ملك :عارفة لو عملتيلى سندويتشات ومعاهم كوباية عصير ويا سلام بقى لو عصير جوافة والله لنحبك حب خطير حب شديد حب فريد
يارا :علشان خاطر ربنا قدرى احساسى وفكرى فى حاجة تانية غير الاكل وانا بحكيلك احزانى
ثم ايه الأوفر ده هتحبونى حب خطير وشديد وفريد علشان كام سندويتش وكوباية عصير ثم هما مين دول اللى هيحبونى اصلا
هى جمعية
ملك وهى بتضحك :انا وبطنى هنحبك يا بنتى
يارا :العرض مش مغرى خالص على فكرة
انتى كده كده بتحبينى
وانا مش عايزة بطنك تحبنى
كفاية بتحبك علشان مش حرماها من حاجة حتى فى عز زعلى يا حلوفة انتى
بقولك عمى عايز يتجوز امى انتى مستوعبة اللى بقوله
ملك :عمك مطلبش حاجة حرام يا يارا
يارا :مقولتش انه حرام
بس مينفعش يعنى ايه عمى يتجوز امى وينام جمبها مكان بابا وتشاركه حياته وتنسى بابا خالص
لا مينفعش
ملك :وايه اللى ينفع ان مامتك تفضل لوحدها بالايام وساعات بالاسابيع لحد ما انتى ولا حد فى اخواتك يروح يقعد معاها كام ساعة
طيب والساعات اللى مبتبقوش معاها فيها تعمل فيها ايه
ولو جرالها حاجة وهى لوحدها
لو كان والدك هو اللى عايش كنتى برضه هترفضى انه يتجوز ولا علشان مامتك ضحت كتير علشانكم فبقى لازم تضحى فى دى كمان وتموت لوحدها
هو ده اللى ينفع يا يارا هترتاحى وانتى واخواتك كل واحد فيكم فى بيته مع شريك حياته بيونسو بعض ومامتك تفضل لوحدها
يارا وهى بتعيط :لا بس والله صعب عليا اوى مش عارفة اتخيل عمى مكان بابا فى حياة ماما وفى حياتنا
يمكن دى انانية منى بس غصب عنى مش عارفة اوافق زى اخواتى ما وافقو
ملك وهى بتحضنها :متفكريش فى الموضوع بالشكل ده فكرى فى ان مامتك مش هتبقى لوحدها هيبقى فى حد ياخد باله منها وتاخد بالها منه
فكرى فى ان لو حتى ده صعب عليكى انتى هتتحمليه علشان مامتك
هتتحملى علشانها زى ما هى ياما اتحملت علشانكم
هتضحى علشانها يا يارا زى ما هى ياما ضحت علشانكم صح
مامتك تستاهل مش كده
يارا وهى بتعيط اكتر :تستاهل والله تستاهل...بس انا زعلانة يا ملك انا زعلانة اوى
ملك :طيب اعملك ايه طيب
تحبى اعملك سندويتشات وعصير ولا نطلب دليفرى
يارا وهى بتضحك :وانتى مفكرانى زيك بنسى زعلى بالأكل
يا بتاعت بطنك انتى
ياللى اى حد يأكلك هتحبيه
ملك وهى بتضحك :ده حقيقى جدا
يارا بابتسامة :شكرا يا ملك
ملك :بتشكرينى على ايه
يارا :على انك صوت ضميرى
على انك دايما بتفكرينى بالصح
على انك بتعرفى تضحكينى وقت ما بعيط
شكرا لأنك فى حياتى اصلا
ملك :كده انا اللى هعيط
لو على الشكر يبقى انا اللى لازم اشكرك على وجودك فى حياتى يا يارا
وبدل ما نقضيها شكر قومى نعمل سندويتشات احسن
يارا وهى بتضحك :ماشى يلا بينا
ملك :على ذكر الجواز انا ابويا اتجوز صحيح
يارا :تانى
ملك :قولى خامس ولا سادس انا بطلت اعد
يارا :ابوكى ده ملوش وصف
ملك :تخيلى واحد زى والدك الطيب الجميل المحترم الله يرحمه يموت فى عز شبابه
وابويا انا يفضل عايش فى الدنيا علشان يتجوز ويطلق ونتعاير بيه من اللى يسوى واللى ميسواش
وشكلى كده مش هتجوز بسببه
يارا :ليه بتقولى كده
حصل حاجة مع محمد
ملك :لا خلاص فكك مبقاش فى محمد
يارا :ليه بس مش قولتيلى انه كان عايز يقابل اهلك
ملك :حطى بس مخلل مع الاكل مبيبقاش حلو من غيره
حصل يا ستى وكنت فعلا هكلم ماما
بس لقيته بيقولى ان فى حاجة بسيطة عايز يقولى عليها قبل ما افاتح ماما فى الموضوع
يارا وهى بتاكل :حاجة ايه دى
ملك :قالى انه مش هينفع نعيش هنا زى ما اتفق معايا
يارا :اومال هتعيشو فين
ملك :عندهم فى البلد فى شقة فى بيت اهله زيه زى اخواته
يارا :تعيشو هناك ازاى وهو نفسه عايش هنا علشان شغله
ملك :ما هو هيودينى انا اعيش معاهم ويبقى يرجعلنا يوم الخميس
وانا هسيب شغلى طبعا ما انا مش هعرف اروح وارجع من بيت اهله
يارا :ده على اساس انك هتتجوزى اهله مش هتتجوزيه هو
ملك :هو بنبرة تقشعر لها الأبدان قالى
انا عايز ابر اهلى بيكى يا ملك
يارا :لا والله وميبرهمش بنفسه ليه حبيب ماما
ملك وهى بتضحك :مش فاضى
مفكر انه هيقف بين ايدين ربنا يقوله انا كنت مقصر فى حق اهلى يا رب بس الحمد لله ملك كانت بتبرهم بدالى
يارا :انسان حقيقى مستفز
انتى من الاول معرفاه انك هتعيشى هنا علشان مش هينفع تبعدى عن مامتك واخواتك
واول ما الموضوع دخل فى الجد
البيه غير كلامه
ملك :معلش عايز يبر اهله بقى
يارا :وقولتيله ايه بعد اللى قاله ده
ملك :قولتله انى مش موافقة على كلامه
لأنى اولا مبحترمش ناس بترجع فى كلامها واتفاقاتها
وثانيا لأنى عندى امى واخواتى وعايزة ابرهم ومش هعرف ابرهم وانا عايشة مع اهله بخدمهم فى بلدهم وهو هنا بيشتغل وسايبهم وسايبنى معاهم
وللأسف انا مش زيه مش هينفع اجيب حد يبر اهلى بدالى
وقولتله بعد كده من الاول يوضح للى هيرتبط بيها الحاجة البسيطة دى
مش يقول كلام ويرجع فيه زى العيال
لا يبقى راجل ويقولها من الاول انه ناوى يبر اهله بيها
يارا :وهو سكتلك بعد ما قولتيله كل ده
ملك وهى بتشرب العصير :لا طبعا
عايرنى وقالى انتى شايفة نفسك على ايه
مش كفاية انى قابل بيكى وانتى ابوكى راميكم وداير يتجوز كل يومين واحدة
يارا بغضب :عديم الاحساس والدم
وانتى قولتيله ايه
ملك :قولتله هو كفاية فعلا
وانى مش عايزة اشوفه تانى فى حياتى وسيبته ومشيت
يارا :بس كده مهزقتيهوش ليه
ملك بدموع فى عينيها :اهزقه واقوله ايه يا يارا هو قال حاجة غلط مش اللى قاله ده الحقيقة
يارا :لا مش دى الحقيقة يا ملك
الحقيقة انك ملكيش ذنب ولا علاقة بابوكى
الحقيقة ان اللى ربتك هى مامتك
الحقيقة انك احسن بنت فى الدنيا
ملك وهى بتعيط :ده بالنسبالك انتى يا يارا
انما الحقيقة بالنسبة للناس هى اللى محمد قالها
بس اللى هو وكل الناس متعرفوش انى مش مستعدة اتجوز حد يعايرنى بالحقيقة دى حتى لو هعيش واموت من غير جواز خالص
بس اموت بكرامتى
يارا وهى بتعيط :ما عاش ولا كان اللى يجرح كرامتك يا حبيبتى
والله انتى احسن منه مليون مرة على الاقل انتى واضحة وصريحة وقد كلامك
عيطتى وخلتينى اعيط وانا حامل ذنبه ايه ابنى انكد عليه
ملك وهى بتمسح دموعها :انتى كده كده عايزة تعيطى وحاوية النكد متتحججيش بيا
يارا وهى بتضحك :عندك حق
انا عندى كيكة شيكولاتة تاكلى
ملك :ده سؤال اكل طبعا حد يقول للأكل لا
يارا النهاردة تعرفى مامتك انك موافقة اللى هى عايزة تعمله ده لا حرام ولا عيب ده حقها وحق عمك
انا مكنتش اتخيل يتجوز بعد موت مراته خصوصا وانه فضل سنين كتير من غير جواز
بس واضح انه مش مستحمل يعيش لوحده فى البيت بعد ما جوز ولاده واسلام ابنه سافر يشتغل بره
الوحدة واضح انها اصعب مما نتخيل
يارا :هى صعبة انا لما اياد بيسافر تبع شغله مش بقدر اقعد فى البيت لوحدى وبروح اقعد مع ماما
عندك حق يا ملك هى تستاهل اضحى علشانها هى تستاهل يبقالها ونس وعمى كمان
انا والله بحبها اوى
هو بس الموضوع صعب عليا
بس...بس انا هستحمل علشانها هى ياما استحملت علشانا
ملك وهى بتحضنها :عين العقل يا حبيبتى
شايف يا مالك مامى قمر ازاى وهتبقى ام عظيمة لازم تكون فخور بيها
يارا :لا خلاص مش هنسميه مالك
اخر حاجة اتفقنا عليها حمزة
ملك :حلو حمزة على الله بس يكون اخر الأسماء المقترحة لغبطونى ولغبطو الواد
انا لو منه اطلع بنت فى الاخر واربيكم على الفرهدة دى
يارا وهى بتضحك :لا انا ابنى طيب مش شرير زيك
ملك :ربنا يتم حملك على خير وتقومى بالسلامة يا حبيبتى انتى وحمزة باشا
صفية :يارا عاملة ايه
ملك :كويسة الحمد لله
طنط ايناس مامتها هتتجوز عمى احمد عم يارا
صفية :الوحدة وحشة وهما الاتنين لوحدهم محتاجين ونس
كويس ان يارا واخواتها وافقو
ملك :وانتى يا ماما
صفية :انا ايه يا حبيبتى
ملك :مش محتاجة ونس
صفية :انا عندى ونس انتى واخواتك ونسى يا ملك
ملك :بس انتى من حقك يبقالك شريك فى حياتك يعوضك عن اللى بابا عمله فيكى
لو عايزة انا هتكلم مع اخواتى واقنعهم
صفية :انا مش محتاجة شريك فى حياتى انا عندى اربع شركا فى حياتى انتى واخواتك ربنا يباركلى فيكم
انتم عوضى من ربنا عن كل اللى حصلى فى حياتى مش بس عوضى عن اللى ابوكى عمله فيا
انا مطلقتش علشان يبقالى شريك حياة غيره
انا اتطلقت لأنه مكنش فى حياتى اكتر من عبء
انا كنت شايلة مسئولية البيت ومسئوليتكم ومسئولية نفسى ومسئوليته هو نفسه لوحدى
وفوق كل ده ضرب وإهانة
وكنت مستحمله وكنت مستعدة افضل لاخر عمرى استحمل
بس هو صعبها عليا بكتر خيانته ليا الناس كلها كانت عارفة بخيانته ليا
كنت بشوف فى عينيهم شفقة كنت بصعب عليهم
مكنتش بقدر ابص فى عينيهم مكنتش حتى بقدر ابص لنفسى فى المرايا علشان مشوفش فى عينيا الذل والكسرة اللى هو حسسنى بيهم
ابوكى خلا نفسى تصعب عليا اوى
وده اللى انا مقدرتش اتحمله
والله لو كنت اقدر استحمل كنت استحملت علشانكم
بس انا كنت حاسة انى هموت من القهرة والذل
وانا لو مت مش هيفضلكم حد يا بنتى انا مامنلوش عليكم
هو مكنش عارف ياخد باله من نفسه علشان يعرف ياخد باله منكم
انا اسفة علشان حرمتكم منه
بس والله انا قولتله كتير انكم حاجة وطلاقى منه حاجة هو اللى مبيسألش عليكم انما انا عمرى ما منعتكم عنه ولا منعته عنكم
حقكم عليا كان نفسى اكون اقوى من كده واتحمل بس والله ما قدرت
ملك وهى بتعيط وبتحضنها :انتى اقوى ست خلقها ربنا يا ماما
كفاية انك بتربينا لوحدك طول عمرنا
انتى الام والاب احنا ملناش ام ولا اب غيرك
انتى محرمتيناش منه هو اللى ما صدق يلاقى حجة يرمينا بيها
وعارف انك هتشيلى زى ما طول عمرك شايلة
انتى مبعدتيناش عنه هو عمره ما كان قريب مننا اصلا
اللى عملتيه ده حقك وكفاية اوى اللى اتحملتيه ولسه بتتحمليه علشانا
انتى حسن ام فى الدنيا واحسن اب فى الدنيا يا ماما
انا والله مقدرة كل اللى ضحيتى بيه علشانا
وعلشان بقولك لو عايزة تتجوزى...
صفية قاطعتها :انا مش عايزة غيركم من الدنيا يا ملك وبدعى ربنا يمد فى عمرى لحد ما بس اطمن عليكم
انا مش عايزة اتجوز مش هأمن لراجل تانى بعد اللى ابوكى عمله فيا
ولا هدخل عليكى انتى واخواتك راجل غريب
ايناس معهاش بنات فى البيت تخاف عليهم
واللى هتتجوزه ده عم ولادها تعرفه وواثقة فيه
وجوزها الله يرحمه كان راجل ولا كل الرجالة مكرهاش فى الجواز وفى الرجالة كلهم
انا غيرها يا حبيبتى انا مش محتاجة غيركم
ربنا ما يحرمنيش منكم
ويرزقكم بازواج صالحين
ويجعل على اخوكى راجل وقد المسئولية وميبقاش شبه ابوكى فى اى حاجة
ملك وهى بتبوس ايديها :ولا يحرمنا منك يا ماما يا رب
ومتخافيش على مش هيطلع زيه معاشروش علشان ياخد منه حاجة على ميعرفوش على ميعرفش غيرك
على وانا وميادة ونيرة شبهك انتى يا ماما واخدين منك احساسك بالمسئولية وقوتك وعزة نفسك وكرامتك اللى فى السما
احنا محظوظين اننا عندنا ام زيك
صفية وهى بتبوس راسها بدموع فى عينيها :انا اللى محظوظة بيكم يا حبيبتى انتم احلى حاجة فى حياتى انتم حياتى كلها
بعد اسبوع
ملك وهى بتخرج تقف فى البلكونة :يعنى خلاص حددتو ميعاد كتب الكتاب يوم الخميس الجاى
يارا :اه انتى هتيجى صح
ملك :مش قولتى هتبقى على الضيق على قد العيلة بس
يارا :طيب ما انتى واحدة مننا يا ملك
علشان خاطرى تعالى اليوم ده هيبقى صعب عليا
ولو مروحتش ماما هتفكرنى زعلانة وانا مش عايزة اضايقها وحقيقى مش هعرف اعدى اليوم من غيرك
ملك :خلاص يا حبيبتى هاجى
يارا :تسلميلى
ملك :غريبة
يارا :فى ايه
ملك :انا عاملة مج كابتشينو وحطاه على سور بلكونة الجيران مش فاكرة انى عملته اصلا
يارا وهى بتضحك :لا مش معقول ملك تنسى اكل او شرب
ملك وهى بتشرب الكابتشينو :شكلى انشغلت بكلامى معاكى ومخدتش بالى برد شوية بس طعمه حلو وجاى فى وقته
يارا :الف هنا على قلبك
انا هقفل علشان احضر العشا اياد على وصول
ملك :تمام يا حبيبتى مع السلامة
على :انتى بتعملى ايه
ملك بخضة :سلام قوم من رب رحيم...عجبك كده المج اتكسر
فى ايه
على :اكيد مش عاجبنى ان المج بتاعى اتكسر واللى مش عاجبنى اكتر انك كنتى بتشربيه بكل استمتاع وكأنه مجك لا وكمان بتزعقى بدل ما تعتذريلى على مجى اللى كسرتيه
ملك :هو...هو اللى اتفشفش ميتين حتة ده مش مجى
على :لا
ملك :والكابتشينو اللى كان فيه مكنش بتاعى
على :ايه الذكاء ده ما لو المج مش بتاعك يبقى اللى فيه اكيد مش بتاعك
وبعدين ايه اللى هيجيب المج بتاعك على سور بلكونتى مش فاهم انا
ملك :والله انا قولت كده برضه
بس فكرت انى حطيته هناك وانا مش مركزة
على :يا سلام
ملك :وانا هكدب عليك ليه
وبعدين البلكونة دى مقفولة من سنين
اكيد مجاش فى بالى ان فى شبح كييف وصاحب مزاج عامل مج كابتشينو وسايبه على سورها
على :او ان واحد من اصحاب الشقة جه قعد فيها
ده بعد اذنك طبعا
وقرر يعمل لنفسه مج كابتشينو يشربه ده لو مكنش يزعج سيادتك
وتطاول وسابه على سور بلكونته اللى فى شقته
ميعرفش انك هتيجى بكل سلام نفسى تشربيه ولا كمان تكسريله المج بتاعه
ملك :انت اللى اتكلمت مرة واحدة وخضتنى
لو مكنتش خضتنى مكنتش وقعته
على :لو مكنتيش خدتيه وهو مش بتاعك مكنتش اتكلمت مرة واحدة وخضيتك
انتى بتقاوحى ليه ما تعتذرى وخلاص
ملك :ثانية واحدة
على :انتى رايحة فين انا مش بكلمك
بعد دقيقة
ملك :شوف ده المج بتاعى نسخة طبق الاصل من اللى بقى ذكرى بتاعك
علشان كده انا فكرته بتاعى
ومعرفش ان الشقة اللى جنبنا سكنها حد
على :مخدتيش بالك ان البلكونة بقت نضيفة
ملك :لا ما انا مش اخر كل يوم باجى اتأمل بلكونتكم واشوفها نضيفة ولا لا
وعموما انا مكنتش اقصد
واتفضل المج بتاعى بدل بتاعك اللى كسرته
على :مش عايزه خليهولك
انا مبقبلش بدايل
ملك :وهتسيبنى انا لضميرى يأنبنى
لا يا عم يفتح الله خد المج انا ضميرى زنان وهيقرفنى
على :قولت مش هاخده
ملك :وانا قولت هتاخده
صفية :ملك يا ملك
على وهو بيدخل :ادخلى بيندهو عليكى وبعد كده متشربيش حاجات مش بتاعتك
ملك :تعالى هنا انت رايح فين
ده انت مستفز
تانى يوم
ملك :خد
على :مفيش مساء الخير السلام عليكم العواف حتى
مفيش اى زوق خالص كده
ملك :مين بقى اللى بيتكلم الاستاذ اللى واخد ماجستير فى الزوق ودكتوراة فى الاتيكيت اللى سابنى واقفة بكلم نفسى ودخل
خد وخلصنى
على :ايه ده
ملك :قنبلة...ما تفتح الشنطة وتشوف ايه
على :لا طبعا مفتحهاش افرضى فيها قنبلة فعلا
العمر مش بعزقة
ملك وهى بتفتح الشنطة :
هى الخناقة دى كلها مش على المج بتاعك اللى انا كسرته بسببك
هكون جايبالك ايه يعنى غير مج جديد
خده بقى
على وهو بيضحك :لا ده واضح ان ضميرك زنان فعلا
ده انتى جايباه غصب عنك ناقص تدينى بيه فى وشى ولا تكسريه فوق دماغى
اهدى يا ملك مش كده
ملك :انت تعرفنى علشان تندهلى بأسمى وتهزر معايا
المج عندك عايز تاخده خده مش عايزه ارميه فى الشارع واهو يحصل اخوه
على :استنى طيب رايحة فين هاخده خلاص
كمان على فكرة انا اعرفك والمفروض انك تعرفينى
احنا جيران على فكرة
ملك :هو علشان جيت سكنت جنبنا امبارح بقينا جيران وتعرفنى والمفروض انى اعرفك
على :انتى مش فكرانى انا على ايهاب اخو سارة
دى شقتنا كنا عايشين فيها قبل ما ننقل
انتى وسارة اختى كنتو اصحاب ودايما بتلعبو سوا لحد ما نقلنا من خمستاشر سنة
انتى فقدتى الذاكرة ولا ايه
انتى مش فكرانا بجد
ملك :انا مش فاكرة حاجة من طفولتى
ذاكرتى اتكونت وانا فى اعدادى تقريبا
وكمان لاحظ انى مشوفتكمش من بعد ما عزلتو
معتقدش خالص انك افتكرتنى من شكلى اللى مشوفتوش من خمستاشر سنة
على :لا شوفت طنط صفية النهاردة واتفاجأت
ملك :علشان لسه عايشين هنا يعنى
عادى مش كل الناس بتعزل من بيوتها
على :لا اتفاجأت ان انتى ملك
انتى كنتى طفلة رقيقة وهادية وشيك اوى فى نفسك
عمرك ما كنتى بتلعبى فى الشارع لعب يخلى هدومك تتوسخ او شعرك يتبهدل
كان دايما شكلك حلو كنتى ليدى كده وانتى طفلة
مكنتش مصدق بقيتى ايه لما كبرتى
ملك :بقيت ايه ان شاء الله هجامة ولا قطاعة طرق
ولا تكونش شوفتنى بلبس مقطع وبقولك خمسة جنيه يا بيه عايزة افطر
على وهو بيضحك :لا مش كده
بس بقيتى بتتخانقى وبتقاوحى وبتردى الكلمة بعشرة بقيتى شقية على كبر
بقولك كنتى ليدى وانتى صغيرة
ملك :هو انا شوفت صورى وانا صغيرة ولاحظت انى كنت دايما نضيفة وشيك زى ما انت بتقول بس قولت عادى انا بتصور طبيعى اهلى يخلو شكلى حلو
على :انا اهلى مصورنى صور متتشافش كل صورة عرة اكتر من اللى قبلها
فى صورة ليا لابس فيها كوتشى فردة والفردة التانية بتاعت كوتشى تانى
وصورة انا حقيقى احول فيها ومش فاهم ليه يسيبونى اتصور وانا بحول بعينى
والكبيرة بقى صورة لابس فيها جاكيت البيجامة ومش لابس البنطلون
ملك وهى بتضحك :لا مش ممكن
على وهو بيضحك :والله حصل
ومش بس كده عمتى وخالتى معاهم نسخ من الصورة دى
ابص فى عيون جوز خالتى ازاى بعد ما يشوف صورة زى دى
ولاد عمتى يحترمونى ازاى بعد ما يشوفوها طيب
يعنى انا عيل وغلط يدارو على غلطى ولا يطبعو الصورة ويوزعوها كده
ملك وهى بتضحك :انت متأكد انهم اهلك مش متبنينك
على وهو بيضحك :اهلى اه فى أوراق تثبت
ملك :ربنا يباركلك فيهم
نورت شقتكم يا
على :على يا ملك
ملك بابتسامة :نورت شقتكم يا على
واسفة على خناقة امبارح وعلى المج اللى كسرته
على :انا كمان اسف على اللى قولته
ملك :اسفك مقبول كده نبقى خالصين
على بابتسامة :واضح ان لسه بقاياها موجودة
ملك باستغراب :هى ايه دى
على :الليدى الشيك الزوق اللى كانت موجودة وانتى صغيرة
ملك :مش عارفة انت كده بتشكر فيا ولا بتنكش على خناقة جديدة
بس على العموم شكرا
على :مبنكش على خناقة لا بالعكس بشكر فيكى جدا والله
ملك :ماشى بعد اذنك
على :رايحة فين
ملك :داخلة
على :ليه
ملك :هو ايه اللى ليه
مش خلاص اديتك المج واتاسفت على اللى عملته
وقولتلك نورت شقتكم
ايه اللى ناقص عايزنى احضرلك العشا ولا ايه
على :لا اعمليلى كابتشينو بدل اللى سال على أسفلت الشارع امبارح
ملك :سال على أسفلت الشارع انتى محسسنى انى قتلته ليه
على :مش هقبل اسفك واخلى ضميرك يبطل زن غير لو عملتيلى مج كابتشينو
ملك :ماشى
على :دلوقتى تعمليه
ملك :ماشى
على :وتعملى لنفسك وتشربيه معايا
ملك :مش عايز شيكوبون بالمرة
على وهو بيضحك :لا كفاية الكابتشينو
ملك :انا هعمله على فكرة بس مش علشانك لا علشان ضميرى اللى مش هيبطل زن
على وهو بيضحك :كل الشكر ليكى ولضميرك
ملك :سكرك ايه
على :زى اللى شربتيه امبارح
ملك :انت مصر تفكرنى ليه ما تقول معلقة واحدة سكر وخلاص
على :معلقة واحدة سكر زى اللى شربتيه امبارح
ملك :لو حسيت بعد ما تشربه ان بطنك بتوجعك متقلقش ده هيبقى سم الفيران اللى حطتهولك فى الكابتشينو
على وهو بيضحك :ضميرك بيخليكى تعترفى بجريمتك قبل ما تعمليها
بتبهرينى بجد
بعد عشر دقايق
ملك :يعنى انت جيت تعيش هنا علشان الشقة دى اقرب لشغلك الجديد
على :اقرب كتير
هو انتى ليه مش فاكرة طفولتك
ملك بحرج :اسفة علشان مفتكرتكش
على :مش محتاجة تتأسفى
انا بس فعلا عايز اعرف ليه مش فاكرة فيها حاجة كده حتى انتى نفسك مش فاكراها وبتتفرجى على صورك زيك زى الغريب
ملك :مبحبهاش
على :هى ايه دى
ملك :فترة طفولتى
على :وانتى اللى متحبيهوش تنسيه
ملك :اه طبعا
على :سهل النسيان
ملك :مش سهل بس ممكن يحصل
النسيان قرار اللى عايز ينسى بجد بينسى
على :ازاى
ملك :ينشغل بالنهاردة يفكر ويخطط لبكرة
امبارح خلاص عدا
يبص قدامه لأن اللى بيبص وراه بيقع
على :معاكى حق
ملك :انا هدخل بقى بعد اذنك
على :خدى المج بتاعى معاكى
ملك :ليه مش قولت انك قبلت اسفى
على :قبلته خليه معاكى علشان هشرب الكابتشينو معاكى كل يوم
بعد تلت شهور
ملك :انا بحاول افهم ايه اللى ضايقك وحقيقى مش عارفة
على :واحدة صاحبتك شافتنى معاكى بتعرفيها بيا ومجرد ما قولتيلها على
قالتلك اخوكى وراحت موجهة كلامها ليا ملوكة بتتكلم عنك كتير ومن كلامها حبيناك كلنا واضح انها بتحبك اوى
هى فكرتنى على اخوكى
وانتى موضحتيلهاش انه مش انا
ملك :يا باشا دى بتحاول تعلقك
على انت كنت بتتشقط يا بابا
هى لو كانت حبت على اخويا من كلامى عليه مش كانت ابسط حاجة عرفت انه فى تانية اعدادى
هى بس كانت بتفتح سكة للكلام يعنى
على :ولما هى بتشقطنى وانتى عارفة انها بتشقطنى
مفهمتيهاش ليه انى مش اخوكى
خلتيها تفكر ان السكة سالكة واشارتها خضرا ليه
ملك :ومفهمتهاش انت ليه
على :سكوتك صدمنى مركزتش اصلح كلامها
ملك :صدمك ده انت مبالغ فى امرك
هتفرق ايه يا على اخوات من اصحاب وجيران
على :لا تفرق كتير يا ملك
احنا مش اخوات لا عمرنا كنا ولا عمرنا هنكون اخوات
ومحناش مجرد اصحاب وجيران وبس
ملك :اومال احنا ايه يا على
بعد شهر
ملك :ارتحت لما نزلت صور خطوبتنا فيس وواتس وانستا مش ناقص غير اطبعها على بانرات فى الشارع
على وهو بيضحك بسعادة :ارتحت جدا
ارتحت وفرحت كده الدنيا كلها عرفت انك بقيتى ليا وبقيتى معايا وبقيتى بتاعتى
ملك وهى بتضحك :انا بقيت كل ده
فوق يا نجم احنا اتخطبنا بس مش اتجوزنا وجبنا سليم واسيل
دبلة الخطوبة مبتعملش كل اللى قولت عليه ده
على :عندى انا بتعمل
بعد ست شهور
على :البقية فى حياتك يا ملك
انا لله وانا اليه راجعون يا حبيبتى
ملك :ونعم بالله
على :مش عارف اقولك ايه بس انا جنبك خليكى عارفة انى جنبك ومعاكى دايما
ملك :اوعدنى انك مش هتبقى زيه يا على
اوعدنى انك مش هتعمل فيا اللى هو عمله فى امى
وانك مش هتعمل فى ولادنا اللى هو عمله فيا انا واخواتى
علشان خاطرى وغلاوتى عندك لو بتحبنى اوعى تعمل زيه
على :اهدى يا ملك اهدى يا حبيبتى
ملك وهى بتعيط :مش ههدى انا مش ههدى
انا ابويا مات وانا واخواتى روحنا العزا زينا زى الغريب
لا فى جوا قلوبنا حزن ولا حياتنا هتبقى ناقصها حاجة بغيابه
انا اخواتى عيطو لما تخيلو لو ماما هى اللى ماتت مش هو
اخواتى حمدو ربنا ان هو اللى مات مش هى وانها عايشة
لأن ماما بالنسبالنا هى الام والاب
وهو ولا حاجة بالنسبالنا
لو هتعمل زيه بلاش انا مش عايزة ولادى يعيشو اللى عشته
ومش هعرف ابقى زى ماما واكون اب وام
مش هتعرف تكون زوج ومش عايز تكون اب
يبقى بلاها من اولها
بس بالله عليك ما تعمل فى ولادنا اللى هو عمله
على :اعمل فيكى وفى ولادنا ايه بس يا ملك
ده انا مبتمناش غير ان يجمعنا بيت انا وانتى
ده انتى وبيت بيجمعنا وولاد منى ومنك ده اكبر احلامى
دى دعوتى الوحيدة اللى بطلبها من ربنا
كلامك واجعنى منك وواجعنى عليكى
انتى مبتثقيش فيا يا ملك انتى خايفة منى انا
ملك وهى بتعيط اكتر :لا انا عارفة انك مش زيه
انا بطمن وانا معاك
انا بثق فيك زى ما بثق فى نفسى
بس هو اذانى اوى يا على اذانا كلنا
عارف انا مبحبش طفولتى ومش فكراها ليه
بسببه لأنه كان معايا فيها
وبعدها سافر كام سنة وبعدين رجع وبعدين ربنا كرمنا وماما اتطلقت منه وخرج من حياتها وحياتنا
انا محبتش حياتى غير لما هو خرج منها
على :وانا هكره حياتى لو انتى خرجتى منها يا ملك
انا حبيت حياتى لما بقيتى معايا فيها انا حبيت الدنيا لما حبيتك
وعد عمرى ما هسيبك ولا هسيبك تسيبينى ولا هعمل اللى يخليكى تسيبينى
مش قولتيلى قبل كده ان الانسان لازم يبص قدامه
بالنسبالى انتى قدامى انتى المستقبل بتاعى
فى حد يقدر يعيش من غير مستقبله
اللى بيبص وراه بيقع واللى معندوش قدام يبصله بيتوه
انا بحبك ومش هسامحك لو شككتى فى حبى ليكى او شكيتى فيا تانى
وخلتينى مضطر اقولك الكلام اللى المفروض اقوله لأنى حاسس بيه ولأنها مشاعرى
بس بدل ما اقوله علشان اعبر عنها وافرح وتفرحى بيها
لا اقوله علشان ابرء نفسى من اتهامات منك ليا ويا عالم بقى تصدقينى ولا لا
ملك :والله العظيم انا كمان بحبك اوى يا على
ومصدقاك انت الراجل الوحيد اللى انا بصدقه فى الدنيا
متزعلش منى مش هقولك كده تانى
على :الأهم عندى انك متفكريش فى كده تانى
متشوفنيش بالشكل ده يا ملك انا مش هتحمل انتى بالذات تشوفينى كده
ملك :حاضر
مش هفكر فى كده تانى
انا دى كانت مخاوف قديمة عندى بس انت طمنتنى ونستهالى
بس موته لغبطنى وتعب اعصابى لأنه فكرنى بحاجات كنت نسيتها
حقك عليا لو طلعت لغبطتى وخوفى فيك
على :حقك انتى عليا يا ملك حقك وحق قلبك عليا
وعد منى كل اللى انتى خايفة منه ده مش هيحصل لولادنا
لما اموت ولادنا هيعيطو عليا قلبهم هيوجعهم علشانى
هيحبو حياتهم لأنى فيها لأنى هعمل كل حاجة اقدر عليها علشانك وعلشانهم
ملك :انا بحبك اوى
على :انا كمان بحبك اوى
الكلمة مسئولية والفعل مسئولية والعلاقة مسئولية
لو مش قد الكلمة متقولهاش
ولو مش قد الفعل متعملوش
ولو مش قد العلاقة متبدءهاش
لو هتشيل مسئولية لازم تكون قدها علشان متدمرش حياة حد لأنك مش قد المسؤلية💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الأعلى بدون حساب ولا سابقة عذاب هو وموتى المسلمين جميعا خصوصا من زال اثره فلم يذره زائر ولم يذكره ذاكر