الليلة اليوم كان من بدايتو متعب... تجهيزات وما بعرف شنو لخطوبة مجتبى ومنار
وحاجة تانية... إني ما شفتو من كم يوم... صح إنو كنا بنتواصل بالواتس بس برضو بعدو حار شديد... ما عارفة بصراحة الحصل في الخمسة أيام الفاتت دي شنو بس مرت براحة براحة... كأنها خمسة سنين
علا: ليلي... سرحانة في شنو انتي؟ من قبيل بنادي فيكي انا
لمار: اشتقت ليهو
علا: منو هو؟؟ ادهم؟
لمار: اي ادهم
علا: هو برضو حيكون اشتاق ليكي وشايفاهو مشغول الأيام دي
ضحكت وقالت ليها: على كلٍ حتشوفيهو الليلة وحتشبعي منو
لمار ابتسمت ليها بحزن بس وقالت ليها: إن شاء الله
تاني ما فتحت خشمها وهم أساساً كانو خلصو شغل
جهزو منار ومشو عشان يتجهزو هم
...
فتح خشمو باندهاش وهو بيعاين ليها بتركيز وهي ونازلة من السلم... ما كانت براها بس هو كان مركز معاها هي وبس... كانت فاكه شعرها ولابسه فستان على الجسم طويل ولونو أسود يدينو مشجرات وشفافات والفستان النوع اللماع داك
ختا يدو ع قلبو عشان نبضاتو كان كلو شوية بتتزايد وقال: حلوه
اما هي ف كانت بتفتش عليهو بعيونها بين المعازيم ديل كلهم وفجأة عيونها لقطتو وبدت ضربات قلبها تتزايد... كان أول مره يكون لابس قميص بي كم طويل وبنطلون
القميص كان لونو أسود ومع عضلاتو وكتفينو العراض كان شي عجيب والبنطلون كان لونو رمادي
لمن كانو مجتبى ومنار بيلبسو في الدبل
جا وقف جنبها وهي اتخلعت وعملت نفسها ما شايفاهو
حاولت تركز مع ناس مجتبى ومنار عشان ما تظهر إنها متوترة قدامو
مجتبى همس لي منار في أضانها وهو مبتسم وقال: ما قادر أصدق إنو الليلة حنرسم علاقتنا يا مناري وحتبقي لي
مسك يدها ولبسها الدبله وهي ما كانت قادرة ترفع رأسها وتعاين ليهو من الخجل بس إبتسمت ليهو لمن قال كده... حاولت تتكلم بس حست لسانها مربوط
بس وأخيراً قدرت تتغلب على خجلها وقالت: ونا كمان ما قادرة أصدق إنك بقيت لي خلاص
مسكت يدو ولبستو الدبله
الناس بقت تصفق وتصفر ومناف قعد يشغلها ليهم
اما علا ف قعدت تبكي وحضنت أخوها وخطيبتو وقعدت تبارك ليهم
والباقيين مشو يباركو ليهم برضو قامت لمار استغلت الفرصة وزحت من ادهم عشان تمشي تبارك ليهم وتبعد منو
YOU ARE READING
رغبة
Randomرواية سودانية بقلم ريل حمزة أحياناً يقتلاننا الألم والرغبة لدرجةِ اننا لا نستطيع النجاة منهما وبالكاد نستطيع العيش والتنفس.. .. بتمنى ليكم متابعة ممتعة☕..
