وليد :انتى بتعملى ايه بتغمضى عينك ليه
سارة :الشمس بتضرب فى عينى
وليد :الطم على وشى بتغمضى عينك وانتى سايقة علشان الشمس اتجرأت وضربت فى عينك ولما العربية تتقلب بينا هيبقى كويس يعنى..انزلى يا سارة انزلى مش هعلمك السواقة
سارة :لا بالله عليك عايزة اتعلم
وليد :انا غلطان قولت اعلمك علشان قلبك يجمد شوية ونسيت انك جبانة ومش هتتعلمى ولا هيجمد قلبك
سارة :انا قلبى مش ضعيف
وليد :والله ومين بقى اللى كانت بتفضل تولول اول ما جبت العربية وتفضل تقولى فى تريلا جاية علينا يا رب ما تدوسنا وتفضلى تعلقى كأنك بتعلقى على ماتش كورة لا وكمان بتغمضى عينك لما تعدى وتفتحيها بعدها وتحمدى ربنا اننا لسه عايشين
سارة وهى بتضحك :ده كان فى الاول بس بعد كده اتعودت
وليد :الاول بتاعك ده فضل اربع شهور
سارة :عادى على فكرة...انت جايبنا الحتة المقطوعة دى ليه
وليد :اكيد مش جايبك هنا علشان اغتصبك انتى مراتى يا اذكى اخواتك
سارة :اومال جايبنا هنا ليه
وليد :يمكن علشان اعرف اعلمك السواقة مثلا ومتدوسيش حد بالعربية وانتى بتتعلمى السواقة
سارة :وبتعلمنى فى عز الضهر ليه خليها اخر النهار فى الطراوة احسن
وليد :ده على اساس انى بفسحك مش بعلمك السواقة ..وعموما خلاص انا رجعت فى رايى مش هعلمك انا مش مستغنى عن عمرك وعمرى ده احنا حتى لسه مخلفناش العيل اللى هيشيل اسمى لو مت..انزلى يا سارة
سارة :تصدق هنزل زهقت ومش عايزة اتعلم وبعدين اتعلم السواقة ليه ما انت موجود وبتعرف تسوق
وليد :بعد المرمطة اللى ممرمطهالى دى علشان تتعلمى فانا موافق وبشدة كفاية انا بعرف اسوق
بالليل
مريم :ولسه بقوله انى فرحانة علشان الترقية اللى جاتلى لقيته بيقولى وانا كمان فرحان ايه رايك نحط فرحتى على فرحتك ونجيب افراح صغيرة
سارة وهى بتضحك :ولما كنتى مضايقة من كام اسبوع وقولتيله انك مضايقة قالك وانا كمان مضايق ما تيجى نحط ضيقى على ضيقك ونجيب احزان صغيرة
الراجل متمسك بيكى يا منيلة هتفضلى تتقلى لحد امتى لحد ما يزهق منك ويروح لغيرك
مريم :انا مش بتقل انا مش بحبه
سارة :مبتحبيهوش ازاى يعنى اذا كان انا ذات نفسى حبيته من كلامك عنه مريم متبقيش نمرودة
مريم :انا نمرودة يا سارة
سارة :ايوه يا مريم ما هو لما يبقى واحد بيحبك وشاريكى بالشكل ده وبيشتغل معاكى فى نفس الشركة ومتعرفيش عنه غير كل خير وطيب ومن كلامك عنه حنين وشكلا تمام وسيادتك ممطوحاه معاكى كده تبقى نمرودة ومش عاجبك اللى جايلك لحد عندك وشاريكى وعايزة واحد بقى يتقل عليكى وينشف ريقك على ما يقولك كلمة حلوة
مريم :زى وليد جوزك كده
مريم وهى بتضحك :متصطاديش فى المية العكرة مش علشان قولت كلمة ضايقتك تقوليلى كلمة تضايقنى
مريم :لا انا بتكلم جد انا حاسة انى ميمشيش معايا غير واحد زى وليد جوزك كده
سارة :بيتهيالك انتى مش عاطفية وواخدة الحياة جد لو اتجوزتى واحد زى وليد جوزى حياتكم هتبقى مملة وهتخلفو اطفال مبتتكلمش انتى مينفعكيش غير واحد زى مالك انسان طيب وحنين هيعوض ولادك عن الجفاف العاطفى اللى هيجلهم بسببك
مريم :ما هو انا خايفة من كده خايفة اختلاف طبايعنا ده يسببلنا مشاكل
سارة :هو عارف ان طبعك مختلف عن طبعه وقابل وشارى متتنمرديش انتى بقى وتضيعيه من ايدك خلى بالك هو مش هيفضل العمر كله يتحايل عليكى لما هيجيب اخره منك هيبعد عنك بلا راجعة
مريم بخضة :ايه ده تفتكرى ممكن يعمل كده
سارة :ممكن جدا الناس العاطفية اللى زيى وزيه مشاعرهم بتحكمهم اه بس مش مشاعر الحب بس مشاعر الحزن او الضيق كمان بتحكمنا لو حس منك باهمال وعدم تقدير كده مشاعره الحلوة تجاهك هتتبخر ومشاعر الضيق هى اللى هتسيطر وهتخليه يبعد عنك ويشيلك من دماغه وميفكرش فيكى تانى متراهنيش على مشاعره الحلوة تجاهك لانك لو فضلتى مكملة فى هبلك ده هتحوليها لمشاعر وحشة وهتخسريه
مريم :لا خلاص لو لمحلى تانى هقوله انى موافقة وهديله رقم بابا
سارة :ايوه كده هو ده الكلام المظبوط عايزة اسمع اخبار حلوة قريب فى صوت بره شكل وليد رجع هقفل دلوقتى ونبقى نكمل كلام بعدين
مريم :ان شاء الله يا حبيبتى تسمعى اخبار حلوة ماشى سلام دلوقتى
سارة :وليد انت رجعت
وليد :اه كنتى بتتكلمى مع مريم
سارة :اه
وليد :خير سامعك بتقوليلها عايزة تسمعى اخبار حلوة
سارة :مفيش كنت بكلمها عن انسان عايزة يتقدملها وهى معصلجة شوية
وليد وهو بيقعد جمبها على السرير :ليه معصلجة
سارة :هو طبيعته مختلفة عن طبيعتها وهى خايفة مينفعوش مع بعض
وليد :وانتى شايفة ان اختلافهم ده يخليهم ينفعو
سارة :انا شايفة انه شاريها وتهون اى حاجة تانية قصاد انه شاريها ومتمسك بيها وبعدين فين المشكلة فى انهم مختلفين مادام مختلفين مش متنافرين يبقى خلاص المهم ان اختلافهم ده ميبقاش مخليهم متنافرين ومش طايقين بعض
وليد :انا وانتى مختلفين
سارة :انا وانت معديين مرحلة مختلفين دى بس قشطا انا بحبك يعنى
بقولك ايه ما تطبلنا شاورمة وكبدة بتوحم عليهم
وليد :بتتوحمى على كبدة وشاورمة اومال فين الرنجة والجبنة القديمة الحاجات اللى الستات بتتوحم عليها دى
سارة وهى بتضحك :ده كان زمان دلوقتى الوحم اتطور شكلك مش متابع
وليد وهو بيضحك :حتى الوحم بينزله ابدايتس وبيتحدث ماشى يا ستى اطلبلك شاورما وكبدة لزوم الوحم
سارة :شوف هتاكل ايه واطلبه لنفسك
وليد :لا مش جعان
سارة :كل مرة بتقول كده ولما الاكل بيجى بتشوفه بتجوع وبنصص سوا فى اكلى فمن فضلك اطلب لنفسك حاجة ولو حصلت المعجزة وشكل الاكل مجوعكش انا هاكل اللى انت طلبته كده كده من ساعة ما بقيت حامل وانا باكل مرة كل ساعتين فمش هيخسر اللى هتجيبه
وليد :تمام طلبت لنفسى شاورما وكبدة زيك هو اللى عايز يتجوز مريم صاحبتك ده ابن اعمها زيى انا وانتى كده
سارة :لا زميلها فى الشغل
وليد :وهى مشكلتها فى اختلاف طباعهم
سارة :شوية وكمان هى مبسوطة كده وهى بتتقل وهو بيزن عليها ومش عاملة حسابها ان مسيره يزهق بتراهن على حاجة ميتراهنش عليها
وليد :واللى هى ايه بقى الحاجة اللى ميتراهنش عليها دى يا فيلسوفة عصرك واوانك
سارة :ولو انى شامة ريحة تريقة فى كلامك زى ما انا شامة ريحة الكبدة والشاورما فى مناخيرى كده بس هجاوبك انت مهما كان جوزى الوحيد
وليد وهو بيضحك :شاكر لافضالك اتفضلى جاوبى
سارة :بص يا وليد هى مراهنة على مشاعره علشان عارفة انه بيحبها ولانها عارفة انه شخص عاطفى
وليد :طيب ما هو مادام بيحبها وعاطفى ومشاعره هى اللى بتحركه يبقى حقها تتقل وتراهن على مشاعره دى
سارة :تراهن على حاجة بتتغير حاجة لو استمرت فى تقلها وعدم اهتمامها هتتحول لضيق وحزن وهتنقلب الاية وهيبقى هو اللى مش مهتم وهيزهدها
زى ما مشاعره الحلوة متحكمة فيه ومخلياه بيحاول معاها مشاعره دى لو اتحولت برضه هتتحكم فيه وهتخليه مش عايزها حتى لو بقت هى عايزاه
يعنى انا بحبك وعلشان كده انا جنبك انما لو انت مقدرتش حبى ومبادلتنيش الحب ده انا همشى مش هفضل جمبك
ان مشاعرى بتحركنى دى حاجة متخلكش تضمنى وتحط فى بطنك بطيخة صيفى دى حاجة تخليك تحافظ على مشاعرى تجاهك لانها لو اتحولت لحاجة تانية بسبب اهمالك ليا وعدم تقديرك وقتها هتخسرنى ..موبايلك بيرن الاكل وصل
بعد عشر دقايق
سارة وهى بتقلب فى شنطة الاكل :ايه ده ده محطش مخلل ..هروح اجيب من اللى عندنا فى التلاجة وامرى لله
وليد :لا كلى من غير مخلل انا اللى قولتله وانا بطلب ميحطش مخلل انتى املاحك زايدة والدكتورة منعاكى من الحادق والحراق
سارة :خلاص هاكل من غير مخلل وامرى لله
وليد :كنتى بتكلمينى عن انى لو مقدرتش مشاعرك هتسيبينى
سارة وهى بتاكل :الله بقى على الشاروما وجمالها..لا يا حبيبى انا كنت بضربلك مثل بس علشان اقربلك كلامى
وليد وهو بياكل :طمنتينى يعنى انا حتى لو مقدرتش مشاعرك مش هتسبينى
سارة :ليه ممضينى على شيكات على بياض ولا متبرعلى بكليتك الشمال ولا حتى اليمين
اكيد لو محستش انك مقدرنى ومقدر مشاعرى هسيبك ولو حتى فرضا مقدرتش اسيبك وقتها هبطل احبك قلبى هيسيبك وهبقى عايشة معاك علشان الولاد بس مش علشانك هتبقى انت مش فارقلى انت متخيل وقتها انت هتبقى خسرت ايه
وليد :فهمتك..بس ما انا دلوقتى مبعرفش اعبر عن مشاعرى زيك
سارة :ده حقيقى بس بتهتم بيا بطرق تانية غير الكلام الحلو
وليد :زى ايه
سارة :زى انك مجرد ما بطلب منك حاجة بتجبهالى زى انك مجبتش مخلل مع الاكل علشان مينفعش اكله وحاجات تانية كتير يمكن تبان بسيطة بس بتفرحنى وبتحسسنى انى مهمة عندك وبتعوض حاجات تانية انت مبتعملهاش او مبتقولهاش
وليد بابتسامة :انا دلوقتى عرفت ليه بابا الله يرحمه كان بيحبك اوى كده علشان انتى شبهه حنينة وعينيك قادرة تشوف الجمال فى ابسط الحاجات
سارة :بابا كمال ده كان كل حاجة ليا فى الدنيا عمى وابويا وصاحبى انت عارف بابا مات وانا صغيرة اوى تقريبا معرفتوش غير من كلامكم عنه انما بابا كمال هو اللى ربانى هو اللى ذكرياتى كلها معاه هو الاب الوحيد اللى عرفته فى حياتى
انا فرحت دلوقتى لما شبهتنى بيه مع انى عارفة انى شبهه لا شبه ماما ولا شبه بابا الله يرحمه بس شبهه هو ونسخة مصغرة منه خصوصا فى طبعه بس برضه فرحت لما انت قولت كده
وليد :انتى وافقتى تتجوزينى علشانه مقدرتيش ترفضى طلبه
سارة :لا هو اقنعنى بصراحة وكمان انا نفسى مش هلاقى احسن منه يكون جد لولادى وبعدين انت كمان ليك مميزاتك يعنى هو انت اه عملى شويتين بس طيب وبتيجى من قريب ومتحمل اختلافى عنك زى ما انا متحملة اختلافك عنى
بابا كمال كان عنده حق احنا مينفعناش غير بعض هو اقنعك بيا زى ما اقنعنى بيك
وليد :هو كان ملاحظ انى ميالك شوية مصدق وفاتحنى فى الموضوع ولما لقانى متردد شوية بسبب خوفى من اختلاف طباعنا لقيته بيقولى انك جالك عريس وهو رفض وان جالك كتير قبله من العيلة ومن بره العيلة ولو انا متردد فالف غيرى يتمنوكى ونفسهم توافقى عليهم الا اكون مفكر انك ملكيش غيرى ولا افكر نفسى املة ده لسه هيقنعك بيا ومش بعيد يضغط عليكى وفى الاخر ترفضينى عادى
سارة وهى بتضحك :حبيبى والله عمرى فى لحظة ما حسيت انه بيحبكم اكتر منى او انى بنت اخوه مش بنته هو..عارف مكنش بيقولى على اللى بيتقدمو دول حتى لما كنت افضل اتحايل عليه واقوله يعنى انا ملفتش نظر حد خالص قلقاسة انا يعنى متحبش يضحك ويقولى ده انتى ست البنات يا سارة وانا مستنى الاقيلك اللى يليق بيكى ويستاهلك
وليد :اكتر حد كان فرحان يوم فرحنا هو تقريبا دى اكتر مرة شوفته فرحان فيها فى حياته
سارة بدموع فى عينيها :هو كان دايما فرحان ومفرح كل اللى حواليه كنت بحسه ضحكة ماشية على رجلين مكنتش فاهمة ازاى شخص بطيبته ونقائه عايش فى دنيتنا دى
وليد :طيب متعيطيش طيب
سارة وهى بتعيط :وحشنى اوى يا وليد انا حسيت باليتم بعد ما مات انما لما ابويا مات محستش باليتم هو عوضنى دلوقتى انا حسا باليتم وحشنى هزاره معايا وحشنى حضنه ليا وحشتنى كلمة سارة بصوته وحشتنى ايده اللى كنت ببوسها كل اللى نفسى فيه دقيقة بس ابوس ايده فيها واحضنه واعيط ويبوس راسى ويطبطب عليا ويقولى ان مش مهم اى حاجة غير انى بخير الجملة اللى دايما بيقولهالى فى كل مرة بتوجع وبروح اعيط على وجعى فى حضنه انا دلوقتى اللى واجعنى انه مبقاش معايا مبقاليش حضن اعيط على وجعى فيه
وليد وهو بيحضنها :انتى عارفة انه كان بيحبك يمكن اكتر منى انا واخواتى لان محدش فينا خد من طبعه قدك لانه حنين والحنين بيحب الحنين اللى زيه
سارة وهى بتعيط اكتر :وانا بعشقه مش بس بحبه وحشنى اوى يا وليد اوى
وليد وهو بيعيط :وواحشنى انا كمان وقاطع بيا والله ومش مصبرنى على فراقه غير وجودك معايا شايفه فيكى
سارة :الواد اللى فى بطنى ده لو مطلعش لجده انا هوأده امين
وليد وهو بيضحك :طيب ما نبيعه اعضاء بشرية واهو نكسب من وراه فلوس
سارة وهى بتمسح دموعه بايديها :لا حرام
وليد :يا سلام حرام نبيعه بس مش حرام توأديه
سارة وهى بتضحك :انا لو وأدته مش هكسب فلوس انما لو بيعته هكسب فلوس
وليد وهو بيضحك :لا عندك مبدء
سارة :كمل اكل معلش على الفاصل الكئيب ده بس هو فعلا وحشنى اوى وبقاله كتير مجاليش فى الحلم شايف مكانه فى الجنة بقى ومبسوط ومش فارقله اللى سابها فى الدنيا دى
وليد :يا رب يسكنه فسيح جناته يا رب
سارة :اللهم امين هو باذن الله اكيد فى الجنة عمل صالح كتير يشفعله عند ربنا..انا شبعت هقوم اعملك قهوة مادام كلنا يبقى لازم تشرب قهوة بتحبها اكتر حاجة فى الدنيا
وليد :بحبها اه بس بحب القهوة اللى فى عينيكى اكتر
سارة وهى بتضحك :ده علشان عينيا لونهم بنى بتشبههم بالقهوة
وليد بغيظ :ده كل اللى لفت انتباهك مخدتيش بالك انى بحاول اقولك كلام حلو
سارة وهى بتضحك :قول والله العظيم انت كده بتقولى كلام حلو...خلاص متزعلش كلام حلو وقمر والله
وليد :بعد ايه بتقولى كده بعد ما كسرتى مأديفى
سارة :بعد الشر على مأديفك بس انت يجى منك صدقنى اشتغل على نفسك بس وهيطلع منك كلام حلو
وليد بابتسامة :مهما قولتلك كلام حلو مش هيبقى احلى منك
سارة بابتسامة :شوفت انك بتطور بسرعة اهى دى احلى من اللى قبلها ..بس بتقولى كلام حلو ليه ايه المناسبة
وليد :مش قولتى ان حبك ليا مش ضمان انك تفضلى تحبينى وتفضلى معايا لو مقدرتوش وعبرتلك عن حبى ادينى بحاول احافظ عليه اهوه
سارة بابتسامة :حبيبى والله طول ما انت مقدر حبى ليك وبتحبنى وخايف تخسرنى يبقى انا عمرى ما هبطل احبك
وليد :وعد
سارة :وعد
مينفعش تراهنو على حب حد ليكم وتقولو انه مشاعره مسيطرة عليه وانه مستحيل يبعد عنكم مهما عملتم
لانه ببساطة عدم تقديركم لمشاعره هيحقق المستحيل ويخليه يبعد مشاعره هتتغير وهتتحول لمشاعر وحشة هتسيطر عليه برضه وهتخليه مش طايقكم ولا حابب وجودكم فى حياته
قدرو حب اللى حواليكم ليكم وحافظو على حبهم وبادلوهم الحب ده ومتراهنوش على مشاعرهم لو مش ناويين تتعبو وتحافظو عليها والا تبقو بتراهنو رهان خسران💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا خصوصا من زال اثره فلم يزره زائر ولم يذكره ذاكر