يلا حالا بالا بالا حيو ابو الفصاد واك واك
فرحة :ده عيد ميلادى وانا علي حسب علمي يعني انثي يبقو تحيو ام الفصاد بتحيو ابو الفصاد بتاع ايه ان شاء الله ها
الكل :ههههه ولا يهمك طب يلا حالا بالا بالا حيو ام الفصاد واك واك
فرحة :احلي اصحاب دول ولا ايه لا بجد فجأتوني والحفلة حلوة اوي ربنا يخليكم ليا
وبعد رقص وتنطيط كتير وضحك وهدايا حلوة اوي وكتيرة اوي روحت البيت النهاردة عيد ميلادى الاربعة وعشرين صحابي عملولي مفاجاة واحتفلنا بيه في كافيه انا فرحت اوى
وبعد عيد ميلادى بقيت بروح الكافية كتير مع صحابي عجبني من يوم عيد ميلادى انا فعلا اتبسط وحبيت الكافيه من يومها
بعد شهر من عيد ميلادى بابا قالي ان في واحد عاوز يتقدملي وخد ميعاد من بابا وهيجي اخر الاسبوع اشوفه ونقعد سوا انا معنديش مشكلة خالص مع الجواز الصالونات انا مبحبش حد بالرغم ان صحابي كتير في الكلية وبعد ما اتخرجت كمان بس محدش فيهم خطف قلبي كلهم بالنسبالي زي بعض ومين عارف يمكن نصيبي يبقي مع حد معرفوش قبل كده
المهم جه ميعاد العريس وخرجتله بس طلعت معرفوش خالص مشفتوش ولا مرة قبل كده هو شكلا تمام لا الصراحة حلو ابن الايه واستايل لبسه كلاسيك كده وعارف انه راجل فمش عامل شعره سيشوار ولا عامل فيه حاجة من وجع البطن الموجود اليومين دول ارتحت لهيئته جدااا
سيف :اذيك يا انسة فرحة
فرحة :تمام الحمد لله بخير
سيف :تحبي تبدأي انتي ولا ابدء انا
فرحة :يا ريت تبدء انت
سيف :انا سيف تلاتين سنة خريج سياحة وفنادق عندي كافيه في المهندسين وواحد تاني في مدينة نصر
انا اصغر اخواتي عندى اختين بنات متجوزين ومخلفين ووالدي ووالدتي متوفين
فرحة :الله يرحمهم
انا فرحة اربعة وعشرين سنة خريجة اداب قسم علي نفس
بابا عنده محل تحف انا بشتغل معاه فيه محبتش اشتغل في مجال دراستي بصراحة انا وحيدة مليش اخوات بس عندي صحاب كتير اقربهم ليا سارة ومني صحابي من زمان اوى وبالنسبالي اكتر من اخواتي
سيف :هواياتك ايه
فرحة :القراية بحب اقرء كتير وبرسم بس مش محترفة يعني بحب الخروج واني اشوف اماكن جديدة واتعرف علي ناس جديدة انا اجتماعية جدا
وانت
سيف :الكورة طبعا والبلايستيشن بحب القراءة بس مبقراش كتير معنديش مانع اجرب حاجات جديدة بس في الغالب انا بعمل نفس الحاجات يعني بروح نفس الاماكن اللي متعود عليها لو رحت مكان جديد بيكون مرة وخلاص علشان اجدد ومملش انما انا مبيغرش عوايدى او الحاجات اللي بحبها
مش اجتماعى اوى بس عندي صحاب يعني
فرحة :انت وفي للحاجات اللي بتحبها شكلك
سيف :جدا مبتخلاش عن حاجة بحبها ولا بقبل حاجة بحبها تضيع مني
فرحة ابتسمت :تمام تمام جدا
ومشي سيف وفضلت انا افكر حسيت سيف في الحاجات اللي انا عايزاه شكله راجل كده ووفي ومخلص وليه شخصية قوية وبيتهيالي انه صريح ومش بتاع لف ودوران بعد تلت ايام بلغت بابا بموافقتي سيف كان من تاني يوم اتصل يعرف من بابا ردى وفرح اوى لما بابا قاله انى وافقت واتخطبنا
بعد خطوبتنا بيومين سيف خدني اتفرج عالكافيه بتاعه
اتفاجات انه نفس الكافيه اللي كان فيه عيد ميلادى
فرحة: سيف انا عيد ميلادى اللي فات صحابي عملهولي هنا حتي انا من كتر ما المكان عجبني جيته كذا مرة بعد عيد ميلادى
سيف :اه يا حبيبتي مانا عارف
فرحة: عارف منين
سيف :انا شفتك يوم عيد ميلادك وانتي فرحانة ومفرحة الكل معاكي شكلك كان حلو اوى يومها فضلت طول الوقت واقف اتفرج عليكي وبعد ما مشيتو اتمنيت تيجي تاني وحصل كنت بشوفك من بعيد وفي مرة مشيت وراكي لحد ما عرفت بيتك واتقدمت لباباكي
فرحة بابتسامة :ده حب من اول نظرة بقي
سيف :باين كده يا فرحتي
فرحة :ربنا يخليك ليا رب واقدر اسعدك زي ما بتسعدنى كده بعد شهر كان عيد ميلاد مني صاحبتي وقلت نعمله في كافيه سيف
سيف رفض ياخد فلوس وقالي اعتبريه هديتك ليها
انا وصحابي لما كنا بنروح كان دايما حسابنا مدفوع ده عادى بس اللي مش عادى ان لو اي حد من صحابي راح الكافيه حتى لو انا مش معاهم سيف كان بيعتبر حسابه مدفوع
روايات كتير وكتب اكتر سيف جبهالي مجرد ميعرف انى بس عايزاها بلاقيها عندى
سيف عمل علشاني كتير حياتي احلوت من يوم ما دخلها
انا اتعلمت الطبخ علشانه حسيت انها حاجة هتفرحه خصوصا انه خسر والدته وهو صغير وعزمته عالغدا عندنا
سيف :تسلم ايدك يا طنط الاكل تحفة
امال :الف هنا يا حبيبي بس النهاردة فرحة اللي عملت الغدا مش انا
سيف بابتسامة :تسلم ايدك يا فرحة
وبعد ما مشي كلمني في الموبايل باليل
فرحة :بجد الاكل اللي عملته عجبك
سيف :حبيبتي تسلم ايدك بس تعبتي نفسك ليه انا هاجيبلك شغالة طبعا لما نتجوز
فرحة :تعبك راحة انا عايزاك تاكل من ايدى ولو متعبتش علشانك هتعب علشان مين
سيف :بحبك يا فرحتي انتي كتير عليا والله
وبقيت لما سيف يكون عندنا في البيت اخليه يعلمني
البلاستيشن علشان هو بيحبها
تعاملي مع صحابي الرجالة قل لحد ما مع الوقت اختفي سيف كان بيغير وبيضايق من كلامي معاهم فبعدت عنهم علشانه
هو مطلبش مني اعمل ده بس انا عملت كده من من نفسي لما لاحظت انه بيضايق منهم وبيغير
بعد ست شهور
سيف :حبيبتي تعالي نخرج
فرحة :حبيببي انا هخرج النهاردة مع مني وسارة نجيب شوية حاجات لسارة علشان فرحها قرب انا قلتلك امبارح
سيف :يعني مينفعش تخلعي منهم ماهي منى معاها
فرحة :هتزعل مني يا سيف وشكلي هيبقي زبالة قدامها
سيف :براحتك بس الرواية الي كانت عجباكي دى الفيلم بتاعها نزل السينمات وانا معايا تذكرتين خلاص بقي نروحه مرة تانية
فرحة :لا مرة تانية ايه انا جاية معاك واهو زي ما قلت سارة منى معاها
سيف :تمام يا فرحتى انا جايلك مسافة السكة هكون عندك
واتكرر الموضوع ده كتير لدرجة ان سارة ومني بطلو يتفقو معايا علي مواعيد لانهم عارفين انى في الاخر هتحجج ومش هاجي
لحد ما جه وقت فرح سارة كانت عملاه في الجونة
سيف :فرحة انا قلت اني مش موافق
فرحة :ليه بس يا حبيبي ما كل صحابي رايحين وبابا كمان هيجي معايا لو طلبت منه
سيف :انا مش هقبل تروحي هناك وتباتي من غير ما اكون معاكى
فرحة :خلاص تعالي معانا
سيف :اعرف مين انا هناك علشان اروح
فرحة :يا سيف دي اعز اصحابي مينفعش مروحش
سيف :انا قلت اللي عندى وانتي حرة وقفل السكة
حاولت اكلمه مردش وفضل تلت ايام ميردش عليا
انا كنت هتجنن اول مرة سيف يعمل كده ازاي استحمل ميكلمنيش ولا يشوفني كل ده مقدرتش اتحمل روحتله الكافية واول مشوفته رحتله ووقفت قدامه وانا ببكى وبقوله
فرحة :سيف انت مبتردش عليا ليه
سيف :اهدي يا فرحة ومتبكيش جرا ايه بس لكل ده
فرحة :جرا كتير يا سيف مبتكلمنيش ومشوفتكش من تلت ايام ليه انا مقدرش علي بعدك عنى كل ده
سيف :خلاص يا حبيبتي اهدي بس انا معاكى اهو
فرحة :متعملش فيا كده تاني يا سيف لو علي فرح سارة انا مش هروح خلاص بس اوعي تبعد عنى كده تاني
سيف :خلاص يا فرحتي حقك عليا اضحكي بقا وتعالي نتغدى انا جعان انتي مش جعانة
فرحة :جعانة دلوقتي حسيت انى جعانة انا مكلتش ولا نمت كويس من تلت ايام
سيف وهو بيبوس ايدها :فرحتي تحب تاكل ايه
وبعد ما اكلنا سيف خدني ورحنا اشترينا هدوم ليا انا بحب اشترى هدوم بحس بسعادة وانا بعمل شوبنج
واشترالي سلسلة فضة عليها اسمه وقالي علشان ابقي معاكي دايما
بعد اربع شهور
فرحة :خلاص بقا كفاية انت عايز تعمل فيا ايه اكتر من كده
سيف :وهو انا كنت عملت فيكي ايه لكل ده
فرحة :عملت ايه انت بجد بتسال
بعدتني عن كل الناس حتي اعز اصحابي خسرتهم
غيرتني كلامى تصرفاتي حتي نظام لبسي غيرته
موتني يا سيف موت فرحة فرحتك اللي شدتك ليها من اول مرة شوفتها فيها وجبت مكانها واحدة تانية ملهاش راي غير رايك ولا ليها غيرك في الدنيا عروسة ماريونيت بتحركها زي ما انت عايز ولو حاولت تقول لا تعاقبها ببعدك عنها
دخلت نفسك في كل تفاصيل حياتي ومفيش حاجة بعملها من غيرك ومفيش في حياتي حد غيرك علشان لما تبعد اتوه ومعرفش اعيش واجيلك راكعة اقولك اني هعمل اللي انت عايزه واقدملك فروض الولاء والطاعة
عارف يوم عيد ميلادى الي انت مكنتش معايا فيه عقابا ليا بتربيني علشان اوافقك ومنزلش مع بابا المحل تانى
طلعلي في ذكرياتي عالفيسبوك صور عيد ميلادى اللي فات لقيت اني ولا حد من اللي في الصور اعرفهم خلاص كلهم بعدت عنهم حتي انا معرفتنيش بصيت في المرايا لقيت واحدة تانية غير اللي في الصور
بوصلي انت شايف فرحة اللي شفتها عندك في الكافية من سنة انت مبتحبنيش يا سيف اللي بيحب حد بجد مبيعملش فيه اللي انت عملته فيا
وانا كمان غلطت لما سبتك تغيرنى للاسوء وتبدل كل حاجة فيا للي انت عايزه لدرجة انى مبقتش عارفانى انت خلتني ضعيفة
والحب اللي بجد بيقوي مبيضعفش
امشي يا سيف انا خلاص مش هبقي عروستك الماريونيت تاني
انا عرفت غلطي ومش هكرره تانى
ودفعت تمنه غالي كفاية انى خسرت نفسي
بس خلاص انا هرجع فرحة تاني
وانا وانت عارفين ان سيف ملوش في حياة فرحة مكان
انت عايز واحدة قالب طوب مطرح مطحه تلاقيه
وفرحة عايزة تلف الدنيا كلها
حب الامتلاك بتاعك مينفعنيش
انا هرجع لنفسي وهصلح غلطى وهلاقي اللي يحبني بجد يحبنى زي ما انا مش يشكلني علي مزاجه
وهبني من جديد اللي انت هديته فيا
وهرجع اللي خسرته
اظن انت عارف طريق الباب كويس
مش عايزة اشوفك تاني
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا