تامر :سمر كنت عايزك فى موضوع كده
سمر :موضوع ايه ده
تامر :احمد صاحبى عايز يتقدملك بس طلب منى اسألك الاول قبل ما افاتح بابا علشان لو مش موافقة ميتحرجش بعد ما يكون فاتحه
سمر :تصدق بالله صاحبك ده نبيه وبيفهم وفيه حاجة لله
تامر :ليه يعنى
سمر :اصلى فعلا مش موافقة
تامر :انتى لسه معرفتيش حاجة عنه استنى هقولك..
سمر قاطعته :من غير ما تقولى انا مش عايزة اعرف عنه حاجة كفاية اللى عرفته
تامر :وانتى عرفتى عنه ايه يخليكى ترفضيه
سمر :عرفت انه صاحبك وده كفاية يخلينى ارفضه
تامر :بترفضيه علشان صاحبى يا سمر
سمر :اه
تامر :ليه عملتلك ايه
سمر :انت بتسأل بجد
تامر :اه بسأل بجد عملت ايه انا يخليكى ترفضى احمد لمجرد انه صاحبى
سمر :عملت كتير يا تامر عملت كتير خدت ولسه بتاخد حب بابا واهتمامه لوحدك مع انك لا البكرى زى محمد ولا انت اخر العنقود زيى جاب قبلك محمد وجاب بعدك مروان وانا
كل الحكاية انك اكتر واحد فينا خد من شكله وكمان اتولدت عيان فهو بقى بيعوضك بحبه بس انت خفيت يا تامر وبقيت زينا واحسن مننا كمان بس بابا زى ما هو بيعاملك احسن مننا كلنا بيميزك عننا فى كل حاجة سواء كلام او افعال
تامر :ده مش حقيقى
سمر :يا سلام هتعمل نفسك مش واخد بالك انت طلباتك كلها مجابة مصروفك كان اكبر مننا كلنا حتى فى العيد بابا كان بيديلك عيدية اكبر مننا قدامنا يا تامر حتى محاولش يديهالك بينك وبينه علشان ميضايقناش لحد ما كرهنى فى اللحظة اللى باخد فيها العيدية منه لانى عارفة انه هيديلك عيدية اكبر مننا لانه بيحبك اكتر مننا لانه مش شايف غيرك يا تامر كأنه مخلفش غيرك انت حتى لما بتغلط بيسامحك على طول انما احنا ممكن يفضل مخاصمنا بالشهر انما انت مبيقدرش على خصامك اقولك على حاجة يا تامر انا بحس انى عندى اخين مش تلت اخوات ومروان ومحمد كمان كده احنا التلاتة ملناش الا بعض وانت ملكش الا بابا
تامر :للدرجة دى يا سمر
سمر :واكتر بس انا مش عايزة اتكلم تانى كفاية اللى قولته
تامر وهو بيخرج من اوضتها :هو كفاية فعلا
تانى يوم
عماد :تامر يا حبيب ابوك مش يلا بقى علشان تروح تنقى العربية اللى قولتلك هجبهالك عبدالله صاحبى قالى جاله عربيات حلوة اوى تعالى نروحله عايزين نلحق ناخد واحدة حلوة منهم
تامر :انا مش عايز يا بابا
عماد :مش عايز ايه
تامر :مش عايز عربية
عماد :ده انت اللى طلبتها
تامر :ودلوقتى خلاص مش عايزها
عماد :ليه يا حبيبى
تامر :هو حضرتك جبت لمحمد عربية
عماد :لا واجبله ليه
تامر :تجبله لانه ابنك زيه زيى يا بابا ويمكن اكتر منى لانه الكبير انا مش عايز العربية يا بابا انا هبقى اجبها لنفسى من شغلى
عماد :وعلى ايه تعبك ما اجبهالك انا
تامر :تجبهالى وتجيب لاخواتى يا بابا تجيب لمحمد ولمروان ولسمر كمان
انا زيى زى اخواتى يا بابا بالله عليك ما تكرههم فيا اكتر من كده
عماد :وانت اخواتك يكرهوك ليه
تامر :علشان حضرتك بتفرق بينى وبينهم فى كل حاجة يا بابا
الغيرة خلت قابيل يقتل هابيل وخلت اخوات سيدنا يوسف يرموه فى البير وكانو مستعدين برضه يقتلوه
عماد :انت خايف اخواتك يقتلوك
تامر :لا يا بابا انا عارف ان اخواتى ميعملوش كده بس خايف يكرهونى خايف يفرحو لما تجرالى حاجة وحشة ولا افشل فى حاجة خايف لما اموت ميعيطوش عليا ميقولوش الله يرحمه خايف ميزعلوش عليا يا بابا يحبونى ازاى وحضرتك بتدينى كل حاجة حارمهم منها
عماد :انا مقصرتش معاهم فى حاجة
تامر :يا بابا الرسول امرنا انك لو ضحكت فى وش واحد من ولادك تضحك فى وش التانى زيه بالظبط وحضرتك مميزنى عنهم فى كل حاجة وخصوصا حنيتك
ربنا هيحاسبك عنهم
عماد :قصرت معاهم فى ايه علمتهم احسن تعليم بيلبسو احسن لبس وبياكلو احسن اكل جوزت محمد زى ما هجوز مروان وسمر
تامر :ربنا هيحاسبك عن قلوبهم اللى شالت منى يا بابا
حضرتك بعدتنى عنهم بكل اللى عملته ده وانا..انا غلطت لما محاولتش اقرب منهم وقولت عادى وانى عندى صحابى قريبين منى وانا قريب منهم علشان خاطرى يا بابا عاملنى زيى زيهم كفاية تفريق فى المعاملة بنا هيكرهونى ايه اكتر من كده
عماد :انا ولادى بيكرهو بعض ليه اكلتهم من حرام انا عمرى ما دخلت عليكم الا فلوس حلال
تامر :لا يا بابا هما مبيكرهوش بعض هما بيحبو بعض ومبيحبونيش وحقهم هما شايفين انك حاططهم كلهم فى كفة وحاططنى لوحدى فى كفة وكفتى انا هى اللى بطب بميزان قلبك يحبونى ازاى وهما شايفين انك بايعهم وشارينى
عماد :انا عمرى ما ابيع حد فيكم انتو ولادى عزوتى وسندى فى الدنيا
تامر :يبقى حضرتك تعاملنا زى بعض متعملش معايا حاجة مبتعملهاش معاهم يا بابا
عماد :خلاص مش هجبلك العربية الا لما اجيب لمحمد الاول
تامر :ماشى يا حبيبى محمد الاول وبعدين انا
سمر :ممكن ادخل
تامر :ادخلى
سمر :هو...انت رديت على صاحبك ولا لسه
تامر :ايه فى حاجة معينة تحبى اقولهاله وانا ببلغه انك رفضاه لمجرد انه صاحبى
سمر :هو..لا..يعنى لو مقولتلوش يعنى مش لازم تقوله كده
تامر :اومال اقوله ايه مش ده اللى انتى قولتيه
سمر :انتو بتضغطو عليا ليه كده خلاص غلطة وعايزة اصلحها الله بقى
تامر :مين كلكو بتضغطو عليا انتى حكيتى لماما
سمر :لا طبعا ماما كانت هتزعقلى انا حكيت لسهر صاحبتى
تامر :وقالتلك ايه بقى سهر خلاكى تغيرى رايك بالسرعة دى
سمر :قالتلى انى غلطت
غلطت فى اللى قلته ليك وغلطت لما رفضته من غير ما اعرف عنه حاجة قالت كلام كتير معناه انى لازم اخد بالاسباب وان عدم الاخد بالاسباب اخرته هباب
تامر وهو بيضحك :هى اشتغلت على توكتوك امتى كلامها ماله كلام سرسجية كده
سمر :متقولش كده عن صاحبتى
تامر :وانا قولت ايه يعنى كمان انا مش مصدق ان سهر صاحبتك الخارصة اللى بتمشى مجرد ما انا ولا حد فى اخواتك يجى من بره اللى بتهز راسها لما بقولها ازيك ولا السلام عليكم ومبتردش عليا بسلام ربنا حتى تقول كده
سمر :انا صاحبتى مش خارصة وبتقول كده واكتر من كده كمان انت متعرفهاش
واخرتها يعنى لو مقولتلوش انى رافضة قول لبابا وخليه يجى ولو خلاص قولتله يبقى قدر الله وما شاء فعل ربنا رايد كده مش ذنبى
تامر وهو بيضحك :خلاص انتى متعصبة ليه وعموما انا مقولتلوش انشغلت بالتفكير فى اللى انتى قولتيه ومقولتلوش
سمر بحرج :بالنسبة للى قولته انا اسفة يعنى ..مكنش ينفع اقوله
تامر :بتتأسفى ليه مش ده اللى انتى حساه ولا كنتى بتكدبى
سمر :مبكدبش ده اللى انا حساه بس مش لازم تعرفه كمان كلام سهر خلانى افكر انت ذنبك ايه فى اللى بابا بيعمله يمكن لو كنت مكانك كنت عملت زيك اللى هو معملتش حاجة اصلا وخدت كل حبه وحنانه من سكات من غير ما افكر فى غيرى
تامر :هو انتى كده المفروض بتتأسفى عن اللى قولتيه صح
سمر :يييييي خلاص متزعلش منى
تامر :مش زعلان يا سمر كلامك خلانى افكر فى حاجات مفكرتش فيها قبل كده ووعد من هنا ورايح انا مش هاخد كل حب بابا وحنانه من سكات من غير ما افكر فى غيرى
انا هفكر فيكم انا مش هفكر غير فيكم اصلا
وبكرة هكلم بابا فى موضوع احمد وعلى فكرة احمد انسان كويس لو انا مش متأكد انه كويس مكنتش وافقت على انه يتقدم لاختى الوحيدة
سمر :ماشى هيجى واشوفه وان شاء الله خير هرجع اوضتى انا بقى تصبح على خير
تامر :وانتى من اهل الخير يا حبيبتى
بعد شهر
عماد :تامر يلا علشان نروح عقيقة حفيد عمك سليمان
تامر :لا يا بابا انا ظبطت خروجة مع اصحابى خد محمد وروحو وحتى خدو معاكم يوسف ابنه علشان كل اصحابك يشوفو يوسف حفيد الحاج عماد الوالى
عماد :هروح من غيرك
تامر :هيبقى معاك محمد يا بابا ابنك الكبير وكبيرنا من بعدك ومحمد ما شاء الله عليه طول بعرض عليه هيبة مشوفتهاش على حد غيرك واخد منك هيبتك وشخصيتك القوية
عماد بابتسامة :مش البكرى ما هو البكرى كده يا تامر بيبقى اب تانى لاخواته بعد ابوهم
تامر :واهو محمد هيبقى كده لينا زى ما حضرتك طول عمرك كده لاعمامى وعماتى
عماد :خلاص الحق اقول لاخوك لحسن يرتبط بمواعيد ولا حاجة
تامر :ولو ارتبط يا بابا هيلغيهم علشانك محمد روحه فى حضرتك
عماد بابتسامة :طالعلى انا كنت كده مع جدك الله يرحمه
بعد اسبوعين
تامر :مروان كنت عايز اتكلم معاك فى موضوع
مروان :تامر خليها بكرة انا راجع تعبان وعايز انام
تامر :معلش مش هطول عليك كمان انت من فرحتك باللى هقوله احتمال ميجلكش نوم اصلا
مروان :للدرجة دى موضوع ايه ده بقى
تامر :انا سمعتك وانت بتتكلم مع ماما عن البنت اللى انت عايز تخطبها
مروان :انت بتتصنت علينا
تامر :انا مكنش قصدى كمان انا عايز اساعدك لو مش عايز خلاص انا متأسفلك يا عم اعتبرنى مقولتش حاجة
مروان :وهو انت..هتساعدنى ازاى
تامر :مش ماما قالتلك ان بابا مش هيوافق انك تخطب قبلى انا هقنعه يوافق هقوله الفرق بينى وبينك سنتين مش فرق كبير يعنى يمنع انك تخطب قبلى كمان انا راجل مانيش بنت هيقولو بارت لو اختها الصغيرة اتخطبت قبل منها
مروان :تفتكر بابا هيقتنع
تامر بابتسامة :عيب عليك اعتبر الموضوع خلص خلاص ودبلتك بقت فى ايدها هى اسمها ايه صحيح
مروان بابتسامة :الاء
تامر :وعرفتها منين الاء
مروان :فى ايه انت هتفتحلى محضر
تامر :وانا اللى هساعدك تهب فيا الهبة دى خلاص اعتبرنى مقولتش حاجة وابقى اقنع ابوك لوحدك بقى
مروان :لا ايه كده تطير منى بص يا سيدى هى كانت معايا فى الكلية بس هى اصغر منى بسنتين وانا عايز الحق اخطبها رفضت كتير علشانى ومش هينفع ترفض اكتر
تامر بابتسامة :مش هتحتاج ترفض تانى خلاص الاء هتبقى من نصيبك وهتبقى واحدة من عيلة الوالى
مروان بسعادة :يا رب يا تامر يا رب
بعد شهرين
تامر :ها يا سوسو طمنينى عاملة ايه مع احمد لو مضايقك عرفينى هربيهولك
سمر :لا يا حبيبى متقلقش احنا كويسين سوا
تامر وهو بيبوس راسها :ربنا يتمملكم على خير يا حبيبتى
سمر :عارف انا حسا ان احمد وشه حلو علينا من ساعة ما اتقدملى وانت علاقتك بينا بقت احلى بكتير عن زمان
تامر :يعنى بقيتى حسا انك عندك تلت اخوات مش اتنين بس
سمر بحرج :انت لسه فاكر خلاص بقى انسى وميبقاش قلبك فوشيا على رأى سهر
تامر :مجتش بقالها كتير ليه صحيح
سمر :خطوبتها اتفسخت
تامر :سابها ليه
سمر :سهر اللى سابته
تامر :والله لو دورتى هتلاقى هو اللى سابها
سمر :هى اللى سيباه وحاول يرجع وهى اللى مقبلتش كمان انا مش فاهمة انت ليه مفكر ان هو اللى سابها
تامر :صاحبتك خارصة وإتمة اكيد زهق ونفد بجلده
سمر :سهر مش كده وانت متعرفهاش علشان تحكم عليها كمان دى اعز اصحابى اتكلم عنها كويس يا تامر
تامر :خلاص يا ستى ولا تزعلى
بعد شهر
سمر :طيب فكر فى الموضوع صدقنى سهر انسانة كويسة وانا متمناش غيرها ليك مش علشان هى صاحبتى وبحبها لا علشان هى فعلا بنت زى الفل ومفيش منها ويا رب هى توافق عليك اصلا
تامر :انتى وماما طالعين بيها السما على ايه مش فاهم ما بنت زى كل البنات
سمر :لا سهر مش زى حد انت متعرفهاش لو عرفتها مش هتقول عنها كده
تامر :ماشى هتقدملها اهو على الاقل افهم انتى وماما مصرين عليها ليه كده
بعد يومين
سهر :واديهم سابونا لوحدنا ها بقى مين فينا اللى يبدء كلام
تامر :الله ما انتى طلعتى بتعرفى تتكلمى اهو
سهر :هو كان حد قالك عنى انى خارصة ولا ايه
تامر :لما كنت بشوفك عندنا مكنتيش بتتكلمى معايا كلمة واحدة ولو شوفتك فى الشارع بتعملى نفسك متعرفنيش
سهر :ده علشان بابا هو اتفق معايا على كده علشان يسبنى اجى لسمر البيت وانا مدام اتفقت مع بابا على حاجة يبقى لازم انفذ اتفاقى معاه بالحرف الواحد والا مبقاش استاهل ثقته
تامر :تمام طيب ابدء انا واسألك سيبتى خطيبك الاولانى ليه
سهر :مفيش بيحب ياكل المكرونة بالمعلقة وانا بحب اكلها بالشوكة وانت عارف بقى الاختلافات الضخمة دى بتعمل مشاكل كبيرة قد ايه
تامر وهو بيضحك :انتى بتتريقى
سهر :عايز تفهمنى ان سمر مقالتلكش سيبته ليه وانك مسألتهاش
تامر :سألتها الصراحة بس هى مرضيتش تقولى وقالتلى اعرف منك انتى لانها خايفة تقولى حاجات وتفاصيل انتى مش حبا انى اعرفها دلوقتى
سهر بابتسامة :اصيلة سمر مانا مبعتبرهاش اعز اصحابى من فراغ برضه ماشى يا سيدى اجاوبك بجد بقى
هو كان شايفنى انانية
تامر :انانية
سهر :اه انانية وعايزاه ليا لوحدى مش ليا ولنص بنات كوكب الارض فانا قررت مبقاش انانية بالعكس واتنازل عنه بالكامل ليهم يشبعو بيه ويشبع بيهم
تامر وهو بيضحك :ونعم الايثار بس انتى مش شايفة ان اسلوب كلامك معايا غريب يعنى دى اول مرة نتكلم مع بعض تقريبا وانتى بتتعاملى ببساطة جدا
سهر :اه مانا قصداها دى قعدة المفروض فيها تقرر اذا كنت عايز ترتبط بيا ولا لا وانا كمان
وبالتالى الافضل ان كل واحد فينا يكون على طبيعته
انا اكون على طبيعتى وانت براحتك take it or leave it يعنى يا تقبل بيا يا متقبلش ده لو هنتكلم بيزنس يعنى معروف الصراحة اقصر الطرق والكذب والتجميل اخرتهم ايه ما مسير الحقيقة تبان فعلى ايه من الاول ونضيع وقت بعض ليه
تامر بابتسامة :كلامك منطقى وعاجبنى
اكلمك عن نفسى انا يا ستى باكل المكرونة بالشوكة زيك يعنى ان شاء الله هنكون متفقين مع بعض انتى عارفة بقى التوافق فى الحاجات دى مهم لان الاختلافات فيها بتعمل مشاكل كبيرة
سهر وهى بتضحك :عارفة طبعا
بعد شهر
سهر :قالك لا صح
تامر :مش بالظبط هو يعنى..
سهر قاطعته وهى بتضحك :قالك لا ومفيش خروج لوحدنا غير بعد كتب الكتاب قبل كده مستحيل زى ما قولتلك وانت قولتلى هقنعه شوفت ان كلامى صح لما تيجى المرة الجاية فكرنى اجبلك حاجة ساقعة
تامر :اشمعنى يعنى
سهر وهى بتضحك :علشان تهضم الكابسة الجامدة دى
تامر :تصدقى انك رخمة
سهر :اه اصدق ومصدقش ليه
تامر :لا بجد كنتى الطف كتير وانتى خارصة وبتهزى راسك لما اكلمك وخلاص انا اللى اتبترت على النعمة اللى كنت فيها
سهر :ولا يهمك انت تيجى تاخد شبكتك وهداياك ولا انت لسه مجبتش هدايا المهم تاخد شبكتك وكل حاجة ترجع زى الاول وارجع اهزلك راسى لما تقولى اذيك ولو انى معتقدش انى هحتاج اعمل كده
تامر :ليه بقى ان شاء الله
سهر :بابا مش هيرضى اجى عندكم وقتها اذا كان اصلا قالى ساعة لما وافقت عليك مفيش مرواح عندكم من غيره هو وماما واخواتى الوضع اتغير ومبقاش ينفع اجى لسمر زى زمان
تامر :طيب ما تهزيلى راسك واحنا مخطوبين عادى
سهر :لا اهزلك راسى دى لما تكون خاطب واحدة خارصة وانا مش خارصة
تامر وهو بيضحك :مش خارصة خالص الحقيقة بس عارفة انا مش عايزك تسكتى كل ما تتكلمى اكتر كل ما هعرفك اكتر
سهر :مش سهل انت برضه وواعى عموما هو انت مش هتعرف تسكتنى حتى لو حاولت معتقدش ممكن يكون عندك حاجة تقولها تسكتنى
تامر :يا سلام ايه الثقة دى
سهر وهى بتضحك :لا مش ثقة ده غرور عادى
تامر :انا جايلكم بكرة عايزك تعمليلى شاى مظبوط بايديكى الحلوة اللى زى قوالب السكر دى
تانى يوم
فى بيت اهل سهر
تامر :انا تقفلى السكة فى وشى يا سهر واكلمك بعدها مترديش
سهر :مش انت اللى بتقولى كلام عيب وبتتغزل فيا غزل صريح
تامر وهو بيضحك :انتى اتكسفتى
سهر :ايه اللى بيضحكك اه اتكسفت ومتقوليش كده تانى
تامر :انا كده كسبت وخليتك متعرفيش تردى
سهر :انت كده بتغش انت مش fair يا تامر ده مش عدل
تامر وهو بيضحك :الحياة كلها مش fair يا سهر
والصراحة اتفاجأت كلمتين زى دول يخرصوكى كده اومال لو قولتلك بحبك هتعملى ايه
سهر :ميغركش هزارى الكتير انا بتكسف من اقل حاجة كمان اوعى تقول حاجة مش حاسس بيها حتى لو بهزار متقولش غير اللى تحس بيه علشان كلامك يكون غالى وقيمته عالية ميبقاش كلام وخلاص
تامر بابتسامة :انتى صح وبينى وبينك حاسس انها هتبقى جد مش هزار قريب اوى
سهر بخجل بتحاول تداريه :انا هقوم اعملك شاى
تامر وهو بيضحك :والدتك عملتلى
سهر وهى بتخرج من الصالة :يبقى اعملك نسكافية انت بتحبه مظبوط صح هعمله وارجعلك
تامر بابتسامة وهو بيكلم نفسه :لا ده انتى شكلك حكايتك حكاية يا سهر بس انا مبسوط وعايزك تبقى حكايتى انا
الغيرة ممكن تخلى الواحد يقتل ممكن تخليه يعمل حاجات مكنش يتخيل انه يعملها فى يوم ممكن اخوات تخسر بعض بسبب الغيرة التفرقة فى المعاملة وحشة خصوصا بين الاخوات المفروض اننا نربى ولادنا على حب بعض علشان يكونو سندنا وسند بعض من بعدنا مينفعش نميز واحد فيهم عن الباقين فنملى قلوب اخواته بالغيرة تجاهه والغيرة تبعدهم عنه وتقسى قلوبهم عليه
ده كان الغلط اللى ابويا عمله واللى انا الحمد لله فهمته وحاولت اصلحه لما قربت انا من اخواتى ولما حاولت اقرب بين بابا وبينهم وقررت انى مش هعمل كده مع اولادى انا وسهر اتجوزنا وخلفنا فريدة ومروة وعلى ربيت ولادى زى بعض فى كل حاجة مسيبتش للغيرة منفذ تدخل قلوبهم منه
الغيرة نار فى قلوب صحابها نار ممكن تحرقهم وتحرق اللى حواليهم اوعو تفرقو بين ولادكم او اخواتكم او اصحابكم اوعو تولعو فى قلوبهم نار الغيرة💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا