- يأتي أحدهم، وكأنه يُنير في روحك ماكان مُظلماً.
...
دقت الباب وكان معاها اهلها.. استنو شوية وطوالي فتحو ليهم.. دخلو وهم سامعين صوت الونسة ديي
سلمو على اهل البيت وما تمت ثانية اندمجو في الونسة
وجن : تعالي يا بتي اسوي ليك شعرك ده
لمار : انا بحبو يكون كيرلي يا ماما بتعرفي تعمليهو كده؟
(طبعاً ندى غارت لمن لمار قالت لي وجن كلمة ماما دي وحست امو عندها مشاركين ومنافسين في بتها بس بعد ده كلو هي ما عارفة لمار بتحبها قدر كيف..)
وجن : كيرلي ده شنو كمان؟
هزار : وريتو ليكي المرة الفاتت يا امي نسيتيهو ولا شنو؟ زي شعر ادهم ومناف والجماعة الطيبين ديل
وجن : انا يا ربي بديت اخرف ولا شنو؟
قعدو يضحكو فيها مع انو كلو واحد كان مندمج في ونستو
طبعاً رجال البيت كانو قاعدين في الصالون التاني وفي الصالون الكبير النسوان والبنات
جا داخل وهو بيقول : يا هزاار ختيتي لي جلابيتي الكبدية وين؟!
وعيونو وقعت على القاعدة تحت رجلين امو دي
وكان لابس كده

لمار : جلابية؟! وكبدية؟؟! واو
قال وهو بيضحك : مالك منططة عيونك ومرتبكة طيب؟!
عشان موضوع الجلابية ولونها ولا عشان سبب تاني؟
وغمز ليها
هزار قعدت تصفر والباقيين قعدو يصفرو ويشغلوها ليهم
ادهم قعد يضحك فيهم ويعاين ليها عايز يشوف ردة فعلها شنو لقاها مبتسمة ومنزلة راسها لمن رفعتو لقتو بعاين ليها والمرة دي ما اشاحت بنظرها.. المرة دي دخلت معاهو في تحدي عيون قوي شديد
تحدي خلاها تقلق وتتوتر وهو كمان
ادهم : فوفو ممكن تعملي لي شعري؟!
ده كلو وهو بعاين ليها.. بس كان عارفها متوترة عشان كان لابس تيشيرت وشورت قصير ولو عليها تمشي تخلي ليهو المكان او تطردو بس تطردو وين وده بيتو!!
فريدة : طوالي يا حبيب فوفو
(طبعاً شعرو كان مبلول والكيرلي اتخرب)
لمار : جيجي اعملي لي شعري زي كده
(طلعت تلفونها وورتها صور للشعر الكيرلي)
وجن : ما نفسك اعملو ليكي بوب؟
ضحكت وقالت : انتي ما شايفة انو الكيرلي أحلى يا خالتي؟
ضحكت وقالت : لا لا حلاتك بالكيرلي يا مرا ولدي
لمار : انتي الأحلى يا حماتي
قعدو يشغلوها ليهم تاني
قال وهو بيضحك : بالمناسبة انا عايز اعقد مع مجتبى.. معقولة ياخ مجتبى يبورني
كلهم اتفاجأو بي قرارو بس فرحو ليهو شديد والنسوان الكبار قعدو يزغردو ساي.. بصراحة ما النسوان الكبار بس البنات برضو قعدو يزغردو وعلا وهزار مشو حضنو لمار بعدها حضنو اخوهم مع فريدة الاصلاً كانت حاضناهو من قال كده وكلهم قعدو يباركو ليها ويحضنوها ما عدا ندى
وجن : تعال هنا يا ولد
فجأة كلهم صنو والجو بقا متوتر
جاها ولمار لسه كانت قاعدة بس زحت طوالي من هو جا
وجن : يا بت انا قلت ليكي زحي؟!
ضحكت وقالت : تعالي
لمار جات وما كانت فاهمة شي وبعد قربت منها حضنتهم هم الاتنين.. هي وادهم مع بعض
بعد باركو ليهم تمام ندى نادت لمار على جنبة وقالت ليها : يا بتي انتي موافقة على موضوع العقد البعد كم يوم ده؟
لمار : ما عارفة يا امي انا ذاتي حاسة نفسي ملخبطة
ندى : طيب استخيري حبيبتي
(طبعاً ندى ما كانت عايزاها تعرس من بدري كده وتسيبها وانتو عارفين لي هي بتقول ليها كده)
لمار : بشوف يا ماما
وجن : دقيقة انتو ما سمعتو راي لمار.. اها يا ليلي انتي موافقة انو ولدي يعقد عليكي بعد كم يوم مع مجتبى ومنار؟
قعد يعاين ليها بترقب وخوف منتظر ردة فعلها
عيونو كانت فيها لمعة ومبتسم ابتسامة خفيفة وهو بعاين ليها جوا عيونها
لمار : اممم م
قعدت مسافة وحاولت تلعب ب اعصابو بعدها قالت وهي بتعاين ليهو وهي مبتسمة : افكر واشوف
اداها نظرة كده سمحة سماحة خلتها تزح عيونها منو وهي لسه مبتسمة وماسكة الضحكة بالعافية
وجن : يا بتي الرجال ديل ما معروفين فكري سريع واديهو جواب
لمار : انا البعرفو انو العايزك بنتظرك لي نهاية العمر وما بيبدلك ب زول مهما كترت الخيارات.. غير كده ده لعب شفع ساي
ما كانت بتعاين ليهو بعدها سكتت
هزار : انا معاها
علا : وانا
منار وريماس : وانا
ملاذ : والله ماف وحدة بترضى بي وحدة تانية تشاركها في حقها وانا لو بحبو وهو معرس مستحيل اكون المرا التانية
النسوان الكبار كلهم ادو رايهم وكان نفس راي البنات
ادهم : والله هو شوفو.. القلب والعقل وكل الجوارح شايلة زولة واحدة.. والزولة دي انا مستحيل اعاين ل غيرها لو كان شنو شنو.. لأنها الوحيدة الفاتنة.. الوحيدة الشدتني ليها وخلتني احبها بطريقة انا ما حصل حبيتها لي زول ولا حيحصل.. ولو وزعو حبي ليها ده للعالم كلو حيكفيهم ويفضل.. لمار دي حياتي وانا من بعدها شفت الدنيا دي بطريقة ما كنت شايفها من قبل
الحياة بعدها بقت حلوة.. بقت حياة بعد ما كانت شي ما مفهوم
عاينت ليهو وكانت حتبكي بس مسكت نفسها والحمد لله هو قدر يقرا تعابير وشها وعرفها ما قادرة تعبر
ندى وناس وجن قعدو يزغردو
مجتبى قال وهو بيضحك : دي كلها زغاريد عشان عرسنا انا ومنار ولا الحنك شنو؟
علا : لا لا فاتكم كتير
مجتبى : اها بشري.. هيي دقيقة انت المقعدك وشط النسوان شنو؟
وقعد يضحك طوالي
ادهم : قعدت بدلك.. انت الجابك محل قاعدين النسوان شنو؟
مجتبى : جابني الجابك
وغمز ليهو
مجتبى : تعالي يا علا احكي لي الحصل شنو
مشت ليهو وفتت ليهو الحصل كلو
ادهم : خلخلي لي شعري يا فوفو لأني بحب الحركة دي
لمار طلعت فوق واتجهت على بيت ناس وعلا وبالتحديد غرفتها
مشت سوت شعرها هناك بعدها قعدت تبكي
على صوتها هزار جات ولقتها بتبكي..
اتخلعت وقالت ليها : يا بت مالك؟ في زول زعلك في حاجة؟
هزت ليها راسها بمعنى لأ
هزار : اها طيب مالك؟
لمار : خايفة
هزار : خايفة من شنو؟
لمار : خايفة ادهم يخليني او يخوني في يوم من الايام.. انا ما صدقت لقيتو وعرفت انو بيحبني.. مستحيل اتقبل الأفكار دي
هزار : يا بت انتي مجنونة؟ مستحيل مستحيل ادهم يخليكي او يخونك مع وحدة ما بتسوى شي.. صدقيني ادهم ده مافي وحدة غيرك في قلبو.. ياخ انتي ما شفتيهو بيتكلم عنك كيف في غيابك ولا شفتي عيونو او ابتسامتو وهو بيجيب سيرتك لي.. صدقيني انا قريبة ليهو اكتر من مراد وجاسر وهو بيحكي لي اكتر من ما بيحكي ليهم يا لمار.. بيحكي لي ايا شي عنك.. وكمان عايزة اوريكي حاجة.. انو ادهم من زمان كان دايرك.. من كنتي طفلة وهو كان مراهق.. بس كان مستنيكي تكبري شوية.. ما كان قادر ينتظر
والكان عارف انو بيحبك انا ومراد بس
ضحكت وقالت : صحي.. واي ما قادرة اصدق وانا بحبو شديد يا هزار بس انتي متأكدة؟
ابتسمت وقالت : على ضمانتي يا ليلي
لمار : اممم طيب عايزة أسألك سؤال.. اذا انتي ومراد بس البتعرفو انو هو بيحبني وانو من زمان بيعرفني.. علا عرفت من وين؟
هزار : هي علا عارفة؟ هو ما وراني حاجة زي دي ابداً
لمار : طيب عايزاكي المرة دي تجاوبيني بكل صراحة
هزار : حاااضر
لمار : ادهم كان بيرسل لي هدايا ورسايل؟
هزار من جواها ارتبكت ومن برا ما ظهرت الارتباك ده قام قالت ليها : ادهم ما قال لي حاجة زي دي
ضيقت عيونها وقالت ليها : متأكدة؟
هزار : اي متأكدة.. ما هو لو قال لي اكيد ما حخبي عنك
لمار : طيب
هزار : خشي استحمي وانا حقول للبنات يجو.. حناديهم عشان نلبس ونتمكيج كلنا وقشي دموعك دي انتي عارفة لمن تبكي وشك بيورم والليلة لازم تطلعي أحلى وحدة
ابتسمت وقالت : حاضر
وحضنت هزار طوالي
هزار : حبيبي انتي
...
بعد اتجهزو عملو الحنتين.. وحدة في الصالة الأولى والتانية في الصالة التانية.. لمار مشت تشوف حنة مجتبى ولمن داخلة بي باب الصالة كده صادفتو
وقف ليها جنب الباب
لمار : عايزة اخش
ادهم : ماف ليك
لمار : ادهم خليني اخش ياخ
ادهم : تخشي وين المكان كلو رجال انتي جنيتي ولا شنو؟
لمار : زي ما هم اهلك هم اهلي برضو
ادهم : طيب
دنقر راسو بعدها رفعو وقال : عقبالنا
زحا ليها عشان تخش
اتحركت من جنبو شوية بعدها وقفت وقالت : امين
صح انو كان طالع برا بس دخل وراها.. هو ذاتو ما عارف ليي بس رجلينو ساقتو ليها
مشت قعدت في كنبة فيها قعدتين طوالي جا قعد جنبها
لمار : ما عايز تتحنن مع مجتبى ولا شنو؟
ادهم : حيحننوني بعد شوية
لمار : اممم طيب.. بالمناسبة
ادهم : احكي
لمار : طالع حلو بالجلابية
ادهم : وانتي كمان الفستان تقول سوهو عشانك.. طالعة حلوة شديد
لمار : شكراً
ادهم : شنو رايك تمشي تتحنني
(عايزها ب اي طريقة تمشي من محل ما الرجال قاعدين)
لمار : ما تخاف علا وهزار جايين يقعدو معاي
ادهم : الليلة حنتنا نحن برضو
لمار : شكلي واقفة ليك في حلقك خلاص ماشة
ادهم : لا ما كده بس انا بغير.. شكلي ححاول اضبط غيرتي
ضحكت وقالت : ما مشكلة غِير ساي كلنا بنغير.. امشي يحننوك وانا كمان ماشة يلا باي
ابتسم ليها وقال : باي
(طبعاً ادهم حدد حنتهم ولمار وافقت انو عقدها يكون مع ناس مجتبى بس العرس يكون بعد شهر من عرس ناس مجتبى)
...
جا يوم العقد والعريسين ضربو لي عروساتهم وقعدو يتكلمو معاهم
ادهم : لمااار انا ما قادر اصدق انك خلاص بقيتي حقتي.. بقيتي مرتي وأخيراً يا حب حياتي
ضحكت وقالت : وانا برضو ما قادرة اصدق يا دودو.. كدي يا علا اقرصيني عشان اتأكد اني ما في حلم
علا فعلاً قرصتها قامت قالت : اوووو ما قلت ليكي اقرصيني شديد كده يا معفنة
ادهم : هيي الليلة ماف ليك.. خلي علا في حالها وانتي يا علا خلي لي الناس البتخصني في حالها
لمار : قال ليك خليني في حالي يا علا
علا : اخلطو ساي يخلطوكم في خلاط من الليلة لي بعد بكرة قولو امين
كلهم قعدو يضحكو فيها ساي
طبعاً البنات كلهم كانو قاعدات مع لمار ومنار في غرفة واحدة وادهم كان مشا الحديقة الخلفية
ادهم : تعالي لي في الحديقة
لمار : ابيت
ادهم : انتحر انا.. انتحر انا ولا كيف
ضحكت فيهو وقالت : انت كان انتحرت انا بحصلك طوالي انت قايل شنو
ادهم : بعد الشر عليكي يعمري
قالت ب صوت طفولي : يو تو بيبي
هزار : اكيد قال ليكي تعالي ليهو.. امشي أصلاً نحن لينا الله.. منار بهناك مجتبى قال ليها تجيهو.. واي ياا ساميااااوو انا لي الله ورقاد المظلة
ريماس : يشيلنا السيل نحن يا صحبتي
علا : بس ياهو ذاتو.. وانتي مالك بتضحكي براكي
ملاذ : انا.. لا لا انا ما
هزار : خليكم خليكم كلكم عندكم الا انا.. انتحر انا ولا كيف
علا : لا لا يا بت تنتحري ليي الدنيا دي حلوووة.. فيها شنو اذا ما عندك.. مالك ومال الرجال ياخ عيشي حياتك ساي
هزار : والله يا التومة صدقتي
لمار قعدت تضحك فيهم بس انبهرت في كلام علا وشافتها واعية شديد.. اكتر من الأول
نزلت ليهو ولقتو واقف بيدخن بس من شافها رمى السجارة وطفاها بي جزمتو
كشرت ليهو وشها وقالت : يااخي؟! انا ما شفتك يعني؟!
ضحك وقال : شفتي شنو؟
لمار : الشي دي انا ما بحبها ولا بحب زول بيهمني يدخنها
ادهم : انا بديت اقلل منها على فكرة.. عشانك
من قال ليها كده خلاها تقطع صورة وصوت
ابتسمت ليهو وقالت : احسن حاجة عملتها
ادهم : شفتي كيف يا ليلي
بدا يقرب منها وهي بدت ترجع
لمار : مالك؟
ادهم : ماف شي بس انتي الليلة طالعة حلوة شديد
لمار : والمرات الفاتت؟
قرب منها زيادة وهمس ليها بي : اكتر من بيرفكت.. دايماً بتسلبي مني عقلي وبتخليني اجن.. كلو يوم بتحلوي اكتر من اليوم القبلو وانا ذاتي ما عارف كيف!!
رجعت خصلها ل ورا وقالت : وانت دايماً بتخليني ادخل جوا ضفوري وانت قريب مني عشان كده ابعد شوية
ضحك وقال : ولو قلت لأ؟
لمار : يبقى انا حهرب
ومن اتحركت كده مسكها
ادهم : وييينن يااا
فكت يدها منو وربعت ليهو يدينها وهي بتضحك وقالت : اها جبتني عشان شنو وريني؟
كان بيعاين ليها بي فضول وهو بيقول : متحمسة عشان تعرفي السبب للدرجة دي؟!
لمار : يب
ادهم : احمم بس عايز اقول ليكي ما تلبسي لبس ضيق.. تتذكري فستانك الاسود الضيق داك.. تاني ما تلبسيهو الا اذا كانت حفلة بنات حاضر؟
لمار : ادهم فستاني داك كان فيهو شنو يعني؟ كان ساتر على فكرة
ادهم : وفايدة الستر شنو اذا كان ضيق.. كلو شي فيكي بقى بيخصني يا لمار افهمي الحاجة دي.. لو كان وشك ولا شعرك ولا جسمك !! ف انا ما بحب زول غيري يشوف الحاجات البتخصني دي
لمار : حاضر ايا طلب تاني؟؟
ادهم : زعلتي يعني؟
لمار : لا لا ما زعلت ازعل ليي يعني؟
ادهم : ما تزعلي مني حبيبتي.. انا عايز مصلحتك بس.. وكده ذاتو ما صح لأنو الكلام ده ما بيرضي ربنا
لمار : على سيرة الموضوع ده.. عايزة اقول ليك حاجة
ادهم : قولي حبيبي
لمار : انا عايزة اتحجب وجادة في الموضوع ده
قال ليها بي فرحة : احلفي؟؟!
لمار : والله
ادهم : متين طيب عشان نمشي مع بعض السوق..
لمار : كدي خلي عرس ناس مجتبى ومنار ده يعدي على خير ونمشي بعدو طوالي
...
مرت الأيام وجا يوم العرس بتاع مجتبى ومنار
الشباين كلهم كانو مطقمين باللون الأسود.. البنات لابسات فساتين وكل وحدة شكل فستانها براهو.. والأولاد كلهم لابسين بدل وكلو واحد برضو شكل بدلتو براهو
ده كان فستان منار

اما مجتبى لابس نفس بدلة ادهم بس باللون الابيض

وفستان لمار 👇🏼

عملو ليهم حفلة من نوع غير.. كان كلو شي فيها غير.. كان فيها اغاني سودانية وفيها اغاني كتيرة.. اشكال والوان
مراد طبعاً جا العرس وقعد مع ماريا وجاسر ده كان متغايظ منو شديد وكان كلو شوية بيديهم نظرات(بيتاوق ليهم)
ولمار دي ما كانت بتحب ترقص بس حتتو حت وادهم ده يشيل ويحمر ليها
بعدو جا وقعد يرقص معاها
ادهم : الفستان مفتح لشنو يا انسة؟
لمار : عجبني
ادهم : طالعة حلوة شديد بس الجمال ده كلو ما يطلع تاني برا مكشف كده او بي لبس ضيق
قالت وهي بتضحك : حاضر يا سيد دودو.. ايا طلب تاني؟!
ضحك وقال : سلامتك بس.. شنو رايك نرقص اسلو؟
لمار : طيب دقيقة امشي لي بتاعين الديجي ديل اوريهم الأغاني المفروض يشغلوها لينا.. بعرف موسيقى كده من الموووتت يا ادهم
مسك يدها وقال : كنت ما عايزك تمشي وانا امشي بس هسه حمشي وانتي حتمشي معاي عشان كلهم يعرفوكي حقتي واسم الموسيقى شنو ممكن اكون بعرفها
ابتسمت وقالت : مفاجأة
ساقها ومشو بس في واحد كده شليق من بتاعين الديجي قعد يعاين ليها بعدها قعد يشاغل فيها قام قال : المدام حلوة.. رقمك كم يا قمر انت
ادهم : قلت لي المدام شنو؟ ورقمك كم؟
مسكو من قميصو واداهو بنية في وشو.. البنية دي من المرة الأولى من شدة قوتها شوهت ليهو وشو ورعفتو
لمار صرخت بعدها حاولت تفكو منو وهي بتقول : ادهم خلاص.. حتقتلو وبعدين انت الحتترمي في السجن.. ده غبي ساي ما تشتغل بيهو
ادهم : كيف ما اشتغل بيهو وهو بيشاغلك قدام عيوني؟؟ والله لو علي اقتلو واشرب من دمو النجس ده
كان معاهو ديجي تانيين وحاولو يفرقوهم من بعض بس ادهم خوفهم وطبعاً ادهم ما خلا الديجي ده وقعد يضرب فيهو بكل قوتو.. ضربو تمام لمن ملامخ وشو بقت ما ظاهرة بعدها طلع وهو معصب
علا جات مخلوعة وقالت : مالكم يا لمار؟ في شنو؟
هزار وليث جو برضو اما الباقيين كانو بيرقصو وما مركزين معاهم
لمار : الغبي الواقع في الواطة ده شاغلني قام ادهم ضربو وطلع معصب بسببو
قرب منهم واحد تاني وقال : ليهو حق يشاغلك
غسان جا فجأة وقال : شنو؟ منو الليهو حق ياا #*$!?
لوا ليهو يدو كسرها ليهو واداهو ليك بنج اعتقد كان حيقتلو بس ده اخف قدراً من الضربو ادهم.. داك لمن نزف ووشو ورم
طبعاً ناس دكتورة سهام وحسان وغسان عزموهم جاسر ولمار
علا وهزار كلو وحدة مسكت ليها واحد ووقعت فيهو ضرب وليث ده يضرب ده يفكو يمسك التاني يضربو وبعد انتهو منهم طردوهم برا الحفلة طوالي
غسان كان عايز يتكلم مع لمار وهي كانت بتحاول توقفهم لأنو الولدين ديل قربو يموتو بعد قنعت منهم مرقت لي ادهم
لقتو قاعد في حديقة الصالة بيدخن وصاري وشو
لمار : عايزة اعرف متين حتبطل الزفت دي؟
سحبتها من يدو رمتها في الأرض وعفصتها بي كعبها
ما اتغاظ منها ولا عمل ليها حاجة بس طوالي اترمى في حضنها.. صح انها اتخلعت بس شدتو عليها
ادهم : خليكي.. ما تبعدي يا لمار
لمار : مالك يا ادهم؟ انت كويس؟
ادهم : كويس بقربك مني بس
لمار : ادهم.. انا حاسة بي احساس ما كويس
زحا منها وقال : زي شنو؟
لمار : ما عارفة بس قلبي قابضني شديد
هو برضو كان حاسي بي نفس الاحساس ده بس ما وراها قام قال : قولي اللهم اجعله خيراً وما بيحصل الا الخير
لمار : كويس
غسان وعيلتو مرقو ولمار مسكت ادهم من يدو واتجهت عليهم.. عرفتهم على بعض طبعاً..
غسان ما كان زعلان ولا متغايظ.. لا كان فرحان شديد واتعرف عليهو عادي وادهم عرفو واتعامل معاهو عادي وقعد يتضاحك ويتونس معاهو
لمار كانت واقفة جنب ادهم وبعض من اهلو كانو برا طلعو يودعو ناسهم وناس ام غسان وابوهو برضو لأنهم طلعو بيعرفو بعض من زمان
(ادهم في اليوم داك كان هو ومحمد اتصالحو ومحمد اتصالح مع ابوهو وفريدة وكل زول كان متزاعل معاهو مع انو بيتعامل مع اغلب الناس كويس)
المهم ادهم جاهو اتصال
فتح الخط والمتصل ده قال ليهو : عامل لينا فيها راجل.. طيب انقذ اهلك وورينا رجولتك دي
والتاني المعاهو قعد يقول : تِك تكِ تِك تِك بممم ههههههه
الصوتين ديل ما كانو غريبين عليهو.. الصوت الأول كان صوت بشار والتاني صوت داني..
ادهم عيونو دمعت وعاين على جهة الصالة
لمار : ادهم مالك؟
جرا على جهة الصالة وهو بيقول ليها : خليكي بعيدة وما تخشي الصالة.. اطلعي برا يا لمااارر
ما سمعت كلامو وجرت وراهو بي خوف بس فجأة الصالة.. انفجرت
والكانو جنب باب الصالة والفي الحديقة طارو عديل من قوة الانفجار
وهي حست بي جسمها ده بس طاير في الهوا وربب وقعت في الأرض
...
بعد مرور ثلاثة أشهر
قعدت تضرب في نفسها وتجر في شعرها.. جا جاري على صوت صراخها وهو مخلوع
ادهم : لماار.. لمااارر.. اهدي اهدي حبيبي..
قعد يقرا ليها ويطبطب عليها.. يومياً ولمدة التلاتة شهور دي كاملة هي كانت في الحالة دي.. ما كانت قادرة تتحمل فراق اهلها وكانت منغلقة على نفسها في غرفة من غرف جناح ادهم واللي هي شقتهم مع بعض وشقتها الجديدة.. ايوه بعد موت اهلها وبعض من اهلو جابها وسكنها معاهو بما انو عاقد عليها.. ما كان نهائي بيخليها براها وبيحاول دايماً يطلعها من اكتئابها ده.. كانت مارة بي اكتئاب حاد..
على الرغم من آلامو الما كانت بتخف أبداً بس برضو ما كان بيخليها لي حزنها
...
كانت بتجرب في شكل حجاب مناسب معاها وبعد اتحجبت ولبست ليها بلوفر أسود وبنطلون اسود نزلت تحت ولأول مرة بعد تلاتة شهور من موت اهلها..
كانت لابسة أسود في أسود.. حتى الحجاب كان أسود.. زي لون حياتها
كانت خاتة يدينها جوا جيوب البلوفر
بعد مرقت الشارع ركبت عربيتها
مرق من الحمام ومشا ليها عشان يشوفها في اوضتها بس لقاها مافيشة.. قعد ينادي فيها بس ما لقا جواب
فتش البيت ده كلو وقلبو طالع نازل بس ما لقاها..
نزل تحت واتوجه بالتحديد للصالة.. لقا هزار قاعدة ومعاها علا
قال ليهم : لمار وين؟
هزار : ما شفتها
علا : شفتها قبلي شوية طلعت برا، حاولت اوقفها بس ما رضت.. كانت شاردة
ادهم : ما شفتيها مشت على ياتو جهة؟
علا : لأ
ادهم : مناف وماريا وين طيب؟
علا : ذكرتني.. هسه كنت ماشة اشوفو.. بيكون في اوضتو
ادهم : وماريا والباقيين
هزار : كلو واحد قاعد في غرفتو
ادهم : طيب امشو شوفوهم
ادا هزار نظرة كده وطلع طوالي.. في التلاتة شهور دي، دي كانت طريقة الكلام بينهم ويمكن اقل ومرات ما كانو بيتكلمو أصلاً.. يمكن كم مرة كلو واحد فيهم كان بيحاول يطبطب على التاني بس وقفو يعملو كده لمن لقو الحال على حالو.. كلو واحد كان بيحاول يلملم نفسو.. او يمكن شتاتو
مشا النيل واول مكان اتجه عليهو المصطبة ديك
لقاها قاعدة وظنو ما خاب.. كانت في مرا كبيرة كده بتبيع فشار وفنكوش وشاي وقهوة قاعدة وهي قاعدة جنبها
كانت بتبكي والمرا بتحاول تواسي فيها
لمار : انا اهلي كلهم ماتو يا خالتي.. صاح انو راجلي معاي وانا بحبو شديييييدد وهو ما مقصر مني بس اهلي.. انا ما بقدر اعيش من دونهم.. بتذكر بابا الدايماً كان بيقيف معاي في كل قراراتي الباخدها.. وماما دايماً البتكون حنينة معاي وتديني نصايح وتشوفني اذا اكلت او لأ.. وريماس اختي.. ريماس الكلو مرة كنا بنتشاكل بس بنرجع نتصالح ونقعد مع بعض عادي وندردش ونضحك.. نصلي ونشوف افلام مع بعض.. وناكل ونشرب نسكافي وشاي مع بعض.. ونطلع مع بعض
انا ما قادرة اتخطى يا خالتي محاسن قولي لي اسوي شنو؟؟! انا ما عارفة سويت شنو في حياتي دي عشان اتجازى كده.. ما حصل اذيت زول بس انا كنت دايماً البتأذي!!
محاسن : هيا بتي انتي كلو يوم بتجي تبكي كده وما بتحاولي تغيري تفكيرك وتمرقي من الانتي فيهو.. لي متين نان؟! الدنيا دي أصلها كده.. عندك انا دي.. عندي اخوي اسمو كمال ومع انو الصغير بس كان دايماً بينصحني وبيحاول يصلحني ويخليني امشي في الطريق الصح.. انا كنت انسانة سيئة شديد يا لمار يا بتي، واسوأ الحاجات الممكن تتخيليها انا كنت بعملها.. بس هو دايماً كان بيديني فرصة لحدي ما قنع مني وحاول يستلم مني الادارة بتاعة المصحة.. في يوم ظلمت لي ولد بيكون عمرو ١٦ ١٧ سنة كده وخليتهم يكهربوهو.. مع العلم اني كنت عارفة انو كويس بس دي كانت كعوبية مني ساي الله يسامحني.. كنت كعبة بمعنى الكلمة.. شفتي الأشرار البيجيبوهم في افلام الكرتون وفي المسلسلات والأفلام ديل؟ انا كنت اكعب منهم.. ناس كتار في المصحة دي عانو مني واتظلمو.. بقو مجانين عديل مع انهم كانو نصاح وده كلو بي سببي.. انتي عارفة انو في نفس اليوم الظلمت فيهو الولد داك انا دخلوني السجن؟؟ بس انا ما زعلت !! عارفة ليي؟! اكتشفت اني غلط في آخر لحظات.. عايزاكي تعرفي انو الدنيا دي فيها ظالمين كتاار وناس سيئيين كتااارر ويمكن اقرب الناس ليكي يكونو سيئين.. ومادام انتي الاتأذيتي وما اذيتي ف ربنا حيشيل ليكي حقك وحيعوضك.. وبالنسبة لي اهلك ف ربنا يرحمهم بس عايزة اقول ليكي حاجة.. كلنا بيموتو لينا ناس.. وقرااب لينا شديييدد.. بنبكي اي وما اكضب عليكي.. بنزعل ونبكي عليهم بالشهور ويمكن بالسنين بس ما بنوقف حياتنا لأنو كلنا مصيرنا نموت.. الموت حق يا بتي.. انا ما حقول ليكي ما تبكي ولا حقول ليكي ما تزعلي.. ما حمنعك نهائي واخدي راحتك على الآخر.. بس ما توقفي حياتك عشان موت زول مهما كان الزول ده قريب ليكي.. نحن بس علينا الدعا.. ندعي ليهم ونقرا ليهم الفاتحة ونتصدق ليهم
غطت وشها وقعدت تبكي شديد من كلام محاسن
محاسن فتحت ليها يدينها وقالت ليها : تعالي
لمار ولا اترددت وطوالي اترمت في حضن محاسن
ادهم : اي عليكي الله يا خالتي وريها انو الزول ما يوقف حياتو عشان موت زول حتى لو قريب ليهو
اتخلعت لمن لقتو قعد جنبها في البنبر
محاسن : أصلاً يا ولدي ده الكلام الصح
ادهم : شفتي كيف.. كبي لي شاي يا خالتي عليكي الله.. مصدع شوية
محاسن : كرعلي يا ولدي سلامتك.. هسه دي اكب ليك شاي
ادهم : تسلم لي يدينك يمه
ابتسمت ليهو وفرحت من كلمة يمه دي شديد
كبت ليهو شاي ومدتو ليهو
لمار : عرفتني قاعدة هنا كيف؟
ادهم : انتي حته مني كيف ما اعرف؟ بعدين ده مكانك المفضل ولا ما كده؟
هزت ليهو راسها ب معنى اي وعلى شفايفها في ابتسامة صغيرة
ضحك بعدها قال : على فكرة طالعة حلوة بالحجاب
ابتسمت وقالت : انت الأحلى
ميلت راسها على كتفو ورقدت
محاسن : هي انت راجل لمورة يعني؟
ادهم : ايوه
محاسن : ربنا يخليكم لي بعض ياخي.. والله يا ادهم لمار دي تشيل وتحكي لي عنك وتشكرك لي.. كلو ما تجي هنا ماسكة لي في سيرتك.. الظاهر انكم بتحبو بعض شديد.. حافظو على بعض عليكم الله يا وليداتي
ادهم : الله مش قلتي لي كده يا خالتي الليلة انا مش احافظ عليها.. انا حشيلها في عيوني عديل.. لو علي ادخلها جواي واقفلها بالمفتاح وتبقى حبيسة قلبي
محاسن قعدت تضحك وتتكشم وتعاين لي لمار ولمار دي زحت من ادهم وما عرفت تودي وشها وين.. بس الحاجة الوحيدة اللي انا وهي عارفنها.. انها اتمنت انو الأرض تنشق وتبلعها
محاسن : الله الليلة انا مزاجي بقى فوق يا اولادي شكلي حرجع بيتي وانا مبسوطة
ادهم ضحك وعضا شفتو السفلية
محاسن ضيقت عيونها وقالت : كأني شايفاك في حتة يا ولدي
ادهم : مش كنتي مديرة مصحة()؟!
محاسن : اي ياني ذاتي
ادهم : بااااسس اخوي كان دخلو هناك
محاسن : انت اخوك ده بيشبهك شديد.. هو تومك ولا شنو؟
ادهم : ايوه واسمو جاسر.. كان دخل المصحة وهو نصيح
محاسن : حييي انا يا ولدي.. كان حيجن بي سببي
حكت ليهو كل القصة قام قالت : اعفي لي يا ولدي حق اخوك وسلم لي عليهو وخليهو هو ذاتو يعفي لي عليك الله
ادهم : كلنا بنغلط يا خالتي والله بيرحم وبيسامح نحن منو عشان ما نرحم ونسامح؟
اتونسو مع محاسن شوية فجأة جات عربية والجوا العربية ده نزل القزاز
محاسن شهقت وقالت : كمااالل؟!
كمال : ايوه كمال.. بتمنى تكوني اتعلمتي درسك يا اختي الكبيرة
وضحك بعدها نزل طوالي واتجه على محاسن وحضنها
حضنتو وقعدت تبكي شديد وهو ذاتو بكى معاها
محاسن : اشتقت ليك شديد يا كمال
كمال : وانا ذاتي اشتقت ليكي يا محاسن يا اختي
لمن خليتهم يقبضو عليكي كنت عايزك تقعدي حبة عشان تاخدي درس بعدها قلبي حنا وجيتك بعد كم شهر طوالي بس ما رضو يطلعوكي وكنت في كل سنة بجي وبي كفالة ما بيرضو.. ياخ صعبين خلاص
السنين دي كلها انا بفكر فيكي ولمن قالو لي انك طلعتي خفت تاني ما القاكي وقعدت افتش عليكي السنين دي كلها
محاسن : انا في الدنيا دي ما عندي غيرك يا اخوي.. ربنا ما يحرمني منك
كمال : وما يحرمني منك
عرفتو على ادهم ولمار وعرفتهم عليهو
وقعدو يدردشو مع بعض
...
علا بهناك مشت لي مناف لقتو راقد وبعاين على الحيطة
علا : مناف
مناف : ممم
علا : عليك الله يا مناف اطلع من الانت فيهو ده
كلنا متأثرين وما قادرين نتحمل بس ما لي درجة انو نقفل نفسنا على أربعة حيطان ونوقف حياتنا نهائي
(في الحقيقة علا ذاتها كانت قافلة نفسها على أربعة حيطان وموقفة حياتها بس ما استسلمت للاكتئاب)
علا : عندك انا دي.. موتهم كلهم أثر علي.. مجتبى.. محمد.. ليث.. ماما فريدة.. والباقيين كلهم.. انا ما قادرة انساهم كلهم يا مناف بس مواصلة.. مواصلة حتى لو بالغصب لأنو في النهاية حتعود مع اني ما حنساهم، ومع انو ماف فايدة من حياتي.. وانا هسه حقول الحمد لله انكم عايشين وربنا ما يحرمنا من بعض
مناف قعد على حيلو وهو بيبكي وحضن علا وهو بيقول : ان شاء الله يا علا.. ان شاء الله ربنا ما يحرمنا من بعض.. لأني خلاص ما قادر
الأم فراقها حاااااارر شديد يا علا وربنا لا ضوقك الاحساس ده.. انا ما قادر على فراقها وما قادر ارجع ل طبيعتي
قعدت تبكي وهي بتقول ب صعوبة : الله يرحمهم ويغفر ليهم.. ونحن معاك يا مناف.. امي هي امك.. ونحن حنقيف مع بعض كده لحدي ما نتجاوز المحنة دي.. هم هسه محتاجين دعائنا بس يا اخوي
(طبعاً العايشين بس غير ناس ادهم.. عبد الله، وجن، ماريا، جاسر، جينيفر)
ماريا وجينيفر جو سكنو معاهم في نفس الفيلا
ادهم ولمار في شقة.. مناف وعبد الله ووجن وهزار وعلا في شقة.. وجينيفر وماريا في شقة.. مرات علا وهزار بيجو يبيتو مع ماريا وجينيفر ومرات مع لمار وادهم
طبعاً ادهم مدي لمار حريتها ومخليها تنوم في اوضة براها ومرة مرة لمن تضايق بيجي يهديها وينومها في حضنو
وجاسر طبعاً قاعد في بيتو وقافلو عليهو
(ناس هزار الأيام الفاتت لمن مشو المطار ما لقو ناس مؤيد وفي اليوم البعدو مؤيد وراها الحصل وكسر شريحتو وجدعها)
...
ادهم ولمار وصلو البيت بالضهر كده وادهم طوالي ضرب ل جاسر قال ليهو تعال
اتلمو كلهم في وحدة من الصالات التحت وادهم بدا يتكلم وده طبعاً بعد جاسر جا
ادهم : نحن كنا طول الوقت ده بعيدين عن بعض.. البنعمل فيهو ده غلط
طبعاً عبد الله بقا مقعد ووجن وجينيفر عندهم اصابات كتيرة والباقيين برضو بس اكتر اتنين جروحهم خفيفة هم لمار وجاسر
كلهم وافقوهو الرأي
ادهم : نتصدق وندعي ليهم.. نبني جامع ونخت ازيار جنبو وعلى الطرق
جاسر إبتسم وقال : فكرة حلوة
لمار : فكرة حلوة شديد
كلهم وافقو بعد شوية كده ادهم قام وقال لي لمار : تعالي معاي حبيبي
قامت ومشت وراهو لحدي ما وصل المطبخ بعدها قال : شنو رايك الليلة نعمل الكيك الانتي بتحبيهو ونسوي شاي.. اكتر ناس بيعرفو يعملو الكيك بالشوكلاتة انا وانتي ف ارح نعملو
حضري لي المكونات الموجودة بس والمضرب والصينية حقت الكيك وانا حقول لي جاسر ومناف يمشو يجيبو باقي المكونات
لمار : حاضر حبيبي
عملو الكيك وختوهو في البراد بعدها عملو الشاي والاكل
جاسر قال : انتو من زمن الكيك.. في حلا كده مشهورة اسمها تراميسو
ادهم : يا غبي نحن عارفين انواع كتيرة من الحلويات بي حلاك دي انا عارفها بس انا قلت نعمل كيك شوكلاتة عشان اغلب القاعدين في الصالة دي بيحبوهو
جاسر : طيب انا ماشي اعمل الحلا التاني ما هو لازم اضوقكم ليهو وانتو اكلو ما تنتظروني
ادهم : امشي اعملو سريع وحننتظرك
ابتسم ليهو ومشا وعلا جاها فضول تشوفو بيسوي الحلا دي كيف وحيظبطها ولا لأ طوالي مشت وراهو
بعد اكلو تمام كلهم اتساعدو وشالو العدة ودوها المطبخ غسلوها بعدها طلعو الحلويات وبدو يختو فيها ومعاها الشاي والعصاير
بعد انتهو غسلو العدة الباقية ونضفو الحتة وجو شافو ليهم فيلم.. بعد الفيلم انتهى عبد الله مشى بي عجلتو اتجاه جاسر وقال : دنقر يا ولدي
جاسر ما كان فاهم حاجة طوالي دنقر عليهو قام عبد الله حضنو وهو بيبكي وبيقول : سامحني يا ولدي
سامحوني كلكم.. انا بس كنت عايز مصلحتكم لمن كنت بضربكم ولمن وديتك المصحة يا ولدي
ادهم : والله يا ابوي عدد المرات الضربتنا فيها بالعدد بس جاسر ده ما اكضب عليك غلطت في حقو كتير.. يعني هو ما كان مجنون وانت دخلتو المصح
عبد الله : بسببي هو كان بعيد عننا الفترة ديك كلها واتأذى كتير بسبب الموضوع ده.. ولدي قرب يموت بسببي..
لحظة قال آخر عبارة دي هو انهار وبقا يجعر بي أعلى صوتو
جاسر : ما تبكي يا ابوي كلنا بنغلط وانا عافي ليك
وجن طبعاً اتخلعت لانها ما كانت عارفة ومشت حضنت جاسر طوالي وهي بتقول : وبعلي يا ولدي انت كنت بتمر بي كل ده وانا ما كنت عارفة؟ ليي ما وريتوني يا جماعة؟ لي انا ما عندي علم بالحاجة دي؟ اها وانت يا ادهم وانت يا مناف؟ ابوكم ده ما عمل ليكم زي ما عمل لي جاسر؟ وانتن يا بناتي؟ بري الراجل ده ما منو ضمان!!
علا : لأ ما حصل
هزار : ما حصل
مناف : بصراحة بس جاسر الحصل ليهو كده يا امي
وجن : الحمد لله يا ولدي انكم كويسين
عاينت لي جاسر وقالت : بس انت يا حبيبي اتعذبت.. ربنا يعوضك خير
جينيفر : نحن كلنا كنا عارفين بس راجلك عاد ما ورانا المصح الهو قاعد فيهو وانا من الزمن داك بعدت عنهم بسبب التوأم.. كرعلي يا جاسر يا ولدي
ماريا حست قلبها بيتقطع لمن قالو كده ولمار كانت حانة عليهو
كلهم مشو حضنو جاسر ما عدا ماريا ولمار وعدو يومهم بسلام
...
عدو ٤ ايام بسلام واليوم الخامس ادهم جاهو اتصال ومن نفس الرقم الاتصل عليهو يوم تفجير الصالة
بشار : عايزنا نخلي اهلك الفضلو ليك ديل بسلام حتعمل حاجة وحدة.. حتجينا وتسلم نفسك
داني : براحة على الولد يا بشار حتخلعو هئهئهئهئهئ
قال بي برود : اجيكم وين؟!
داني شال التلفون من بشار وقال : في()
لمار طبعاً سمعتو وقررت تمشي لي غسان بس اتذكرت انو ماف وقت ف اتصلت عليهو بس
صوتها كان بيرجف وهي بتتكلم معاهو
لمار : غسان الحقني.. جيب معاك دوريات شرطة في()
وحكت ليهو الحاصل كلو من طقطق للسلام عليكم
كانت ماشة على غرفتو وبالصدفة سمعتو بيتكلم مع هزار
هزار : بس يا ادهم ما ينفع كده.. ما ينفع النحن بنعمل فيهو ده وما ينفع انت تمشي براك
ادهم : هزار اول شي لو ما كان ضربو ليكي المجرمين النتنين ديل ووروكي انا ما كنت حوريكي ف عشان كده رجاء ما تجي معاي وتاني شي ما لازم لمار تعرف اني قاتل
~
كلمة قاتل دي وقعت علي زي الصاقعة بس كنت حاسة.. عارفة انو مختلف وانو مستحيل يقتل زول بس ما عارفة لي كنت حاسة انو قاتل.. يمكن لأنو كل الأدلة بتشير على انو قاتل.. بس انا كنت بنكر ومخي ما راضي يصدق الفكرة دي أبداً رغم قوة الادلة ووضوحها
رجعت لي ورا مخلوعة ومشيت قفلت اوضتي علي
ما عارفة لي بس حسيت نفسي عايزة افضفض ولمنو؟ ل غسان.. ما عارفة لي بس حسيت بي انو قطعة مني
اتصلت عليهو وقلت : عاين يا غسان ابعت دوريات الشرطة للمكان داك وتعال اغشاني
غسان : خلاص اجهزي
بعد جاها وركبت معاهو اتحركو
بعد شوية كده قال ليها : حاسي بيكي ما تمام.. يعني زي الرايحة ليكي حاجة كده
لمار : فعلاً.. انا ما تمام يا غسان.. انا ضايعة وده كلو بسببو
غسان : عرفتي حقيقتو؟
لمار : قصدك شنو؟
غسان : انو قاتل مثلاً..
حاولت تتمالك نفسها بس ما قدرت.. بكت وغطت وشها بيدينها
غسان : ما كنت عايز اصدمك.. اول جريمة ليهو كانت وهو بيدافع عن نفسو وبيصد في واحد.. واحد متحرش.. كان عمرو ١٩ سنة.. ما عارف اسوي شنو بس القرار قرارك.. انك تقيفي معاهو.. او انك تقيفي ضدو..
عايز اقول ليكي الحاجة دي.. انك نقطة ضعفي يا لمار وانا ما عارف اذا وقفتي معاهو انا اقيف معاكم ولا ضدكم.. فكري بي سرعة وبي حكمة.. ما عندنا وقت
سرحت مسافة وابتسمت وقالت : حقيف معاهو ولو عايزين تسجنونا اسجنونا بعداك
سوق بسرعة يلا
غسان : حاضر
لمن وصلو ادهم ما كان وصل لسه ولمار وغسان ادسو ورا حجار كبيرة كده اما الشرطة ف ما كانت وصلت لسه ووحدة من عربيات الشرطة اتفجرت
لمار كانت لابسة 👇🏼

وادهم كان لابس 👇🏼

المهم بعد ادهم وصل اتكلم وقال : عايزين مننا شنو انتو؟ قتلتو جزو كبير من اهلي بس مستحيل اسمح ليكم تأذو الباقيين
قال بطريقة كده اعتقد غاظتهم الاتنين : تحلمو
وجراها مسافة
داني : القنبلة التانية بعد شوية حتتفجر هئهئهئهئهئ
ادهم : حصل زول قبلي كده قال ليك ضحكتك شينة؟
وضحك باستهزاء
بشار : الزم حدودك يا ولد وجن
ادهم : اوعك تجيب سيرة امي على لسانك الوصخ ده
داني وبشار طلعو مسدساتهم
لمار شهقت وكانت عايزة تتحرك على ادهم بس شافت هزار من بعيد جارية عليهو قامت جرتها على جنبة وقالت : المشاكل والنزاعات ما بتتحلى بالقوة.. عليكي الله ما تمشي لأنو لو حصلت ليكي حاجة ادهم بيموت عليكي وامك وابوكي واخوانك كمان
بشار : وين هزار؟
داني : وجينيفر؟
ادهم اتخلع وقال في نفسو : جينيفر برضو عايزين تقتلوها يا #*$!?
داني : بيهمك في شنو؟ مش اختنا؟
مشا ناحيتهم قام بشار قال : عايز تورينا رجولتك صاح؟
ادهم ما رد
بشار طلق رصاص ورا بعض بس انتو عارفين الاتصاوب منو؟ جينيفر
ادهم : جينيفر لأ
هزار ما اتحركت من مكانها ودخلت في حالة صدمة
لمار : غسان امسك هزار دي وعليك الله ما تمشي منها وتخليها براها.. البت دي امانة في رقبتك
جرت طوالي على جهة ادهم والشرطة وصلت يادوب.. مشو عليهم براحة لحدي ما مسكوهم
ادهم : جينيفر.. جينيفر قومي.. ما تموتي يا خالتي
لسه نحن ما طلعنا مع بعض ولا عملنا الحاجات الانتي نفسك تعمليها معانا
جينيفر : خلي بالك من اهلك يا ولدي.. خلي بالك من وجن وماريا شديد ومن ليلي دي
كلهم شيلهم في عيونك
نطقت الشهادة بس فجأة سكنت.. بقت لا بتتحرك لا بتتنفس
لمس اماكن النبض في جسمها ولقى ماف نبض قام قال : جينيفر انتي جنيتي؟ جنيتي صاح؟ كيف تعملي فيني كده؟ كيف تمشي وتخليني؟؟
قال كده وهو بيبكي
زحا منها وقال : خلوهم.. فكو المجرمين ديل وخلوهم لي
طلع مسدسو رصص التوأم كلو واحد في راسو
ورجع لي ورا..
لمار قعدت تبكي وقالت : ادهم لأ
جرت عليهو وكانو قريبين شديد من الحافة
ادهم : انا قاتل يا لمار.. ما كان بيدي صدقيني.. انا اتغيرت عشانك وبطلت اقتل الناس بس ما عارف.. داني وبشار حيأذوكم يا لمار وانا كان لازم اعمل كده
لمار : اي انا عارفة حبيبي.. عارفة كلو شي يا ادهم وانا واقفة معاك.. عارفة انك غلطت بس ما بقدر انك تبعد مني.. ممكن يعدموك عادي وانا ما بقدر اعيش لو حصلت ليك حاجة.. نحن حنعيش سوا وحنموت سوا
ادهم : لا يا لمار ما تظلمي نفسك عشاني
ضربتو في صدرو وهي بتضحك وبتقول : يا ولد مجنون انت؟
- ابعدي عن المجرم ده يا مواطنة والا حتتصنفي مجرمة معاهو وفي الحالة دي ما عندنا غير حلين معاكم.. يا اما تدخلو انتو الاتنين السجن يا انا تترصصو
غسان طبعاً ودا هزار العربية بتاعتو وجا سمعهم قالو كلامهم ده
لمار : صنفوني معاهو أصلاً انا ما عندي حاجة اخسرها
ادهم : لمار ما تعملي في نفسك كده وتضيعي مستقبلك
لمار : ادهم هسسس
غسان : كيف يعني يترصصو انت جنيت؟
انا رئيس القسم بتاعنا ماف داعي تقرر نيابة عني!! ولا ما شايفني وعارفني؟؟
ادهم : غسان اهتم بأهلي وب لمار
نطا بس اتفاجأ بي لمار وهي حاضناهو.. ووقعت!! معاهو..
غسان جا جاري بي اقصى سرعتو وهزار مرقت من العربية وجرت محل نطا ادهم ومعاهو لمار
اما غسان ف شافها وهي بتبعد عنو.. حسا انو بيموت وروحو بتنتزع منو.. وبي دموعو النازلة مطر وقال : لمااااااااااااررررر
...
- أُريد أن أكون معَك في كُل حالاتِك تعال لا تترد .
- إنني أؤمن أن لاشيء يحدُث عبثاًَ.. تِلك ألعثرات إما أن تكون دروساً لباقي العُمر أو أن يكون أجراً عظيماً. أحزان الأمس قد غفت معك على الوسادة دعها في سُباتها,وامضِ مُبتسماً فهُنالك من هو مُغرم بِتلك الإبتسامة. ❤️🥀