ملك لنفسها :اه يا ايدى يانا ياما انا ايه اللي خلانى اعمل فيها سبع رجالة فى بعض واجيب الحاجات دى وانا راجعة من الكلية مكنت روحت ونزلت تانى اجيبهم او بعت احمد يجيبهم او حتى ان شالله عنهم ما جم ايدى بتتقطع
لا انا هحطهم في الارض اريح ايدى شوية
مالك :يا انسة تحبى اساعدك
ملك :افندم
مالك :الشنط تحبى اساعدك واشيلها معاكى
ملك لنفسها :طب ده بيحاول يعلقنى وكده ولا بيتكلم جدعنة اقوله ايه لا مانا مش هشيلهم تانى انا فقدت احساسي بالخنصر والبنصر خلاص مش قادرة
وبعدين بصتله وقالتله: يا ريت لو سمحت
مالك :حضرتك ساكنة في عمارة كام
ملك :عمارة اتنين وعشرين
مالك :احنا جيران انا ساكن في عمارة خمسة وعشرين قصاد عمارتكم
ملك باندفاع :انت الشبح
مالك :ايه الشبح
ملك :ايوه العمارة دى مفيش فيها غير شقة واحدة بس سكنت من شهر بس اللي عايش فيها مبيخرجش مبيقعدش في البلكونة مبينشرش غسيل حتى
طول النهار مقفلة وباليل بتكون اضاءتها هادية وفيه ضل احيانا بيتحرك كانه شبح ده انت نشفت دمى وانا خايفة ومستنية اي دليل ان اللي عايش جوا الشقة بنى ادم عادى زينا
مالك :انا ببقي نايم طول النهار وبصحي طول الليل
واضاءة الشقة هادية علشان انا مبحبش الاضاءة القوية بالنسبة للغسيل فانا عايش لوحدى وهيبقي شكل مسخرة وانا واقف انشر الغسيل في البلكونة ولا انتى ايه رايك
ملك :وجهة نظرك تحترم شكلك هيبقى فانلة جدا وانت واقف تنشر هدومك في البلكونة طب وبتعمل ايه في الغسيل
مالك :بغسله واجففه وبعدين بكويه واللي مبيكونش نشف بفرشه علي كنب الصالة ينشف
ملك :الجيش قالك اتصرف برضه
مالك :هو مفيش حاجة نركبها بدل المشي ده كله
ملك :احنا مدينة جديدة حتي العمارات اغلبها مش ساكنة لسه فمفيش تاكسي ولا حتى توكتوك يدخلك جوا والعربيات بتنزلك عالطريق من بره وخلاص
مالك :هو عمارتكم مين ساكن فيها غيركم
ملك :الاول ساكن فيه مجموعة طلبة في الجامعة
والتالت ساكن فيه راجل كبير ومراته
وانا واهلي في التاسع اخر دور
مالك :مفيش غيركم
ملك :اه هي بقية الشقق محجوزة بس اصحابها لسه مشطبوهاش وقعدو فيها احنا اول ناس قعدنا وخدنا اخر شقة في اخر دور وبعدنا بشهر جه الراجل الكبير وبعدها بشهرين جه الطلبة
مالك :انتى عندك اخوات ايه
ملك باستغراب :احمد وعادل بس بتسال ليه
مالك :انتى فتاة الشروق
ملك :انا مين
مالك :فتاة الشروق بتطلعى كل يوم تتفرجى علي الشروق من علي سطح العمارة بتاعتكم بس ايه ده انتى محجبة امال بتطلعى بشعرك ليه
ملك بخجل وغضب من نفسها :علشان انا استاهل ضرب الجزم القديمة حضرتك
مالك :مش فاهم قصدك
ملك :انا محجبة طبعا وكنت بطلع بحجاب بس العمارات اللي حوالينا اغلبها مش ساكن واللي ساكنين مبيبقوش صاحين في الوقت ده فانا بقيت بحطه علي كتفي لما اطلع مش مدية خوانة ان في حد صاحى وادينى طلعت غلطانة وغبية وخدت ذنوب قد الدنيا
مالك :انا اسف
ملك :لا انا اللي غلطانة انا اللي المفروض انى محجبة يبقي مدام بره بيتنا ميبنش منى شعرة واحدة
ملك لنفسها من غير صوت :وده ما شاء الله مكنش فيه حجاب اصلا شوفي بقي هتكفرى عن الذنب ده ازاي يا ست ملك
مالك :روحتى فين
ملك :هاه لا مفيش
العمارة اهى متشكرة تعبتك معايا
مالك :لا شكر علي واجب
ملك :بعد اذنك
ملك دخلت شقتهم
ملك :ماما جبتلك الطلبات اللي عايزاها وايدى اتكسرت من تقلهم بعد كده انا مليش فيه احمد ولا عادل يجيبو وهما راجعين
امال :خلاص ماشي هاتيهم طيب ادخل المطبخ احطهم مكانهم
ودخلت ملك اوضتها
ملك لنفسها :مطلعش شبح طلع انسان عادى اهو وبيتكلم زينا وزوق وشال عنى الشنط بس ينهار ابيض ده شافنى وانا عالسطح تستاهلي يا ست ملك علشان تعملي فيها عميقة اوى وطالعة تتفرجى عالشروق وسايبة شعرك النسيم يطيره فاكرة نفسك بطلة مسلسل هندى
عقابا ليكى مفيش طلوع تانى وهتطلعي ربع مصروفك صدقة بنية الاستغفار عن ذنبك ده وكمان هتستغفرى ربنا ميتين مرة ذيادة في اليوم عن اللي هببتيه ده
انا هتوضا واصلي العصر وادعى ربنا يغفرلي وبعد الصلاة وانا بقول اذكارالمساء هستغفر كتير
ااااه يا ربي استغفرك واتوب اليك اعمل ايه في نفسي بس
بعد اسبوعين وملك راجعة من الكلية
مالك بصوت بينهج لانه بيحاول يحصلها :يا فتاة الشروق يا فتاة الشروق
ملك وقفت وبصت رواها شافته جاى عليها :فتاة الشروق مين اه افتكرت ده اللقب اللي طلعته عليا
مالك :مانا معرفش اسمك وكنت عايز حاجة الفت انتباهك بيها علشان تقفي انتى اسمك ايه صحيح
ملك :انا ملك
مالك :وانا مالك
ملك :تشرفنا بس لو سمحت مشيتك معايا دى متنفعش المرة اللي فاتت كنت بتساعدنى في شيل الشنط المرة دى مفيش اي عزر
مالك :اااااه انا اسف طيب معلش ممكن سؤال وهمشي انتى مبقتيش تطلعى ليه
ملك :ولو انى مش المفروض اجاوبك بس انا هجاوب
علشان حضرتك شفتنى وده معناه ان ممكن اي حد يشوفنى
مالك :طيب كنتى طلعتى بحجابك
ملك :انا كنت بطلع علشان ابقي لوحدى الوحيدة اللي صاحية في الوقت ده واتضح انى مش لوحدى ولا حاجة
فخلاص مبقاش ليه لازمة كمان انا حرة اعاقب نفسي بالطريقة اللي تعجبنى بعد اذنك
ومشيت ملك بخطوات سريعة
مالك لنفسه :البت دى مالها وبتعاقب نفسهاازاي يعنى وعلى ايه
غريبة وكلامها اغرب وشخصيتها اغرب واغرب
بعد شهر
مالك :انسة ملك لو سمحتى
ملك :ايوه حضرتك في حاجة
مالك :لو سمحتى ممكن رقم والدك
ملك :ليه
مالك :ها.. اااه .. هاخد منه ميعاد اتقدملك فيه
ملك :وده حب من اول نظرة ده احنا هنهرج يابو الشباب
وبعدين قالت في نفسها من غير صوت انا بتكلم معاه كده ليه انا مينفعش اكلمه كده ده لو اخويا في الرضاعة مش هكلمه بالطريقة دى الله يخربيت كده ملبسنى في ذنوب من اول مرة شفته فيها
مالك طرقع بصوابعه قدام وشها :هاى روحتى فين
ملك :ها.. .بص الله يكرمك سبنى في حالى
مالك :يا ستى طيب هاتى رقم والدك طيب وانا همشي
ملك : والله حضرتك لو عايز تتقدملي مش المفروض توقفنى في الشارع علشان رقم والدى اللي هو جارك وممكن توقفه بنفسك وتكلمه بدل ما انت موقفنى انا كده
بعد اذنك واتمنى تكون دى اخر مرة توقفنى فيها
مالك :مالها دى ما كانت خدتنى قلمين احسن
بس هى معاها حق انا اكلم والدها بنفسي احسن
وبعد يومين ملك والدها قالها ان في واحد جارهم متقدملها
وهيجى كمان يومين تشوفو
ملك لنفسها:ايه ده مطلعش بيشتغلنى
يا ترى انت حكايتك ايه يا كابتن مالك مالك الشبح
انسان مريب ومش مفهوم
بس هانت اهى كلها يومين وتيجى الملوخية تحت المخرطة
واتكلم معاه واعرف ايه حكايته بالظبط
وعدو اليومين وجه ميعاد مالك
والد ملك ندالها ودخلت ملك
ووالدها قام قعد بعيد عنهم في الصالة قصاد الصالون اللي هما قاعدين فيه
ملك فضلت ساكتة
مالك :ايه يا تلت اربع اسمى مش سامعلك صوت
ملك باستغراب :تلت اربع اسمك ... معاك حق ده انا تلت اربع اسمك فعلا بس هو في حد يقول كده لواحدة المفروض انه بيتقدملها
مالك :اه لما يكون عايزها تبصله وتبطل تبص علي جذمته يا ستى ملمعها قبل ما اجى والله بصا في الارض ليه واقع منك حاجة بتدورى عليها
ملك :اه انت هتروش عليا بقي لا واضح كده ان الموضوع بلح من اوله
مالك :وهى في واحدة تقول تروش وبلح لواحد المفروض انه بيتقدملها
ملك :ما انت اللي استفزتنى بكلامك ده
مالك :اه مانا قاصد
ملك :نعم
مالك :اه قاصد اصلك ساكتة وانا متعود عليكى بتتكلمى فقلت افك احراجك من الموقف يعنى
طلع عندك حق شقتى من بلكونتكم تدى علي بيت اشباح بالاضاءة بتاعتها دى
ملك :وانت عرفت ازاي
مالك :جالي اتصال ووالدك قالي الشبكة في البلكونة احسن
شقتى مكشوف معظمها من بلكونتكم
المهم انا اكيد مش جاى علشان اشوف شقتى من بلكونتكم تحبى تبداى انتى اسئلة ولا ابدء انا
ملك :ابدء انت
مالك :تمام عرفينى بنفسك
ملك :انا ملك اتنين وعشرين سنة اخر سنة كلية تجارة
وانت عندى اتنين اخوات ولاد اكبر منى زي ما سبق وقلتلك بس كده وانت
مالك :انا مالك تلاتين سنة خريج كلية تجارة برضه انا وصاحبى فاتحين مطعم شغال اربعة وعشرين ساعة هو بيكون هناك طول النهار وانا بروح باليل قليل اوى لما اروح بالنهار علشان نخلص حاجة في الحسابات او نغير حاجة في نظام المطعم ساعة مشوفتك اول مرة وتانى مرة كانت من المرات القليلة دى اهلي عايشين في طنطا بس انا حبيت الحياة في القاهرة من وانا في الجامعة علشان كده فتحت مع صاحبي المطعم هنا بعد ما اتخرجنا على طول انا كنت ماجر شقة مفروشة قبل ما اشترى الشقة اللي في العمارة اللي قصادكم قلت الملك احسن و علشان تبقي قريبة من المطعم
عندى اخين واحد اكبر منى وده متجوز مع اهلي في البيت والتاني اصغر منى وده اتجوز من سنة بس مش مع اهلي خد شقة قريبة من شغله بس في طنطا برضه
ملك :هو انت متقدملي ليه
مالك :علشان صراحتك دى
ملك :ازاي مش فاهمة
مالك :اصلك علي طبيعتك كده في كلامك مبتلفيش وتدورى وبعدين قوية وجريئة كده مبتتكسفيش تحرجى حد مدام عارفة انك صح وكمان بصراحة عندى فضول اعرفك
ملك :فضول تعرفنى
مالك :اه الكلام اللي بتقوليه في عقلك وتسرحى ده عايزة اعرفه يعنى ايه بتعاقبي نفسك لما متطلعيش السطح
ملك :بسيطة انا لما بعمل حاجة كبيرة غلط او حرام بعاقب نفسي علشان مكررهاش
مالك :وانتى غلطتى لما طلعتى السطح
ملك :لا غلطت لما خدت راحتى كانى في بيتنا بحجة ان مفيش حد صاحي انا محجبة في اى حتة بره حيطان البيت ده حتى لو كانت البلكونة بتاعتنا
مالك :بس انا كنت بشوفك من شباك اوضتى علشان كده انتى مختيش بالك منى كمان ملامحك مكنتش واضحة اوى انا حتى سئتلك الاسئلة اللي سالتهالك دى علشان اتاكد ان انتى
ملك :ولو برضه انا غلطت
مالك :عارفة انا كنت بشوفك بعد ما برجع من المطعم وكان عندى فضول اعرف انتى مين وبتطلعى كل اليوم السطح بعد الفجر بساعة ليه
لما شوفتك اول مرة مقدرتش متاكدش اذا كنتى انتى هي ولا لا او علي الاقل اعرف ممكن تكون مين
انتى كنتى بتطلعى ليه صحيح
ملك :انا بحب اتفرج عالشروق والمنظر من السطح تحفة احلي بكتير من المنظر من البلكونة كمان بفكر بهدوء لما تكون حاجة شغلانى وعايزة اخد فيها قرار
بطلع نص ساعة وانزل افطر والبس واروح الكلية فكرة انى اصحى اصلي الفجر واتفرج عالشروق كانت بتخلينى متحمسة لان لو الفكرة في الكلية هقوم المغرب عادى
مالك :منطق برضه احلي حاجة انك بتتعاملي مع نفسك بذكاء عارفة تعاقبيها ازاي تشجعيها ازاي تكافئيها ازاي حلو ده
انتى مختلفة ومثيرة للفضول جدا علي فكرة
ملك :مش لوحدى ما انت كمان كده
متقدملي علشان فضولك ناحيتى ايه السبب ده مش مستوعباك
مالك :لا انا اتقدمتلك علشان انتى اول انسانة تثير فضولي وتخلينى عايز اعرفها واتكلم معاها ودى حاجة فريدة بالنسبالى ومهمة
ملك :تمام وجهة نظرك تحترم برضه وتحسها عميقة كده
حابب تسالنى علي حاجة تانية
مالك :لا انا كده خلاص وانتى
ملك :انا برضه خلاص تمام عن اذنك وبابا هيبقي يبلغك برايى
ومشي هو واستخرت انا اول مرة مكنتش حاسة بحاجة بس كررت الاستخارة بعد صلاة الفجر حسيت براحة شوية وكررتها تانى بعد ما رجعت من الكلية حسيت براحة اكتر فكرت لقيت ان مالك في حاجات كتير من اللي انا عايزاها في شريك حياتى وانا مش حسا انى دى اخر مرة عايزة اقعدها معاه لا انا كمان بقي عندى فضول اعرفه
وبعد يومين بابا كلمه وبلغه بموافقتى وجه هو واهله واتفقنا علي الخطوبة دلوقتى والجواز بعد ما اخلص الكلية
مع الوقت فضولي بقي بيزيد تجاه مالك ومع الوقت بقي اكتر من فضول بقي اهتمام والاهتمام بقى حب
على ما جه ميعاد فرحنا كنت بقيت فعلا بحبه وبحب الراحة اللي بحسها في الكلام معاه لدرجة انى بتكلم من غير تفكير
بالنسبة لمالك المختلف اللي فيا انى ثرت فضوله وبقي عايز يعرفنى
بالنسبالي المختلف اللي فيه هو انه اول شخص اتكلم معاه وانا مش عارفة اتحكم في كلامى بيخلينى علي طبيعتى غصب عنى وبقول اي حاجة تيجى في بالي من اول مرة شفته فيها واحنا بنتكلم وكاننا صحاب وبينا عشرة مش اتنين ميعرفوش بعض واول مرة يتكلمو والموضوع اتكرر في المرتين اللي شفته فيهم بعدها وزاد وكان واضح جدا لما جه اتقدملى اول مرة لوحده السهولة اللي كنا بنتكلم بيها دى مبتحصلش مع اي حد المهم اتجوزنا انا ومالك وعشت معاه في بيت الاشباح
اللي مبقاش بيت اشباح لانى بقيت مخلية اضاءة البيت عادية وبقيت بنشر غسيل في البلكونة الحمد لله
مالك كمان قسم الايام بينه وبين شريكه علشان ميبقاش كل ايامه باليل هنقعد مع بعض امتى انا وهو كده
وانا اشتغلت في بنك وبعد سنة من جوازنا بقيت حامل وخلفت مريم وبعدها بتلت سنين محمد واخيرا بعدهم بسنتين سيف
وبقيت احيانا بنطلع انا ومالك نتفرج عالشروق سوا
وانا مش مصدقة انى طلوعى اتفرج عالشروق كان سبب ان مالك يعرفنى والشنط اللي كانت معايا كانت سبب انه يساعدنى ويتكلم معايا وبعدها يتقدملى ونتخطب ونتجوز
فعلا ربنا بيسبب الاسباب وفي احيان كتير الاسباب بتكون ابسط مما نتخيل واحلي مما نتخيل كمان💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الأعلى هو وموتى المسلمين جميعا خصوصا من زال أثره فلم يزره زائر ولم يذكره ذاكر