حكايات منار

حكاية " تمن اختيار "

ساندى :سؤال جماعى يعنى كلنا هنجاوبه
منة :قشطا جدا
رانيا :تمام حبيت الفكرة
ليلى :اسالى طيب بما ان الفكرة فكرتك
ساندى :سبب رفضتى عريس علشانه
منة :معنديش اجابة بسبب ابراهيم انتو عارفين لا حد بيتقدملى ولا بقعد مع حد
رانيا :ولا بتقعدى معاه ولا بتتخطبيله هتفضلى متعلقة ومعلقاه معاكى كده لامتى خليتى حجتك الكلية ادينا بقينا فى اخر سنة مبقاش فى حاجة تتحججى بيها
منة :ولا عارفة اقول موافقة اتخطبله واتجوزه ولا عارفة اقول لا
ساندى :علشان خايفة تختارى
منة :حد غيرى يجاوب  بقى جاوبى يا ليلى
ليلى :كان عايز يتجوز بعد سنة تانية كلية واقضى سنتين عنده وانتى يا ساندى
ساندى :كان واخدنى كوبرى
ليلى :كوبرى ازاى يعنى
ساندى :يعنى هو كان مرتبط بواحدة جارتى انا وهى مبنطيقش بعض سابته وكان عايز يغيظها فتقدملى
منة :ده عيل اوى
رانيا :وهو ايه اللى خلاه يفكر انك ممكن توافقى عليه اصلا
ساندى :فكر انى ما هصدق علشان اغيظها واحرق قلبها وابقى خدته منها
ليلى :بينى وبينك كده مفكرتيش توافقى
ساندى :لا طبعا الموضوع مرفوض ومش محتاج تفكير بالنسبالى هو ايه اللى اتخطبله واتجوزه علشان اضايقها او اغيظها ما ان شاء الله عنها ما اضايقت ولا اتغاظت
وبعدين بدماغه العيالى التافهة دى هى ربنا نجاها منه تنجى هى منه والبس انا نفسى فيه لا مش لاعبة يفتح الله
مفاضلش غيرك مجاوبش يا رانيا
ليلى :اكيد علشان قالها مساء الخير بدل ما يقول السلام عليكم ولا تلاقيه كان شاب عادى مش ماشى بالسبحة فى جيبه والسواك فى ايده ودقنه واصلة لحد ركبه وهى هترفض غير للاسباب دى ست الشيخة
رانيا :انا مش شيخة يا ليلى مش علشان لابسة نقاب ابقى شيخة واكيد مش من حقك انك تقوليلى الكلمة دى على الفاضية وعلى المليانة ولا من حقك تتريقى عليا بالشكل الوقح ده ومتقوليش بهزر لان لو ده هزار فمتهزريش معايا الهزار ده تانى لانه تقيل على قلبى ومش قبلاه
ليلى :انتى كبرتى الموضوع ليه
رانيا :انا مكبرتوش هو كبير لوحده انتى اللى مصغراه وانا عديتلك كتير قولت يمكن من نفسك تحسى وتغيرى اسلوبك ده بس بالعكس مع الوقت اسلوبك بيزيد من غير مبرر وضغطانى بشكل مش طبيعى وانا حقيقى مش نقصاكى
منة :اهدى يا رانيا ليلى مش قصدها
رانيا :مش قصدها ايه بالظبط يا منة مش قصدها تتريق عليا وتقلل من اختياراتى
اختياراتى دى اللى هى فى حياتى مش فى حياتها
النقاب اللى لبساه ده على وشى مش على وشك يا ليلى
ويا ريته جاى بالساهل
انتى عارفة انا استحملت ولسه مستحملة ايه علشان النقاب
عارفة اهلى عارضونى ازاى متخيلة انى لسه بيتسمم بدنى لحد دلوقتى علشان انتقبت
طيب انتى عارفة انى بسمع كلمة ست الشيخة دى اكتر ما بسمع اسمى تقريبا
لو غلطت ايه ده ازاى ست الشيخة تغلط وكأنى مش بشر زيكم من حقى اغلط واتعلم من غلطى
وان ضحكت ايه ده معقول ست الشيخة بتضحك وكأن الضحك متحرم عليا
ولو اتكلمت مع بنت قريبتى شوية امها هتخاف عليها لاقنعها تنتقب زيى وكانى هقنعها تشتغل رقاصة مثلا واصلا انا مبحاولش اقنع حد بالنقاب انما ازاى لا طبعا يخافو على بناتهم منى ومن افكارى ونقابى كانى بقيت فيرس او جرثومة
انا عارفة ان فى بنات منتقبة وبتعمل بلاوى وان حتى فى ناس بتلبس النقاب وتخطف وتسرق بس هو ده معناه ان كل المنتقبات كده هو مش فى بنات محجبة وبتعمل كل ده واكتر مش حتى فى بنات بشعرها وبتعمل كده واكتر من كده
المنتقبات زيهم زى اى حد فيهم الكويس والوحش زى ما فى بنات مغرورة بشكلها فى منتقبات مغرورة بنقابها مفكرة انها اكيد اقرب لربنا من اى واحدة مش منتقبة
عارفة ليه لان الغرور صفة انسانية فى كل الناس مش حكر على اللى بشعرهم بس او اللى بيلبسو شوال حتى
زى ما برضه الطيبة والجدعنة والاحترام صفات انسانية ممكن تكون عند اى حد ومش حكر على مجموعة معينة من الناس حسب لبسهم ولا شكلهم
وانا عمرى ما قولت انى احسن منك ولا عاملتك بعنصرية انما انتى بقى اللى بتعاملينى بعنصرية وبتقللى منى ومن اختيارى
ليلى :اهدى طيب
رانيا :لا مش ههدى عارفة يا ليلى قسما بربى لو قولتيلى كلمة ست الشيخة دى تانى انا ما هعرفك تانى
ساندى :وليه ما تجيبيها من شعرها وخلاص
رانيا :لا انهى علاقتى بيها واخلص لانى مش مصاحباها علشان تقلل منى ومن حاجة عملتها علشان اقرب لربنا بيها
انتى مجبرة تحترمينى وتحترمى اختياراتى حتى لو مش مقتنعة بيها زى ما انا بحترمك وبحترم اختياراتك يا ليلى
ليلى :خلاص بقى متزعليش مكنتش اعرف ان الكلمة بتضايقك اوى كده
رانيا وهى بتعيط :مش بتضايقنى بتتعبنى يا ليلى
يعنى انا اقاوم نفسى اللى نفسها تلبس عادى زى كل البنات
ولا اقاوم ضيق اهلى منى
ولا اقاوم خوف الناس منى ومن نقابى
ولا اقاوم تريقتكم عليا وتقليلكم منى
انا تعبت والله العظيم تعبت
ليلى وهى بتحضنها :انتى قوية يا رانيا وربنا هيجازيكى خير عن كل اللى متحملاه ده
طيب اقولك على سر
رانيا :قولى
ليلى :انا بغير منك
رانيا :بتغيرى منى انا
ليلى :اه علشان انتى قدرتى انك تبطلى لبس بناطيل ومكياج لا ومش بس كده انتقبتى كمان خدتى قرار ونفذتيه واتحملتى كل توابعه
انا مش بقلل منك بالعكس انا شايفاكى حاجة كبيرة اتمنى اقدر اقرب من ربنا زيك كده
رانيا :ممكن تكونى انتى اقرب منى عند ربنا
انتى جدعة وبتساعدى كل الناس ممكن تبقى عند ربنا احسن منى ما هو مش باللبس يا ليلى
كل واحد فينا بيحاول يقرب لربنا باللى يعرف يعمله ويقدر عليه المهم نكون كلنا بنحاول نقرب لربنا ونرضيه ويا عالم بقى ربنا هيتقبل من مين فينا وهيتقبل منه ايه
ليلى :ونعم بالله المهم متزعليش منى انا والله بحبك واخر حاجة هبقى عايزاها هى انى اخسرك
رانيا :انا كمان بحبك
منة وهى بتضحك :ايه يا عصافير الحب الحضن طول والناس هتبتدى تفهمكم  غلط
ليلى وهى بتضحك :والله اللى ليه عندنا حاجة يبقى يجى ياخدها فى شوال
رانيا وهى بتضحك :اللى غيران مننا يعمل زينا
منة وهى بتضحك :اه اتصالحتو بقى والداخل بينكم خارج
رانيا :ربنا ما يفرقنا عن بعض ابدا
ليلى :يا عمرررررررى
ساندى :طيب يا جماعة انتو اتخانقتو والحمد لله اتصالحتو ونسيتو ان الموضوع على برته قصدى على سؤالى اللى مجاوبتيهوش لسه يا رانيا
رانيا :بصى يا ستى رفضته علشان البيه كان عامل حسابه انه تحت النقاب فيه لمبة فينوس جو المنتقبة الحسناء اللى بيضا قشطا وعينها خضرا وخدودها حمرا وبتنور فى الضلمة اللى انتو عارفينه ده
فهو لما لقى ان تحت النقاب بنت عادية مش لمبة فينوس ولا حاجة يا عينى اتصدم فانا رفضته بقى علشان يروح يشوف المنتقبة الحسناء بتاعته فى حتة تانية
اهو احنا كده مش منصوفين التليفزيون يطلعنا ارهابيين وبنتاجر فى الاعضاء وبناكل عيال صغيرة والروايات تطلعنا ملكات جمال وانتقبنا علشان الشباب متقطعش شرايينها بالطول من فتنتنا
ساندى وهى بتضحك :يعنى انتى منتقبتيش طاعة لربنا وعلشان تاخدى اجر
منة وهى بتضحك :تؤتؤ علشان الشباب متقطعش شراينها بالطول من الفتنة
رانيا :ويا ريتها جات بس على قد كده ده فيه اللى بيضايقو لما يلاقو انك زيك زى كل البنات ليكى متطلبات مادية ومستوى معين مش عايزة تقلى عنه
بيتصدم كده اللى هو انتى ازاى مش زاهدة فى الدنيا ايه انتى مش منتقبة يعنى لو هتعيشى فى عشة وتاكلى ملح بعيش توافقى ومتفتحيش بؤك
لا وفى بقى نوع تالت بيتميز بكونه بجح اللى هو مبيصليش ميعرفش حاجة عن دينه وعارف بنات بعدد شعر راسه واحتمال يكون بيشرب مخدرات اصلا ويجى للمنتقبة بقى يقولك اهى دى اللى أامن على نفسى معاها واشيلها اسمى وشرفى طيب وهى حضرتك مش من حقها تأمن على نفسها معاك
وان قولتى لا يقولولك اتجوزيه وخدى فيه ثواب يمكن هدايته تكون على ايدك
ولو متهداش ومتغيرش يا جدعان ايه البس انا
ليلى :يالله الموضوع صعب
رانيا :صعب جدا انا لو كنت لبسته علشان حد كان زمانى تعبت وزهقت وقلعته انما علشان انا لابساه علشان ارضى ربنا فربنا بيقوينى وبيهون عليا كل اللى بيحصل معايا ده
ساندى :عارفة حكاية ان الراجل بيبقى عايز لمبة فينوس بتنور فى الضلمة ده مش لو كانت البنت منتقبة بس حصلت مع بنات قرايبى كتير
اغلب الشباب ان مكنش كلهم عايزين لمبة فينوس
منة وهى بتضحك :يبقى هو بيقعد فى الصالة وكرشه واصل لاوضة النوم واصلع وفيه العبر وعايز لمبة فينوس موزة تقفيل لبنانى ده العادى يا بنتى
ليلى وهى بتضحك :ده ربنا يعينهم على المهلبية اللى فى دماغهم دى
ساندى :المصيبة ان المهلبية دى مبقتش عندهم هما بس فى بنات دلوقتى عايزة لمض فينوس برضه
منة :اسمها لمب
ساندى :لا لمض جمع لمبة
رانيا :لا لمب ولا لمض هى لنض معروفة يعنى
ليلى وهى بتضحك :سيبو بقى الموضوع المهم اللى بنتكلم فيه وشوفو هى لمب ولا لنب ولا لمض ولا لنض
ساندى :ايوه المهم يعنى ان فى بنات دلوقتى بقى ده مقياسها فى فتى احلامها انه يكون حلو ومفيش منه وكل البنات تحسدها على شكله تحسو انها هتشغله موديل مش هتتخطبله وتتجوزه
منة :مش كل البنات كده ما ابراهيم زى القمر وتحسيه تركى ونزل مصر بالغلط ومع ذلك انا مش فرقالى حكاية شكله دى
ليلى :هو انتى ليه مترددة يا منة
رانيا :انتى بقالك كتير كل ما يفاتحوكى فى الموضوع تقولى لسه بدرى بس انا حاسة انك بتأجلى الموضوع وخلاص
ساندى :وانا كمان
   ليلى :+1
منة :اهلى كلهم بيحبو ابراهيم بحكم انه ابن خالتى وشايفين انه ميترفضش محترم ومؤدب وراجل ويعتمد عليه وجدع وشارينى وزى القمر
ساندى :بس ... ما هو مادام مترددة كده تجاهه يبقى فيه بس
منة :بس انا مش بحبه مش شايفاه اكتر من ابن خالتى مش شايفاه غير اخويا مش عارفة اتخيله خطيبى او جوزى مشاعرى تجاهه مش رايحة فى الحتة دى خالص
ليلى :ورايحة لواحد تانى حتى لو بينك وبين نفسك حب من طرفك انتى بس يعنى
منة :لا ما هو ده اللى مخلينى مترددة ومبقولش لا وبحاول أاجل فى الموضوع وخلاص لانى مبحبش حد تانى بس ما انا برضه مبحبش ابراهيم وشايفاه اخويا
خايفة اتخطبله وانا مبحبوش وافضل مستنية حد احبه ويا سلام بقى لو جه كده انا لبست فى مصيبة
وخايفة متخطبلوش اندم اهلى كلامهم عنه وعن انه هيهنينى ويسعدنى لانه شارينى بيأثر فيا
انا لا عارفة اقول لا ولا قادرة اقول اه انا خايفة اختار
ساندى :حياتك محدش غيرك هيعيشها وكلام اهلك مينفعش يحددلك اختياراتك بالشكل ده لان فى الاخر انتى اللى هتعيشى حتى لو كنتى جبانة وسيبتيهم يختارولك انتى اللى هتعيشى
منة :يا سلام وانتى كنتى عرفتى تعملى كده علشان انا اعمل
قولتى انتى لباباكى انك مش هتشتغلى معاه فى مكتب المحاسبة بتاعه بعد ما تخلصى الكلية وانك عايزة تشتغلى فى حضانة علشان بتحبى الاطفال
ساندى :بابا مش هيفهمنى وهيزعل منى
منة :وانا مش بس بابا لا بابا وماما وخالتى وجوزها وابراهيم واخواته هيزعلو منى وضعى صعب فمتحكميش عليا طول ما انتى مش مكانى
ساندى :انا مبحكمش عليكى انا بنصحك انا خايفة عليكى مش عايزاكى تبقى تعيسة لو وافقتى على ابراهيم وانتى مش شايفاه غير اخوكى هتبقى بتأذى الكل واولهم ابراهيم نفسه
هو من حقه يتجوز واحدة بتحبه واحدة تكون سعيدة معاه علشان تقدر تسعده
واهلك مش هيبقو فرحانين وانتى مش فرحانة وخالتك وجوزها وولادها اكيد هيبقو عايزين يشوفو ابنهم فرحان وبكلامك واحساسك ده راحة ابراهيم وسعادته مش معاكى وراحتك وسعادتك وقلبك مش معاه
منة :عارفة ... بس ما يمكن احبه بعدين
ليلى :بيتهيألى لو كان ممكن تحبيه كان زمانك حبتيه او حتى اعجبتى بيه
رانيا :او على الاقل مشوفتيهوش اخوكى وعرفتى تتخيليه خطيبك اللى هيبقى جوزك
ليلى :اهلك اللى هيزعلو لو رفضتيه النهاردة هيزعلو زعل اكبر مليون مرة لو اتخطبتو وفسختى الخطوبة
رانيا :او اتجوزتو واطلقتو
ساندى :او فضلتو متجوزين ومفيش بينكم لا مودة ولا رحمة ولا حب مفيش بينكم غير خناق ومشاكل لان ابراهيم اللى شاريكى وبيحبك انتى مش شايفاه غير اخوكى
والاخوات مبيتجوزوش يا منة
منة :انا هفكر تانى وهستخير وربنا يرشدنى للخير ويختارلى ولا يخيرنى
ساندى :يا رب
ليلى :اللهم امين
رانيا :ربنا يسعدك ويريح قلبك يا حبيبتى

بعد شهر
رانيا :لا مش قادرة انا متوترة وخايفة وركبى بتخبط فى بعض
ليلى :يا بنتى انتى مش قولتى انه قريبك وتعرفيه
رانيا :قريبنا من بعيد واعرفه على خفيف اللى هو اعرف شكله واسمه بس مش متربيه معاه انا
منة :اهدى يا رانيا دى مجرد رؤية شرعية هى مش اسمها كده برضه
رانيا :اه اسمها رؤية شرعية
ساندى :تمام رؤية شرعية وهتعدى اتكلمى معاه واستخيرى وفكرى ارتاحتيله وافقى مرتاحتيلوش اديله صابونة
رانيا :لا سهلة فعلا وانا اللى مكبرة الموضوع ما انتو اصلكم ايديكم فى المياه وانا اللى ايدى فى النار
ليلى :ما كفاياكى افورة بقى انتى هتقعدى مع عريس مش هتحررى فلسطين
كمان انتى لبستى ايه اصلا
رانيا :مش وقته السؤال ده
منة :لا وقته ردى
رانيا :لبست الفستان النبيتى والخمار والنقاب الكافية
ساندى :حلو ده ... ثانية واحدة انتى قولتى نقاب
منة :قالت نقاب اه وليه نقاب يا منيلة مش دى رؤية شرعية
ليلى :يعنى من حقه لا من حقه ايه من ابسط حقوقه انه يشوف وشك
رانيا :هبقى ارفع النقاب علشان يبص بصة وابقى انزله تانى
ليلى :يبص بصة ايه هو هيشترى شقة ده حتى اللى بيشترى شقة بيبص عليها كتير ويشوف اذا كانت عجباه وهيشتريها ولا لا
منة :رانيا ما تحترمى نفسك وتخرجى للراجل من غير النقاب
ساندى :قولى الحق انتى خارجة تطفشيه
رانيا :لا والله ابدا انا بس خايفة اوى وقولت لما اخرج واتكلم معاه واطمن هرفع النقاب ... يا نهار ابيض ده جه خلاص انا لازم اقفل
ليلى :طيب بصى اقرى اية الكرسى قبل ما تخرجيله
منة :وعدى من واحد لعشرة
ساندى :واشربى مياة علشان تهدى
رانيا :ماشى هقفل بقى فى حفظ الله يا بنات

بعد ربع ساعة
عمر :ازيك يا رانيا
رانيا :الحمد لله
عمر :هو انا معرفش كتير عن المنتقبات بس المفروض تخرجيلى من غير نقاب علشان اشوف وشك ولا انتى رافضانى ولا هو مش حقى ولا ايه
رانيا :لا ... لا مش رفضاك وهو من حقك فعلا بس انا يعنى ... متوترة شوية
طيب قبل ما ارفع النقاب عايزة اوضحلك حاجة
عمر :حاجة ايه
رانيا :انا مش شيخة انا بنت عادية جدا واللى اعرفه فى الدين برضه هو الحاجات العادية اللى كل الناس عارفينها انا لا كنت ازهر ولا انا بدرس علوم شرعية انا كلية تجارة عادى يعنى
عمر :عارف انك كلية تجارة وعارف انك مش شيخة ومين قالك انى شايفك شيخة
رانيا :لا انا بوضحلك بس اه فى حاجة تانية عايزة اوضحهالك برضه
عمر :اتفضلى
رانيا :انا مش لمبة فينوس
عمر باستغراب :ايه
رانيا :قصدى يعنى انا مش المنتقبة الحسناء انا لا بيضا ولا عينيا ملونة
عمر :هو انا عارفك من زمان وعارف انك مش بيضا وشايف عينيكى اللى مش شايف حاجة غيرها اصلا من النقاب وباينلى انهم مش ملونين وباينى مش هشوف غيرهم النهاردة
رانيا :لا خلاص هرفع النقاب اهو ... طيب حاجة كمان اوضحهالك قبل ما ...
عمر قاطعها :بصى خلاص مترفعيش النقاب انا عارفك
رانيا :انت اخر مرة شوفت وشى كان من حوالى تلت سنين لسه فاكر شكلى
عمر :يعنى طشاش كده بس ما انا هعمل ايه انتى شكلك متوترة وتوترك ده محسسنى بالذنب كأنك هتعملى حاجة حرام
رانيا :لا والله هو حلال وهو حقك اصلا خلاص انا هرفعه اهو
عمر :استنى قبل ما ترفعيه فى حاجة عايز اوضحهالك
رانيا :اتفضل
عمر :بصى انا شاب عادى معرفش فى الدين حاجات كتير بصلى الخمس فروض وبصوم رمضان وعارف ان السرقة والكدب والزنا والقتل حرام شاب عادى واقل من العادى كمان ومكنش حلمى اتجوز واحدة منتقبة ومقدرش اقولك ان كل اللى نفسك تلاقيه فى جوزك هتلاقيه فيا كل اللى اقدر اقولهولك ان لو حصل نصيب انا هتقى ربنا فيكى وهحترمك وهقدرك وهحترم نقابك وعمرى ما هقولك اقلعيه انا عارف انك تعبتى على ما اقنعتى اهلك يسيبوكى تلبسيه ومش همنعك عن حاجة بتحاولى تقربى بيها من ربنا
بس ده كل اللى عندى
رانيا وهى بترفع النقاب وبتبتسم :وانا مش عايزة اكتر من كده

ووافقت رانيا على عمر واتخطبو واتجوزو وخلفو محمد وخديجة
ومنة لما اهلها فاتحوها فى موضوع ابراهيم جمدت قلبها وقالتلهم انها مش موافقة وانها فكرت كتير واستخارت كمان ومش شايفاه غير اخوها
طبعا زعلو واضايقو منها بس مع الوقت ضيقهم وزعلهم قل بالتدريج لحد ما اختفى خصوصا بعد ما ابراهيم اتجوز وخلف وهى كمان اتجوزت واحد عرفته لما اتخرجنا واشتغلت كان زميلها فى الشغل
وخلفو سعد وحمزة وطه
وليلى اتجوزت ابن عمتها وخلفت منه مرام وملك
وانا بقى مقدرتش اقول لبابا انى مش عايزة اشتغل معاه فى المكتب بتاعه اشتغلت معاه اربع شهور وكنت حاسة انى مخنوقة وتعبانة وان المكان ده مش مكانى فجمدت قلبى وقولتله انى مش عايزة اشتغل معاه وسيبت المكتب واشتغلت فى حضانة صاحبتها تبقى قريبتنا
واتخطبت لواحد صاحب اخويا واتجوزنا وخلفت شذى ولمار

الاختيار حاجة صعبة لا حاجة صعبة اوى خصوصا لما نكون عايزين نختار حاجات اهلنا مش عايزينها او مقتنعين بيها او حاجات مجتمعنا مش متقبلها ده بيصعب علينا قرار الاختيار وبيصعب علينا كمان تحمل نتيجة اختيارنا بعد ما ننفذه
بس ما هو برضه لازم نختار لانها حياتنا ولا اهلنا ولا المجتمع ولا الناس هيعيشوها مكانا دى حياتنا واحنا اللى هنعيشها وهنتحمل نتيجة اختياراتنا فيها فى الدنيا وهنتحاسب عن اختياراتنا واعمالنا فيها فى الاخرة
وعلشان كده لازم نفكر كويس ونحسبها صح ونجمد قلوبنا ونتشجع ونختار ونبقى مستعدين ندفع تمن اختيارنا
الاختيار صعب وتمنه غالى بس احنا نستاهل نعيش حياة احنا اللى بنختار وبندفع تمن اختياراتنا فيها علشان نحس اننا فعلا عايشين
مادام تمن الاختيار احنا اللى هندفعه سواء كنا احنا اللى اخترناه او لا يبقى الافضل ندفع تمن اختيار احنا اللى اختارناه💖
#حكايات_منار

فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا خصوصا من زال اثره فلم يذره زائر ولم يذكره ذاكر