حكايات منار

حكاية " الخلاصة "

على :مجتيش النهاردة الخطوبة ليه
ناهد :هى..هى الخطوبة اتعملت يعنى ..كملت للاخر..خطبت بجد
على :اه
ناهد بوجع :يبقى مسمهاش مجتيش الخطوبة ليه يا على يبقي اسمها مجتيش خطوبتى ليه
على :تمام مجتيش خطوبتى ليه مقدرتيش
ناهد :كفاية انت قدرت يا على كفاية انت قدرت تعمل كده
على :انا مقدرتش انتى اللى خلتينى اعمل كده
ناهد :بجد انا اللى خليتك تعمل كده انا اللى خليتك تبيعنى تبيع حب سبع سنين
على :انا مبعتكيش ومقدرش ابيع حبنا
ناهد :لا بعتنى وبعت حبنا وخطبت مبروك يا على ربنا يتمملك على خير
على :الخير اللى ليا فى الدنيا هو انتى
ناهد :لا خلاص ده كان زمان الخير بقي خطيبتك اللى هتبقي مراتك
على :انا بحب..
ناهد قاطعته :متكملهاش لا بقى حقك تقولها ولا بقي حقى اسمعها ولا انا عايزة اسمعها
على بخوف :يعنى ايه
ناهد :هو ايه اللى يعنى ايه يعنى انت خلاص خطبت وهتتجوز احترم بقي الانسانة اللى اختارتها تكمل معاها عمرك ولو عايز تخونها انت حر بس اكيد مش انا اللي ممكن تخونها معايا
على :انا مش هتجوز غيرك وحبى لغيرك هو اللى خيانة وانتى عارفة انى مش ممكن اخونك
ناهد بوجع :ولما تخطب واحدة غيرى تبقي مخونتنيش
انت كالعادة غضبك عماك ومفكرتش انت بتعمل ايه
على انت خطبت خلاص فى واحدة بقت على اسمك امنتك على نفسها بتخطط لحياة جاية انت هتشاركها فيها
اقفل يا على اقفل ومتكلمنيش تانى يا ابن عمى من النهاردة احنا ولاد عم وبس
ارجع لخطوبتك اللي انت سايبها دى كده ميصحش معلش مجتش الخطوبة بس اكيد هحضر الفرح اكيد مش هفوت فرحك

وقفلت السكة وحطيت رقمه بلاك ليست
بعد ما اهلى رجعو فهمت ان كده الخطوبة خلصت جبت صفحته على الفيس ولقيت صور مديت ايدى اللى بتترعش علشان افتحهم واشوفهم قلبي كان بيدق بسرعة وصوت نفسي كان عالى بنهج كأنى بجرى لما شوفت الصور عيطت كتير اوى
على خطب واحدة غيرى دبلته بقت فى ايد واحدة غيرى
لما كلمنى فى الموبايل كنت مستنياه يقولى انه معملش كده فيا مخطبش غيرى وبرغم انى عرفت منه انه خطب بس وجعى وهو بيقولى كده كوم ووجعى وانا شايفة الصور كوم تانى
قلبى بيتحرق حسا قلبى بيتحرق وروحى بتطلع هموت من وجعى حطيت ايدى على بؤقى علشان اهلى ميسمعوش صوت عياطى فضلت طول الليل بعيط كنت حاسة انى من كتر الوجع هموت مش هيطلع عليا الصبح بس طلع عليا الصبح ومموتش بس دموعى خلصت
لبست وخرجت لكليتى لانى مكنتش هتحمل افضل فى البيت مكنتش عايزة اهلى يشوفونى كده
كنت محتاجة اتكلم كنت محتاجة اشارك حد وجعى بس انا مليش حد غير على انا مليش حد
روحت الجامعة فضلت ماشية فيها وروحت عند السور بتاعها فى مكان مفيهوش حد تقريبا وعيطت دموعى طلعت مخلصتش بس محطتش ايدى على بؤقى لانى هنا لوحدى ومش خايفة حد فى اهلى يسمعنى لقتنى بخبط على قلبي بايدى كنت حاسة انه هيقف كنت حاسة انى مش عارفة اتنفس
وفجاة لقتنى فى حضن حد

ساجدة وهى بتطبطب عليها :اهدى..اهدى كل حاجة هتبقى كويسة..اهدى..

لقتنى بحضنها وبعيط فضلت خمس دقايق بعيط فى حضنها وبعدين لقتنى بتكلم وانا بعيط
ناهد وهى بتعيط وبتتشحتف :خطب..على خطب..خطب واحدة غيرى..سابنى..ساب روحه..كان بيقول انى روحه اللى ميقدرش يستغنى عنها..وقدر..انا هموت حاسة انى هموت من كتر الوجع
ساجدة وهى بتطبطب عليها :متقلقيش لو كان فى حد بيموت بسبب الحب كان زمان نص الدنيا ماتت صدقينى هتعيشي ووجعك ده هيفضل يقل شوية بشوية لحد ما يختفى
ناهد :بس انا بحبه
ساجدة :هتبطلى تحبيه
ناهد :هو فى حد بيبطل يحب لو كان بيحب بجد
ساجدة :اه فيه الناس الشاطرة اللي مبتضيعش عمرها هدر انما فى ناس خايبة بتضيع عمرها فى ذكريات حب راح ومش راجع بتوقف حياتها على ناس متستاهلش
انتى بقى شاطرة ولا خايبة
ناهد :معرفش
ساجدة :شكلك شاطرة قلبي بيقولى انك شاطرة وانا قلبي ميكدبش عليا ابدا
ناهد وهى بتخرج من حضنها :شاطرة ايه بس بعياطى ده كمان انتى جيتى منين انا مكونتش شايفة حد هنا غيرى
ساجدة :انتى مكونتيش شايفة اصلا ماشية زى ما تكونى مخبوطة على دماغك ومش دريانة بحاجة انا اسفة انى مشيت وراكى بس منظرك خضنى عليكى لقتنى بمشي وراكى علشان قلقلت ولما لقيتك بتعيطى بحرقة كده وبتخبطى على قلبك بايدك محستش بنفسي غير وانا بحضنك اسفة انى اقتحمت المساحة الشخصية بتاعتك
ناهد وهى بتضحك وبتمسح دموعها :اخر حاجة كنت اتخيلها انى اضحك النهاردة بعد اللى حصل
مساحة شخصية ايه بس اللى اقتحمتيها ليه كلامك كبير كده
كمان متتأسفيش شكرا انك قلقتى عليا وجيتى ورايا شكرا انك حضنتينى  وسمعتينى كنت حاسة انى هموت من وجعى اللي مش لاقية حد احكيهوله لان مليش حد غير على
على اللي وجعنى كل الوجع ده
ساجدة :مين على
ناهد :ياااااه هتطول اجابته السؤال ده
ساجدة :احكى انا معاكى لاخر اليوم انتى اكيد مش هتحضرى محاضرات بحالتك دى
ناهد :مش هحضر لا بس انتى مش هتحضرى ليه
ساجدة :مش هسيبك لوحدك في حالتك دى كمان انا بتلكك علشان محضرش المحاضرات وربنا بعتك ليا من السما علشان اخلع منهم من غير ما ضميرى يوجعنى
اعتقد انك مكلتيش بقالك كتير
ناهد :من امبارح مكلتش
ساجدة :خلاص نفطر سوا تحبي نفطر هنا ولا نخرج نفطر بره
ناهد :بره هتخرجى معايا وانتى متعرفنيش انتى مش خايفة
ساجدة وهى بتضحك :انتى شكلك ميخوفش عيل صغير اصلا مش طالبة كبيرة فى ليسانس زيى كمان اخاف منك ليه
ناهد :على قالى انى مش اى واحدة اكلمها واحرص واخاف على نفسي وانتى مش بس بتكلمينى لا انتى هتسيبي محاضراتك علشانى وكمان مستعدة تخرجى معايا بره الجامعة
ساجدة وهى بتضحك :طيب دى حاجة تخوفك انتى منى مش تخوفنى انا منك
ناهد :بس انا مش خايفة منك
كمان هتعمليلي ايه يعنى اكتر من اللى حصلى
ساجدة :نفطر بس وتحكيلي اللى حصلك اقولك نفطر هنا احسن بره دوشة تعالى نشوف حتة ضل نقعد فيها بعد ما نجيب حاجة ناكلها لحسن الشمس هنا حامية اوى سيحت دماغى
ناهد :ماشى يلا

ناهد :مكنش ليه لزوم انتى اللى تدفعى فلوس الفطار كنتى سبتينى اعزمك مش كفاية هتسمعينى
ساجدة :يا بنتى انتى متخزوقة يعنى تبقي متخزوقة وكمان تدفعى فلوس الفطار لا كده كتير كتير اوى
ناهد وهى بتضحك :مخلتيش فيها متخزوقة وانتى بتضحكينى كده طيب احترمى الخزوقة اللي انا فيها طيب
ساجدة وهى بتضحك :انا بحارب كل مشاكلى وخوازيقى واحزانى بالضحك الضحك سلاح قوى جدا على فكرة
ناهد :مش الضحك اللي سلاح قوى ان يكون عندك حد يهتم بوجعك بيضحكك علشان يهون عنك هو اللي سلاح قوى
ساجدة وهى بتصقف :ده ايه الكلام الكبير العميق ده
المهم احكيلي بقي مين على
ناهد :ابن عمى وصاحب عمرى واول حب فى حياتى
احنا متربين سوا اصلا عايشين فى بيت واحد بس كل واحد فى شقة هو اكبر منى بتلت سنين
صداقتنا اتحولت لحب من سبع سنين يعنى تقدرى تقولى على هو حب المراهقة والشباب بالنسبالى
ساجدة :وهو بيحبك زى ما انتى بتحبيه كده
ناهد :المفروض بعد اللى عمله مبقتش عارفة حاجة خلاص
ساجدة :هو خطب صح انتى كنتى بتقولى على خطب وانتى بتعيطى
ناهد :خطب اه
ساجدة :بطل يحبك وعلشان كده خطب
ناهد :لأ كان بيعاقبنى وعلشان كده خطب
ساجدة :بيعاقبك ازاى يعنى وعلى ايه
ناهد :علشان رفضت يتقدملى ونتجوز
ساجدة بصدمة :نعم يا اختى وانتى رفضتى ليه ان شاء الله وانتى بتحبيه بالشكل ده
ناهد :علشان هو كان عايز نتخطب الترم ده بس وفى الاجازة الجاية نتجوز واقضى اخر سنة ليا فى الكلية عنده وانا مش هعرف اشيل مسئولية بيت ومسئوليتى ومسئوليته وانا بدرس خوفت معرفش
ساجدة :ولما قولتيله كده مفهمكيش
ناهد :مستناش اقوله كده اتعصب عليا واتهمنى انى مبحبوش زى ما هو بيحبنى وانى مش عايزة نكون سوا وهددنى انه لو مخطبنيش الاجازة دى هيخطب غيرى
ساجدة :ونفذ تهديده
ناهد :ونفذ تهديده
ساجدة :طيب وانتى ليه مسمعتيش كلامه
ناهد :وليه هو مسمعنيش ليه هو دايما مبيسمعنيش وكلامه اوامر فرمانات لازم تتنفذ والا ابقي مبحبوش انا تعبت وهو حتى مدانيش فرصة اراجع نغسي بسرعة جدا خطب
ساجدة :انتى حضرتى الخطوبة
ناهد :لا مقدرتش اتحججت بانى تعبانة وعندى دور برد جامد والدوا بينيمنى ومش هقدر اخرج اهلى راحو الخطوبة من غيرى امبارح
ساجدة :خلاص يا حبيبتى ربنا يهون عليكى ويريح قلبك يا رب
ناهد :يا رب يا..انتى اسمك ايه صح
ساجدة بابتسامة :كل ده بنرغى ومتعرفناش انا ساجدة صالح فرقة رابعة كلية اداب قسم علم نفس
ناهد :وانا ناهد مصطفى فرقة تالتة كلية تربية قسم كيميا
ساجدة :هاتى رقمك بقي علشان نعرف نتقابل تانى
ناهد :انتى عايزة تشوفينى تانى
ساجدة :طبعا مش خلاص بقينا اصحاب
ناهد :انتى عايزة نبقي صحاب
ساجدة :احنا بقينا صحاب خلاص وبنا عيش وملح كمان
ناهد :انتى طيبة اوى يا ساجدة
ساجدة :انتى اطيب يا ناهد المهم هاتى رقمك بقى..تمام انا هرن عليكى سجلى رقمى عايزين نشوف بعض بكرة ولو النهاردة حسيتى انك عايزة تتكلمى معايا متتردديش لحظة وكلمينى على طول
ناهد :تمام تسلمى يا رب

روحت البيت وانا حسا انى احسن شوية وجعى مقلش بس بسبب ساجدة حسيت انى عندى حد يشاركنى الوجع ده
على جالنا اتحجج بانه عايز يفرج بابا وماما واخواتى على صور خطوبته علشان يشوفنى
شوفتو الهنا اللى انا فيه جاى يتحجج بصور خطوبته علشان يشوفنى بس انا مخرجتش من اوضتى عملت فيها نايمة لحد ما هو مشي طلع شقتهم
انا حسيت انى مخنوقة وقفت في شباك اوضتى فضلت برضه مخنوقة عملت لنفسى كاكاو باللبن وقولت هطلع اشربه فى السطح بيقولو ان الشيكولاتة بتحسن المزاج يا ترى كل الوجع اللي انا حسا بيه ده مج كاكاو باللبن هيكون قادر يهونه عليا
طلعت فوق وبعد ما طلعت بدقيقتين لقيت على طالع ورايا

على :كنت عارف انك هتطلعى السطح من خنقتك قولتيلي قبل كده انك لما بتتخنقى بتبقي حسا انك مش عارفة تتنفسي ومحتاجة هوا بارد يضرب فى وشك علشان تحسي انك قادرة تتنفسي واحساسك بالخنقة يقل
ناهد :خنقتى دى انت سببها ويا ريت تنسي اى حاجة قولتهالك وتنسانى يا على
على :انسي مين انتى مجنونة وصلتى لنص المج هاتيه النص تانى بتاعى
ناهد :كان بتاعك يا على دلوقتى احنا لا هنتشارك المج ولا هنتشارك اى حاجة فى الدنيا تانى خلاص انت جبت اخرها
على :انا معملتش كده علشان اجيب اخرها انا عملت كده علشان..
ناهد قاطعته :علشان تربينى علشان تعاقبنى بس اللي انت عملته ده ميربيش يا على اللى انت عملته ده يموت يا يموتنى يا يموت حبك فى قلبى
على :مش هيحصل
ناهد وهى بترمى المج فى الارض :لا هيحصل يا على
على:انتى عملتى ايه
ناهد :سمحت لغضبي يتحكم فيا زيك كسرت المج اللى انت جبتهولى هدية من اربع سنين تفتكر حتى لو ندمت دلوقتى هعرف ارجعه لا مش هعرف يا على زى ما انت مش هتعرف تصلح اللى عملته
على :انا معملتش حاجة انا مش هتجوز غيرك
ناهد :بس خطبت غيرى لبست واحدة غيرى دبلتك خلتنى هيجى عليا يوم واسلم على واحدة بقت خطيبتك واقولها مبروك نورتى عيلتنا هباركلها على خطوبتكم يا على هدعيلك ربنا يتمملك على خير مع واحدة غيرى
على :مش هيحصل انا عمرى مهحطك فى الموقف ده مش هتشوفيها
ناهد :هتمنع مرات عمى تعزمها هى واهلها عندكم ولا هتمنع نفسك تجيبها معاك اى مناسبة هتحصل عندنا
انت مش فاهم انت عملت ايه صح
على :انا بحبك
ناهد وهى بتمسك ايده اليمين ترفعها :انت خطبت شايف الدبلة دى دى دبلتك اللى اختارتها مع واحدة غيرى احترم الدبلة واحترم صاحبتها متقوليش كلام مش من حقك تقوله احترم القرار اللي انت خدته ونفذته متبقاش زى العيل اللى كسر لعبته وبعد ما كسرها بيعيط عليها وعايزها ترجع زى ما كانت
انسي اللى فات يا على زى ما انا هنساه انت خلاص خطبت ومسيرك تتجوز وانا كمان مسيرى اتخطب واتجوز وتيجى تباركلى يا ابن عمى
على بغضب :ده على جثتى
ناهد :لا ده على دبلتك
خلاص مبقلكش عليا حقوق يا على وغضبك ده مش هيغير حاجة
على :انتى هتتخلى عنى هتسبينى
ناهد وهى بتضحك بوجع :هموت واعرف انت ازاى مش فاهم اللي انت عملته انت اللي اتخليت عنى يا على انت اللي سبتنى وروحت خطبت انت اللى حققت كل احلامنا عن يوم خطوبتنا مع واحدة غيرى انت مفكر انك مهما عملت هتنسينى انك عملت فيا كده هتنسينى انى بسببك عيشت امبارح اسوء ليلة فى حياتى
على :انا اسف
ناهد :اعمل بيها ايه اسف دى اسفك مش هيغير حاجة يا على بعد كده انا ناهد بنت عمك وبس يا على لانى مش هكون غير كده ليك يا ابن عمى ابقى سلملى على خطيبتك قولها ناهد اختى الصغيرة وبنت عمى بتسلم عليكى

وسيبته ونزلت عيطت تانى هو انا امتى دموعى دى هتخلص بقى
تانى يوم كلمت ساجدة طلبت منها تيجى قبل ميعاد المحاضرات بساعة كنت فعلا محتاجة اتكلم معاها ومكنتش هخليها تسيب محاضراتها علشانى زى ما عملت امبارح
عارفة ان عشمى فيها زاد لما طلبت منها تيجى بدرى علشانى بس عشمى فيها طلع فى محله لانها وافقت
جت وحكتلها اللى حصل امبارح

ساجدة :هو دايما بيعمل كده لما بترفضيله طلب بيعاقبك يعنى
ناهد :اه
ساعات كان بيخاصمنى وساعات كان بيتكلم معايا بس كلامه كان بيكون بالقطارة
وانا مكنتش بتحمل على كل حياتى وبالتالى فكرة انه يخاصمنى دى او يكون مضايق منى كانت بتخلينى انفذله اللى هو عايزه
ساجدة :سؤال يمكن يكون تافه بس معلش اعذرى فضولى
هو ايه حكاية انك خلصتى نص المج وهو النص التانى بتاعه دى
ناهد :انا دايما لما بطلع السطح بعمل لنفسي كاكاو باللبن قبل ما اطلع وطبعا مش هينفع اعمل اتنين فانا وعلى بنتشارك المج اللى بعمله انا نص وهو النص التانى
ساجدة :وليه مينفعش تعملى اتنين
ناهد :هقول لاهلى ايه طالعة اشرب مجين كاكاو باللبن في السطح
ساجدة :هو اهلك ميعرفوش انك بتطلعى علشان تقابلي على
ناهد :لا طبعا ميعرفوش اهلى ميعرفوش ان انا وعلى بنحب بعض كل اللى يعرفوه اننا ولاد عم ومتربين سوا
ولو عرفو حكاية بنحب بعض دى هيطينو عيشتى
على قالى منقولهمش لانهم لو عرفو هيركزو معانا وهيبعدونا عن بعض
ساجدة :وانتى طبعا سمعتى كلامه
ناهد :طبعا انتى مش فاهمة على ده بالنسبالى ايه يا ساجدة على ده كل حاجة فى حياتى ده الماضى والحاضر والمستقبل كنت بخطط ليه معاه عمرى ما اتخيلت انه مش هيكون شريك حياتى الجاية
ساجدة :انتى ليه قولتيله ميقولكيش انه بيحبك
ناهد :علشان مبقاش من حقه يقولها ولا بقي حقى اسمعها هو خلاص خطب مش صح انه يخطب واحدة ويقول لواحدة تانية بحبك
ساجدة :بس انتى في حياته من قبلها بكتير
ناهد :وهو اللى دخلها حياته وخطبها يبقي يحترمها ويحترم علاقتهم ميرضيش ربنا اللى هو بيعمله ده
ساجدة :معاكى حق فى كلامك بس ميرضيش ربنا برضه علاقتكم نفسها صداقتكم وارتباطكم حبكم لبعض سبع سنين ده كله حرام ذنوب لازم تستغفرى عنها
ناهد :بس احنا كنا ناويين نتجوز مكناش بنتسلي كنا واخدين الموضوع جد
ساجدة :وايه اللى حصل فى الاخر بقيتو سوا ولا هو خطب واحدة غيرك
كمان عايزاكى تعرفى حاجة حتى لو كنتو اتخطبتو واتجوزتو اللى فات ده كله قبل جوازكم ذنب لازم تستغفرى عنه وتتوبي لربنا
ناهد :حتى لو اتجوزنا
ساجدة :حتى لو اتجوزتم
ناهد :مكنتش اعرف انا كنت واثقة في على وعارفة انه محترم وانسان كويس وواثقة في نفسي كمان
ساجدة :حلال ربنا وحرامه مبيختلفش من شخص للتانى يعنى مش بنفذه مع الشخص الصايع والشخص المحترم مبنفذوش معاه
حلال ربنا وحرامه بيتنفذ مع الكل مبنستثنيش ناس على مزاجنا احنا
ناهد :معاكى حق
ساجدة :عايزاكى تبحثى فى الموضوع ده بنفسك
حكم اختلاطك بالرجالة وحدود تعاملك معاهم وتشوفى الايات القرءانية وتفسيرها والاحاديث كمان عايزاكى تقتنعى بنفسك
ناهد :هعمل كده ..الوقت عدى بسرعة ولازم نقوم علشان نحضر المحاضرات
ساجدة :نبقي نشوف الاوقات الفاضية بين محاضراتنا يمكن نعرف نتقابل ولو معرفناش نتكلم فى الموبايل اتفقنا
ناهد بابتسامة :اتفقنا انتى جدعة اوى يا ساجدة انا مش عارفة اشكرك ازاى
ساجدة :تشكرينى على ايه ده حقك عليا مش احنا اصحاب
ناهد وهى بتحضنها :شكرا بجد شكرا الحمد لله انى عرفتك انتى ربنا بعتك ليا نجدة من السما
ساجدة وهى بتطبطب عليها :وانا كفاية عليا الكلمتين دول مش عايزة اكتر من كده

عدى تلت اربع ايام مجراش فيهم حاجة غير انى بحثت بنفسي عن اللي ساجدة كانت بتكلمنى عنه واكتشفت ان علاقتى بعلى من اولها لاخرها حرام في حرام
استغفرت ربنا وقررت اتوب عملتله بلوك فيس وواتس مكنتش برد على ارقام غريبة لانى كنت عارفة ان على اللي بيتصل وهو اصلا كان مانعنى قبل كده ارد على الارقام الغريبة
يوم الجمعة ساجدة كلمتنى فى الموبايل وطلبت نخرج

ناهد :لا
ساجدة :لا ليه
ناهد :على مش بيرضى اخرج
ساجدة :على مبقاش موجود يا ناهد
قرارتك انتى لوحدك اللي تاخديها بناءا على رغبتك انتى لان على ورغباته وموافقته او رفضه مبقتش حاجة تخصك خلاص
ناهد باحباط :معاكى حق خلاص مبقاش فى على
ساجدة :ربنا يهون عليكى ويفرح قلبك يا حبيبتى
استأذنى اهلك بقي هخرجك خروجة جامدة كمان عايزة اعرفك على هند وليلي صحابي
ناهد :حاضر

وخرجنا واتفسحنا واتغدينا بره صحاب ساجدة طيبين ويتحبو بسرعة بس مش اطيب من ساجدة ساجدة مفيش اطيب منها بس اتبسطت بخروجى معاهم دى اول مرة اخرج مع صحباتى اول مرة يكون عندى اصحاب من اصله
رجعت مبسوطة وقررت ارفع صور اليوم حالات على الواتس كنت بشوف بنات عمى بيعملو كده وانا مكنتش بعمل زيهم لانى معنديش صحاب انزل صورى معاهم
نزلت الصور وبعد ما نزلتها بنص ساعة لقيت رسالة جايالى على الواتس

بتخرجى يا ناهد ومن غير اذنى ومنزلة صورك حالات كمان قلبك مات يعنى خلاص ومبقاش فارقلك موافقتى من عدمها
مش هعديلك الحركة دى بالساهل على فكرة
بس مبسوط انى شوفتك بتضحكى فى الصور بقالى كتير اوى مشوفتش وشك بيضحك وحشتنى ملامحك وهى فرحانة يا رب الضحكة الحلوة دى ما تفارق وشك ابدا يا ناهودتى

وانا بقرء الرسالة فى اولها كنت خايفة حسا انى فعلا غلطت وهتعاقب وفى اخرها لقتنى مبسوطة هو كمان وحشنى انا بتجنب اشوفه من بعد ما اتكلمنا على السطح وقررت انى اصلا مش هطلع السطح تانى
هو شاف الصور لانى رقمى مش مع ناس كتير اصلا فانا مش عاملة للصور حماية ان ميشوفهاش غير اللي عندى في جهات الاتصال محتجتش اعمل كده واساسا مكنتش بنزل صورى قبل كده لان على مكنش بيرضى
عملت للرقم بلوك ومسحت الرسالة غصب عنى بس هو ده الصح وفضلت افكر نفسي ان على خلاص مش فى حياتى لا ينفع اخاف من كلامه ولا ينفع افرح بيه ولا ينفع يوحشنى
الكلام سهل بس التنفيذ صعب التنفيذ صعب اوى بس مسيرى اقدر انفذه
عدى اسبوع كمان عمتى عنايات عزمتنا كلنا على الغدا
معرفتش اتحجج او بصراحة قررت انى مش هتحجج مانا مسيرى اقابلها مسيرى اشوفهم سوا فى الحقيقة زى ما شوفتهم فى الصور قررت انى هواجه ومش ههرب وانى هعاملها عادى هى معملتليش حاجة علشان اعاملها وحش
روحت العزومة وكنت خايفة هى تيجى رغم كل تشجيعى لنفسي وكل الكلام اللى قولته لروحى بس برضه فضلت خايفة
بس هى مجتش على جه لوحده وقال ان النهاردة فرح اعز اصحابها وعلشان كده هى مقدرتش تيجى
على بيكدب انا عارفاه وعارفة شكله لما يكون بيكدب يمكن يكون مقلهاش اصلا او يمكن عمل خناقة معاها بحيث ميبقاش مضطر يقولها على العزومة ولما يتصالحو يقولها انه اتحجج قدامنا بحجة فرح صاحبتها علشان محدش يضايق منها وطبعا هى هتفرح بيه وبانه حريص على صورتها قدام اهله
على دماغه سم وبتطلع منه افكار عبقرية ده وهو هادى بس لما يتعصب مبيفكرش

على :اخبارك ايه يا ناهد
ناهد :الحمد لله يا على انت عامل ايه
على بصوت واطى شوية :مش قولتلك مش هخليكى تشوفيها
ناهد بصوت واطى شوية :قولتلك مسيرى اشوفها لو مش دلوقتى فبعدين مسيرى اشوفها واباركلها على خطوبتكم يا ابن عمى انا هقف في البلكونة مينفعش نطول فى الوقفة سوا عن كده متفكرش تيجى ورايا البلكونة لانك كده هتلفت النظر لينا واللى متعرفش زمان هيتعرف دلوقتى بعد ما خلاص مبقاش موجود اساسا

وسيبته ودخلت البلكونة لقيت عمار ابن عمتى جاى يسلم عليا
عمار :اخبارك ايه يا ناهد
ناهد :انا تمام الحمد لله يا عمار تسلم
عمار :عارف انك تمام ولو مش تمام دلوقتى هتبقى تمام بعدين الحكاية كلها حكاية وقت بس وهتنسي
ناهد بتوتر :انسا..انسا ايه
عمار :عارفة النسيان ده طبع الانسان حتى لو مكنش عايز ينسي بينسي انا غصب عنى نسيت داليا الله يرحمها وحياتى مشيت لدرجة انى بقيت مستعد اخطب
واتجوز لانى غصب عنى حياتى مشيت ولازم انا كمان امشي معاها ومفضلش واقف مكانى لوحدى
قدرت اتجاوز صدمة موت داليا وقدرت اتعايش مع حقيقة موتها وانى هقضى مع واحدة غيرها بقية عمرى مع ان داليا سابتنى غصب عنها عمرها وخلص ولو بايديها كانت عاشت ليا وعلشانى تفتكرى بقي انتى مش هتقدرى تنسي واحد سابك بمزاجه وخطب مش هتقدرى تتجاوزى حكايتكم وتكملى حياتك
ناهد :انت عرفت منين حكايتى انا وعلى هو حكالك معقول
عمار وهو بيضحك :لا طبعا على عامل فيها شبح ومخبى
بس باين عليه وعليكى للى يركز في التفاصيل وانا بقي متخصص تفاصيل يعنى مثلا بصى على على غيران علشان انا واقف معاكى وماسك نفسه بالعافية انه يجى يشلفط وشى بس معتقدش هيفضل ماسك نفسه كتير صبره خلص اقل من دقيقة وهيجلنا
ناهد :معتقدش
عمار :انا اعتقد جدا انا راجل وافهم الراجل اللى زيى
على :اخبارك ايه يا عمار واحشنى يا راجل
عمار :بخير يا على بس مش سلمت عليا انت اول ما جيت
على وهو بياخده بره البلكونة :وماله نسلم تانى انا كنت عايز اسئلك على حاجة..

هو خده وخرج وانا فضلت اضحك عمار طلع معاه حق
عمار كمان طلع بيحب داليا خطيبته الله يرحمها خطبها من اربع سنين وقبل فرحهم بتلت شهور ماتت هى بقالها تلت سنين ميتة عمار احتاج تلت سنين علشان يتجاوز حبه ليها
مكنتش اعرف انه كان بيحبها الحقيقة انا معرفش حاجات كتير عن عمار او عن اى حد فى ولاد اعمامى او عماتى ليه لان على كان مانعنى ان كلامى معاهم او مع اى راجل فى الدنيا يزيد عن اذيك الحمد لله سواء فى عيلة بابا او عيلة ماما
يا ترى انا هحتاج كام سنة علشان انسي على واتجاوز حكايتى معاه
بعد اسبوع على فسخ خطوبته خطب بالظبط تلت اسابيع مكملش الشهر حتى
مفرحتش مش هنكر انى حسيت براحة فى قلبى بس مفرحتش اللى على عمله كسر جوايا حاجة ثقتى فيه انا مبقتش بثق فيه ولا فى حبه ليا ومعتقدش دى حاجة هيقدر يرجعها زى ما كانت
فضلت زى ما انا مبطلعش السطح مبحاولش احتك بيه مبردش على ارقام غريبة
عدى شهرين كنت انا خلصت الترم التانى من سنة تالتة وفاضلى رابعة وساجدة اتخرجت خلاص
بعد ما خلصت الامتحانات بيومين بابا قالى ان على متقدملى طبعا مكنش ينفع ارفض على طول فقولت لبابا يجى واتكلم معاه علشان اقدر اخد قرار وتانى يوم على جه وبابا وماما سابونا لوحدنا

على :مش مصدق انى اخيرا اتقدمتلك الحمد لله اخيرا
ناهد :انت عارف ان دى اول مرة اقعد مع عريس صح
على :عارف اه
ناهد :بس دى مش اول مرة ليك تقعد مع عروسة
على :اا..انتى مش زى اى واحدة انا قعدت معاها وانتى عارفة
ناهد :مبقتش عارفة حاجة خلاص يا على
على :يعنى ايه انتى عندك شك فى حبى ليكى
ناهد :كان فين حبك وانت بتتقدم لواحدة غيرى وبتجبلها الشبكة وبتلبسها دبلتك وبتتفق مع اهلها على اتفاقات الجواز وعلى مدة الخطوبة اللى بعدها هيحصل فرح
كان فين حبك وانت بتدخل واحدة ملهاش اى ذنب فى حكايتنا وانت مش ناوى تكمل معاها خطبتها ليه لما انت ناوى تسيبها هو دخول بيوت الناس بالساهل كسرة قلبها بالساهل
على :مكسرتش قلبها هى محبتنيش ملحقتش وانا مكنتش عارف اتعامل معاها اصلا علشان تحبنى او تتعلق بيا
ناهد :ولو محبتكش مش اتحسبت عليها خطوبة مش انجرحت كرامتها لما فسخت خطوبتك منها بعد اقل من شهر
تفتكر انك مكنتش قادر تتعامل معاها ده مجرحش كرامتها وحسسها بالاهانة انت غلطت في حقها
على :لو كنت فضلت خاطبها وانا بحبك انتى كنت هبقي بغلط في حقها اكتر كده احسن ليها وليا
كمان انا اتاسفتلها وقولتلها ان العيب منى مش منها هى معملتش حاجة غلط ولا قصرت كمان انا سيبتلها الشبكة
ناهد :طيب لو فرضنا ان اعتذارك ليها والشبكة هما تمن غلطك في حقها واديك صلحته
غلطك فى حقى انا هتصلحه ازاى يا على انا مبقتش بثق فيك
على :مبتثقيش فيا رغم حبى الكبير ليكى
ناهد :حبك الكبير ليا عصبيتك وغضبك اكبر منه
ممكن يجى عليك يوم وفى عز عصبيتك تضربنى لو غلطت
على :انا مش ممكن امد ايدى عليكى يا ناهد قلبى مش هيطاوعنى
ناهد :قلبك طاوعك تكسر قلبي يا على لما خطبت غيرى لما حققت كل احلامنا عن خطوبتنا مع واحدة غيرى
بعد الجواز لو غلطت او اختلفت معاك فى حاجة انا وانت وغضبك وعصبيتك كالعادة اتحكمو فيك هتعمل ايه هتطلقنى وبعد ما تهدا تندم وتبقي عايز تردنى ولا هتتجوز عليا علشان تربينى وتعاقبنى وبعد ما تهدا وتندم تبقي تطلقها بقى وتصلح غلطك في حقها باعتذار وبالشبكة وبمؤخر الصداق
انت ملكش امان يا على
على :انا مليش امان يا ناهد ده انا محبتش فى حياتى غيرك بنات الدنيا كلها اختصرتهم فيكى وميلزمنيش منهم غيرك
ناهد :وانا مش هحس بالامان معاك يا على هفضل خايفة يجى عليك يوم تكسر قلبي تانى طول ما عصبيتك وغضبك بيتحكمو فيك وبيعموك وبيخلوك تتصرف من غير تفكير انا عمرى مهأمنلك الحب مش كفاية لوحده يا على الحب من غير ثقة وامان ملوش لازمة وانا مبقتش بثق فيك ولا هحس بالامان وانا معاك
طلبك مرفوض يا ابن عمى

وسيبته ودخلت اوضتى فضلت اعيط
هو انا كده كسرت قلبه بس ما هو كمان كسر قلبى مش بالسهولة دى نرجع
كلمت ساجدة حكتلها قالتلى انها هتجيلي البيت الكلام فى التليفون ده ميلزمهاش

ساجدة :فكرتك اول ما يتقدملك هترجعيله لانك بتحبيه
ناهد :بحبه بس مبثقش فيه ولا بأمنله يا ساجدة مش بالساهل كده ارجعله مش بالساهل يكسب ثقتى اللى خسرها
ساجدة بابتسامة :انا فخورة بيكى وبقوتك يا ناهد بجد..ايه الصوت ده جالكم حد
ناهد :ده صوت عمتى عنايات
ساجدة :طيب همشي انا بقي وانتى اخرجى اقعدى مع عمتك
ناهد :لسه بدرى خليكى قاعدة معايا شوية
ساجدة :هجيلك تانى تعالى بس خرجينى علشان اسلم على والدتك وعمتك وامشي
ناهد وهى بتسلم على عنايات :عمتو اذيك وحشتينى
عنايات :وانتى كمان يا حبييتى
ناهد :دى ساجدة صاحبتى
ساجدة :اهلا يا طنط انا عرفت ناهد جايبة الحلاوة دى كلها منين حقها لما تكون مامتها قمر كده وعمتها قمر لازم تطلع حلوة زيهم
عنايات وهى بتضحك :والله انتى اللى قمر يا حبيبتى ولسانك بينقط شهد
صفية :اه والله يا عنايات ومفيش فى اخلاقها كمان دى ناهد بتحبها وروحها فيها
ساجدة :وانا كمان بحبها يا طنط ناهد ما شاء الله عليها مفيش منها استأذنكم انا بقي مضطرة امشي
صفية :ما لسه بدرى يا حبيبتى
ساجدة :علشان متأخرش علي البيت بس وان شاء الله هاجى تانى فرصة سعيدة انى شوفت حضرتك يا طنط عنايات
عنايات :انا اسعد يا حبيبتى
ساجدة :بعد اذنكم
عنايات وصفية :اتفضلى يا حبيبتى

بعد ما ساجدة مشيت ماما وعمتى سألونى عنها لو يعنى مخطوبة او مقرى فتحتها قولتلهم لا قالو ولا حد حاجزها او متكلم عليها قولتلهم معرفش هما عايزينها لعمار
وانا الفكرة عجبتنى جدا بس قولتلهم انى هشوف كده لو مش محجوزة لحد هفاتحها فى ان عمار يتقدملها
انا عارفة ان ساجدة لا محجوزة ولا حاجة بس قولتلهم كده علشان لو رفضت اقولهم انها محجوزة بحيث ميبقاش فى حرج بينها وبين اهلى وكلمتها فى الموبايل علشان افاتحها فى الموضوع

ناهد :يا بنتى والله عمار ده مفيش منه طول بعرض واخلاقه زى الفل ومحترم وبيصلى ومبيشربش سجاير وبيشتغل ويقدر يفتح بيت
ساجدة :ومتقدملكيش ليه بقي مش انتى بنت خاله وهو اولى بيكى
ناهد :مش شايفنى اكتر من اخته واساسا عارف انى بحب على هو انتى رافضة علشان كان خاطب قبل كده
ساجدة :لا طبعا ده نصيب كمان انتى قولتيلي انه بقاله اكتر من تلت سنين مفكرش يخطب لحد ما اتقبل فكرة موتها واتجاوز حبه ليها وبقي قادر يخطب ويتجوز ويحب دى حاجة تخلينى احترمه واقدره مش ارفضه
ناهد :اومال ايه بقي رافضة ليه
ساجدة :مش رافضة بس لو جه وقعدت معاه ومرتحتش ورفضت كده اهلك هيزعلو منى
ناهد :يا ستى ده نصيب لو ليكم نصيب في بعض هتتجوزو ولو ملكوش خلاص واهلى ملهمش حق يزعلو مش هيزعلو متقلقيش وانا اصلا حسا انه هيحصل بينكم قبول والموضوع هيتم باذن الله
ساجدة :خلاص هديكى رقم بابا وهما يكلمو ياخدو منه ميعاد
ناهد بسعادة :تمام يا حبيبتى ربنا يقدملكم اللى فيه الخير

واتقدم عمار لساجدة وفكرت واستخارت ووافقت وهو كمان واتخطبو انا كنت فرحانة علشان ساجدة مش بس بقت صاحبتى لا كمان بقت مرات ابن عمتى
وكمان فرحانة لعمار وساجدة هما الاتنين كويسين جدا يستاهلو بعض من الاخر
بعد ما عدا شهرين على اول مرة اتقدملى فيها على اتقدملى تانى قبل الاجازة ما تخلص بشهر
قولت لبابا انى مش موافقة بس هو طلب من بابا يقعد يتكلم معايا

على :انا عايز فرصة اصلح غلطى فى حقك وحق نفسي يا ناهد عايز ابنى ثقتك فيا من تانى
انا مش هعرف اتجوز واحدة غيرك انا خطبت اية تلت اسابيع لا نقيت معاها الشبكة ولا كنت فرحان يوم الخطوبة ولا كنت عارف اتكلم معاها اصلا
مش انتى سألتينى هصلح غلطى فى حقك ازاى ادينى فرصة اصلحه ادينى فرصة اثبتلك انى هتغير ومش هكسر قلبك تانى
ناهد :انا مبقتش ناهد اللى انت سيبتها وروحت خطبت واحدة غيرها يا على انا اتغيرت بقا عندى صحاب وشخصيتى اتغيرت بقيت اقوى لو اتخطبنا مش هعاملك على انك على بتاع زمان لا هتبقي بالنسبالى واحد اتخطبتله علشان نعرف بعض ولو متفقناش يبقي مش هنكمل هتعرف تتعامل مع ناهد الجديدة هتفهم ان حكايتنا القديمة راحت لحالها
على بحزن :مبقتش فارق معاكى يا ناهد مبقتيش بتحبينى اللى كان بنا مش فارق غير معايا انا وبس

نبرة صوته والحزن اللى كان في عينيه خلونى عايزة اقوله انى عمرى ما حبيت ولا هحب حد غيره بس منعت نفسي واتحكمت في روحى انا خدت قرار يا على يتغير واكسبه للابد يا ميتغيرش واخسره للابد انما قلبي مش هيتكسر تانى بسببه ومش هعيش ليلة تانية زى الليلة اللى خطب فيها الليلة اللي حسيت انى هموت فيها من كتر الوجع اللي حسيت فيها ان قلبى بيتحرق مش هسمحله بسبب غضبه وعصبيته يخلينى اعيشها تانى
اتحكمت في نفسي ورديت عليه

ناهد :اللى فات ده نهايته كانت انك روحت خطبت واحدة غيرى يا على غلطت في حقها وفى حقى وفي حق نفسك
انا بقولك انى هديلك فرصة نبدء مع بعض من جديد لو اتغيرت هنكمل سوا ونتجوز ولو متغيرتش يبقي ربنا يرزقك الخير
مع واحدة غيرى يا ابن عمى ويرزقنى الخير مع واحد غيرك
على :قولتلك قبل كده الخير اللى ليا فى الدنيا هو انتى

لا انا هضعف كده هضعف واقوله انى بحبه بالراحة يا عم قلبي الصغير لا يتحمل وربنا
المهم حاولت اتحكم فى نفسي ومبينش انى اتأثرت بكلامه مع انى اتأثرت جدا جدا يعنى

ناهد :احم احم..اا..تمام يبقي انا هقولك شروطى وانت قرر بقي هتتحملها ولا لا
على بغضب :شروط.. شروط علشان تقبلي تتجوزينى يا ناهد

خوفت انا كده خوفت عينيه بتطلع نار وهيقوم يعمل منى بوفتيك انا عارفة
حاولت متنيلش ابين خوفى واتحكم فى نفسي على لازم يفهم انى اتغيرت وان هو كمان لازم يتغير

ناهد :ايوه شروط مش الجواز عرض وطلب انا هقول شروطى وانت قول شروطك اتفقنا كان بها نتخطب متفقناش خلاص بقي شوف نصيبك مع واحدة غيرى
على وهو بيحاول يتحكم فى عصبيته :لا هنتفق ان شاء الله انتى ملكيش اختيار غير اننا نتفق خلى فى علمك يعنى
ناهد وهى بتحاول متبينش انها خايفة :اولا انا هشتغل بعد الجواز
على :نعم يا اختى وانا مش هعرف اصرف عليكى
ناهد :لا هتعرف يا على بس انا متعلمتش كل السنين دى علشان اخد شيهادة التخرج اعلقها فى الصالة
على :ولو شغلك جه على حساب بيتك
ناهد :ساعتها هسيبه لان البيت اكيد اهم عندى
على :ماشى هسيبك تتزفتى قصدى تشتغلى
ناهد :انا بقى عندى اصحاب
على :كام واحدة اوعى يكون فيهم ولاد بموتك دى على فكرة

وعهد الله خوفت وقلبي هيقف من الخوف حرام كده

ناهد :لا مفيهمش ولاد مش علشانك على فكرة بس علشان ده حرام وعندى اربع صحاب بس ساجدة اقرب واحدة فيهم ليا
على :دى اللى عمار خطبها صح
ناهد :اه هيا المهم انا هخرج مع اصحابي دول هحضر خطوباتهم وافراحهم بعد ما اتجوز مش هقطع معاهم مش ههمل بيتى طبعا بس اليوم طويل يعنى وانا هقدر اوفق بين بيتى وبينك وبين شغلى وصحابى
على :بقا عندك حاجات تانية في حياتك غيرى يا ناهد

هعيط واقوله انى معنديش اهم منه وبحبه اكتر حاجة فى الدنيا الموضوع طلع اصعب مما اتخيل
حاولت اتحكم فى نفسي واكمل الطريق اللى بدءته للاخر علشان مندمش بعد كده

ناهد :وانت كمان يا على هيبقي في شغلك وصحابك واهلك وولادنا
الخطوبة هتكون سنتين
على بصوت عالى :نعم يا اختى شكلك اتجننتى خطوبة مين اللى هتكون سنتين
ناهد :هتتعصب من اولها
خطوبتنا هتبقي سنتين مش هتجوزك انا غير لما اتاكد انك اتغيرت لما ارجع اثق فيك تانى ابقي اتجوزك ولا اتجوزك وانا مبثقش فيك ولا بحس بالامان معاك
على :من غير ما تسممى بدنى بكلامك ده
سنتين كتير يا ناهد انا عايز اتجوزك امبارح مش بكرة وانتى تقوليلي سنتين
ناهد :خلاص سنة ونص
على :هزيها كمان شوية علشان خاطرى
ناهد وهى بتضحك :انت بتفاصل فى تمن نقلة بطاطس خلاص سنة وتلت شهور ومش هقللهم عن كده
على وهو بيحاول يتحكم فى نفسه :ماشي
ناهد :ماشى ايه
على :ماشى متنيل موافق عايزة ايه تانى ولا شروطك خلصت كده
ناهد :شوفت اديك متعصب عليا اهوه
على بابتسامة سمجة :مين قال انى متعصب ده انا هادى واعصابي تلاجة كملى شروطك كملى
ناهد :هو مش شرط بس انا عرفت ان اللى حصل بنا قبل كده حرام صداقتنا يعنى
على :صداقة مين ياما حب سبع سنين خلتيه سيادتك صداقة
ناهد :حبنا يا على كان حرام انا استغفرت انت كمان استغفر وعايزين فى الخطوبة منغضبش ربنا
على :ايوه يعنى ايه
ناهد :يعنى مش هنخرج لوحدنا ابدا مش هتقولى كلام حلو خالص ولا انا طبعا محدش فينا هيعبر للتانى عن مشاعره خلى ربنا يباركلنا المرة دى يا على مش عايزين نغضبه تانى
على :ماشى ولو انها صعبة بس موافق مدام ده اللى يرضى ربنا
طيب ما نكتب الكتاب مش كده هيكون احسن
ناهد :هو هيكون احسن لان الحدود هتبقي اقل بس لما نكتب الكتاب واكتشف انك مش ممكن تتغير واسيبك انا كده هبقي مطلقة يا على
على :تسيبي مين ده بموتك او موتى قال تسبينى قال
بس ماشى يا ناهد علشان تعرفي انى شاريكى وانى ندمان على اللى عملته فيكى وعلشان تعرفى انى مستعد اتغير علشانك انى مستعد اعمل اى حاجة فى الدنيا علشانك

طبعا كلامه ثبتنى جدا ووقف قلبي من الفرحة بس كان لازم مبينش انا عارفة ان الكلام سهل وان الصعب هو التنفيذ
كلام على مش هيرجع ثقتى فيه مش هيحسسنى بالامان معاه اللى هيرجع ثقتى فيه افعاله اللى هيخلينى احس بالامان معاه افعاله افعاله وبس

ناهد:تمام انا كده خلصت انت شروطك ايه
على :لا انا مليش شروط انا عايزك ترجعيلى ونتخطب ونتجوز وبس

ووافقت وحددنا ميعاد للخطوبة ونزلنا علشان نجيب الشبكة
ناهد :طبعا دى مش اول مرة تيجى الصاغة علشان تجيب الشبكة
على :هتصدقينى لو قولتلك انى المرة اللى فاتت كأنى مجتش ومركزتش فى ولا محل دخلناه لان كل اللى كان بيحصل مكنش فارقلى
ناهد :احم احم طيب تعالى ننقي سوا
على بابتسامة :يلا

يوم الخطوبة
ناهد :حاسس ايه وانت بتخطب للمرة التانية
على :حاسس انها اول مرة حاسس بفرحة الدنيا كلها فى قلبي انا من الفرحة منمتش اخيرا خطبتك ودبلتى بقت فى ايدك ودبلتك فى ايدى
ناهد وهى بتحاول تتحكم فى نفسها :ايه رايك حلوة الدبلة بتاعتى
على بابتسامة :حلوة لانها فى ايدك

بعد شهر
على :انتى مبترديش على موبايلك ليه
ناهد :مسمعتوش يا على
على :خمستاشر مرة انا رنيت عليكى خمستاشر مرة وانتى مسمعتيهوش ليه انطرشتى
ناهد :ايه انطرشتى دى عادى كنت في المحاضرة وعملته صامت ونسيت افك الصامت لما المحاضرة خلصت حصل ايه يعنى
على :حصل انى قلقت عليكى خوفت يكون حصلك حاجة لو مكنتيش رديتى انا كنت هجيلك الجامعة من قلقي وانتى بكل برود بتقوليلى انك عاملة الموبايل صامت ونسيتى تغيرى الصامت وكأنك مش مخطوبة للوح هيتنيل يقلق عليكى
ناهد :خلاص مش هعمل كده تانى خلاص حقك عليا بقى يا على عديهالي المرة دى وبأذن الله مش هتتكرر تانى
على :المهم انك كويسة انا هقفل خلى بالك من نفسك
ناهد :متقفلش انا لسه عندى وقت قبل المحاضرة التانية
على :لا هقفل انا عندى شغل سلام

بعد شهرين
على :من ساعة محددو ميعاد لفرح عمار وساجدة وانا مش عارف اتلايم عليكى
ناهد :مشغولة بجيب مع ساجدة اللى ناقصها انت عارف انها اعز اصحابي كمان معندهاش اخوات بنات
على :مع انى مضايق انك مشغولة عنى بس كفاية انك فرحانة لصاحبتك عقبالنا
ناهد :ان شاء الله اخبار شغلك ايه
على :تمام الحمد لله

بعد شهر
على :افهم بقي واقفة مع نادر ليه انتى
ناهد :مسمهاش واقفة مع نادر اسمها واقفة مع ولاد عمك وعمتك انا كنت واقفة مع نادر ومنى وريهام اخواته ودينا بنت عمتو عنايات مكنتش واقفة معاه لوحدى ولا هو كان طالبلي اتنين ليمون فى كازينو الوردة البيضا يا على المفروض تكون واثق فيا وفى اخلاقى اكتر من كده
على :هى هتهب منك ولا ايه انا اكيد واثق فيكى وفى اخلاقك بس متنيل غيران اعمل ايه يعنى في روحى
ناهد :احم احم متعملش حاجة خلاص مش مشكلة وانا هحاول مقفش معاه تانى حتى لو كنا مجموعة هيبقي اخرى اذيك الحمد لله وخلاص
على :ولو متقوليش اذيك يكون افضل
ناهد وهى بتضحك :لا ده انت حالتك صعبة

بعد خمس شهور
على :ايه رايك الجمعة الجاية نخرج انا وانتى ونيرة وملك اخواتى نروح الملاهى او السينما ونتغدى بره
ناهد :لا اتفقت مع اصحابي نخرج مش هينفع
على :وطبعا لو قولتلك ازاى تتفقى معاهم من غير ما تقوليلي هتقوليلي انا استأذنت بابا وانت خطيبي مش جوزى ومش المفروض استأذنك
بس تفتكرى كمان انه مش من حقى انك متتفقيش على خروجة مع اصحابك فى يوم الجمعة اليوم اللى المفروض انى بجيلك اشوفك فيه فى البيت يا ترى نسيتى ان ده اليوم اللي بجيلك فيه ولا افتكرتى ومفرقلكيش انتى بتحاولى تعملى ايه يا ناهد بتختبرينى علشان تتاكدى انى اتغيرت
يعنى انا علشان اثبتلك انى اتغيرت لازم اسكت واعدى حاجات مفيش راجل فى الدنيا يعديها ولو مسكتش ابقى متغيرتش صح انا كده مبقاش اتغيرت انا كده ميبقاش عندى دم يا ناهد ابقي مبحسش ولا عندى رجولة ولا كرامة
ناهد :على انا..
على قاطعها :انتى جيتى عليا اوى يا ناهد وغلطتى فى حقى عندك حق الحب لوحده مش كفاية من غير ثقة انا مبقتش واثق انك بتحبينى من اصله بتحبينى ازاى وانتى محسسانى انى عامل زى اللي ماشي على حبل فى السيرك لو غلط وفقد تركيزه يقع وتتقطم رقبته
عمال اصبر نفسي واقول بتعمل كده من حبها فيك بتسمعك الكلام اللي يضايق ده من غيرتها انك خطبت غيرها
بتيجى عليك من خوفها بس مسيرها تطمنلك وخوفها يروح وميفضلش غير حبها بس انتى وصلتينى انى مبقتش واثق فى حبك ليا حاسس انك مبتحبنيش ولا عمرك حبتينى في يوم لو كنتى حبتينى مكنش قلبك قسي عليا بالشكل ده كنتى شوفتى انى بتغير علشانك بتحكم فى كلامى وافعالى علشان تعرفي ان حبك فى قلبي اكبر من عصبيتى وغضبي اكبر واهم من اى حاجة فى الدنيا بالنسبالى
بس انتى مشوفتيش كل ده انتى مش شايفة غير نفسك وبس كان عندك حق لما قولتيلي انك اتغيرتى بس انتى اتغيرتى للاسوء يا ناهد
اخرجى مع اصحابك ولو انى عارف انى موافقتى من عدمها مش فارقالك اخرجى يا ناهد انا خلاص مش عايز اشوفك بجد مش عايز اشوفك

وقفل السكة فى وشى وانا فضلت اعيط
انا بالغت فى افعالي بس والله مكنش قصدى انا بحبه وعايزاه يتغير علشان افضل بحبه انا كنت عايزة احافظ عليه ازاى اخسره كده لا مش هخسره انا بحبه انا محبتش في حياتى غيره مش معقول اخليه يسيبنى مش معقول اكسر قلبه واشككه فى حبى ليه الوجع اللي حسيت بيه وهو بيتكلم كان اكبر من الوجع اللي حسيت بيه لما خطب غيرى لانى كنت عارفة انه بيحبنى انا
حتى لو غضبه خلاه يخطب غيرى بس عارفة انى الوحيدة اللي فى قلبه
انما انا بغبائى ومبالغتى فى خوفى خلتنى حسسته انى عمرى ما حبيته ده قالى انه مش عايز يشوفنى يعنى ايه هيسبنى لا مستحيل ده انا اروح فيها
لبست اسدالى وطلعت شقتهم طلبت من نيرة تندهولى

ناهد وهى بتعيط : انا اسفة والله مكنش قصدى اجى عليك بالشكل ده انا عايزة نكتب الكتاب بكرة انا اسفة والله اسفة
على :اهدى اهدى بس وبطلى عياط
ناهد وهى بتعيط اكتر :اهدى ازاى بعد ما قولتلى مش عايز اشوفك لا احنا نكتب الكتاب علشان متقدرش تسيبنى
على :انا مقولتش انى هسيبك
ناهد :امال معناها ايه مش عايز اشوفك دى
على :معناها انى مضايق منك يا ناهد معناها انى حاسس انك مش بتحبينى ولا انا فارق معاكى
ناهد وهى بتعيط :انا اسفة انى حسستك بكل ده والله انا مش فارق معايا فى الدنيا كلها غيرك انا بحبك اكتر من نفسي يا على اوعى تقول انى مبحبكش تانى
على بابتسامة :مش قولتى حرام نعبر عن مشاعرنا فى الخطوبة
ناهد وهى بتضحك :استغفرك ربي واتوب اليك خلاص نكتب الكتاب بقي علشان اعبر براحتى لانى مش هقدر امسك نفسي واتحكم في كلامى اكتر من كده
على وهو بيضحك :خلاص نكتب الكتاب ونعبر براحتنا

كتبنا الكتاب بعدها بيومين كان فاضل على امتحاناتى اسبوعين
امتحنت وخلصت امتحانات
ولقيت على بيقولى انه وصى كذا حد فى اصحابه شغالين مدرسين علشان لو في مدرسة محتاجة مدرسة كيميا يقولوله
فرحت لانى حسيت انه اتغير علشانى بيدورلى على شغل علشان ده كان اتفاقنا علشان عارف انى دى حاجة هتسعدنى بدا راحتى على راحته من فرحتى لقتنى بقوله

ناهد :متيجى نحدد ميعاد فرحنا
على :بس فاضل اربع شهور فى المدة اللي اتفقنا عليها
ناهد بابتسامة :مش لازمنى بس لو لازمينك نستنى ماشى
على بسرعة :لازمين مين انتى اتجننتى ناديلي عمى اتفق معاه على الفرح ناديه يلا متنحيش

واتجوزنا انا وعلى كنا بنتخانق اه كنا بنتخانق طبعا زى اى اتنين متجوزين كان بيتعصب عليا اه كان بيتعصب بس بيتعصب فى المواقف اللي تستاهل انه يتعصب علشانها وكنا بنتخاصم ونتصالح وعمرى ما خوفت انه في خناقة من خناقاتنا يرمى عليا يمين الطلاق ولا يدخل عليا فى يوم بواحدة اتجوزها عليا
على فهم انه لما سمح لغضبه يتحكم فيه قبل كده وخطب غيرى مكنش بيربينى لا هو كان بيغلط في حقى وحق ونفسه وحق البنت اللي خطبها
فهم ان مشاكلنا مينفعش يدخل فيها ناس تانية ملهمش ذنب
واتعلم يسمعنى ويتحكم في عصبيته شوية علشانى بقينا بنتناقش الحمد لله اللى حصل علم على يسمعنى ويحترم رايى
وانا اتعلمت ان اوقات واحنا بناخد حقنا بنجور على اللي قدامنا فبنظلمه اتعلمت ان المبالغة وحشة وان لما نيجى ناخد حقنا ناخده بالعقل علشان منظلمش حد
اتعلمت كمان انى مينفعش اسيب خوفى يتحكم فيا والا هخسر كتير
اتعلمت كمان ان كل حاجة بتحصل بسبب ولسبب
على خطب غيرى يمكن علشان هو يتغير ويتحكم في عصبيته وغضبه وميسيبهمش يتحكمو فيه وفى حياته او علشان انا اتغير للاحسن شخصيتى تبقي اقوى واعتمد على نفسي اكتر او يمكن علشان نبدء من جديد بس نبدء صح ونراعى ربنا فى كل اللي بنعمله ونستغفر عن اللي فات لانه كان ذنب
ويمكن علشان انا اعرف ساجدة ونبقي صحاب
ويمكن علشان عمتى تشوف ساجدة وتفكر تخطبها لعمار ويشوف عمار ساجدة ويخطبها ويتجوزها ويخلفو ناهد وهيثم الحكاية دى ضايقت على لانه غار عليا بس انا بالعافية اقنعته ان ساجدة اللي اختارت الاسم مش عمار لانها بتحبنى لانى اعز اصحابها
بالمناسبة انا وعلى خلفنا مالك ومريم ومى
يمكن ده حصل علشان سبب في دول ويمكن علشان كل الاسباب دى ويمكن علشان سبب تانى خالص غيرهم الله اعلم بس اكيد ربنا ليه حكمة من اللى حصل ده

الخلاصة كل حاجة في حياتكم بتحصل بسبب ولسبب حتى لو معرفتوش ايه السبب دلوقتى مسيركم تعرفو بعدين
الاكيد ان كل اللي بيحصلنا هو خير من ربنا حتى لو اتوجعنا وحزنا وملينا الدنيا بكا بسبب اللي حصلنا ده ميمنعش انه اكيد فيه خير لينا بس احنا اللى مش عارفين بس ربنا عارف
ربنا وبس اللى عارف الخير لينا فين وايه الاحسن لينا خلو عندكم ثقة في ربنا فى حكمته وحسن تدبيره واختياره هى دى الخلاصة علشان تعيشو صح💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا