♨ الحلقة 88♨
الكاملة وزهرة يصليو عالنبي يبارك ف ذيك الجوهرة لي كسبو.. حفيدتهم لزوز.. زينة لبنات ولالات النسا.. ما حبيبنا من عينيهم لي رح ياكلوها عض شفافو مغزل رح يموت بالفقسة خايف عليها من العين والحسد.. ماتدري شكون يحب ولا شكون يحسدك.. والعين حق ماتخيرش شكون تتحط عليه.. تنطر جبدها من وسطهم قعدو ع أقرب فوتاي يتمتم
أسد: ترصي هنا
أمنية: بحشمة: يوه سيبني شبيك احشم شوي واطلڨني ا نمي مش قداامهم بعد
أسد: هدرت مع رببك تحركي وتشوفي.. عطاها قحرة موت ركحها بيها وزادت تحركت.. كملو لمتهم ع خير وعافية.. ضيفوهم من خيرات ربي.. جاو مروحين.. كبشت فيهم الكاملة وشدتهم للغدا.. تغداو كملو زادو للصالون تحط لاتاي الدڨلة والرفيس قدامهم حلويات ربي تحطت.. تلهاو فالحديث والماكلة لين قطع سكوتهم
جمال: نهار مڨدود كون غير كانت بنت العم حاضرة خلات بلاصتها فارغة
الكاملة: مشيئة ربي ا ولدي ماكرهناش تفرح لفرحة بنتها
سعيد: بقات كون حضرت ماصراش لي صرا من اصلو
جهاد: علاه!
سعيد: كانت رافضة كيفها كيف الأغلبية
سليمان: سايي كلشي تقد درك ماكلاه نتفكرو لي فات
جمال: هدرنا برك ماجيناش نفزدو اللمة
سعيد: احمم صح.. تبسم ع جيهة: حساام واش بطلتي.. خذا إنتباه الكل وحسام اولهم كان لاتي مع أميرتو يعبر ويتغزل تلف لجدو مش فاهم قصدو
حسام: ها!! وش لي بطلت
سعيد: غمزو: مش قلتي خطبة وفاتحة ضربة وحدة.. شهقو كل.. أسد زأر
أسد: واشييااا!! قحرلهم لزوز: شمن فااتحة تا### ماازال الحال عليهاا
سعيد: ماعجبكش طلب الولد وهو قاصد الخير سليمان شايف حفيدك
سليمان: اسد بالعقل ا ولدي نحكيو بالهدن
أسد: وش من ### هدن نسيووتو شرطي قلت يخطبها ومايزيدش يشوفها حتى يعرسو تقلولي يهز عليها لفاتحة تولي مرتو قدام ربي وديك الساعة ماتوقفوش كلمتي
سعيد: علاه معصب زيادة لاتكون ناوي تبطل وتجبد عليه فنص الطريق!
أسد: نفخ بغزول ونقر عالطابلة: عاارف روحي وش هدرت ووش نهدر.. نتا لي فهمنا وش مخي على ماه ناوي ملخر
سعيد: ببراءة مخبي خبثو: غير الخير وش ح ننوي ف رايك
سليمان: صافي بركااونا مالعراك.. حسام وش قولك ا ولدي
حسام: شاف مع الكل ركح ع عينين جدو مضيقهم فيه تاا امشي ع كلامي.. مش فاهم علاه يديرلو هك يخطط من وراه بلا علمو ويهدر عاد يحطو ف وجه المدفع.. من جيهة جدو هو لي صلحلو زواجو.. ومن جيهة حبيبة قلبي مكبشة ف ذراعو وترجف خايفة لاتخرب فرحتها.. تذكر كلامها لبارح وفهم قصدها.. حدسها ف محلو كلمة منو يفسد كلشي ويضيعها من بين يديه.. شاف ف اسد محمر الشوفة فيه ع شعرة ينطق يفسخ الخطبة.. تكبس بكلو شد ف يد شهد يطبطب عليها به تهدى ونطق بثقة ورزانة
حسام: ماكرهتش نهزو الفاتحة.. مي.. حاجة ماتجي بالسيف ومادام خوها ف مقام بوها مش راضي مانسيف عليكم حتى حاجة.. جينا بالخير وباغيها تكمل غ خير.. حتى ترضاو ونهزو الفاتحة مش درك نأجلوها ليوم خلاف
كلامو صدم لكل.. من أسد تكبس ماتوقعش ردو كان حاسبو طايش وبسهولة رح يغلبو.. اما هو ظهر العكس.. بينلو شحال مثبت باغي أختو صح وماعينوش يخسرها.. حسو جدي ف علاقتو بيها وبيهم والأهم تأكد أنو مش متفاهم مع سعيد وحكاية الفاتحة لعبة جديدة منو.. علاش وكيفاه مافهمش.. سعيد تعصب قلبو يضرب بالجهد ضغطو طلع النفس ذاقتلو تكبس بكلو مخبي غشو متحلف ف حسام لاغير ماروحوش يشوف حسابو معاه
مع روحو الجماعة.. وقفت أمنية مع شهد عاونو الخدامات فرزو الحالة بالذمة تعطلت هاربة من أسد.. اما هيهات تهرب مالصيد لي عندها.. دخل بكشاكشو يقلب عليها زاد للكوزينة برك ع يدها جارها وراه.. تتبسل تمثل تعوڨ بتسيتت زعما وجعها عايق بيها طفاها طالع فالدروج عيطتلهم الكاملة زفر بفدة وراحو لعندها
أسد: سربي مزوبين
الكاملة: محتاجة كنتي روح نتا ع روحك
اسد: متلف: حتى انا محتاج كن.. فاق: مرتي محتاج مرتي علاه معيطتلها نتي درك
الكاملة: سيبها تشو.. طلڨ يدها شدتها تكمد فيها عاضة شنوفتها تخزرلو تحت شفارها.. فطنتها الكاملة: ارواحي ابنتي.. مشات تجرجر بقفطانها طايح كثر فلرض ملي نحات للطالون.. توله من الشي أذا قرم ع لسانو بعضة يتحلف ويعاود.. قعدت حذاها والثانية جبدت صرة صغيرة قدها هالقد عطاتهالها: خبيها فصدرك ملي يكون عندنا الزايد ولا تعودي خارجة.. تحميك مالعين وتحفظك لينا
أمنية: تتفحص فالصرة: وشفيها!؟
الكاملة: حباب ملح ع شب ع فاسوخ.. تشيكلة تحفظك من عينين لعباد.. باستها لراسها ودات الصرة لصدرها تمحنت مع الرقبة مزيرة جيهة الصدر ملي تعمر كثر.. خشاتها ف سوتيانتها ع عينين أسد رح يخرجو من بلاصتهم تمنى يكون الصرة ذيك ويغطس فالخير أذاك.. وقفت شافتو باقي ساهي شمرت قفطانها بزوز يدين هاربة قشعها لحقها يجري ويعيط.. ضحكت وعطات الحس لرجليها حتى هي
★★★★★★
لحقها فاول درجة تحنى هزها وكمل بيها لبيتهم يعارك
أسد: ويين هااربة لمك
أمنية: سيبنيي ا أسد نزلني وجعتني.. نفضها عالسرير يعارك
أسد: مااتعقاليش نتي ا### تفرفطي فالسما ماخفتيش طيحيلي فالدروج
أمنية: ماكنتش ح نطيح وأصلا نتا لي جريتي ورايا
أسد: وباقية تحلي في فمك رح نهبل ا الربب العالي.. عرفتو ترون صح ويفزد نهارهم قلبتها دراما شدت فكرشها وطلڨتها ب رغية متوجعة زعم.. مادراش براسو به تبلا جرالها مخلوع يتفتف ف كرشها
أسد: منين توجع فيك هنا؟ هنا؟ ولا هناا!! انطقي
أمنية: هناا(حطتلو يديه لزوز ع كرشها😋): ابقى مركحهم مغص قطعلي كرشي ولادك مرضوني
أسد: ماتتفلايش ع ولادي.. نتي لي جبتيها لروحك واحد ماقالك البسي العالي وطيري غادي وجاي ومكمتلها بالركيض زي لفرس
أمنية: من كلمة ولادي لي قالها بلاما يفيق سهات ف وجههو عضت شفافها حابة تبوسو لين لحق لفرس فطنت تقحرلو: لفرس؟ كملتيها بفرس.. تجيبها تجيبها فلخر تندبلها سعدها بففف.. نطرتلو يديه ووقفت لباس بيها.. عرفها تفيلمي جبدها جات فوق حجرو
أسد: ويين رايحة بكرشك ضارتك
أمنية: رح نبدل به توصلني لدارنا كشما بقا نعاونهم فيه
أسد: بعثت شكون يعاونهم ماتخميش خلينا فكرشك
أمنية: شبيها كرشي؟ بالوقت تحرك البيبي خلعهم لزوز
أسد: سخر يدو: تحركت
أمنية: شكون بنتك؟
أسد: اممم احمم
أمنية: باست شفافو وبعدت: زيانيت وشهوتي جات عليك باينتها بنت.. مي حاس أنو ولد ماعرفتش علاه
أسد: مسح لحيتو: وش حاب تهدري ملخر
أمنية: بالاك عندي توأم
أسد: تكبس وكبسها بلاما يفيق وجعها ف حزامها نحاتلو يديه ووقفت حبسها: شوفي طبيبة تاعك تعملك رونديvو ليامات هاذو ديرلك فحص شامل
أمنية: طفاتو: رح نلبس مانطولش عليك.. زادت للدرينسڨ بخطوات متثاقلة مش عارفة علاه تهربت منو والأصح خايفة مش منجمة تتوقع ردة فعلو.. بدلت قفطانها لبست واحد فالبلون كاسي ريڨلت شعرها لمتو بطريقة عشوائية لفوق وشدتو ببروش.. عملت مايك أب جديد.. برفنت لبست دومي طالون هزت لبواط كادو لأية وخرجت مالقاتوش عرفتو سبقها.. نزلت لتحت لقاتو يحكي فالتليفون مع شافها كوپا هزها وحطها هاز حاجبو
أسد: علاه معرية راسك
أمنية: هاا!!
أسد: الشال تا قبيل وينو علاه مش حاطتو ع راسك
أمنية: الشال أسوغتي مع القفطان أذاك وأصلا كنت بردانة قبيل
أسد: ودرك ماكش بردانة خارجة هك براسك عريان كون يلهفك هوا
أمنية: مايلهفنيش مانيش باقية فيه خطوة منا للوطو ودارنا صغيرة سخونة
أسد: هز لبواط: تحركي لملي روحك مانيش نشاور فيك.. جات تحكي حمر عينيه معاها.. سكتت تعض فشفافها معصبة وجات طالعة حبسها: وماتجينيش ب طالون ترعشي لانحلف عليك والله ماعديتيها.. شهقت غمزها وخرج يزفر واثق من روحو ركب فاللوطو.. 5د دقايق طلعت عملت وش طلب وخرجت عندو.. ركبت وخبطت الباب معصبة
أسد: لاجاك فالطريق ڨلعيه.. خنزرت فيه تبسم زاد فقسها كثر عضت يدها تتحلف وتزيد.. حرك لوطو زايد لدارهم.. دقايق وصلو.. سبقتو لداخل غير لحقت للصالون رمات الشال بغش وتنهدت رجعتلها الروح
رحمة: شبيك
أمنية: سلمت عليها: شي احمم وش مازال يندار
رحمة: كلشي واجد يعطيه الصحة راجلك بعثلنا البنات اذوك عاونيني فكلشي
أسد: بلا مزية مني كشما يخص قولولي
أمنية: تمتمت: ياحنَين معاه حنين ومعايا تقرص.. سمعها غمزها وتبسم ضحكت رحمة.. أمنية حشمت وسرسبت من تم.. دخلت لعند آية.. والثانية شعلت فيها
آية: درك باه جاية كون جيتي معاهم خير
أمنية: طارت معاها بقرصة ليعتها: عصبني أسد ماتزيدينيش نتي ماتاكليش روحك بعد ساعتين به يجيو الجماعة
آية: حاستها مغشة حضنتها وطارت ع خدها ببوسة تتسيتت: شبيها مُنْمُن شكون قلقها
أمنية: خطيك مني خلينا فيك امشي نوجودك
★★★★★★
ع دخلتهم للصالون شعل فيه بالعاراكات ماخلا ماقالو عارك حتى طلعلو الضغط رجع يرجف جرا ليه جمال قعدو عالفوتاي
جمال: تهدن ا بابا لا تطلعلك لاطونسيون
سعيد: خليها تطلع بالناقص من حياتي حد ماسامع بيا
حسام: هذا كل خاطرني مامشيتش معاك فالخط
جمال: اسكت يسكت حسك
حسام: مانسكتش وااش بغيتوهم يبطلو مايمدوليش الطفلة
سعيد: هذااك وش هاامك كون تبعتني يوالفقو بالسيف ورجلو فوق رقبتهم يحسابلك بالساهل يرفضو بعد مامدوها.. لاطاحت كلمتهم اطيح هيبتهم ومحال يسمحو بالشي هذا
حسام: ضو ضرب فيه.. كلامو جدو صحيح كيفاه ماعملش حساب للشي هذاك علاه مامشاش مع جدو كون وقف عند كلمتو راهي مرتو قدام ربي وقدامهم.. سب روحو وكبس بونيتو: مي نتاا ماقلتيهاليش مااقلناهاش للجماعة قبل كيفااه صدمتي عليهم وباغيني نمشي معاك فالخط
سعيد: خاطرك ماتخممش زي زي بووك البوهالي لخوه كوون ما أنا واقف عليكم كلااوكم لكلااب
جمال: باابااا
سعيد: اسكت مافاحل غير فالصهيل والتمرعيش عليها جاا الطفل زيك
حسام: وهو منين جابها! قحرلهم لزوز وتعدا علليهم طلع لبيتو
سعيد: شاايف شاايف تربيتك تفوو ع الزريعة المرة مارحبنا منها والو
جمال: لعبت عليه الدوخة.. ظاهرو كثر حلاوة والسكر تاعو مش مريڨل ليامات هذو.. طفا بوه خلاه وطلع لبيتو
... دخل لبيتو معصب.. بقى رايح جاي ينفخ ف دخاخينو.. قلبو واجعو ومخو تعب من كلشي.. سب راسو فرصة جاتو وضيعها كون راهي ملكو درك.. ترما عالسرير هز تليفونو رح يعيطلها صهدو زمان يخزر رقمها.. نفض راسو من أفكارو الخايبة وعيطلها.. هزت بالخف.. مع جاه صوتها نسا كلشي وتحل فالعريض فرحان لفرحتها.. داوها حكي ساعة كاملة لين جبدتلو الsjt هذاك
شهد: مي ماحكيناش فالفاتحة علاه جدك جبدها
حسام: خربق شعرو: ماعلاباليش بيه كيفي كيفكم ماكانش عندي علم
شهد: كنت خايفة تسايرو يجنو خواتي ويفزدو الخطبة
حسام: تهناي مانعملش حاجة تضرنا
شهد: عجبني ردك خلاه خلاه يسلملي حبيبي الفهمان
حسام: صرا خير مهم نتي معايا تضحكي وهذيك فرحتي.. ليوم غدوا ولا بعد أشهر نتي تاعي ليا ليا ماعندك علاه تخافي اضحكي وافرحي ليوم بالذا.. نحبك زاهية
شهد: تأنا نحبك
حسام: وأنا نحبك كثر
ع صوت كلاكسون (أمان يزمر بلوطو) تنطرت واقفة تنكز مخلوعة
آية: يااا جااو.. جااو يااربي جاو
أمنية: حبسي تمرعيش خليني نركبلك الشافر
آية: نقلك جااو ياا بني جااو راهم هناا
أمنية: هههه اركحي ا فرس لي يشوفك يقول عشقانة السيد طايحة لووv فيه
آية: ركحت ترمش بحشمة: راهم جاو مش بكري شوي
أمنية: لملهوف تااعك ا ختي sure ماقدرش يصبر.. اجي هنا نركبلك الزمر أذا.. قعدتها ف بلاصتها.. قاداتها شوافر زادت Aي لاينر فوقهم: نمشي نستقبلهم درك موااح
خرجت للصالون لقاتها عامرة.. الكاملة شهد.. زهرة ومليكة.. حورية وسارة.. والرجال زادة سلمت عالنسا رحبت بالرجال وجات حذا امها عاطيتها للتمرحيب الضحك والتوانيس فرحانة لفرحة أختها.. نطق سليمان
سليمان: دايمة لمتنا نشاء الله
لكل: آمين
سليمان: جيبو البنت نحكيو قدامها.. وقفت أمنية وياسين لعند آية.. دخلو قابلتهم واقفة فوسط بيتها ترجف.. قربت منها أمنية حضنتها بالقاوي
أمنية: فرحتلك بزاف بزااف ربي يهنيك نشاء الله
آية: آمين ويهنيك زادة
ياسين: بعد أمنية وجبد آية لصدرو: وأخيرا جاا لي يعقلك ويهنيني منك
آية: ههه مازلت باقية حذاك ماكلاه تفرح باطل
ياسين: هههه عارف نتمسخر برك.. علابالك مانيش ساخي بيك رح نتوحشك بعدما تزوجي
أمنية: جبدتهم لصدرها: ربي يخليكم ليا ونشوفكم تضحكو ديما
لزوز: ويخليك لينا ا الغالية.. حلت الباب ودخلت دمعو عينيها ع شوفتهم فحضن بنتها لكبيرة.. قربت منهم وضمتهم بحالتهم أذيك تبوس فيهم بالواحد حتى ضحكو كل
رحمة: باست راس آية: حمد الله لي عشت وشفتك تتخبطي ورح تولي مرا وديري دارك
آية: باست يدها وراسها: ربي يخليك تاج ع روسنا يا أحلى ام
رحمة: لزتها لصدرها: آمين ا بنتي آمين.. احمم خلينا نخرجو طولنا ع الجماعة.. سبقتهم خرجت.. آية شدت ف أمنية وياسين وخرجو للصالون.. نزلت راسها حشمانة وفات تسلم عالجماعة بالواحد من تلفتها لحقت ل خليل سلمت عليه حتى هو.. ترشقو كل بالضحك وهو أولهم.. ماهي ماتت وفضت تمنات تتبخر ولاتغلط الغلطة ذيك.. حشمت وجات تهرب سبقتها يدو جبدها قعدها حذاه وهمسلها
خليل: شديتك ماعندك ماتروحي مني
سليمان: ايواا بدينا وع النبي صلينا
الكل: عليها الصلاة والسلام
سليمان: تسمحيلنا ا الحاجة
الكاملة: الولد ولدكم زيد كمل برك
سليمان: ربي يبارك فيك.. احمم تلمينا ليوم ع بركة الله طالبين يد بنتكم آية لولدنا خليل ع سنة الله ورسوله واش قلتو
خليل: أنا قابل وهي قابلة.. ضحكو كل
سعيد: عوايدنا وتقاليدنا رح تعفسو ع عراف جدودنا؟
جهاد: حاشا لله.. متحمس برك ماتلوموش عليه
سعيد: احمم بنتي آية قابلة؟
آية: شافت معا الكل تحت شفافها وزاد ليه غمزها وعض شفتو زمت شفافها تمتم: ساقط مايحشمش.. وتوتتلها أمنية
أمنية: ردي شبيك خلعتي الجماعة
سليمان: حشمتو البنت يقولو السكوت علامة رضى
سعيد: لازمنا نسمعوها بالاك مش قابلة.. شافولها كل تربثت كثر نزلت ع يديها تفرك.. أمنية حطت يدها ع تعها وطمنت بعينيها
آية: جبدت نفس قاوي ونطقت
★★★★★★
آية: : جبدت نفس قاوي ونطقت: قابلة
خليل: وأنا قابل.. ألف مبروك علينا.. جبدها لصدرو وباس راسها بمعزة.. ضحكو كل
وفقو سلمو وباركولهم بالواحد وغرقوهم بلي كادو
سارة: ألف مبروك ا مرت خويا
آية: عيشك
شهد: حضنتها: فرحتلكم رح نعقبو وقت يهبل مع بعضانا
آية: نشاء الله
خليل: جبدها من وسطهم: كل وحدة تتهز لعند راجلها سيبولي خطيبتي.. ضحكو عليه وراحو
أمنية: حلت لبواط: لبسو لخواتم وش تستناو.. تبسمو هزوهم لبسوهم لبعض بالدالة.. جات تسل يدها من تاعو سبقها شبك صباعيه مع تعها وجبدها عندو.. عيات تجبد ف يدها حلف لاسيبها
خليل: غير اركحي مش رح تتفكي مني ا فرخة
قاعدة حذاه الحشمة قاتلها منزلة راسها وتتبسم لتحت تسمعلو يتغزل فيها ويتبسل مرة ع مرة يعلق ع وحدة مالبنات.. شهد نعامة.. سارة مصفارة.. أمنية دلاعة.. شدت ضحكتها بالسيف
آية: ماتتلمش نتا درك ولا كيفاه
خليل: تعرض عالفوتاي حال رجليه شوي حاط يدو ورا ظهرها: لاا درك وين بديت نتحل فالعريض
آية: يخخ عالشيب ظهر شيعة برك مش مالحكمة
خليل: تبسم خربق شعرو: خرجلي الشيب بعد ماعرفتك.. ينبت بالسيف عملتيلي لعصاب
آية: زغدت حواجبها: تستاهل شح مح
خليل: مقبولة منك.. قرب من وذنها يهمس: بصح جيت فنة باللبسة ذي.. خرج معاك التقليدي
آية: تزنكو خدودها: نجي زينة بأي حاجة نلبسها
خليل: هههه خلاص الالة عرفتك شكارة راسك.. قحرتلو شاخ خليها كثر
كسر لمتهم تليفون سعيد لي صونا كثر من مرة.. وقف ع جيهة يحكي شوي تكبس عقد ملامحو هز روحو وخرج ركب فلوطو وزاد من تم عيطو مايردش عصبو رما التليفون وشاور للشوفار يزيد فالفيتاس يلحقو قبل مايفزد كلشي.. فنص الطريق صونا تليفونو هزو بزربة
سعيد: ينعلل طااسيلتك علااه مااتردش علياا
جعفر: ماتضيڨش فيا حتى نتاا طفيتني بزااف
سعيد: خلااص بلع.. ويينك درك
جعفر: جاي لقصر نتا وااين؟
سعيد: عندك نلحق برجليك عتبوه نقطعهملك
جعفر: ماتهددنيش تعرفني ماانتهدد
سعيد: مااكش خايف مني
جعفر: نتا لي لازمك تخاف لااحليت فمي وهدرت لي عندي رح يطير رااسك
سعيد: وراسك.. اسكك ينعل الساعة لي جبتك فيها للدنيا تفووو.. نلقااك ف الدار عند أمك.. كوپا عليه معصب وضااڨ فالشوفار زاد فالفيتاس
ف جيهة خلاف واقفة قريب مالقصر تستنى فالخدامة تجيها.. حارزة جنابها خايفة لايشوفها شي حد.. تهزت ع يد تحطت ع كتافها تلفتت بالسيف تترعد حسبتهم شدوها.. مع شافتها تنهدت من عروش قلبها وشعلت فيها
دليلة: الله لاتربحك ركبتيلي الما ف رجليا
خ: آسفة ا مدام ماكنتش قاصدة نخلعك
دليلة: بركااي مالهدرة.. جبتي وش وصيتك
خ: لاحت يدها لصاكها جبدتلها ساشي مدتهالها
دليلة: خطفتها بزربة حلتها شافت وش فيها وتبسيمة عريضة ترسمت على شفافها: مليح كشمن لحق عليك ولاشافك ونتي خارجة
خ: لا مي..
دليلة: فزتها: وااش انطقيي
خ: وش ح ديري بهذوك
دليلة: دزتها وهزت صبعها تهدد: مادخلكش درتي لي عليك
خ: طالبة سلامتي وقوتي بلييز ا مدام ماتجبدنيش فالحكاية ماشفتك ماشفتيني
دليلة: تهناي مايفيق بحتى حاجة شدي الدراهم اذم مشي بيها روحك أيامات حتى نرجع للقصر ونرفحك بالڨدا
خ: خطفت كمشة الدراهم عينيها قلوب: عيشك ا مدام ربي يخليك لينا لا حتجتيني اطلبيني خدامتك وندير وش تحبي
دليلة: هانية غير اضربي السكات برك ونغرقك فالخير.. خلاتها وزادت تزرب تتبسم بخبث
شاف مع الحضور ضاحكين.. النسا عاطينها للتوانيس وهذي تشكر ف هذي.. أمنية وسارة ڨارنين الراس للراس ويحكيو ع مخاوفهم.. الحمل رجالهم وحكايات العيب.. واش يناسبهم ويناسب لي ف كروشهم ووش لازمهم يبعدو عليه.. دخلت عليهم شهد وإكرام (صحبة آية) ب سينيات الضيافة.. سرباولهم بالواحد لين لحقو عندو.. مدتلو شهد فنجانو وغمزت لآية لوحتلها بوسة فالهوا تشكر فيها.. خليل ماحس بوالو نزل عالقهوة ترشف أول مااستطعم مذاقها تكبس بكلو.. شاف مع ختو لاعبتها خاطية.. زاد لآية تتبسم تحت لتحت عرفها مولاتها.. برد راسو وصرط لي ف فمو بزربة.. عينيه حمر ريقو نشف فمو وزوز لحرور ليعتو
★★★★★★
ملح ع فلفل ع قارس.. رعشة سرات ف بدنو.. نزل ع كاس الما شربو دقة وحدة مارتاحش زادلو الثاني وختمها بكعبة بقلاوة مقطرة عسل.. سرطها عاد رتاح لاح يدو لحزامها جبدها ليه يهمس متحلف
خليل: رح تخلصيها ا فرخة
آية: ههه وش نخلص
خليل: باس رقبتها: نتي وأنا عارفين
آية: بورشها عنكشت رقبتها: مادرت والو كشما تحركت من بلاصتي
خليل: ماتحركتيش بصح خليتيهم ينفذو.. قلبتي أختي عليا
آية: تفاهمنا ورح نتفاهمو بزااف منا وجاي
خليل: فردة ولقات أختها فراسات ربي يعيننا عليكم وفرات.. ضحكتلو بإنتصار.. ردهالها ونطق بصوت عالي سمعوه كل: مادام مازلنا هنا حبيت نديرو حاجة
الكاملة: وش هي
خليل: نقراو الفاتحة.. شهقو كامل تلفت لآية ترجف حذاه غمزها يتبسم بتسوميم يفقس فيها
سليمان: إييه علااه لا.. ماكانش مانع عند الجماعة.. شاف ف رحمة لي تخزر ل بلاصة بوها لفارغة حوست بعينيها ع وجه جمال مالقاتوش ظهر روح.. ركزت عينيها ع حسام خزرلها ندرا زيماه وهزلها راسو بإيه.. تنهدت وردت
رحمة: كأنها مش وقتها يعني لبنت مازالت صغيرة
خليل: ماقلتش نهزها من درك.. قلت نقراو الفاتحة نرجع محلل عليها نشوفها ونشوفكم بلا إحراج هذا ماكان
حسام: عداك العيب هذا الصح به ماتلحقكمش مشاكل بعد كل مرة تتلاقاو فيها
خليل: مانيش صغير ا صاحبي لبنت شرفها من شرفي وحاجة ماتلحقها.. حبيت نتممو لمتنا بفرحة مدوبلة هذا ماكان
سليمان: كلامك صواب
أسد: لهدرة مع البنت لامش قابلة ماعندو علاه يزربها
جهاد: ايواا وش رايك ا آية
رحمة: ساماتها وشدتلها يدها: سقساوك وش جوابك ا بنتي
آية: .... ساكتة تقلب عينيها بين الحضور.. ماكانتش متوقعة لخطوة ذي
أسد: باينتها مترددة خليوها ع راحتها ماتسييفوش عليها
خليل: دك نحكي معاها.. شد فيدها وجا يوقف ردو ياسين
ياسين: احكيو هنا قدامنا ماتضغطش عليها
خليل: تحت سنانو: يااسين
أسد: خلييل.. شافتها حمات بيناتهم ع شعرة يشدو رقاب بعض ترشڨت
آية: خلااص حبسو أنا موافقة
الكل: ع وااه
آية: نهزو الفاتحة
خليل: بفرحة: هااي قابلة نتم برك لمخلوعين.. ضحكو عليه كل.. هزو يديهم قراو الفاتحة للخر.. مسح وجهو تلفتلها مزالت هازة يديها.. جمعهم عندو باسهم بالوحدة شد وجهها بين يديه وباس راسها بمعزة: ألف مبروك.. علينا.. عليا بيك ا مرتي الفرخة
بعد ماتفاهمو عالشرط العقد والعرس لي يديروهم بعد ماتخرج الريزيلتا تا لباك.. بقاو ملمومين يتوانسو حتى فات الوقت وصار لازم يمشيو لقصر سليمان يحضرو لخطبة أمان ومهى.. هزو بعضهم وراحو مجمولين
دخلت للصالون شادة فذراع أمها فرحانة الدنيا مش ساعيتها.. وأخيرا فرحتها كملت.. أمها حذاها فأهم يوم حياتها.. ليوم لي تتربط فيه بحبيبها حب طفولتها.. تسمع فالهدرة والضحك ماشي ويقوى.. مع كل خطوة تعملها تقرب للصالون قلبها يدق بالجهد حتى لحقو للصالون.. ع دخلتهم عم السكات وتلفتولهم كامل.. واقفة ترجف بكلها مكبشة فدليلة لي عينيها قلوبة تضحك من قلبها قدرت تدخل للظار أذي من جديد ولحقت دير وش قاللها راسها.. مهى منزلة راسها عينيها فارض مانجمتش تهزهم.. حشمة كبيرة نزلت عليها والسر.. فطنها صوت الزغاريت شهد و آية زعزعو القصر قاصدينها.. البقية هزوها بالتباريك الصلاة والسلام على النبي.. هزت عينيها بالشوي بانلها جاي قاصدها بكل اناقتو ووسامتو.. لابس كوستيم فالبلو مع شوميز بلونش بارفانتو من أرماني لي تعشقها.. مرجع شعرو مع خط التحفيفة مزينو.. لحيتو محصورة وجهو ضاوي.. نافخ صدرو عضلاتو مفتولين باينين.. متبسم شطر وعينيه قلوبة عليها عاجبتو عراها بهزراتو.. غرقت فبلاصتها بالحشمة.. وقف مقابلها تحنى ع وذنها همسلها
أمان: جيتي ت*** العقل وش يصبرني عليك.. هزت راسها عينيها طاقة.. غمزلها وعض شفتو يتغزل فيها كمل ع مابيها.. ضحكو عينيه عاجبتو وقت تحشم وتحمار.. شدها من أمها شبك يدها ف ذراعو.. رجع بيها للتصديرة صدر الصالون ومجلس العرسان زعم.. قعدو بالوقت نطق أسد
أسد: آخر العنقود مزروب خلينا نفرزوها بالخف
أمان: يسلملي لي يفهم حكيتي المفيد ا كبير
سليمان: ع بركة الله ابداو
أسد: تلمينا ليوم طالبين يد بنتكم مهى لولدنا أمان.. واش قولكم قابلين تمدولنا البنت
عم السكات بالعاني يلعبو ع أعصاب أمان لي كبس ملامحو.. كسر السكون صوت فالباب يحك ف عين ويقحر بالثاني
جواد: شمن يد ورجل.. حد مايدي حد بلا شواري.. ترشقو كل بالضحك
★★★★★★
دخل بوهرتو كوستيم نواغ صغرونة مفصلة بدنو.. شعرو مشوك بالجال مهزوز مبينلو وجهو حروفو مقدودة فوسات فالخدود حفر الزين يا ديني مع ضحك بانو حلاوه كثر خلاهم يضحكو لضحكو بالسيف.. واقف ف نصهم يد ع حزامو والثانية ف لحيتو يحك هاز حاجبو مخنزر
جواد: حد لا يتحرك حد لا يوافق نحاسبكم واحد واحد.. شاف ف حسام وشهد.. زاد ل خليل وآية: منبعد نتولاكم نتم
حسام: شووف الفصعون
جاسر: سمرة لمي ولدك يا يطير راسو
سمرة: هزاتو فرفط كبست عليه عندها: هههه شديتو كملو برك
أمان: شكون كان يهدر تهدرو ولا نهز البنت ونطفش وااصلتلي للقرجومة.. ضحكو كل
أسد: احمم طلبنا يد بنتكم مهى ل أمان.. قابلين
جواد: لااا مانيش ولله ماقابل حتى هي ماتقبلش وااش كنتو رح تزوجهم كامل وأنا راقد لاشاورتوني لا وكلتوني بقلاوة وڨاطو وااش عدوكم أنا عدوكم
أمان: كابس بونيتو: اعلفوو الطفل ا الرررب العالي خليوني نتهنى حررااام عليكم
سارة: وقفت: عطيهولي نمدلو وش حب
جاسر: قعدها معصب يهمس: اهمدي عندو أمو
سمرة: عيشك خليكي مع الجماعة دك نجي.. مع حطتو ملص منها وهرب لعند سارة ترما ف حجرها يضيحك
جواد: قاعد عند طاطا سوسو جيبي هنا
جاسر: فز من تم.. زغدلو راسو بلا شد وجه سارة بزوز يدين وتلاح عليها ببوسة طويلة عريضة.. خلات جاسر يجن قشعو مالكروما هزها فالسما: ليووم نقتل عزريينك
جواد: مخطوف: علااه شعملت بستها برك
جاسر: برك!! نستناك حتى تعمل ما كثر منها تڨعر ا @@@
جهاد: جااسر لم فمك.. قحرلو جاسر.. سارة وسمرة عرفوها حمات ادخلو سمرة دات ولدها وسارة هدنت جاسر.. تلهاو كل مع الأكشن نساو الكوپل عرساننا جاو يتلفتو ليهم لقاوهم ركبو الخواتم ووصلو للبوسان رغا جواد
جواد: عييب عييب رااح يدييرو العييب انندب ا شومي هالعار او مااي ربيي سيدي وين احترام الطفولة وين البرااءة.. ترشقو بالضحك كامل.. والكوپل تعنا مات فأرضو مهى خشات راسها فصدر أمان حشمانة.. وهو يضيحك ضخكة صفرة ومحمر شوفات مع جواد لي يعملو ف شح مح بيديه وحواجبو
فاتو داك الجزء قابلة قابل قابلين ربي يباركلكم ويهنيكم.. سلمو وباركولهم واحد واحد وردو لبلاصتهم
سليمان: ياك ماعندكش مفاجآت نتا ثانا
أمان: كاستيون تاعك مايحتاجش سؤال أكيد عندي مفاجآت.. جبد تليفونو عمل إتصال 5د دخل الڨارد براجل من لبستو باين لعدول شهقو كامل وهو ضربها بضحكة قتلهم بالبارد وقف يتعرض دافع صدرو خمس مع العدول رحب بيها وقعدو
سعيد: وااش لي يصراا وش قلت الضرافة هذي ولييتو تعفسو ع هيبتنا هك
أسد: وش لي وش! وش قلقك نتا من الأساس رح يعقد ع البنت لي خطبها مش أي حد.. بوم قفصفو سعيد حط قلوة في فمو ومازادش حلو
سليمان: وااش كنتو عارفين
جهاد: شاورني قبل مايجيو
جاسر: معصب: وعلااه ماقلتيهاليش
جهاد: علاه نقلك.. مدي أختك لي هي بنتي مش أي حد
جاسر: تغشش هز روحو وقف: هاي ليكم مالا ديرو لي بغيتو كي عدت أنا خوها الوحيد مايهمش رأيي تسمى مايهمش وجودي حتى هو.. خليتهالكم.. ثار بوه وجدو يعاركو يعيطو عليه مالتاش بيهم كمل طريقو جا خارج لحقتو سارة فالباب جبدتو ع جيهة تهدي فيه وتقل
لعدول: كاينة مشكلة
أمان: لا اصبر غير 5د برك.. سمرة جيبي لاكارت تا مهى ووراقيها اللازمين
دليلة: خليها دك نجيبهم أنا.. وقفت تتبختر نافخة روحها خشمها فالسما تفقص ف رحمة زعم ملي جات وهي محكوكة عليها كرهت شوفتها.. ماهي مش شايفتها أصلا عاطية التيقار والوقار لعمرها مسامية الكاملة يتوانسو ضاحكين للوذنين.. خرجت شافت ف سارة وجاسر يهدرو تبسمت بتسوميم وكملت طلعت لفوق شافت خدمتها
جاسر: ماتقوليليش تهدر من نهار نهاري ساكت لدرك وااش بغااو ينزلو ع ### الزلط داخل خارج علينا واكل شارب وضاحك قال طالب البنت ضربت قلوة لفمي وسكت ع جال لكبار ودرك جااي مالتالي بغاا يضرب العقد ديرااكت وااش مزربو لاا كلاه### يخبطو فالحيط وش يست.. صبرت صبرت لين كفرت ماشي ويعلي ف صوتو خافت يفضحهم لين لحق للكلمة ذي ماخلاتوش يكملها تلاحت ع شفافو تبوس سكتتاتو بمعريفتها
★★★★★★
صدماتو بعملتها كان معصب عاد جهل من تصرفها.. كبس ع حزامها بزوز يدين جبدها ليه لين حست بمتاعو مكبوس يقيس ف حزامها.. ونزل ع شفافها يبوس ويعصر برد غدايدو فيهم.. ترخف ت مطاوعتو لين حست بيه وصل للطوپ سايي مابقاش فيه ويقلبها طرح وااعر خافت شي حد يلحق بيهم فالوضع الحامي أذاك.. جبدت روحها كبسها حاط جبينو ع تعها ينهجو لزوز
جاسر: ترصي
سارة: مزنكة منزلة راسها عينيها مغمضين: سيبني كون كشمن يشوفنا هك
جاسر: ي*** مانسمع بحتى عربي
سارة: شافت فيه مذبلة عويناتها: نحكي وسمعني بلييز ع جالي سمعني
جاسر: اهدري نسمع فيك
سارة: ماطلبش لحرام طلب المعقول وأمان منا وفينا خليهم يكملوها ع خير بلييز يزيي ماتشنشفو
جاسر: ماقلتش مايديهاش قلت علااه ماخبروني ماشاورونيش رجعني طحاان وسطهم بعملتو أذيك
سارة: حاشا لا تكون هكاك ولا ينجمو هم ولا غيرهم يردوك هكاك علاه تحكي هك يهديك ربي
جاسر: خليني علييك بعديي
سارة: كبشت فيه: وين رايح هياا خلينا ندخلو نحضرو معاهم
جاسر: مانحضر ما### سايي يكملو بلا بيا وليت خضرة فوق عشا
سارة: دمعت: علاه تحكي أكيد موراه شي مووحال يقصد يهنيك ولا يقلقك هك
جاسر: مات*** مخي بهدرتك علااه اختهم مامدوهاش مامپا خلاوه يهز الفاتحة وختي زاربينلها واش حلهاا ولااا شفو كرشها لفمها.. شهقت وهو حل عينيه ضو ضرب ف مخو لاتكون هدرتو صحيحة جمع بونيتو وجا داخل لقا أسد وحسام ف وجهو
حسام: تهدن ا صاحبي خلي الفرحة اتم
جاسر: قيل ### بعد من قدامي
أسد: شدو: ماكان والو ملي يدور ف مخك المن*** أذااك ماكلاه تفزدها بهبالك
جاسر: دزو: لهدرة مش معاك معاه لهدرة مع ال@@@ وأختي
حسام: دزو: شبييه ربك ميبس مخك تقوول حيط واا اافهااام ع السيد بغا ختك ونواها ليه حلالو قدام ربي وعبادو.. ماكفر ما دار لحرام
أسد: لا مش موافق نتا قولها ويتأجل مش تدخل ب### فمك تخرج خرا مخري وتفزدلهم ليلتهم
جاسر: أكيد داروها بعدو من ### وجهي بعدو ليووم ن***هم بطريحة لزوز.. شدوه لزوز عياو ما يركحو فيه مات وكفر.. لين وقفت عليهم دليلة
دليلة: شبيكم وش صاير
سارة: والو ماتخميش
دليلة: بلعي فمك شكون هدر معاك نتي.. نحكي مع لزوز اذوك لي شادين ولدي.. نطرتلهم يديهم: علااه شادين فيه
أسد: حكاية بيناتنا حنا الرجال.. ادخلي مالصباح يستناو فيك.. صفارا تخلخل وجهها
حسام: هزها وحطها: طولتي منين كنتي تجيبي فيهم
دليلة: هاا كنت كنت.. احمم بعدو خليوني ندخل ومام انتو الحقوني.. زربت دخلت والبقية دارو ب جاسر كلمة كلمة مات وكفر بالسيف مارضا يدخل.. هكاك ودخل معاهم مكره قعد فبلاصتو سارة حذاه توتت وتهدي فيه لا يدير شي زبلة
لعدول: يقلب فالورق: قريتو الفاتحة وتفاهمو عالشرط؟
سليمان: لا مازال
لعدول: بلا الفاتحة ماينجموش يعقدو قانوننا هك
جاسر: ع شوفة عينيك ملهوفين ا خويا
جهاد: قحرلو: عارفين دك نفرزو كلشي تلها بالورق برك
تفاهمو عالصداق والعرس يخليوه منبعد.. هزو يديهم قراو الفاتحة وكلشي يدعيلهم بالخير العافية والهناء حتى كملو.. نطق
العدول: تجمعنا اليوم انشاء الله باش نكتبو كتاب هادو الزوز لي نواو الحلال ع بركة الله بدينا.. سي أمان بن قاسم القاسي.. هل تقبل الزواج مهى بنت جهاد بن سالم؟
أمان: خزرلها باقية مصدومة دور فعينيها عليه وعالبقية.. غمزها متبسم وباسلها يديها: اكييد قابل.. قحرلو مالا علاه جايبك وش باقي تتبسل هنا لخص
لعدول: بزربة: مهى بنت جهاد بن سالم قابلة تتزوجي أمان بن قاسم القاسي؟
مهى: سكتت مصدومة جاها كلشي ع غفلة حسبتها خطبة قرك.. حتى كملتلها خطبة فاتحة وعقد.. رح تولي مرتو شرعيا ورسميا... تخلطو أحاسيس جاتها بكية ع فرحة قابلتها تنوض تهزها بتزغريتة ماقدها قد توصل لماكل ديار قريتهم تقوولهم.. واا دييتو دييت لي بغييتو موتوو لابغييتوو.. سهات ف حرتها وسكوتها لعب ع اعصاب الغاشي.. لكل ستناو درها وهي غايبة عالواقع ترفعات لعالم اخر.. تفكر وش تشرلي لعرسها وش تغيط وش تلبس كيفاه تفوت الليلة ذيك زعما تحمل من اول ليلة ولالا! قداه تجيب ولاد ووش تسميهم.. تفكيرها رجعها لذكرياتها معاه من اول نهار شافتو من صغرهم.. وكيفاه حبها وحبتو بعد مكان يضربها ويتبسل عليها(ضرب الحبيب ولا زبيب ا حوجي ياا تنادبو معايا😭تفوو عالزهر شعر😔) فطنت ع قرصة عطاهالها للجنب ليعها بيها.. وكلمة لعدو
لعدول: موافقة؟
مهى: تبسمت عويناها لي يبرقو فرحة ووجعة القرصة فنفس الوقت تركزو ع أمان شافت فيه بحب تتأمل ملامحو لي عشقت وباقية تعشقهم وكأنها اول مرة تشوفو.. حمدت ربها وشكراتو ف سرها لي رزقها بيه وخلاها تعيش اللحضة ذي وتذوق فرحتها.. هزات راسها بثقة وبدون تردد ردت
مهى: أكيد موافقة
★★★★★★
بعينين دامعين وقلب متوجع شادتو غصة طلقت حلوقها وضربتها بتزغريتة زعزعت بيها القصر وهزتلهم قلوبهم.. فرحانة لبنت خالها وفنفس الوقت موجوعة للفازة ذيك.. حست بالشماتة والقهر موش غيطتها ولاحاسدتها لا بالعكس.. مي ذيك الوخزة لي فقلبها وجعتها كثر تبقى بنت وتاهي تسخف.. علاش باه فايتتها مهى حتى تصحلها فاتحة وصداق فنفس الوقت وهي لا.. زعما لأنها غلطت ودركا ربي يحاسب فيها؟! زعما لأنها سلمت ل حسام روحها وبدنها شحال من مرة ومزية هو ترزن وحفظها.. شافت فالكل وفيه هو بالذات لي تكبس فاهم وحاسس بيها.. بالوقت طاحو دمعاتها زرب خرجت وتفلقت بالبكا مخليتهم وراها يباركو فيه ويهنيو كلشي ضاحك وفرحان بخلافها هي تبكي.. تلفتت ع يدين تحطو ع كتافها مع دارت تصدمت آخر حد توقعاتو يحسابلها حسام.. ظهر أسد.. من غير مايحكي ولا يقول حرف جبدها لصدرو وحضنها بزوز يدين مخليها تبكي وتبرد قلبها.. بكات سيلت عينيها ووجعتلو قلبو جبد روحو منها هزلها راسها مسحلها دموعها
أسد: فهميني علاه تبكي درك
شهد: مانعرف
أسد: مافرحتيلهمش
شهد: بزربة: بالعكس أمان خويا ومهى اختي وأعز علاه مانفرحلهمش
أسد: علاه الدموع مالا؟ وماتقوليليش فرحة! ماهمش دموع فرحة برك
شهد: كيفاش عرفت؟
أسد: ضرب راسو فتعها بالخف: لأني خوك ولا ناسية
شهد: هاربة من عينيه: س. سخفت.. تمنيت حتى أنا يصرالي كيفهم
أسد: وش تمنيتي؟
شهد: الفاتحة.. العقد.. حبيت علاقتي تقوى كثر وترجع علانية أكثر
أسد: سكت زمان يجمع ف حروفو ويخير فيهم.. حب يقلها خايف عليك منهم عليها نعطل فكلشي.. حب يفهمها أنها عزت بيه ومش بالساهل يتعود ع غيابها.. حب يوصللها فكرة أنها منو أنو بوها مش غير خوها ف كيفاه تحبو يمدها بالسهولة ذيك.. أما هو وين.. ولي حب يقولو وين.. هرب حروفو ورا جبروتو وقسوتو للمعتادة.. كيفاه يعبرها وهو بالعادة كلمة وقص لا ثاني لها.. صعيب يكسر ذاك الحاجز لي منعو يحكيلها شحال يعزها وشحال عزيزة عليه.. وبين قلبو وعقلو حرب.. رااء توسطت ذيك الكلمة لي تعبر عن احساسو ليها.. أخ اختو.. وآااه من ذاك الحضن ماأحنو.. تبسملها وعينيه لمعو ببريق أول مرة تشوفهم بيه: كلشي بالمكتوب ماتخافيش ربي كاتبلكم ا حسن من اللحظات أذوك
شهد: رح تقبل يااك قاابل تمدني ليه للخر
أسد: قابل مي مارانيش ساخي بيك برك عليها نبسل.. ضحكت ضحكتلو وسط دموعها وتلاحت عليه تسلم وتعاود عراتلو وجهو بوس بعدها مخنزر
أسد: تلمي عندي مرا ماتحبش عليا تجيك تريشك اختي
شهد: مُنْمُن حبيبتي وأحب مرت أخ هاذي موحال ديرلي هكاك تبسم ضحكتلو ودخلت ناشطة تبارك وتسلم تالفة فوتت بوساتها حتى لحسام عاد فاقت جبدت روحها حاشمة مزية حد ماشافهم جبدها من ذراعها سماها ليه يمسحلها فدموعها يهمس
حسام: شبيها أميرتي علاه كانت تبكي
شهد: باستلو صبعو: شي فرحتلهم برك
حسام: قرب من وذنها زعما يخالي شاف مع لبقية لاتيين نزل ع رقبتها بزوز بوسات دافيين حنان بورشها عنكشت رقبتها منزكة
شهد: هبلتي
حسام: بيك ا حبي عمري وكل دنيتي ماتزيديش تبكي رح نعملك أحلى فاتحة عقد وعرس خير من تعهم كل وتفكري هدرتي
شهد: بعينين عاشقين: مصدقاتك ربي لا يبعدني عليك
حسام: آمين ولايبعدك عليا.. قرب رح يبوسها لخدها سبقو جواد
جواد: موااح حلوة عسل
حسام: مخنزر: تذهب من هنا ولا نقتل سمااك
جواد: زغدلو حواحبو: عطيني 100 الف ولا نقولهم وش كنتو ديرو.. شهقت شهد ماحسام تهمز رايحو فحط أذاك مانع بجلدو
تحطت الضيافة كلشي ضاحك زاهي.. شدت صحن الزريرة من عند سمرة بعينين قلوبة
سمرة: بصحتك ا حبيبة
أمنية: يعيش الزين.. نزلت عالصحن بالمغرفة تاكل وتسبن تتمعجن حذاه.. لاتي معا الرجال يتوانسو لين جهل بلي تعمل فيه. نزل ع وذنها يهمس
أسد: بلا تمعجين كولي بلا صووت
أمنية: بنينة تسخف هااك ذوق شوي
أسد: نتي لي بنينة وتسخفي نقصي صوتك راني ع شعرة نتحول ونمرغ ربك هناا عالطاپي قدامهم
أمنية: ضحكو عينيها ولحست لمغرفة: تصدق حتى نتا جيتي زين تهبل سخفتني
أسد: سااي مابقاش فيه نطرلها الصحن وبرك ع حزامها موقفها: امشي شبيها لروحك
أمنية: هههه يا شومي ههه سيبني وين مديني
أسد: غمزها: نحي لعمري السخفة.. وندي عمري تحوس ياا وين تحب يا وين تحب.. عض شفتو شاد ضحكتو
أمنية: ههه صوتك يهبل ونتا تغني
أسد: اشش قال نغني قال.. تحركي لا نبداك هنا
أمنية: ههه اصبر وين وديني ههه.. تم سايقها لحقو للباب وقفت عليهم جداتو
حورية: جابكم ربي زيدو للصالون لوخرى تتعشاو
أسد: كنا فالعشا حتى حنا
حورية: الصالون تعرفها
أسد: الطرق كل عارفها ماتخميش.. خرج بأمنية تضيحك ع هبالو مع قلب الدورة للدروج حبسو جدو
سليمان: الصالون مناا ارواحو جاي
أسد: راح يتفقس: اسبقنا جايين وراك
جهاد: طبطب عظهرو: هههه زيد زيد قال اسبقنا قال عينيك فاضحينك ا مسخوط.. أمنية مات فأرضها تفكت منو ورجعت لتالي تمروح ع وجهها.. ما هو طابت وتحرقتلو مشا مع خالو ينعل ف بليس لي يوسوسلو به يقتلو
★★★★★★
طلعت فالدروج أذوك تتسابق مع الريح كابسة ع فمها قلبها داير عليها وف اي ثانية يفلت منها الردان وتفرغ كلشي.. حلت باب بيتها مع اول خطوة تقبض قلبها وتزير جرات للدوش وقفت علافابو وسيب روحها ردت كلشي كلاتو حتى رجع لون داك صفر تخلعت هزتها بالبكا ع طول مايجيب صوتها خايفة ع لي فكرشها.. كان لاحقها ملي سمع بكاها مجهد حرق ذوك الدرجا لي بقالو لحق لباب بيتو عمل اول خطوة وتقلب تقول شكون من جا وقلبلو سافلو ع عارفو.. تعصب ف سطحة الله وكبر ودخل عاقدهم فرع عليها باب الدوج خلعها دارتلو مخطوفة شافت ترعبت وكمل عليها كثر بعياطو
جاسر: هدر مع رببك قتلك مااتكااليش كوون كشما يصرك ونتي تسرطي برك تقول بقرة مربوطة وسيبوها عالعلف
سارة: بصدمة تشوفمع جنابها ماكاين حتى حد معاها: تحكي معايا.. قصدك عليا.. انا البقرة.. تفلقت بالكا كثر من قبل وتلاحت تضرب فيه ودز تعافر معاها معصب من غشها قدرت تخرجو للبيت.. شدها يديها
جاسر: شبييه رببك علااه حالتك هك لميي لغبك فضحتيها
سارة: نطرت يديها: خليني نبكي نتا وش كلااك وش وجعك
جاسر: صمم عليها: تبلعي ولالا
سارة: رح تضربني!! ف عوض ماتراضيني رح تمد يدك علياا؟! علااه تبدلي هك شكوون عبااك عليا
جاسر: ساااارة.. ونزل عليها بيدو تشدت ف آخر ثانية.. تلفتو لزوز كانت امو
دليلة: شبيكم جنييتو
سارة: هو لي جنن كاان رح يضربني هءهء
دليلة: جبدها لصدرو مخنزرة ف ولدها: ماتحشمش لاعملتي اعتبارك ليها لا لي فكرشك لا لراسك شبيك كلبتي ربيتي هك أنا
جاسر: يماا ماتدخليش بيني وبين مرتي
جهاد: (لي حضر الفيلم ملول تصدمتو حشوة علابالي😁لي فيه نڨة ما تتنڨى وعمرو ذفار الكلب لا يتڨد✌) بحدة: باين فيك ضارب وااحد حلوزي ولا شارب بوول الداب خلي الجماعة يروحو ونريڨلك حسابك.. شاف ف دليلة لي محضنة سارة تسكت فيها حار وفنفس الوقت عجبتو ب تصرفها.. تنهد وجا مولي: ماطولوش..
دليلة: جيست راح دزتها: كاان ح يضربك ماتكوني غير وصلتي روحك تفوو نسا آخر زمان زيدي ديري كاش حاجة جيبيها ف عضامك مانزيدش نحامي عليك.. خلاتهم وخرجت تتبسم بتسوميم شادة ضحكتها نزلت للجماعة لتحت ببراءة ترحب وتعاود مولات الدار الفحلة زعم.. عدات عينيها عالكل والصحونةبالأخص.. تبسمت بشر وقعدت تتعشا معاهم مستنية تنوض هايلالة خلاف
سارة: شافت فيه زمان تبكي شادة ف كرشها مستنيو يراضيها مي هو لا هدر لا شاف فيها أصلا وقف عند الشباك ينفخ ف دخاخينو يكمي غالدخان ينحي بيه غشو.. رفست لرض بغزول ورجعت للدوش غسلت فمها ووجها وخرجت فااتت للكوافوز تعاود ف ماكياجها.. قشعها وقف عند راسها زي لمكلوب وأصلا مكلوب ماتقيسوش عليه
جاسر: شدها مالشعر: امسي عليا الزبل لي دايراتو
سارة: اي اي وش من زبل
جاسر: الماكيااج ماتحطي والو ع خليقتك
سارة: أي وجعتني هءهء نحي يدك
جاسر: نطرها بقوة راسها راح وجا قريب ڨلعو دارتلو ادمع: يخيي شيييك الليلة علاه مكلوب هطفهمني وش صراا
جاسر: بصبعو يهدد: هدرت مع ربك جربي اهبطي سابغة وجهك تمسحك بيه القصر شبر بشبر سااامعة.. خلعها هزها وهطها قحرها وخرج صرفق الباب وراه.. مع أول خطوتين وقف تقول فطن صهد ف بلاصتو يخمم علاش طلع وش جابو هنا ماعرفش.. نفض راسو ونزل لتحت.. ما سارة بكات بردت قلبها وجعها بزااف ليلة ومافهمتش سبب تغيرو 180°.. غسلت وجهها مرة خلاف وبقات فبيتها حتى تناحتلها الحمورية شوي.. خرجت حطت فوندوتا خبات بيها الحالة شوي.. قرمت ع شفافها بالعضان حتى حمارو عاد عتقتهم.. شافت روحها فالمراية كسلت شعرها لمكمش من قبضتو تنهدت بقلة حيلة وخرجت نزلت للصالون جمعت معاهم تنقر فوق القلب
أمنية: قربت منها تهمس: شبيه وجهك
سارة: والو علاه شبيه؟
أمنية: مانعرفش تقول بديتي تماكيي وحد طارك بالمايك أب
سارة: تقييت جيت نعاودو فشلت ماكملتش
أمنية: شدت ف يدها: صافا رحتي ذرك
سارة: شوية احمم غير كولي لاتبردلك الماكلة
أمنية: هزتلها طرف لحم ولحقت سلاطة: كولي حتى نتي رك بروحي ذوك اللقمتين ماينفعوكمش
سارة: عيشو الزين.. تبسمتلها امنية وكملت هجومها عالماكلة.. هزت راسها ع شوفاتو مساميها قحرتلو.. قرب منها يهمس ويحطلها ف طرف اللحم من صحنو
جاسر: كولي تاعي خير ورجعليها تعها
سارة: طفاتو ونزلت ع طرف تا أمنية تخطع بالموس كون صابت تخشيه فيه تمتمت: تعتاع وضربة ع ذااك الڨاع تفوو لاعب روحو ملاك قدامهم
... كلمو لعشا ع خير وهنا ضحك وتوانيس وعصافير الحب تتمعشق.. ناضو ورجعو للصالون قعدو مجمولين كيما كانو وحكاية تجبد حكاية.. الرجال ف مواضيعهم والنسا نفس الشي.. وقف للصحن تا الفروتز مسربي هزو ومشا لأمنية وسارة قاعدين حذا بعضاهم فالنص ورجالهم ف طرف ع نفس الفوتاي.. قعد بيناتهم بصحن ف حجرو وقطعلهم توانيسهم
جواد: ماتقلقوش رواحكم الرجال كل هك.. خزرولو مصدومين
★★★★★★
تبسم هز حبتين فراز ومدهملهم شدوهم عليه ودخلوهم لفامهم..: ماتبقاوش تخزرولي هك لا يفيقو بيا يقتلوني ديك الساعة.. سرطو لي ف فمهم وخزرو ف بعض غميز داير حالة مش فامهين وش قاعد يصير.. رجع حكى: حتى بابا زي هك.. يعارك ماما يزبلها منبعد يحصل كي يجي يراضيها.. يمضغ فالتفاح: تعرفو ماما من بن سالم راسها كاسح شوي يعييا يرضي بالسيف وكون مانعاونو ياترضاش عليه
أمنية: هزت مالصحن مدت لسارة ودات لفمها: عندك خبرة فمهنا مالا وش نديرو مع الزوز أذوك
سارة: ا خلايا ا امنية ها العيب الطفل صغير وش فاهم هو
جواد: العيب كل كي تسمعيني وماتديش ع كلامي.. سكتتها نزلت عالتفاح بالمضيغ رداتو جي ف فمها
جواد: خصكم تلعبو ع الوتر الحساس
أمنية: لي هو!
جواد: الغيرة
سارة: وكيفاه كلهم فامي تاع بعضاهم واش هبلتي
جواد: بفف رح بالك لبعيد.. رحالكم واحد غياار و لوخر مهووس بحبو.. صافي ابسط جاست ديروها ولا يديرالكم شي حد تخليهم يجنو فهمتو
أمنية: بشر: تصدق توحشتك افصعون
جواد: تأنا ا طاطا مُنمُن
سارة: فهموني ا الشعر
أمنية: غمزتها: ماديري والو جواد لي يدير
جواد: هههه راني مطهر لا جراو عليا منعوني لا يطفروني ف مستقبلي
تلفتولهم كل ع صوت ضحكاتهم.. تحلو العينين ع وسعهم لشوفتهم لأمنية وسارة يضكحو جواد ف وسطهم يحكي ويعبر بيديه وكل مرة يبوس وحدة فيهم.. جاسر وأسد النار شعلت فيهم
جواد: هههه صرا هك تصدقو وطاح فاللرض
أمنية وسارة: هههه (يقهقهو بالجهد)
جواد: نزل ع كرش امنية: وهااذي البطبوبة وقتااه نشوف وش ح تجيبلنا.. باسها وهز راسو غمزها وزاد لكرش سارة: ياا ربي ياربي رح نولي عم موااح موااح جيبو وكثرولي ولاد نلقا مع من نلعب.. ترشقو كل بالضحك من غير الزوز أذوك
أسد: لف أمنية من جنبها وجبدها ليه: ماتقيسهاش لاتوجعها
جاسر: نفس الشي: وحتى ذي ديجا علااه متلايح تم فز.. جبدو من يدو نوضو
جواد: طاطاواتي لي حبوني نضحكم قنطو ملبسالة والسماطة حذاكم.. قحرولو ذبل عويناتو تا مقصد والو.. خليل عرفها ليلتو جبدو لحجرو
خليل: ارواح هنا يا ولدي لا يطير راسك
جواد: موااح توحشتك ا خالو
خليل: باسو: هات لي عندك
جواد: مغشش زعم: مانسيتلكش عملت خاطب طاطا هذي من ورايا
خليل: باه نرضيك
جواد: مانسحق منك والو دوك ندي من عندها
خليل: وش تدي؟
جواد: نقلها تبوسني
خليل: كبس عليها وباسو: مادورش بيها راهي فرس نخاف عليها منك.. قصدي عليك منها
جواد: هههه فهمتك عطيني شوي تاي برك طلعلي السكر
سعيد صونالو تليفونو واحد من رجالو يطلب هز من غير مايشلقو بيه يحكي ببرود.. كمل كوپا عليه ناض من وسطهم خرج عيط ل جعفر (جاد مادوخوليش ره نفس العبد🔪) طلبو مرة وزوز معصب ماردلوش جن كثر مع تلف لمحها فايتة عيطلها قربت منو منزلة راسها حشمانة
سعيد: فرحانة؟
آية: هزلت راسها معاه تخزرلو فشي شكل.. مستغربة جدها ولا مرة شافها ولا اهتم بيها درك يسقسي فيها ع شعورها!! جاتها حاجة مش نورمال.. نطقت: عادي
سعيد: قرب منها بيناتهم شبر: مغخصكش تفرحي عارفة علاش
آية: علاش؟!
سعيد: خاطر لي ديتيه مش كيما حاسبتو
آية: مافهمتكش! وش قصدك
سعيد: صحيح هو الثابت ف خوتو.. مي هو الأضعف فيهم ونقطة ضعفو أمو.. هذاك ولد أمو.. وأمو شكون؟! أكثر وحدة تكره أمك.. تبسم بشر: مش رح تهناي من درك قتلك
آية: علاه تحكي هك وش تعرف؟
سعيد: مازلتي صغيرة.. وسهام وحدة كبيرة مخها يوزن بلد
آية: ترشقت: بخدايم الشر.. ضيق الشوفة فيها.. كملت بثقة: خدايمي كثر من تعها
سعيد: خايف عليك.. أختك لولى ماخذاتش رأيي.. مانعرف عليك نتي
آية: جدي
سعيد: اممم
آية: عارف وش بين سهام ويما
سعيد: لا علااه نتي عارفة وش بيناتهم!
آية: هربت بعينيها: لا
سعيد: نقر بعصاه: لاحتجتيني تلقايني حذاك.. خطيبك ماهوش أسد يقتل أمو عجالك.. هذاك يقتل قبل ماتخمي تقيسيلو امو.. يبست ف بلاصتها تحسب ف كلامو.. هذاك مش خطيبها رجع راجلها.. ولا كلامو صح كيفاه رح تحاسب سهام ع لي دارتو مع أمها.. قشع نظرة الحيرة والغش ف عينيها.. تبسم لحق يضربلها الوتر الحساس.. لوحلها كلامو وخرج لبرا يعيطلو ع راحتو مرتين ال3 هز عليه
جعفر: وااش
سعيد: ينعل بوو الطالسيلة تاعك وينك مالصبااح نطلب فيك علاه ماتردش
★★★★★★
جعفر: يسوق: مانيش فارغ شغل ليك
سعيد: ماتجهلنيش ولي تفاهمنا عليه
جعفر: رغا: قتلك ااتيش فارغ ةااش ماتفهمش عيننك تهجم عالجماعة هاك وسطهم تيري عليهم وتهنى ولا خاايف
سعيد: مااتلعبش معايا اللعب أذا أ ولد أمك ولا ناسي وش ممكن ندير فيها
جعفر: ماتدورش بيها الله ينعلك وينعل بوو الساعة لي عرفناك فيها
سعيد: بلاا كلام تندم عليه منبعد.. ريڨل أمورك حتى يوصلك ميساج مني
كوپا عليه معصب رما التليفون عند رجلو وبرك عالفولون يضرب ويعارك جنونو حايمة
رانيا: تبكي: خلااص حبس رااح تموتنا
جعفر: بلعي ### فمك علياا كلمة لاا
رانيا: مانيش خايفة عليا ولا عليك الله لاينوضك خايفة ع سيرين بنتي لي جبتيها معانا بالسيف
جعفر: شاف مع سيرين فالمراية ونفخ بغش: بقاي سااكتة حتى نوصلو
رانيا: حررام علييك مانحبش نطيحو خليه والله مانطلب منك حاجة مهم خليني نجيبو
جعفر: جنيتي وااش هدرت مع رببك دااك النهار نبقى ننبح
رانيا: خوفها تكمشت ع روحها وتلفتت للبلار شاردة مع الطريق دموعها سبالة.. تدعي ف قلبها تصرا كاش حاجة وتمنعلها صغيرها.. ماتحبش تخصرو تبقى أم وإحساس الأمومة قوى عندها.. لكلاب وتحن ع ولادها مابالك إنسانة.. ومش أي إنسانة فوتت الزبابيل ع راسها غير ع جالها بنتها مابالك هذا.. كون ماضغطش عليها ب سيرين محال وافقت تجي معاه برجليها
واقفة ف وسط القصر فارغ.. تخزلو مع الخدامات بصدمة ع ذاك الخبر لي سمعتو.. "راحو يخطبو لأمان".. يعني خطب من وراها.. يعني خلاوها شبه ميتة حد لاهمو أمرها وزادو كل يحضرو للخطبة.. خطبة ولدها لي ماحضرتهاش.. لعبت بيها الدوخة من 3سوايع فطنت لدرك لاسمعو بيها! للدرجة ذي ماتهمهمش ماتعنيلهمش! تركزت ع الفوتاي بزوز يدين ورغات ع الخدامة لي هازة التليفون
سهام: حبسي عندك
خ: نزلت التليفون: أنا.. ح. ننعيط
سهام: ماتخبري حتى حد
خ: مي ا مدام
سهام: هدرت معاك ماتحليش فمك نهائيا ندراك عييطيلهم نقتلك ساامعة.. حمرت عينيها خلعت الخدامة بشوفاتها.. خرجت كيف مادخلت ركب مع الڨارد وشاورتلو يمشي: تحرك لقصر بابا..
كل ما يقربو قلبها يدق اكثر.. تحس فالوقت موس حافي يذبح فيها.. تحس فالهوا لي تتنفس فيه معاه غاز سام خانقها.. شاردة مع الطريق ومش حاسة بيها غير دموعها سبالة.. فطنها وقت شد فران قدام نفس السبيطار لي جاو ليها أول مرة
جعفر: انزلي
رانيا: بغصة: مابدلتيش رايك؟
جعفر: ماخزرلهاش هزلها راسو لالا
رانيا: قلبها تقبض ضاع أخر أمل ليها.. غمضت عينيها بقوة حلتهم تبكي: وسيرين
جعفر: تبقاي معايا
رانيا: حلت الباب رح تنزل وتلفتتلو: ولا متت!جعفر: ربيي ربيي علااه تحكي هكك نااوية تجعريني ف### الليلة ذي
رانيا: خايفة لا مانوليش هءهء خايفة مانزيدش نحضنها ولا نشم ريحتها.. خايفة ما نشو.. جبدها ليه ونزل ع شفافها باسها بوسة طويلة لخص فيها قداش من حاجة مخبيها ومش منجم يوصلهالها.. جبد روحو يمسحلها ف دموعها
جعفر: ماتكبيش مايصرالك والو رح توليلنا
رانيا: تخيلت نكون عيلة معاك معانا
جعفر: راانيا بجااه ربي افهميني ماانجمش نخلييه ماايكونش ولدي زيي كرهت عيشة لحراام لي عايشها أنا
رانيا: نحاتلو يديه: فهمتك
جعفر: باس راسها: نرجع أسمي وبعدها نجيبو ولاد قد ماتحبي.. ماردتلوش زرب نزلت ودخلت جامعة شوية الكرامة والقوة لي باقينلها.. حاضنة كرشها بزوز يدين تحكي مع صغيرها
رانيا: سامحني يا روحي.. سامحني مش بيدي سيبت يدك.. سامحني حاجة فوق طاقتي.. تخيلت بنت نسميك بيلين.. تخيلتك ولد وكنت رح نسميك إياان.. بنت أول ولد ماكانتش رح تفرق عندي.. مهم أنك معايا.. مع أختك كانت رح تحبك وتخافك قدي وأكثر.. ياريت كتبلك ربي عمر وتلاقيتي بيها ياريت
ماشي وراها بخطوات ثقال تقول ماشي عالجمر.. هو بيدو مش منجم عالخطوة لي سيفها عليها.. بيدو مش ساخي بولدو.. وكيفاه يسخى بيه وهو طرف منو.. ماهوش بالقيوة ذيك.. ماهوش بلاقلب يطيش دمو أما حالتو غير.. وحاجة كبر منو.. مش حابب ولدو يتربى ويكبر بلانسب بلاعروق.. لقيتو شجرة عايشة بلاعروق! لاا.. هو بيدو مش عارف كيفاه عاش 36سنة.. علاه موتو طولت ماعرفش.. لحقو لبيرو الطبيبة دخلو لقاوها قدامهم وقفت تحكي معاهم وتأكدلهم من سهولة العملية.. واقفين لزوز ساكتين يسمعولها وماسمعو حتى كلمة قالتها.. قلبو عندها يخزرلها حابب ولدو حابهاا هي.. منزلة راسها دموعها يتڨرنو ف ذقنها وينزلو للرض.. قلبها عند صغيرها رح تفارقو ف أول مشوار.. قلبها عند بنتها أكيد رح تكرهها بعد ماتعرف.. قلبها عندو ماهيش عارفة كيفاه تكون معاه من بعد الليلة ذي.. حد فيهم لانطق بحرف.. وضاعت ذيك السعادة ف صمتهم البارد
ف قصر سليمان.. مازلو ملمومين ف سهريتهم
سعيد: وقتاه تسهلو للمساكن هاذوك نعملولهم عرس طول
أسد: علاه مزوب إذا هم مش مزروبين.. خزر مع شهد نزلت راسها وزاد ل حسام
حسام: كلشي فوقتو مليح ماعنديش مانع نستناها قد ماتحب وأصلا مانزوجوش حتى تفطن خالتي
دليلة: مسكينة نومتها طولت كون عرستو برك
جهاد: خليك ف توانيسكم خير.. تنبزت تلفتت ل سمرة تحكي شوي هزت روحها خرجت
أسد: بعقلهم خلي تتخرج منبعد ساهل يديرو وش يحبو
جهاد: وزوز أذوك نفس الشي.. وافقت عالعقد مش العرس.. وبنتي عندي كي البارح كي ليوم
أمان: نعععمم!! علااه؟ ضحكو كل
★★★★★★
حمار وجهو مالغش جبدها ليه: والله لامارضيتوش نهزها نبقى حذاكم ماعنديش مشكلة
جاسر: يسخطك ماتحشم ما تجعر
خليل: شو شكون يحكي.. ضحكو كامل
سمرة: شافت مع جنابها جواد مش مبين خافت لايكون يخلط ف شي بلاصة وقف خارجة لحقتها سارة
سارة: شبيك
سمرة: المبلي أذاك ماعرفتش وين تلف
سارة: يكون هنا فشي بلاصة
سمرة: وهذيك الندبة.. ولدي تفتاف بزااف نغفل عليه يرون الدنيا ولقصر كبير ماندري فااه غطس يبربش
سارة: ماتخافيش درك نلقاوه جاية معاك نحوسو عليه
خرجو كل وحدة زادت ف طريق يحوسو عليه.. تعدات حذا الكوزينة فاتت ووقفت عند لهدرة لي سمعتها.. وذنيها تهزو وأوتوماتيكمون لقات روحها تصنط
دليلة: ياك ما خلطوش فالصحونة
خ: هاا!! هيه .. كيما قلتيلي.. نولت راسها تخمم.. بذاتها نسات واش سربات الصحن للشخص المناسب ولالا
دليلة: رغات فيها: حطيتيه يااك
خ: إييه حطيتو والله حطيتو
دليلة: مليح.. جات خارجة شدتها الخدامة: مداام ماعطيتينيش الحرز نطلعو لبيت المدام الصغيرة.. ماجات تكملها لفتتها وجهها بكف3D
دليلة: شدتها مالشعر: بلعيي يااكلبة رااح تفضحينا.. سمعت صوت حاجة تكسرت صفارت وخضارت أكيد سمعها شي حد.. سيبتها وخرجت تجري مالقات حتى حد.. رجعت للخدامة عطاتها طريحة بردت قلبها فيها.. هزتها من شعرها تقول شليقة تحكي والشر يطاير منها: تهزي شرااوط درك درك وتنقلعي مالقصر ساامعة
خ: هءهء مي نتي وعدتيتي ا مدام ق.قل
دليلة: يااتخرجي برجليك ياانخرجك محملة رحلييك خييريي.. نزلت راسها عاطيتها للبكا نفضتها تقول حاجة خامجة مسحت يديها: هك تعجبيني.. مانشوفش خليقتك هنا شوف كاش واحد ملي ڨارد قولو المدام يديك وين تحبي.. خلاتها وزربت خرجت عينيها يدورو كشما يبانلها العبد لي سمعهم.. لحقت للصالون ع دخولها دخلت الثانية.. وكانت الصدمة للكل
واقفة قدام الكل.. عدات عينيها عليهم وقلبها واجعها.. ملمومين يضحكو زاهيين.. وهي! هي تنسات منسية من نهار طاحت.. عبات عينيها بشوفة ولادها.. لحقت لأسد ودمعو عينيها.. زارها متأكدة أنو زارها.. شافتها حذاه وتكبست كثر.. تذكرت كلام ممرضتها وقت سقساتها شكون يزيرها شكون يهتم بيها.. زوز كلمات تقولهملها "كنتك أمنية" كنتك..هاذي مرت ولدها.. هذيك بنت بنت.. نفسها بنت ر.رحمة عينيها حمارو شوفتها حاضرة معاهم ف خطبة ولدها حستها خذات بلاصتها.. خذات ولدها منها بعد مادات أسد لول.. قربت منهم تصفق تقحر فيهم بالواحد
سهام: براافو يعيطكم الصحة ملومين كل هناا فرحانين.. جراتلها شهد تحضن وتبوس.. جمدت خلاتها دير وش بغات لين نزلو دموعها حضنتها تبوس فيها.. جرالها أمان وخليل ومام أسد لي دز فيه أمنية تنخز وتهمسلو
أمنية: روح حتى نتا وش تستنى
أسد: استناي هاام حذاها.. دزاتو لحد عندها
أمنية: ع سلامتك ا خالتي
سهام: فوق القلب: الله يسلمك.. شدت ف خد أسد: ماكش رح تحضنني ا ولدي ولد كرشي.. تبلوكا ماستناتوش يدير أي حاجة جبتدو لصدرها تحضن دارو بيها ولادها مام أمنية لزت لأسد حتى هي تشخنن منظر عاطفي بزااف رقق قلوب الكل.. كسرت السكون بدخلتها تبكي جرات طول ل جاسر تشكي
سارة: أمك هءهء أمك ا جااسر عملتنا سحور مرة خلاف
جاسر: وااشيياا.. كلشي تصدم وتلفتلها وجهها راح وجا ألوان وأشكال
جهاد: فزها: وااش صح لي قالتو
دليلة: نطرت يدها تبكي: كذب وعلاه نديروهولهم محاال نضر ولدي
سارة: كذذابة تكذب
جاسر: سااارة
سارة: تكذب والله تكذب ذرك برك سمعتها فالكوزينة تحكي مع وحدة مالخدامات
دليلة: سرطت ريقها وبدات تنوح ع طول صوتها: لعفة قتلكم لفعة ماابردلهاش قلبها حاابة تخرجني من داري ياا ناس بغات تحرمني من ولادي
سليمان: وش صااير هنا
سعيد: شوفت عينك مشااكل نساا
حسام: خليونا براا لحكاية ا جماعة يحلوها بيناتهم
سارة: والله والله والله ونحلف بال3 وعالمصحف الشريف غير سمعتها سمعتها بوذنياا أذم
دليلة: تحلف بالكذب يسخط ينعلك علاه نتي تعرفي ربي والمصحف عاارفة القبلة ويين جاتت ونتي ليل مع النهار فالحة ف هزاان رجليك والتكهكيه
جاسر: يمااا
جهاد: صمم عليها: تبلعي ولالا نعديين رببك سخطيينا
دليلة: واا الظلم ا عباد الله الظلم اشهدو يااناس قلبتهم علياا الفتانة هي لي سحرتكم دورتكم عليا هي السحارة
الكاملة: لااا هناا ويزيي لهنااا ومانبقاش سااكتة عالتمسخير أذاا بنتي بنت ولدي ماتتهانش هك ونبقى نشوف
حورية: تهدني ا الحاجة سوء تفاهم برك
الكاملة: بعدي من قدامي بعديي.. فاتت فيها ووقت عند دليلة: نتي مولات لخدايم أذووك نتي لي سحرتيها يوم حنتها ولانسيتي
دليلة: غلطت مرة وحدة ومانزيدش نعاودها.. بسبتها قريب خسرت راجلي وولادي وداري
الكاملة: لي دارها مرة يعاودها عشرة ونتي ماشاء الله دايرة شحال من مرة ومن شحال هذي سنين.. دليلة وسهام تخلخلو وجوهم
جهاد: فااه تحكي يخي
الكاملة: مرتك.. وحتى أختك عارفين سقسيهم هما
.... يتبع
ماتبخلونيش بآراائكم ... خليو تعليقاتكم فكل حلقة ❤..
فضلا ★ vote للحلقات
اضغطو على رمز " ★" اسفل الحلقة❤