روز :شهاب انزل اتغدى معانا
شهاب :مش هقدر يا روز خليها يوم تانى
روز :انزل بمزاجك بدل ما اخلى جدى يطلع ينزلك
شهاب :صدقينى مش هقدر مش جعان
روز :يبنى الغدا النهاردة كشرى من ايد جدى هتندم انزل بقا متبقاش رخم
شهاب بغضب :انتى مبتفهميش قلت مش جعان
روز :مفكر كده هسكت يعنى
شهاب :متزعليش يا روز
روز :انا مش زعلانة بس لو منزلتش بجد هزعل
شهاب :خلاص نازل
بعد ساعة
روز :فى ايه بقى انت هتفضل لحد امتى متضايق وقافل على نفسك بسببها
شهاب :دى اتخلت عنى يا روز فى اكتر وقت انا محتاجلها فيه مستحملتش حزنى على امى وسابتنى قالت انى اتغيرت وانى مش الانسان اللى هى حبته وانى اتغيرت هو انا اتغيرت يا روز هو انا مش من حقى احزن على امى
روز :انت متغيرتش انت بس كنت حزين وده حقك ده ابسط حقوقك هى مفهمتش حزنك ومقدرتش وجعك بس انت متغيرتش يا شهاب انت زى ما انت هى اللى تبقي غبية لو مفكرة انك المفروض تكون بتضحك طول الوقت بس انت كمان غلطت
شهاب :غلطت فى ايه انا
روز :انت اللى دايما بتبين للناس انك فرفوش ومية فل وعشرة هى متعودة عليك كده فلما بقيت دايما ساكت ولو اتكلمت بتبقي عصبي هى متحملتش انت بعدتها عنك بسكوتك وبعصبيتك
شهاب :وهى بعدت بعدت ليه ما انتى مبعدتيش
روز :لأنى فهماك وعارفة انك لما بتقولى سبينى لوحدى ده بيبقي اكتر وقت انت محتاجنى فيه يا معقد يا سيكوباتى
شهاب وهو بيضحك :اول مرة اضحك من يوم ما ماما ماتت
انا معقد وسيكوباتى يا روز
روز :كلنا معقدين وجوانا بلاوى
شهاب :بس انا كنت محتاجها يا روز
روز :اوعى تحتاج فى يوم حد مش عايزك اوعى دوس على قلبك وعلى نفسك حتى بس متطلبش من حد اهتمام متسمحش لحد يخدش كرامتك مجرد خدش مش يجرحها حتى وصدقنى الحب اللى بجد مش هتتخير بينه وبين كرامتك
شهاب :يعنى اخسر اتنين من اهم اربع ستات فى حياتى ورا بعض مش كتير عليا كده
روز :ينهارك ابيض انت كنت مساويها بطنط فاطمة والدتك احن ست فى الدنيا كلها وبطنط حنان عمتك حتة السكرة دى وبيا ده احنا عشرة خمستاشر سنة يا جذمة بتساوى حنين اللى تعرفها من تسع شهور بيا
شهاب :الله مش حبيتها يا روز
روز :ولو برضه اواسيك ازاى دلوقتى وانا حسا انى عايزة اقوم اكسر دماغك
شهاب :انا حبيتها بجد يا روز وكنت هخطبها لولا موت امى كان زمانى خطبتها كان زمانى خطبت واحدة بتحبنى وانا فى احسن حالاتى بس واحدة هتتخلى عنى مع اول وجع حقيقي يقابلنى فى حياتى
روز :يبقي احمد ربنا انك عرفت انها مش الانسانة اللى تتجوزها وانها عمرها مهتكون سند ليك ولا سكن لقلبك
طنط فاطمة هى خسارتك اللى بجد هى خسارتك اللى عمرك مهتعرف تعوضها هى وجعك اللى هيفضل معاك لحد ما تموت وتروحلها انما حنين دى مجرد تجربة فاشلة فصل وعدى في حياتك اقلب الصفحة واقفلها ومترجعش تبص فيها تانى ابدا لانها متستاهلش
شهاب :يعنى اعمل ايه
روز :ركز فى شغلك اخرج مع اصحابك كلمنى كل يوم الصبح وبالليل علشان نشتم عليها سوا ميضرش
انما توقف حياتك عليها تبقي مش شهاب اللى انا اعرفه تبقى اتغيرت علشان واحدة متستاهلش تأثر فيك بالشكل ده عارف لو هى تستاهل كنت هقولك حقك انما هى متستاهلش متديهاش اكبر من حجمها يا شهاب
شهاب :بس انا قلبى بيوجعنى اوى يا روز
روز :عليها
شهاب :لأ على امى البيت وحش من غيرها حياتى كلها وحشة من غيرها انا تعبان اوى اوقات بحس جسمى كله بيوجعنى كأن فيه حد ماسكنى وبيعصر فيا واوقات تانية بحس انى مش عارف اخد نفسى النفس تقيل ومش عارف اطلعه
انا مش بخير يا روز مش بخير خالص
روز :عارفة والله عارفة
عارف انت وجعك ده كله عليها مش على حنين لان حنين متستاهلش تتوجع عليها خسارة فيها الوجع
شهاب وهو بيعيط :انا عايز ابقى كويس يا روز عايز وجعى يختفى اعمل ايه
روز :وجعك هيقل صدقنى هيبقي وجع تقدر تتحمله وتكمل حياتك بيه
زى ما انا عرفت اكمل حياتى من غير ابويا وامى
شهاب :بس انا حياتى صعبة اوى من غير امى صعبة ولا تحتمل
روز :صعبة بس ربنا بيخلى فى حياتنا ناس تهون علينا زى جدى وزيك فى حياتى
وزى عمتك حنان وزيى فى حياتك وزى والدك واخواتك ولسه ناس تانية هتدخل حياتك لسه هتحب تانى وتتجوز وتخلف
شهاب :احب تانى
روز :اه طبعا تحب تانى هتيجى واحدة تستاهل قلبك اللى زى الماس ده هتيجى واحدة تستحمل وجعك وتقدره هتيجى واحدة تعرفك ان حنين دى ولا كان ليها اى تلاتين لازمة فى حياتك اصلا
شهاب :ولحد ما تيجى انا هعمل ايه
روز :هتستناها هتعيش حياتك عادى خالص لحد ما تلاقيها
شهاب :ولما الاقيها هعمل ايه
روز :اقتلها يا شهاب نشها طلقة فى نص راسها يخربيت غباءك يا جدع
شهاب :يا بت احترمى فرق السن طيب
روز :يا عم انا مشوفتش ربع ساعة تربية سيبنى واطلع شقتك يلا
شهاب :لا مش عايز اطلع هبقي لوحدى فوق
روز :انت صدقت ولا ايه انا بهزر ده بيتك انا جدى ممكن ينيمنى تحت بير السلم عادى علشانك والله حساه هيورثك معايا من كتر ما بيحبك
شهاب :انا كمان بحبه وبحسه جدى انا كمان مش جدك لوحدك
بالليل
روز :واخيرا رنيت عليا وسمعت الرنة اللى مخصصهالك
ده انا كنت نسيتها بقالك كتير اوى مرنتش عليا وانا اللى بكلمك لأ وساعات البيه مبيردش كمان
شهاب :حقك عليا بعد كده هتزهقى من كتر ما هرن عليكى
روز :ده التليفون ينور يا باشا ويتشرف كمان بس ايه مكلمنى ليه
شهاب :انتى مش قولتى اكلمك الصبح وبالليل نشتم على حنين سوا عادى
روز وهى بتضحك :انت مكلمنى علشان نشتم عليها
شهاب وهو بيضحك :لا خسارة فيها الشتيمة انا بس جعان وقلت اكلمك وانا باكل علشان ماكلش لوحدى
روز :طيب متنزل تتعشي معانا
شهاب :جدك مبيتعشاش اصلا
روز :يا عم انا بتعشي انزل نتعشي سوا
شهاب :لا هتحرج كفاية اتغديت معاكم ايه معنديش دم
روز :البيت بيتك يا شهاب وتيجى فى كل وقت
شهاب :خف تعوم برضه يا روز
روز :خلاص انزل افطر معانا بكرة
شهاب :شوف انا بقولك ايه وانتى بتقولى ايه يا بت هو جدك ده خلفنى ونسينى
روز :يا ابنى جدى اللى قايلى اقولك كده اصلا وهيزعل لو منزلتش فطرت معانا الصبح
شهاب :خلاص هنزل
انا شهاب عندى ستة وعشرين سنة الابن الوحيد لأمى بس مش الابن الوحيد لابويا عندى اختين من ابويا
امى كانت صاحبة عمتى حنان وكانت بتحب ابويا وفرحت اوى لما اتقدملها كانت بتحبه لدرجة انها لما عرفت ان عنده مشاكل فى الخلفة فهمته ان العيب منها هيا
بعد اربع سنين امى بقيت حامل فيا عرفت ان ابويا اتجوز عليها من سنة وطبعا مخلفش لان هو اللى عنده مشاكل
امى لما عرفت طلبت منه الطلاق ولما رفض قالتله ان العيب كان منه مش منها هى عمرها ما كان عندها مشاكل فى الخلفة واصرت على الطلاق بابا قالها انه هيطلق مراته التانية قالتله انها حتى لو طلقها هى برضه هتطلق منه لانها خلاص مش هتقدر تثق فيه تانى لانه كسر ثقتها فيه وقالتله ينساها ويكمل حياته مع مراته التانية وهى هتفضل ام ابنه وبس
مع اصرارها بابا وافق واتطلقو وطبعا انا عشت مع امى وبابا بعد سنة خلف من مراته التانية انا اكبر من اختى بسنة ونص
ابويا مش بس كسر ثقة امى فيه هو كمان كسر قلبها هى علشان بتحبه ضحت وفهمته وفهمت الكل ان العيب منها وهو راح اتجوز عليها من وراها علشان يخلف اكتشفت انه ميستاهلش تضحى علشانه ولا يستاهل تحبه بالشكل ده وعلشان كده اتطلقت منه
بس عمرها مقدرت تبطل تحبه وعلشان كده متجوزتش بعده اسوء حاجة فى الدنيا لما تحب حد ميستاهلش حبك
بعد موت امى ابويا عرض عليا اروح اعيش معاه بس انا رفضت مقدرتش اسيب ذكرياتى مع امى وامشى وكمان لانى فى بيت ابويا هحس بالغربة علاقتى باخواتى البنات عادية مش حلوة ومش وحشة ومرات ابويا مبطقنيش لا انا ولا امى لان ابويا بيقارنها بامى دايما وطبعا امى اللى بتكسب فى اى مقارنة
علاقتى بابويا كويسة امى عمرها ما حاولت تكرهنى فيه بالعكس
امى دى مفيش منها
روز تبقى جارتى جات تعيش مع جدها من خمستاشر سنة بعد ما امها ماتت وقبلها بتلت سنين كان ابوها مات وهى جات تعيش مع جدها اول ما شوفتها حسيت اننا هنبقي اصحاب انا اكبر منها بتلت سنين
روز تبقي صاحبة عمرى صحاب من خمستاشر سنة
بعد شهرين
شهاب :روز اطلعيلى
روز :انت عايزنى اطلع لشاب عازب عايش لوحده دى اخرتها يا شهاب عايز تتحمرش بيا انا كان قلبى حاسس انك واطى وذئب بشرى
شهاب وهو بيضحك :ايه البكبورت اللى طفح فى وشى ده اهدى يبنتى على نفسك يا ظنانة السوء عمتى هنا ومصرة تطلعى تتغدى معانا
روز :حنون عندك الله وحشتنى اوى خلاص هقول لجدى واطلع فوريرة
شهاب :قشطة مستنينك
حنان :طالعة
شهاب :اه
حنان :مبسمعش ضحكتك اللى بصوت عالى دى غير مع روز بس
شهاب :اصلها بتفصلنى الصراحة روز بتعرف تضحكنى فى اى وقت حرفيا فى اى وقت
حنان :ومحدش غيرها بيقدر يعمل ده
شهاب :لأ هى روز بس
حنان :عارف قريت مرة جملة حلوة اوى لدكتور ابراهيم الفقى بتقول "مطرح ما تلاقى ضحكتك ابنى بيت واسكن فيه "
شهاب :قصدك ايه عمتى
حنان :مقصديش روح افتح روز بتخبط
روز :حنون وحشتينى وحشتينى وحشتينى اوى كده برضه هونت عليكى متشوفنيش كل ده
حنان وهى بتحضنها :والله يا حبيبتى استنيتك كتير لما جيت المرة اللى فاتت بس انتى اتأخرتى فى شغلك وانا كان لازم ارجع للولاد
روز وهى بتغمزلها :علشان الولاد ولا علشان ابو الولاد يا حنون
حنان وهى بتضحك :بنت عيب بينى وبينك علشان ابو الولاد مبيحبنيش اتأخر بره البيت
روز :الله بقى على الحب اللى مولع فى الدرة
عمتك بتعشق وبتتمعشق وانت ساكت يا عم شهاب والله عيب عليك
شهاب وهو بيضحك :مقدرش افرق بين قلبين جمعهم الحب يا روز انتى عارفانى
روز وهى بتضحك :نحنوح اوى
شهاب :انا نحنوح يا كلب البحر انتى
حنان :كفاية مناقرة ويلا علشان نتغدى علشان الحق اروح
بعد اسبوع
روز :شهاب تعالى نخرج نشرب حاجة بره
شهاب :طب ما انزلك ونشربها عندكم
روز :لا انا زهقانة وعايزة اخرج انجز
شهاب :خلاص هغير وانزلك
بعد نص ساعة
روز :انا زهقانة اوى
شهاب :ومين سمعك انا مخنوق وشايف الدنيا من خرم ابره اضيق من عينك
روز :وانا عندى زهق اكبر من مناخيرك تخيل
مبهزرش يا شهاب انا بجد زهقانة اوى
شهاب :حصل ايه
روز :محصلش وده اللى مزهقنى
انه مبيحصلش جديد حياتى مملة وسخيفة وكل شهر ولا اتنين اقعد مع عريس شبه كل اللى اتقدمو قبله واترفضو كلهم شبه بعض وحاجة تخنق
شهاب :هو انتى مش عايزة تتجوزى
روز :لأ عايزة طبعا بس عايزة اتجوز واحد عايزنى عايز روز واحد يحس انه حقق حلم حياته لما وصلى واحد ميبقاش عايز من الدنيا غيرى كتير عليا الاقى واحد مش عايز من الدنيا غيرى
كلهم تقليدين يا شهاب
اللى بيتقدمو تقليدين وعايزين يتجوزو والسلام
واللى بيطلبو يرتبطو بيا وخلاص برضه تقليدين وعايزين يرتبطو وخلاص بأى واحدة المهم يكونو فى علاقة
مبحسش ان فى واحد فيهم قاصدنى انا مبحسش ان واحد فيهم هيكمل الناقص فيا بحس انى حتى لو بقيت معاهم برضه هفضل لوحدى وانا تعبت من وحدتى تعبت ونفسى اتحب بقى شهاب هو انا متحبش
شهاب :لا تتحبى طبعا انا بحبك
روز :مش قصدى حب الصحاب ده انا بتكلم عن الحب التانى الحب اللى بيفرح القلب وبيطمن الروح ده انا متحبوش مستاهلش ان قلبى يفرح وروحى تطمن
شهاب :لا تستاهلى طبعا
روز :امال مبتحبش ليه
شهاب :
روز :قوم نمشي انا عايزة اروح جدى لوحده بقاله كتير
شهاب :انتى رفضتى العريس اللى اتقدملك من كام يوم
روز :رفضته
شهاب :وجدك زعل منك
روز :زعل بس من ورا قلبه هو عايز يجوزنى ويطمن عليا بس برضه مش عايز يبقى لوحده ويعز عليه فراقى
اه صح شهاب هو انت هتعمل ايه لو انا اتجوزت
شهاب :مش عارف مفكرتش فى الموضوع قبل كده
روز :تصدق بالله انك رخم حتى التفكير مستخسره فيا قوم نروح قوم زهقتنى اكتر ما انا زهقانة
بعد شهر
روز :شهاب اى ريح طيبة اتت بك
شهاب :جدك صاحى
روز :اه صاحى منمش لسه انت عايزه
شهاب :اه
روز :ليه
شهاب :هاخد منه ميعاد اجيب ابويا نطلب ايدك منه
روز :وده من ايه ده
شهاب :هو ايه ده اللى من ايه ده
روز :الجنان ده شهاب متهزرش الحاجات دى مفيهاش هزار
شهاب :انا بتكلم جد
روز :خليك مكانك ربع ساعة هستاذن جدى نخرج وهغير واجيلك افهم فيك ايه
بعد ربع ساعة
روز :مالك بقى
شهاب :هو ايه اللى مالى عايز اتجوزك فيها ايه دى
روز :لا مفيهاش حاجة خالص عادى تطلب ايدى من جدى وتتجوزنى ومتاخدش رأيى مانا اصلى جاموسة هتسحبها وتمشي مش بنى ءادمة ومن حقى اقبل او ارفض
شهاب :وانتى ترفضينى ليه
روز :واقبلك ليه
شهاب :علشان احنا اصحاب
روز :ده مش سبب يخلينى اوافق على فكرة انت كده مبتقنعنيش
شهاب :متهزريش يا روز
روز :مبهزرش يبنى افهم الاسطورة بتقول انك مينفعش تتجوز حبك الاول
شهاب :انتى بتحبينى
روز :كنت ومبقيتش بنت مين فى مصر انا علشان اتجوز حبى الاول ها مش انت اتخزوقت من حبك الاول وقصة حبك فشلت ادينى فرصة افشل انا كمان متبقاش انانى كده
شهاب :روز اتكلمى جد وبطلى هزار
انتى بجد بتحبينى
روز :كنت يبنى كنت كنت فعل ماض يعنى
شهاب :ودلوقتى بطلتى تحبينى
روز :لأ طبعا بحبك بس بحبك كاصحاب ومش مستنية منك تحبنى حب غيره ولا هحب الحب ده ليك
هحبه لحد بيحبهولى ونفسه ومنا عينه احبهوله
مش لوح زيك احبه سنتين وميحسش بيا وفى الاخر يروح يحب واحدة غيرى ويجى يحكيلي عنها يحكيلي ادق تفاصيلهم
شهاب :انا كنت بحكيلك علشان احنا اصحاب
روز :وانا كنت بسمعك علشان احنا اصحاب انت كنت بتحكيلي كل حاجة يا شهاب مسبتش حاجة اتخيلها حتى يا مفترى
شهاب :وعلشان كده قررتى تبطلى تحبينى
روز :انت خلاص حبيت واحدة غيرى مينفعش افضل بحبك
شهاب :ومقولتليش ليه
روز :الحب مبينطلبش يا شهاب الحب يا يحصل يا ميحصلش وفى حالتى انا محصلش انت محبتنيش وانا مكنش ينفع اجبرك تحبنى ولا اطلب منك حاجة انت مش هتقدر تقدمهالى
انا فضلت جمبك ومبعدتش عنك ومدفعتكش تمن حاجة ملكش ذنب فيها
شهاب :وبتقوليلي دلوقتى ليه ورافضة نتجوز ليه
روز :علشان انا اخترت احافظ على صداقتنا دوست على قلبى بالجذمة وسمعتك وانت بتحكيلي عن حبك لواحدة تانية نسيت وجعى منك وخففت عنك وجعك بسببها مرحمتش نفسي
واديتك كل حقوقك عليا كاصحاب ودلوقتى دورك علشان تحافظ على صداقتنا
شهاب :وهو انا كده عايز ادمرها بالعكس انا كده بحافظ عليها مدى العمر
روز :انت كده بتدمرنى انا انا حقى اتحب واحب انت عايز تتجوزنى ليه يا شهاب
شهاب :دكتور احمد خالد توفيق بيقول "من يتقبلك وانت منطفئ يستحق كل الحب " ودكتور ابراهيم الفقى بيقول "مطرح ما تلاقى ضحكتك ابنى بيت واسكن فيه"وانا محدش اتحمل ضلمتى قدك يا روز وفى الدنيا كلها محدش بيضحكنى اكتر منك
روز :لو على انى بتحملك فى اسوء حالاتك فده حقك عليا احنا اصحاب بقالنا خمستاشر سنة وانا مش ناوية ابعد عنك لو كنت هعملها كنت عملتها من زمان ولو على انى بضحكك فاحمد حلمى وهنيدى مقصروش معاك فى حاجة
دى مش اسباب تخلينا نتجوز يا شهاب
شهاب :انتى بتعاقبينى علشان وقت ما انتى حبتينى انا حبيت واحدة غيرك
روز بصدمة :انا يا شهاب انا
شهاب :ايوه يا روز انتى
روز وهى بتعيط :انا لو عايزة اعاقبك كنت بعدت عنك وريحت قلبى انما انا فضلت جنبك علشان مبقاش بعاقبك زى ما انت بتقول انا بعاقبنى انا يا شهاب كفاية بقى احتياج لحاجات مش هاخدها
محتاجة ابويا وامى ومشيئة ربنا انهم يموتو ويسيبونى لوحدى محتاجة اعمامى واخوالى وخالاتى وكل واحد فيهم مشغول بحياته وولاده محتاجاك..محتاجاك تحبنى وانت حبيت واحدة غيرى خلاص مش نهاية الدنيا حقك تحب اللى قلبك اختارها ومش هعاقبك علشان قلبك مختارنيش
بس مش هحتاج من حد حاجة هو مش قادر يديهالى مش هحتاج غير لحد عايز يدينى اللى انا محتاجاه كفايانى وجع قلب بقى انا تعبت والله العظيم تعبت وفى الاخر جاى انت بكل بساطة بعد كل ده تقولى انى بعاقبك لا يا شهاب انا مش بعاقبك انت انا بعاقب نفسي وبحميها من الوجع
شهاب :انا اسف والله العظيم انا اسف انا مكنتش اعرف انك شايلة جواكى كل ده حقك عليا بطلى عياط الناس بتبص علينا
روز :ما يبصو ميهمنيش
شهاب :هما مفكرينك بتعيطى بسببي لانى بخونك ولا حاجة الست اللى بعدنا بترابيزتين دى بتبصلى بشر وحاسس انها هتيجى تطبق فى زمارة رقبتى وتمشينى من غير زمارة يرضيكى يعنى
روز وهى بتضحك وبتمسح دموعها :لا ميرضنيش
شهاب :تحبى نكمل كلامنا دلوقتى ولا نأجلها لبكرة
روز :هو مخلصش كلامنا
يا سيدى انا مستعدة اوعدك احلفلك على المصحف حتى انى مش هبعد عنك حتى لو اتجوزت
شهاب :انا مش خايف لتبعدى عنى لما تتجوزى يا روز انا مش عايز اتجوز غيرك ولا عايزك تتجوزى غيرى
انا فكرت ولقيت انى مش هقدر احكى لواحدة اخر خمستاشر سنة فى عمرى واقولها بحب ايه وبكره ايه وبخاف من ايه وافهمها انى لما اقولها تسبنى وتمشى هبقي مش عايزها تسبينى وتمشي وانى لما بتعصب بكون مضايق وانها لو اتحملت عصبيتى هاجى من نفسى واحكلها اللى مضايقنى
مش هلاقى واحدة غيرك تعرف عنى كل ده مش هلاقى واحدة غيرك تستحمل عقدى ولا انتى هتلاقى حد غيرى يعرف عنك كل ده ويستحمل عقدك
روز :هو مش هناقشك فى كلامك صح ولا غلط
بس معقول فكرت فى كل ده بسبب تلميحات عمتك حنان
شهاب :انتى عرفتى منين انها بتلمحلى
روز وهى بتضحك :حنون بتلمح للكل بقالها سنين بتلمحلى حتى لما انت حكتلها عن حنين برضه كانت بتلمحلى هى محبتش حنين خالص وكانت شايفة انها متستاهلكش دايما كانت بتقولى كده
شهاب وهو بيضحك :ليها نظرة برضه عمتى
بس لأ مش هى السبب انى فكرت فى كل ده او بمعنى اوضح خدت بالى من كل ده
روز :امال ايه السبب
شهاب :من حوالى اسبوع روحت ازور عمرو صاحبى عمل حادثة جامدة بس الحمد لله ربنا نجاه منها
وانا قاعد معاه حكالى انه لما عمل الحادثة فكر انه هيموت كان نفسه فى دقيقة واحدة بس يكلم ابوه يعتزرله لانه متخانق معاه قالى كنت هكلمه واقوله انى اسف وانى بحبه كان نفسه ربنا يديله فرصة بس يصالح ابوه فيها لما فاق وعرف انه مماتش وان ربنا نجاه اول ما ابوه دخل يطمن عليه عمرو مسك ايده وباسها وهو بيعيط وفضل يقوله انا اسف حقك عليا متزعلش منى وابوه باس راسه وهو بيعيط وبيحمد ربنا انه نجاهوله وقاله انه ابنه وهو عمره ميزعل منه وان ضفره عنده بالدنيا
لما مشيت من عند عمرو من المستشفى فكرت هو انا لو مكانه لو عملت حادثة وبموت هفكر في ايه
ايه اخر حاجة هبقي نفسي اعملها فى حياتى لقيت ان هبقى عايز اشوفك لاخر مرة وانتى بتضحكيلى ومن يومها وانا بفكر فى كل اللى قلتهولك ده وخدت قرار اننا لازم نتجوز
بصى انا مش هقولك انك حلم حياتى زى ما انتى نفسك يتقالك
بس اقدر اقولك انك حياتى نفسها انتى اخر خمستاشر سنة فى حياتى يا روز عايشاهم معايا بكل ما فيهم انتى الماضى والحاضر وانا عايزك تبقي المستقبل
انتى مش حلم حياتى لأ انتى حقيقة حقيقة بعيشها كل يوم بقالى سنين معلش لو مش بسمعك الكلام الحلو اللى انتى عايزة تسمعيه انتى عارفة انا مش رومانسي اوى بس انا بقولك اللى جوايا انتى بتعيطى ليه خلاص متزعليش انتى حلم حياتى وحب وعمرى وبنت قلبى كمان ولا تزعلى نفسك
روز وهى بتمسح دموعها وبتضحك :انا مش بعيط علشان كده انا بعيط من فرحتى باللى انت بتقوله
شهاب :يا شيخة خضتينى بس ايه رايك انا فى الرومانسية معنديش ياما ارحمينى ها موافقة بقا
روز :لا طبعا انا مش هتجوز فى الشتا الدنيا ساقعة وهبرد وانا لابسة الفستان ومفيش فساتين افراح شتوى
شهاب وهو بيضحك :لأ واضح انك مش موافقة على جوازنا فعلا
انا كنت ناوى على خطوبة علشان تتعودى على تغيير الوضع وانتى دماغك فى فرح على طول ومشكلتك ان الجو برد
روز بحرج :مش ..مش ده قصدى كمان على فكرة بقى مش موافقة
شهاب :مش مهم كفاية انا موافق
روز :هتتجوزنى بالغصب
شهاب :اه عادى
روز :ترضاها على نفسك
شهاب :يا ستى ارضاها على نفسى اه انتى مالك
روز وهى بتضحك :عندك كرامة اوى
شهاب وهو بيضحك :انا فى الكرامة معنديش ياما ارحمينى
ورجعنا وطلبت من جدها ميعاد اجى اتقدم فيه انا وبابا وجدها وافق هو بيحبنى جدا واتقدمت وحددنا ميعاد الفرح كمان خمس شهور اكون جددت فى الشقة واختارنا عفش جديد انا وروز ويكون الصيف جه علشان متبردش وهى لابسة فستان الفرح
وجه يوم الفرح وشوفتها بالفستان الابيض كانت احلى من القمر احلى مرة شوفت فيها روز في حياتى
شهاب وهو بيبوس راسها :مبروك عليكى انا
روز بابتسامة :تسلملى..ثانية واحدة هى مش كانت مبروك عليا انتى باين
شهاب وهو بيضحك :نحن نختلف عن الاخرون يا حبيبتى
شكلك حلو اوى بالفستان
روز :انت كمان البدلة هتاكل منك حتة
عارف من اول اليوم بتخيل طنط فاطمة هنا وماسكة ايدى وبتوصينى عليك وبتقولى اللى هتتجوزيه ده مش بس ابنى الوحيد ده عمرى كله خلى بالك منه
هى اكيد حاسة بينا النهاردة وفرحانة
شهاب بابتسامة :اكيد ربنا يرحمها يا رب
انا بقى جدك قالى انى لو جيت عليكى فى يوم هيحط العكاز بتاعه فى عينى الاتنين صراحة انا خوفت جدك اتحول كده امتى
روز وهى بتضحك :اوعى جدى الجامد جدا
بعد اربع شهور
شهاب :تاخرى شوية
روز :مش هتاخر كمان نازل ورايا ليه انا سيبالك الشقة كلها ونازلة بيت جدى تقوم تنزل ورايا اروح أاجر اوضة فى فندق انام فيها انا يعنى ولا اعمل ايه
شهاب وهو بيعدى من فوقها وبينام :هاجى وراكى برضه على فكرة
روز :ليه ها ليييييه
شهاب :اممممم ..يمكن علشان انتى مراتى مثلا
كمان مش هتبطلى لما نتخانق تنزلى عند جدك وانزل وراكى وشكلى يبقي مش مسيطر خالص كده قدامه
روز :اعمل ايه يعنى لو منزلتش بيت جدى
شهاب :روحى نامى فى اوضة الاطفال عندنا مالها حلوة وفيها بدل السرير اتنين وتنامى فيها براحتك
روز :ينهارك ابيض يا شهاب هو انا لو روحت اوضة الاطفال هتسبنى ومش هتيجى ورايا
شهاب :لا طبعا انا اروح وراكى لو روحتى المريخ حتى
روز وهى بتحضنه :جوزى وسكنى وقرة عينى اوى
شهاب :جوزك بقا شكله فانلة قدام جدك انتى عارفة ده فتحلى ودخل ينام مسألنيش حتى فى ايه اتعود على جنانك يا ظالمة ده احنا بنبات هنا اكتر ما بنام فى شقتنا
روز وهى بتضحك :يا حبيبى هنا بيتنا وهنا بيتنا كمان بصراحة انا بعمل كده علشان جدى علشان ميبقاش لوحده
شهاب :عارف وكان ممكن تقوليلي على الاقل ننزل قدامه كأى زوج وزوجة طبيعين جايين يباتو معاه مش متخانقين وسيادتك عاملة فيها غضبانة عنده وتانى يوم نفطر معاه ونروح الشغل ونبات بالليل فى شقتنا عادى
روز :جدى مش هيرضى وهيقولى بيتك اولى بيكى وهيتحرج منك لو كنا بننزل نبات معاه عادى
انما كده هو معلم عليك وفاتحلك بيته انت اللى تتحرج مش هو
شهاب :هو اللى معلم عليا متنقى الفاظك يا ست حلويات
كمان يا ستى ماشي نعمل متخانقين بس نعمل نمثل سوا مش سيادتك تتلككى وتتخانقى معايا على حاجات تافهة وتقومى واخدة بعضك ونازلة على هنا
لأ انتى ببساطة تقوليلي يلا هنعمل متخانقين وننزل نبات مع جدى وانا اقولك قشطا اسبقى وانا هخلص الماتش واحصلك انما ليه تتخانقى وتسمعينى اسطوانة الاهتمام مبيطلبش والحب مبيتشحتش والدايت مبيخسسش دى كل مرة
روز وهى بتضحك :الله مش بنكد عليك زى اى زوجة مصرية اصيلة
عارف يا شهاب انت احسن راجل فى الدنيا دى كلها اصلا انت الدنيا دى كلها بالنسبالى انت الاب اللى ملحقتش اعيش معاه والاخ اللى عمره ما كان عندى انت صاحب عمرى وحب حياتى انت سكنى وفرحة قلبى
شهاب :هو لو كل مرة هنبات فيها مع جدك هتقوليلى الكلام الحلو ده فانا مستعد اننا نيجى نعيش معاه على فكرة
انتى عارفة انى بحبك صح
روز :عارفة انا كمان بحبك
شهاب :بس برضه شكلى فانلة قدام جدك
قريت مرة جملة حلوة اوى لكاتب اجنبى مش فاكر اسمه المهم بتقول ايه بقى الجملة العبقرية دى بتقول "ليس نقص الحب بل نقص الصداقة هو ما يجعل الزواج تعيسا "هو كاتبها بالانجليزى طبعا بس دى ترجمتها بالعربى
اخينا اللى انا مش فاكر اسمه ده عنده حق الجواز بيبقي تعيس وخنيق وحتى ممكن ينتهى بسبب ان الازواج مش اصدقاء مبيعرفوش يتكلمو سوا يهزرو يتخانقو يصارحو بعض باللى فى قلوبهم يعترفو بغلطاتهم يعيطو حتى قدام بعض
الاصحاب بيعرفو يعملو كل ده انما الحبايب لأ لو مفيش بينهم صداقة مش بس حب مبيقدروش يعملو كل ده مع بعض
علاقات الحب ممكن تنتهى بس علاقات الصداقة اللى بجد مبتنتهيش
انا وروز كنا اصحاب قبل ما نكون حبايب او ازواج علشان كده كنا بنقدر نتخانق سوا ونتصالح من غير ما حد يعرف عن خناقتنا حاجة كنا بنورى ضعفنا لبعض ومبنخبيهوش كنا بنعرف نعتذر لبعض لما نغلط وبنعرف كويس اوى ازاى نصلح غلطنا ونعوض بعض لاننا عارفين بعض كويس كل واحد فينا عارف ايه اللي بيفرح التانى وايه اللى بيعجبه
خلفنا فاطمة على اسم امى وليلى على اسم مامت روز وحنان على اسم عمتى
انا وروز ربينا بناتنا على انهم يكونو صحاب لبعض واننا صحاب ليهم انا وروز صحاب ليهم مش بس ابوهم وامهم وعلشان كده بناتنا سرهم كله معانا
محظوظ اوى اللى يتجوز واحدة حاسس انهم صحاب ويعيشو سوا كاصحاب وكحبايب وكأزواج سعادة ما بعدها سعادة وراحة ما بعدها راحة
ده ميمنعش ان فى خناق ومشاكل طبعا بيحصل بنا كل ده
بس بنعرف نعديه لاننا صحاب بجد وزى ما قلت الصحاب اللى بجد بيعرفو يتخانقو ويتصالحو ويعدو كل حاجة سوا
وانا محظوظ وربنا بيحبنى لانى اتجوزت روز اعز اصحابى💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا