تامر :رؤى انا بس عايز اتكلم معاكى
رؤى :وانا مش عايزة اتكلم معاك
تامر :انا اسف اللى شوفتيه ده طيش لحظة ضعف ومش هتتكرر
رؤى :اللى شوفته ده انت انسان واطى حقير بيخون خطيبته مع بنت عمه اللى اصغر منه باتناشر سنة بتعمل كده فى عمك بتضحك على بنته
تامر :مبضحكش عليها بمزاجها اصلا هى اللى..
رؤى قاطعته :هى اللى اقنعتك تعمل كده هى اللى اغرتك وانت ادبيت وغلطت بدل ما تبقى راجل وتضربها قلم يفوقها عملت اللى عملته علشان انت عيل منتاش راجل كبير ومسئول انت انسان زبالة
تامر :يا رؤى ادينى فرصة اعرفك اللى حصل ده حصل ليه
رؤى :مش عايزة اعرف انا عايزة انسى اللى شوفته وانساك انا كل ما بفتكر شكلكم وقتها بحس انى عايزة ارجع صوتكم ايدك وهى..
تامر :يا رؤى
رؤى وهى بتقف عند سلة زبالة كبيرة وبترجع وبعدها بتمسح بؤها بمنديل :صدقت انى بقرف منك وقرفانة من اللى شوفته امشى يا تامر ومتفكرش تتكلم معايا تانى والا هعرف اهلك انا فسخت الخطوبة ليه ومش بس كده هروح بنفسي لعمك اقوله اتقى شرى وخاف على نفسك ومتورنيش خلقتك تانى
هيقول ايه اسف لحظة ضعف لحظة شيطان الحقيقة ان هو اللى شيطان أامنه ازاى على نفسى وهو مكنش امين على بنت عمه وبدل ما يكسر اى حد يفكر بس يعاكسها مش يلمسها يجى هو ويتجرأ عليها بالشكل ده
هى اللى غلطانة عيلة عندها تمنتاشر سنة اثرت على راجل المفروض انه كبير وعاقل عنده تلاتين سنة وهو معليهوش لوم صح الذنب ذنبها وهو اصله شرابة خرج اى واحدة تقدر تخليه يغلط كونه راجل مبرر مناسب لانه يخليه مش غلطان واللوم مش عليه اللوم على قليلة الحيا عديمة الرباية اللى ادحلبتله المفروض افكر بالشكل العقيم ده واسامحه واكمل مع انسان عديم الاخلاق والشرف زيه صح
لا مش صح انا ميلزمنيش الكلام ده وهو نفسه ميلزمنيش
تامر كان خطيبي لانى الحمد لله فسخت خطوبتى منه ربنا نجانى وكشفلى حقيقته
هو عايش فى نفس العمارة مع خالى شافنى كذا مرة واحنا جايين لخالى اتقدملى ووافقت واتخطبنا
بعد خمس شهور من خطوبتنا كنا جايين لخالى قولت هطلع السطح علشان اتكلم فى الموبايل لان الشبكة فى الشقة بتاعتهم وحشة والحقيقة انى كنت عايزة اشوف تامر هو عامل غية حمام فى السطح وبيطلعلهم كتير ولو مشفتوش اهو اشوف الحمام انا بحبه طلعت وشوفت باب الغية مردود بس مش مقفول قولت هزق الباب اشوفه جوه ولا لا ولو مش جوا هفضل وسط الحمام شوية وبعدين اخرج واقفل الباب اللى هو نسى يقفله ده فتحت الباب وشوفت اسوء منظر شوفته فى حياتى مش هقول يا ريتنى ما فتحت لا الحمد لله انى فتحت علشان اشوفه على حقيقته هو حتى مخدش باله انى واقفة مشغول بقى ومش فاضى
انا نزلت وطلبت من اهلى نرجع بيتنا وقررت انى هفسخ الخطوبة طبعا بس كنت محتارة اقول اللى شوفته ولا لا وفى الاخر قررت انى مقولش ربنا سترهم مين انا علشان افضحهم
بعت لتامر رسالة كتبتله فيها
ابقى تعالى خد شبكتك والدبلة لان خطوبتنا خلاص انتهت انا مش هربط مصيرى بمصير انسان خسيس زيك متحاولش تتكلم معايا او ترجعنى عن قرارى والا هقول للكل انا شوفت ايه فى غية الحمام اللى انت نسيت تقفل بابها عليكم وافسخ الخطوبة برضه بس بفضيحة ليك وليها
انت احقر خلق الله والحمد لله ان ربنا كشفك ليا على حقيقتك
وقولت لاهلى تانى يوم انى عايزة افسخ الخطوبة لانى مش مرتاحة وبحلم بكوابييس وقلبى مقبوض
انا مكدبتش انا قلبى بيتقبض كل ما اتخيل انى كان ممكن مشوفوش واكمل فى الخطوبة واتجوز واحد زيه
وحلمت بكوابيس طول الليل اشوفه هو وهى فى كوابيس واكيد انا خلاص مش مرتاحة معاه بعد اللى شوفته هو انا كمان بقيت بقرف منه وبحتقره بس مقولتلهمش ده
طبعا اهلى حاولو يقنعونى اديله فرصة تانية او حتى اتكلم معاه فى كل اللى انا حسا بيه ده يمكن نلاقى حل سوا قولتلهم انى مش عايزة اديله فرصة تانية ولا عايزة اتكلم واحسن ننهى كل حاجة واحنا لسه فى الاول كده بابا اللى اداله حاجته انا رفضت اخرجله مكنتش عايزة اشوف وشه
وعملتله بلوك فيس وواتس وحطيت رقمه بلاك ليست هو حتى جرب يكلمنى من ارقام غريبة مجرد ما بسمع صوته واعرف ان هو بقفل فى وشه السكة وبحط الرقم اللى كلمنى منه بلاك ليست لحد ما جالى النهاردة عند شغلى انا حذرته للمرة الاخيرة لو فكر يجيلى تانى او يتعرضلى هعرف الكل انا فسخت الخطوبة ليه واولهم عمه خليه يربى بنته كل اللى معملتوش اول مرة هعمله لو ورانى خلقته تانى
بس لانه غلطان وجبان مورانيش وشه تانى اكيد خاف انفذ تهديدى ويمكن فهم ان خلاص مفيش حاجة ممكن يقولهالى تغير رايى
بعد اربع شهور من فسخ الخطوبة خالى ومراته كانو عندنا انا من بعد فسخ الخطوبة مبقتش اروحلهم لانى لا عايزة اشوفه ولا اشوفها المهم مرات خالى كانت بتتكلم معايا انا وماما
فاطمة :بنتك دى فيها حاجة لله يا سمية اه والله دى ربنا نجدها يا اختى من الوقعة السودا اللى كانت هتقعها
سمية :ليه حصل ايه
فاطمة :عريس الغفلة اللى سابته اتفضح فى المنطقة كلها هو وبنت عمه البت سمر ولا ابوه ولا عمه ولا امه ولا حد فى اخواته عارف
يرفع عينه فى الناس بعد اللى حصل
سمية :وهو ايه اللى حصل يا فاطمة
فاطمة :الست منيرة كانت طالعة السطح تحط اكل ومياه للفراخ بتاعتها انتى عارفة هى مربيا فراخ حطاهم فى عشة على سطح العمارة
سمية :عارفة عارفة المهم ايه اللى حصل
فاطمة :فرخة من بتوعها خرجت من العشة ودخلت غية الحمام بتاعت عريس الغفلة راحت تجيبها شافته هو وبنت عمه فى منظر لا مؤاخدة يعنى ربنا يستر على وليانا يا رب
ومن عندها راحت مصوتة ولما العمارة كلها عليهم
ابوه طبعا حكم عليه يكتب عليها وهو كان رافض تخيلى بس عمه تعب فابوه قاله لو متجوزتهاش انسا ان ليك اب فكتب عليها غصب عنه البت بقى كانت فرحانة عديمة الدم مهمهاش انها فضحت ابوها وفضحت نفسها
لا بنتك دى بجد فيها حاجة لله انها قالت مش مرتاحة قلبها كان حاسس انه انسان عديم الاخلاق كده يعمل كده فى بنت عمه العيلة
سمية :عيلة ايه بقى بعد اللى عملته ده يلا ربنا يسترها على بناتنا ويحفظهم يا رب
ساكتة ليه يا رؤى اوعى تكونى زعلانة عليه ده ربنا نجدك منه يا بنتى ده انسان معندوش دين ولا اخلاق
رؤى :ازعل ايه بس يا ماما وانا اللى سيباه ده ميتزعلش عليه ده احمد ربنا انه بعده عنى وخرجه من حياتى انا بس معنديش حاجة اقولها فبسمعكم
فاطمة :واحنا جاينلكم النهاردة كانو بيعزلو من العمارة بعد الفضيحة اللى حصلت مبقالهمش عيش فى المنطقة خلاص
انتى عارفة بناتهم كتير وبعد الفضيحة دى محدش هيهوب ناحية بيتهم يطلب بنت من بناتهم دى نيرمين اختها الكبيرة خطيبها سابها بعد اللى حصل ده
سمية :الشهادة لله هما بناتهم كويسين غيرش بس البت سمر دى هى اللى كانت شاكلها كده ضاربة ومختلفة عنهم
فاطمة :محدش هيقول كده يا سمية هياخدو اخواتها بذنبها هيقولو اكيد زيها
سمية :ربنا مبيظلمش حد بس الناس بتظلم واديهم رايحين مكان تانى ربنا يسترها عليهم بقى
فاطمة :امين
سمية وهى بتحضن رؤى :الحمد لله ان ربنا نجاكى يا بنتى
يعنى انا شوفته ومفضحتوش وهو بدل ما يبطل ويقول ربنا سترنى المرة دى الله اعلم هيسترنى تانى ولا لا ويخاف ويتوب لربنا لا بكل بجاحة فضل مكمل فى غلطه لحد ما ستر ربنا اتشال من عليه
وسمر دى كمان يستاهل هو كل اللى عملته ده تغضب ربنا وتوطى راس ابوها فى التراب وتتفضح وتعمل لاخواتها سمعة زبالة بسببها وتوقف حالهم علشانه علشان يتجوزها وفرحانة ومش فارقلها كل ده ومش فارقلها ان حتى هو مكنش عايز يتجوزها وابوه غصبه مش فارقلها ان كلهم شايفينها رخيصة واولهم هو خسرت كل حاجة ومع ذلك فرحانة وحاسة بالانتصار بكرة تفهم هى عملت فى نفسها ايه لما يوريها الجحيم على الارض واهلها مش هيقفوله هى اللى اختارته هى اللى ضحت بكل حاجة علشانه ومحدش هيدخلها فى حاجة وهو هيبيع ويشترى فيها لان هى اللى رخصت نفسها واللى ترخص نفسها محدش بيغليها هى دلوقتى شيطانها عاميها عن الحقيقة وفرحانة انها عملت اللى فى نفسها وبقت على اسمه بكرة تشرب الندم كاسات كاسات بكرة تدفع تمن غلطها غالى
بعد شهرين يعنى كان فات ست شهور على فسخى للخطوبة اتقدملى عريس كان اتقدملى كام واحد قبل كده وانا رفضت وبابا قدر انى محتاجة وقت بس المرة دى مصر اقعد معاه هو شايف ان عدا وقت كفاية كمان اللى متقدم ابن عمتى ومينفعش يقولهم لا كده عمتى تزعل وادم كمان يزعل هو الصراحة مش فاهمة ايه اللى يزعل عادى ادم اخره فى كلامه معايا اذيك الحمد لله وخلاص يعنى مش هيتكسر قلبه لو رفضت
بس هو انا لحد امتى هفضل رافضة اشوف حد خايفة اكرر التجربة وافشل تانى هفضل لحد امتى خايفة قررت انى هواجه خوفى ومش هسيبه يتحكم فيا ويشل حياتى
جه ادم لوحده علشان نتكلم مع بعض
ادم :اذيك يا رؤى عاملة ايه
رؤى :انا بخير الحمد لله وانت
ادم :انا تمام الحمد لله..هو انا مش عارف بيتقال ايه فى المواقف اللى زى دى فلو عندك سؤال تساليه او لو حبا تتكلمى فى حاجة اتفضلى
رؤى :انت اول مرة ليك تقعد مع واحدة متقدملها
ادم :انا اول مرة اتقدم لعروسة اصلا
رؤى :نعم ده اللى هو ازاى
ادم :زى السكر فى الشاى يا رؤى عادى
رؤى :عندك تسعة وعشرين سنة ومتقدمتش لعروسة واحدة بس حتى ليه كنت شايف ان لسه بدرى
ادم :مكنش ينفع قبل ما اخواتى البنات يتجوزو واطمن عليهم انتى عارفة من بعد موت بابا انا راجلهم وبعد ما جوزتهم كنت محتاج وقت اكون نفسي بحيث ابقى قادر اتجوز وافتح بيت
رؤى :اخر واحدة فى اخواتك اتجوزت من سنتين كل ده كنت بتكون نفسك
ادم :لا ظروفى كانت بقت تمام وينفع على الاقل اخطب من سنة
رؤى :ومخطبتش ليه
ادم :انتى اتخطبتى
رؤى :وايه المشكلة فى انى اتخطبت
ادم :لا رؤى الله يباركلك ركزى معايا بقولك كان ينفع اخطب ومخطبتش لانك اتخطبتى يبقى ايه
رؤى وهى بتفكر :يبقى انت كنت عايز تخطبنى صح
ادم :صح
رؤى :ومقولتش ليه
ادم :علشان مينفعش اقول اقول ايه وانا مش ضامن ظروفى ولسه عندى تلت اخوات بنات اتجوز فيهم واحدة بس فى حياة بابا وفاضل اتنين اربطك جمبى ازاى
سكت لانى مكنش ينفع اتكلم دعيت ربنا وبس وحاولت اركز فى شغلى علشان احسن ظروفى بسرعة واتقدملك
رؤى :ولما اتخطبت محستش انك غلطت لما ما اتكلمتش
ادم :انا عارف انى عملت الصح اللى يرضى ربنا ولما اتخطبتى رغم كل دعايا وتعبى فى شغلى علشانك قولت يمكن انا مش خير ليكى
رؤى :ويمكن انا مش خير ليك
ادم بابتسامة :معتقدش انتى خير لاى حد تكونى معاه
لما اتخطبتى رضيت وقولت كل اللى بيحصل خير لانه من عند ربنا وانا مسلم لله امورى كلها وعارف ان سبحانه مش هيضيعنى
رضيت بالامر الواقع واتمنتلك الخير مع اللى اتخطبتيله
وكنت بدعى لربنا يربط على قلبى ويصبرنى ويعوضنى دعيته ان لو ده اختبار يقوينى انى انجح فيه
لحد ما خطوبتك اتفسخت كان فى نار فى قلبى رغم كل دعايا لربنا ومحاولتى انى اصبر وارضى مكنتش بتنطفى منطفتش غير لما خطوبتك اتفسخت كنت هتقدملك بعدها على طول بس عرفت من ماما انك رفضتى عريس اتقدملك وقولتى لخالى انك محتاجة وقت فقررت اصبر شوية كمان واهو اللى خلانى استنيت السنين دى كلها يخلينى استنى كام شهر كمان
رؤى :هو انت بتفكر فيا من قد ايه بالظبط
ادم :خمس سنين واربع شهور واسبوع بالظبط
رؤى :واو مدة طويلة
ادم :واطول على اللى عاشها المهم انتى رايك ايه
رؤى :والله يا ادم بعد اللى انت قولته ده ممكن اتقدملك انا عادى
ادم وهو بيضحك :افهم من كده انك موافقة
رؤى :اللى ترفض واحد اتقى ربنا فيها بالشكل ده زيك تبقى غبية وانا مش غبية
انا موافقة شوف مع بابا هتجيب عمتو وعمى مصطفى عمك امتى وتتفقو على تفاصيل الخطوبة
ادم :خطوبة ما تخليها كتب كتاب الهى تنسترى ويفرح قلبك يا رب
رؤى وهى بتضحك :انت كده بتشحت مش بتقنعنى..كمان انا محتاجة وقت اعرفك وتعرفنى كتب الكتاب ده خطوة مش سهلة بس اوعدك فترة الخطوبة مطولش خصوصا لو كنت مرتاحة
ادم :ان شاء الله تكونى مرتاحة دايما ماشى هقبل بخطوبة احنا كنا فين وبقينا فين اهو كده احسن برضه
رؤى :احسن كتير صدقنى انت مش متخيل كلامك فرق معايا ازاى
كلام ادم طمنى ان مش كل الرجالة زى تامر اللى مصانش عرض عمه اللى مكنش امين على بنت عمه اللى خانى واحنا مخطوبين
وان زى ما فيه تامر فى الدنيا برضه فيه ادم الانسان اللى حبنى ومتكلمش شاف انه مش من حقه يربطنى جمبه وهو مش ضامن ظروفه ومفكرش حتى مجرد تفكير انه يرتبط بيا ويعرفنى اللى جواه علشان ميغضبش ربنا
اللى مغضبش وقال ليه يا رب لما اتخطبت اللى فضل بيحاول يعمل اللى يرضى ربنا رغم وجع قلبه
خمس سنين واربع شهور واسبوع فضل كاتم مشاعره جواه كل ده مدة طويلة بصراحة ان مشاعره تفضل زى ما هيا ومتتغيرش وان حتى شيطانه ميوزوش انه على الاقل يعرفنى انه بيحبنى قدر يتحكم فى نفسه كل ده قدر يتقى ربنا فيا وفى نفسه كل ده مش عارفة لو كنت مكانه كنت هقدر اعمل كده ولا لا ادم بجد انسان قوى
اتخطبنا تلت شهور وكتبنا الكتاب اربع شهور وبعدين اتجوزنا وخلفنا مريم ورضوى وملك
ادم بيحاول دايما يرضى ربنا فى علاقته باهله او بيا او باهلى وحتى فى تربية بناتنا ادم دايما بيفكر ايه اللى يرضى ربنا ويعمله وايه اللى يغضب ربنا وبيحاول يبعد عنه
بيغلط طبعا لانه بشر بس بيستغفر وبيتوب وبيدعى ربنا يقبل توبته ويقربه منه بيدعى ربنا يرشده للطريق الصح دايما
بيقولى ربنا هو الملاذ انا مليش غيره يا رؤى
ادم معاه حق ربنا هو ملاذنا واحنا كلنا ملناش غيره
فكرو دايما فى ربنا وحاولو تقربو منه وتعملو اللى يرضيه ولو غلطو استغفرو وتوبو لو بعدتم عن طريقه ارجعو
وخليكم فاكرين ربنا هو الملاذ💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا