🔸️حلقة 24
مراد يحكي:
تكيت لتالي و مديت يدي...هزيت تصويرتها نغزرلها ظاهرلي كانت تبكي...عديت صوابعي على الصورة ياسر توحشتها...كل يوم نصبر روحي...بانو كلشي باش يوفا و باش تكون ليا في التالي...منعرفش شبيها تبكي أما متأكد لعمر ورا الحكاية...حطيتها من يدي و هزيت تصويرة أخرى...كبست على سناني و انا نرا فيه شادها بالطريقة هذيكا...حطيت يديا زوز عالطاولة...نعدي في عينيا على كل صورة و كل بلاصة كانو فيها...كل صورة تخليني ننقم عليه اكثر و اكثر...كل مرة يحط يدو عليها كل مرة يقربلها...يخليني نكره روحي اكثر خاطرني سمحتلها باش توصل لهوني...فقت من سرحتي على صوت الباب...خذيت نفس نحكي
أنا:أدخل
طلعت راسي نغزر لبلال...تبسمت على جنب نحكي
أنا:ظاهر لي عندك اخبار جديدة
بلال:بالظبط...تفضل
مديت يدي شديت عليه الظرف...حليتو...جبدت الصور و تبسمت...نحكي
انا:وحدة بوحدة...برافو بلال
نغزر لتصاوري مع سيرين في البار...و في الحفلة ليلتها غزرتلو نحكي
انا:نظن لازم الدوزة تكون اكبر من هكا...عالاقل تخلي سي عمر...يعرف انو ديما فما شكون سابقو بخطوة
بلال:شتقصد ؟
انا:ميهمش شنقصد...لي يهم انك تنفذ لي نقلك عليه و كهو
بلال:فما اوامر اخرى
انا:الكلينيك لي كانت تعدي فيها زهرة
بلال:شبيها ؟
انا:باز باش يحاولو يخلو الطبيب يشهد على حالتها الايامات هذوكا...و الإفادة متاعو باش جيبلنا برشا مشاكل على راسنا
بلال:مراد ياخي باش؟
انا:من غير ما تتفجع...لي نعرفو انو فما مؤتمر...هو لازم يمشيلو
بلال:كيفاش باش نعملو هكا ؟
انا:دعوة مزورة و لا مكالمة...دبر راسك انت...المهم باش يبعد من تونس الفترة هاذي
بلال:و المحامي ؟
انا:مزال عليه شوية...خلي الحكاية يومين قبل الجلسة
بلال:باهي كيما تحب
انا:تنجم تمشي
هزلي براسو ايه...حطيت الصور على جنب...نغزر لسكرتيرة لي دخلت...غزرتلها نحكي
انا:شفما ؟
هي:مسيو حسان هوني
انا:خليه يدخل
هي:باهي
طلعت راسي نغزرلو...قرب من البيرو...مدلي يدو يحكي
حسان:اهلا سي مراد
انا:تفضل
جبد يدو و قعد مقابلني...مديت يدي هزيت صورة سيرين...حطيتها قدامو...غزرلي مستغرب يحكي
حسان:شتعمل تصويرة سيرين عندك ؟
انا:ملا تعرفها ؟
حسان:بالطبيعة...تخدم عندي ؟
انا:تخدم عندك...نعرفها المعلومة هاذي...اما مدير كيفك يخرج يسهر مع اللي يخدمو عندو و يبدلو جو منجمتش نفهما صراحة
حسان:قرينا مع بعضنا...و بدينا في سوسيتي هاذي الكل مع بعض...ميجيش نتبدل عليهم بعد ما وصلنا لهوني
انا:مممم باهي
حطيت صورة عمر قدامو...و غزرتلو...نحكي
انا:و هذا ؟
حسان:عمر...خطيب سيرين...البطل لي يهد علينا كل مرة
انا:ظاهر علاقتك انت و سيرين قوية
حسان:ايه صحيح
انا:زعمة عمر مناسب ليها...أكثر منك ؟
حسان:شتقصد ؟
أنا:قصة حبك بدات في الجامعة...أما وفات وقت عمر سبقك بخطوة و إعترفلها...و حد كيفو صعيب برشا ترفضو أي طفلة
غزرلي ندرا كيف...هز روحو وقف...قحرلي...يحكي
حسان:وين تحب توصل أنت ؟
انا:أقعد قبل
ترمى عالكرسي...يغزرلي...حطيت يديا الزوز عالبيرو نحكي
انا:ظاهر فيك مزلت تحبها لتوا
حسان:كلشي وفى وقت اختارت عمر...محاولتش نقربلها...و لا حتى نحل الموضوع معاها
انا:أحسن...و الا كنت باش توحل في مصيبة كبيرة تعرفها بالقدا
حسان:نجم نعرف علاش طلبتني لهوني سي مراد
انا:نحب نسألك ؟
حسان:تفضل
انا:سيرين باش تكمل خدمتها عندكم ؟
حسان:فاش يهمك انت ؟
انا:نحب على جواب...سي حسان
حسان:على الاغلب لا...عمر هكا يحب...أصلا من فترة عمل مشكلة عالموضوع هذا و نظن باش تحبس الخدمة في أقرب وقت
أنا:ملا أنت باش تمنعها ؟
حسان:شننوة ؟
أنا:ماهيش حاجة صعيبة عليك...باش تعطيها ترقية...و تولي تخلص فلوس أكثر...نظن هذا شي...باش يخليها تتراجع في قرارها
حسان:مسيو مراد...نظن غلطت فيا...سوسيتي متاعنا صغيرة...متتحملش تكاليف هذوما الكل...كيما زادة سيرين تحب ترا حياتها مع عمر...مانيش باش نمنعها
أنا:باش تعمل لي نقولو انا و كهو ؟
حسان:و كان رفضت ؟
أنا:تتسكر سوسيتي متاعك في ظرف اسبوعين...انت اختار
بقى يغزرلي مصدوم...مديت يدي...هزيت الشاك حطيتو قدامو نحكي
انا:المبلغ لي هوني...يقارن الارباح متاع سوسيتي متاعك في عام...لي عليك توا...تخلي سيرين تتعلق بخدمتها...تقنعها انو تنجم تخدم بعد العرس و كهو...و الفلوس لي هوني باش يعاونوك تعمل لي قتلك عليه
بقيت نغزرلو...تكيت لتالي...و حليت البيسي...نحكي
انا:تنجم تمشي...نستنى اخر الاخبار منك
مد يدو هز شاك...و وقف...غزرلي يحكي
حسان:باهي...باهي
اول ما خرج...رجعت سكرت البيسي...و هزيت روحي خرجت...اصلا نحس البلايص الكل تخنق فيا...قد ما حاولت منجمتش نعدي حتى ثانية من غير ما نفكر فيها...ركيت الكرهبة مقابل البوتيك لي كانو فيه البارح و تكيت راسي عالكرسي...رجعت بذاكرتي لتالي...وقت دخلت لدار...تفركس على امها...وقتها اخر عام في الإعدادي...كان ظاهر فيها قداش متغشة...اما حتى كي تبدا اكاكا صوتها ميخرجش...من صغرتها هادية...هذاكا اللي كان يميزها برشا...غزرتلها وقتها...نحكي
انا:شبيها زهرتي ؟
زهرة:شي
أنا:نسمع فيك
زهرة:أمي وعدتني باش تمشي معايا ليوم...على اساس اني باش نختار روبة...للحفلة متاع اخر سنة...اما ظاهر فيها مشغولة...و هي تعرف انو الحفلة غدوة...ظاهر مانيش باش نمشي
انا:انا نجي معاك
زهرة:تحكي بالرسمي ؟
انا:مممم
زهرة:لحظظة باش نطلع نجيب فلوسي
انا:محبيتهاش منك
زهرة:باهي ملا خلينا نمشيو توا
انا:نكمل الخدمة و نمشيو...مزال الوقت
زهرة:لااا أمان مراد...عيش خويا...خلينا نمشيو توا أمانك
أنا:باهي لالة...خلي الخدمة ملا
زهرة:هيا فيسع
انا:لحظة يا بنتي...شبيك مزروبة
زهرة:خاطر بقيت انا كهو لتوا ما شريت شي...هيا فيسع
انا:متخافش باش تكون احلى وحدة فيهم
زهرة:مش لهدرجة...اما نحب نختار روبة مزيانة...تنجم تعاوني مش هكا
انا:هيا برك...تو نشوف اذا نجم
سبقتني للكرهبة...فرحتها واضحة...تعدا اكا نهار...لحظة بلحظة بين عينيا...حليت عينيا مروهج...كبست بيديا عالفولون...سؤال واحد جا لبالي...زعمة كان بقيت مراد خوها كيما كانت تقول ديما...كانت باش تبقى معايا لتوا كنت باش نتحمل قربها من حد اخر من غير ما نتكلم...و لا نمنعها...كيفاش كنت نتقبل قربها لراجل اخر...مهما كان..حسيت راسي باش يطرشق..معادش نعرف كيفاش نتصرف...قربها حرقني...و بعدها كواني معادش نجم نخمم في اللي باش يصير...رغم اللي قاعد نعمل فيه أما خايف عليها...خايف كان نضرها بلا ما نحس...وجيعتها تهدني...و تخليني عاجز على كلشي...أنا اكثر حد نعرف لهي قداش حساسة...الكل يفهم لهو خوف...اما ديما نحس لي قوتها ورا الهدوء متاعها غزرتها كهو تكفي باش تخليني ننسى كلشي...تخليني عاجز عالكلام لكنت باش نقولو...و فرد وقت نندم على لي قلتو...يمكن اي حد يفهم اللي قاعد يصير انو جنون اما انا نسميه اكثر من حب...خاطرني بالرسمي تعديت مرحلة الحب...كان نرجع سنين لتالي...نقول لي كنت نحبها...اما توا...نحسها عايشة داخلي...و كيما حاولت منجمش نخرجها مني
🔸️مريم تحكي:
فقت الصباح على صوت تليفوني ينوقز...حليت عينيا بالسيف...و رميت يدي جبدت تليفون...نغزر لرقم جديد ضيقت عينيا مستغربة...هزيت عليه نحكي
أنا:شكون ؟
زهرة:م..مريم
أول ما سمعت صوتها...هزيت روحي تقعدت...نحكي
انا:زهرررة لباس ماهو...و وين تليفونك علاه تحكي معايا من نومرو جديد شفما ياخي ؟
زهرة:مريم...أمانك ايجا عندي
أنا:وينك إنتي ؟
زهرة:في الدار
انا:باهي...نتلقاو في بلاصة العادة
زهرة:ما نحب نمشي لحتى بلاصة...أمانك إيجا إنتي
انا:زهرة...تعرف لي منجمش ندخل لدار هذيكا مرة اخرى...و
سكت كي سمعت شهقاتها...هزيت روحي وقفت نحكي
انا:زهررة شفما ياخي...شصااار ؟
باقي تبكي من غير حتى كلمة...قربت من القارد روب نجبد في دبشي...و نحكي فرد وقت
انا:باهي عزيزتي...باهي هاني جاية...اسمعني انتي توا باش تقوم تغسل وجهك و معادش تبكي باهي يا روحي
زهرة:ب..باهي
انا:هاني باش نبدل و نخرج...متقلقنيش عليك اكثر عيش اختي
زهرة:باهي...نستنى فيك
انا:باهي
بدلت دبشي بالزربة...هزيت تليفوني و مفاتحي...و خرجت نجري...جاب ربي اليوم عطلة...لقيت رنيم في وجهي...جات باش تحكي...دزيتها بيدي و خرجت شديت طاكسي...طول الثنية و انا نمرج فيه باش يزرب منعرفش كيفاش وصلنا...خلصتو و نزلت...وصلت للباب مترددة...ذكرت لي صار اخر مرة مع الساقط هذاكا...قبل ما ندق الباب...فتح بالوقت...جات عيني في عينو...اصلا حظي و نعرفو...كان متلقيتوش توا...نعرف لفما معجزة قاعدة تصير...جيت باش نحكي...قص عليا هو يحكي
حسام:شتعمل هوني انتي ؟
انا:نحب نقابل زهرة
حسام:مش قتلك اخر مرة متخلينيش نرا وجهك
انا:و انا مانيش ميتة عليك سي حسام...نحب نشوف صحبتي و نمشي...اما نسيت انو مانيش قاعدة نحكي مع واحد كيما العباد
قحرلي قحرة متاع موت...شدني من زندي...سكر الباب وراه و دزني عالحيط...نزل عليا اكثر...يحكي
حسام:اغزرلي هوني...لسااانك هذا نقصهولك بيدي متلعبش معايا احسنلك
انا:و الا شباش تعمل...ترجع تبوسني مرة اخرى...باش تسكتني
بقى يغزرلي ندرا كيف...كبس عليا على زندي أكثر تبسمت على جنب نحكي
انا:اه لااا عاااد... متكونش تفكر في شي اخر...منظنش لانت ساقط لهدرجة
حسام:و أكثر من اللي تتوقع...كان متحبش تجربني متظهرش قدامي
انا:اسمعني...تهديدك هذا ماهوش باش ينفع معايا...اعمل لي تحب عليه...باهي مسيو حسام...و توا سيبني...عندي حاجات اهم...على اني نضيع الوقت مع
قص عليا كي شدني من وجهي...كبس عليا اكثر يحكي
حسام:مزال تخرج كلمة وحدة من فمك...كلمة وحدة إلا ما ندمرك...أغزرلي مليح...و تذكر كلامي...الا ما نخليك تندم على كل كلمة خرجتها من فمك...صدقني باش تخلص حقها كلمة بكلمة
انا:كان نجمت متقصرش...و توا سيبني...لازمني نشوف زهرة توا
رخف يدو شوية...وخر خطوة لتالي...هزني و حطني...و مد يدو حل الباب...و تبسم على جنب يحكي
حسام:تفضل...نشوفك مرة أخرى
قحرتلو و دخلت...صبحت على امو...و طلعت نجري منجمتش حتى نحكي معاها...قربت لبيتها بالزربة حليتها و دخلت...اول ما طلعت راسها...هزت روحها و ترمات عليا حضنتني...كبست عليا تحكي
زهرة:مزية جيت مريم
انا:شفمااا زهرة...شصااارلك ؟
جبدت روحي منها...حطيت يديا زوز على وجها و كملت نحكي
انا:و شبي حالتك هكا ؟
زهرة:تاعبة برشا مريم...تاعبة عاللخر
انا:ايجا اقعد قبل
قربت معاها لسرير...قعدتها و قعدت مقابلتها...نغزر لحالتها لي داخلة بعضها...مديت يدي حطيتها على خدها نحكي
انا:زهرة شفما...شنوة الحالة لإنتي فيها...شصااار...فهمني خاطرني معادش نجم نستوعب
زهرة:معادش نحب نشوفو
انا:مراااد ؟
هزتلي براسها لا...خذيت نفس نغزر لدبش لي مفروت عالسرير...و رجعت غزرتلها نحكي
انا:تقصد عمر ؟
زهرة:شباش نعمل توا...قلي شنوة نعمل...مش هو كان يكرهني شنوة لي تبدل ؟
انا:زهررة عزيزتي...شنوة لي صار...شعملك عمر ؟
زهرة:أغزر...شوف بعينيك...فاش قام حتى يعمل معايا هذا الكل...علاه يحب يعلقني بيه أكثر...تعرف شنوة لي صار البارح..باسني مرة أخرى...و أنا كي العادة منجمتش نبعد عليه...منجمتش نقولو لاا...متعملش هكا...خاطرك توجع فيا بالطريقة هاذي...سكت مرة أخرى...حبيت نسألو...أما خفت من الجواب متاعو...أصلا شنوة نقولو علاه تعمل معايا هكا...شباش يكون الجواب متاعو هاني باش نقولك...زهرة متسألنيش أحسنلك خاطرني باش نعرس بعد شهرين
هزت يدها تمسح في دموعها...و غزرتلي ندرا كيف تحكي
زهرة:باش يعرس بيها مريم
انا:زهرة عزيزتي
زهرة:باش يعرس بيها...أصلا عمل معايا هكا...خاطر كانو متعاركين...أنا قريت الميساج...كلشي قاعد يصير كذبة شنوة لي عملتو أنا مريم...شنوة لي عملتو...انا قاعدة نحب فيه
بقيت نغزرلها...متصدمتش...اصلا كان ظاهر فيها لي تحبو...حتى كان يعجبها من قبل...اما ديما كانت تتهرب من الحكاية...هزت روحها وقفت بالزربة...و كملت كلامها تحكي
زهرة:قاعدة نحب في الراجل هذا مريم...شباش نعمل توا...كيفاش نحيها الحكاية هاذي من راسي...كيفاش نقنع روحي أنو أنا معاه كهو على خاطر مراد...خاطرو يحمي فيا منو...علاه من اول مرة هربت عندو...علاه بعد السنين هذوما الكل...انا هربت من مراد...كيفاش نجمت ناثق فيه و كنت نعرف لهو يكرهني من التصرفات متاعو معايا...يا ربي شنوة اللي نعمل فيه انا
هزيت روحي وقفت في جرتها...قربت منها شوية نحكي
انا:باهي زهرة...اهداا...تو نلقاو حل مع بعضنا
زهرة:مفما حتى حل فهمتني...حتى حل...كلشي باش يوفى كيما بدا...انا لازمني ننساه...ما نحب حتى شي يذكرني فيه...حتى شي
قربت من سرير ترمي في الدبش عالارض..بقيت نغزرلها حلت قجر تابل دونوي تفركس فيه...ندرا على شنوة...و تحكي فرد وقت
زهرة:ويينووو يا ربي وييننو...حطيتو هوني
انا:زهرة على شنوة تفركس انتي ؟
زهرة:تيي وينو يا ربي...نحس في روحي باش نهبل
جبدتها من يدها دورتها عندي...اول مرة نراها في الحالة هاذي...كبست عليها نحكي
أنا:زهرررة...فيق على روحك شبيييي حالتك هكا
زهرة:مرييم...راسي يوجع فيا...امانك عاوني...لازم نلقى دوا متاعي
انا:دواااا شنية ؟
جبدت روحها مني...باقي تفركس لين لقاتها...حطت اكثر من وحدة في يدها باش تشربهم...حبستها نحكي
انا:زهرررة شنوة هذا...مش على اساس معادش تشرب دوا انتي ؟
زهرة:متخافش..ماهوش قوي...يعني جيست باش راسي ميوجعنيش
انا:زهرررة...كيفاش تاخو دوا من غير طبيب
زهرة:مريييم يزي امانك...قتلك ماهوش قوي برشااا...كان تحب اسأل البروف متاعك هو شراه
انا:يززززي...ياخي ناوية تهبلني انتي...ماكش باش تشربهم
فكيتهم من يدها و رميتهم عالارض...غزرتلي ندرا كيف تحكي
زهرة:فاش تعمل إنتي ؟
أنا:ميجيش لي تعمل فيه...زهرة اهدا أمانك
دزتني بيديها زوز لتالي...وخرت مروهجة...قربت مني تحكي
زهرة:زهرة اعمل هكا...زهرة متعملش هكا...زهرة أسكت زهرة احكي...امممي و مراااد...و عمر...و توا انتي...يكككفييي...انا تعبت منكم الكل...معاد نحب حتى حد فيكم يدخل فيا...يكككفيي...يكفييي
بقيت نغزرلها...نزلت دمعتي بالوقت...متوقعتش باش نلقاها في الحالة هاذي...طاحت عالارض تبكي و تحكي
زهرة:يكففي...يكفي أنا تعبت
قربت منها بالزربة...نزلت عندها...حضنتها...نحكي
انا:باااهي يا روحي...وفااات...انا معاك هوني...كلشي باش يكون مليح
زهرة:معاادش نجم...علاااه الكل يتصرف معايا بالطريقة هاذي مريم...في شنوة غلطت انا...في بالي باش نرتاح من مرااد...اما وحلت اكثر
طلعت راسي على حلة الباب...نغزر لدالي...لواقف يغزرلنا ندرا كيف...ظاهر سمعنا...خاطر بيتو قريبة هزيت يدي...شاورتلو باش يرجع و ما يحكي شي
هزلي براسو ايه...و خرج...طلعت راسها شوية غزرتلي تحكي
زهرة:مريم شنوة نعمل...كيفاش نخرج من هذا الكل ؟
انا:تخرج...باش تخرج عزيزتي...كلشي باش يوفا
زهرة:و عمر ؟
حطيت يدي على خدها...نمسح في دموعها و نحكي فرد وقت
انا:عمر اذا كان يحبك بالرسمي...باش يرجعلك...صدقني
زهرة:باش يعرس بعد شهرين
انا:هو الخاسر في التالي...صدقني ماهوش باش يلقى وحدة كيفك
زهرة:انا ريتها مريم...خطيبتو مزيانة برشا
انا:يمكن...أما صدقني كان جا يحبها بالرسمي...مكانش يعمل هذا الكل على خاطرك
زهرة:باهي
انا:هيا قوم توا...لازمك ترتاح
عاونتها وقفت...قعدت عالسرير...و غزرتلي تحكي
زهرة:مريم امانك نحب عالدوا متاعي توا
انا:لااا انتي مليحة...و لازمك ترتاح كهو
قربت قعدت من الشيرة لاخرى...حطت راسها على حجري...بقيت نعدي في يدي على شعرها و نحكي
انا:زهررة
زهرة:مممم
انا:ياخي دوا هذا تاخو ديما إنتي
زهرة:لااا...جيست كي نتقلق
انا:نفسو دوا لي عطاهولك طبيب آخر مرة
زهرة:لااا...هذا جيست كي يوجعني راسي...اما ناخو اكثر من وحدة باش نرتاح
انا:باهي...اما حتى هذا باش تقص عليه...يمكن يضرك عزيزتي
زهرة:باهي
تكيت لتالي...نغزر لدبش لي رماتو عالارض...خايفة حالتها تسوء اكثر...حسيتها هدات...نزلت راسي لقيتها رقدت...اصلا كان ظاهر فيها عدات ليلة قاعدة...جبدت روحي منها وقفت...غطيتها...وهزيت البوات متاع دوا صورتها...خاطر منجمتش نعرف اذا بالرسمي كيما قالت و لا لا...من اخر مرة تحسنت حالتها معادش سألتها عالدوا...لميت الدبش لي رماتو و طويتو...ظاهر فيه هو لي اختارو...يطلع منو الأستاذ عمر كيما تقول هي...يا ريت يطلع يحبها بالحق...وقتها بالرسمي باش ترتاح من الوجيعة هاذي الكل...عالأقل وحدة فينا ترتاح في الحياة هاذي...اول مرة نحس روحي عاجزة و منجمش نعاون اختي في اللي قاعد يصير...قربت من الشباك نغزرلو...واقف لبرا حاط يديه في مكاتبو...منعرفش علاه نحسو مختلف برشا على خوه...اصلا حتى هو ظاهر فيه مش متفاهم معاه...ندرا كيفاش متحملين عبد كيفو...كل مرة نتذكر لي صار ليلتها...نتقزز من روحي...لا و زيد يهدد من فوق...مستحيل حد في دنيا ينجم يهدني...حتى هو...رغم كلشي يعملو...مانيش باش نرضخلو...و لا حتى نخليه يوصل للي يحب عليه دموعي غالية برشا...باش نزلها على ساقط كيفو...تلفت غزرت لزهرة...باش نظطر نبقى معاها اليوم...منجمش نخليها وحدها...على هذاكا احسن شي منخرجش من البيت...عالاقل باش منظطرش نرا وجهو مرة اخرى.
🔸️عمر يحكي:
فقت الصباح...نحل في عينيا بالسيف...هزيت يدي حطيتها على راسي...نحس فيه باش يطرشق...اصلا منعرفش كيفاش وصلت لدار...كل لي نتذكرو اني بقيت نخلط في الكلام مع حسام...هذا لي قاعد نقول فيه...اما بيني و بين روحي متأكد لهذيكا هي الحقيقة الوحيدة و قد ما حاولت نهرب منها منجمتش...هزيت روحي بالسيف خرجت...دخلت لصالة...لقيتو راقد عالفوتاي تبسمت على جنب...محبيتش نفيقو...اصلا باقي يسمع فيا لوجه الصباح...دخلت لبيت البانو...عملت دوش رتحت بيه اعصابي...بدلت دبشي...و مشيت للكوجينة حضرت لي جا...و رجعت عندو...نهز فيه و نحكي
انا:قوووم...يا ولدي...مش عندك خدمة
حل عينيه مروهج يثبت فيا...هز روحو تقعد...يعدي في يديه زوز على وجهو...طلعت ريدو...نسمع فيه يحكي
حسام:قداش ساعة
انا:توا 9:00
حسام:شنننوة ؟
انا:شبييك ؟
حسام:عندي إجتماع بعد ساعة
انا:عادي تنجم تخلط
حسام:بالمنظر هذا...و زيد دوسي نسيتو في الدار
انا:هيا ملا ازرب روحك
حسام:كلو جرايرك
انا:انت لي حبيت تجي
حسام:باهي...باهي مزال عندنا كلام...متفكرش روحك هربت مني
يحكي و يلبس في الفاست متاعو...هزيت يدي على وجهي نحكي
أنا:هيا...تو تبطى عالاجتماع
حسام:باهي عمر باهي..نراك مبعد
انا:فما فطور...كان تحب
حسام:مش وقتو...إيه قبل ما ننسى
وصل للباب و تلفتلي...تبسم على جنب...يحكي
حسام:هوكا طلع عندك شوية مشاعر...حمد الله كنت خايف عليك
قحرتلو...تبسم و خرج...بقيت واقف في بلاصتي...ظاهر حكيت كلشي عندي البارح...حتى انا شملزني نشرب لهدرجة...فطرت و خلطت على حسام خرجت دريكسيون للمحامي...اصلا أسبوع بقى على الجلسة الثانية...أحسن شي لقيتو في بيروه...دخلت عندو بالوقت...قرب مني صافحني يحكي
هو:أهلا سي عمر...زهرة ويني ؟
انا:تاعبة شوية...نحب نعرف منك شنوة باش يصير في الجلسة...و شنوة لازم علينا ؟
هو:بالطبيعة تفضل
هزيتلو براسي ايه...و قعدت عالفوتاي...قعد مقابلني يحكي
هو:وصلتو لدليل آخر ؟
انا:لااا...اصلا لي نعرفو مراد معادش قرب ناحيتها من نهارت الجلسة
هو:معناها مفما حتى دليل اخر ؟
انا:للأسف لا
هو:معناها باش ناخو باي حاجة و كل شخص ينجم يعاونا
انا:شتقصد ؟
هو:اول حاجة لازمنا تقرير طبي جديد...يأكد انو بعد الفترة لي خرجت فيها من كلينيك...معادش شربت الداو هذاكا...و بالنسبة لطبيب لي كشف على حالتها...يعني لي خذيت من عندو تقرير طبي لي يأكد انو هي تعرضت لضرب...منعرفش اما افادتو يمكن تساعدنا في القضية...عالاقل ينجم يأكد حالتها نفسية
انا:باهي...تو نحكي معاه...باز باش يشهد معانا
هو:باهي...بما انو شهادة امها كانت لصالح مراد...لازمنا شاهد يأكد كلام زهرة
انا:فما صحبتها مريم...نظن تنجم تعاونا...زادة انا مرة ريتو وقت جا لفاك تهدد على طفل يقرا عندي ضربو...و حاول ياخو زهرة معاه بالغصب...وقتها هربت عندي
هو:باهي برشا...يعني حتى انت تنجم تشهد
انا:بالطبيعة
هو:و اي شي اخر اعلمني بيه بالوقت
انا:باهي
جبدت الشاك حطيتو عالطاولة...و غزرتلو...نحكي
انا:هاذي الدفعة الاولى..كيما تفاهمنا
هو:باهي سي عمر عيشك
انا:باش نمشي توا...و كان وصلت لشي نخبرك
هو:باهي
خرجت من عندو...رجعت للكرهبة...منعرفش كيفاش وصلت لشط...فكيت الحزام و تكيت لتالي...نغزر للمطر لي ماشية و تقوى...ذكرت لي صار البارح...تبسمت بوجيعة...مكنتش باش نقربلها مرة اخرى...اما كي العادة منعرفش كيفاش صار اكاكا...منعرفش علاش منجمش نتحكم في روحي...وقت تبدا قدامي...تصرفاتها دخلني بعضي...تخليني نهبل عليها و نهدا فرد وقت...نعرف و متأكد انو مفما حتى شي بينها و بين حسام...نعرف لي قاعدة تتعامل معاه عادي...و يمكن هذا لتأكدت منو وقت بستها البارح...توقعت منها تعمل كلشي...دزني تصيح...حقها و مكنتش باش نلومها على شي...أما استسلامها ليا ساعتها...يدها لي تحطت على خدي في لحظة...شفايفها لي ضعت فيهم...و اللي حسيتو وقتها الكل خلاني نتأكد...انو زهرة مستحيل تكون كيما غيرها حتى سيرين لي كنت نقول اني نحبها...طلع مش حب يمكن عجبتني...ستانست بيها...حبيت بلاصتها في حياتي...اما منجمتش نحبها...كنت ديما نقول...انو مع الوقت...نفهمها اكثر...يمكن بعد ما نعرس بيها...تنقص من حبها لروحها...و هذا لي كنت نلاحظو ديما...اما زهرة قلبت هذا الكل في لحظة...خلاتني معلق في النص
لأول مرة نحس روحي عاجز قدام قرار كيما هذا...لي نعرفو مستحيل ندمر سيرين...على حساب سعادتي مستحيل ندمر أحلامها لي بناتهم معايا في سنين هذوما...مستحيل نجم نضرها حتى هي...قص عليا سرحتي صوت تليفوني...استغربت كي لقيتو يطلب فيا توا...هزيت عليه بالوقت نحكي
أنا:أهلا آمين
امين:وينك يا راجل...لا تطلب و لا تسأل حتى
انا:خدمة ماك تعرف...متاخوش بخاطرك مني
امين:نعرف صاحبي نعرف...و انا على هذاكا كلمتك
انا:شقصدك ؟
أمين:عندي عرض ليك
انا:عرض شنوة ؟
امين:فما مشروع كبير...يحبو على مهندس...يعني فرصة كيما هاذي...صدقني باش تهزك لبعيد...زادة كان تحب تكمل تقري هوني مفماش مشكلة...تنجم تخدم الزوز مع بعض...و بما انك باش تعرس...تو نلقالك دار فيسع...تليق بيك و بالمدام...عجبهم تصميمك لي عملتو قبل خمس سنين...و هاذي ثاني فرصة تجيك بعد اخر خدمة معاهم...خمم بالقدا عمر...معادش جيك فرصة هكا مرة اخرى...صدقني تنجم تقول لهي فرصة العمر خاصة مع شريكة كبيرة كيما هاذي
بقيت نسمع فيه لتالي...من غير ما نقاطعو...منعرفش علاه حسيت للخدمة هاذي جات في وقتها...تنهدت بالقاوي نحكي
انا:باهي امين...نخمم فيها الحكاية...ابعثلي المعلومات الكل في الإيميل...و انا مبعد نكلمك
أمين:هيا باهي...نكلمك مبعد
انا:باهي
كبست على التليفون اكثر...و نزلتو...طلعت راسي...نغزر للمطر اللي قاعدة تزيد...اول مرة ناخو قرار من غير ما نخمم مرتين...يمكن هذا باش يكون احسن حل لينا الكل انا و سيرين و زهرة...بلكشي البعد ينسيني فيها...و الوجيعة تكون اقل من هكا...اول ما نطمن لي مراد بعد عليها...و هي رجعت لحياتها عادي...وقتها معادش نبقى هوني جملة...منحبش نضرها...يمكن بالطريقة هاذي تنجم تبدا من جديد...اصلا هذا لي لازم يصير...منعرفش قداش تعدا وقت بالظبط...ساعات تعدات...محسيتش بيها...حتى الطبيب لي كنت باش نمشيلو نسيتو...اول ما ضرب في راسي...خدمت الكرهبة...و طرت للكلينيك عرفت منهم لهو خرج...رجعت للكرهبة...باش نولي لدار هزيت تليفوني...كلمتها متردد باش نخبرها...انو لازم تعاود التحاليل...اول ما ردت...خذيت نفس نحكي
أنا:زهررة
مريم:انا مريم
عقدت حواجبي مستغرب...فكرة لهي خرجت من الدار و مشات لمريم وحدها دخلتني بعضي...عقدت حواجبي نحكي
انا:مريمم !! شنوة يعمل تليفونها عندك ؟
مريم:زهرة راقدة توا
انا:وينكم نتوما ؟
مريم:أنا جيتها صباح...خاطر كانت تاعبة شوية...و هوكا مزلت نستنى فيها تفيق
انا:باهي مسافة الطريق...متقلهاش لأنا كلمتك باهي
مريم:باهي
دورت الكرهبة...و طرت بيها...محسيتش بروحي كيفاش وصلت...خذيت نفس و نزلت...حاولت قد ما نجم ما نظهر حتى شي قدامهم...خاصة امي فتحية...أول ما دخلت...لقيتهم الكل عالعشا...كان هي...غزرتلي أمي فتحية تحكي
فتحية:جيت في وقتك...تفضل عزيزي
انا:لا أمي...صحة ليكم...انا باش نستنى حسام الفوق
عملي براسو شفما...فهمتو من بعيد لي نحب نراها حسيتو فهم عليا...أول ما طلعت...لقيت مريم باش تدخل عندها...في يدها صينية...وقفتها نحكي
انا:مريم
مريم:أهلا مسيو عمر
انا:شبيها ؟
مريم:منعرفش شبيها بالظبط...أما نفسيتها ياسر تاعبة
انا:هات عليك...انا باش ندخل عندها
شديت عليها صينية...غزرتلي ندرا كيف...عقدت حواجبي نحكي
أنا:شفما مريم ؟
مريم:شي مسيو عمر...رد بالك عليها...نستنى فيك هوني
هزيتلها براسي ايه...مع أنو متأكد فما كلام...كانت تحب تقولو اما فضلت انها تسكت...كبست عالصينية في يدي و دخلت...سكرت الباب ورايا...و قربت منها...نغزرلها غاطسة في نوم...حطيت صينية عالتابل دونوي...و قعدت على طرف السرير...نغزرلها...هزيت يدي...حطيتها على خدها...بعدت خصلات شعرها لتالي...من وجها ظاهر فيها تاعبة...باقي نعدي في صوابعي على خدها لين بدات تفيق...تحل في عينيها بالسيف...تغزرلي و تثبت فيا...هزت روحها شوية...رجعت شعرها لتالي تحكي
زهرة:ع..عمر
غمضت عينيها بالقاوي...و رجعت حلتهم...خذيت نفس نحكي
انا:شبي حالتك هكا ؟ شصاار ؟
زهرة:ش..شتعمل هوني أنت...و كان يراك حد معايا
جات باش تقوم...شديتها من زندها كبست عليها نحكي
انا:خليك في بلاصتك
زهرة:ا أما...ع عمر أنا
انا:ماكش باش تقوم حتى تفهمني شبيك
زهرة:ش..شي...تاعبة و كهو
استندت بيدي عالفرش...و قربتلها شوية...دخلت بعضها اكثر...وجها احمر باش يطرشق...دورت عينيا على وجها نحكي
انا:نسمع فيك
زهرة:ع..عمر...و والله مفما شي...هاني باش نقوم توا
جات باش تقوم...كبست على زندها اكثر...جبدتها عندي جا وجها مع وجهي...غزرتلي ندرا كيف...منعرفش علاه حسيتها خايفة مني...هزيت يدي لاخرى...نعدي في صوابعي على خدها و نحكي فرد وقت
انا:زهرة...اغزرلي...ما نحبك تخبي عليا حتى شي...و منحبش نراك هكا...باهي
زهرة:ع..علاه جيت أنت ؟
انا:معناها إنتي هكا بسببي انا ؟
هزتلي براسها لا...تغزرلي ندرا كيف...طلعت حاجبي نستنى فيها تحكي...هزت يدها...حطتها على يدي لي فوق خدها...كبست عليا تحكي
زهرة:ع..عمر...انا خايفة برشااا...خايفة من اللي قاعد يصير...و خايفة من اللي باش يصير زادة...كان صار و انا خسرت القضية...مراد ماهوش باش يخليني...و انت باش تعرس...معناها باش نولي لنقطة صفر...كلشي يرجع كيما كان في الأول
بقيت نغزرلها...منعرفش علاه حسيتها تلوم فيا بكلامها منعرفش علاه حسيتها خايفة مني كان نجبد بيها في نص الطريق...رخفت يدي على زندها...رجعتلها شعرها لتالي نحكي
انا:زهررة...منحبكش تذبل من توا...مهما صار انتي لازمك تبقى قوية...نعرف لانا و انتي ثنية مسدودة...اما مانيش باش نخليك جملة...عرسي من سيرين...ماهوش باش يبعدني عليك...باش نبقى وراك ديما...القضية باش تربحها...و طول ما انا عايش مراد ماهوش باش يقربلك و لا باش يحط يدو عليك جملة...حط هذا في راسك معادش نحب نراك في الحالة هاذي باهي
زهرة:توعدني ؟
كبست على خدها اكثر...و هزيتلها براسي ايه...نحكي
انا:وعد
قربت مني اكثر...دورت يديها زوز على رقبتي..حضنتني بالقاوي...جمدت في بلاصتي...متوقعتش باش تعمل هكا هزيت يدي حطيتها على ظهرها كبست عليها...النفس متاعها روهجني...نزلت راسي شوية...خذيت نفس من ريحة شعرها...نحكي
انا:اخر مرة نراك في الحالة هاذي...صدقني انتي باش تكون مليحة...باش يجي وقت معاد تحتاج لحتى حد حتى انا...باش تكون قوية لهدرجة يعني
كبست عليا اكثر...منعرفش علاش حسيتها خايفة من اللي باش يصير...منعرفش اذا قاعد نقوي فيها و لا في روحي...فكرة لانا معادش باش نجم نقربلها مرة اخرى قاعدة تخنق فيا...توا برك...فهمت انو احسن شي نبعد عليها...باش ما حد فينا ما يتظلم اكثر...خاصة هي...يزي لي تعدا عليها...اصلا منعرفش علاه نحسها صغيرة برشا...و مستغرب من روحي اكثر...كيفاش قاعد نتعامل معاها...مش من عادتي نوسع بالي مع حتى حد و لا ندخل في حد...منعرفش كيفاش و امتى دخلت لحياتي كيفاش عطيت لروحي فرصة نستسلم للي نحس فيها و نحبها...للحظة تمنيت كان تولي متاعي...كان نجم نملك الحق باش نقول الكلمة هاذي...اما لي تعودت عليه...انو حياتي ديما تمشي بالعكس...و اللي نحبهم نخسرهم بيدي...فقت من سرحتي...كي جبدت روحها مني شوية...كبست على خدها و تبسمتلها نحكي
انا:لباس توا ؟
هزتلي براسها ايه...خذيت نفس..منحبش نتوتر قدامها اكثر...تبسمتلها نحكي
انا:هيا باش تاكول توا...منحبش نمشي و نبقى متحير عليك
بقات تغزرلي من غير حتى كلمة...مديت يدي هزيت الصينية...حطيتها عالفرش قدامها...نحكي
انا:هيااا
زهرة:ا اما
انا:ماكش باش تتهرب مني...هيا فيسع
زهرة:باهي
هزتها في يدها...تاكول بالسيف...بقيت نغزرلها...هزيت روحي وقفت...ندور في عينيا عالبيت...تبسمت على جنب نحكي
انا:ظاهر بيتك هوني احلى
زهرة:عادي...حتى مراد كان عاملي بيت احلى منها
دورت راسي غزرتلها...تحكي و تلعب بالماكلة...منعرفش علاه حكات بالطريقة هاذي...اصلا كي كانت عندي البيت دوب نجمت ترتبها باش تبقى فيها...خاطرها صغيرة...و ما فيها حتى شي...كان الكنبة و القاردروب ما نجمت نحكي حتى شي...خاصة كي حكات على مراد...قربت من التابل دونوي...جات عيني عالبوات متاع دوا...هزيتها في يدي مستغرب...نحكي
انا:زهرة شنوة هذا ؟
طلعت راسها غزرتلي مصدومة...حطت الصينية من يدها...و وقفت...قربت مني...وقفت قدامي تحكي
زهرة:م..مش اخر مرة طبيب عطاني دوا هذا...و قالي اشربو وقت يوجعك راسك و هاك انت بيدك شريتو
انا:مزلت تشرب فيه لتوا
زهرة:ساعات يوجعني راسي برشا...منجمش نتحمل والله
كبست عليه في يدي...حاولت قد ما نجم نشد روحي باش منصيحش...و لا نعمل حاجة نندم عليها...خذيت نفس نحكي
انا:علاه مخبرتنيش...مش سألتك من قبل كان مزلت تشربو و قتلي لا ؟
زهرة:ا انا
انا:شنوة ؟
زهرة:ا انا...انا
انا:شننوة ؟
قربت مني اكثر...حطت يدها على يدي...باردة عاللخر كبست عليا تحكي
زهرة:خفت كان تاخو مني...والله الوجيعة قوية عمر خفت تشدني كريز و نتفضح قدام الجماعة حشمت منهم...منحبش نولي في نظرهم وحدة مدمنة أمانك من غير ما تصيح توا...كان تحب اسأل طبيب هوما جيست ينقصو الوجيعة متاع راس و كهو والله مش مهدئات
تنهدت بالقاوي...هزيت يدي حطيتها على ظهرها...قربتها ليا اكثر...حضنتها نحكي
انا:ششش اهدا...انتي ماكش اكاكا و معادش نحبك تعاودها الكلمة...انا جيست خفت عليك...في بالك المحامي طلب تحاليل جديدة باش يثبت انو انتي ماكش تاخو في دوا...في الفترة هاذي
جبدت راسها شوية...غزرتلي مصدومة...تحكي
زهرة:ش..شباش نعمل...اذا أثر دوا هذا فيا ؟
انا:صدقني منعرفش...كان طلع كيما راك تحكي ماهوش باش يأثر فيك...حاول متشربوش...اليومين هذوما بعدها نحكيو مع طبيب...بلكشي فما حل غير الحرابش هذوما
زهرة:باهي كان هكا
رجعت حضنتني...حسيت بيها ترعش...ضيقت عينيا نحكي
انا:شبيك ؟
زهرة:بردت
كبست عليها اكثر...و نزلت بستها من راسها...نحكي
انا:هيا ملا...ادخل لفرشك...ميجيش فتحية تدخل تلقانا هكا...مانيش باش نسلم منها مبعد
جبدت روحها مني تضحك...تفرهدت شوية كي ريتها ضحكت...قربت معاها لسرير...خليتها تسطحت...و غطيتها...غزرتلي تحكي
زهرة:متمشيش
هزيتلها براسي ايه...قعدت على طرف السرير نغزرلها دوب تسطحت غفات...اصلا ظاهر فيها تاعبة عاللخر كبست على البوات متاع دوا في يدي...نحس في راسي باش يطرشق...اللي نعرفو...انو بالطريقة هاذي...قاعد نضيع فيها اكثر...معادش نعرف كيفاش نتصرف معاها و منجمش نقول لحسام رد بالك عليها خاطرها باش تتغشش كان تسمع لهو يعرف بالحكاية تلفت نغزرلها أحسن شي رقدت...قص عليا صوت تليفوني ينوقز لقيتها سيرين تطلب...هزيت عليها نحكي
انا:شتحب سيرين ؟
سيرين:لازمنا نحكيو
انا:باهي...أما مش توا
سيرين:إمتى ؟
أنا:منعرفش...مبعد نكلمك
سيرين:أما
انا:تصبح على خير
علقت عليها من غير حتى كلمة اخرى...اصلا معادش نعرف في شنوة نفكر بالظبط...أهم شي لازم توا...انو هي تربح القضية...عالاقل بالطريقة هاذي...نطمن عليها باز مانيش باش نخليها قبل ما نطمن لهي ماهيش باش تحتاج لشي...و تنجم تعيش حياتها مرتاحة
🔸️حسام يحكي:
هزيت روحي خرجت من صالة...عالاقل باش امي متحسش لعمر مع زهرة الفوق...مع انو ماهوش باش يخفى عليها شي هكا...احسن شي المجودرة هذيكا معاهم الفوق...طلعت الدروج وحدة وحدة...ضيقت عينيا كي ريتها متكية عالحيط...مقابلة الباب...يطلع منو عمر...خلاها برا...باش يستفرد بالطفلة...اصلا متأكد لزهرة مش قد بعضها اليوم...يعني هذاكا الظاهر...كنت باش ندخل لبيتي...اما تذكرت فازة الصباح...قربت منها شوية..هزيتها و حطيتها نحكي
انا:يعني متنجمش تدخل لبلاصة و تقعد فيها كيما العباد
مريم:اخطاني احسنلك...مانيش ناقصتك
قربت منها اكثر...جات باش تبعد...حصرتها بيديا زوز...و نزلت عليها اكثر...جا وجها مع وجهي...تبسمت على جنب نحكي
انا:مش قتلك معادش تظهر قدامي ؟
هزت يديها زوز...حطتهم على صدري...دز فيا لتالي و تحكي
مريم:و الا شباش تعمل اه...شباش تعمل ؟
شديتها من يديها زوز...كبست عليهم...و طلعتهم لفوق قربت لشفايفها اكثر...نحكي
انا:متخدمش مخك معايا...راك باش تندم
مريم:ابعععدني يااا سااقط...ابعد...و لا باش نصيح و نلمهم عليك
انا:جرب حل فمك...هيا صيح
بقات تغزرلي بغش...كبست على يديها اكثر..لين حسيتها توجعت...حاولت تفك روحها تحكي
مريم:سييبني...قتلك معادش تحط يدك عليا
انا:ششش...اسكت...فمك هذا تسكرو...مكانش نخليك تسكت بطريقتي
مريم:منستغربش منك...العباد لي كيفك مخها كان في الخمج
تبسمت على جنب...غريبة كيفاش متنجمش تسكت...و الكلام على راس لسانها...جيت باش نقربلها اكثر منعرفش فاش كنت نخمم ساعتها...حسيت بخطوات من تالي...جبدتها من يدها...و دخلتها لبيتي...ضربتني لكتفي تحكي
مريم:فاااش تعمل...سييبني ؟
دزيتها عالحيط...حطيت يدي على فمها باش تسكت نغزر من شق لباب...لامي...لي ماشية لبيتها...أول ما طمنت لي هي دخلت...تلفتلها..تفرفط تحب تجبد روحها قربتلها اكثر...نزلت نحكي في وذنها
انا:هاني باش نزل يدي...و جرب حظك تصيح
هزتلي براسها إيه...نزلت يدي شوية...تبسمت على جنب تستفز فيا...أصلا مستغربتهاش منها...جات باش تصيح سبقتها كي نزلت عليها بالوقت...عضيتها من شفتها اللوطانية بالقاوي...دزتني بيديها لتالي...شديتهم و دزيتها لتالي...كبست عليها...و جبدت روحي منها نحكي
انا:قتلك متخدمش مخك معايا...المرة الجاية صدقني ترصالك في حاجات أكبر...متنجمش تتوقعهم عزيزتي حاجات يخلوك تبكي حياتك الكل
مريم:متحشمش...سااقط و واطي...صدقني كان تموت ماكش باش ترا دموعي...خاطرهم غاليين برشااا منجمش نزلهم على واحد كيفك...و توا ابعدني...خليني نخرج أحسنلك
انا:مزال حسابي موفاش معاك...اتو نتقابلو مرة اخرى...برا اقلب عليا منظرك توا
مريم:اعمل لي تحب عليه
تبسمتلي ندرا كيف...و خرجت من البيت...خلطت عليها كنت باش نحكي...أما سكت كي ريت عمر خارج من بيت زهرة...سبقتني تحكي
مريم:مسيو عمر...ميسالش توصلني في طريقك
عمر:باهي...هيا
مريم:باهي لحظة
دخلت لبيت زهرة...قربت من عمر شوية...نحكي
انا:شبيها زهرة ؟
عمر:منعرفش...أما خايفة من الجلسة
انا:فما جديد ياخي ؟
عمر:لازمني نحكي مع الطبيب متاعها
انا:باهي...باز باش تتحل القضية هاذي...اصلا هذا لي لازم يصير
عمر:ان شاء الله
تلفت نغزرلها...لبست كبوطها...و قربت منا تحكي
مريم:مسيو عمر نستنى فيك برا
نزلت من غير حتى كلمة...تلفت عندي غزرلي ندرا كيف يحكي
عمر:شعملتلها ؟
انا:شعندي نعمل لفرخة كيفها
عمر:ظاهر الفرخة هاذي...باش تعبك برشا يا صاحبي
ضربني لكتفي...و تبسم على جنب...عديت يدي على شعري...نحكي
انا:لااا عاااد...متخافش عليا
عمر:ههههههه باهي...رد بالك على زهرة...و كان صار شي كلمني
انا:باهي...خليني نوصلك للباب
عمر:نعرف الطريق...برا ارتاح على روحك...يزي ما مرجتك معايا البارح
انا:احسن طلع عندك شوية رحمة
عمر:ههههههه برا اخطاني مانيش ناقصك
انا:ههههههه تصبح على خير
عمر:و انت بخير
اول ما نزل...دخلت لبيتي...قربت من الشباك...طلعت الريدو نغزرلها...واقفة لبرا...مع انو ياسر البرد...اما واقفة عادي..كبوطها محلول...طلعت راسها شوية غزرتلي نجمت تشوفني...خاطر ضو الفيلا شاعل...هزت يدها في وجهي...منعرفش شنوة لي كانت شداتو...ريتها...كي قربت من الكرهبة متاعي...ظاهر تخبش فيها...تبسمت على جنب...نعرف لي قاعدة تستفز فيا...اول ما شافت عمر...تصرفت كانو مفما حتى شي...تبسمتلي بنصر و ركبت...رديت الريدو...و ترميت عالفرش...وحدة بوحدة يا مريم...مبعد نرا شنوة ردة الفعل على العملة هاذي...الا ما نخليها تندم الدوبل...اكيد في النهاية عندها حدود لقوتها...و هذاكا لباش نوصلو انا في الاخير.
#زهرة 🌸
#سمر_القايد 💜