ត្របកភ្នែកតូចបើកឡើងយឺតៗបន្ទាប់ពីគេងលង់លក់អស់រយ:ពេលជាច្រើនម៉ោង ស្រីស្រស់យ៉ាគីច្រត់ដៃម្ខាងទាញខ្លួនអោយក្រោកអង្គុយ នាងចាំបានថាមុនពេលដេកលក់ ជុងគុកបាននិយាយជាមួយនាងពីរឿងចង់នាំនាងទៅប្រទេសជប៉ុនសិន តែនាងក៏បដិសេធថាមិនទៅ អោយនាងទៅណាកើត? បើនាងនៅមិនទាន់បានសងសឹកជាមួយ
ថេយ៉ុងផងនោះ។
សម្លេងបើកទ្វារក៏បន្លឺឡើង ធ្វើអោយស្រីស្រស់ផ្តើមញញឹមភ្លាម
< ជុង..អេឡិច!? >
ភាពភ្ញាក់ផ្អើលនិងការភ័យខ្លាចរត់សម្រុកបុកក្នុងខួរក្បាលរបស់នាងភ្លាមៗ ឮបន្ទាប់ពីឃើញអ្នកដែលបើកទ្វារចូលមកនោះមិនមែនជាជុងគុកឡើយប៉ុន្តែជាអេឡិចស្វាមីកំណាចរបស់នាងទៅវិញទេ។
< យ៉ាងម៉េចភ្ញាក់ផ្អើលខ្លាំងទេប្រពន្ធសម្លាញ់?? >
អេឡិចដើរសម្តៅមករកយ៉ាគីទាំងស្នាមញញឹមអំណាចរឹតតែធ្វើអោយនាងស្លន់ស្លោខ្លាចដល់ថ្នាក់ញ័រខ្លួនទទ្រើតដូចកូនសត្វ។
< អេឡិច សុំអង្វរលោកដោះលែងខ្ញុំទៅ..ខ្ញុំដឹងខុសហើយ..ពេលនេះខ្ញុំមានគ្រួសារហើយ! >
នាងតូចយ៉ាគីលើកដៃសំពះអង្វរសុំអោយគេដោះលែងទាំងទឹកភ្នែកសស្រាក់សស្រាំ ប៉ុន្តែកែវភ្នែកពេញកំហឹងរបស់អេឡិចបញ្ជាក់ច្បាស់ហើយថានាយគ្មានថ្ងៃដោះលែងនាងឡើយ។
< គ្រួសារដែលនាងបំបែកបំបាក់ប្តីប្រពន្ធគេហ្នឹងមែនទេ? ពីមុនយល់ថានាងពពោះកូនរបស់យើង ទើបយើងទុកជីវិតអោយនាង តែមនុស្សដូចនាងវាមិនកែបំផ្លាញយើងម្តងហើយម្តងទៀត ពេលនេះកូនរបស់យើងក៏ស្លាប់ដោយសារតែស្រីថោកទាបដូចជានាង!!! >
អេឡិចស្រែកសម្លុតនាងខ្លាំងៗ ភ្នែកក្រហមច្រាលព្រោះភ្លើងកំហឹងក្តៅងំពេញក្នុងទ្រូង ពីមុនគេទុកឱកាសអោយនាងកែខ្លួនជាច្រើនដងព្រោះយល់ដល់កូនដែលនៅក្នុងផ្ទៃរបស់នាង តែនាងជាមនុស្សដែលមិនចេះកែប្រែ លើកនេះនាងហ៊ានលួចយកគម្រោងវាល់លានរបស់គេទៅលក់អោយគូសត្រូវគេ ព្រមទាំងលួចរត់មកសម្ងំលាក់ខ្លួននៅកូរ៉េនេះទៀត ការពិតទៅអេឡិចមិនមែនជាមនុស្សអាក្រក់ញៀនល្បែងស្រីស្រាដូចដែលនាងបាននិយាយប្រាប់ជុងគុកឡើយ គ្រាន់តែគេរាងកាចសាហាវចំពោះអ្នកដែលក្បត់ជាមួយគេ គ្រប់យ៉ាងគឺនាងកុហកសាងមុខមាត់ល្អអោយខ្លួនឯងតែប៉ុណ្ណោះ។
< គឺ..គឺថេយ៉ុង.គីម ថេយ៉ុងជាអ្នកសម្លាប់កូនរបស់ខ្ញុំ..គេជាអ្នកច្រានខ្ញុំទម្លាក់ពីលើជណ្តើរ..លោកត្រូវសងសឹកអោយកូនយើងណា.អេឡិច..លោកត្រូវសម្លាប់ គីម ថេយ៉ុង..សម្លាប់ៗ..វាចោលទៅ!! >
យ៉ាគីស្រវាចាប់ដៃអេឡិចដោយនិយាយទម្លាក់កំហុសអោយទៅថេយ៉ុង កែវភ្នែកក៏ក្រឡេកក្រឡាប់ដូចជាមនុស្សវិកលចរិត ឃើញហើយអេឡិចសែនទើសចិត្តជាខ្លាំង នេះនាងមិនចេះទទួលស្គាល់កំហុសរបស់ខ្លួនឯងខ្លះទេឬ? ពិតជាថោកទាបរកលេខដាក់គ្មានមែន កោតតែអាម្សៀតជុងគុកនោះជឿទៅរួច។
< បានហើយ យ៉ាគី សេហេគិ!! ឈប់ចោទប្រកាន់មនុស្សល្អទៀតទៅ សន្តាននាងបែបយើងស្គាល់ច្បាស់ គិតថាយើងជឿនាងឬ? >
អេឡិចគ្រលាស់ដៃចេញពីនាងសឹងតែផ្កាប់មុខធ្លាក់ពីលើគ្រែទៅហើយ ទឹកមុខស្លូតបូតគួរអោយអាណិតអាសូរមុននេះ ប្រែជាកំណាចវិញមួយរំពេច កែវភ្នែកបើកក្រឡោតៗដូចមនុស្សខ្មោចចូល។
< មែនហើយ! យើងស្អប់វា យើងស្អប់ គីម ថេយ៉ុង..វាដណ្តើមជុងគុក ពីយើង..ហិុក..ហុិក..យើងចង់សម្លាប់វា..តែយើងបែរជា.ធ្លាក់ពីលើជណ្តើរដោយខ្លួនឯងទៅវិញ..វាធ្វើអោយយើងបាត់បង់កូន..ហិុកៗ.. >
ពាក្យសម្តីរបស់នាងធ្វើអោយអ្នកដែលសម្ងំនៅក្នុងបន្ទប់ទឹកនោះ មិនអាចនៅស្ងៀមបានតទៅទៀត ជុងគុកបើកទ្វារបន្ទប់ដើរចេញមក មុខមាំស្រោចដោយកំហឹងចំហាយនរកសាយពេញរាងកាយរបស់គេ ភាពជាបិសាចត្រឡប់មកនៅក្នុងខ្លួនគេម្តងទៀតបន្ទាប់ពីឮសម្តីសារភាពពីចិត្តខ្មៅងងឹតរបស់នាង។
កន្លងមកគេថែរក្សាកញ្ជ្រោងអោយនៅក្បែរខ្លួនរបស់គេឬ? គេពិតជាល្ងង់ខ្លាំងណាស់ដែលលង់ជឿសម្តីស្រីអសិរពិសដូចជានាង បែរហ៊ានលើកដៃទះកំផ្លៀងប្រពន្ធដ៏ល្អរបស់គេ គិតដល់ត្រឹមនេះអារម្មណ៍ឈឺចាប់ដឹងខុសរត់សម្រុកចូលក្នុងទ្រូងភ្លាមៗ។
< ជុងគ.ជុងគុក?? >
យ៉ាគីប្រែជាគាំងអណ្តាតនិយាយមិនចង់ចេញ នេះបញ្ជាក់ថាគេបានស្តាប់ឮគ្រប់យ៉ាងអស់ហើយមែនទេ? អត់ទេ! នាងគួរធ្វើបែបណាទៅ ស្រីស្រស់រហ័សចុះពីលើគ្រែរត់សម្តៅទៅរករាងក្រាស់ជុងគុក ដែលឈរនៅបន្ទប់ទ្វារបន្ទប់ទឹក កែវភ្នែកសម្លឹងមកនាងហាក់ដូចជាចង់ហែកសាច់នាងសីុទាំងរស់។
មុននេះពេលដែលនាងដេកលក់គេក៏បានចូលទៅបន្ទប់ទឹកបំណងចង់ងូតទឹកសម្អាតខ្លួន ដោយសារគេមិនចង់ទៅផ្ទះខ្លាចថាពិបាកប្រឈមមុខជាមួយនិងរាងតូចថេយ៉ុង តែគេមិននឹកស្មានថានឹងបានស្តាប់ឮពីភាពអាក្រក់យង់ឃ្នងរបស់យ៉ាគីឡើយ។
< ជុង..ជុងស្តាប់ខ្ញុំសិនណា..ជុងស្តាប់ខ្ញុំសិន.. >
ស្រីស្រស់ព្យាយាមនិយាយលួងលោមអោយគេទប់ចិត្តព្រមទាំងស្រវេស្រវាបំណងចាប់ដៃមាំ ប៉ុន្តែទឹកភ្នែករបស់នាងប្រើជាមួយគេលែងបានទៀតហើយ រាងក្រាស់ឈានថយក្រោយមួយជំហានមិនអោយនាងប៉ះដៃគេបាន។
< កុំយកដៃស្មោកគ្រោករបស់នាងមកបះយើង!!! >
សម្តីគគ្រាតគ្មានទឹកដមស្រែកសម្លុតនាងមួយទំហឹងដោយការខ្ពើមរអើម ឯនាងបានត្រឹមតែក្រវីក្បាលយំដង្ហក់ឡើងញ័រខ្លួនទទ្រើត។
< នេះឬជុងគុកម៉ាហាតូ កូនប្រុសតែម្នាក់របស់ប្រមុខមាហ្វៀប្រចាំប្រទេសជប៉ុននោះ?..មិនគួរណាល្ងង់ អោយស្រីពស់វែកម្នាក់នេះបង្វិលក្បាលបានតាមចិត្តសោះ!! >
សម្តីឡកឡឺយរបស់អេឡិចក៏បន្លឺឡើង ពិតជាគួរអោយអស់សំណើចខ្លាំងណាស់ជាកូនប្រុសរបស់ម៉ាហ្វៀដែលមានអំណាចកាន់កាប់ជំនួញដ៏មហាសាល បែរជាមកល្ងង់ចាញ់ល្បិចស្រីខ្លួនតូចម្នាក់នេះទៅវិញ។
< ឯងបិតមាត់ទៅ អាអេឡិច!! > យ៉ាគី
< យ៉ាងម៉េចទទួលយកមិនបានពិតទេ.ថាខ្លួននាងនៀក៎! វាថោកទាបកម្រិតណា? > អេឡិច
< បានហើយ!! ឯងចង់យកស្រីម្នាក់នេះទៅបាញ់បំបែកក្បាលចោលឯណាក៏តាមចិត្ត > ជុងគុក
ដល់កហើយភាពជាមិត្តក៏គេគ្មានអោយស្រីម្នាក់នេះទៀតដែរ ចង់ប្តីរបស់នាងយកនាងទៅសម្លាប់ឯណាក៏យកទៅគេលែងខ្វល់ហើយ ឯស្រីស្រស់យ៉ាគីគ្រាន់តែឮសម្តីរបស់ជុងគុកនាងផ្តើមភ័យឆ្លេឆ្លានឹងស្រែកយំកាន់តែខ្លាំង ពេលនេះនាងលែងមានខ្នងបង្អែកទៀតហើយ។
ផ្លាច់! ផ្លាច់!
២កំផ្លៀងផ្ទួនៗវាត់ទៅលើថ្ពាល់រលោងស្អាតរបស់យ៉ាគីរហូតដល់បែកចេញឈាមតាមគែមមាត់។
< ២កំផ្លៀងសម្រាប់ថេយ៉ុងប្រពន្ធរបស់យើង!! >
និយាយរួចរាងក្រាស់ក៏ចាកចេញពីបន្ទប់នោះទុកអោយអេឡិចជាអ្នកចាត់ការស្រីបិសាចម្នាក់នេះចុះ។
ចេញមកដល់ខាងក្រៅទូរស័ព្ទរបស់គេក៏ផ្តើមរោទ៍ ទើបនាយលើកវាយកមកមើលឃើញថាជាលេខរបស់ខូជិ ជំនិតរបស់ខ្លួនទើបគេចុចទទួល។
< មានការអីមែនទេ ខូជិ?? >
< គឺ..អ្នកប្រុសតូចជួបគ្រោះថ្នាក់ចរាចរណ៍ ពេលនេះអាការៈធ្ងន់ធ្ងរណាស់.. >
ក្តុក!!
បេះដូងធ្លាក់ដល់កែងជើង ខ្លួនប្រាណប្រែជាស្រាលស្ងើកដូចសំឡី គេស្តាប់មែនទេ? ត្រូវហើយប្រហែលជាត្រចៀកគេមានបញ្ហាហើយ ថេយ៉ុងម៉េចនឹងអាចកើតអីបានទៅ ប្រពន្ធគេរឹងមាំណាស់។
< អ្នកប្រុសត្រូវបានគេបញ្ជូនមកមន្ទីរពេទ្យជាមួយនិងអ្នកនាងយ៉ាគីដែលទាន! ពេលនេះកំពុងស្ថិតនៅក្នុងបន្ទប់សង្រ្គោះបន្ទាន់!! >
ដោយឃើញចៅហ្វាយស្ងាត់មិនមានឆ្លើយតបអី ខូជិក៏ប្រាប់បន្ថែមទៀត សម្តីច្បាស់ចាក់ចំបេះដូងនាយកំលោះអោយឈឺស្ពឹក មិនចាំយូរជុងគុកក៏ប្រញាប់រត់ទៅបន្ទប់សង្រ្គោះបន្ទាន់ភ្លាមៗ។
_____________
នៅក្នុងបន្ទប់សង្រ្គោះបន្ទាន់
រាងតូចដេកស្ងៀមនៅលើគ្រែហ៊ុមព័ទ្ធដោយក្រុមគ្រូពេទ្យដែលកំពុងធ្វើការវះកាត់យ៉ាងស្វិតស្វាញ ក្នុងចំណោមនោះក៏មានដុកទ័ររូបសង្ហា ជុង ហូស៊ុក ផងដែរ។
< អូនទៅណាមិនបានទាំងអស់គីមថេយ៉ុង អូនត្រូវត្រឡប់មកវិញ ត្រឡប់មកមើលភាពវិនាសរបស់ពួកគេ ពួកគេជំពាក់អូនច្រើនណាស់ ពួកគេត្រូវតែសងរាល់ការឈឺចាប់របស់អូន >
ហូស៊ុកនិយាយតិចៗដាក់រាងតូចដែលដេកស្ងៀម តែចិត្តវិញ្ញាណកំពុងតតាំងជាមួយនឹងផ្លូវមច្ចុរាជ
ទឺត___ទឺត____
សម្លេងឧបករណ៍វាស់ចង្វាក់បេះដូងលោតស្ថេរធ្វើអោយគ្រប់គ្នាមានការភ្ញាក់ផ្អើលនិងតក់ស្លុតក្នុងពេលតែមួយ។
< លោកដុកទ័រ អ្នកជំងឺផុតដង្ហើមហើយ >
សម្លេងគិលានុបដ្ឋាយិកាម្នាក់បន្លឺឡើងទាំងទឹកមុខស្រពោនបន្ទាប់ពីមិនអាចជួយស្រោចស្រង់ជីវិតរបស់រាងតូចបាន ប៉ុន្តែភ្លាមក៏មានមនុស្សម្នាក់ទម្លុះទ្វារចូលមកស្របនឹងសម្តី។
< មិនពិត!! ប្រពន្ធយើងនៅមិនទាន់ស្លាប់ទេ!! >
___________