حكايات منار

حكاية " بتحصل "

مصطفى :هى بنت عمتك دى مالها عاملة كده ليه
ولاء :كده اللى هو ازاى يعنى
مصطفى :ساكتة مبتتكلمش بصالنا كأننا كائنات فضائية
مراد :يا ريتها بس مبتتكلمش دى مبتردش كمان
لما كلمتها وحاولت ابدء معاها كلام بترد بكلمة او اتنين وفى الاخر سابتنى وقامت قبل ما اخلص كلامى معاها
ولاء :جميلة اصل حكايتها حكاية ابوها مات وعمتى خدتها وراحت عاشت مع جدى الله يرحمه وبعدها عمتى ماتت وفضلت لوحدها مع جدى علشان ميعش لوحده ولما مات من شهرين بابا جابها تعيش معانا هى اكيد عيشتها مع جدى وفقدانها لباباها ومامتها خلوها هادية كده وكمان اول مرة تشوفكم عايزينها تعمل ايه تقولكم نكت يعنى
مراد وهو بيضحك :قابل يا عم خطيبتك وكلامها انت مش مسيطر يا اسماعيل
مصطفى :كده برضه يا لولو تشمتى فيا العيل البارد ده
ولاء :فشر ده مصطفى ده السيطرة كلها هو انا شايفة فى الدنيا كلها راجل غيره اصلا
مراد :مش شايفة راجل غيره يعنى انتى شايفانى دلوقتى سوسن
مصطفى وهو بيضحك :او الفت
مراد :طيب حيث كده انا هاخد الباقى من كرامتى واسيبكم لوحدكم يا عصافير الحب
ولاء وهى بتضحك :يلا يا سينجل يا بائس
مراد :لا مسمحلكيش انا سينجل بمزاجى
ولاء :بمزاجك
مراد :طبعا بمزاجى ما تلم حريمك يا عم درش
ولاء :حريم انا بقيت حريم
مصطفى بابتسامة :الحريم الوحيدة اللى فى حياتى بعد ماما واخواتى احلى وارق حريم فى الدنيا
ولاء بابتسامة :بجد يا حبيبى
مراد وهو بيضحك :واديها اتثبتت تمت المهمة بنجاح يا درش
ولاء :تثبيت انت بتثبتنى يا مصطفى
مصطفى :طبعا لا يا حبيبتى الواد المعفن ده بيشعللها بس ما انتى عرفاه
ولاء وهى بتطلع لسانها :مش هنتخانق ريح روحك يا مراد وروح شوفلك حاجة غيرنا تعملها
مصطفى وهو بيضحك :شكلك بقى وحش اووووى
مراد وهو بيضحك :اه ما انا خدت بالى

ولاء :جميلة مش هتتعشى معانا
جميلة :مش جعانة
ولاء :مش جعانة ازاى بس وانتى مكلتيش كويس على الغدا فى بيت جدى
جميلة :انا اكلتى كده
ولاء :هو انا مضيقاكى بكلامى حسا انك مش طيقانى انا بس حسا انك مش على راحتك وعايزاكى تحسى انك فى بيتك وانتى وسطنا
جميلة :لا..مش كده..انا بس اتعودت اكون لوحدى مش متعودة اكون عايشة مع ناس كتير
ولاء :احنا مش ناس يا جميلة احنا اهلك..مش فى يوم وليلة هتتعودى على وجودك وسطنا بس حاولى تتعودى على الوضع الجديد وتتقبليه وتتعاملى على اساسه حاولى وواحدة واحدة هتقدرى انما متفضليش حبسا نفسك وقاعدة لوحدك كده فكرى فى كلامى ولو شوفتى انه صح تقدرى تبدءى بأنك تيجى تتعشى معانا

قولتلها كده وخرجت كان نفسى تيجى تتعشى معانا بس اكيد مش هتقتنع بكلامى وتنفذه بسرعة كده بس تانى يوم اتعشت معانا اينعم متكلمتش ولا كلمة على العشا بس اهى اتعشت معانا يومها بعد العشا قولت هنلعب انا وهيا ونيفين وسارة اخواتى لعبة الازازة بمحايلة كتير وافقت بس انا غيرت اللعبة لانها مكنش بيكون عندها اجابات للاسئلة جميلة عاشت عيشة غريبة مش قادرة اتخيل حياتها كانت عاملة ازاى مع جدى الله يرحمه بس الاكيد انها مكنتش حياة سهلة خالص
لعبنا كوتشينة عادية قولت انها هتبقى احسن من الازازة
عدا شهر كنت بحاول فيه اقرب منها واخليها تتعامل معانا كلنا بشكل عادى كنا هنخرج نشترى هدوم انا واخواتى قولتلها تيجى معانا وقولتلها ان بابا ادانى فلوس علشانها هى كمان بس رفضت تيجى معانا وقالت مش محتاجة لما قولت لبابا طلب منى اقولها تروحله لانه عايز يتكلم معاها
راحتله اوضته هو وماما وماما خرجت من الاوضة وفضل هو وهيا بس ومش عارفة بابا قالها ايه بس هى خرجت من عنده موافقة تيجى معانا نشترى هدوم

سعد :تعالى يا جميلة اقعدى انتى واقفة كده ليه
جميلة وهى بتقعد على طرف السرير :حضرتك عايزنى
سعد :عارفة يا جميلة انا اصريت تيجى تعيشى معايا ليه ومرضيتش تروحى تعيشى مع خالك حسن او اى واحد فى اعمامك
جميلة :علشان هما عندهم فى ولادهم شباب وحضرتك عندك تلت بنات وهبقى براحتى اكتر هنا
سعد :مش بس علشان كده انا عايز اصلح غلطى فى حقك يا بنتى انا عارف ان طبع جدك صعب جدا
ياما طلبت منه يجى يعيش معايا بس هو رفض ده حتى مكنش بيجى يزورنى ومكنش ينفع انا وبناتى نروح نعيش معاه فسيبتك تعيشى معاه لوحدك وفى زحمة الحياة مهتمتش بيكى يا بنتى وانتى لا ليكى اب ولا ام وعايشة مع جدك اللى مفيش اصعب من طبعه انا عارف
رميت حمله عليكى وريحت نفسى وبقيت مطمن انه مش لوحده وانك معاه تخلى بالك منه ومن ادويته
انا جبتك هنا علشان اعوضك يا جميلة عايز اكونلك اب يا بنتى مش بيقولو الخال والد وعايزك تعتبرى بناتى اخواتك انتى هنا فى بيتك يا جميلة واى فلوس بصرفها عليكى دى فلوسك يا بنتى ورثك من ابوكى وامك كمان يعنى تاخديها بقلب جامد وانتى عارفة انك بتاخدى حقك وكلها كام شهر وتتمى الواحد وعشرين ومتبقيش محتاجة وصى عليكى وتبقى حرة فى مالك
جميلة :خليه معاك يا خالى حضرتك بتشغله من ساعة موت بابا من ساعة ما ماما الله يرحمها شاركتك بورثى وورثها وانا مش عايزة ده يتغير انا بثق فى حضرتك زى ما ماما بتثق فى حضرتك بالظبط
سعد :مش بس عايزك تثقى فيا عايزك تحبينى يا بنتى عايزك تعرفى انك عندى فى غلاوة بناتى وانى معتبر انى بقى عندى اربع بنات مش تلاتة وانك فى البيت زيك زيهم ومنتيش ضيفة
جميلة :تسلم يا رب يا خالى
سعد :ماشى يا حبيبتى اخرجى مع اخواتك بكرة واتبسطى ماشى
جميلة بابتسامة :ماشى يا خالى بعد اذنك

وخرجنا واشترينا هدوم كتير جميلة مكنتش راضية بس انا اصريت عليها لاحظت انها معندهاش هدوم كتير وكمان لبسها مش مهتمية بيه بعد ما خلصنا شرا هدوم اتغدينا ودخلنا السينما واكتشفت ان جميلة عمرها ما دخلت السينما واضح انها معملتش حاجات كتير فى حياتها
ولما رجعنا بعد محايلة اقنعتها تلبس اللى جبناه وتفرج بابا وماما عليه زى ما انا واخواتى بنعمل فى الاول كانت محرجة بس مع الوقت اندمجت وبقت فرحانة بالهدوم وفرحانة بكلامنا عن حلاوة اللبس عليها
طلعت فى دماغى انا واخواتى نقص شعرنا ماما بتعرف تقص وايديها تتلف فى حرير سألت جميلة لو تحب تقص شعرها معانا او على الاقل تقصره شوية هى بعد تردد قررت تقصه

نيفين وهى بتلعب فى شعرها بايديها :برتاح نفسيا لما بقص شعرى
سارة :انا بقى بندم وكل مرة اقول مش هقصه تانى وبعدين الاقيكم بتقصوه اقصه معاكم
ولاء وهى بتضحك :ربنا ما يفرقنا عن بعض ابدا يا عمرى
سارة :بس الشعر القصير حلو اوى عليكى يا جميلة
نيفين :الحق يتقال وهو طويل برضه كان حلو فى الحالتين زى القمر
ولاء :لا بس القصير لايق مع تدويرة وشها اوى
جميلة :بجد شكلى حلو
سارة :حلو اوى
نيفين :زى القمر
ولاء :يا بنتى والله مزة جدا
جميلة :اول مرة من بعد موت ماما الله يرحمها اقص شعرى
ولاء :الله يرحمها...طيب ايه مش نتصور بقى بالنيولوك اللى عملنا كلنا ده

بعد شهر
جميلة :ايه ده نيفين وسارة لسه مرجعوش من دروسهم
ولاء :زمانهم جايين
جميلة :وانا راجعة من الجامعة جبتلنا شيكولاتة
ولاء :طيب ما نغدر بيهم وناكلها انا وانتى
جميلة وهى بتضحك :انتى اخت كبيرة مش جدعة على فكرة
ولاء :خلاص صحيتى ضميرى نستناهم
جميلة :هو انتى مش مضايقة انى شاركتك اوضتك بعد ما كنتى عايشة فيها لوحدك
ولاء :لا مش مضايقة واصلا لما نيفين وسارة بيتخانقو واحدة فيهم بتسيب للتانية الاوضة وتيجى تغضب عندى هنا فانا متعودة يكون معايا حد واكيد انتى مريحة اكتر منهم
انتى مرتاحة معايا بعد ما كنتى فى اوضة لوحدك عند جدى
جميلة :انا مش بس كنت فى اوضة لوحدى انا كنت لوحدى فى كل حاجة
ولاء انتى عارفة انا مكنش عندى صحاب جدى مكنش بيوافق اخرج معاهم او يجولى البيت او اروح عندهم فبعدت عنهم ده حتى مكنش بيسبنى اجلكم او اروح لعمامى كتير وهما برضه مكنوش بيسألو عليا اصلا
انا مكنش فى حياتى غير جدى وجدى مكنش بيتكلم معايا تقريبا حتى مكنش بياكل معايا انا كنت بعمل كل حاجة لوحدى حتى كنت بشترى هدومى لوحدى وعلشان كده مكنتش بشترى هدوم كتير ومكنتش بفهم فيها فاللى بجيبه مكنش بيبقى حلو اوى اللى جبته معاكو احلى بكتير من اللى كنت بجيبه وانا لوحدى انا مبسوطة انى هنا انا مبسوطة انى مبقتش لوحدى
ولاء وهى بتحضنها :عمرك ما هتبقى لوحدك تانى قولتلك انتى واحدة مننا وانا والله مبسوطة ان جاتلى الفرصة اقرب منك ومبسوطة انك جيتى تعيشى معانا
سارة :هو ان غاب القط العب يا فار
نيفين :ده باينه الحب ولع فى الدرا بتحضنو بعض عادى كده طب اقفلو باب الاوضة عليكم
ولاء :بس يا باردة منك ليها روحو غيرو علشان نتغدى انا جعانة وبعدها ناكل الشيكولاتة اللى ستكم جميلة جابتها
نيفين وهى بتبوس جميلة من خدها :ستنا وتاج راسنا كمان مدام الموضوع فيه شيكولاتة
سارة وهى بتحضنها :تصدقى بالله يا جميلة انا بحبك لله فى لله
جميلة وهى بتضحك :لله فى لله مش علشان جبتلك شيكولاتة
سارة وهى بتضحك :استغفر الله يا بنتى وانا بتاعت كده برضه
ولاء وهى بتضحك :ده انتى بتاعت كده وابو كده وام كده كمان اخلصو غيرو هدومكم علشان نتغدى

بعد اسبوعين
جميلة :بس مصطفى خطيبك ده طيب اوى وشكله بيحبك
ولاء بابتسامة :وانا كمان بحبه مصطفى ده مش ابن خالى ولا خطيبي وبس ده حب عمرى كله مبسوطة انك اندمجتى اكتر فى بيت جدى المرة دى عن المرة اللى فاتت واللى قبلها ده اللى قبلها دى انتى كنتى منفضة للكل لدرجة انهم سألونى مالك انما دلوقتى بقو بيحبوكى عايزاكى تاخدى عليهم وتجيلى كتير بعد ما اتجوز انا ومصطفى
جميلة :متفكرنيش علشان بضايق كل ما افتكر ان فرحك بيقرب
ولاء :يا حبيبتى هجلكم كتير وانتو كمان هتجولى
جميلة :مش كفاية هرجع تانى بنام لوحدى فى الاوضة كنت اتعودت يكونلى شريك
ولاء :متقلقيش نيفين وسارة بيتخانقو اكتر ما بياكلو كل شوية هتلاقى واحدة فيهم نطالك زى ما كانو بينطولى

جميلة خدت علينا بقت بتتعامل معانا عادى بعد ما كانت بتتجنب التعامل معانا وعايشة لوحدها حتى بقت لما بنروح عند جدى بتتكلم مع الكل مع جدى وستى واخوالى ومراتاتهم وولادهم بقت عايشة معانا مش عايشة مع نفسها زى زمان
حتى بقت لما بنقول هنروح لجدى وشها مبيقلبش قبل كده كان وشها بيقلب وبتحاول تتحجج علشان متجيش بس طبعا كنا بنرفض
علشان متفضلش فى البيت لوحدها
احنا كل شهر بنتجمع عند جدى كلنا

بعد شهر
مراد :بصى هو التغيير اللى حصلك حلو مفيش كلام بس انا مش فاهم التغيير ده مشملنيش ليه
جميلة :افندم
مراد :انتى بقيتى لما بتيجى هنا بتتكلمى وبتهزرى مع كل الموجودين كل الموجودين يا مؤمنة ما عدا العبد لله ليه
جميلة :لا عادى
مراد :انتى اتغيرتى مع الكل ما عدا انا لا مش عادى
جميلة :هو بصراحة عارفة انك لما جيت تتكلم معايا كان علشان صعبت عليك وانا لوحدى كده ومبتكلمش مع حد وانا مبكرهش فى حياتى اكتر من الشفقة
مراد :مكنتش شفقة..طيب بلاش البصة دى فى الاول كانت شفقة خصوصا بعد ما عرفت حكايتك بس انا والله كنت عايز اساعدك
جميلة :عارفة وعلشان كده مقبلتش مساعدتك دى ومستجبتش لمحاولاتك فى انك تفتح معايا كلام
قبل ما تقدم لحد مساعدة فكر هو محتاج المساعدة دى ولا لا علشان هو لو مش محتاجها ببساطة من حقه يرفضها زى ما انا عملت كده
مراد :طيب ولو عايز نبقى اصحاب لا عايز اساعدك بدافع الشفقة ولا عايز اساعدك اصلا انتى خلاص مبقتيش محتاجة مساعدة ما شاء الله اتصاحبتى على الكل ما عدا العاق انا توافقى بصداقتى ولا ترفضيها
جميلة :من غير شفقة
مراد :من غير شفقة انتى مبقتيش محتاجاها خلاص
جميلة :ولا عمرى فى حياتى كنت محتاجها ولا عمرى هحتاجها ولا هقبل بيها انا مبكرهش فى حياتى اكتر من الشفقة
مراد :ماشى يا ست المرأة الحديدية موافقة ولا ايه
جميلة :هفكر فى الموضوع
مراد :هفكر ده ايه الغرور ده
جميلة :علشان تبقى تشفق عليا اوى
مراد :اخر مرة اشفق على حد فى حياتى يا ستى
جميلة :يبقى خلاص موافقة

بعد شهرين
سارة :الحقو نيفين بتعيط
ولاء :ايه ده ليه
سارة :معرفش وسألتها مرديتش عليا
ولاء وهى بتدخل اوضة نيفين وسارة :نيفين يا حبيبتى بتعيطى ليه فيه ايه
جميلة :حد عملك حاجة فى المدرسة
نيفين وهى بتعيط :مش كفاية ان ولاء هتتجوز كمان اسبوعين وتسبنا انتى كمان هتتخطبى وتتجوزى وتسبينا ومش هيفضل غيرى انا وسارة هنا
جميلة :مين قالك يا حبيبتى بس ان انا هتخطب ما انا قاعدة معاكى اهو
نيفين  وهى بتعيط اكتر :سمعت بابا وماما بيتكلمو ان مراد ابن خالو عايز يتقدملك وبابا قال لماما نأجل الكلام فى الموضوع ده لحد بعد فرح ولاء يعنى هى تتجوز وتسبنا وبعدها انتى تتخطبى وتتجوزى وتسبينا لوحدنا انتى كمان
جميلة وفى عيونها دموع :كل العياط ده علشانى
نيفين :مش عايزاكى تسبينا انتى كمان كفاية ولاء ما تبقيش انتى وهيا كده كتير عليا
جميلة وهى بتمسح دموعها :متقلقيش يا حبيبتى حتى لو اتخطبت لمراد مش هتجوز غير بعد سنتين لما اخلص الكلية ويمكن اكتر من سنتن كمان
نيفين :وعد
جميلة :وعد
سارة :يعنى كده هتبقى انتى وجميلة سلايف وعايشين فى بيت واحد الله بقى
جميلة وهى بتضحك :شايفة لوح التلج توأمك بتفكر فى ايه
سارة :يا بنتى ما هتجولنا وهنرحلوكم وحتى كل واحدة فينا تاخد اوضة لوحدها بقى
ولاء وهى بتضحك :طمعانة فى الاوضة ياللى معندكيش دم
سارة وهى بتضحك :لا متفهمنيش صح

واتجوزت انا ومصطفى وبعد جوازنا بشهر مراد وجميلة اتخطبو وبعد ما خلصت كلية اتجوزو وبقينا سلايف انا وهيا لان مصطفى ومراد اخوات
حياة جميلة كانت صعبة اوى باباها مات وسابت بيتها وراحت هى وعمتى عاشت مع جدى وبعدها عمتى نفسها ماتت وبقت جميلة يتيمة اب وام وملهاش فى الدنيا غير جدى اللى عزلها عن العالم كله ومهما هى حكتلى ومهما انا تخيلت مش هقدر اتخيل شكل حياتها مع جدى انا مكنتش بقدر اتحمله ساعتين تلاتة لما كان بابا بياخدنا نزوره مبال بقى جميلة اللى عاشت معاه سنين من عمرها واتحملت طباعه الصعبة دى كلها
يمكن صبرها على كل ده نتيجته كانت تعويض ربنا ليها بينا ببابا وماما واخواتى وانا احنا كلنا بنحبها ومراد كمان
جميلة بعد ما كانت لوحدها بقى فى حياتها ناس كتير اوى ومبقتش بتعمل اى حاجة لوحدها
جميلة قالتلى انها لما كانت بتحاول تتخيل شكل حياتها فى المستقبل كان هيبقى عامل ازاى مكنتش بتعرف بس حتى لو كانت عرفت فاللى حصلها احلى من اي حاجة كانت ممكن تتخيلها واجمل من اى حلم كانت ممكن تحلمه

بتحصل ونفرح بعد الحزن بتحصل ونرتاح بعد التعب بتحصل وننجح بعد الفشل بتحصل ويبقالنا ونس بعد الوحدة
الدنيا واسعة اوى وممكن اى حاجة تحصلنا فيها
لما تحصلك حاجات مكنتش تتخيلها متتفاجأش وتتصدم افتكر ان الدنيا واسعة وانك لسه ياما هتشوف فيها تقبل اللى بيحصلك وابتسم وقول لنفسك بتحصل💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا