منى :بس انا تعبت يا سارة والله تعبت لحد امتى هفضل كده مغفلة وباخد على قفايا لحد ما قفايا ازرق
مش بس على قفايا انا باخد على قلبى يا سارة ويحصل شرخ وبدل ما ادافع عن قلبى واجيب حقه منهم
او حتى ارحمه وابعد لا بفضل لحد ما يدونى على قلبى تانى والشرخ يبقى كسر والوجع يبقى لا يحتمل
نفسي اعرف انا نفسي مبتصعبش عليا ليه
انا بخاف على زعلهم ليه مبيفرقش معايا زعل نفسى
سارة :اهدى يا منى انتى مش مغفلة انتى طيبة بس طيبتك زايدة وانتى مخلياها ضعف
مش لازم تفضلى جنبهم وهما يأذوكى لحد ما تكرههيهم
ابعدى وانتى لسه جواكى ذكرى حلوة ليهم
وانتى لسه بتحترميهم وانتى مبتكرهيش نفسك بسببهم
منى :مبعرفش يا سارة
سارة :لا يا منى انتى مبتحاوليش بجد
مجرد مبيقولولك كلمة حلوة بتنسي وبتفكريهم باقين عليكى وهيتغيرو هما مش باقين عليكى زى ما انتى مفكرة ولا هيتغيرو علشانك هما بس عارفين انك حاجة حلوة اوى ومش هيتخلو عنك بسهولة
لا هيقدروكى ويتغيرو علشانك
ولا هيسيبوكى تبعدى وتروحى لحد يقدرك
هما انانيين ومؤذيين بس انتى اللي سايبالهم نفسك يأذوها
انتى غلطانة فى حق نفسك يا منى
حقك لو مجبتيهوش لنفسك محدش هيجبهولك
وهتلاقى الف واحد وواحد مستعد ياكل حقك
نفسك لو مقدرتيهاش وحبتيها محدش هيقدرها ولا يحبها
متبقيش عارفة انهم بيستغلوكى وهياخدو منك ومش هيدوكى وتفضلى معاهم وفى الاخر وتقولى هما ظلمونى الحقيقة انك انتى ظلمتى نفسك قبلهم لما قبلتى انهم يظلموكى
لما يجيبو اخرك ويستنفذو قوتك مش هيقضو بقية عمرهم يتأسفولك ويحاولو يعوضوكى ولا هيدوكى جايزة شكر
لا عادى هيسبوكى هما
هيبعدو عنك ويدورو علي حد تانى يستغلوه ويستنفذوه
فى ناس كده بيبقو ناقصين نقص ميقدروش يملو غير من الآخرين
يعنى قوتهم تبقي من ضعفك وذكائهم من غبائك
وجمالهم من قبحك ونجاحهم من فشلك
من غير حد يطلعو عليه نقصهم بيبقو ولا حاجة
متسمحيش لحد يطلع نقصه عيكى يا منى
منى :يعنى اعمل ايه ابعد عن سمر جارتى وصاحبتى من اتناشر سنة ولا افسخ خطوبتى من ايمن واحنا جوازنا خلاص كمان اربع شهور
سارة :الاتناشر سنة اللي بينكم دول بقو اتناشر لأنك بقالك اتناشر سنة ساكتة بتعملى علشانها كتير وبتعديلها وتشجعيها وتهونى عليها وتسامحيها وتفرحيها
من غير متطلبى منها تقدملك اللي بتاخده منك
لو كنتى طالبتيها تتعب علشانك هى كمان مكنتوش هتفضلو اصحاب تلت شهور مش اتناشر سنة
دول مش اتناشر سنة صداقة دول اتناشر سنة استغلال واخد من غير عطا وتعب ليكى وراحة ليها
ومش لازم يبقو خمستاشر علشان تفهمى انها عمرها ما كانت صاحبتك وان انتى بس اللي كنتى صاحبتها
كفاية كده يا منى كفاية كده عليها وكفاية كده ليكى حرام عليكى نفسك
وايمن اللى طول الوقت بيذم فيكى
انتى ازاى غبية كده انا لما كنت في الكلية مكنتش بجيب غير امتياز او على الاقل جيد جدا
انتى تخينة اوى ليه ساكتة علي نفسك
وكانه مش خاطبك وانتى كده
انتى مش اجتماعية ولسانك مش حلو لبنى مرات اخويا اشطر منك كتير علشان كده امى بتحبها اكتر منك
انتى بتتكلمى بسرعة وكانك خايفة لو اتكلمتى ببطء هتغلطى وتنسي الكلام كانك عندك سبع سنين
انتى اكلك مش حلو ماما اكلها احسن منه
بيقارنك بوالداته اللي بتطبخ من خمسة وتلاتين سنة ومستغرب ان والداته اشطر اذكى اخواته
ده حتى لون بشرتك معتقهوش وبيقولك متلبسيش الوان غامقة بتبين انك سمرا ادارى وسط الالوان الفاتحة
ده بيعمل فيكى كده وانتو مخطوبين يا منى انتى متخيلة حياتك هتبقي عاملة معاه ازاى بعد ما تتجوزو
هتبقي جحيم هيكرهك في نفسك مش هيحس بقيمته غير لما قيمتك تقل ولا هيحس بقوته غير وانتى ضعيفة
وثقته بنفسه هتبقي علي حساب ثقتك بنفسك
هيشكك في نفسك وفي قدراتك هيخليكى تشوفي نفسك شخص فاشل علشان يحس هو بنجاحه
ده مريض نفسي هتتجوزى واحد مريض نفسي وتقضى معاه بقية عمرك ليه
ده البعد عنه غنيمة يا منى
كفاياكى ظلم لنفسك بقي ربنا هيحاسبك على اللي انتى بتعملى في نفسك ده على فكرة
ربنا كرمك متهنيش انتى نفسك
منى :بابا مش هيرضى
سارة :والدك مش هيعيش معاه بدالك يا منى انتى اللي هتعيشى وانتى اللي هتتحملى
مش انا قلتلك انك لازم تجيبي حقك لنفسك دافعى عن حقك فى حياة مع انسان بيحترمك وبيقدرك يا منى
ووالدك فى الاول والاخر متهموش غير سعادتك يمكن هو مفكر غلط انها مع كائن الايمن ده بس انتى عارفة انها عمرها مهتكون معاه يبقي دافعى عن سعادتك وعرفي والدك ان مش ايمن اللي يأمن عليكى معاه
منى :الموضوع صعب
سارة :صعب بس مش مستحيل
وبعدين انتى مش عايزة تتعبي يا منى
اتعبى في الاول علشان بعد كده ترتاحى
انما معاه انتى هتتعبى بس وعمرك مهتعرفى طعم الراحة معاه
اتعبى علشان نفسك حاربى علشان تاخدى حقوقك يا منى
منى :هحاول
سارة :مسمهاش هحاول
اسمها هعمل كده
متقنعيش نفسك انك هتحاولى كأن ينفع انك متحاوليش وتفشلى متحبطيش نفسك يا منى
انتى معندكيش اختيار تانى
ده الاختيار الوحيد اللي يضمنلك حياة فيها سعادة واحترام وحب انما الاختيارات الباقية دى هتبقى كلها ذل وضعف وقلة قيمة وهتبقي انتى اللي اخترتيها وعملتى كده فى نفسك لما محاربتيش علشان نفسك لما استسلمتى ليهم
انتى عارفة كام واحدة من صحابنا وقرايبنا وجيرانا
عملت زيك كده واستحملت العيشة اللي كلها ذل وقرف دى
اقولك كام واحدة فيهم اتطلقت
طيب كام واحدة فيهم مكملة غصب عنها
كام واحدة فيهم شكلها اتغير مية وتمانين درجة وشكلها كبر ولا عشرين سنة على عمرهم روحهم عجزت قبل اوانها يا منى وقلوبهم شالت هم اكبر بكتير من طاقتها
انتى عايزة تبقي زيهم ما هو النهاية واحد صدقينى
بلاش تعملى فى نفسك كده
قاعدة بسيطة اوى تبروزيها كده وتحطيها قدام عنيكى
اللي ميحبكيش ميستاهلش حبك
اللي ميقدركيش ميستاهلش تقديرك
اللى ميحترمكيش ميستاهلش احترامك
اللى مش هيعذرك ميستاهلش تعذريه
اللي مش هيتعب علشانك ميستاهلش يكون في حياتك
منى :معاكى حق انا اوقات بحس انك اختى الكبيرة
مش بنت خالتى واصغر منى بتلت سنين
بت انتى مش ناوية تتخطبى بقى ولا انا عقدتك ولا ايه
سارة :بصى هو ايمن يعقد بلد بحالها ويكرها في الجواز واللي عايزين يتجوزو
بس انا عارفة ان الدنيا فيها رجالة بجد مش رجالة ربع كم زى ايمن كده واسمحيلي اقولك كده بما انك خلاص هتسيبه بقي مش محتاجة اقول كده في دماغى من غير صوت
منى :لا براحتك يا بيبي
سارة :فل عليكى يا منمن
المهم ان الدنيا مش كلها زى ايمن ولا كلها زى سمر
وانى ان شاء الله ربنا هيرزقنى بحد كويس
ولو لا قدر الله جه حد مش كويس يبقي علي طول نديله استمارة ستة
بس انا لسه باقيلي سنتين فى الكلية مش اتخرجت زيك يا دكترة
وبينى وبينك حسا انى مش جاهزة للمسئولية دى
ما هو الموضوع مش دبلة خطوبة وفستان وخلاص
لا دى حياة كاملة هتختلف ومسئولية هشيلها
ولو مش متاكدة انى هقدر يبقى ملوش لازمة اتسرع
تعالى نطلع لخالتك بقي بقالنا ساعتين قاعدين سوا وسايبنها
منى :يلا بينا
مشيت من عند خالتى وانا بفكر في كلام سارة ومترددة شوية
بس شوفت زينة جارتنا وانا راجعة البيت
زينة جوزها بعد ما اتجوزها بسنة طلقها علشان يتجوز واحدة زميلته في الشغل وطبعا هو مكنش هيقدر يفتح بيتين فطلق زينة وقبل ما يطلقها كان بيضربها وهددها انها لو مبرتوش واتنازلت عن كل حقوقها هيكسر عضمها كله ومش بس كده لا الاستاذ المحترم هددها انه هيقول انه لقي علي موبايلها ارقام رجالة وبينهم كلام وصور وبتخونه معاهم
وطبعا هى خافت واتنازلت عن حقوقها
ومن ساعة ما اتطلقت وهى عايشة كأنها هى المذنب
دخولها وخروجها بحساب النفس اللي بتتنفسه بحساب
اخواتها بيتعاملو معاها علي انها عار
كأنه ذنبها انهم جوزوها لانسان عديم الشرف والاخلاق والدم
بالمناسبة اخواتها اللي جوزوهاله من غير مياخدو رأيها وهي قبلت مكنش في ايديها انها ترفض لانهم كده كده كانو هيجوزوهاله
فجاة لقتنى خفت انا هسكت لحد امتى لحد ما يحصلى الي حصل لزينة لا خلاص هى خلصت كده
انا لازم اتصرف وهتصرف
تانى يوم خطيبي المبجل كان عندنا
ايمن :امبارح جبت لاب جديد راماته اكتر وامكانياته اعلي احسن بكتير من القديم كان مهنج وبطئ
طبعا انتى مش فاهمة كلامى لانك جاهلة ومبتحاوليش تثقفى نفسك ربنا يصبرنى علي جهلك ده
منى بابتسامة :انا دكتورة سنان يا ايمن اعرف ليه في الاب وسعة الذاكرة بتاعته وامكانياته
انتى تعرف ايه عن شغلي ايه معلومات سيادتك عن الحشو ايه خبرتك في الطربوش تفهم ايه في طريقة عمل طقم السنان عمرك خلعت لحد ضرس ولا حتة سنة قبل كده
انت خريج حاسبات ومعلومات وطبيعى تكون عارف كل ده لان دى دراستك ومجال شغلك انت مش بتعمل معجزة يعنى ولا بتقدم خدمة للبشرية
ويا سيدى انت مش محتاج تصبر عليا وعلي جهلي يا اينشتاين جيلك اتفضل دبلتك اهى وثانية اجبلك الشبكة واتمنى مشوفش وشك تانى يا ريت تخرج من حياتى للابد وتحرمنى من عبقريتك وعقليتك الفاذة لانك خسارة فيا وفي الكوكب كله والله انت المفروض تعيش في كوكب لوحدك
ايمن بصدمة :انتى بتعملى ايه
منى :لا عيب واحد بمستوى ذكائك يسأل سؤال زى ده
انا بفسخ خطوبتى منك بلغة العصر بفركش معاك
بمعنى ادق بنجو بنفسي بنفد بجلدى يا ايمن
ثوانى اجبلك الشبكة
ومشى ايمن وهو مصدوم مش مصدق ان انا سبت
جهبز في كل حاجة زيه بعقليتي الضعيفة وذكائى المحدود بالمقارنة بذكائه طبعا
بابا اتخانق معايا بس انا قلتله ان انا اللي هتجوز وانا اللي هعيش وايمن مش الشخص المناسب اكيد
وانى لسه صغيرة ومعنستش يعنى علشان ابقي مجبرة اتجوزه وانا مش طايقاه
بابا رمى طوبتى وقالي اتفلق وماما كانت بتدعيلي ربنا يهدينى ويردلى عقلي وارجع لايمن
ده علي اساس انى فى واحدة عندها ذرة عقل تقبل تتجوزه
فانا كنت بسعادة بتفلق وبنفذ قرارى بكل راحة
وبأمن علي دعا امى ان ربنا يهدينى لكل خير
فضلت اسبوعين مبكلمش سمر
شوفتها صدفة فى الشارع ولقيتها بمنتهى البجاحة اللي فى الدنيا بتعاتبنى علي انى مكلمتهاش من اسبوعين
سمر :اسبوعين لا بتتصلي ولا بتسالي ينفع كده يا منى
هانت عليكى عشرة اتناشر سنة
منى :ومتصلتيش انتى ليه
سمر :نعم
منى :لما انا متصلتش متصلتيش انتى ليه وسالتى عليا
مجتليش ليه البيت تطمنى عليا تشوفينى مكلمتكيش ليه
مجتيش ليه حتى تعاتبينى على انى مكلمتكيش ده لو الموضوع فارق معاكى يعنى
انما بتعاتبينى في الشارع وانتى شايفانى صدفة اصلا انتى هبلة يا سمر
عايزة تفهمينى انك متعرفيش انى فسخت خطوبتى من ايمن
سمر :لا عارفة انتى فسختيها ليه صحيح
منى :عارفة ومجتيش تطمنى عليا
انا مش متفاجئة انك عارفة دى حاجة متوقعة منك
انتى بقي الي متفاجئة انى بس مكلمتكيش في الموبايل
اتمنى ده يعرفك الفرق بينى وبينك
مش هقولك فسختها ليه لانك مش صاحبتى يا سمر انتى عمرك مكنتي صاحبتى
وانا قررت انى مش هكون صاحبتك تانى ميشرفنيش
وبالنسبة للي اتناشر سنة اللي فاتو بليهم واشربي ميتهم
عيشى علي ذكراهم لانى خلاص عقلت وفوقت وشوفتك علي حقيقتك ومش هزود علي الاتناشر سنة يوم زيادة كمان سلام بقي معنديش وقت اضيعه عليكى
ايمن حاول يرجعلي تانى تلت مرات تقريبا مش مصدق انى فسخت خطوبتنا عايزنى ارجعله وينتقم منى علي اهانتى لشخصه العظيم انا طبعا مفكرتش لحظة ارجعله
وهو يأس ودور علي ضحية جديدة قصدى عروسة جديدة
سمر حاولت مرة تعتذرلى وتقولى اديها فرصة تانية بس انا رفضت اللي زى سمر الفرصة التانية خسارة فيهم وهيضيعوها بمنتهى السهولة
وانا خلاص اتعلمت الدرس مش هدى فرصة لحد ميستاهلش
لا فرصة ولا مشاعر ولا تقدير ولا حب ولا احترام ولا اي حاجة لحد ميستاهلش
قررت ان نقطة ومن اول السطر هبدء من جديد مع نفسي وهعيد ترتيب اولويات حياتى وهصحح شوية افكار غلط عندى
بعد سبع شهور اتقدملى دكتور سنان زيى اكبر منى بسنتين
قعدت معاه وارتحتله واتخطبنا
واتاكدت انه انسان محترم ومش معقد ولا عنده عقد نقص راجل بمعنى الكلمة اتخطبنا تمن شهور وبعدين اتجوزنا
انا واخته بقينا اصحاب اوى هى قدى في السن
بس اعز اصحابى طبعا فضلت سارة بطلة حياتى والله
اللي فتحت عينى عالحقيقة وقوتنى ومنعتنى اكمل في الغلط اللي كنت بغلطه فى حق نفسي
اتخطبت وهى في اخر سنة في الكلية ربنا يسعدها يا رب هى تستاهل كل خير
انا خلفت من ايمن جوزى اسمه ايمن برضه بس مختلف تماما عن ايمن اينشتاين الحمد لله الشبه بينهم في الاسم بس
خلفت منه سارة علي اسم سارة بنت خالتى طبعا
وعبدالرحمن علي اسم والد ايمن
وكريم مش علي اسم حد بس حبينا الاسم فسميناه
وربيت ولادى علي انهم يقدرو نفسهم لانهم يستاهلو التقدير
يقدرو نفسهم لو انهم مقدروش نفسهم محدش هيقدرهم
عرفتهم انهم يستاهلو الاهتمام والحب والتقدير والاحترام ويستاهلو اي حاجة بيقدموها هما كمان يستاهلو يخدو اللي بيقدمو ويتعمل علشانهم اللي بيعملو للى حواليهم
فهمتهم ان علاقتهم باى حد في حياتهم علشان تستمر لازم تكون رايح جاي مش رايح بس تكون اخد وعطا مش اخد بس ولا عطا بس
ده سر نجاح اي علاقة في الدنيا انها تكون متبادلة بين الطرفين ببساطة
#حكايات_منار
فضلا تدعو لابويا بالرحمة والمغفرة وان يسكنه الله فردوسه الأعلى هو وموتى المسلمين جميعا خصوصا من زال أثره فلم يزره زائر ولم يذكره ذاكر