خلاص حضرت الفطار وصحيت على علشان يلحق شغله
وبعدها رحت لمريم صحتها علشان جامعتها
وحاولت مع احمد يقوم يبدء مزاكرة من اول اليوم علشان ثانوية السنة دى وزى كل يوم قالي انه كان بيزاكر لوقت متاخر وعايز ينام وشد الغطا على وشه ونام
ورحت لندى صحيتها تروح مدرستها هي اولى اعدادى واخر العنقود كريم خمسة ابتدائى صحيته للمدرسة بس كريم طالعلي بينام بدرى ويصحى بدرى
بعد مصحيو كلهم وفطرو واللي راح لشغله واللي لجامعتها واللي لمدارسهم
بدات انا الغسيل وترويق البيت وطبقت سرايرهم علشان هما مبيطبقوهاش وبعد ما خلصت عملت الغدا
ورجعو اتغدينا وبعدين عملت لعلي الشاى وبعدين غسلت المواعين وكويت الحاجات اللي محتاجينها تتكوى
واشتغلت تريكو شوية وبعدين حضرت العشا واتعشينا وشلت الاكل وغسلت الاطباق وكده خلاص يومى خلص
كل يوم بعمل نفس الحاجات بنفس الترتيب تقريبا
انا مبعملش حاجة لنفسى خالص حتى الاكل بعمل اللي هما بيحبو طول عمرى بعمل المطلوب منى
زمان كبنت لاهلي لما كنت بساعد ماما في شغل البيت من وانا عشر سنين مع ان عبدالرحمن اخويا مكنش بيساعدها فى اي حاجة حتى الطلبات اللي من بره انا اللي كنت بجيبها
لحد ما سبت المدرسة علشان عبدالرحمن اهم واولى منى انه يتعلم مع انه كان بيكره المدرسة ودرجاته زفت وانا كنت شاطرة وبطلع من الاوائل
وحتى لما اتجوزت علي لان بابا شاف انه مناسب وماما شافت انه خلاص آن آوان جوازى
ولما عشت مع علي في بيت اهله اخدمهم ومطلبتش يكون لى شقة لوحدى لحد ما ماتو
وحتى ولادى انا بعمل اللي مطلوب اعمله كأم
طول عمرى بنت اخت زوجة ام
انما مكنتش ولو ليوم واحد امال وبس
معشتش لنفسي يوم واحد معملتش حاجة لان انا عايزاها ولو لمرة في حياتى كلها
عمرى مقلت لا معرفش غير كلمة حاضر
اهلى ماتو راضين عنى الحمد لله
وعلي دايما يقول عنى بنت اصول
وولادى بيحبونى بس ما طبيعى يحبونى انا امهم
حياتى مفيش فيها غير جوزى وولادى وسميحة وبس
سميحة جارتى دى عايشة لوحدها بعد ما جوزها مات وابنها الوحيد اتجوز ونسيها بيسال عليها كل فين وفين
انا وسميحة اصحاب هي صاحبتى الوحيدة
قبلها مكنش عندى صحاب لان امى الله يرحمها كانت بتحذرنى من البنات وانهم بيبوظو بعض فمكنش ليا كلام مع حد وكنت دايما لوحدى
وقبل علي انا مكنتش اعرف رجالة غيره ولا حتى قرايبي لان عبدالرحمن اخويا مكنش بيخلينى اسلم عليهم حتى
اهلي حطولى حدود كتير وانا عمرى محاولت حتى اتخطى الحدود دى
سميحة جارتى من يوم متجوزت علي
هي طيبة وجوزها الله يرحمه كان راجل طيب
مش عارفة ابنها طالع قاسي وبراوى كده لمين
البواب بتاع عمارتنا اسمه عباس
عنده سبع عيال ومش قادر علي مصاريفهم
كان هيطلع رحمة بنته من المدرسة ويجوزها وهى لسه اولى ثانوى سميحة اتكلمت معاه وقالتله حرام يعمل فيها كده قالها ان مصاريفهم زادت وهو مبقاش حمل مصاريف علامها تتستر ويتشال من علي كتفه حملها احسن
هو كان هيجوزها لواحد بواب برضه وكانت هتساعده في خدمة السكان
ساعتها سميحة عرضت عليه ان رحمة تعيش معاها وتاخد بالها منها وتساعدها في شغل البيت وهى هتديله مرتب ليها
وعاشت رحمة مع سميحة
سميحة مطلعتهاش من المدرسة بالعكس دى كانت بتديها فلوس تروح دروس كمان وكانت بتشتريلها هدوم علشان ميبقاش حد احسن منها
رحمة كانت بتساعد سميحة في شغل البيت فعلا وبتديها الادوية بتاعتها
بس سميحة ايام الامتحانات مكنتش بتخلى رحمة تشيل ورقة من الارض
كانت بتعمل بنفسها كل حاجة علشان رحمة تزاكر
وام رحمة كانت بتطلع تساعد سميحة مكنتش مصدقة ان بنتها هتكمل تعليمها وتدخل جامعة بس سميحة وعدتها ان هتفضل ورا رحمة لحد ما تشوفها احسن واحدة في الدنيا
هى كانت بتنزل لاهلها وقت ما تحب وتبات معاهم
فى الثانوية رحمة جابت كلية هندسة
ساعتها عباس مسك ايد سميحة باسها وقالها ان لو عاش طول عمره يخدمها ويشكرها علي اللي عملته لبنته مش هيوفيها حقها علي انها خلته بقي ابو البشمهندسة رحمة
وانه هيرفع راسه وسط اهله في البلد لان بنته عملت اللي محدش في بناتهم ولا ولادهم حتى عملو اللي رحمة عملته
رحمة اتخطبت وهي في اخر سنة لدكتور ابوه فاتح مخبز فى الشارع بتاعنا وسميحة اصرت تجهزها مع ابوها ولما رفض قالتله ان رحمة بنتها زى ما هي بنته واجهزتها الكهربائية هدية من ام لبنتها
رحمة مكنتش بتقول لسميحة غير يا ماما
واتجوزت بعد ما خلصت جامعة علي طول وبتشتغل هى وجوزها واهو حياتهم ماشية علي قدهم
رحمة مفيش مرة تيجى لأهلها الا وتكون طالعة لسميحة تشوفها وسمت اول بنت ليها سميحة
سميحة دايما بتقول رحمة دى عملي الصالح في الدنيا
بتقولى انها اللي عملته لابنها ومطمرش فيه لما عملت اللي اقل منه لرحمة طمر فيها
كمان بتقولى ان هي وابوه السبب في انانيته دى
فرحتهم بيه وانه ابنهم الوحيد اللي جع بعد اربع سنين من غير خلفة خلتهم دلعوه ومشيلهوش مسئولية خلو بياخد بس مبيديش بيهتم بنفسه وبس
معودوهوش ان هما ليهم حقوق عليه لازم يوفيها
فطلع متعود ان هو بس اللي ليه حقوق
هو اللي لازم يهتمو بيه وهو ميهتمش ولا يعملهم اعتبار
كانت بتبكى وهي بتقولى كده
سميحة بعد جواز رحمة رجعت تانى عايشة لوحدها
بس انا كتير بروح اقعد معاها وبعزمها تيجى تتغدى معانا
مريم بنتي رجعت من الكلية دخلت اوضتها علي طول قلقت ورحت اطمن عليها
امال :مريم يا حبيبتى مالك
مريم وهى بتمسح دموعها :انا كويسة يا ماما متقلقيش
امال :كويسة ايه بس هتكدبي عليا في ايه
مريم وهي بتبكى :ماما انا عايزة افسخ خطوبتى من حسين
امال :ليه بس يا حبيبتى جرا ايه
مريم :بيكلم بنات يا ماما بيخونى من قبل منتجوز حتى
ولما واجهته قاله انه راجل وحر يعمل اللي هو عايزه انا مش هتجوزو يا ماما حرام اربط مصيرى بمصير إنسان زى ده حرام والله
امال :خلاص انا هكلم ابوكى
وفتحت الموضوع مع علي بس هو قالي ان حسين لسه شاب وطايش وبكرة يتجوز ويعقل ومدام علي قد كلام وبس تبقي بسيطة وان غيره بيعمل بلاوى
وبلاش البت تخرب علي نفسها هي كلها كام شهر ويتجوزو
لما الناس تلاقيها فسخت الخطوبة بعد سنة وجوازهم قرب تقول عليها ايه وطلب منى اعقلها
وسمعت كلامه وقلتلها اللي قاله ساعتها مريم بصتلي بصة حسستنى بعجزى وضعفى
مقدرتش ابصلها سبت البيت وقلت اروح اقعد شوية مع سميحة وحكتلها
سميحة :حرام عليكى بنتك يا امال هتضيعيها وترميها في جهنم بايدك حسين حياتها معاه هتبقي عذاب
لو جوزتوهاله هيعرف ان ملهاش ضهر وهيعمل اللي هو عايزه حسين زى عمر ابنى انانى وميهموش غير نفسه
متعمليش في بنتك كده
انا مسامحه عمر علشان هو ابنى قلبي راضى عنه علشان مقدرش اغضب عليه وربنا يغضب عليه علشانى
عارفة انا بدعيله رينا يباركله فى ولاده ويهديهم من عنده وميعملوش في عمر اللي هو عمله فيا
قولى لا يا امال اتعلمي تقوليها ربنا هيسالك عن بنتك دى وهيقولك مخدتيش حقها ليه بدل متجيبو حسين ده تهزقوه وترمو شبكتو في وشه هتجوزهاله كده ببساطة
دافعي عن حق بنتك يا امال كحكح ومتعمليش كحكح فيها كده
امال :شكلك تعبان
سميحة :اه البرد والكحة زادو عليا
امال :طب انتى خدتى الدوا
سميحة :خدتو بس معملش حاجة
امال :طيب انا هروح اعملك حاجة سخنة واجى
ورحت عملتها ورجعت
امال :سميحة ايه ده انتى نمتى سميحة قومى اشربى اليانسون سميحة طب قومى اشربيه ونامى
سميحة ..سميييييييييحة الحقونى
ماتت سميحة ماتت
ماتت وابنها مش جنبها ومشافتوش من اكتر من شهر
انا بكيت عليها كتير ورحمة كانت بتبكى كأن امها اللي ماتت وسيدة ام رحمة كانت بتبكى كتير وتقول الست سميحة دى مكنش في زيها كفاية اللي عملته لبنتي في الجنة باذن الله حتى عباس البواب بكى عليها
بعد العزا بيومين لقيت عمر جه باع الشقة وحتى العفش باعه شفته عالسلم
امال :البقاء لله
عمر :الدوام لله
امال :امك ماتت راضية عنك قالتلي انها راضية عنك علشان ربنا ميغضبش عليك قالتلي انها بتدعيلك ولادك ميعملوش فيك اللي انت عملته فيها
امك كانت ست طيبة وحنينة وانا مش عارفة انت جايب قسوة قلبك دى منين ادعى ربنا يسامحك علي اللي عملته فيها لانك مش هتقدر تستحمل عقاب ربنا علي عقوقك بيها
عمر :يا طنط امال انا...
امال :اسكت متقولش حاجة انا مش عايزة اسمعك وكويس انك بعت الشقة لانى مش عايزة اشوف وشك تانى
حتى البيت اللي فيه ريحة ابوك وامك بعته
حسبي الله ونعم الوكيل فيك
وسبته ومشيت ودخلت البيت فضلت ابكى يا ترى ممكن ولادى يعملو فيا كده لما يكبرو
فضلت اسبوع ببكى وعلي والاولاد مفكرنى ببكى علي سميحة بس الحقيقة انا كنت ببكى عليها وعلي نفسي معاها ببكى من حزنى عليها ومن خوفي لولادى يعملو فيا اللي ابنها عمله فيها
بس انا قررت لا انا مش هسيب ولادى يعملو فيا كده مش هخليهم يطلعو زى عمر هعرفهم انى ليا عليهم حقوق انا وابوهم هدافع عن حقوقهم وهربيهم انهم يكونو سند ليا انا وابوهم لما نكبر
طلبت من مريم تخلي حسين يجلنا البيت
وجه وهو قاعد في الصالون جبت الشبكة اديتهاله
حسين :ايه ده يا حاجة امال
امال :شبكتك يا ابنى انت ملكش بنات عندنا للجواز
ده انت خنت الامانه وهي لسه في بيتنا ومش علي زمتك امال لما تبقي في بيتك وتحت طوعك هتعمل فيها ايه
حسين :الحاج علي راضي عن اللي انتى بتقوليه ده
امال :الحاج علي تهمه سعادة بنته وراحتها
ومريم لا هتكون سعيدة ولا مرتاحة معاك ولا انت هتصونها احنا منأمنش علي بنتنا معاك
خد شبكتك وامشي وانسي انك كنت تعرف مريم في يوم
حسين :يا حاجة انا.....
امال :امشي من سكات بدل مخلي احمد اخوها الصغير يجى يطردك
مريم وهي بتحضنها :انا متشكرة اوى يا ماما ربنا يخليكى ليا
امال :ويخليكى ليا يا حبيبة ماما
علي لما رجع وعرف اللي عملته زعق واتخانق
على :يعنى ايه ترجعيله شبكته ايه يا امال خلاص بقا رايك من دماغك وانا مليش لازمة في البيت
امال :قطع لسان اللي يقول كده ده انت راجل البيت يا علي ده احنا كلنا عايشين في حماك وبحسك
بس دى بنتنا نرميها لواحد عديم الشرف زيه
نأمنه عليها ازاي ده معملهاش ولا عملنا اعتبار وهي لسه في بيتنا يا علي امال هيعمل ايه لما تبقي في بيته
هتعمل كده في مريم بكريتك اول فرحتك واول ما شافت عينك وشالت ايدك
هتهون عليها ترميها في نار حياتها معاه بايدك
على :برضه مكنش ينفع تعملى كده من نفسك
امال :انا خايفة ولادنا يعملو فينا اللي عمر عمله في سميحة
على :وايه اللي يخليهم يعملو فينا اللي عمر عمله
امال : يا علي خلينا نربيهم صح ونخاف عليهم بجد
لايطلعو انانين ولا يطلعو ضعاف وملهمش راي
بلاش نضيع حقهم علشان ميكرهوناش ويقولو اننا السبب في الحزن والهم الي هما هيبقو فيه
علي:طيب كنتى قلتيلى قبل ما تعملى كده
انما بتفهمينى بعد ما خلاص نفذتى
امال :حقك علي راسي من فوق انا اسفة اول واخر مرة بعد كده رايك قبل رايي في كل حاجة والشورة شورتك
علي :خلاص هعديها المرة دى بس علي الله تتكرر تانى
امال :خلاص توبة من دى النوبة
احط الاكل علشان نتغدى انا عملا النهاردة مسقعة علشانك
على :حطى يا امال انا واقع من الجوع
انا راضيت علي لانى عارفة انه طيب وانا مش عايزاه يزعل منى قررت اجيب حق بنتي وكمان مخسرش ابوها
بس كان لازم اغور انا حسين لانه لو كان اتكلم مع علي وقاله انه هيتغير علي كان هيصدقه وهو في الاول وفي الاخر راجل زيه وعلي ميهموش اكتر من ان بنته تتستر
بس تتستر مع انسان زى حسين يبقي كانها متسترتش واخرتها هترجعلنا بعيلين في ايدها وهي كارهاه وكارهانا وكارهه نفسها حسين واللي زيه مش ممكن يبقو ستر في يوم من الايام
بعد ما حضرت الفطار ودخلت اصحى الكل
امال :ندى كريم قومو يلا علشان المدرسة
ندى :صباح الخير يا ماما
كريم :صباح الخير
امال :صباح النور
علي فين طبقو سرايركم الاول
كريم :ليه مش انتى كل يوم بتطبقيها
امال :لا يا كيمو خلاص
انتو كبرتو وهطبقوها بنفسكم مش كريم راجل وبيعتمد علي نفسه صح
كريم بابتسامة :صح يا ماما
امال :برافو يا حبيبى يلا طبق سريرك بسرعة علشان تلحق تصلي الصبح وتفطر وتلبس وتروح المدرسة ومتتاخرش
شوف ندى شاطرة ازاي وسمعت الكلام يلا اعمل زيها
كريم :حاضر
انا قررت اربي ولادى صح
انا امهم وهما مسئولين منى بس لازم يعملو حاجات لنفسهم علشان ميطلعوش انانين متواكلين عليا وميعتمدش عليهم لازم يعتمدو علي نفسهم ويتعبو علشان يقدرو اللي انا بعمله علشانهم وميفكرهوش حق مكتسب وخلاص حاجة طبيعية مستاهلش عليها شكر او تقدير
بقيت اخليهم يطبقو سرايرهم ويكوو لنفسهم ويروقو اوضهم بنفسهم والبنات تساعدنى شوية في البيت
والولاد يجيبو الطلبات من بره
علمتهم يقولو تسلم ايدك بعد الاكل
ويبوسو ايد ابوهم ويقولو شكرا لما يجبلهم حاجة
علمتهم يقدرو تعبي وتعبه علشانهم
خليت رضايا ورضاه حاجة مهمة بالنسبالهم يبقو حريصين عليها مش حاجة ضمنينها
هو طبعا احنا الحمد لله راضين عنهم ومسامحينهم علي اي حاجة بس مينفعش نربي ولادنا علي كده وفي الاخر نستغرب انهم طلعو انانين مبيفكروش فينا ولا عاملين لينا حساب
مريم بعد الكلية اتجوزت مدرس كان بيشتغل معاها في المدرسة اللي اتعينت فيها اول ما اتخرجت هي اصلها كانت في كلية تربية وخلفت منه بنتين وولد
واحمد النوم اللي نامه ده كله طلع بفايدة ومش عالفاضي ودخل حاسبات ومعلومات ولما طلب يشتغل وهو بيدرس علي جوزى اعترض بس انا قلتله اننا نسيبه يعتمد على نفسه وانه لما يتعب في الفلوس اللي معاه مش هيصرفها فى حاجة فاضية وهيقدر تعب علي نفسه علشانهم
وفكرته انه كان اكبر منه بسنتين لما اتجوزنى وبقا مسئول عن بيت وزوجة وانه بيشتغل من وهو اصغر منه
قلتله سيبه يطلع راجل زى ابوه فاقتنع الحمد لله
وندى وكريم كانو فرصتى اعوض كل الي اتحرمت منه اهتميت بدراستهم اهتميت ان كريم يعرف ان ندى زيها زيه وهو مش احسن منها لانه الراجل اهتميت انه يقدرها وميجيش عليها ويفكر انه مدام هو الولد يبقي خلاص
كنت حريصة ان احمد وكريم ميطلعوش زى حسين
وان ولادى الاربعة ميطلعوش لا قدر الله زى عمر
اتعلمت اعمل اللي انا عايزاه بس بذكاء لان علي تفكيره ميختلفش كتير عن تفكير ابويا الله يرحمه
بس انا اتعلمت ازاي اعمل اللي انا عايزاه من غير ما هو يضايق ولا يحس انى باجى نحية رجولته او بقلل من احترامه كراجل البيت وان الراي الاول والاخير ليه
الحكاية كانت صعبة بس انا كنت مصرة انجح واخلي ولادى احسن ناس في الدنيا يبقو عملي الصالح اللي ربنا هيسالنى عنه قررت اعمل كده لانى عايزة كده مش لان ده المفروض اعمله لا امال عايزة تخلي ولادها تجارتها الكسبانة سهمى اللي مش ممكن يخيب في الدنيا ولا باذن الله في الاخرة💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا