هيثم :صباح الخير
نغم :صباح النور
هيثم :اخبارك ايه يا نغم
نغم :الحمد لله
بعد اسبوع
هيثم :صباح الخير
نغم :صباح النور
هيثم :اخبارك ايه يا نغم
نغم :الحمد لله
هيثم :نغم استنى
نغم :نعم
هيثم :هو انتى هتطلعى رحلة اسكندرية
نغم :لا مش هطلع
هيثم :اصل انا طالع
نغم :وتفتكر ده سبب يخلينى اطلع
هيثم :هو انتى بتعاملينى برخامة كده ليه
نغم :وانا اعاملك بشكل تانى ليه اخويا قريبي جوز خالتى ابن جوز امى طيب
هيثم :لا بس احنا زمايل يعنى واصحاب
نغم :احنا لا زمايل ولا اصحاب وكويس بقي ان جاتلى الفرصة اتكلم انت تبطل تقولى صباح الخير واخبارك ايه اللى ماسكلى فيهم بقالك شهرين دول انا برد على قد السؤال وبقول مسيره يفهم انى مش عايزة اتكلم معاه وعلشان كده برد بالقطارة وانت مبتفهمش فعلى بلاطة كده بطل تتكلم معايا لانى مش هرد عليك
هيثم :ليه
نغم :يا دى النيلة عليا هو ايه اللى ليه
هيثم :ليه مش عايزة تتكلمى معايا
نغم :بص يا نجم الدفعة يا معشوق البنات انت انا مش عايزاك تركز معايا واهتمامك بيا ده مش فارقلى بالعكس ده مضايقنى ومكرهنى فى الكلية اكتر ما انا بكرهها فياريت تفكك منى وتركز مع واحدة غيرى ماشى الجو الملزق ده انا مليش فيه
هيثم :جو ايه بس انا عايز اتعرف عليكى يمكن يحصل بنا حاجة حلوة
نغم بابتسامة صفرا :يا عسل يمكن يحصل بنا حاجة حلوة
لا مش هيحصل حاجة حلوة انا مبتعرفش يا كابتن انا اللى عايز يعرفنى يجى فى بيت اهلى يعرفنى والكلام ده مش ليك لانى مش عايزاك تتقدملى
هيثم :ليه بقى ان شاء الله
نغم :لانك قدى وانا مش هعيل كمان انا مش عايزة حاجة تفكرنى بالدفعة الزبالة دى مش عايزة حاجة من ريحتها
فكك منى بقى وروح شوفلك واحدة غيرى اتعرف عليها يمكن تحصل بينكم حاجة حلوة واهو الهبل حواليك كتير وهيصدقو كلامك العبيط ده وهيتشقطو عادى انما انا لا ولو مسبتنيش فى حالى هعملك مشاكل ويمكن حتى اشتكيك لعميد الكلية فخودها من قصيرها يا ابن الناس وحل عن سمايا احسنلك
نوران :يعنى طيرتى الكراش من ايدك يا خايبة
نغم :كراش ايه انتى كمان هيثم ده عيل نايتى اصلا ده انا ارجل منه
نوران :بس قمر لما ورتينى صورته ساعة مبعتلك طلب صداقة ورفضتيه كان قمر فى الصورة جان كده وجنتل
نغم :انا عملتله بلوك ساعتها مش بس رفضت طلب الصداقة كمان بقولك عيل نايتى وملزق هو انا ناقصة قرف
نوران :يا بنتى ما يمكن يكون كان ناوى يتقدملك
نغم :لا يا ناصحة هيثم ده واللى زيه فى الاول بيجيبو رجلك بانهم يقولولك نتعرف واللي فيه الخير يقدمه ربنا
وفى الاخر يقولك انتى تستاهلى حد احسن منى
وهو مش غلطان انتى اللى غبية ورخصتى نفسك ومستنية من واحد خسيس انه يغليكى
كمان انا بكره كليتى وبكره دفعتى ومش عايزة اى حاجة تفكرنى بالسنين البيضا اللى قضيتها فى الكلية
نوران :انتى مبتحبيش كليتك
نغم :انا مش بس مبحبهاش انا بكرهها ولو فى حاجة اكبر من الكره هتبقي شعورى ناحية كليتى
انا مفيش يوم واحد روحته الكلية غير وانا غاصبة نفسي اروح حتى ايام الامتحانات بحس انى بجر رجلى جر وانا رايحة مفيش يوم ينفع اغيبه غير وغيبته مفيش يوم روحته غير وانا بسأل نفسي انا بعمل ايه هنا وانا بدعى ربنا يخلصنى منها على خير
نوران :انتى بتكرهيها علشان ملكيش صحاب فيها
نغم :بكرهها علشان هى تتكره بس يمكن لو كان ليا فيها صحاب كانو هونو عليا الخنقة اللى بحسها فى الكلية
انا بحس انى مش فى مكانى وانا هناك مبحسش كمان انى جزء من دفعتى انا فعلا مبطيقهمش عايزة اتخرج علشان اغور من وشهم واخلص من الكلية دى بقى دى مش كلية ده سجن انفرادى وسط الناس انتى عارفة انا بنام اقوم احلم باليوم اللى هتخرج فيه
نوران :هانت يا حبييتى كلها كام شهر وتتخرجى على خير
نغم :يا رب يا نوران
بعد سبع شهور
نوران :مبروك التخرج يا نغومتى
نغم :الله يبارك فيكى يا نوران بس قوليلى مبروك الافراج اخيرا بقيت حرة
نوران وهى بتضحك :ماشى يا ستى مبروك الافراج ومبروك عليكى حبيب القلب اللى اتقدم اخيرا
نغم :بنت عيب كمان حبيب قلب مين انا مبحبش حد
نوران :لا يا شيخة يعنى انتى مبتحبيش محمد ابن خالتك من اكتر من خمس سنين
نغم :هو كان باين عليا
نوران :باين طبعا انتى مبتشوفيش نفسك وانتى بتكلمينى عنه عينيكى بيبقي ناقص تطلع قلوب
نغم :وانا اللى كنت مفكرة انى مخبية
نوران :لو خبيتى عن الدنيا كلها مش هتعرفي تخبي عنى انا بس مرضيتش اخليكى تحكيلي ونتكلم عنه علشان مكبرش مشاعرك جواكى وفى الاخر ميكونش هو نصيبك وتتعذبى انتى
نغم :صح انا مقولتش لانى مكنتش عايزة اخليه حكاية مع نفسي وفى الاخر يطلع وهم او مش من نصيبي وابقي اذيت نفسي بنفسي
نوران :واهو فى الاخر بقي نصيبك يا ستى وربنا كرمك بيه لانك معبرتيش عن مشاعرك ومعملتيش حاجة غلط
نغم :الحمد لله انا فرحانة اوى
نوران :ربنا يفرحك كمان وكمان يا حبيبتى
يوم الخطوبة
محمد :انا فرحان اوى انك بقيتى خطيبتى وقريب هتبقي مراتى
نغم :وانا كمان ربنا يتمملنا على خير يا رب
محمد :انا همشى دلوقتى وبكرة هستأذن جوز خالتى اننا نخرج
نغم :مش هتقعد معايا شوية
محمد :العيال صحابى عايزين يحتفلو بيا بره كمان هعوضهالك بكرة هخرجك خروجة محصلتش
نغم :خلاص ماشى
بعد شهر
محمد :انا مش هعرف اجى معاكى خطوبة نوران صاحبتك
نغم :ليه بس مش احنا اتفقنا وظبط امورك على انك هتيجى معايا
محمد :انا واصحابى مسافرين سوا ومتفقين على السفرية دى من فترة انا اللي كنت نسيتها
نغم :طيب ما تاجلوها لبعد الخطوبة
محمد :مش هينفع انا ظبط امورى فى الشغل على السفرية دى
نغم :يعنى ظبط امورك فى الشغل على اساس سفريتك مع اصحابك وانا اولع مش مهم حتى مفكرتش ترجع اليوم ده تحضر معايا الخطوبة وبعدين ترجعلهم تانى
محمد :يا حبيبتى متزعليش انا..
نغم قاطعته :انا لازم اقفل يا محمد محتاجة انزل اشترى فستان علشان احضر بيه خطوبة اعز اصحابى اللى انت مش هتحضرها معايا مع السلامة
بعد عشر ايام
محمد :شوفتى جبتلك معايا ايه هدية من شرم علشان اصالحك
نغم :وتفتكر حتى لو صالحتنى انا هنسا انى روحت خطوبة نوران من غيرك واضطريت اكدب واقول انك فى سفرية شغل والحقيقة انك بديت سفرية مع اصحابك عليا لانى مش مهمة
محمد :ازاى تقولى كده انتى اهم حد فى حياتى انتى خطيبتى اللى هتبقي مراتى
نغم :بص يا محمد انا عارفة انك عارف انى بحبك
محمد :وانا كمان بحبك
نغم :سيبنى اكمل انت عارف انى بحبك ومفكر انك مهما عملت هتحمل وده حقيقي انا بحبك وهتحملك بس انا مش مضمونة لا انا ولا حبى
حبى ليه اخر ولو جبت اخره هتلاقينى بطلعك من حياتى بكل سهولة لدرجة انك هتشك فى انى حبيتك فى يوم لو جبت اخر طاقة تحملى مش هفضل معاك ساعة واحدة زيادة
ميغركش صبرى عليك نصيحة منى متضمنيش بدل ما تندم لما تلاقى انك خسرتنى
محمد :مش هخسرك ايه بس لازمة الكلام ده
نغم :انا مش هقولك كده تانى بس اسمع كلامى وافهمه يا محمد متضمنيش انا مش مضمونة وحبى ليك مش ضمان انى اتحمل عمايلك دى
ها ورينى بقا جبتلى ايه هدية
محمد باستغراب :انتى كده سامحتينى
نغم :اه واللى عليا عملته وكلمتك وفهمتك علشان لو حصل حاجة مندمش ولا الوم روحى لانى هبقي عارفة انى عملت اللى عليا واكتر كمان وبالتالى مش هندم
كمان انا مش بتاعت تهديد يا محمد انا بتاعت تنفيذ
كلامى ليك ده مش تهديد ولا مثلا بخوفك علشان تتمسك بيا انت لو متمسكتش بيا وخوفت تخسرنى من نفسك يبقي الخطوبة دى كلها متلزمنيش
انا زى ما قولتلك مش بهددك انا بفهمك او بوعيك او بوضحلك حاجة ممكن تكون غايبة عنك مش اكتر
المهم ورينى جبتلى ايه..الله حلوة اوى
محمد :مش احلى منك يا حبيبتى
بعد اسبوعين
محمد :انا همشى بقي
نغم :ليه بس ما انت قاعد معايا ومبقالكش ساعة جايلنا اصلا
محمد :معلش يا حبييتى انا اصلى مواعد صحابى نخرج النهاردة
نغم :لا خلاص روحلهم بدل ما تتاخر عليهم
محمد :هكلمك بالليل
نغم :تمام
بعد شهر
نغم :يعنى ايه مش هينفع تاخد بكرة اجازة ده عيد ميلادك وانا عايزه نقضى اليوم سوا كله
محمد :نعوضها يوم تانى
نغم :يوم تانى ايه ده عيد ميلادك هو عيد ميلادك هيجى يوم تانى
محمد :اديكى قولتيها بنفسك عيد ميلادى انا وانا مش عايز اخرج بكرة
نغم :عندك حق عيد ميلادك وانت حر فيه خلاص يا محمد متاخدش اليوم اجازة
محمد :هعدى عليكم بعد الشغل واستأذن جوز خالتى ونخرج طيب ايه رايك اهو نقسم البلد نصين
نغم :لا انا مش عايزة اخرج خلاص هديتك معايا عايز تيجى بكرة تاخدها ماشى مش عايز انت حر
تانى يوم
نغم :اتفضل
محمد :ايه ده
نغم وهى بتقلع الدبلة من ايديها :دى هدية عيد ميلادك ودى الشبكة انا خلاص الخطوبة دى متلزمنيش
محمد :كل ده علشان مرديتش اخد النهاردة اجازة واعطل شغلى
نغم :لا كل ده لانى مش مهمة عندك صحابك وشغلك اهم منى انت مش عايز شريكة حياة وزوجة بجد يا محمد انت عايز حاجة تكمل بيها شكلك الاجتماعى واحدة هترميها فى بيتك تكلم حيطانه لانك لا هتهتم بيها ولا هيفرق معاك وجودها
وقولت انى هتحمل الوضع المقرف ده لانى بحبك ونسيت ان لو كان حبيبك عسل متلحسوش كله ونسيت انى قولتلك متضمنيش لانى مش مضمونة وحبى ليك ليه اخر
عموما انا عملت اللى عليا وللاخر كمان وعلشان كده انا مش هندم انت اللى هتندم لانك معملتش اللى عليك لانك قصرت فى حقى لانك جيت عليا جامد يا ابن خالتى بس خلاص انا جبت اخرى
محمد :بس انتى بتحبينى
نغم :قصدك كنت بحبك كل موقف وحش عملته معايا كل احساس زى الزفت بالاهمال والاهانة حسيته بسببك كان بياخد من رصيد حبك فى قلبي لحد ما خلاص مبقالكش حب فى قلبى انا عرفتك على حقيقتك لما اتخطبتلك وقربت منك وعرفت انك لا تستاهل حبى ولا تستاهل اتحملك واجى على نفسي علشانك انت متستاهلش تكون فى حياتى بصورة تانية يا محمد غير انك ابن خالتى ابن خالتى وبس وانا مش هديلك مكانة انت متستهلهاش مكانة انت مش عايز تتعب علشان تفضل فيها ومفكر انها حق مكتسب لانى بحبك وادينى لا بقيت احبك ولا مستعدة افضل معاك ساعة واحدة كمان وانت محطوط فى مكانة واسعة عليك مش عارف تملاها لانك مش قدها ولا تستاهلها
من هنا ورايح انا نغم بنت خالتك وبس يا ابن خالتى
وسيبته ودخلت اوضتى بس معيطش بالعكس انا حسيت براحة رجعت خفيفة من تانى وحسيت كمان انى خدت حقى وانتقمت لكرامتى وحبى لمحمد هو بايده مسحه من قلبى كأنه مكنش
ربنا عوضنى عن خطوبتى اللى اتفسخت منه بانى لقيت شغل فى مدرسة واخيرا بعد ما كنت يأست انى الاقى شغل
بالمناسبة انا خريجة تربية قسم كيميا
روحت المدرسة واول يوم وانا فى اوضة المدرسين شوفت اخر حد كنت متخيلة انى اشوفه
هيثم :صباح الخير
نغم :صباح النور مش معقول هيثم
هيثم :بقيتى بتقولى اسمى مش كنتى مسميانى نجم الدفعة
نغم :ما خلاص بقى راحت الدفعة وراحت ايامها الحمد لله
هيثم :انتى اتعينتى هنا
نغم :اه ده اول يوم ليا
هيثم :تبقى الدفعة وراكى وراكى كده هنبقي زمايل شغل انا كمان بشتغل هنا معلش بقي مضطرة تستحملينى وتفتكرى الدفعة بيا
نغم :المهم انى خلصت من الكلية كمان مش مشكلة احنا هنا زمايل شغل مش زمايل كلية وده بالنسبالى اهون مليون مرة
هيثم وهو بيمد ايده :فرصة سعيدة يا نغم مبسوط انى شوفتك تانى
نغم وهى بتحط ايدها فى ايده :انا اسعد يا هيثم
هيثم بصدمة :ايه ده انتى فسختى خطوبتك
نغم :اه من شهر..بس انت عرفت منين انى اتخطبت
هيثم :انا عندى حصة دلوقتى بعد اذنك
بعد يومين
هيثم :صباح الخير
نغم :صباح النور
هيثم :اخبارك ايه
نغم :انا تمام الحمد لله انت عامل ايه
هيثم :انا بخير الحمد لله بس بقيتى بتسالينى عن اخبارى يعنى كلامك مبقاش بالقطارة معايا
نغم :مش بقينا زمايل بنشتغل فى مدرسة واحدة
هيثم :يعنى انتى دلوقتى شايفانا زمايل مش زى زمان
نغم :خلاص بقى زمان انتهى
واحنا الصدفة خلتنا بنشتغل فى مدرسة واحدة يبقي نتعامل عادى بقي وننسي زمان ماشى
هيثم :ماشى يا نغم
كل يوم هيثم كان بيقولى صباح الخير واخبارك ايه زى ما كان بيعمل فى الكلية الجديد هو انى بقيت برد عليه
الكلام معاه مبقاش تقيل على قلبى زى زمان
يمكن لانى مش حسا انه بيحاول يشقطنى زى ما كنت حاسة ايام الكلية هو بيتعامل معايا عادى زملا وخلاص
من شغلنا فى مدرسة واحدة اكتشفت ان هيثم انسان متواضع علاقته بكل اللى شغالين فى المدرسة حلوة من اول مدير المدرسة لحد بواب المدرسة والفراشين
كمان بيعامل الطلبة كويس وبيشرحلهم مبيكروتهمش فى الحصة علشان يروحو عنده درس
حتى مش بيحاول يكون زير نساء مع المدرسات اللى فى المدرسة حتى اللى حاطين عينيهم عليه منهم هو منفضلهم وبيعاملهم فى حدود الزمالة وبس
مبقتش حسا انى مش طايقاه فكرتى عنه اتغيرت
محمد كان حاول يرجعلى وانا رفضت
مرضيتش حتى اقعد معاه ونتكلم انا مش هتفرقلى حاجة هو هيقولها وفعلا مش عايزة اسمعه
في يوم لقيته مستنينى بره المدرسة
نغم :انت بتعمل ايه هنا
محمد :مستنيكى تخلصى شغل علشان اخدك ونروح نقعد فى حتة ونتكلم
نغم :مبقاش فى بنا كلام يتقال خلاص يا محمد
محمد :لا مش خلاص نغم ادينى فرصة تانية
نغم :هتضيعها زى ما ضيعت الفرصة الاولى كمان انا مش هقدر يا محمد مش هقدر صدقنى انا مبكرهكش بس اتقفلت منك لا عايزة احاول تانى علشانك ولا عندى استعداد اتحملك مش عايزاك تكون فى حياتى غير انك ابن خالتى وبس مش اكتر من كده
محمد :يا نغم صدقينى انا فكرت ولقيت انى معاكى حق وانى ظلمتك
نغم :فكرت فيا دلوقتى عمرك ما كنت بتفكر فيا قبل كده
محمد :عارف انى غلطت وندمان
نغم :وانا مش ندمانة وعلشان كده بقولك انى مش هقدر اديلك فرصة تانية انا عملت اللي عليا للاخر علشان كده علشان لما امشى مبصش ورايا تانى مهما حصل
انا قولت اللى عندى ومش هينفع نطول فى وقفتنا اكتر من كده يا ريت حركة انك تجيلى عند المدرسة دى متتكررش تانى والا هقول لبابا وهو يتصرف بقي بعد اذنك
تانى يوم
هيثم :صباح الخير
نغم :صباح النور
هيثم :اخبارك ايه
نغم :بخير الحمد لله وانت
هيثم :انا تمام شوفتك امبارح واقفة مع محمد خطيبك قدام المدرسة خير هترجعو لبعض ولا حاجة
نغم باستغراب :انت تعرف محمد ابن خالتى منين
هيثم :ابن خالتك وخطيبك
نغم :لا ابن خالتى وبس مبقاش خطيبي خلاص كمان مجاوبتش انت تعرفه منين
هيثم :هو انتى لسه رافضة ترتبطى بحد قدك وشايفة انك هتعيلي اديكى جربتى اللى اكبر منك بست سنين اهو وفشلتى معاه مفهمتيش ان الفكرة مش فى السن الفكرة فى انه يكون شاريكى وعايزك بجد
نغم :انت تعرف ازاى ان محمد اكبر منى بست سنين وعرفت منين انه كان خطيبي وعرفت منين اصلا انى اتخطبت
هيثم :اجابة السؤال ده هتطول ايه رايك تدينى رقم والدك واجيلكم البيت واجاوبك هناك
نغم :انت عايز تتقدملى
هيثم :اه
نغم :ليه
هيثم :اجابة السؤال ده كمان اقولهالك فى بيتكم المدرسة اكيد مش المكان المناسب لكلام زى ده ها هتجيبي رقم والدك على الاقل علشان تعرفى اجابة اسئلتك
نغم :ماشى هديلك رقم بابا
بعد يومين
فى بيت اهل نغم
نغم :واديهم سابونا لوحدنا جاوب اسئلتى بقي
هيثم :انتى عارفة انى من بلد جمبكم علشان كده كنت بشوفك فى طريقك للكلية وانتى رايحة ووانتى راجعة وبرضه علشان كده الحمد لله اشتغلنا فى مدرسة واحدة
فى الكلية كنت كتير بشوفك دايما لوحدك ودايما ساكتة
ومع نفسك لقتنى غصب عنى مركز معاكى عينيا مبتنزلش من عليكى بس انتى مكونتيش شيفانى
قررت انى هتكلم انا معاكى هقرب منك واحدة واحدة ونبقي صحاب بس انتى كنتى بتردى بالقطارة وفى الاخر قولتيلي كل اللى قولتيه مبقتش عارف المفروض اعمل ايه بعد كلامك ده
كلامك خلانى احترمتك انا مبحتقرش البنات اللى بتكلم ولاد وبتتعامل معاهم عادى ومعنديش مشكلة اتجوز بنت كنت مرتبط بيها قبل ما نتجوز لو كنت بحبها بجد مش هبعد عنها واعذب نفسي بحبها
بس انا عارف ان ده مش صح وانى مش هسمح لسارة اختى الصغيرة تعمل كده
المهم بعد كلامك لقتنى عايز اعرفك اكتر عايز ادخل حياتك وعايزك فى حياتى قولت بعد ما نتخرج هتقدملك يمكن يبقالنا حكاية سوا بس انتى اتخطبتى بعد ما اتخرجنا انا عرفت من صفحتك على الفيس لانى عملت اكونت تانى كنت بتابعك منه
لما لقيتك اتخطبتى عملتلك بلوك لانى فهمت ان كده مستحيل يبقالنا حكاية سوا
بس رجعت تانى شوفتك فى المدرسة اللى بشتغل فيها لا وكمان خطوبتك اتفسخت حسيت ان فيه امل اللي محصلش قبل كده يحصل دلوقتى
كنت طول الوقت اللى فات بتعامل معاكى عادى بدور على طريقة اقربلك بيها واقنعك تدينى فرصة ومترفضنيش لانى قدك وبحاول اصلحلك فكرتك الغلط اللى كنتى وخداها عنى انا مش بتاع بنات على فكرة عادى فى الجامعة كنت فى شلة ولاد وبنات بس كنا اصحاب مش اكتر
نغم :هما مكانوش شايفين كده كانو عايزين يبقو اكتر من مجرد صحاب ليك كانو واقعين فى عيونك الزرقا وطولك وشعرك الاسود الناعم كنت بالنسبالهم شبه ابطال المسلسلات التركى كل واحدة فيهم كانت مهتصدق تشاورلها بصباعك علشان تجيلك لحد عندك
هيثم :طيب بالنسبالك انتى عيونى الزرقا ملهاش اي تأثير عليكى
نغم :لا انا بحب العيون البنى اللى زى عينيا
هيثم :طيب وربنا قدر ان عينيا تكون زرقا ايه هتعترضى على قضاء ربنا
نغم وهى بتضحك :لا طبعا مينفعش
برضه مقولتش انت متقدملى ليه
هيثم :لانى عايز يبقالنا حكاية سوا
انا كنت خلاص طلعتك من دماغى من بعد ما اتخطبتى بس ربنا حطك فى طريقى تانى وواضح ان لينا نصيب مع بعض
ادينى فرصة
نغم :ماشى بس من الاول انا عايزاك تعرف حاجة عنى
انا مش مضمونة بمعنى ان اكبر غلطة ممكن تعملها معايا هى انك تضمنى انا بعدى بس مبنساش هفضل اعدى اعدى وانت تضمنى وتطمن انى مهما انت عملت فانا هعدى وبعدين هتتفاجئ بيا بنهى كل حاجة وانى خلاص مش عايزاك فى حياتى
انا مبكرهش حد انا بتقفل يعنى مش هكرهك بس هتقفل منك هبقى مش عايزة اشوفك مش متحملة وجودك ولو حتى ندمت وحاولت ترجعلى مش هقبل مش هعرف
مش هكرهك ومش هتمنالك الشر بس هتمنالك الخير بعيد عنى لان وقتها هيبقي انا وانت مسحيل يجمعنا طريق تانى
فهمتنى
هيثم :فهمتك
نغم :وانت ايه اكتر حاجة ممكن تضايقك وتقفلك منى
هيثم :انك تكونى بتحكى اللي بيحصل بنا لاهلك او لاصحابك اخواتى واصحابي حصلتلهم مشاكل كتير من ورا الحكى للاهل وللصحاب دى كمان متبقيش ودنية اى حد يقولك حاجة تقتنعى وتتأثرى بكلامه عايز اكون خاطبك لوحدك مش خاطبك انتى وخمس ست بنات صحابك بتسمعى كلامهم وبتتأثرى بيه ولاغية شخصيتك
نغم :لا من الناحية دى متقلقش اللى بنا هيفضل بنا مش هيطلع بره مهما حصل كمان انا مش ودنية ومبغيرش ارائى بسهولة ومبتأثرش بكلام حد
هيثم بابتسامة :تمام جدااااا
وانا مش هضمنك انا عارف ان اللى مش هنتعب علشان نحافظ عليه يبقي ببساطة هنخسره علشان كده انا مش هضمنك وعايزك انتى كمان متضمننيش انا شاريكى وباقى عليكى بس لو مكونتيش انتى كمان شاريانى وباقية عليا يبقي الحكاية مش هتكمل وهتبقي بايدك نهيتيها وجبتى اخرها واخرى
نغم :وانا طول ما انت شارينى وباقى عليا انا لا هجيب اخرك ولا هجيب اخر الحكاية
هيثم بابتسامة :يعنى موافقة عليا وهتدينى فرصة يا نغم
نغم بابتسامة :يعنى موافقة عليك وهديك فرصة يا هيثم
اغبى حاجة ممكن تعملها فى حياتك انك تضمن حد لانك عارف انه بيحبك فتفضل تيجى عليه وتيجى عليه وتيجى عليه وانت مطمن انه بيحبك وميقدرش يبعد عنك وتتفاجئ بأن الحب اللى كان ليك فى قلبه انت محيته بعمايلك معاه وانه خلاص مبقاش عايزك فى حياته
وتانى اغبى حاجة ممكن تعملها فى حياتك انك تضيع من ايدك حد شاريك وباقى عليك لو حد اشتراك يبقي اشتريه ومتبيعهوش ولو حد باعك بالرخيص مش بس بيعه بالرخيص ولا حتى اتبرع بيه ببلاش لا ده انت تحط فوقه فلوس للى هياخده
الاقوى من الكره هو القفلان انك تتقفل من الشخص تبقي مش طايق وجوده قرفان تشوفه وتسمع صوته مش متحمل يكون معاك فى مكان واحد انك تكون مش عايزه يحصله حاجة وحشة ولا حاجة بس فى نفس الوقت مش عايزه قريب منك
انك تتقفل من الشخص اقوى من انك تكرهه بكتير
خليك فاكر مفيش حد مضمون فى الدنيا واللى مش هتتعب علشان تحافظ عليه هتخسره
وخليك فاكر متشتريش حد بايعك متشتريش غير اللى شاريك متشتريش غير اللى شاريك وبس
وخليك كمان فاكر انك لو خليت حد يتقفل منك فانت خسرته بجد لان القفلان اقوى من الكره متخليش حد يتقفل منك بعد ما كان بيحبك اتفقنا💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا