انهاردة يومى كان متعب في الشغل وفي المواصلات وانا جاية بيقولو ان الناس اللي هتتثبت هينزلو اسماءهم قريب يا رب اتثبت مش علشان المرتب ولا حاجة بس انا حبيت المدرسة ومش عايزة لا اشتغل بعقد ولا حتي اتثبت في مكان تاني
خلى بالك من نفسك انا اسفة وبحبك
بعتت اللي كتبته وظبطت المنبه ونامت
تاني يوم راحت المدرسة رجعت لقت والدتها في المطبخ بتجهز حاجات علشان العريس اللي جاى لاختها
جه ومشي واختها قالت هتفكر وترد علي باباها
يومي النهاردة كان عادى بس في عريس جه النهاردة لندى اختي وقالت لبابا انها هتفكر وترد عليه الهانم تعرفه من اربع سنين وبيحبو بعض بقالهم تلت سنين ومستنياه يجي يتقدم هو جارنا بابا فاهم ان جاي صالونات وحد رشحهاله والكلام ده
طيب بابا صح انا عملت فيها من بنها ومقلتولوش ندى فرحانة اوى وانا فرحانة علشانها ربنا يتتملها علي خير
خلي بالك من نفسك انا اسفة وبحبك
بعتت الكلام وحاولت تنام معرفتش
افتكرت لما جه واتقدم قد ايه كان فرحان بيها
وافق علي كل شروط والدها وافق علي الخطوبة الطويلة اللي هي طلبتها جاب شبكة اغلي مما اتفقو كمان
وهما بيشترو فستان الخطوبة اشترالها فستان غالي لمجرد انه شافها وهي بتبصله باعجاب
يوم خطوبتهم حس انه ملك الدنيا قالها كده وفرحة الدنيا في عينيه كل يوم كان بيكلمها هي كانت بتقفل في الكلام وبترد بالقطارة بس هو كان قليلها كتير بالنسباله مفيش حرف قالته ونسيه مفيش حاجة بتحبها الا وعملهالها وعمره مستنا منها مقابل ولا حتي كلمة شكر كان بيخليها تحكيله كل يوم يومها عامل ازاي وايه حصل فيه كان بيعاملها كانها اميرة وانها كتير عليه وهي صدقت انها اميرة والاسوء حست انها كتير عليه
اهملته وجت عليه كتير فكرت انه مستحيل يبعد وانه مالوش غيرها اعتبرته مضمون ومسلم بوجوده في حياتها
لحد ما تعب طاقته خلصت مبقاش قادر يتحمل
حاول يفهمها كتير بس مفهمتش حذرها انه خلاص علي اخره
قالها خافي عليا خافي علي اللي بينا مسمعتوش وكابرت
لحد ما لقت دبلته قدامها عالترابيزة ومش في ايده
مشي هي اللي خلته يمشي جابت اخره وهي مفكرة انه مالوش اخر حست بقيمتها العالية ونسيت ان قيمتها دى جات من حبه وتقديره ليها اتوجعت وندمت علي كل اسفة مقالتهالوش علي كل بحبك استكترتها عليه ندمت علي كل حاجة
مسكت موبايلها وبعتتله تسجيل مصطفي انا اسفة بقالي خمس شهور ببعتلك بحاول اعمل كل حاجة اتاخرت اني اعملها بشركك في حياتي بخاف عليك بعتزرلك بقولك اني بحبك عارف قلبي بيوجعنى لما بحس انك ممكن تحب حد غيرى واني ممكن مشوفكش تاني والله ببكى انا بحكيلك علشان احس انك في حياتى لسه موجود مصطفي اديني فرصة واحدة بس اعمل كل ده وانت معايا اتاسفلك واقولك اني بحبك وعيني في عينك ادينى فرصة اعوضك اديني فرصة اعيش يا مصطفي انا حسا روحي بتتسحب مني والله
انا ندمت وقلبك الابيض اللي مفيش اطيب منه ده مش هيستكتر عليا فرصة اصلح فيها اللي عملته صح
اميرتك بتموت يا مصطفي بتموت في بعدك والله
وانهارت اميرة في البكا وفضلت تدعي رجعهولي يا رب ارحمني انا مليش غيرك والله مهغلط في حقه تاني وهحمدك كل يوم علي نعمة وجوده يا رب يا رب ارحمني انا اسفة يامصطفي والله اسفة والله بحبك بعتت التسجيل وفضلت تبكي
لقت تليفونها بيرن برقمه
اميرة :مصطفي وبكت اكتر
مصطفي :اميرة اهدى متبكيش دموعك غالية اوى عندي
حقك عليا اني احتجت كل الوقت ده علشان اصفا انا
اميرة قاطعته :لا انت اللي حقك عليا يا مصطفي انا اللي مستاهلكش انت اللي كتير عليا والله انا اسفة وحياة ربنا انا اسفة عمرى مهغلط في حقك تاني انا عارفة انك تستاهل واحدة احسن مني بكتير بس انا بحبك ومقدرش اعيش من غيرك
وبكت اكتر
مصطفي :انا مش عايز غيرك انا كنت بقرا اللي بتكتبيه في الاول مكنتش بقرا واحاول اتجاهله بس مقدرتش بقيت اقرء واستني تبعتيلي رجعت اشوفك اميرة اللي حبيتها من يوم ما شوفتها في فرح في العيلة وجمعت عنها معلومات واستنيت الوقت المناسب اتقدم وواحدة واحدة نسيت زعلي منك ووجع قلبي كلمة بحبك اللي فضلتي تكتبيها كل يوم دواه ووجع كرامتي كلمة اسفة داوته بس فضلت خايف
خايف تعملي كده تاني بس صوتك النهاردة ودموعك خلوني نسيت خوفي وبقيت خايف عليكي
اميرة انتي سامعاني
اميرة :سامعاك وحشني صوتك اوى اتكلم عايزة اسمعك وحشتني يا مصطفي وحشتني اوى
مصطفي :اول مرة تقوليلي وحشتنى
اميرة:علشان كنت غبية انت وحشتني هقولهالك كل يوم لحد اخر يوم في عمرى بس انت اديني فرصة مصطفي انا اسفة وبحبك
مصطفي :وانا كمان بحبك يا اميرتى💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا