وجهت المسدس عليهو وقالت بي كل شراسة : سلم نفسك
قال : بقيتي قوية زي ما قلت ليكي زمان.. ويمكن اقوى؟!
.
.
- اسم المعزوفة دي شنو؟
- اسمها cukur.. بتعرفيها؟
.
.
- بس الزول ده ما غريب علي.. انا متأكدة اني بعرفو!!
.
.
قالت بي صوت مليان حزن وعيون مليانة دموع : زين انا اتذكرت!! اتذكرت كلو حاجة!!
...
- اخاف ان يفنى بنا العمر ونحن نتخيل الأشياء على امل ان تحدث، ولا تحدث.
- لا أعرف المعنى وراء كل ما يجري، أنا فقط أستيقظ وأنا متعب، وأنام وأنا متعب أيضًا، شيء ما أريده أن ينتهي حتى أرتاح، ولا أعرف ما هو.
...
كانت قاعدة في الحديقة براها وشاردة في بيت من ضواحي امريكا عامل بالشكل ده 👇🏼

بس الفرق انو بيتهم كان فيهو سور كبير وحرص برا
شافتو جاي من بعيد وابتسمت
قعد وقال : مالك قاعدة براك كده؟
- حسيت اني عايزة اقعد مع نفسي شوية
- يعني انا اقوم ولا كيف؟
- لا لا ما قصدي كده اقعد ساي
- في حاجة مضايقاك؟
- لأ
- متأكدة
- طبعاً
تكل ضهرو على الكرسي وعاين للسما الصافية والفيها شوية غيم.. اخد نفس وطلعو بس بي صوت كأنو تعبان او فيهو شوية ضيقة قام قال : عرسها قرب.. ما تصدقي انا متحمس قدر شنو بس في نفس الوقت زعلان.. حتمسخ لي البيت ياخ
- اي جد ياخ حتمسخو شديد وما ليك براك لينا كلنا.. بس برضو حيسكنو قريب ف ما تشيل هم وده صحبك الحيعرسها ف اتأكد تماماً انها حتكون آمنة وتحت الحفظ والصون.. انس وانا بعرفو كويس
داعبها بي اصبعو في ارنبة انفها وقال : بالمناسبة.. ما تتكلمي كده كأنو هو حبيبك
صرت ليهو وقالت : اففف زييينن ياخي!! ما بحب الحركة دي انا 😀..
(الحركة العملها ليها قبلي شوية)
عمل فيها رايح وقال وهو بيضحك : ياتو حركة؟
- انت عارف ما تعمل رايح
زين : اعصابك اعصابك يا انسة لمار
جاها تشوش وقعدت تشوف شكل زول وهو بيقول ليها انسة لمار بس طشاش طشاش
مسكت راسها وصرت وشها
لاحظ ليها قام قال بي قلق : مالك؟
لمار : ماف حاجة؟
ضيق عيونو وقال : متأكدة
قعدت تضحك وقالت : زين عليك الله تاني ما تعمل الحركة دي
(قصدها حركة تضييق العيون)
ضحك وقال : لي يعني؟
لمار : بتضحكني
قعد يتأمل في ضحكتها بعدها قال : اضحكي ساي جعل محد يضحك غيرك
ابتسمت بس.. سكتو مسافة بعدها قال : جاتك نفس حالة المرة الفاتت؟
لمار : كيف يعني؟
زين : لمن كشرتي ومسكتي راسك
الابتسامة زحت من وشها لمن قال ليها كده قامت قعدت تعاين في الأرض وقالت : اي.. ما عارفة ده منو يا زين.. شفت طشاش تاني والمرة دي كان بيقول لي يا انسة لمار زي ما انت قلت بس شكلو كان مختلف
زين : قلت ليكي نرجع السودان عشان تتذكري يا لمار بس انتي ما بتسمعي كلامي
لمار : نرجع السودان؟ ما عايزة.. ما عايزة ارجع.. كلو ما اتذكرو يا زين بحس انو في ذكرى سيئة بتربطني بيهو! مع اني بحبو بس ما بحب زول يجيب لي سيرتو!! ما عارفة ليي..
كان عايز يخت يدو في ايدها عشان يطبطب عليها بس اتذكر انو كده ما صح وفضل انو يواسيها بالكلام
زين : لو ما واجهتي مشاعرك هسه حتواجهيها متين؟
لمار : ما عارفة يا زين.. مع اني ما بحب افضفض بس حتكلم.. كلو ما في الموضوع حاسة اني ضايعة
زين : واجهي مشاعرك وانا حساعدك عشان تطلعي من دائرة الضياع دي.. في النهاية انا صحبك وزي اخوكي ف حساعدك وما حخليكي براكي
لمار : شكراً يا زين.. عايزة اصارحك بي حاجة ممكن؟
زين : احكي
لمار : انا قررت انقل في شقة براي
زين : كيف يعني الكلام ده؟ البيت هنا واسع وانتي ما بتعرفي زول غيري وغير ميرال هنا في امريكا دي وما ممكن تقعدي براكي ممكن عادي في البلد دي تتعرضي للقتل او غيرو وانتي بت براكي.. جنيتي انتي؟
قامت وقالت : ما تتكلم معاي بالطريقة دي!!
زين : معليش ما قصدي وانا عايز مصلحتك ما اكتر
قالت ليهو وعيونها ملانة دموع : انا ما قصدي كده.. انا قصدي هو.. البيجيني على شكل طشاش ده.. كلو مرة بتذكرني بيهو.. رجاء.. رجاء يا زين غير طريقتك دي لأنها ما عاجباني.. ما عشان هي طريقتك بس انت عارف..
قالت : ياخخخ وختت يدها ع راسها
ده كلو عشان ما عرفت تعبر ليهو وتوصل ليهو فكرتها.. ما عرفت تقول ليهو شنو وخافت يفهمها غلط ويزعل من كلامها وده هي البتفكر بيهو بس هي ما عارفاهو فاهمها كويس
سكتت مسافة بعدها قالت : غيرها عشان انا ما عايزة يجيني شعور الطشاش ده تاني ولا المشاعر والوشوش المبهمين ديل
...
جا راجع من حفلتو الموسيقية منهك ومتعب شديد ورقد من غير يغير هدومو
بعد ٣ ساعات قام من السرير بي تعب وبعد جهد جهيد.. اتجه على المراية
عاين لي شعرو الاسود الطويل والغزير ولي دقنو وشنبو المغطيات وشو من شدة غزيرات والظاهر عليهو ما حلقهم ليهو زمن طويل لأنو حتى ما خففهم ولو شوية
من غير مقدمات عيونو اتملت دموع
كان بيكلم نفسو في المراية وقال : عارف انك ضعيف.. لي ما قدرت تتجاوزها وريني؟
رد على نفسو وقال : لأنها مميزة.. مختلفة عن غيرها.. هي غير كل بنات حواء ديل كلهم!! هي حواء مختلفة
شاف طيفها وهو جاي عليهو، كانت بتضحك وبتقول : ادهم حبيبي
- لي ما عايزة تفارق تفكيري؟؟ هي خلاص ماتت!!
عليك الله.. عليك الله ابعدي مني.. انا ما عايز اتخيلك.. ما عااايز
كان بيقول كده وهو بيبعد منها وبيأشر ليها بيدو بمعنى انو تقيف او كأنو عايز يحمي نفسو من طيفها لحدي ما وقع في الأرض..
قام وهو معصب شديد وكان بيكورك.. كان فاقد السيطرة على نفسو بطريقة ما عادية قام ضرب المراية بي قبضة يدو لمن جرحها وبعد ده كلو ما اكترث لي جرحو العميق النجم ليهو عن ضربو للمراية.. اتوجه على الحمام استحمى واتوضى ومشا يصلي
...
شافت صحبتها وهي داخلة البيت معصبة قامت قالت ليها : لمار مالك؟
لمار : ماف حاجة يا ميرال
ميرال : يا بت ماف حاجة كيف شوفي وشك ده عامل كيف!!
جا لاحقها وهو بيقول : لمار لمار.. لمار وقفي! انا اسف والله ما كان قصدي والموضوع ده ما بيدي وما كنت عارف أصلاً!! انتي عارفة انو انا دي طريقتي كده في الكلام اسألي ميرال دي وانتي بحد نفسك عارفاني من أربعة سنين!!
ميرال : بسم الله مالكم يا زين؟!
لمار : يا بت ارح ارح الاوضة انتي عرسك قرب ما تشغلي نفسك بالموضوع ده كتير
زين : لمار
لمار : خلاص انا ما زعلانة يا زين
ميرال : يا جماعة فهموني حاجة!! مالكم؟! كدي بالهداوة كده احكو لي عشان ما اكون زي الاطرش في الزفة!!
زين حكى ليها كلو شي قامت قالت : بس يا لمار زين ما عمل حاجة غلط.. صدقيني ما عشان اخوي ولا بدافع عنو بس انتي مصيرك تتذكري.. وانا ذاتي حساعدك تتذكري ومعانا انس وابوي ومؤيد ذاتو لمن يجي.. ما هو مستحيل نخليك براكي حقيقة يعني ولازم تتذكري.. ما ترفضي وتكابري لأنو والله ما ممكن البتعملي في نفسك ده.. واجهي مخاوفك يا اختي
سكتت بس اما ميرال اتجهت عليها وحضنتها قامت قالت : اعملي حاجة عشان نفسك ولو لمرة وحدة بس يا لمار
لمار : بس يا ميرال انا تعبت.. تعبت وانا بحاول اتذكر.. اعمل شنو وانا عارفة انو الذكريات الانا بحاول اتذكرها دي حتكون سيئة وانا متأكدة.. احساسي أبداً ما بيكذب!! بعدين انا لا عارفة اهلي ولا ناسي ولا سكني وين في السودان وفي ياتو منطقة او في ياتو ولاية.. ويمكن أساساً ما عندي
ميرال : ولو سيئة نحن معاكي.. بعدين ما تتشائمي!!
بعدين انتي لمتين حتفضلي كده؟؟! ما هو لازم لازم تتذكري يا لمار!!
لمار : حاضر يا ميرال ححاول.. زين اسفة اني هجت فيك.. معليش بس اعصابي باظت لمن لقيت
زين : هششش.. فاهمك انا..
تاني ابتسم وقال : اها، صافية لبن؟
ابتسمت وقالت : اي بس انا المفروض اقول ليك كده!!
زين : انا نهائي ما بزعل منك
ميرال قعدت تتضحك وتشغلا ليهم
قال ليها وهو مبتسم : هيي مالك؟
ميرال : احم مالي
ورفعت ليهو حواجبها مرتين
حاولت تذوق منهم بالكلام عشان ما يشغلوها ليها قامت قالت : شنو رايكم اعمل ليكم ايس كوفي؟
رفع يدو وقال : معاك
ميرال : ولي يعني لمن اقول ليك اني عايزة اعملها بتقول ما عايز
ضحك وهو بجرها من خدها قام قال : انتي بتخربيها يا عسل
ميرال : حييييي انا من لمار دي.. نبقى ليك لمار ولا شنو + فكني حتقلع لي جضومي دي من محلها
لمار : يا عفنه.. ملاحظة انك بتغيري من صحبتك؟
قعدت تضحك قامت قالت : صدقيني يا حمارة اني بغير عليكم انتو الاتنين بي مؤيد
زين : على سيرة مؤيد.. قال حيجي بكرة
قالت بي فرحة واضحة على وشها وعلى نبرة صوتها : احلف!! ولي ما كلمني؟!
زين : ما عارف
لمار قالت ليهو بي همس : يا بلييييدد يمكن داير يعملها ليها مفاجأة !!
ضرب بي يدو على جبينو : اووبسس!! ما فكرت فيها
لمار : واي من غبائك يا زييينن
ميرال : قعد تقولو في شنو انتو الاتنين؟
قالو في نفس الوقت وبنفس حركات اليدين لمن تجي تنفي حاجة : لا لا ولا حاجة
قعدو يضحكو ويتونسو وسو ليهم ايس كوفي مشو بيهو الحديقة بعدها كلو واحد فيهم طلع واترمى في سريرو
قبل الفجر كده لمار صحت وحست كأنو في زول بيعزف
استغربت وقامت من سريرها.. نزلت تحت ونظرها وقع على الصالة البابها باللون البني وطالع من تحت بابها نور..
الفضول شداها وكانت عايزة تشوف البيعزف بالبيانو بإحترافية ده منو؟ خمنت من عندها انو ده زين لأنو ميرال ما بتعرف تعزف
اتجهت على الغرفة دي وفتحت الباب براحة واتفاجأت بيهو قاعد تحت ضو القمرة.. وبيعزف❤️.
صح انو مضلم الغرفة وفاتح التبريد على أعلى حاجة بس على الرغم من كده ضو القمر كان ساطع بشدة ومدي اطلالة حلوة شديد للمكان ف كان منظر اسطوري
خشت وقفلت الباب براحة.. مشت عليهو بخطوات بطيئة.. ما عرفت تقول شنو ف فضلت ساكتة
حسا انو في زول وراهو قام قبل لقاها زي هي ولقى دموعها نازلة
استغرب وقال : بسم الله لمار!! مالك؟!
لمار : اسم المعزوفة دي شنو؟
زين : اسمها cukur.. بتعرفيها؟
لمار : لأ.. بس..
زين : بس شنو؟
لمار : حاسة اني بعرفها او سمعتها قبلي كده
زين : لمار.. نحن لازم نرجع السودان عشان تتذكري كلو شي.. ما بقدر اشوفك بالحالة دي انا
لمار : طيب يا زين بشوف بشوف
جاب ليها كرسي وقال ليها : اقعدي
قعدت وهي مستغربة وما قالت حاجة
زين : مش قلتي لي قبلي كده انك بتحبي العزف والغناء
لمار : اي
زين : بما انو صوتك حلو ف حساعدك اذا عايزة تعملي أغنية
عاينت ليهو وعيونها فيها لمعة وقالت : احلف يا زين؟!
زين : والله.. جادي معاك.. وبالمناسبة خليكي جاهزة لأنو عايز اعرفك على مؤيد ده الليلة
لمار : كويس.. يلا نبدا.. علمني يا سيد زين
ابتسم وبدا يعزف
بعد انتهى قال : عجبتك؟
قالت ليهو بي فضول : اي شديد اسمها شنو الموسيقى دي طيب؟
قبلي ما يرد عليها شافت وش الراجل البتشوفو كلو مرة ده وهو بيقول ليها : اسمها fake love
ما حبت توري زين بالحاجة الحصلت ليها هسي دي بس اتفاجأت لمن لقتو بيقول ليها : اسمها fake love
لمار : شكلي بسببك حبقى محترفة في العزف يا زين
ضحك وقال : ما تكبري لي راسي
ضحكت فيهو وفي كلامو
زين : دقيقة في جيتار فوق حجيبو وحجي
لمار : طيب حنتظرك وححاول اعزف في المسافات دي
زين : كويس هَنِي
قعدت مسافة وزين لسه ما كان جاها.. حست بي حركة وراها ولمن قبلت اتخلعت لمن لقتو زول طويل متجمد في مكانو وبيعاين ليها بي ذهول.. طبعاً هي اتهجمت وكانت حتصرخ بس هو ما اداها فرصة وطوالي قفل ليها شفايفها بي يدو
كانت بتعاين ليهو بي دهشة وخوف في نفس الوقت.. ضربات قلبها كانت سريعة وعالية ل درجة انها خافت انو يسمعها
بعد استوعب دي منو الواقفة قدامو قال : لمار؟؟!
ما استناها ترد طوالي زحا منها وبدا يتراجع لحدي ما وصل باب الصالة
فتحو ومرق بس لقا زين قدامو..
زين : مؤيد؟! انت جيت متين؟ ولي ما وريتني واتسحبت زي الحرامي يمعفن!!
مؤيد : زين
سلم عليهو سلام حار بس برضو زين لاحظ ليهو ما ياهو
وجات تمت الناقصة لمار لمن جات طالعة من الصالة.. وقفت جنب الباب لمن لقتهم الاتنين جنب بعض.. عاينت لي مؤيد مسافة بعدها لي زين وطوالي مشت فوق على غرفتها
زين : مالا؟ عملت ليها حاجة يا مؤيد انت؟
مؤيد :.........
زين : اافف يا ربي.. شوف نادي دانيال يشيل ليك شنطك يطلعها ليك فوق وانا حمشي اشوفها مالها تمام؟ وتعال لاحقني!!
هزا راسو بمعنى طيب ومشى برا لي دانيال
طلع ليها لقاها بتلم في ملابسها وجايطة.. بتمشي وتجي تمشي وتجي في الغرفة من اولها لي آخرها
زين : ده شنو؟ وماشة وين انتي والحتة مضلمة وفي وقت زي ده كده؟
لمار : ممم م ما عارفة يا زين
حسا بيها مضطربة شديد قام جا عليها.. مسكها من يدها وقعدها في طرف السرير وجرا ليهو كرسي قعد قدامها
قال بي صوت هادي : مالك؟ وريني في شنو؟
هزت راسها بمعنى لأ
زين : مؤيد صاح؟ مؤيد عمل ليكي حاجة؟ انا متأكد انو مؤيد لأنو طلع من الصالة..
لمار : حاسة اني بعرفو بس ما قادرة اتذكر يا زين!!
ما عارفة لي ذاكرتي خانتني بالسهولة دي ليي؟ انا عايزة ارجع السودان يا زين.. عايزة ارجع السودان.. رجعني
زين : لمار حبيبي.. اهدي طيب وبوعدك بعد عرس ميرال طوالي، حنمشي السودان وحتتعالجي
هزت ليهو راسها بس وسكتت
قرب منها ومسح ليها دموعها بعدها دنقر وقعد يفكر
مؤيد جا وشافو وهو بيمسح ليها في دموعها.. صح انو اتضايق بس كتمها جواهو قام قال : احمم.. عارفك هسه بتفكر في شنو يا زين!!
بعدها عاين لي لمار وقال : اي دي لمار الكنت بحبها !!
لمار وزين الاتنين اتخلعو ونططو عيونهم وهو فضل يعاين لي لمار جوا عيونها
...
رد على المكالمة اللي جاتو وقال : ايوه يا ماهر.. الحفلة دي حتتلغي
ماهر : بس يا ادهم
ادهم : من غير بس يا ماهر
ماهر : الحفلة دي مهمة شديد يا ادهم.. حتربح منها كتير وحتوصلك لي مكان ابعد من العالمية.. شوف حفلاتك الفاتت دي وصلتك لي وين؟ للعالمية عديل
ادهم : انا ما بغني عشان القروش ولا عشان اصل مكان ابعد من العالمية او عشان العالمية نفسها.. انا بغني عشانها هي فاهمني انت؟!
ماهر حسا بالأسى على صحبو الما قادر يتخطى المرحلة الفاتت دي من حياتو ولا يعرس ولا يحب بت غيرها قام قال بي غضب كده : كفاية يا ادهم!! الكلام الانت بتعمل فيهو ده غلط في حق نفسك!! بعدين هي ماتت خلاص وانت ما مفروض تتعلق بي زول ميت وتوقف حياتك عليهو!! هي هسه بس محتاجة دعواتك وليس ندمك وزعلك عليها فاهمني انت؟! بعدين الزواج سنة هي ما اول ولا اخر مرااا
مع كلمة مرا دي هو صرخ وقال : لاااا يا ماهرر!! هي اخر مراا !! هي اخر مرااا !! هي اول مرا واخر مرا بالنسبة لي!! انا متأكد انها عايشة..
ودموعو جرو طوالي
سكت بعد هدا وقال : عارف؟! عارف؟؟! انك اثبت لي انو ما حصل عرفت معنى الحب يا ماهر!!
بعدين ما شايف انك كترتها؟! انا ادهم عبد الله وماف زول بيسترجي يقول لي حاجة انا ما عايزها أو حتى يغصبني انو اعملها !! فاهمني انت؟! فاهم علي انا بقول فشنو؟!
ما تجيب لي السيرة دي تاني والا بتخسرني يا ماهر
وطق قفل الخط في وشو 😀
(طبعاً ماهر ده صحبو الوحيد بعد مراد.. حتى هزار وجاسر بقى ما مصاحبهم بس مصاحب ماهر ده ويمكن ده الوحيد اللي هو بيتجاوب معاهو ومع فرقتو الموسيقية والناس اللي هو بيتعامل أو بيغني معاهم بس ما بيبتسم ليهم او يتكلم معاهم عن مواضيع خارج نطاق الشغل ما عدا ماهر)
رمى الفون ولا عاين ليهو وقع وين واترمى في السرير.. قعد يعاين في السقف والعبرة خانقاهو.. زرايرو كانت مفتحة وكان مطفي النور وضو القمر كان ساطع شديد في غرفتو.. فضل بالحالة دي لحدي ما الواطة بدت تفتح بعد شوية كده تلفونو رنا
قام باستعجال وشالو.. لقا مكتوب ست الكل وجنبها قلوب
ما رد عليها لأنو عارفها عايزة تقول ليهو تعال وكلام كتير وهو حافظ امو
دموعو نزلت تاني وما كان قادر يتكلم معاها ف خت الفون في السرير بس ورقد اتكور ع نفسو
شال من الكومودينة صورة متوسطة الحجم ع شكل قلب.. قعد يعاين ليها ودموعو نزلت فيها
ادهم : لي عملتي كده فيني يا لمار؟! لي خليتيني براي؟! انا هسه اهلي ما قادر اتعامل معاهم زي الأول!! ما اهلي بس!! الناس كلها يا لمار!! الناس كلها !!
...
من مؤيد قال كده قربت منو وقالت ش شش شنو؟! بتقول في شنو انت؟! وانا؟ انا بعرفك من وين؟؟! احكي سريع!!
كانت بترجف وحتى صوتها كان بيرجف، بس فجأة حست بي طعنة في قلبها
ختت يدها في صدرها وقعدت في السرير.. حست انها ما كويسة وانو اعصابها تلفت وبي انو جسمها ده تقيل.. حتى انو اطرافها تلجت
زين ومؤيد اتخلعو ومؤيد جرا عليها
زين اتخلع وخاف عليها بس اتذكر انو بتجيها الحالة دي كتير ف مشى عالكومودينة وشال ليهو علبة فيها حبوب كده وكبا ليها موية
مؤيد : ارح نوديها المستشفى يا زين !!
عملت بي يدها الحركة دي 🖐🏼وقالت : لا ما يحتاج انا كويسة
زين : امسكي ابلعي دي..
شالتها منو بلعتها حتين بدت ترجع لطبيعتها وهدت حبة
لمن لقا اخوهو بيعاين ليها بي خوف واضح ع ملامح وشو قال ليهو : لمار ما حترضى تمشي المستشفى يا مؤيد + دي ما اول مرة تمر بالحالة دي وقبلي كده لمن وديناها المستشفى وادوها ادوية وحالياً في دكتور متابع معاها وبدت تتحسن
مؤيد عاين لي زين بي نظرات تساؤل نظام دي هي البت الكنتو بتقولوا لي عنها انت وميرال؟
ما استنى زين يقول حاجة تانية، مشى طوالي ع غرفتو وقفلها عليهو
زين : لمار.. ارقدي خلاص بعد ده.. الوقت اتأخر نومي وارتاحي
هزت ليهو راسها ورقدت.. شال البطانية وغطاها
مشى يدو على شعرها لحدي ما نامت
يمكن تقولو ده انحراف وقلة ادب.. بس لمار كانت فاقدة الاخو وزين بقا ليها الاخو والابو والصاحب وكلو شي ما عدا الحبيب والزوج.. بس هو كان متيم!!
يمكن عشان حاني عليها بسبب المارة بيهو هسه ده؟! ويمكن عشان بتشبه امل!! يمكن برضو عشان هي مختلفة عن الباقيات زي ما كانت امل..
قفل النور وفتح ليها اللمبة الخفيفة اللي على الكومودينة لأنو كان عارف انها بتخاف من الضلام.. اداها نظرة اخيرة بعدها قفل الباب
كان قلبو واجعو بس ما كان عارف ليي..
كان محدد وجهتو الحيمشيها من البداية.. لقى نفسو قدام باب غرفة اخوهو.. اتردد في انو يدق الباب ولا لأ وفي وقفتو دي مؤيد فتح الباب، كان لابس ملابس بيت وظاهر عليهو استحمى وغير
اتخلع لمن لقا اخوهو واقف كده
مؤيد : زين
زين : مؤيد
قالو كده مع بعض بس بي صوت واطي.. بطريقة كده بتبين انو كلو واحد فيهم عايز يفهم الحاصل شنو..
مؤيد قال وهو بعاين في الواطة : ما عارف اقول شنو.. الدنيا دي غريبة شديد..
زين : جد.. أبداً ما ختيت في بالي انها تكون البت الكنت بتحبها..
هزا ليهو راسو بتفهم وقال وهو بيضحك : خش ولا اعزمك زيزو؟
دخل وهو مبتسم وقال : ياهك مؤيد المرح.. الاتغير فيك بس انك بقيت جادي ومسؤول
قال وهو بيقفل باب الغرفة : جد الزمن بغير.. قبلي شوية لمن لقيتني في الباب كنت ماشي اخلع ميرال
زين قام بي حماس وقال : خلاص ارح عشان نشوف ردة فعلها شنو!!
مشو لي ميرال في غرفتها.. زين كان واقف جنب سريرها وكاتم الضحكة ومؤيد ركب بي فوق ليها وقعد على ركبتينو ويدينو عشان يخلعها
قعد ينادي فيها كده زي لمن مثلاً زول يموت وانت تصحي زول من اهلك بخلعة وتخلعو معاك
وهي طبعاً الصوت جاييها بعيد بعيد 🤣🤣💔
زين قال ليهو وهو بيضحك : براحة عليها ما كده بتجيها سكتة قلبية
مؤيد قال وهو بيضحك برضو : لا لا الليلة الا اخلعها
قامت مخلوعة وهي بتتلفت ومنططة عيونها وبتقول : في شنو في شنو
مؤيد : مفاجأااااااة
قالت بي صوت باكي : مؤييييدد؟؟!
حضنها عليهو وهي كانت بس بتبكي شديد
ميرال : أربعة سنين؟؟ أربعة سنين تمش وتخلينا انا وابوي وزين؟؟! بعد مشت سماهر مشيت انت بعديها ومسخت لينا الدنيا !! انا وزين بقينا ناقصين من دونك!! صح الدادا زين امنا واخونا وما مقصر مني بس لمن نبعد من بعض الدنيا بتتقلب!!
كانت بتقول كده وهي بتضربو في صدرو ضربات خفيفة
صح انو زين اتأثر وكان حيبكي لمن جابت سيرة سماهر بس ضحك لمن قالت كلمة الدادا زين دي ومؤيد اكتفى ب إنو يبتسم بس ويشد ميرال عليهو
(يخخ قدر شنو البت دي بريئة وعسل 😭💗💗 + اي صح اللي في بالكم.. سماهر ماتت وابو ناس زين رجع انتكس لمدة سنة بس رجع ليهم بعد السنة دي بعد اتعافى.. كان حنين معاهم شديد في التلاتة سنين الفاتت دي مع انو السنة الأولى من موت امو كان ماري باكتئاب حاد.. ليهو حق الراجل خسر مرتو وامو.. بس صحى ع نفسو واتذكر انو عندو اولاد هو ما خسرهم وهم لسه عايشين ف دي نعمة.. عندو أحلى تلاتة اولاد بيحبو بعض ودايماً مع بعض في الحلوة والمره ف ما حب يخرب حياتهم او ينفسن بيهم وجمع باقي شتاتو عشانهم.. اما مؤيد وميرال كانو حزنانين شديد عليها.. عاد كيييفف وهي امهم التانية الربتهم من شفع ودايماً كانت معاهم.. كلهم كانو بيحاولو يتعايشو مع الوضع ده.. اما زين ف كان ماسك الشغل كلو في السنة الأولى من موتها وانتكاس ابوهو واللي صادفت أيام انفجار الصالة حقت عرس ناس مجتبى ومنار.. كان بيحاول يخفف ع ابوهو واختو واخوهو.. مع انو هو لي نفسو عايز الزول اللي يمسح ع قلبو.. كان بيدعي ربنا كتير انو يعوضو.. يعوضو فقد امو.. يعوضو فقد امل.. وسماهر.. كان مكسور شديد بس بيحاول عشانو وعشان اخوانو وابوهو.. بس في نفس السنة الأولى من موت سماهر حصلت حاجة يمكن تكون جبر بالنسبة ليهو ويمكن جبر لي ميرال وبشار كمان.. كانت بمثابة دوا لجروحهم والزول البيطبطب عليهم دايماً.. ايوه دي ياها اللي في راسكم ذاتها.. لمار..
يمكن ما عدا مؤيد لأنو ما كانت بتكلمو ولا كان بيكلمها ولأنها ليها أربعة سنين فاقدة الذاكرة كلياً ولأنو هو كان مغترب في الأربعة سنين دي وفي بلد غير امريكا.. من موت سماهر كان قرر يسافر ويقعد مع نفسو لحدي ما يلقاها)
بعد ده ضحك والتاني ابتسم نزلت منهم دموع لأنهم اتذكرو سماهر.. مؤيد مدا يدو لي زين عشان يجي يخش في الحضن ده وفعلاً مشى حضنهم
(صح انو حتقولو الرواية دي الناس اللي فيها جنهم دموع.. جنهم يبكو بالرجال.. بس اقول ليكم حاجة؟! كلنا بنبكي وبنزعل.. ما عشان راجل بكى معناها هو مرا !! وما عشان بت بكت معناها هي بكاية!! يمكن ديل مارين بي ظروف سيئة شديد؟! او مواقف كتيرة خلتهم يبكو كده ومن اقل حاجة!! وبرضو ما معناها انو زول ما يبكي قدامك معناها انو هو ما بيبكي خالص!! او انو قلبو حجر!! يمكن هو بيبكي بينو وبين نفسو؟! ويمكن حياتو اسوأ من حياتك!! ومقهور وممغوص اكتر منك؟!
البكا ما معناهو الضعف!! بالعكس البكا قوة.. لأنو مستحيل زول يبكي شديد او بقهر او حتى تنزل منو دموع كتيرة كده وتكون دموع تماسيح ولا شنو؟! البكا قوة لأنو الزول ده اتحمل حاجات كتيرة ولحدي هسه عايش وبيكافح عشانو!! او يمكن عشان ناس بتهمو؟! مشكلتنا اننا كشعوب سودانية وعربية او يمكن الحاجة دي شايعة في العالم كلو، انو بنقول الزول البيبكي ده كان مرا كان راجل كان شافع كان عجوز، ما عندو موضوع او هو بكاي.. وانو الراجل البيبكي ده مرا وخايب وباطل او تقعد تقول للزول ده ما تبكي ياخ ما بتستاهل وما تبكي قدام الناس حيقولو انك ضعيف.. او ما تبكي من اقل حاجة!! يخخ انت عرفتها من وين ما بتستاهل؟؟! عرفت من وين الظروف الماري بيها الزول القدامك ده؟؟! ولي؟! ليي ما يبكي قدام الناس؟؟! يعني بتهمك نظرة الناس ليك وليهو اكتر من ما بتهمك مشاعرو؟ طيب وما يشوفو ضعيف نظرتهم حتفيدك وحتفيدو بشنو يعني؟ حتحل ليهو مشاكلو ولا تزيل ليهو همومو؟! بعدين ما يبكي من اقل حاجة ليي؟ ما يمكن دي تراكمات وظروف هو ماري بيها !! ما فكرت فيها ولا عشان اهلك والمجتمع الانت عايش فيهو ورثوك الافكار المغلوطة دي؟! ماا معليش اسمحو لي اقول ليكم الحقيقة!! ماف زول يزعل من كلامي ده لأني ما قلت حاجة غلط.. نحن عايزين مجتمع جديد خالي من التفكيرات الزي دي.. مجتمع خالي من العقد والنقص.. الاتربينا عليهم، عايزين اولادنا واحفادنا والأجيال الجاية ما تتربى على الاتربينا عليهو نحن واتربو عليهو اباءنا واجدادنا والأجيال اللي قبلينا
عايزنها تكون أجيال احسن.. خالية من العقد والنقص والامراض النفسية والعقلية والاختلالات والاضطرابات.. وبرضو في نقطة عايزة اوضحها.. انو في زول بيقول ليك ما تبكي او ما تبكي كده انا حبكي معاك والله لأنو بس ما عايزك تزعل وانو بيتأثر معاك مع انو ممكن يكون زول كويس وفي قلبو ماف حاجة سيئة تجاهك بس برضو غلط انو يقول كده.. وحتى في شخصيات في روايتي كانت بتقول كده والناس من حوليني كمان بس الفكرة دي غلط.. لمن زول قريب منك او حتى غريب بكى خليهو يبكي.. خليهو يبكي ويطلع كل الجواهو بس بشرط!! انك تطبطب عليهو وتحتويهو او ممكن تحضنو اذا هو قريب شديد.. الحاجات دي ممكن تأثر عليهو وتخليهو يهدا شوية)
زين : خلونا نتواعد اننا ما نخلي بعض نهائي
زين : وعد
مؤيد : وعد
ميرال : وعد
لمار : وعد
طبعاً الباب كان فاتح وهم ما حسو بيها لمن دخلت واتخلعو لمن شافوها
زين ضحك وقال : هي انتي مش كنتي نايمة يا ليلي؟
لمار : ما دايرني اقعد معاكم يعني؟ طيب ماشة
كلهم مع بعض قالو : لا خليكي
زين : ما قصدي كده قصدي انو اديتك حبوبك وهي بتنوم ف استغربت وقلت يمكن تكوني ما كويسة او عايزة تنومي مع ميرال
ميرال : بعدين يا بت انتي عبيطة ولا شنو تعالي هنا.. انتي اختنا الرابعة تعالي تعالي.. بعدين دي حركات جديدة ليك ولا شنو.. هي ها بختلف معاك انا يا زق
كانت بتقول كلامها ده بي صوت ضاحك
لمار ضحكت وقالت : وانتو صدقتو يعني مستحيل امشي حتتتى لو قلتو لي!!
تاني قالت وهي مبتسمة للضرس الاخير : ربنا ما يحرمني منكم
في حاجة خلتها تحول نظرها من ميرال وتعاين لي مؤيد ولمن عاينت لقتو مبحلق فيها والحاجة دي خلتها تتوتر.. حولت نظرها باتجاه زين ولقت في ابتسامة صغيرة ع ثغرو والحاجة دي خلتها لا إرادياً تحس بالراحة.. يمكن عشان متعودة عليهو وعلى ميرال ف عشان كده ما بتتوتر شديد لمن تكون معاهم.. بس أحياناً مع زين بتتوتر
لمار : شنو رايكم نعمل قعدة في الجنينة + بابا بشار حيجي قريب يخخ انا فرحانة شديد.. لازم نعمل ليهو مفاجأة شنو رايكم؟!
كلهم اتحمسو للفكرة وقعدوا يخططو ليها وفي نص الونسة مؤيد قال : صحي انتي ما حتتحبسي لي عرسك يا ميرال.. شايفك بتمرقي عادي وكده؟!
ميرال : اتحبس؟ اتحبس ليي؟ اهتمام وبهتما بي نفسي.. بس بري ما بتحبس وبمرق عادي.. عاداتنا وتقاليدنا الزق دي ما عايزة اعملها انا.. انو اتحبس عشان اتجلبط بي كريمات الفسخ واعمل ماسكات لي وشي وشعري عشانو.. لا لا معليش مستحيل طبعاً.. يتقبلني زي ما انا ويقدر النعمة ولا يودعني
(حرام عليها الولد بيحبها وبيموت فيها زي ما هي 😀😹💔)
مؤيد قال وهو بيضحك : بتي.. تربيتي يااخخ
زين : عرفتك داير تصل للنقطة دي يا مؤيد.. تربيتنا نحن الاتنين حررممم
لمار : هيي اول مرة القى لي ناس تفكيرهم زي تفكيري 😆
(افف اافف ياااه.. النقطة العايزة اصل ليها ومنتظراها من قبيل 😈😖🙉.. طيب طيب طيب.. انتي ك بت عاقلة كده تفسخي لشنو؟ انا ما قصدي الفسخ اللي في اوقات تانية بس انا قصدي الفسخ القبلي العرس برضو !! تفسخي عشانو؟؟ عشان تعجبيهو؟ وتهتمي بي نفسك عشان تعجبيهو يعني؟؟ هو ما لو عايزك بعوزك بي لونك الطبيعي وشعرك الطبيعي.. الاهتمام ده أصلاً مفروض يكون عشان نفسك حبيبي.. ما عشان تعجبي ليك انسان.. يعني لازم تهتمي بي نفسك عشان نفسك وليس عشان شعبك اللي بيقدس البياض والشعر الاستريت الناعم ما لازم انتي تكوني زيهم.. يلا في ناس كده عشان هم بيحبو كده.. بس في مجموعة تانية بتحب الحاجات دي وبتحب تكون كده عشان مجتمعها البيحب وبيأيد الافكار والخذعبلات دي!! حمانا الله.. بس نفسي اعرف الجاب التفكير المعاق ده والنشرو بين الناس وكلهم بقو بيتداولوهو ده عشان اسكو بي مقشاشتي دي 🧹🤣🤣.. والمشكلة ما هنا بس.. المشكلة انو في رجال برضو بيفسخو او بيكوو شعرهم ويعملو ليهو حاجات عشان ينعم زي الاستشوار والبروتين والكيراتين وسجم الرماد الباقي😃😀💔 .. يعني تخيلي معاي يا عزيزتي المرأة وتخيل معاي يا عزيزي الرجل تقيم نفسك ولونك وشعرك عشان معايير جمال جابوها البشر.. جابا زول عادي زي وزيك كده ومخلوق من طين.. تخيل معاي تقيم نفسك بي تفكير الناس.. اسمحو لي اقول ليكم.. الناس اللي بيقولو معايير جمال وبيمشو بيها واللي بيحكم عالناس ديل راسهم ما تمام والله ومرضى عديل ومهووسين.. يعني انت منو عشان تجي تقول البني آدم ده شكلو ما حلو؟؟ ولا انت منو عشان تقول انت حلو بس لو لونك كان افتح شوية حتبقى أحلى.. انت حلو بس اذا سمنت حبة حتبقى أحلى.. انت وانت وانت وانت الخ..
طب انت ما طلبت راي الزول البيعلق ليك ده وهو بيتكلم كأنو احسن زول في الدنيا طيب لي هو يقول كده من غير تطلب رايو؟؟! وأساساً لي تطلب رايو هَنِي؟! الوحيد المسموح ليهو انو يقيمك هو انت.. لا بأس اذا زول قال ليك انت حلو او شعرك او لونك حلو بس اذا قال العكس!! طوالي افصلو بصراحة كده يعني.. عشان ده زول توكسيك بالمختصر
الجمال نسبي يجماعة.. يعني حتى اذا الزول ده شايفك شين من المفترض يحتفظ بي رايو لي نفسو..
ما ضروري تكون ابيض او لونك فاتح عشان تكون حلو.. ما ضروري يكون شعرك استريت زي تفكير مجتمعنا السوداني والمجتمعات العربية وبعض الاسويين والاجانب حتين يكون حلو.. لو ملاحظين انا في روايتي دي خليت البطلة سمرا وشعرها كيرلي ما ناعم شديد والبطل ابيض شعرو كيرلي بس انعم من شعرها.. ليي؟! عشان اوريكي انو البيحبك ده بيحبك عشان ذاتك ما عشان الشكل الخارجي.. هو عادي يحب شكلك الخارجي بس اهم شي انو يحب ذاتك الأول ويكون رافع راسو وهو معاكي.. يكون فخور انك مرتو وحبيبتو وشريكتو في الحياة حتين بعداك يحب شكلك الخارجي بعدين في كوبلات زي كده على أرض الواقع.. ومعظم الرجال عندهم عقدة النقص دي اكتر من البنات.. انو مرتو لازم تكون حلبية وشعرها ناعم وطويل.. بس اغلب البنات بيقبلو بالولد مهما كان.. ما بتعاين لي شكلو او لونو او شعرو عشان البنات اغلبهم حبهم صادق عكس بعض الرجال وهنا ما قصدي انو الرجال ما بيحبو.. هم بيحبو بس معظمهم بيحب حب ما صادق وانتو عارفين قصدي اعتقد.. البحبك ده خلاص بيحبك بغض النظر عن انو انت عامل كيف.. شكلك، لونك، شعرك.. دي كلها تفاصيل ما بتهمو زي حب ادهم لي لمار وحب لمار لي ادهم
عايزاكم بس تختو الكلام ده حلقة في اضنينكم انو كلنا حلوين وانو ربنا خلقنا في احسن تقويم.. اكيد هو خلقك بالشكل واللون والشعر والعرق والجنسية دي عشان سبب بيعلمو هو بس، بس هو برضو خلقك في احسن صورة.. خلق جسمك بصورة مختلفة عن باقي المخلوقات وحتى شكلك ده.. هسه حصل شفت ليك زول بيشبه حيوان؟
كلو واحد فينا حلو بطريقة ما.. كوووولناا حلوين والله صدقوني💕💕.. سواء بملامحنا ولونا اذا كان اسمر اسود ابيض حنطي اصفر بنفسجي برتقالي وشعرنا اذا كان طويل او قصير اذا كان كيرلي او كنكي او استريت او ويفي واذا كان ناعم او خشن، وجسمنا لو كنا سمان او ضعاف وطولنا اذا كنا طوال قصار متوسطين، او طريقة كلامنا وتعبيرنا وتعاملنا او حتى شخصياتنا الخ..)
ابقو عافية 💕💕
...
- ثم يتسلل اليك يوم قديم يخبرك انك مازلت عالقاً بين الماضي والحاضر🖤🥀.