فاطمة :بص يا حسين انا عارفة ان القعدة دى مش على هواك
حسين :وايه عرفك
فاطمة :سمعتك وانت بتقول لطنط نجاة والدتك انك مش عايز لا تخطب ولا تتجوز دلوقتى لما زهقت من كتر العرايس اللي بتجبهملك
واضح انك وافقت علشان جدى وواضح كمان انك بتحبه لدرجة انك معترضتش على كلامه
حسين :هو انتى اعترضتى
فاطمة :اه بس هو مسمعليش واضايق منى وخاصمنى فاضطريت اسايره واوافق بس صدقنى الموضوع ده مش هيكمل صدقنى وخليك واثق فيا انا عندى خطة
حسين :خطة ايه دى
فاطمة :لا مش هينفع اقولهالك هنا بعد الخطوبة جدك هيوافق نخرج سوا عادى مدام اتخطبنا وقتها نتكلم وافهمك اللى فى دماغى
حسين :يعنى انتى موافقة نتخطب
فاطمة :جدى مسابليش اختيار تانى وافق انت كمان وصدقنى انا هخلصنا من الحوار ده بأقل خساير ممكنة ليا وليك
كمان اعتبرها فرصة ليك ترتاح شوية من العرايس اللى طنط نجاة بتجبهملك
حسين :خلاص انا هخرج واقول لجدى اننا اتكلمنا سوا ومتفقين وموافقين احنا الاتنين ونحدد ميعاد نجيب الشبكة وميعاد للخطوبة كمان تمام
فاطمة :تمام
بعد الخطوبة بيومين
حسين :مش مصدق انك طلع عندك حق وجدى وافق نخرج سوا لوحدنا
فاطمة :علشان انت حفيده وهو ضامنك وضامن اخلاقك لو كنت واحد غريب مكنش وافق انا عارفة جدى
حسين :تمام تحبى نروح نتغدى فين
فاطمة :مطعم سورى اصلى بحبه
حسين :بتحبى الاكل السورى
فاطمة وهى بتضحك :لا بحب اللى بيعملو الاكل السورى..انت مبتضحكش ليه انا بهزر
حسين :مش هنروح مطعم سورى اصل اكلهم تقيل على قلبى وملوش طعم بالنسبالى
فاطمة :انت مبتحبش الاكل السورى
حسين :لا مبحبش اللى بيعملوه
فاطمة :يا حسين اكلهم حلو طيب هاخدك مطعم تحفة هيعجبك
حسين :لا اقترحى مطعم تانى نروحه
فاطمة :خلاص اقترح انت
حسين :تمام يبقي نروح مطعم سمك اخبارك ايه مع السمك بتحبيه
فاطمة :بحبه اه يبقي خلاص نروح مطعم سمك
فى المطعم
حسين :كنتى قولتيلي عندك خطة
فاطمة :اه بص يا سيدى احنا نتخطب كام شهر وبعدين انت تقول مرتاحتش ونفسخ الخطوبة
حسين:وليه مش انتى اللي تقولى كده
فاطمة :جدى عارف انى مكنتش عايزة اتخطب وهيبقي عارف انى بتلكك ومش هيصدقنى
لكن هيصدقك لانك وافقت مجرد ما قالك وبالتالى مش هيشك فيك
حسين :ايوه يا ناصحة بس ما هو ممكن لو عملت زى ما قولتى كده وقولت مش مرتاح يقولى حاول تقرب منها وتعرفها وانتو ملحقتوش اساسا ممكن يسالنى مش مرتاح ليه بالظبط اقوله ايه ساعتها بقي
فاطمة :معاك حق مفكرتش فيها دى طيب نعمل ايه
حسين :نتعرف على بعض بحيث لما نتكلم على عيوب فى بعض مش متحملينها يبقي الكلام مظبوط ومقنع وميخليش جدى يشك
فاطمة :كلامك سليم
يبقي احنا نتعرف علي بعض انت تعرفنى عليك وانا اعرفك عليا
عايزين كمان فى الاول نبان مبسوطين وتمام وبعدين نبدء بقي نعمل مشاكل سوا كده هنبقي مقنعين صح
حسين:صح
فاطمة :طيب كده احنا هنفذ الخطة الجديدة دى
هنتكلم سوا كتير هتعملى مفاجاة فى عيد ميلادى وانا كمان هعملك اه صح انت عيد ميلادك امتى
حسين :تسعتاشر حداشر وانتى
فاطمة :لا انا قبلك انا تلاتين تسعة
حسين :عيد ميلادك قرب
فاطمة :اه عايزاك بقي تعملى عيد ميلاد وتخلى شيماء ونورا يساعدوك فيه وتجبلى هدية واعمل فرحان وانا هعمل متفاجئة بقى وفرحانة والدنيا مش سيعانى
حسين :هتعملى متفاجأة
فاطمة :بص هبهرك
كمان هنزل بوستات من نوعية
الحياة بتحلو لما يدخل فى حياتنا اللي يحليها ويحلينا وانا حياتى احلوت خلاص
ويومى مبيعديش من غيرك واليوم فى بعدك سنة
وكلام لغة عربية فصحى كمان وكل شغل صفحة حب لا يموت ده
حسين وهو بيضحك :انتى ليكى فى الجو ده
فاطمة وهى بتضحك:لا مليش بس هحاول علشان الخطة تنجح بقي هنزل بوستات رومانسية واعملك منشن
حسين :بس انا مليش في جو البوستات ده مش هرفعلك بوستات
انا كمان مش هرد عليكى بتعليقات اوفر انا بتخنق من صحابى اللي بيعملو كده ومليش فى الجو الملزق ده
فاطمة :مش لازم ترفع انت كمان ولا تعلق بكلام اوفر بس على الاقل رد بايموشنات تمام
حسين :تمام
فاطمة :اضحك طيب عايزة نتصور وافرج جدى على الصور
حسين وهو بيبتسم :تمام احنا متصورناش غير بموبايلك تعالى نتصور بموبايلي
فاطمة :لا ملوش لازمة مش هرتاح وفى صور ليا معاك
حسين :ليه
فاطمة :هو اكمل اخوك او محمد وبلال ولاد خالى رضوان حد فيهم معاه صور ليا
حسين :لا بس انا مش زيهم انا خطيبك
فاطمة :خطوبة هتتفسخ ومش عايزة يبقى معاك صور ليا كمان فعلا مش هكون مرتاحة
حسين :يعنى انا مش هاخد الصور دى
فاطمة :لا طبعا مش هديهالك
حسين :بس كده غلط لازم تكون معايا البت شيماء تدخل عليا وانا بتفرج عليهم تقوم تسيحلى قدام العيلة كلها كده يعنى
مينفعش ميكونش معايا صور ليكى دى حاجة غريبة وهتشكك جدى فينا
فاطمة :معاك حق طيب بص هبعتهملك بس متنزلهمش لا حالات فيس ولا واتس انا صورى متنزلش واصحابك يتفرجو عليها
حسين :انا اكيد مش هعمل كده حتى لو انتى كنتى هتوافقى انا مكنتش هرضى ومبفهمش ازاى البنات بتنزل صورها وكل من هب ودب يشوفها كده
فاطمة :يبقى متفقين ..ادينى بعتهملك
عايزين كل ما نخرج نتصور بقي علشان نحبوك الحكاية ويبان اننا عايشين اجمل ايام حياتنا اتفقنا
حسين :اتفقنا
فاطمة :تمام اول مهرجع البيت هنزل البوست وشيماء لما تشوفو هتسيح وهتعرف الكل باللى نزلته
حسين :رغاية شيماء اختى
فاطمة :لا والله دى قمر خالص هى بس بتتكلم كتير وفرحانة بحوار خطوبتى انا وانت ده فهتبقي عايزة تتكلم عنه كتير واحنا هنستغل ده لصالحنا
بعد ساعتين
حسين :جامد اوى الكلام اللى نزلتيه ده
فاطمة :لا قولتلك انا هظبط الدنيا عيب عليك
حسين :كنت عايز اكلمك فى الموبايل بس لقيت انى لسه مش معايا رقمك ابعتهولى
فاطمة :حاضر
حسين :الو يا فاطمة
فاطمة :اا..الو يا حسين اخبارك ايه
حسين :انا تمام الحمد لله انتى كويسة
فاطمة وهى بتاخد نفس وبتطلعه :هو بصراحة انا عارفة اننا لازم نتكلم علشان الخطة وان خطوبتنا دى اى كلام اصلا بس..انا..محروجة شوية
حسين :من ايه محروجة
فاطمة :يعنى من الكلام معاك فى الموبايل
حسين :دى اول مرة تكلمى راجل فى الموبايل
فاطمة :غير الارقام الغلط او اللي بتعاكس اه دى اول مرة
هو انا كنت اتخطبت قبل كده علشان اتكلم فى الموبايل
وانت طبعا دى مش اول مرة صح
حسين :وهو انا كنت خطبت قبل كده علشان اكلم بنت فى الموبايل
فاطمة وهى بتضحك :يعنى انت على الابيض مرتبطش قبل كده محبتش قبل كده
حسين :غير الارقام الغلط والارقام اللي بتعاكس يبقي دى اول مرة
فاطمة وهى بتضحك :ارقام بتعاكس انت فى بنات بتتصل تعاكسك
حسين:اه احيانا كمان بتضحكى ليه
فاطمة :اصلى مش متخيلة الفكرة يعنى بيتصلو يقولولك انك صوتك حلو وهما عايزين يتعرفو وكده يعنى
حسين :انتى الارقام اللي بتعاكس بتقولك كده
فاطمة :انا مبديلهمش فرصة يقولو كده لما بلاقى ان اللى متصل راجل بقفل قبل ما يلحق يعاكس اصلا وبحطه بلاك ليست على طول بقي لا بهزق ولا بشتم ولا باخد ذنوب على الفاضى
حسين :عاش هو ده جدعة يا بطوط
فاطمة :بطوط
حسين :اا..اه بطوط عادى بدلعك
فاطمة :تقوم تقولى بطوط
حسين :ما البيت كله بيقولك يا بطة وجدى بيقولك يا بطاطا ومانع اى حد غيره يقولك كده فمش فاضل غير بطوط اقولهولك انا
فاطمة :طيب ده فى الخطوبة بس صح يعنى لما الخطة تنجح ونفسخها هتبطل تقولها صح
حسين :وابطل ليه
فاطمة :علشان كل حاجة هترجع زى الاول وهو انت قبل كده كنت بتقولى يا بطوط
حسين :لا
فاطمة :يبقي خلاص كل حاجة هترجع زى الاول واولهم بطوط دى ما انت مش بتكلم بنت اختك يعنى
حسين وهو بيضحك :ماشى يا بطوط وانتى هتدلعينى بايه
فاطمة :وانا ادلعك ليه
حسين :يعنى هبقى بدلعك لوحدى شكلى هيبقى غريب
فاطمة :معاك حق طيب اقولك ايه
حسين :قولى انتى
فاطمة وهى بتفكر :اا..سونا وسنسن الدلعين دول انا بكرههم اكتر من بعض
حسين :سونا وسنسن ايه بس ده دلع مايع جدا طيب ما تقوليلي سحس
فاطمة :لا ده بقوله لجدى
حسين :نعم بتقولى لجدى يا سحس وبيسكتلك
فاطمة :لما بيكون مزاجه رايق بس بيسبنى اقولهوله طيب ايه رايك اقولك يا اتش
حسين :اتش
فاطمة :اه دلع جديد وحلو ومحدش بيندهلك بيه
حسين :تمام اتش اتش اتفقنا يا بطوط
فاطمة وهى بتضحك :اتفقنا يا اتش
عجبتك الجملة اللى نزلتها فى بوست وعملتلك اشارة
حسين :البوست قدامى عاللاب اهو
وانى اراك بعين قلبى جنة يا من به مر الحياة يطيب
جامدة الجملة بصراحة
فاطمة :وانت رادد عليا بايموشنات بس
حسين :قولتلك مش هعرف ارد بكلام وانتى قولتى مش مهم رد بايموشنات
فاطمة :عارفة انى قولت كده بس حسا شكلى اهبل وانا كتبا كده وانت رادد عليا بايموشنات وخلاص
حسين :وهو يعنى انتى مألفة الكلام ده ما هى جمل مش بتاعتك يا بطوط بسيطة الحكاية متكبريهاش
فاطمة :انا كده هقلق على مراتك المستقبلية انت ملكش فى الكلام الحلو
حسين :مش اوى
فاطمة :لو حبيت هتلاقى الكلام بيطلع منك غصب عنك
حسين :تفتكرى
فاطمة :بيتهيألى انا مجربتش بس بقولك رأيى
حسين :ومش ناوية تجربى
فاطمة :لا
حسين:ليه
فاطمة :علشان مبثقش فيكم هحب ازاى وانا مبثقش
حسين :مبتثقيش فينا احنا الرجالة يعنى
فاطمة :اه..لقيتها انت ممكن تبقي تقول لجدى مبتثقش فيا وشكاكة وخنقانى
حسين :هيقولى الستات كلها كده انت لازم تسيطر عليها ولا انت مش راجل ولا ايه
فاطمة باحباط :هيقول كده فعلا خلاص نبقي نشوف حاجة تانية اكيد هنلاقى فيك او فيا عيوب لا تحتمل يعنى
حسين :ولو ملقيناش هنعمل ايه هنطلع فى بعض القطط الفاطسة
فاطمة وهى بتضحك :اه ولو ملقيناش نجيب قطط ونفطسها ونقول انها مننا احننا
حسين وهو بيضحك :طلعتى لمضة يا فاطمة مع ان شكلك يبان هادية
فاطمة :لمضة ايه الكلام القديم ده كمان يا سيدى انا ببان هادية للى يشوفنى من بعيد انما اللى يشوفنى من قريب هيعرف انى مش هادية خالص
حسين :يا رب افضل دايما قريب منك
فاطمة:افندم
حسين :ايه يا بطوط علشان الخطة بتمرن انى ارد عليكى بكلام حلو
فاطمة :قشطا عليك يا اتش برافو لا دماغك حلوة وعجبانى المهم انا هقفل علشان بكرة عندى شغل بدرى وانت كمان اه صحيح انت بتنام بدرى
حسين :لا انا بسهر
فاطمة :حتى فى ايام الشغل
حسين :حتى فى ايام الشغل وانتى
فاطمة :انا بحب السهر بس فى ايام الشغل بنام بدرى بس بسهر ايام الاجازة
حسين :ايه رايك استاذن جدى بكرة انى اعدى عليكى واخدك من الشغل ارجعك البيت
فاطمة :لا بكرة هتبقى اوفر اوى انت مش واقع اوى كده
كده جدى هيشك فينا خليها بعد بكرة او بعد يومين خليها كمان يومين
حسين :تمام
فاطمة :انا هقفل بقي تصبح على خير يا اتش
حسين :وانتى من اهل الجنة يا بطوط
فاطمة :احلى حاجة انك على نفس الخط معايا
شاطر قولى يا بطوط واقولك يا اتش علشان لسانا يتعود عليها ونقولها قدامهم وميبقاش شكلنا بنمثل عاش يا باشا اظن ان الخطة دى هتنجح يا اتش
حسين :يا رب يا بطوط الخطة تنجح يا رب
تانى يوم
حسين :السلام عليكم يا بطوط
فاطمة :وعليكم السلام يا اتش مكلمنى ليه مش اتفقنا تبقي تيجى تاخدنى من الشغل بكرة او بعده
حسين :تصدقى بالله انتى لا ليكى فى الخطط ولا نيلة
يا بنتى مش المفروض نكون بنتكلم كل يوم فى الموبايل خصوصا فى الاول كده
فاطمة :يييييي عليا معاك حق خلاص بس منتكلمش عن الخطة واحنا فى البيت حد يسمعنا نتكلم عنها واحنا بره
وطول ما احنا فى البيت نتكلم عادى زى مقولتلك ويكأننا بنعيش اجمل ايام حياتنا
حسين :ويكأننا
فاطمة وهى بتضحك :اه ويكأننا زباين عاديين
حسين وهو بيضحك :دى قلشة من فيلم صح
فاطمة :اه فيلم غبى منه فيه بحب الفيلم ده اوى
حسين :بتحبى التلفزيون
فاطمة :اه جدا بتفرج عليه كتير اصلا بس بحب الافلام اكتر من المسلسلات اصلى بزهق بسرعة
وانت
حسين :مليش غير فى ماتشات الكورة
فاطمة :ايه ده يعنى لو جينا نخرج هتودينا نشوف ماتش بدل ما نروح السينما
حسين وهو بيضحك :لا مش للدرجة دى نروح السينما عادى
فاطمة :طمنتنى طب ايه يومك كان عامل ايه فى الشغل
حسين :يومى في الشغل
فاطمة :مش قولنا ويكأننا زباين عاديين يا اتش
حسين وهو بيضحك :اه صح نسيت ويكأننا بنعيش اجمل ايام حياتنا تمام يا بطوط كان يوم عادى بس المفروض انهم هيرقو حد في قسمنا الشهر ده انا بشتغل جامد نفسي اخد الترقية دى
فاطمة :يا رب تاخدها يا اتش ان شاء الله هتاخدها مدام تعبت يبقي هتاخدها ربنا مش هيضيع تعبك
تانى يوم فى عربية حسين
فاطمة :طب اقول انك بتاع بنات وخونتنى
حسين :نعم يا اختى يعنى تدمرى سمعتى وسط العيلة كمان خونتك امتى هو انا لحقت مبقلناش اسبوع مخطوبين
فاطمة وهى بتضحك :كنت هستنى شوية يكون عدى مدة على الخطوبة بس معاك حق متنفعش خونتنى دى علشان العيلة ولا تنفع كمان مديت ايدك عليا
حسين :وانا امد ايدى عليكى ليه
فاطمة :انا مش هسمحلك تعملها انا كان قصدى اتحجج بيها بس مش هتنفع علشان احنا اهل لازم نفسخ الخطوبة بهدوء ومن غير مشاكل كبيرة
وعلشان كده لا ينفع اقول خانى ولا مد ايده عليا ولا شتمنى باهلى محدش هيصدق اصلا انك عملت كده باخلاقك دى
حسين :اخلاقى دى
فاطمة :ايوه انت محترم جدا يا حسين ولا بتاع بنات ولا ليك فى المشاكل ولا بتشرب سجاير حتى انت مبتشربش سجاير ليه ها مبتشربش سجاير ليه معكش فلوسها
حسين وهو بيضحك :لا معايا فلوسها بس عارف انها حرام كمان بعد اللى السجاير عملته فى ابويا وفى عمى رضوان وبعد امراض الدنيا اللى جابتهلهم انا مستحيل اشربها حتى لو هيدفعولى فلوس
فاطمة :طب اعمل ايه طيب اقول بخيل مش هيقتنعو انت كريم اوفر وايدك مخرومة اصلا
بس لقيتها اقول انك مبذر
حسين :جدى هيقولك هو مبذر خليكى انتى حريصة الست الواعية هى اللي تعرف تمشي حياتها صح مهما كان طبع جوزها
فاطمة باحباط :هيقول كده فعلا..انت رايح فين ده مش طريق البيت
حسين :هنتغدى بره انا استأذنت جدى
فاطمة :طيب هنقول ايه ما اكيد مش هنقول خنتك انا يعنى
طيب ما تقول لجدى ان استايلي مش عاجبك
حسين :استايلك مش عاجبنى ازاى يعنى
فاطمة :يعنى مثلا قوله مبتحطش مكياج ولبسها واسع حاسس انى خاطب واحد صاحبي
حسين :انتى عبيطة يا فاطمة ولا شايفانى بارايل
مكياج ايه اللي هضايق لانك مش بتحطيه ومين قالك اصلا انى هسمحلك تحطيه كمان لبس واسع ايه اللي هيضايقنى امال يعنى هلبسك ضيق علشان الناس تتفرج عليكى
انتى لو مكنش ده استايلك انا كنت هخليه استايلك علشان ده اللى ربنا امرك بيه وعلشان انا مرضاش على نفسي غير كده رجولتى هتمنعنى هو انا كنت سيبت شيماء ونورا اخواتى يلبسو محزق ويحطو مكياج علشان اسيب خطيبتى ومراتى تعمل كده
فاطمة بحرج :مش قصدى والله بس عادى فيه رجالة بتبقي عايزه كده
حسين :ميستاهلوش يبقو رجالة مدام مخلين اهل بيتهم فرجة للى يسوا واللي ميسواش
فاطمة :انا اسفة اعتبرها مجرد فكرة غبية وهلغيها زى ما لغيت اخواتها طيب ايه اقول لجدى ايه اقول مش رومانسي اه حلوة دى مش رومانسي وعملى زى الماكنة
حسين :هيقولك وهو انا كنت رومانسي مع ستك ولا حد فى اخوالك رومانسي مع مراته اعقلى وبلاش دلع اهم حاجة اخلاقه مش تقوليلي رومانسي ومش رومانسي والكلام الماسخ ده
فاطمة :جدى هيقول كده فعلا
طيب بص احنا نمشي الدنيا عادى ونفضل كام شهر كده ونتعامل عادى وتمام وبعدين من غير مشاكل ولا حاجة نقول اننا اخوات
ومش شايفين بعض اكتر من كده واننا حاولنا نبقي اكتر من اخوات ومعرفناش حلوة الفكرة دى
حسين :هى..
فاطمة قاطعته :صدقنى حلوة كده لا هنيجى يمة اخلاقى ولا اخلاقك هنفسخ الخطوبة من غير مشاكل ونفضل اهل زى ما احنا ومحدش هيشيل من التانى لا خالى ومرات خالى هيشيلو منى علشانك ولا ماما هتشيل منك علشانى
ولا جدى هيقول حاجة احنا هنتكلم عن احساسنا وهو مش هيدخل جوا قلوبنا يعنى فهيصدق
حسين :جدى مش هيصدقنى لو قولت كده قصدى يعنى مش هيصدقنا احنا الاتنين
فاطمة :هيصدق هيبص في عينيا ومش هيلاقى فيهم حب ليك فهيصدقنى
حسين :واما يبص فى عينيا انا
فاطمة :مش هيلاقى فيهم حب ليا فهيصدقك هيلاقى اننا اتخطبنا شهور ومفيش حاجة جوانا اتحركت محدش فينا مكانته عند التانى اتغيرت فهيصدق احنا بس هنتصرف عادى الكام شهر الجايين
حسين وهو بيضحك :ويكأننا عايشين احلى ايام حياتنا يا بطوط
فاطمة وهى بتضحك :بالظبط كده يا اتش ها هتودينا فين نتغدى مطعم سورى
حسين بسرعة :لا مطعم سورى لا ايه رايك نروح مطعم بيقدم اكل ايطالى
فاطمة بابتسامة :ايطالى ايطالى انا موافقة
بعد اسبوع
حسين :كل سنة وانتى طيبة يا بطوط
فاطمة :وانت طيب يا اتش
شيماء :حسين اصر نعملك عيد ميلاد مفاجأة وخدنى معاه ومرمطنى طيب نجيب تورتة شيكولاتة ولا فانيليا والجاتوه وكله كوم واللف اللى لفناه على الهدية
حسين :تعيش وتجبلها يا حسين
حسين وهو بيبوس ايده :تعيش يا جدى
حسين :كل سنة وانتى سالمة يا بطاطا يباركلنا فيكى ربنا
فاطمة وهى بتبوس ايده :وانت طيب وبخير يا جدى
بالليل فى الموبايل
حسين :عجبتك الهدية يا بطوط
فاطمة :قصدك الهدايا انت جبت حاجات كتير تسلم يا رب يا اتش مردودالك فى عيد ميلادك بأذن الله
حسين :هتجبيلي ايه
فاطمة :اكيد مش هجبلك سلسلة ذهب ومصحف ملون وشنطة جلد زى ما انت جبتلى
بس هفأجاك زى ما انت فجأتنى كده صدقنى هفاجأك بص هتنبهر
حسين وهو بيضحك :مش مطمنلك مش عارف ليه
فاطمة :لا متقلقش عيب عليك ده انت فى مقام خطيبى يعنى
حسين :تصدقى بالله فى مقام خطيبي دى قلقتنى اكتر
فاطمة :بص مش هقولك غير هتنبهر
حسين :ربنا يستر
بعد اسبوعين
فاطمة :حسين اخبارك ايه
حسين :الحمد لله كويس عارف انى مقولتلكيش انى هعدى عليكى قبل ما اطلع شقتنا بس محتاج اتكلم معاكى
فاطمة :قلقتنى حصل ايه انت كويس
حسين :فاكرة الترقية اللي كلمتك عليها
فاطمة :اه فاكراها هما ادوها لحد غيرك
حسين :المشكلة مش انهم ادوها لحد غيرى المشكلة انهم ادوها لحد ميستاهلش لمجرد انه يبقى اخو مرات المدير انتى متخيلة
فاطمة :متخيلة جدا للاسف انت عارف ان ده نفس السبب اللى متعينتش معيده علشانه بس انا ظلمونى علشان ابن عميد الكلية مش علشان اخو مراته متضايقش نفسك انت عملت اللى عليك وربنا هيعوضك صدقنى تحب نخرج
حسين :نخرج
فاطمة :اه نستأذن جدى ونخرج نتمشي نضرب ايس كريم او حمص الشام اللي يعجبك فيهم نجيبه واعزمك علي العشا على حسابك
حسين وهو بيضحك :هتعزمينى على العشا على حسابى لا فيكى الخير يا بطوط
فاطمة وهى بتضحك :اى خدمة يا اتش المهم موافق نستأذن جدى نخرج ولا تتعشى معانا هنا انت مش هتطلع شقتكم غير لما تتعشي معانا يا معايا لوحدى بره يا معانا كلنا هنا اختار يلا
حسين :لا خلاص هستأذن جدى ونخرج
على الكورنيش
حسين :فاطمة كنت عايز اسألك سؤال
فاطمة :اتفضل اسأل
حسين :هو انتى مكنتيش عايزة تتخطبيلي ليه
فاطمة :لا انا مكنتش عايزة اتخطب اصلا لا ليك ولا لغيرك
حسين :ليه
فاطمة :علشان هقول لخطيبي واهله ايه ابويا فين لما ولادى يسألونى جدنا فين يا ماما اقولهم ايه
اكدب اقول مات
ولا اقول الحقيقة ان ابويا بعد عشر سنين جواز طلق امى غيبا وسرق ذهبها وباع الشقة اللي كانو عايشين فيها وهرب بره
وان اهله معملولوش حاجة وان جدى مرضاش يعمل فضايح علشانى وعلشان امى
امى اللى اتفاجات ان جوزها طلقها لما ورقتها جاتلها واكتشفت انه مكنش مسافر في شغل اكتشفت انه هرب بعد ما سرق ذهبها اللي ملقتوش فى دولابها
وانه مش بس سرق الشبكة اللي هو جبهالها لا كمان سرق الذهب اللى جدى كان جايبهولها
امى غلطت فى ايه انها وثقت فيه لما متثقش في جوزها امال تثق في مين المفروض تخونه وهى بتنام معاه على نفس السرير تحرص منه وهو ابو بنتها وهما عايشين تحت سقف بيت واحد
حسين :وعلشان كده مبتثقيش فينا شايفانا كلنا زى والدك
فاطمة : انا بثق في جدى بس ده الراجل الوحيد فى الدنيا اللي انا بثق فيه
كمان انا مش شايفاكم كلكم زى بابا فيكم الاحسن منه ويمكن فيكم الاسوء منه مع انى معتقدش ان فى فى الدنيا كلها حد اسوء منه
الغكرة انى مش شايفة اى راجل يستاهل الثقة غير جدى كلكم متستاهلوش الثقة بتتغيرو وفجأة بتعضو القلوب اللي بتحبكم وعلشان كده انا قررت انى لا هثق في حد ولا هحب حد
حسين :وقولتى الكلام ده لجدى
فاطمة :قولتله قالى صوابعك العشرة مش زى بعض
قولتله بلاش انا
اللى هيتقدملى ده هنقوله ابويا فين
طلق امى ماشي بس مبيسالش عنى ليه مش هيقف في اي اتفاق من اتفاقات جوازى ليه بعدها هو قالى ان انا وانت هنتخطب لانك اتقدمتلى
فهمت انه لما لقانى خايفة من الغريب اللى مش هعرف احكيله الحكاية قال يبقي القريب اولى واهو كده كده عارف الحكاية
قولتله انى مش موافقة خاصمنى تلت ايام مقدرتش وقولتله انى خلاص موافقة بس عايزة اتكلم معاك الاول واتكلمت معاك لما جيت واتفقت معاك على الخطة بعد كده
حسين :وافقتى تتخطبيلي علشان جدى خاصمك تلت ايام
فاطمة :انت متعرفش جدى ده عندى ايه
ده جدى وابويا وصاحبى وكل حاجة ليا فى الدنيا
انا عندى اربعة وعشرين سنة عشت معاه فى بيته خمستاشر سنة منهم يعنى اكتر من نص عمرى
مينفعش يزعل منى وعلشان كده قولت هعمله اللى هو عايزه واتصرف وانهى الموضوع بشكل طبيعى علشان هو ميزعلش
حسين:وبعد ما تنهيه
فاطمة :خلاص مش هتخطب تانى ولاد خالى رضوان اتجوزو واكمل اخوك اتجوز وولاد خالتى صفية اتجوزو واللي متجوزش فيهم خطب يعنى مفاضلش غيرك وادينا اتخطبنا وفشلنا
يبقي خلصت وانا مش هتخطب لواحد غريب واحكيله ابويا عمل فيا وفى امى ايه وساعتها يا ميمكملش الموضوع يا يكمله ويتجوزنى وبعدين يعايرنى بابويا
انت عارف ان عمرى ما كان عندى صحاب بنات غير شيماء ونورا اخواتك ورندا بنت خالتو صفية علشان كده علشان مكنتش هحكى لواحدة عن ابويا علشان حاسة انى على راسي بطحا ومش عايزة حد غريب يقرب يشوفها ويعايرنى بيها
انا مش هتجوز يا حسين مش هسيب راجل يسرقنى ويطلقنى ويبيع بيتنا ويرمينى ويغدر بيا زى ما ابوبا عمل في امى
مش هخلف بنت تعيش وحيدة زيى لانها على راسها بطحة وخايغة حد يشوفها مش هخلف بنت يربيها جدها زي ما جدى ربانى ولو انى حتى معنديش جد يربيها لان ابويا مشافنيش من خمستاشر سنة
يعنى وقتها هربي بنتى لوحدى ومش هيبقالها حد يعوضها عن ابوها
مش هعمل فى نفسي كده محدش يستاهل اعمل فى نفسي كده علشانه
حسين :انتى متخيلة انى ممكن اعمل فيكى كده
فاطمة :وتفتكر امى كانت متخيلة ان ابويا يعمل فيها كده مقولتلك بقي انتو فجأة بتتغيرو وبتعضو القلوب اللي بتحبكم
حسين :بس انتى مش شايفة جدى زى ابوكى
فاطمة :لان جدى مش زى ابويا
جدى ملوش زى فى الدنيا
حسين :بس اكيد فينا رجالة كويسين زى جدى
فاطمة :حتى لو فيه انا مش شايفاهم
يا اتش سيبك منى معلش بنت عمتك معقدة خلاص احنا يومين كده ونفسخ الخطوبة وانت بعدها ابقي دور على واحدة طبيعية مش معقدة ومفيش على راسها بطحا واخطبها واتجوزها
حسين :لا يومين ايه نستنا شهرين تلاتة كمان
لسه بدرى مبقلناش شهرين مخطوبين مدة مش طويلة خالص
فاطمة :انا قولت كده علشانك حسيتك زهقت وعايز تخطب وتتجوز بجد
حسين :لا انا مزهقتش وهكمل فى الخطة للاخر يا بطوط
فاطمة :تمام يا اتش وانا معاك
بعد شهر ونص
فاطمة :حسين انت ساكت ليه في ايه جيت خدتنى من الشغل ومن ساعة ما ركبت مفتحتش بؤقك بحرف واحد
حتى مقولتليش رايحين فين
حسين :وصلنا انزلى
فاطمة بخوف :انت جايبنا مستشفى ليه
حسين :جدى الصبح تعب ونقلوه على المستشفى
فاطمة :جدى ودينى لاوضته بسرعة حسين هو مش بيعمل عملية صح
حسين :متقلقيش محتاجش عملية الحمد لله الدكاترة سيطرو على الوضع اهدى يا فاطمة ومتخضيهوش على نفسه
فاطمة :اهدى ايه بس يا حسين وانا ماليش غيره فى الدنيا انا وامى
حسين :دى اوضته هندخل ارجوكى امسكى نفسك قدامه
فاطمة وهى بتقعد على رجليها جمب سرير جدها وبتمسك ايده وبتبوسها وهى بتعيط :جدى انت كويس صح
حسين بتعب :كويس يا حبيبتى
فاطمة وهى بتعيط اكتر :جدى اوعى تسيبنا انا وماما ملناش غيرك انا عارفة ان فاطمة الكبيرة وحشاك اوعى تسيب فاطمة الصغيرة وتروح للكبيرة حبيبتك
حسين :يا بت احترمى نفسك واتحشمى
فاطمة وهى بتضحك وسط عياطها :لا يا سحس مش هتحشم بطاطا وحشتك انا عارفة وبتدعى ربنا يجمعك بيها فى الفردوس الاعلى انا بسمعك وانت بتدعى
حسين وهو بيضربها على راسها من ورا بايده :بتتجسسي على جدك
فاطمة :قوملنا انت بس بالسلامة وانا هبطل اتجسس عليك هعملك اى حاجة انت عايزها بس متسبنيش انا مليش غيرك يا جدى
حسين :والواد اللى خطبتهولك ده ايه قرطاس لب
فاطمة :والله لو عملتها وسيبتنا لا هتجوزه ولا هتجوز غيره لو مكنتش وكيلي انا مش هتجوز انا بقولك اهو
حسين :يعنى لما اقوم بالسلامة نحدد ميعاد فرحكم
فاطمة :نحدد ميعاد الفرح ونعمل كل اللى انت عايزه بس انت قوم بالسلامة يا جدى
حسين:هتتجوزيه علشان خاطرى
فاطمة وهى بتكلمه بصوت واطى :لا يا سحس هتجوزه علشان بحبه
حسين :يا بت احترمى نفسك انتى بتكلمى جدك
فاطمة وهى بتحط ايدها على بؤقها :خلاص سكت
حسين وهو بيكلمها بصوت واطى :بجد يا بطاطا بتحبيه
فاطمة وهى بتكلمه بصوت واطى :بجد يا سحس يا روح وقلب بطاطا بحبه
حسين وهو بيكلمها بصوت واطى :هو الواد حسين يتحب طالع لجدك بالك انتى ستك فاطمة كانت بتعشقنى بتموت فى التراب اللى بخطى عليه برجلى
فاطمة وهى بتسقف بايديها :يا سحس يا جاااااامد
حسين :يا بت اتأدبى احنا فى مستشفى انا تعبان يا بقرة هو انتى جاية تباركليى علشان رجعت من الحجاز
فاطمة :اسفة خلاص هسكت المهم انك بخير ربنا يباركلنا فى عمرك يا جدى
وميحرمناش منك ابدا يا رب يا جدى
حسين وهو بيطبطب بايده على راسها :ولا يحرمنى منكم يا قلب جدك
حبيته اه حبيته اتعودت على كلامنا وهزارنا اتعوت اسمع منه كل يوم عمل ايه فى يومه بقيت بحب دلع بطوط منه ومبحسش انى عيلة لما بيقولهولى
كنا بنمثل فى الاول يمكن بس اهو التمثيل قلب معايا جد
الكدب اللى كنا بنكدبه على جدى واهلنا انا صدقته
هو مينفعش نفضل بنمثل ونكدب بقية حياتنا انا مش هبقي بكدب هبقي بقول الصدق وبعمل اللي حساه بجد
يا ترى هيرضى يكمل معايا يا ترى حبنى هو كمان
ولا حبيته لوحدى
انا عايزة اغير الخطة مش عايزة نسيب بعض
عايزة نحط خطة جديدة خطة لحياة كاملة هنعيشها سوا خطة لعمر كامل هنقضيه مع بعض
لازم يوافق علشان نحط خطة جديدة
لو موافقش وده حقه وقتها هنكمل في الخطة القديمة هنفذها ونسيب بعض
هسيب الانسان الوحيد اللي حبيته الانسان الوحيد اللى وثقت فيه من بعد جدى
يا رب يكون حبنى او على الاقل يا رب يرضى نغير الخطة يا رب ما يسيبنى يا رب ما يرفضنى يا رب قلبي ما يتكسر
قررت انى هتكلم معاه وفورا كمان
امى باتت مع جدى واصرت ان كلنا نروح ونجيلهم بكرة
خالى محمد روح هو ومراته وشيماء ونورا بناته فى عربيته
وخالى رضوان برضه
وخالتى صفية كمان
كله روح زى ما جه وانا لانى جيت مع حسين روحت معاه لوحدى الحمد لله لانى كنت عايزة اتكلم معاه بسرعة مكنتش هقدر افضل بفكر لوحدى كده كان لازم اقطع عرق واسيح دم واخلص
حسين :شكلك قلقان متقلقيش جدى هيكون بخير الدكتور طمنى جدك عضمه ناشف وقوى ومفيش حاجة تأثر فيه
فاطمة :ربنا يباركلنا فى عمره يا رب
حسين :يا رب
فاطمة :هو..انا ..كنت عايزة اتكلم معاك فى حاجة
حسين :حاجة ايه
فاطمة :الخطة بتاعتنا
حسين :عايزة ننفذها دلوقتى شايفة ده وقت مناسب يعنى
فاطمة :لا
حسين :ولما انتى مش شايفة ده وقت مناسب بتتكلمى ليه وعايزانا ننفذها
فاطمة :انا..انا قصدى لا مش عايزة ننفذها انا اللى اتكلمت فى الاول وقولتلك عندى خطة وسوا عدلنا فيها
ودلوقتى انا هتكلم الاول واقولك انى مش عايزة انفذها انا التمثيل قلب معايا جد صدقت الكدبة اللى كنا عايشينها الخطة فشلت وخلاص انا مش عايزاها
بس لو..بس لو انت عايزها خلاص اعتبرنى مقولتش حاجة واول ما جدى يخرج من المستشفى نعدى اسبوع اسبوعين وننفذ الخطة
حسين بابتسامة :يمكن خطتك انتى فشلت بس انا خطتى نجحت الحمد لله
فاطمة :مش فاهمة
حسين :انا خطتى مكنتش اننا نسيب بعض
انا خطتى كانت اننا نقرب انك تعرفينى وتسبينى اعرفك
علشان كده اقنعتك اننا لازم نعرف بعض علشان نلاقى حجة مقنعة نقولهالهم نسيب بيها بعض
مكنش فيه طريقة غير دى اخليكى بيها تدينى فرصة تعرفينى وتقربي منى
انتى مفكرة جدى هو اللي قالى اخطبك ده مش حقيقي انا اللى طلبت ايدك منه
انا كنت برفض العرايس اللى كانت امى بتجبهوملى لانى عايزك ومكنتش عارف اوصلك ازاى ولما حكيت لجدى هزقنى وقالى ان الرجالة اللي بجد بتاخد اللى هى عايزاه ولو بالقوة وان الضعف اللي انا فيه ده عار على رجولتى وعيب على عيلة مهران كلها قالى عايزك يبقي اتقدملك غير كده يبقي شغل عيال وانه هيخلينى بنفسي اسأل على اللى هيتقدملك واطمن على اخلاقه
علشان اندم بقي على سكوتى وضعفى
طبعا بعد كلامه ده انا اتقدمت وطلبت ايدك
بس انتى فكرتينى متقدملك بسبب جدى
بس لقيت انى لو قولتلك انك غلط مش هستفاد حاجة انتى رافضة الموضوع وما شاء الله عندك خطة
فقولت استغل خطتك لصالحى واخليكى تقربي منى من غير ما تحسي وكنت بدعى ربنا تحبينى كنت خايف انى رغم كل اللي عملته واللي بعمله انك متحبنيش
فاطمة :علشان كده كل ما اقولك حجة نسيب بيها بعض تبوظها وكل ما اقولك ننفذ الخطة دلوقتى تقولى نستنى شوية
حسين :ايوه طبعا كلامك ده كان معناه انى خطتى لسه منجحتش وانا مكنتش هقبل تفشل بمزاجك غصب عنك مش هنسيب بعض انا ما صدقت بقينا سوا
فاطمة :شوفت طلع عندى حق لما قولتلك انك لما هتحب الكلام الحلو هيطلع منك غصب عنك
حسين:مش غصب عنى يا بطوط ده بمزاجى طالع من قلبى انا بحبك ومش هسيبك هفضل جمبك هثبتلك انى مستحيل اعمل فيكى اللى اتعمل فى عمتى ومستحيل اعمل فى ولادنا اللى اتعمل فيكى هثبتلك انى زى جدى استاهل ثقتك وحبك كمان
فاطمة بابتسامة :انا خلاص بقيت بثق فيك انت تانى راجل انا بثق فيه بعد جدى
حسين :موافق مدام بعد جدى فانا موافق يكون جدى قبلى
بس بالنسبة للحب ايه مجبتيش سيرته يا بطوط
فاطمة وهى بتضحك :لا اخص عليا معقول مجبتش سيرة الحب ده انت الحب كله يا اتش انا بحبك بجد بحبك
حسين :لو مكنش جدى فى المستشفى وابقي حلوف ومعنديش دم لو اتكلمت فى تحديد ميعاد فرح دلوقتى كنت طلبت نحدد ميعاد فرحنا بس الصبر حلو هانت جدى يخرج بس وهفاتحه وهو ان شاء الله هيوافق وانتى احسنلك اول ما يقولك تبصي في الارض وتقولى اللى تشوفه يا جدى لو فكرتى تأجلى هجيبك من شعرك انا بقولك اهو
فاطمة وهى بتضحك :لا وعلى ايه انا هخاف على شعرى واوافق بس مش هبص فى الارض انا محدش كاسر عينى انا هبص فى عيون سحس واقوله انى موافقة
حسين :لو بص فيهم هيلاقى حب ليا يا فاطمة
فاطمة وهى بتهز راسها بمعنى ايوه :لو بص فيهم هيلاقى حب كبيييييير اوى ليك يا حسين
حسين :يعنى خطتى نجحت
فاطمة وهى بتضحك :نجحت نجاح ساحق نجاح مبهر يا باشا
انت تريد وانا اريد والله يفعل ما يريد
انا فضلت ارفض في عرسان حتى لما قبلت بحسين كنت ناوية ان الموضوع ميكملش بس الموضوع كمل واتجوزنا وخلفنا رامى ومازن كان نفسي نسمى حسين على اسم جدى بس مينفعش كده الواد هيبقي اسمه حسين حسين محمد حسين
ده كده هيطلع معقد باسمه حرام عليا
ربنا مارادش انى اخلف بنت مع انى كنت خلاص بطلت اخاف ان بنتى يحصلها اللى حصلى لان حسين مش زى ابويا ومستحيل يعمل اللى ابويا عمله
رغم رفضى لفكرة انى اتجوز ورغم الخطة اللي حطتها علشان اسيب حسين الا انى فى الاخر حبيته واتجوزته مش لانى خطتى وحشة او لان حسين خطته احسن من خطتى لا ببساطة لان ربنا رايد كده ده اللى ربنا كاتبهولى ربنا كاتبلى احب حسين واتجوزه واخلف منه ربنا كاتب لحسين انه يحبنى ويتجوزنى
الحب مبيحصلش بخطط الحب بيحصل لما ربنا يريد
الحب الجواز الشغل النجاح كل الحاجات دى وكل حاجة فى الدنيا هى رزق من ربنا ورزق ربنا هيجى فى الوقت اللى ربنا رايده لا فى خطة ممكن تمنع رزق ربنا كاتبلنا انه يجلنا ولا فى خطة ممكن تجبلنا رزق ربنا مش كاتبه لينا
مش هيجلنا غير اللى ربنا كاتبه ومش هيحصلنا غير اللى ربنا رايده ومش هناخد اكتر من قسمتنا مهما رسمنا وفكرنا فى خطة واتنين وتلاتة فى الاخر اللى ربنا رايده هو اللى هيكون وقضاء ربنا وقدره مفيش منهم مهرب ولا بخطط الدنيا كلها💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا