على :احنا مش هننفض من الموضوع ده بقى يا امى
روحية :لا يا على مش هننفض انا عايزة افرح بيك نفسى اشيل عيالك
على :هتشيليهم ازاى اذا كنت انا مبخلفش انتى ليه مش مصدقانى بلاش انا ليه مش مصدقة التلت دكاترة اللى روحتلهم
روحية :مفيش حاجة بعيدة على ربنا
على :وانا ربنا قدرلى انى مخلفش وانا راضى ارضى انتى كمان
روحية :ارضى بايه ارضالك بوحدتك لا عيل ولا حتى زوجة تراعيك وتراعيها
على :زوجة مين اللى هتراعينى وارعيها مين دى اللى هترضى بواحد مبيخلفش مين دى اللى هتحكم على نفسها تعيش من غير ولاد
روحية :ما ناخدها عندها عيال يا ابنى
على :مطلقة يا امى هاخدها مطلقة ولا ارملة واضمنها واضمن اخلاقها منين اذا كانت اللى كانت جارتى ومتربية قدام عينى هربت مع واحد يا امى مستنتش حتى تطلق منى
هلاقيها فين دى اللى أامنها على اسمى وشرفى ومتمرمغهمش فى الوحل تانى
يا امى انا ما صدقت الناس نسيت وانا بحاول انسى ارحمينى يا امى بقى وسيبينى انسى
روحية :مش هتنسى طول ما انت لوحدك جرحك اللى كان على ايد ست مش هيداوى غير على ايد ست برضه
على :وهنلاقيها فين دى اللى هداوى جرحى اللى هقدر اشيلها اسمى وترجعنى اثق فى الستات من تانى
روحية :موجودة واضمنها بعمرى وعندها عيال كمان
على :ودى مين بقى اللى مفيهاش غلطة ومش ناقصها حاجة دى
روحية :دينا
على :دينا مين اوعى يكون قصدك على دينا اللى فى دماغى
روحية بابتسامة :ايوه هى مفيش غيرها دينا بنت اختى زينة البنات
على :دينا بنت اختك اللى رفضت كل اللى اتقدمولها من بعد موت جوزها هتوافق عليا انا زينة البنات اللى رفضتنى زمان هتقبل بيا دلوقتى وانا مطلق
روحية :وهى يعنى اللى بنت بنوت ما هى ارملة
على :ولو قبلت بانى مطلق ومفرقلهاش انى مراتى هربت هتقبل بانى مبخلفش
روحية :تقبل ومتقبلش ليه ما هى عندها عيال
وانت مش هتحرمها منهم
على :يا ماما...
روحية قاطعته :لو اتجوزتها مش هتحرمها من عيالها صح
على :لا طبعا ده حرام وكمان احرمها من عيالها ازاى وانا مش هعرف اخليها تجيب غيرهم
روحية :خلاص مادام هتتقى ربنا فيها وفى عيالها ترفض ليه
على :زى ما رفضت زمان علشان مش شايفانى غير اخوها
روحية :عدى سنين على الكلام ده وزمانها مبقتش شايفاك كده وبعدين اخوها ايه مادام منتاش ابن ابوها وامها متبقاش اخوها وتبقى تحللك تتجوزها وانا هجوزهالك وهما هيلاقو احسن منك فين يأمنوه عليها وعلى عيالها
على :انا مليش فيه مش هفتح بؤى فى الموضوع ده غير لما خالتى تقولك ان بنتها موافقة مش هتقدم واترفض تانى يا امى مش هنعيده تانى
روحية :المهم انك موافق خلاص انا هكلم عديلة تكلم احمد جوزها
على :ودينا يا امى موافقتها قبل موافقتهم قولتلك مش هنعيده تانى
روحية :حاضر من عينيا انت تؤمر يا قلب امك
بعد اسبوع
على :يعنى ايه عايزة تقعد تتكلم معايا الاول
روحية :عادى يا ابنى مفيهاش حاجة
على :ما طلبت نقعد زمان وفى الاخر قالت لا مش شايفاه غير اخويا
روحية :المرة دى الوضع مختلف يمكن عايزة تطمن على حياتها وحياة عيالها معاك
على :وانا هعمل فيها ولا فيهم ايه يعنى
روحية :معلش يا حبيبى ام ومن حقها تطمن انت متعرفش الضنا غالى ازاى يا ابنى
على :معرفش ومش هعرف فى حياتى يا امى
روحية بسرعة :مش قصدى يا حبيبى والله
على :خلاص يا امى ادينى هروح اما اشوف اخرتها ايه مع بنت اختك
تانى يوم
دينا :انت متقدملى ليه يا على
على :نفس السؤال اللى سألتيهولى من عشر سنين ويا ترى بقى زى المرة اللى فاتت قاعدة معايا علشان بس امى وامك ميزعلوش لما ترفضينى من غير ما حتى تقعدى معايا فقعدتى معايا وانتى اصلا واخدة قرارك انك هترفضى هنعيده تانى يا دينا
دينا :لا يا على مش هنعيده المرة دى غير انا مش واخدة قرارى ومهما قولتلى مش هيفرقلى
المرة دى كلامك هيفرقلى المرة دى فى فرصة جاوب سؤالى لو سمحت متقدملى ليه المرة اللى فاتت قولتلى علشان بنت خالتى وعارفك وعارف اخلاقك اسبابك اختلفت ولا لسه هى هى
على :مفيش حاجة بتفضل على حالها اختلفت اسبابى يا دينا
مش عايز ابقى لوحدى لما ابويا وامى سافرو يحجو من كام شهر فضلت لوحدى مكنش حد بيسأل عليا اخواتى واصحابى ملهيين فى حياتهم لقيت انى امى وابويا عندهم بعض واخواتى واصحابى عندهم اجوزاهم ومراتاتهم وانا معنديش حد مليش حد مليش غير ابويا وامى ولو سافرو او ربنا استرد امانته هبقى حرفيا لوحدى ربنا يباركلى فى عمرهم يا رب وخالتك مبتبطلش زى عليا علشان اتجوز
وانا مبقاش عندى طاقة ابدء مع حد جديد مفياش حيل اعرف حد عليا ولا اتعرف على حد ويا عالم يطلع يستاهل ثقتى ولا لا
دينا :يعنى انت بتثق فيا
على :اه عارف اننا مختلفين فى حاجات كتير ويمكن مفيش حاجة واحدة بنتفق عليها بس انا بثق فيكى دينك واخلاقك معليهمش غبار بالنسبالى طول عمرى وانا كده ويمكن لو كنتى وافقتى عليا زمان كنتى جنبتينى حاجات كتير اوى بس قدر الله وما شاء فعل انا نصيبى اتجوز غيرك وانتى نصيبك تتجوزى غيرى يمكن علشان تخلفى يمكن مكنتيش هتتحملى حياتك معايا من غير اولاد
بس سؤال انتى رفضتينى ليه وقتها
دينا :عمرك ما سألتنى السؤال ده
على :جه فى دماغى كتير بس...
دينا :سكت ليه بس استكبرت تسألهولى صح
على :مش عارف يمكن صح
دينا :مش يمكن ده اكيد
هجاوب سؤالك رفضت ليه لانى كنت عارفة اننا مش هننفع سوا مش هنسلك مع بعض انت عايز واحدة ملهاش صوت مبتعترضش على حاجة زيها زى اى كنبة فى البيت وانا مببطلش كلام وعايزة واحد يتعامل معايا على انى انسانة ليها عليه حقوق زى ما ليه عندها واجبات واحد يعتبرنى شريكة حياته مش مجرد شئ بيكمل بيه شكله الاجتماعى
كنت عايزة احب واتحب وكنت عارفة ان لا انت هتحبنى ولا انا هحبك فقولت لا علشان كل واحد فينا يلاقى اللى يحبه
على :انتى لقيتى اللى يحبك انما اللى لقيتها هربت وسابتنى وسابت حتى اهلها
دينا :هى حبتك
على :تانى هتقوليلى حبتك وتانى هتقوليلى انى السبب فى اللى هى عملته وانها مغلطتش
دينا :لما سألتنى ايه رايى فى اللى حصل بعد ما سابتك قولتلك بلاش انا رأيى مش هيعجبك وانت اصريت تسمع رأيى ومجرد ما قولتلك انها حبتك بس انت ضيعت حبها ليك وانك سبب من الاسباب اللى خلتها تعمل اللى عملته اتعصبت واتنرفزت ومسمعتش بقية كلامى
على :وايه بقى بقية كلامك اللى مسمعتهاش
دينا :هى حبتك يا على وعلشان كده عاشت معاك سنين من غير خلفة وكانت ممكن تستحمل اكتر بس تحس انها عايشة معاك انك شايفها انت خليتها حاسة انها عايشة لوحدها مع انك عايش معاها فى بيت واحد اهملتها خلصت رصيد حبك فى قلبها سيبتها لوحدها لدرجة ان فى حد تانى خد مكانك حد تانى اهتم وقت ما انت اهملتها حد حسسها بقيمتها وقت ما انت كنت محسسها انها ملهاش لازمة فى حياتك حد عملها حاجات كان المفروض انت اللى تعملها وكانت ايه النتيجة هربت منك ومن اهلها علشانه هى غلطت فى حقك وحق نفسها وحق اهلها والاهم غلطت فى حق ربنا بس انت احد الاسباب فى اللى حصل انت كنت فين وكل ده بيحصل
انت اللى سيبتلها فراغ غصب عنها لما جه حد ملاه مسكت فيه بايديها وسنانها وخسرتك وخسرت اهلها علشانه انت عارف هى قد ايه رومانسية وان رومانسيتها دى هى اللى خلتها سنين معاك من غير خلفة وده عمره ما فرقلها كان كفاية عليها تكون جنبك علشان بتحبك قلبها اللى كان متحكم فيها وخلاها معاك اتحكم فيها وخلاها تهرب وتسيب كل حاجة علشان الحب
بس هى غلطت كان احسنلها واشرفلها تطلق منك وتتجوزه بمعرفة اهلها بس احنا منعرفش هى هربت ليه ومع مين ومطلقتش ليه حتى اهلها ميعرفوش عنها حاجة
انا مبقولش انها مغلطتش انا كل اللى بقوله انك كان لازم تركز فى تجربتك وتشوف انت غلطت فى ايه علشان متكررش غلطك تانى
على :انا غلطت فى اختيارها من الاول
دينا :لا يا على مش كده او لو هنقول غلطت من الاول هيبقى علشان اختارت واحدة رومانسية مبتفكرش غير بقلبها وانت واحد عملى واخر حاجة بتفكر فيها هى المشاعر
على :انا قولت بتحبنى مش المثل بيقول خد اللى بيحبك
دينا :ده مثل انانى وظالم واللى بيحبك ده مش من حقه انك تحبه زى ما بيحبك
واهو حصل ايه لما خدت اللى بتحبك بطلت تحبك وغلطت فى حقك وحق اهلها وحق نفسها ويا عالم حالها ايه دلوقتى معتقدش طلع يستاهل تسيب اهلها وتحط راسهم فى التراب علشانه محدش فى الدنيا يستاهل تعمل فى نفسها او فى اهلها كده علشانه
على :تولع بجاز وسخ تستاهل اى حاجة وحشة هتحصلها تستاهل يحصلها كل حاجة وحشة انا بكرهها
دينا :عمر ما كان جواك مشاعر حب ليها ولما بقى عندك مشاعر تجاهها بقت انك بتكرهها عموما كرهك ليها رد فعل طبيعى بعد اللى هى عملته
على :انتى شايفة انى معنديش قلب ومبعرفش احب صح
دينا :لا اكيد عندك قلب كلنا عندنا قلوب علشان نقدر نعيش
بس مش متخيلاك بتحب ممكن تكون عادى بتعرف تحب بس انا مش متخيلاك بتحب
على :ولما انتى شايفة كده وعلشان كده رفضتينى زمان ليه دلوقتى بقيتى مستعدة تدينى فرصة وممكن توافقى عليا
دينا :لانى كبرت مبقتش محتاجة حد احبه ويحبنى دلوقتى انا محتاجة اب لولادى محتاجة راجل لبيتى مش محتاجة حد يصرف عليا او عليهم انا بشتغل وابوهم سايبلنا اللى يكفينا بس انا محتاجة اب ليهم مش عارفة اكونلهم اب وام مش عارفة اربيهم لوحدى الموضوع صعب
حاولت اكونلهم اب واعوضهم عن غياب ابوهم عارف كانت ايه النتيجة يا على
على :ايه
دينا :انى عوضتهم عن غياب ابوهم بس بقى ناقصهم وجود امهم بقيتلهم اب وبقو من غير ام بقيت راجل البيت بس البيت بقى من غير ست
فى ستات غيرى قدرو يعملو ده ويبقو الاب والام بس انا مش عارفة
رفضت اللى اتقدمولى قبل كده لانهم عندهم ولاد عايزنى لوحدى محدش عايز ولادى محدش مستعد يكونلهم اب وانا اصلا لو اتجوزت هتجوز علشان اجبلهم اب
ماما قالتلى انى حبيت اعوض ولادى عن ابوهم فحرمتهم من امهم وانك هتكونلهم اب وهتكون امين عليا وعليهم
انا اتغيرت يا على مبقتش عايزة دلوقتى الحاجات اللى كنت عايزاها زمان
انت بقى عايز تبقى اب لولادى هتقبل تبقى مسئول عن اربع عيال دى شيلة تقيلة ومسئولية كبيرة وان قولت مش عايز محدش هيقدر يلومك
على :لو مكنتش عايز مكنش زمانى قاعد قصادك دلوقتى
دينا :ممكن تكون قابل تكون زوج ليا سؤالى هو انت قابل تكون اب لولادى
على :قابل يا دينا
دينا :ليه
على :مهم اوى عندك سؤال ليه ده بتقوليه كتير
دينا :علشان بيهمنى اعرف الاسباب ليه يا على
على :علشان دى الفرصة الوحيدة انى اكون اب
اب لولاد محتاجنى عيال اخواتى بحبهم وبيحبونى بس فى الاول وفى الاخر انا مش ابوهم
دينا :ممكن تخلف يا على مهما الدكاترة قالو صعب ولا مستحيل مفيش حاجة مستحيلة على ربنا وقدرته ربنا كريم اوى وقادر يراضيك
على :وان حصل هتقبلى يبقى عندك عيل خامس عيل انا ابوه
دينا :اكيد هقبل انا مش انانية علشان مبقاش عايزاك يكونلك ابن من صلبك ولو مكنتش شايفة انك هتكون اب كويس مكنتش قبلت انك تكون اب لولادى
كل اللى هبقى عايزاه وقتها انك متفرقش فى المعاملة اوى بينه وبين ولادى خصوصا لو كانو اتعلقو بيك
على :يا عالم هييقالى فى يوم عيل من صلبى ولا لا ولو حصل غالبا هيبقى ربنا بيراضينى علشان ولادك واللى هعمله معاهم واكيد مش هشكر ربنا على نعمته بانى افرق فى المعاملة بينهم واحسس ولادك باليتم للمرة التانية
دينا :اسفة لو كلامى ضايقك انا مش قصدى والله انا بس غصب عنى خايفة وبكلمك فى مخاوفى علشان تطمنى انا كل اللى عايزاه منك دلوقتى وكل اللى هبقى عايزاه منك طول حياتى هو انك تطمنى
انك تطمنى اهم عندى من انك تحبنى يا على
على :ان شاء الله عمرك ما هتخافى على نفسك ولا على ولادك وانتى معايا
دينا :ان شاء الله...طيب فى اسباب تانية لانك موافق تتجوزنى وتكون اب لولادى
على :هو مش عارف ده سبب ولا لا بس فى سؤال كان بيجيلى كتير خصوصا لما بشوفك بعد ما حصلى اللى حصلى
دينا :سؤال ايه ده
على :يا ترى لو كنت اتجوزتك كان هيبقى شكل حياتى ايه معاكى
تقريبا جاتلى فرصة اعرف اجابة السؤال ده وقررت استغل الفرصة
دينا :لما نتجوز هنعيش فى شقتى
على :نعم
دينا :مش هاخد ولادى بعيد عن البيت اللى عاشو فيه طول عمرهم وفى صحابهم وجيرانهم ومدارسهم ومدرسينهم
على :انا مش هعيش فى بيت مش بيتى مش هعيش فى بيت مراتى
دينا :مش هينفع انى اكون بخلى ولادى يتقبلو وجودك فى حياتى وحياتهم وكمان اشقلبلهم حياتهم ده هيصعب حياتهم مش هيتقبلو وجودك بالعكس
على :انا مش هقدر اعيش فى بيت مراتى وعيالها..
دينا قاطعته :وانا مش هخرج ولادى من بيتهم مش ههز الاستقرار اللى حياتهم فيه بالشكل ده
على :ممكن تسكتى وتدينى فرصة اكمل كلامى مش هقدر اعيش فى بيت مش ملكى قولت اسكتى واستنى اكمل كلامى معناها انى هشترى منك شقتكم فتبقى انتى وولادك عايشين فى بيتى تبقى عايشة فى بيت جوزك
اظن ده حل يرضيكى ويرضينى
دينا :هو حل مناسب فعلا
على :محتاجة تتحكمى فى تسرعك واندفاعك لان انا شخص عصبى شوية وانفعالى فتسرعك واندفاعك مع عصبيتى وانفعالى هيخلو حياتنا كلها خناق
وانا مبحبش الخناق الكتير
دينا :انا كمان مبحبش الخناق الكتير...اسفة انى اتسرعت فى الرد ومسيبتلكش فرصة تكمل كلامك الاول
هحاول اتحكم فى اندفاعى اكتر من كده
بعد اربع شهور
دينا :انا هسيب الشغل صعب اوى اوفق بينه وبين البيت والولاد وبينك
كمان انا مش محتاجاه انت بتصرف على البيت ورافض اساعدك
على :بيتى ميصرفش عليه حد غيرى
دينا :طيب حتى اكل الولاد وشربهم
على :وانا مش هعرف أاكلهم واشربهم ولا ايه كفاية انى سايبك تدفعى فلوس تعليمهم ولبسهم من معاكى
انما اكلهم شربهم خروجاتهم دى عليا هما مسئولين منى وانتى كمان مسئولة منى فياريت تكونى فاهمة ده وتبقى فلوس ورثك او اى فلوس معاكى تصرفيها على الاولاد انما اى حاجة تحتاجيها لنفسك تبقى من فلوسى انا
دينا بابتسامة :حاضر المهم انى خلاص هسيب الشغل مبقتش محتاجة فلوسه وانت والولاد اولى بوقتى وطاقتى
على :كنت عايز اقولك كده من يوم ما اتجوزنا
دينا :ومقولتش ليه
على :خوفت تفهمينى غلط تفتكرى انى بحاول اتحكم فيكى او مش عايز يبقالك دخلك الخاص وخلاص
دينا :مكنتش هفكر كده انت ليه فكرت كده
على :يمكن علشان كتير بحس انك بتفهمى تصرفاتى غلط بناءا على فكرة الشخص العملى عديم الاحساس اللى انتى شايفانى بيها
دينا :انا عمرى ما قولت انك عديم الاحساس
على :مش محتاجة تقوليها علشان اعرف انك شايفانى كده
دينا :وانا لو شايفاك كده كنت اختارتك تكون اب لولادى الاربعة كنت أمنتك على بناتى الاتنين وانا بسمع عن مصايب بتحصل للبنات من اجواز امهاتهم
انا شايفاك راجل بجد يا على راجل ومفيش منك كمان سيبك من اللى دينا زمان كانت شايفاه دينا دلوقتى كبرت ونضجت وبقت عارفة قيمتك كويس عارفة ومقدرة قيمة وجودك فى حياتى مقدرة انى خلاص مبقتش محتاجة اقفل كل الشبابيك والبلكونات واقفل باب الشقة بالتلت ترابيس ورغم كل ده برضه انام خايفة كل يوم وادعى ربنا يحفظنى ويحفظ ولادى ويكفينا كل شر
على :وجودى مطمنك
دينا :جدا ربنا يديم وجودك فى حياتى وحياة ولادى
على :زين لسه مش قابل وجودى زينة قبلت وجودى وبقت بتقولى يا بابا ومروان زى ما قولتى طيب وبيحب الناس بسرعة وبعد شهر بس من جوازنا بقى بيقولى بابا وريم بتقولى بابا من اول يوم
دينا :علشان اخر العنقود وما صدقت يكون فيه حد تقوله بابا
زين برضه هيجى عليه وقت ويتقبل وجودك ويقولك يا بابا هو علشان شايف نفسه كبير اخواته وراجل البيت معايا وعنده برضه ذكريات مع ابوه حتى لو قليلة بس موجودة دى كلها حاجات هتخليه محتاج شوية وقت
كمان زين وزينة تؤام وروح واحدة ميغركش خناقهم دول روحهم فى بعض ومادام زينة تقبلت وجودك بالشكل ده فزين قريب اوى هيتقبله هو كمان مش هيفضل بيقاوح كتير
بعد اسبوعين
على :زين يلا علشان تنزل تصلى معايا الجمعة
زين :انا مبصليش
على :وهو انت مش راجل ولا ايه
زين :راجل طبعا
على :طيب وهو فى راجل مبيصليش الراجل بيصلى خصوصا الجمعة الراجل لازم يصليها فى المسجد ها هتيجى تصلى معايا ولا انت مش راجل ولا ايه
زين :لا طبعا هاجى معاك...بس انا مبعرفش اتوضى يعنى مش عارف كل الحاجات اللى بتتعمل فى الوضوء
زينة :انا بعرف هوريلك يا زين بشوف ماما وهى بتتوضى...بابا اجى اصلى معاكم
على :ماشى يا حبييتى
مروان :انا كمان هاجى معاكم مش انا راجل يا بابا
على وهو بيشيله :راجل طبعا وهتيجى معانا
بسرعة طيب اتوضو علشان قبل ما ننزل اعلمكم الصلاة ازاى
زين :ماشى
مروان :حاضر يا بابا
زينة :حاضر يا بابا...ماما ما تيجى معانا
دينا :حاضر يا حبيبتى
على :انتى ازاى كل ده معلمتيهمش الصلاة زين مبيعرفش يتوضى حتى
دينا :قولت لسه صغيرين
على :زين وزينة عندهم تمن سنين والرسول قال نبدء نعلم ولادنا الصلاة من سن سبع سنين يعنى هما مبقوش صغيرين والصلاة حاجة مهمة يتعلموها ويحبوها من صغرهم
دينا :معاك حق بعد كده هتابع صلاتهم وهخلى بالى
بعد خمس ايام
دينا :انا مش فاهمة انا عملت ايه لكل ده انا جبت كهربائى يصلح التلاجة وسيبت باب الشقة مفتوح
على :مستنتيش لما ارجع ليه
ليه يدخل راجل البيت وانا مش فى البيت
دينا افهمى انتى خلاص مبقتيش راجل البيت
البيت بقاله راجل خلاص ولازم تحترمى راجل البيت ده اكتر من كده
دينا :قللت من احترامك فى ايه راجل عنده خمسين سنة واكتر ومش اول مرة يجى يصلحلى حاجة وبيجى لاغلب سكان العمارة
على :عنده خمسين سنة عنده تسعين سنة مليش فيه ميجيش وانا مش هنا متكلميهوش يجى اصلا انا اللى اكلمه وميجيش غير فى وجودى انتى مبتسمعيش عن حوادث السرقة والاغتصاب اللى بتحصل فى ظروف شبه دى هعمل ايه انا لو كان جرالك انتى او ريم حاجة كان هيفيدنى عندك ده بايه
وبعدين مش انتى قولتى انك عايزة راجل للبيت وانا قبلت اكون راجل البيت يبقى تتصرفى على اساس انى راجل البيت وانك ست البيت
ست البيت مش راجله يا دينا
دينا :خلاص انا اسفة انا عملت بحكم التعود متوقعتش ان دى حاجة هتضايقك
على :مدخلة راجل البيت فى غيابى وتقوليلى متوقعتش انها حاجة هتضايقك متجوزة سوسن ولا ماهيتاب اصلك...انتى بتضحكى يعنى مش كفاية اللى عملتيه كمان بتحرقى دمى وبتضحكى
دينا وهى بتوقف ضحك :مش قصدى احرق دمك والله بس كلامك ضحكنى يعنى قدى مرتين فى الطول والعرض وتقول ماهيتاب ولا سوسن ازاى يعنى كمان الجيم عامل شغل عالى الصراحة قولى الحقيقة انت بتتعاكس فى الشارع
على وهو بيضحك :انتى اتهبلتى يا دينا
دينا :لا بجد قولى ما هو مش معقول تكون بتمشى طول بعرض بعضلات كده ومبتتعاكسش هى البنات اتعمت ولا ايه
على وهو بيضحك اكتر :اول مرة اشوف واحدة عايزة جوزها يتعاكس انتى بتهزرى علشان تلهينى عن عملتك المنيلة صح
دينا وهى بتضحك :متفهمنيش صح خلاص بقى اسفة لا هجيب كهربائى ولا سباك وانت مش موجود ولا حتى هكلمهم انت اللى هتكلمهم لانك راجلى وراجل البيت احلى راجل بيت فى الدنيا
على :احم احم ثبتينى كالعادة بس اخر مرة لو اتكررت تانى مش هيحصل طيب
دينا :خلاص والله اخر مرة
بعد يومين
دينا :بالراحة يا على قلل السرعة
على :الطريق فاضى معليهوش عربيات
زين :يا ماما ميبقاش قلبك خفيف كده
ده انا مستنى اكبر علشان اتعلم السواقة واسوق بسرعة جدا
على :كام سنة كده بس تكبرهم وانا بنفسى هعلمك
دينا :علشان يعملى حادثة صح مش هتتعلم سواقة قبل سن الواحد وعشرين
زين :ايه ده يعنى بعد تلتاشر سنة واكتر لا كتير
على :سيبك منها يا حبيبى اول ما رجلك تطول دواسة الفرامل انا هعلمك
زين بسعادة :بجد يا بابا
على بابتسامة :بجد يا حبيب بابا
زين بلغبطة :انا مش قصدى اقول...انا يعنى كان قصدى
على :الراجل ميرجعش فى كلمته وانت قولت بابا يبقى انا بابا من هنا ورايح ماشى
زين بابتسامة :ماشى يا بابا
دينا وهى بتبتسم وبتمسك ايده :ربنا يخليك لينا
على بابتسامة :ويخليكو ليا
بعد شهر
على :قدامك تلت دقايق تقوليلى فيهم عم الولاد ده ايه حكايته بالظبط وبالتفصيل يا دينا كلامه وحركاته مكنتش مريحانى ولولا اننا كنا فى فرح ووسط اهل الولاد انا كنت مسحت بيه بلاط القاعة
دينا :بص هو راجل بصباص يعنى وعينه رايغة بعد موت عبدالرحمن اتقدملى كذا مرة وعايز اربى ولاد اخويا وبتاع وانا طبعا كنت برفض لانى مكنتش عايزة اتجوز ولو هتجوز فهو اكيد لا مناسب ليا ولا للولاد لما وافقت عليك جالنا البيت وهدد انى لو اتجوزت هياخد منى الولاد بس انا عارفة ان وصاية الولاد مش هتروحله لان جدتهم لابوهم وجدهم لابوهم كمان ميت وكده لو حد هيتولى رعايتهم هيكون امى انا حسب القانون وقولتله اعلى ما فى خيلك اركبه
وعرفت مراته باللى حصل وهى ست قوية وهو بيخاف منها فهى اتصرفت يعنى ومن بعدها الموضوع اتقفل وبس كده والله ما فى اكتر من اللى قلتهولك
على :انسان مستفز وبارد ولزج وعينه يندب فيها رصاصة حرقلى دمى يعنى مش فارقله انى واقف جمبك
دينا :لا فارقله وهو اصلا بوء على الفاضى هو مستغل اننا فى فرح وانك محترم وهتراعى المناسبة اللى احنا فيها انما هو عارف انك لو ضربته كف هتخليه يفقد الذاكرة ولو نفخت فيه هتطيره
متضايقش نفسك بسببه هو ميستاهلش
على :بعد كده لو روحنا فرح تبع اهل الولاد مش هنقعد معاه على نفس الترابيزة نقعد على ترابيزة تانية ولا نفضل واقفين حتى انا لو جمعنى مكان واحد باللزج ده تانى هلعبله فى وشه البخت
دينا :خلاص حاضر انت تؤمر بس متضايقش نفسك
بعد شهرين
دينا :هتفضل ساكت كده...اتكلم قول حاجة طيب...انت متضايق علشانها حزين عليها
على :انا حزين على اهلها ابوها مكنش قادر يصلب طوله
انتى فاهمة يعنى ايه واحد الشرطة تكلمه علشان يجى يتعرف على جثة بنته اللى معرفهاش لان الجثث اللى هناك متحللة علشان بقالها كتير مقتولة واللى ناقصهم عيون واللى ناقصهم قلوب او الكلى او الكبد مش سايبين فيهم حتة سليمة لدرجة انه معرفش يتعرف على جثتها انا كمان معرفتش اتعرف على جثتها
هربت منى ومن اهلها علشان واحد طلع تبع تجارة الاعضاء مشيت ورا قلبها وراحت لواحد شال قلبها من مكانه شال كل حاجة مسابش فيها غير عضم ولو كان هينفع يبيعه كان خده باعه
ابوها اللى ضهره اتكسر بهروبها ضهره اتكسر النهاردة الف مرة وهو واقف مش عارف يلاقى جثتها بين الجثث اللى هناك مش لاقى جثتها مش لاقى شوية عضم ياخدهم يدفنهم
كلمونى علشان فى بطاقتها انا جوزها ولما رفضت وقولت انى خلاص طلقتها كلمو ابوها ولما معرفش يتعرف عليها كلمنى يتحايل عليا اروح يمكن اعرف جثتها قاللى انا عايز بس اخد جثتها استرها وادفنها فضحت نفسها وفضحتنا وهى عايشة بس عايز استرها بعد ما ماتت الميت ليه حرمة يا ابنى وعيط مقدرتش اقوله لا ولما روحت معرفتش اساعده معرفتش الاقى جثتها وسط كل الجثث اللى هناك
المنظر بشع مهما تخيلتى مش هتعرفى تتخيلى اللى شوفته ازواج كتير معرفوش يتعرفو على زوجاتهم واهالى كتير معرفوش يتعرفو على بناتهم
جم علشان بس ينقهرو لما يعرفو ان عيالهم اللى ميعرفوش هما هربو ولا اتخطفو وقعو فى ايد عصابة تجارة اعضاء سرقت اعضائهم ويا عالم اغتصبوهم ولا عذبوهم ولا عملو فيهم ايه
هى راحت بمزاجها خدت هدومها وذهبها وهربت
بس هناك كان فى اهالى بتعيط على بناتهم اللى كانو رايحين مدارس ولا دروس ولا كليات ومرجعوش
انا خايف على زينة اوى وعلى ريم وعليكى
من هنا ورايح متروحيش فى مكان من غيرى ولو اضطريتى تروحى لوحدك تتابعى معايا بالتليفون والبنات لازم نخلى بالنا منهم لا انا ولا انتى حمل اننا نتحط مكان الاهالى اللى شوفتهم النهاردة ربنا يربط على قلوبهم ويهون عليهم فراق بناتهم
لازم نخلى بالنا من بناتنا يا رب ما اشوف فيهم ولا فيكى حاجة وحشة ابدا
دينا :اللهم امين اهدى يا على اهدى يا حبيبى
على :اهدى ايه بس انتى اصلك مشوفتيش اللى انا شوفته اكفينا الشر يا رب اكفينا الشر يا رب
الولاد فين اندهيهملى عايز اطمن عليهم
دينا :حاضر يا على هندههم
بعد تلت شهور
دينا :ماما واخواتى النهاردة هرونى تريقة ماما تقولى وشك منور ورادد فيكى الروح وسلمى تقولها بركاتك يا على ونورا تقولها فيه راجل بينور الست وراجل بيطفيها وبنتك لقت اللى ينورها يا ماما
ولما كلمتنى تطمن عليا استلمونى بقى ده الحب ولع فى الدرا نبعت نجيب شجرة واتنين ليمون الراجل الحنين رزق ده انا جوزى لو اتخطفت هيسجد لربنا سجدة شكر ولما حبيت ارخم واقولهم انتو بتقارنو مين بمين على ميتقارنش بحد خدونى غسيل ومكواة وده من امتى ده ما كان من الاول مش كان زى اخوكى ورفضتيه ولما اتقدم تانى بعد عشر سنين فضلنا نقنعك ونتحايل عليكى
على :وانتى قولتيلهم ايه
دينا :قولتلهم كل حاجة فى وقتها حلوة انا وانت مكناش هننفع مع بعض من عشر سنين
على :وننفع مع بعض دلوقتى
دينا :ننفع جدا مع بعض دلوقتى
انا مينفعنيش غيرك دلوقتى
على :ولا انا ينفعنى غيرك دلوقتى
كنتى قولتيلى انك رفضتينى من عشر سنين علشان لا كنت هحبك ولا كنتى هتحبينى
دلوقتى ينفع ولا لسه لا يجوز
دينا وهى بتضحك :لا يجوز عادى
على :وكنتى قولتيلى برضه انك مش متخيلانى بحب بصيلى كويس ده شكلى لما بحب انا بحبك
دينا بابتسامة :وانا كمان بحبك ما هو مش معقول بعد كل اللى بتعمله معايا ومع ولادى
على :ولادنا
دينا :ولادنا مش معقول بعد كل اللى بتعمله معايا ومعاهم ده محبكش ده انا ابقى مغفلة جدا يعنى
ربنا يباركلنا فيك وميحرمناش منك
على بابتسامة :ويباركلى فيكم وميحرمنيش منكم
انا وعلى مخلفناش مع ان كان نفسى فى ابن منه بس ربنا مارادش وهو رضى بقضاء ربنا وجودنا معاه خلاه قادر يصبر ويرضى كمان
انا بحبه وولادنا روحهم فيه بيضايق لما بقول ولادى فمبقولش غير ولادنا لانهم فعلا ولادنا هو عوض ربنا ليا وليهم واحنا عوض ربنا ليه
حكايتى انا وعلى مكنش وقتها من عشر سنين مكنش وقته انا وعلى نحب بعض او نتجوز من عشر سنين مكناش هنعرف نعيش سوا مكناش هنقدر نتحمل بعض مكناش هنعرف قيمة بعض كان لازم نمر بكل حاجة مرينا بيها وتحصلنا كل حاجة حصلتلنا علشان نتغير
على ودينا بتوع زمان مكنوش ينفعو مع بعض
انما على ودينا بتوع دلوقتى مينفعوش غير مع بعض
لانهم ملهمش غير بعض والوقت ده وقتهم
لما تحلم بحاجة كتير وتتمناها وتدعى بيها ومتحصلش خليك فاكر انها ممكن تكون مش خير ليك اصلا
ويمكن تكون خير ليك بعدين
انما دلوقتى هى مش خير ليك
كل حاجة بتحصل فى وقتها وبتبقى حلوة فى وقتها
لو حلمت بحاجة ومحصلتش متبطلش دعا ومتيأسش من رحمة ربنا
يا هيجيلك الاحسن منها يا هتجيلك هى بس فى وقتها
يمكن دلوقتى مش وقتها💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا خصوصا من زال اثره فلم يزره زائر ولم يذكره ذاكر