حكايات منار

حكاية " كلام الناس "

اسلام :حضرتك كويسة انا اسف مكنش قصدى اخبطك
فاتن وهى بتقوم من على الارض تقف :انا بخير
اسلام :تحبى نروح المستشفى علشان نطمن
فاتن :مش مستاهلة دى خبطة بسيطة
اسلام :طيب فى اى حاجة انا ممكن اعملهالك اى تعويض تطلبيه
فاتن :هو انت محسسنى انى بين الحياة والموت ليه دى خبطة بسيطة اخرها كدمات يعنى وبعدين انا مبقبلش العوض يا حضرة
اسلام :انا اسف لو كلامى ضايقك
فاتن :مجراش حاجة شكلك مخضوض اكتر منى اصلا
تحب تدخل المطعم تشرب حاجة تهدى اعصابك بيها
اسلام :انتى كنتى داخلة المطعم ده
فاتن :اه
اسلام :طيب ممكن على الاقل اعزمك على عصير فريش كاسف عن اللى عملته ومش تعويض يا ستى علشان انتى مبتقبليش العوض
فاتن :محدش بيعزم حد فى ملكه
اسلام :ملكه انتى صاحبة المطعم ده
فاتن :اه
اسلام :ده كده انتى اللى تعزمينى بقى
فاتن :ماشى انت تخبطنى وانا اللى اعزمك يلا مش مشكلة خليها عليا اتفضل معايا..سيد تعالى هنا
سيد :ايوه يا فاتن هانم
فاتن :ياه يا سيد يعنى مش كفاية اسمى كمان بتقول هانم انا كده قديمة وش يعنى سيد انت اكبر منى بتلت سنين متقوليش هانم دى واسمع كلامى زهقت من كتر ما بطلب منك الطلب ده
سيد :خلاص يا ست فاتن
فاتن :برضه
سيد :مانا مش هينفع اقول لحضرتك غير كده
فاتن :ماشى يا سيد اهى اهون من هانم..تشرب ايه
اسلام :قهوة سادة
فاتن :لا قهوة ايه عصير احسن
اسلام :خلاص عصير فراولة
فاتن :اتنين عصير فراولة يا سيد
سيد :من عينيا
اسلام :المطعم بتاعك حلو اوى وعتيق كده تحسيه طالع من فيلم ابيض واسود
فاتن :اسمه ايام زمان وماما كانت حريصة انه يكون شبه زمان الديكور والاغانى اللى شغالة فيه وحتى شكل الترابيزات والكراسى كله قديم
اسلام :مطعم ايام زمان مع انه على طريقى للشغل بس عمرى ما دخلته دى اول مرة وان شاء الله متكونش الاخيرة
فاتن بابتسامة :اعتبر المكان مكانك يا..
اسلام :اسلام
فاتن :تشرفنا يا استاذ اسلام انا فاتن
اسلام :لا من غير استاذ اسلام وبس انا كمان زيك مبحبش الالقاب
سيد وهو بيحط العصير :اتفضلو الف هنا
فاتن :تسلم ايدك يا سيد
سيد بابتسامة :تسلمى يا ست فاتن
اسلام :حلوة الطريقة اللى بتعاملى بيها اللى شغالين عندك
فاتن :شغالين معايا مش عندى كمان سيد ابن البواب اللى فى العمارة اللى انا ساكنة فيها ويعتبر متربين سوا انا لو عليا يقولى يا فاتن بس بس هو مش راضى اشرب العصير هيعجبك فريش على فكرة لسه معمول حالا اى اكل او شرب هنا بيكون فريش
اسلام وهو بيشرب العصير :طعمه حلو اوى فعلا انتى مش حاسة بوجع من الخبطة
فاتن :لا انت قلوق اوى على فكرة بسيطة يعنى الخبطة هعيش هعيش متخافش
اسلام وهو بيضحك :طيب الحمد لله انا خوفت تروحى فيها وادخل السجن بتهمة القتل ولا حاجة
فاتن :لا متقلقش كانت هتبقى قضية قتل بالخطأ
اسلام :انتى محامية
فاتن :لا دخلت كلية حقوق قضيت فيها سنة وبعدين سيبتها
اسلام :وحولتى كلية ايه
فاتن :تجارة انجلش وبعدين سيبتها
اسلام وهو بيضحك :انتى مبتعمريش فى كلية خالص كده طيب وحولتى لكلية ايه بعدها
فاتن بابتسامة :سياحة وفنادق مسك الختام اخر سنة ليا السنة دى
اسلام :فرصة سعيدة جدا يا فاتن
فاتن :انا اسعد انت بتعمل ايه
اسلام :هدفع الحساب
فاتن :مش انا قولت ان انا اللى عازماك وان محدش بيعزم حد فى ملكه
اسلام :بس مينفعش
فاتن :وايه اللى قل نفعه بس ينفع عادى على فكرة نورت المكان
اسلام بابتسامة :ده نورك بعد اذنك
فاتن :اتفضل

بعد يومين
فى المطعم
فاتن :اسلام اذيك
اسلام :انا الحمد لله اتفضلى اقعدى
فاتن :لا هسيبك تاكل براحتك
اسلام :لا اقعدى مبحبش اكل لوحدى اصلا
فاتن وهى بتقعد :ايه رايك فى الاكل
اسلام :حلو اوى اطلبلك ايه تاكليه
فاتن :لا انا سبقتك اتغديت مع بابا وماما قبل ما اجى
اسلام :مامتك اللى اختارت اسم المطعم وديكوره صح
فاتن :صح هى بتحب كل حاجة قديمة حبت بابا علشان كده وسمتنى فاتن علشان كده
اسلام :هى مسمياكى فاتن على اسم فاتن حمامة
فاتن :اينعم واختى اسمها نادية على اسم نادية لطفى
اسلام :مامتك اسمها ايه
فاتن :اسمها شاهيناز تخيل جدى سما شاهيناز وسليم وفريدة وامى سمتنا نادية وفاتن تحسها غريبة وسطنا انا ونادية وبابا
اسلام :هو باباكى اسمه ايه
فاتن :اقولك بس متضحكش
اسلام :قولى
فاتن :عمر الشريف
اسلام :يعنى انتى اسمك فاتن عمر الشريف اسم سينمائى جدا
فاتن :انا اتهريت قلش على اسمى بشكل لا يتحمله بشر ولا بنى ادمين سعادتك بس انا بحبه ورثت حب ايام زمان وحب كل حاجة قديمة من ماما
اسلام :انتى قولتى ان ده مطعمك بس مامتك اللى اختارت كل حاجة فيه صح
فاتن :هو ماما فتحته من حوالى عشرين سنة وبعدين لما اختى نادية اتخرجت من كلية الصيدلة وبابا وماما فتحولها صيدلية كبيرة باسمها قررو انهم هيكتبولى المطعم ده باسمى ماما فى الاول كانت بتنزلنى معاها علشان تعلمنى الشغل ولما اتعلمته وبقيت شاطرة فيه سابتلى المطعم لوحدى بتيجى قليل اوى
اسلام :بس واضح انك بتحبى المطعم اوى
فاتن :جدااااا ده شغفى انا دخلت سياحة وفنادق علشانه
بسببه عرفت انا المفروض اكون ايه واعمل ايه فى حياتى انا حلمى يبقى عندى سلسلة مطاعم وكلها بنفس الاسم ايام زمان ونفس الديكور كلهم
اسلام :ان شاء الله تحققى حلمك
فاتن :اه صح انت بتشتغل ايه
اسلام :انا دكتور شغال فى مستشفى الامل قريبة اوى من هنا
فاتن :عارفاها وعلى كده انت الدكتور ولا الدوا اكيد المرضى بيشوفوك بيخفو على طول
اسلام وهو بيضحك :مش للدرجة دى
فاتن :يا عم دكتور وبعنين زرقا وابيض وطويل وشعرك اسود وسايح ونايح هيعوزو ايه اكتر من كده علشان يخفو
اسلام وهو بيضحك :هيعوزو علاج كمان يعنى ايه سايح ونايح
فاتن :يعنى ناعم طيب وانت دكتور ايه يمكن ابقى اجى انفعك
اسلام :بعد الشر عليكى من انك تجيلى انا يا ستى دكتور قلب
فاتن :تخصص صعب اوى ربنا يكون فى عونك
اسلام وهو بيبص فى الساعة :للاسف لازم ارجع المستشفى بس اكيد هاجى تانى
فاتن :المكان مكانك يا دكتور ..انت بتعمل ايه
اسلام :هطلب الحساب
فاتن :لا طبعا ميصحش
اسلام :انا ناوى اجى كتير لو كل مرة مش هتخلينى ادفع كده مش هاجى تانى
فاتن :لا طبعا تيجى ومدام شوفتك يبقى متدفعش لما تيجى وانا مش هنا ابقى ادفع براحتك ويا سيدى اعتبره عربون صداقة هترفض صداقتى
اسلام :لا طبعا وانا اطول شرف ليا صداقتك
فاتن :الشرف ليا اتفضل علشان مأخركش على المستشفى
اسلام :اه صح المستشفى ده انا نسيتها هو انتى بتيجى دايما فى الميعاد ده
فاتن :اه بكون خلصت الكلية ورجعت البيت اتغديت مع اهلى
اسلام :تمام بعد اذنك

بعد سبع شهور
فاتن بصوت عالى :يا جماعة طلباتكم دى كلها عندى بمناسبة انى اتخرجت
اسلام بصوت عالى :ومن عندى انا نزل لكل الموجودين الحلو اللى يطلبوه
كل اللى فى المكان :مبروك ..الف مبروك ..مبروك
فاتن بسعادة :الله يبارك فيكم منورين المطعم ..واخيرا اتخرجت يا اسلام
اسلام بابتسامة :الف مليون مبروك يا فيتو
فاتن :الدلع اللى محدش غيرك بيقولهولى ده
اسلام :اومال الباقين بيقولولك ايه
فاتن :اهلى بيقولولى يا تونة واصحابى بيقولولى يا فيفى ما عدا الدكتور اسلام الوحيد اللى بيقولى يا فيتو
اسلام :طبعا انا اختلف عن الاخرون المهم مقولتليش عملتى ايه مع العريس اللى كان متقدملك
فاتن :رفضته قبل ما هو يرفضنى
اسلام :وايش عرفك انه كان هيرفضك
فاتن :شوفتها فى عينيه ده اتصدم لما شافنى تقريبا كان رايح يتقدم لملكة جمال لبنان وجه عندنا يتقدملى بالغلط
اسلام :مش بالشكل بس كمان انتى فيكى مميزات كتير
فاتن :متلزموش ومتلزمش ناس كتير مدام شكلى مش حلو فخلاص هما مش هيدونى فرصة يعرفو بقية صفاتى اصلا وانا كمان اللى بيفكرو بالطريقة العقيمة دى ميلزمونيش واصلا مش عايزة اتخطب كده بس علشان بابا اصر عليا لانه ابن صاحبه لولا كده مكنتش شوفته انما انا عايزة واحد عارفنى ومختارنى انا مختار فاتن مش مختار فاتن عمر او فاتن بنت شاهيناز او فاتن اخت نادية
اسلام :بتقولى كده عن نادية علشان اخو جوزها اللى اتقدملك
فاتن :هو فكرنى زى نادية وانا مش زيها مش علشان اخوات يعنى هنبقى زى بعض دول بيبقو توأم ومتماثلين فى الشكل وفى الطبع تلاقيهم مختلفين مبالك بقى بانا ونادية وهى اكبر منى بتلت سنين يلا مش مشكلة انا اصلا عايزة اركز فى المطعم اكتر الفترة الجاية مش فى دماغى حوار الخطوبة ده دلوقتى سيبك منى انت ايه جديدك
اسلام :مفيش جديد سلمى بس لسه بتحاول معايا نرجع
فاتن :طيب وهو مفيش امل ترجعلها يا اسلام
اسلام :مستحيل يا فاتن دى واحدة مش شايفانى اكتر من فرصة كويسة دكتور ووسيم وغنى ده كل اللى هاممها فيا مش شايفة فيا اى حاجة تانية مش مهم عندها اسلام كل اللى يهمها مكانة اسلام انا فسخت الخطوبة ومتأكد انى عملت الصح
فاتن :يمكن بتحبك وعلشان كده بتحاول ترجع لاحظ ان ده مش سهل انها تيجى على كرامتها وتقولك نرجع وانت اللى سايبها
اسلام :صدقينى هى مش شايفانى اكتر من فرصة وعلشان الفرصة دى هى ممكن تعمل اى حاجة مش علشانى علشان مكانتى ولو لقت حد احسن منى هتحل عنى وتجرى وراه
فاتن :خلاص مدام متأكد انك عملت الصح ومرتاح يبقى مش مشكلة
اسلام :مرتاح جدااااا

بعد شهرين
اسلام :فاتن انا عايز اقابل اهلك
فاتن :مانا طلبت منك كتير تجلنا البيت اعرفك عليهم وانت اللى كنت بترفض وتقولى لا اتحرج خلاص يا سيدى اعتبر نفسك معزوم عندنا على الغدا فى الوقت اللى يعجبك
اسلام :هو..لا انتى مش فهمانى..انا قصدى انى عايز اتقدملك عايز اقابل اهلك علشان اطلب ايدك
فاتن :مش هينفع
اسلام :ليه
فاتن :علشان مش هينفع واصلا ايه اللى طلعها فى دماغك انت عايز تتقدملى ليه
اسلام :علشان انا بحبك
فاتن :بتحبنى انت خطبت واحدة تانية وانت تعرفنى اكتشفت امتى انك بتحبنى بقى
اسلام :لما خطبت مميزاتك كانت بتبرزلى عيوبها بساطتك كانت بتبين تعقيدها انا فسخت خطوبتى منها لانها مش انتى انا خطبتها فى بداية صداقتنا مكنتش لسه عرفتك انما لما عرفتك كرهتها وكل ما اقرب منك كل ما نفورى منها يزيد الصراحة كنت مفكر كل البنات زيها ميهمهمش غير المظاهر بس انتى مش كده يا فاتن انا عايز اتجوزك
فاتن :مش هينفع احنا مش مناسبين لبعض مينفعش نبقى اكتر من صحاب
اسلام :ليه
فاتن :لانك احلى منى يا اسلام احلى منى بكتير اوى
اسلام :يعنى مش مهم ان فى بنا توافق اجتماعى وفكرى واننا بتجمعنا صداقة قوية وكل المهم عندك الشكل
فاتن :مش مهم عندى مهم عند الناس اللى هيفضلو يقولو شوفو وقعته ازاى دى اكيد سحراله كان عقله فين وهو بيخطبها وهو احلى منها كده ويلوموك ويقولولك انك غلطت لما ارتبطت بيا وكل بنت تشوف نفسها احق منى بيك وتفضل انت تبرر وافضل انا ابرر واتحمل كلامهم اللى زى الزفت
اسلام :انتى من امتى بيفرق معاكى كلام الناس
فاتن :مبيفرقش معايا وتحت جذمتى بس بيوجعنى يا اسلام كلامهم بيوجعنى مقارنتهم بينى وبين نادية اختى اللى احلى منى كانت بتوجعنى وانا صغيرة خدت وقت طويل على ما اقدرت ابطل اهتم واتوجع من كلامهم عن ان نادية احلى منى وان ماما كمان احلى منى وانهم مش عارفين انا طالعة وحشة كده لمين بالعافية بطلت اتوجع من كلامهم مش هفتح على نفسى فتحة جديدة فتحة اكبر ووجعها هيبقى اصعب لان كلامهم هيبقى اكتر هيبقى مش بس الناس اللى انا اعرفهم هيبقى كمان والناس اللى انا معرفهاش اهلك وصحابك والناس اللى بتشتغل معاهم والناس اللى عندك فى الاصدقاء على الفيس ولا اللى متابعينك على الانستا نزل صورة ليا انا وانت وقول دى خطيبتى واتفرج على التعليقات هتبقى عاملة ازاى
اسلام :مش مهم
فاتن :لا مهم انا انسانة وعندى مشاعر وكلامهم هيجرح مشاعرى وهيحسسنى باهانة وهيهز ثقتى فى نفسى يا اسلام
اسلام :ومشاعرى انا مش مهمة عندك يا فاتن انا بحبك عادى عندك كده ترفضينى
فاتن :انا مش برفضك افهمنى انا كل اللى بقوله خلى كل حاجة زى ما هى خلينا اصحاب
اسلام :انا بحبك احنا مش صحاب انتى كده بترفضينى وبترفضى حبى ومش عايزانى فى حياتك علشان شوية كلام فارغ هيقولو ناس ملهمش لازمة
فاتن :بيتهيالك الكلام ده زى ما هيقولو الغريب هيقولو القريب برضه وانت هتتعب وانت بتبرر وبتشرح وبتوريهم قد ايه انت بتحبنى وقد ايه انا جميلة من جوايا
اسلام :من جوا ومن برا كمان يا فاتن
فاتن :ده فى عيونك انت وبس يا اسلام انا مش عايزة اخسرك انا حبا وجودك فى حياتى بس نفضل زى ما احنا
اسلام :مش هينفع افهمى انا بحبك لا هقدر اشوفك بتتخطبى لحد غيرى ولا هقدر اخطب واحدة غيرك وانا بحبك
انتى مش بتحبينى
فاتن :مسمحتش لنفسى احبك او اشوفك اكتر من صديق احنا مننفعش غير صحاب
اسلام :وده كله علشان كلام الناس الناس هى اللى بتحددلك ترتبطى بمين ناس حياتك كلها على بعضها مش هتأثر فيهم فى اى حاجة هتدمرى انتى حياتى وحياتك علشان كلامهم
فاتن بدموع فى عينيها :انت مجربتش تسمع كلام وحش بيتقالك فى وشك وكلام اسوء منه بيتقال فى ضهرك والمفروض انك تسمع وتسكت لانك لو اتكلمت تبقى قليل الادب والمفروض ساعات كمان تضحك لانهم بيهزرو ولو مضحكتش تبقى حساس زيادة وبتكبر المواضيع انت مجربتش تبقى مكانى يا اسلام فمتحكمش عليا
اسلام :بس انتى اتجاوزتى كل ده يا فاتن عندك مطعم وشاطرة فى شغلك وبتحبيه ومهتمة بنفسك ولبسك شيك وزوقك حلو وواثقة من نفسك وبتواجهى الدنيا بدراع مفتوح من غير خوف وبطروحى مطرح ما رجلك تاخدك
فاتن :بصعوبة نسيت او تناسيت كلامهم بصعوبة مهتمتش هما شايفنى ازاى المهم انا شايفانى ازاى لحد ما كلامهم قل كتير مع الوقت هرجع من تانى افتحه على نفسى وبشكل اكبر كمان
اسلام :حتى لو هتتعبى انا مستاهلش تتعبى علشانى التعب ده
فاتن :انت تستاهل يا اسلام انت تستاهل كل الحلو اللى فى الدنيا انا اللى مش هقدر اتعب التعب ده
اسلام وهو بيقوم يقف :قصدك انتى اللى مش عايزة تتعبى التعب ده
فاتن :يا اسلام استنى بس

سابنى ومشى هو مفكر انى سهل عليا ارفضه وارفض حبه سهل عليا اقوله مش عايزاك سهل عليا اكون عارفة اننا مينفعش نبقى سوا علشان كلام الناس مش هيرحمنى ولا هيرحمه ويمكن يبطل يحبنى ويندم انه اختارنى بسبب كلامهم
صعب كل ده صعب والاصعب منى اللى اتحملته من كلام الناس عن شكلى بشرتى اللى مش بيضا زى امى واختى عينيا الضيقة شعرى اللى مش ناعم ملامحى اللى مش حلوة ومش مهم عقلى ومش مهم خفة دمى ومش مهم طيبتى وحنيتى المهم الشكل الشكل وبس
انا بصعوبة طلعت نفسى بره الدايرة دى واهتميت بنفسى وبحياتى وقولت مش مهم هما شايفنى ازاى المهم انا شايفة نفسى ازاى ولو اللى هيتقدملى بيفكر زيهم يبقى ميلزمنيش
مش هقدر ادخل الدايرة دى من تانى مش هتحمل
بس اسلام مفهمنيش محسش بيا مش فاهم يعنى ايه بنت تكون مش حلوة وكل الناس بيقولولها كده ومهما حاولت اتغير غصب عنى كلامهم سايب اثر جوايا انا مبيفرقش معايا كلام الناس بس كلامهم بيوجعنى كلامهم بيوجعنى اوى
عدى اسبوع مجاش فيه المطعم مع انه متعود يجى يتغدى فيه كل يوم ما عدا ايام الاجازة
مردش عليا لما كلمته مردش على رسايلى اللى بعتهاله
انا عارفة انى جرحته بس غصب عنى والله غصب عنى انا جرحته وجرحت نفسى معاه وجعته ووجعتنى بس مش بايدى
بعد اسبوع لقيته جالى المطعم وشه كان مجهد واضح انه مكنش بينام كويس

اسلام :ماشى الناس هتتكلم ومش هتبطل كلام بس مش من العدل انى اخسر بنت بحبها وبموت فيها بسبب كلامهم حرام اخسر بنت بتفهمنى وبتهون عليا لو مضايق وبتضحكنى وحياتى بقت احلى لما دخلتها لمجرد ان الناس شايفين انى كتير عليها علشان شكلى احلى شكلى ده اللى هو حاجة من عند ربنا انا متعبتش فيها ولا اختارتها فى حين ان هى اختارت تبقى لطيفة وواخدة الدنيا ببساطة اختارت تبقى شاطرة فى شغلها اختارت تبقى متواضعة مع كل اللى حواليها واولهم اللى شغالين معاها اختارت تبقى مثقفة وبتقرء كتب كتير اختارت تبقى طيبة اختارت تهون عليا وقت ما كنت انا خابطها بعربيتى لانها لاحظت انى مخضوض اختارت تبقى زوق ومسابتنيش ادفع الحساب فى ولا مرة جيت فيهم المطعم بتاعها اختارت تبقى مختلفة وميهمهاش شكلى ولا مكانتى متشوفنيش فرصة مناسبة وعريس ميتفوتش اختارت تشوفنى صديق انسان فيه مميزات وعيوب انسان حبت تتعرف عليه
هما اغبية ومش فارقلهم غير الشكل انما انا مش غبى علشان اعمل زيهم وابقى سطحى انا مش حمار علشان اضيعك من ايدى انا مش هسمع كلامك وهنتجوز يا فاتن غصب عنك وغصب عن الناس كمان
فاتن وهى بتعيط :وافرض ندمت
اسلام :عمرى ما اندم الحالة الوحيدة اللى ممكن اندم فيها هى انى اسمع كلامك ده وابعد عنك
فاتن وهى بتعيط اكتر :انا مش عايزاك تبعد عنى متبعدش يا اسلام
اسلام :مش هبعد مهما قولتى مش هبعد وبعدين بتعيطى ليه كلامى مضايقك
فاتن وهى بتمسح دموعها :كلامك مفرحنى اخر حاجة كنت اتخيلها انى اسمع الكلام ده فى حياتى من راجل لا ومش اى راجل راجل زيك دكتور ووسيم وليه مكانته فى المجتمع والف بنت تتمناه
اسلام وهو بيضحك :اتغر يعنى وعموما يا ستى انا ميلزمنيش من الالف دول غيرك ميلزمنيش من كل بنات الدنيا غيرك يا فيتو بصى احنا مش هنبرر لحد اللى بيحبنا هيفرحلنا واللى مفكرين انهم محور الكون وكلامهم سيف على رقاب اللى بيسمعوه احنا هنحط كلامهم اللى ملوش لازمة ده تحت رجلينا انا مش هبرر نفسى لحد ولا هقنع حد انك تستاهلى حبى يا فاتن انا كفاية عليا انى متأكد من انى بحبك وانى مش عايز غيرك المرة دى مش هتتعبى لوحدك هنتعب سوا
فاتن بابتسامة :وانا موافقة نتعب سوا ومش هخسرك

كلام الناس ملوش لازمة واوقات كتير اوى بيكون غلط وسطحى وملوش اساس من الصحة بس بيوجع اللى بيسمعه وبيتعبه وقادر يحوله لمريض نفسى
لازم نقاوم لازم نفكر نفسنا ان الناس متعرفناش وحكمهم علينا غلط لازم نفكر نفسنا ان رضاهم غاية لا تدرك المهم رضانا عن نفسنا مش مهم هما شايفنا ازاى المهم احنا شايفين نفسنا ازاى محدش هيعرفنا اكتر من نفسنا
احنا منقدرش نغير كل الناس اللى نقدر نغيره هو نفسنا نقدر نبطل نهتم بكلامهم ونتأثر بيه ونفتكر ان كلام الناس ملوش لازمة وقيمتنا احنا اللى بنحددها بنفسنا وبتعبنا وباللى بنعمله فى حياتنا مش بكلام الناس💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا