حكايات منار

حكاية"شجاعة الاختيار"

انا بيهمني راي اللي حواليا فيا اوى مبشوفش نفسي كويسة غير لو هما شافونى كده وانا صغيرة كنت عايزة العب كاراتيه وماما مرضيتش قالتلي دى للولاد وبس انتي بنت ولما كبرت مدخلتش علمى رياضة مع ان كان نفسي ادخل هندسة علشان بابا قالي دى للولاد وانتي لازم تبقي دكتورة وبقيت دخلت طب اسنان وبقيت زي ما هما عايزين هدومى ماما بتشتريها معايا او بمعني اوضح بتشتريهالي انا بقيس بس حتي مع اصحابي بعمل اللي هما عايزينه نروح فين ناكل ايه هما اللي بيختارو
انا مبحاولش افكر حتي انا عايزة ايه بالنسبالي راي اللي حواليا اكيد صح ورايي اللي معرفوش لانى مبفكرش فيه اكيد غلط تلاتة وعشرين سنة وانا عالحال ده
رؤي بنت عمتي اتقدملها عريس ظابط وغني واكبر منها بتلت سنين بس عمتي كانت طايرة بيه وماما وبابا كانو بيتكلمو انها وقعت واقفة ده عريس ميترفضش انا قلت رؤي هتوافق من غير متشوفه اصلا وللمفاجاة رؤي رفضت ومحدش قدر يغيرلها رايها ماما قالتلي كلميها حاولي تقنعيها
روحتلهم البيت وقعدت معاها
سارة :ايه يبنتي اللي عملتيه ده بزمتك ده عريس يترفض
رؤى :اه وميترفضش ليه يعني مش مناسب ليا ولا انا مناسبة ليه
سارة :مش مناسب ليكي ليه ان شاء الله ناقصه ايه وظيفة كويسة وماديا واجتماعيا تمام جدا
رؤى : وانا هتجوز شغله وفلوسه يا سارة انا هتجوزو هو باخلاقة ومميزاته وعيوبه وانا قاعدة معاه زهقت من اول دقيقتين كلامه عملي وشايف نفسه شغله ومكانته الاجتماعية طالعين من عينه وباينين في كل كلامه ده كان ناقص يقولي انتي تحمدى ربنا اني اتنازلت واتواضعت واتقدمتلك
وانا ميلزمنيش حد شايفني اقل منه ولا ينفع معايا حد مغرور بالشكل ده عايزة حد ينفع اعيش معاه الوظيفة بتروح والشكل بيكبر وحتي الفلوس والمكانة الاجتماعية ممكن يضيعو واللي هيفضل ساعتها اخلاقة وصفاته وتقديره ليا ولبيتنا 
سارة  :طب وعمتي وجوز عمتي
رؤى :بابا اعترض في الاول وحاول يقنعني بس انا قلتله انى مصرة فقلى انه مش هيجبرنى علي حاجة وماما مبتكلمنيش من ساعتها بس مسيرها تهدي انا مش هتجوز علشان ميزعلوش شخص مش مناسب وادمر حياتي في الاخر اجي الومهم انهم اختارولي غلط والحقيقة ان ساعتها هيكون الغلط غلطي انا لانى مدافعتش عن حقي في الاختيار دي حياتى وانا اللي هعيشها ولازم انا اللي اختارها حتي لو اختارت غلط هتحمل نتيجة غلطي واتعلم منه احسن الف مرة متحمل نتيجة غلطهم امال ربنا اداني قلب وعقل ليه
ربنا كرمني بيهم وانا لازم احمد ربنا علي نعمه واقدرهم واستخدمهم صح انا هتحاسب عن نفسي يا سارة محدش هيتحاسب مكانى وهعيش حياتي برضه محدش هيعشهالي
سارة :اهم حاجة تكونى مرتاحة انا همشي بقى
مشيت وفكرت في كلامها لقيت ان معاها حق انا بعمل ايه في حياتى رؤي صح وانا غلط بس خلاص انا مش هغلط اكتر من كده روحت البيت وتاني يوم خرجت لوحدى جبت هدوم كنت خايفة شوية في الاول بس مع الوقت نسيت خوفي جبت هدوم كتير وبعدها روحت لوحدى اتغدى ومسكت المنيو فضلت نص ساعة بفكر هاكل ايه لحد ما الجرسون قالي تحبي اساعدك وكان هيعرض عليا اكل ايه قلتله لا انا هختار واختارت
الاكل اللي اختارته طلع طعمه وحش بصراحة طلع وحش اوى بس كلته وانا مبسوطة ان شاء الله المرة الجاية اختار اكل طعمه حلو المهم اني هختار
روحت البيت ماما قالتلي ايه اللي في ايدك ده قلتلها هدوم قالتلي لما انتي محتاجة هدوم مقلتليش ليه ننزل سوا قلتلها انا مكنتش محتاجة هدوم انا كنت محتاجة اجيب هدوم لوحدى اجيبهم علي زوقي لان انا اللي هلبسهم ماما قالتلي وانا زوقي وحش بوست راسها وقلتلها لا طبعا يا ست الكل بس انا محتاجة اعتمد علي نفسي
لبست طقم من اللي جبتهم ومشيت وانا حسا بسعادة حسا ان ليا كيان كيان اسمه سارة رحت الشغل لما فكرت لقتني بحب شغلي انا شاطرة فيه والمرضي بتوعي بيشكرو فيا  ومش طبيعي اكرهه لمجرد انى مش انا اللي اختارته بابا كان سبب ولو حتي هو مقاليش ابقي دكتورة اكيد مهما عملت كنت هبقي دكتورة ببساطة علشان ربنا عايز كده كليتي وشغلي رزق اختيار ربنا ليا والحمد لله علي اختيارات ربنا لينا كلها بس بقيت بشتغل بحب وطاقة اكتر من الاول علاقتي باهلي بقيت اقوى بقيت بحاول اقربلهم اتكلم معاهم افهمهم واحاول اخليهم يفهموني بقينا بنتناقش واقول رايى واسمع رايهم واحترمه واتقبله حتي لو اختلف مع رايي الله حلوة اوى الكلمة دى رايي وطبعا اوقات بيبقي رايي غلط وبنفذ رايهم بس اللي اختلف انى بنفذه وانا مقتنعة بيه وانا شايفه انه الصح
بقا ليا شخصية مستقلة وراي وصحابي بقو بياخدو رايى اتفاجأو شوية بالتغيير اللي حصلي بس مع الوقت استوعبو
بقيت حسا اني عايشة ان في حاجة اسمها سارة في الدنيا بعمل حاجات صح وحاجات اغلط واتعلم منها واحاول اصلحها ومكررهاش بقيت عايشة بدماغى وباخد قرارات وانفذها بقي عندى شجاعة الحياة وشجاعة الاختيار بقيت واثقة في نفسي واثقة في احساسي وفي عقلى وعارفة اني شخص كويس ومش محتاجة شخص يختارلي انا محتاجة شخص يختار معايا 💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا