ندى :سارة انتى قولتى لملك انى فاشلة ولعبية وبتاعت مصلحتى ومستغلة كمان
سارة :هو
ندى قاطعتها :لا استنى ملك انتى قولتى لسارة انى بتاعت ولاد وخرباها وعاملة فيها خضرة الشريفة عليكم والحقيقة انى مش كده خالص
ملك :هقولك هو..
ندى :لا تقوليلى ولا اقولك انا حبيت اواجهكم مرة واحدة واخلص على فكرة يا سارة ملك زى ما كانت بتتكلم عنى وحش معاكى كانت بتيجى تتكلم عنك وحش معايا الفرق ان انا مكنتش بتجاوب معاها ولا بصدق كلامها وانتى كمان يا ملك سارة كانت بتيجى تتكلم عنك وحش معايا زى ما بتتكلمو عنى وحش مع بعض يعنى مش كفاية انى بعيد السنة لا كمان لما اتصاحب على بنات يطلعو بنات لتاتة زيكم على فكرة انتو شبه بعض انا اللى مش فاهمة اتصاحبت عليكم ازاى وانتو زبالة كده اللى بيجرى فى عروقك منك ليها ده مش دم دى مية مجارى كتكو القرف بنات معفنة لو واحدة فيكم بس حاولت تتكلم معايا همسح بكرامتها بلاط الكلية لا بلاط الكلية ايه همسح بكرامتها بلاط الجامعة بلاطة بلاطة كتها نيلة اللى عايزة اصحاب يغورو الصحاب لو كلهم زيكم كده
علمت عليهم وسبتهم ومشيت اتصاحبت عليهم من شهرين بس كانت صحوبية منيلة بنيلة يعنى انا اللى قدى اتخرجو واتجوزو وفيهم اللى معاها خديجة ومالك دلوقتى
وانا هنا وقعت فى بنات نمو عقلهم واقف عند اولى ثانوى ولسه بيتكلمو وحش عن بعض فى ضهر بعض ايه مش كبرو على الجو الخنيق ده
كده ندوش رجعت تانى لوحدها مش مهم الوحدة الصادقة خير من الاصدقاء العرة اللى ملهمش امان
خرجت من الكلية لقيت صبرى ابن خالى مستنينى عند باب الجامعة هو مش ابن خالى لزم هو والده يبقي ابن عم ماما ومعتبرنى حب مراهقته وشبابه صبرى مهندس كمبيوتر شاطر جدا فى شغله بس فاشل جدا فى التعامل مع العالم الخارجى غير الكمبيوتر هو ملوش صحاب
صبرى بابتسامة :ندوش اخبارك ايه وحشتينى
ندى :صبرى يا اخرة صبرى اولا بطل تقولى ندوش ثانيا مينفعش تقولى وحشتينى
صبرى :ليه انا مش بكدب انتى وحشتينى
ندى :يا عم وانا مالى واوحشك بتاع ايه
يعنى يا صبرى انت مبتعرفش تتكلم مع جنس مخلوق كلمتين على بعض وبتيجى عندى وتقلب بربنط والكلام بيطلع منك لوحده
صبرى :علشان بحبك مش ناوية تقبلى نتجوز بقى انا اتقدمتلك تلت مرات لحد دلوقتى وانتى كل مرة بترفضى
ندى :وده ملفتش نظرك لحاجة
صبرى :حاجة ايه
ندى :انى مش قابلة يا صبرى اننا مش مناسبين لبعض
صبرى :ليه بقى
ندى :مش عارفة بس انا مش حاسة اننا مناسبين لبعض
صبرى :احساسك مش كفاية ممكن يكون غلط الصح انك تجربى الاول وتدينى فرصة
ندى :يعنى اتجوزك ونخلف تلت اربع عيال علشان اعرف اذا كنا مناسبين لبعض ولا لا
صبرى :طبعا التجربة هى الحكم السليم بنا
ندى :حكم سليم ايه بس هو ماتش كورة صبرى انت عارف انا هنا ليه
صبرى :علشان عندك محاضرات بقالى ساعتين مستنيكى تخرجى
ندى :صح عندى محاضرات لانى بعيد السنة تفتكر دى مش حاجة تخليك تشلنى من دماغك وتدور لاحلامك على بنت تليق بيها انا منفعش فتاة احلامك يا صبرى مستاهلش تقف ساعتين تستنانى الدنيا فيها بنات كتير اختارلك منهم واحدة
صبرى :مش عايز من بنات الدنيا غيرك
ندى :اموت واعرف بيروح فين كلامك ده مع بقية بنات العيلة اللى هيموتو ويعرفو صوتك تخين ولا رفيع
صبرى :من صغرنا وانا مبعرفش اتكلم مع حد غيرك
ندى :اديك قولتها بنفسك صغرنا دلوقتى احنا كبرنا يا صبرى
صبرى :كبرت وحبى ليكى كبر معايا
ندى :يعنى اصرخ والم الناس واقول متحرش ولا اعمل ايه بس يا ربى
صبرى :هو انتى بتحبى حد تانى
ندى :لا تانى ولا تالت انا مبحبش حد
صبرى انا بس مراعية انك ابن خالى وعلشان كده ساكتة والصراحة لو قولت لبابا انك بتجيلى عند الجامعة هيقعدنى من الكلية هو مش طايقنى علشان بعيد السنة وهو ما هيصدق وانا برغم كل شئ عندى امل اتخرج من الكلية واخلص
الله يباركلك يا صبرى يقعدلك فى عافيتك واهلك يا رب حل عن سمايا وارحمنى وارحم نفسك
صبرى :يا ريت كان بايدى يا ندى كنت عملت كده انا مش شايف فى الدنيا بنات غيرك حاولت ابعد والله ومقدرتش كلامك اللى زى السم ده وكرهك ليا اهون عندى من بعدى عنك
ندى :يا صبرى افهمنى انا مش بكرهك انت انسان كويس جدا محترم وشاطر فى شغلك وخام وملكش تجارب عملة نادرة يعنى انت ابن خالى وانا بعزك والله
ومش سهل عليا اسمعك كلام يضايقك بس مانا مش عارفة اعمل ايه
صبرى :وافقى نتخطب
ندى :يا صبرى انا بزهق بسرعة بمل ممكن اوافق على الخطوبة وبعد شهرين احس انى عايزة افسخها ممكن النهاردة احبك وبكرة احس انى مش طيقاك هلهوتا يعنى انا بحميك منى
صبرى :هلهوتا هلهوتا انا راضى ويا ستى متحمنيش منك انا عايزك زى ما انتى لو طلبتى نفسخ الخطوبة انا مش هوافق هسمع من ودن واطلع من التانية لو قولتيلى بكرهك ومش طيقاك مش هصدقك هتخنقينى يومين وهتفرحينى يومين حياتى معاكى مش هتبقي كلها وحشة وعارف انك هتعوضينى حتى لو هعانى من تقلباتك المزاجية انا قابل حتى احس ان حياتى بيحصل فيها حاجة بدل ما انا حاسس انها واقفة كده
ندى :يعنى انت شايف ان انا اللى هحركلك حياتك الواقفة دى
صبرى :اينعم
انا بحبك يا ندى وقابل بيكى زى ما انتى وبحبك زى ما انتى
ندى :مش هيجى يوم تكرهنى مش هيجى يوم تتعب منى وتسبنى
صبرى :انا مقدرش اكرهك انتى متتكرهيش انتى تتحبى بس
يمكن يجى يوم واتعب بس حتى لو حاولت ابعد مش هقدر
انتى عندك كام اب وام
ندى :ايه السؤال ده اب واحد وام واحدة طبعا
صبرى :ممكن يجى يوم وتبدليهم بحد او يبقي عندك اب وام تانيين معاهم
ندى :لا طبعا مستحيل
صبرى :اهو انا بقي شايفك كده عندى اب واحد وام واحدة وبنت واحدة بس شايفها حبيبتى ونفسي تبقى مراتى زى ما ابويا وامى ملهمش بديل انتى كمان ملكيش بديل عندى
ندى :انا معملتش حاجة تخليك تعتبرنى كده
صبرى :عملتى كتير من صغرنا وانتى مكنتيش زى الباقين اللى كانو بيتريقو عليا او بيسبونى لوحدى وخلاص
انتى كنتى بتيجى تتكلمى معايا حتى لو مرديتش وبتلعبى معايا سنين وانتى بتكلمينى حتى لو ردى كان بسيط لحد ما اتعلمت اتكلم معاكى وكلامى معاكى بقا مبيخلصش
حتى لما كبرنا وكنت حاسس انى فاشل علشان مش عايز ابقى دكتور زى ما بابا كان عايز انتى اللى شجعتينى ابقى مهندس كمبيوتر وقولتيلى انى علشان اكون ناجح مش لازم ابقى دكتور المهم اعمل الحاجة اللى بحبها وشاطر فيها علشان اكون ناجح وسعيد فى حياتى
وافقى يا ندى هتقدملك مرة رابعة ووافقى لو رفضتى انا مش هيأس هفضل بدعى ربنا يجعلك تحبينى نص ما بحبك حتى وهتقدم خامس وعاشر وعشرين كمان هتقدم لحد ما توافقى
ندى :خلاص ماشى
صبرى :ماشى ايه
ندى :ماشى هوافق لما تتقدم شكلى بقى وحش فى العيلة انت عارف بقو مسمينى جولييت ومسمينك مجنون ندى اهو اوافق بقى واخلصنا من كلامهم ده
صبرى :مجنون ندى مجنون ندى انا راضى المهم انك وافقتى
ندى :خلاص مش عملتلك اللى انت عايزه امشى بقا وخلينى اروح بقالنا كتير بنتكلم فلسعت المحاضرة على الفاضى
صبرى :انتى كان عندك محاضرة وسبتيها
ندى :اه
صبرى :سبتيها ليه
ندى :زهقت
انا لما بزهق بمشى خلى بالك
صبرى :وانا لو مشيتى هاجى وراكى خلى بالك
ندى :بشوقك انا عملت اللى عليا وحذرتك وانت اخترت
صبرى :ومتأكد من اختيارى الحق اروح علشان اخلى بابا يفاتح عمى سليم والدك رابع فى موضوعنا المرة الرابعة والاخيرة بأذن الله
واتقدم صبرى للمرة الرابعة ووافقت واتخطبنا
صبرى مكنش سايبلى فرصة ازهق كان بيكلمنى كتير بيجبلى هدايا بياخدنى انا واخواتى واخواته ونخرج علشان بابا مكنش بيرضى نخرج لوحدنا
مصدق وافقت واديته فرصة وهو مسك فيها بايديه وسنانه
بعد خمس شهور
صبرى :لا الله يباركلك زهق من المذاكرة ايه احنا داخلين على امتحانات عمى سليم قالى مفيش جواز غير لما تتخرجى
ندى :دبسك يعنى ابويا ده مش سهل برضه
صبرى :يا ستى انا راضى ادبس
ندى حبيبتى دى اخر امتحانات فى حياتك بعدها هتبقى حرة نفسك لا محاضرات ولا شيتات ولا امتحانات
اقولك انا هزغلل عينك
ندى :هتزغلل عينى ازاى بقى
صبرى :فاكرة الكرسى اللى شبه المرجيحة ده اللى كنتى مشيرا صور ليه
ندى :فاكراه طبعا
صبرى :هجيبه فى شقتنا نحطه فى الفراندة بتاعتنا بس انتى انجحى السنة دى
ندى :وتجيبهولى
صبرى :واجبهولك وعد
ندى :ويكون لونه ابيض
صبرى :ويكون لونه ابيض
ندى :خلاص استبينا هقفل واقوم اذاكر
صبرى :هو ده عاش يا بنتى
تشجيع صبرى ليا خلانى بقيت بذاكر بقى مصدر طاقة ليا بستمد منه طاقتى كل ما احس انى طاقتى خلصت
بقيت بحاول مش علشان نفسي بس لا علشانه هو كمان واتخرجت واتجوزنا
بعد تلت شهور
ندى :لازم تطلب يزودو مرتبك انت تستاهل اكتر من اللى هما بيدهولك ده
صبرى :وافرضى رفضو
ندى :هددهم انك هتسيب الشغل وهما هيخافو ويقبلو هما محتاجين كفاءتك ومش هيخسروك انت بس اللى سكوتك طمعهم فيك ويا سيدى لو عملو كده وقتها تسيب شركتهم وتشوف شغل فى شركة تانية
صبرى :وافرضى ملقتش
ندى :هتلاقى وبسرعة كمان انا واثقة فى قدراتك انت مفيش زيك فى شغلك جمد قلبك بس وكلمهم بثقة
بعد تلت ايام
صبرى :ها تحبى نروح فين نحتفل بالترقية وزيادة المرتب اللى لولاكى مكنوش حصلو
ندى :لولا شغلك وشطارتك فيه مكنوش حصلو انا معملتش حاجة انا شجعتك بس انما البركة فيك وفى شغلك وعقلك اللى زى الماس ده
صبرى :كفاية تشجيعك كفاية انك فى ضهرى
تحبى نروح نتغدى فى مطعم ولا نروح مول نلف شوية ونتغدى هناك
ندى :ما تيجى نروح مسمط
صبرى :مسمط
ندى :اه مسمط زهقت من المطاعم الشيك الحلوة نروح مسمط كده نتغدى غدوة حلوة هناك
صبرى :ماشى يا ستى مسمط مسمط
بعد شهر
ندى :بقول ايه
صبرى :قولى
ندى :ما تيجى ناخد اجازة من بعض
صبرى :اجازة من بعض ازاى يعنى
ندى :يعنى انا اروح بيت اهلى كام يوم وانت كمان اهو نوحش بعض تفتقدنى وافتقدك نتكلم فى الموبايل نرجع ذكريات الخطوبة
صبرى :هو طبعا انا مش عايزك تبعدى عنى يوم واحد حتى بس لو ده هيخليكى مبسوطة ماشى روحى بيت اهلك كام يوم
ندى :وانت
صبرى :لا انا مش هسيب شقتنا وكام يوم كده وهاجى اخدك
بعد يومين
صبرى :بسم الله الرحمن الرحيم
ندى :ايه شوفت عفريت
صبرى :لا اتخضيت لما لقيتك فى البيت
انا مش موديكى لاهلك امبارح يا بنتى لحقتى زهقتى كمان مقولتليش ليه كنت جيت جبتك
ندى :مزهقتش بس انت وحشتنى معرفتش اقعد معاهم من غيرك فجتلى فكرة تانية
صبرى :فكرة ايه دى قولى واشجينى
ندى :انا هنام فى اوضة الاطفال وانت نام فى اوضتنا
صبرى :ماشى موافق المهم انك رجعتى البيت ملوش طعم من غيرك
بالليل
ندى :ايه ده فى ايه
صبرى :ايه هنام على السرير التانى
ندى :يا سلام وكده نبقى عملنا ايه بقى
صبرى :هو يعنى لازم انتى فى اوضة وانا فى اوضة مش كفاية انتى على سرير وانا على سرير مانا مش قابل صراحة تكونى معايا فى البيت وانتى فى اوضة وانا فى اوضة
ندى :خلاص ماشى ...صبرى هو انت زهقت منى زهقت من جنانى ده يعنى
صبرى :ليه بتقولى كده
ندى :اصلى كنت بفكر انك ممكن تكون زهقت او تكون بسبب هطلى ده حاسس انى ممكن يجى يوم واسيبك او حتى تكون مفكر انى بحبك علشان اللى انت بتعمله علشانى وانك لو بطلت تعمله انا هسيبك هو انت حاسس بحاجة من دول
صبرى :اوقات بحس بالتعب الصراحة بس انتى بتعوضينى بحاجات تانية بتعمليها علشانى واوقات بخاف تسبينى
ندى وهى بتقوم تنام جمبه :بس انا مش ممكن اسيبك انا بحبك حتى لو رتابة حياتنا حسستنى بملل برضه ده ميمنعش انى بحبك وانى مش هفكر اسيبك بس هفكر اعمل ايه اضيع بيه الملل ده
هو انت مش زيى مبتملش يعنى
صبرى وهو بيضحك :هو الصراحة انتى مش سيبالى فرصة احس بملل كل شوية تطلعيلى بفكرة جديدة مجنونة اكتر من اللى قبلها بس عارفة قبل ما اخطبك كنت حاسس بملل جامد الحاجة الوحيدة اللى كانت بتكسر الملل ده فى حياتى هو انتى كلامك معايا وطريقتك وتفكيرى فى انى ازاى اكسب قلبك كان بيضيع الملل اللى انا حاسس بيه كان بيعمل نوش فى حياتى كده
ندى وهى بتضحك :نوش انت بتقعد معايا كتير وده خطر مصطلحاتك باظت خالص
صبرى وهو بيضحك :يا ستى باظت باظت فداكى بس جيتى نمتى جمبى يعنى مش قولتى عايزة تجربى حاجة جديدة
ندى وهى بتحضنه :اعمل ايه بقى مبقدرش على بعدك
بقول هبعد لما احس بزهق ومجرد ما ابعد خطوة واحدة بعيد عنك بتوحشنى وبرجع الخطوة اللى بعدتها عارف قبل ما تدخل عليا كنت بفكر انى من بكرة هرجع انام فى اوضتنا واللى منعنى اجى انام جمبك من دلوقتى ان شكلى هيبقى فانلة جدا وانا برجع فى كلامى من اول يوم كده
تقدر تقول كده انا بزهق من كل حاجة فى حياتى ما عدا انت يا صبرى هجرب حاجات جديدة وانت معايا وانت جمبى مش هعرف اكون بعيد عنك زى ما انت مش شايف لنفسك حبيبة وزوجة غيرى انا كمان مش شايفة لنفسى حبيب وزوج غيرك
صبرى :دى اوضة الاطفال بتخليكى تقولى كلام حلو لا كده ننام فيها كل يوم عادى
ندى :صبرى يا اخرة صبرى يا احلى واغلى اخر لصبرى انا بحبك
صبرى :خلاص قرار لا رجعة فيه احنا هنام فى اوضة الاطفال كل يوم من هنا ورايح دى سرها باتع دى خلتك نطقتى يا بنتى
ندى وهى بتضحك :يا سلام ولما نخلف عيال يا ناصح
صبرى وهو بيضحك :نبقى نفرشلهم ينامو فى المطبخ
الزهق ده عامل زى الوحش بيقضى على حاجات كتير اوى
لو الزهق دخل من الباب الحب بيهرب من الشباك
الزهق بيخلى فرحتنا بالحاجة تروح حتى لو كانت الحاجة دى حلم وصلناله بطلوع الروح
لازم نقاوم الزهق نجرب حاجات جديدة نعمل حاجات مختلفة حتى لو كانت مش شبهنا
فى ناس ممكن تبطل تحب بعض بسبب الملل قالو لبعض كل حاجة عملو مع بعض كل حاجة فخلاص بيحسو انهم جابو اخر قصتهم واحدة واحدة حبهم لبعض بيختفى بيندفن
لازم دايما نجرب حاجات جديدة مع بعض نغير دم علاقتنا باستمرار
جملة احنا عمرنا مبنزهق من بعض دى مش حقيقية احنا هنزهق لو مش دلوقتى فبعدين بعد سنة اتنين عشرة حتى هنزهق وقتها لازم نقاوم الزهق علشان ميدفنش الحب اللى جوانا وميفضلش غير خنقة وملل مخلينا مش طايقين بعض او يخلونا غصب عننا ننجذب لناس تانية
الدنيا واسعة وفيها مية الف حاجة مجربتوهاش لما تحسو بالزهق جربو حاجة فى المية الف حاجة اللى مجربتوهمش فى الدنيا متخلوش النهاردة شبه امبارح وبكرة شبه النهاردة وفى الاخر تقولو هو احنا مش سعدا ليه فكرو تعملو ايه علشان تبقو سعدا تعملو ايه تقاومو بيه الزهق لان الزهق وحش لازم دايما نحاربه ومنستسلملوش💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا