حورية :هو مش مزعلنى وقاسم قلبى اربع تربع قد بعض بس بموت فيه وكل ربع فى الاربع تربع بيعشقه
حنان :متخلنيش اديكى بضهر ايدى على وشك اقسملك انا كرامتك اربع تربع قد بعض
حورية :ايه يا حنان العنف ده حتى مش لايق على اسمك
حنان :كرهتينى فى اسمى وكرهتينى فى الجواز
انتى بقيتى مهزقة اوى
حورية :بحبه يا حنان بحبه بحبببببببه
حنان :يا ستى فهمنا انك بتحبيه بس ايه علاقة ده بانك تتهاونى فى كل حقوقك كده يعنى تديله حب يديكى تجاهل تهتمى بيه يهملك وانتى ساكتة ولا ومش بس ساكتة لا كمان بتبرريله قدام نفسك وقليله كتير بالنسبالك ليه قليله كتير هو يقدر يديكى اكتر من كده يا حورية انتى تستاهلى اكتر من اللى هو بيديهولك ده
حورية :عارفة كلامك ده كله ومقتنعة بيه كمان وببقى معيطة ومفلوقة من العياط بسببه واقول لو جه يكلمنى هعمل فيه وهسوى ومش هتصالح بسرعة ومجرد ما يقولى حورية بس وهو بيبتسم بلاقينى نسيت زعلى ودموعى وقولتله ايوه يا حبيبى
حنان :نعم يا اختى
حورية :والله زى ما بقولك كده ابتسامته دى اصله مبيبتسمهاش لحد غيرى ابتسامة حلوة ورايقة كده ابتسامة احلى من حياتى يا حنان بفرح بيها لانى عارفة انه مبيبتسمهاش لحد غيرى بفرح لانى عارفة انه بيبتسمهالى علشان يراضينى بيبتسمها لحورية وبس تعرفى انه قبل جوازنا مكنش بيبتسم اصلا
حنان :يا حورية انا عارفة انه بيحبك وانه كريم ومحترم وطيب ومش خاين ولسانه مش وحش وابن عمك وبتحبيه من صغرك وروحك فيه وما صدقتى اتقدملك ووافقتى وانتى فرحة الدنيا مش سيعاكى
بس هو لازم يعبر عن حبه ده يا حورية
حورية :واعمل ايه علشان يعبر عن حبه ده
حنان :سيبيله فرصة يعبر انتى بتعبرى ليكى وليه كل وقتك وتفكيرك ومجهودك ومشاعرك وطاقتك ليه
حورية :الله مش جوزى
حنان :يا ستى جوزك مقولناش حاجة بس مش كده انتى عندك اهلك عندك انا وبقية صحابنا عندك كليتك عندك حاجات كتير فى حياتك متنسيش كل ده وتتصرفى معاه على ان هو حياتك كلها اديله فرصة يشتاقلك يحس انك ممكن تنشغلى عنه خليه يحس انك بتعملى حاجات غيره فى حياتك مش مقطوعاله كده
حورية :مش هعرف
حنان :خلاص انتى حرة وافضلى بقى عيطى وافضلى حاسة ان انتى وبس اللى بتحبيه وانك مش فارقة معاه اصلا افضلى مدلوقة عليه كده لحد ما يحب غيرك ولا يتجوز عليكى
حورية بخضة :ايه لا مش ممكن عمار ميعملش كده
حنان :اى حد لو مكانه هيعمل كده انا لو مكانه هعمل كده ما انا ضامنك بقى وعارف انك هتعديلى اى حاجة هعملها مهما كانت يبقى مجيش عليكى ليه ما انا ضامنك وعارف انك مش هتعملى حاجة
حورية :طيب انتى شايفة انا لازم اعمل ايه
حنان :لما يزعلك متتراضيش مجرد ما يبتسملك يا حورية خدى موقف خليه يفهم ان زعلك صعب خليه يتعب شوية علشان يراضيكى وقتها هيعمل لزعلك حساب
الكلية اللى مبتجيهاش يوم السبت دى وبتضيعى المحاضرتين اللى عندنا
حورية :اعمل ايه طيب ما هو اجازة يوم السبت اسيبه لوحده فى البيت
حنان :وهو انتى يعنى سيباه لوحده فى الشارع ما انتى سيباه فى شقتكم حضريله الفطار يا ستى وتعالى الكلية
حورية :ويفطر لوحده
حنان :متشلنيش يا حورية وهيجراله ايه يعنى لو فطر لوحده
وخروجك معايا انا والبنات
حورية :هو قالى مش هينفع
حنان :لا يا حورية هو مقالش مش هينفع هو كل اللى قاله انه بيبقى مضايق وانتى بره معانا وهو فى البيت لوحده وسيادتك من نفسك مبقتيش تخرجى معانا في حين ان هو بيخرج مع اصحابه عادى وبيسيبك لوحدك كتير
لما تقوليله انك عايزة تخرجى معانا ويرفض قوليله ليه وناقشيه فهميه ان انا صاحبتك من خمستاشر سنة وخلود وجميلة صحابنا من تلت سنين وان مينفعش تبعدى عنا كده وان زى ما هو ليه صحاب وبيخرج معاهم انتى كمان ليكى صحاب ومن حقك تخرجى معاهم مادام مش هتقصرى فى حقه ولا فى حق البيت
حورية :ماشى هعمل كده او هحاول يعنى علشان بصراحة حسا انى مش هقدر
حنان :انتى كده هتخسريه يا حورية هتحوليه لشخص انانى مبيفكرش فيكى وضامنك هتبوظى حياتك معاه وهيبقى الغلط غلطك طاقتك مسيرها تخلص حبك ليه هيجى وقت ومش هيكون كفاية انك تتحمليه وهتبقى محتاجة ان هو كمان يتعب علشانك ويحبك ويعبرلك عن حبه وطبعا هو مش هيعرف لانه مش متعود لانك عودتيه على انه ياخد منك وبس وميدكيش لا هيعرف يديكى ولا هيعرف يتحملك وانتى مش قادرة تدى
حبا الوضع بينكم يوصل لكده
حورية :طبعا لا...خلاص انا هعمل اللى قولتيلى عليه
حنان :بجد يا حورية
حورية :والله بجد انا فعلا حكاية ان انا وبس اللى بعبرله عن حبى دى تاعبانى
حنان :ايوه صح بالنسبة لحكاية تعبيرك عن مشاعرك دى قلليها شوية متبقيش مدلوقة اوى كده فى كلامك
حورية :وان قالى بتعملى كده ليه
حنان :قوليله اصلى لقيتك مبتقوليش كلام حلو فقولت انك مش بتحبه ولو قالك لا بحبه قوليله اومال مبتقولهوليش ليه
حورية :وان قالى فعلا مش بحبه
حنان :قوليله يبقى انا تفكيرى صح ومش هقولك كلام حلو مادام مش بتحبه وهو مش هيتحمل وهيبدء يقولك كلام حلو علشان ترجعى انتى زى الاول
حورية :ووقتها ارجع زى الاول
حنان :اه طبعا حتى لو مقالكيش كلام حلو قد ما بتقوليله مش مهم المهم يقولك كلام حلو ويعبر عن حبه ليكى ومتبقيش لوحدك اللى بتعبرى
حورية :تمام فهمتك
حنان :انا همشى بقى النهاردة الجمعة وبنقضيه عند جدى وانا جتلك قبل ما اروح علشان كالعادة اتصلتى بيا وانتى معيطة
حورية وهى بتحضنها :متحرمش منك يا حبيبتى بس خليكى نتغدى سوا عمار مش هيجى غير بالليل
حنان :مش هينفع لازم اتغدى عند جدى
حورية :خلاص على راحتك اشوفك بكرة فى الجامعة
حنان :هتيجى بكرة
حورية :هاجى بكرة..مش قولنا هنغير اسلوب المعاملة يبقى نبدء من النهاردة
حنان :ربنا يهدى سركم يا حبيبتى ويسعدكم
حورية :يا رب يا حنان يا رب خلى بالك من نفسك وابقى طمنينى عليكى لما توصلى عند جدك
بالليل
عمار :ايه ده انتى مش هتتعشى معايا
حورية :لا مش جعانة
عمار :يعنى انا هتعشى لوحدى
حورية :عادى ما انا اتغديت لوحدى واتعود بقى لانك هتفطر بكرة كمان لوحدك
عمار :ليه
حورية :لانى رايحة الكلية بكرة
عمار :من امتى وانتى بتروحى يوم السبت ما انتى بتغيبه من ساعة ما اتجوزنا
حورية :كنت غبية وبضيع على نفسى محاضرات مهمة على الفاضى
عمار :على الفاضى يا حورية قعادك معايا علشان مقعدش لوحدى حاجة فاضية
حورية :وانت مش سبتنى النهاردة طول اليوم لوحدى بعد ما قولت لاهلى ولبيت عمى اننا مش هنروحلهم الجمعة دى علشان هنخرج تيجى انت بكل بساطة وتقولى انك هتخرج مع اصحابك واترزع لوحدى انا بقى فى البيت اكلم فى حيطانه
عمار :هو ده اللى مزعلك
حورية :وهو انت شايف ان دى حاجة متزعلش
عمار :متزعليش انا هعوضهالك
حورية :طبعا خروجك معايا يتعوض انما مع اصحابك لا
عمار :انتى عايزة تتخانقى وخلاص
حورية :لا انا عايزة انام اتعشى علشان اشيل الاكل
عمار :مش واكل شيليه
بعد نص ساعة
عمار :انتى سيبانى اتفرج على التلفزيون لوحدى وقاعدة على موبايلك بتعملى ايه
حورية :بقرء رواية
عمار :من امتى بتقرى روايات وانا فى البيت
حورية :من دلوقتى وطالع اه صحيح انا كنت عايزة استأذنك اخرج بكرة مع اصحابى بعد الكلية
عمار :لا وبعدين مصرة تروحى الكلية بكرة وتسيبينى
حورية :اه
عمار بابتسامة :حتى لو قولتلك متزعليش حقك عليا
حورية بصوت واطى :لا مش هضعف لا انشفى يا حورية حنان هتعمل منك بطاطس محمرة
عمار بابتسامة :حورية بتقولى ايه مش سامعك يا حبيبتى
حورية :يا سواد الحلل على حورية وسنينها البيضا بص انت متبتسمش ومتقوليش يا حبيبتى
عمار وهو بيبوس راسها :حقك عليا
حورية :لا انت خطر عليا
عمار :رايحة فين انتى
حورية :هروح انام فى اوضة الاطفال
عمار :نعم يا اختى اوضة اطفال ايه اللى هتنامى فيها ما خلاص قولتلك حقك عليا متزعليش
حورية :والمفروض اعدى انا اللى حصل علشان انت قولتلى متزعليش حقك عليا لا يا عمار مش هعديها
عمار :هو ايه اللى مش هتعديها مفيش نوم فى اوضة الاطفال يا حورية
حورية :ماشى مش هنام فى اوضة الاطفال يا عمار ارتحت كده
عمار :ومفيش خروج مع اصحابك بكرة مش هتلطع انا فى البيت لوحدى وسيادتك بتتفسحى بره مع اصحابك
حورية :ولو ان ده بالظبط اللى انت عملته فيا النهاردة بس ماشى انت جوزى ومش هخرج الا بأذنك ولو رفضت فخلاص
بس هروح الكلية اظن انك متفق مع ابويا وابوك ان جوازنا مش هيقصر على دراستى
عمار :وانا عند كلامى وانتى اللى كنتى بتغيبى يوم السبت بمزاجك
حورية :وخلاص قررت انى هركز على مستقبلى ومش هغيب تانى
عمار :انتى بتعملى ايه
حورية :هنام على الكنبة مش حكمت عليا مخرجش من الاوضة
عمار :تقومى تنامى على الكنبة يا حورية
حورية :ايوه يا عمار علشان انا مش عايزة انام جمبك
عمار :ماشى يا حورية نامى على الكنبة ولا حتى على الارض انتى حرة
بعد عشر دقايق
عمار :حورية..حورية
حورية بصوت نايم :نعم يا عمار
عمار :انتى نمتى
حورية :بنام اهو
عمار :انتى عارفة تنامى عندك مش قولتيلى قبل كده انك بقيتى مبتعرفيش تنامى غير جمبى
حورية :ما هو انا برضه مش هعرف انام جمبك وانت كاسرلى خاطرى ومزعلنى يا عمار سيبنى انام بقى انا عندى كلية بدرى بكرة
عمار :حورية
حورية :نعم
عمار :انا اسف متزعليش منى
حورية وهى بتقوم تقعد على الكنبة :انت قولت ايه
عمار :قولتلك انا اسف متزعليش منى
حورية :خلاص مش زعلانة
عمار :تعالى طيب نامى على السرير مش عارف انام وانتى مش جمبى
حورية بسعادة وهى بتقوم تنام جمبه على السرير :بجد
عمار :بجد يا حورية
حورية :خلاص وادينى جيت انام جمبك اهو بس برضه انا هروح الكلية بكرة
عمار :برضه مصرة وهتسبينى لوحدى فى البيت
حورية :بص مش هتأخر هخلص واجى على طول
تانى يوم
حورية :كنت هضعف بصراحة واقوله تولع الكلية على الجامعة كلها بس مسكت نفسى بالعافية عمار باس راسى وقالى انا اسف وقالى انه مبيعرفش ينام غير وانا جمبه لما خدت موقف ومرضيتش اعدى اللى حصل بسهولة معاكى حق هو يقدر يدينى اكتر بكتير من اللى كان بيديهولى وانا مش هقبل بالقليل بعد كده مش هقبل غير باللى استحقه منه
حنان وهى بتسقف :يا حورية يا جامد عاش يا بنتى
حورية وهى بتضحك :متفرحيش اوى كده انا لسه واقعة فيه ومدلوقة زى ما انا بس بقاوح عارفة لما باس راسى وحياة ربنا كنت هحاوط وسطه بايدى واحضنه واقوله خلاص مش زعلانة ومسكت نفسى بالعافية
لما روحت نمت على الكنبة مكنش جايلى نوم لو كان استنى خمس دقايق بس ومتكلمش كنت هقوم زى البوبى انام جمبه ولما اتكلم عملت فيها قال ايه بروح فى النوم
حتى حكاية انى قولتله انى هاجى الكلية النهاردة لو كان اصر عليا مجيش كنت هضعف ومش هاجى
حنان :لا الله يباركلك احنا ملصمينك كملى زى ما انتى
حورية :هحاول بس انتى اصلك متعرفيش انا بحبه ازاى انا هاين عليا امسكه احطه جوا قلبى كده مطلعوش منه
حنان وهى بتضحك :يا ستى ربنا يديمكم لبعض ويديم الحب والود بينكم بس الله يباركلك يا حورية كملى اللى بدأتيه
حورية :استنى ده ده عمار بيرن..الو يا عمار
عمار :انتى خلصتى ولا لسه
حورية :خلصت بس كنت بشرب عصير مع حنان فى الكافيتريا بتاعت الجامعة هخلصه وهقوم اروح على طول مش هتأخر
عمار :انا فى الطريق جايلك هاخدك ونخرج نتغدا بره خليكى قاعدة معاها لحد ما اوصل
حورية بسعادة :ايه ده بجد خلاص مستنياك يا حبيبى تيجى بالسلامة
حنان بابتسامة :قالك ايه مفرحك اوى كده
حورية بسعادة :قالى جايلى وهياخدنى ونخرج تقريبا بيعوضنى عن خروجة امبارح بركاتك يا حنان
حنان وهى بتضحك :بركات ايه بس انا معملتش حاجة
حوربة وهى بتبوسها :لا عملتى كتير نصايحك جابت نتيجة هايلة عمار بيعمل كل ده علشان يراضينى فارقله زعلى
حنان :انا قولتلك انه بيحبك سيبيله بس فرصة يعبرلك عن الحب ده
حورية :سبتله ولسه هسبله اكتر كمان لو النتيجة هتبقى حلوة كده فانا هسمع كلامك بالحرف مش هخليه يضمنى هخليه يخاف على زعلى هخليه يعبرلى عن حبه زى ما بعبرله عن حبى هعمل حاجات تانية فى حياتى ومش هبقى مقطوعاله بحيث اوحشه بصى هسمع كلامك كله كله وهتقل عليه
حنان بابتسامة :ربنا يسعدك يا حبيبتى
حورية بسعادة :ده عمار بيرن شكله وصل
حنان وهى بتضحك :لا شكلك هتعرفى تتقلى عليه يا واقعة
حورية وهى بتضحك :واقعة ومدلوقة ودايبه فى دباديبه دبدوب دبدوب بس هنفذ اللى اتفقنا عليه النتيجة طلعت حلوة اوى ...عمار بيرن تانى انا هخرجله اشوفك بكرة
حنان بابتسامة :اشوفك بكرة يا حبيبتى
حورية :ايوه يا حبيبى وصلت طيب انا خرجالك اهوه
كل ما هو متبادل يستمر مفيش علاقة هتستمر وطرف واحد فيها بس هو اللى بيدى هو اللى بيتعب هو اللى بيعمل كل حاجة
علشان العلاقة تستمر لازم الطرفين يدو والطرفين يتعبو والطرفين يعملو حاجات حلوة علشان بعض لازم يكون العطاء متبادل والحب متبادل علشان الحب اللى بينهم يستمر
الحب هيخلص لو مكنش رايح جاى بين اتنين اى حاجة حلوة فى الدنيا هتخلص لو مكنتش متبادلة ورايحة جاية بين اتنين💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا خصوصا من زال اثره فلم يزره زائر ولم يذكره ذاكر