ناهد :يا بت افهمى
بقولك محترم ومتربى وشكله زى القمر ومسافر بقاله كتير يعنى كون نفسه
واهله احنا بقينا عارفينهم
واخوكى اتجوز بنتهم
يعنى مش هيعمل فيكى حاجة وحشة علشان اخته عندنا هيخاف عليها
سهر :ده على اساس اننا واخدين اخته رهن
ولا هى عملية تبادل أسرى
يا ماما انتى بتتكلمى على جواز مش مقايضة
خدنا منكم بنت يبقى تاخدو قصادها بنت مننا
ناهد :انا بتكلم على جواز يا عين امك
وهو الجواز ايه غير راجل عنده دين واخلاق عارفين اصله وفاصله وقادر يفتح بيت
سهر :وقبول يا ماما وتفاهم وحب
ناهد :حب ايه وهبل ايه
ما ياما بيوت اتخربت علشان اتبنت على اساس الحب
اللى بتقولى عليه ده وطلع اساس مخوخ
واتهدت البيوت دى فوق روس صحابها
اختك مش حبت واختارت اللى حبته ومسمعتلناش لما قولنالها مينفعكيش
وفى الاخر حصل ايه وراها الويل هو واهله وفى الاخر طلقها
عايزة تعملى زيها
مالك راجل ومحترم
واهله عايزينه يخطب قبل ما يسافر علشان ميطولش عن سنة المرة دى ويرجع يتجوز
سهر :بس انا مش عايزة اسافر
ناهد :وانتى مفكرة انى ممكن اوافق بواحد يبعدك عنى
يا بت لا هيرجع يستقر هنا
سهر :اه واهله عايزين ضمان انه يرجع وميطولش فى سفره
يعنى انتى شايفة جوازنا ولا عملية تبادل الأسرى
واهله شايفينه قيد يربطوه بيه هنا ويخلوه جنبهم بدل ما هو بعيد عنهم
لا واضح انها هتبقى جوازة الهنا والسعادة
ده انا شكلى داخلة على ايام بيضا
بعد سنة ونص
مالك :نامى انتى فى اوضة الأطفال
سهر :نعم
مالك :مش عارف انام هناك
السرير صغير
رجلى نصها مدلدل براه
مينفعش انام انا هناك بس انتى ينفع
سهر :اوضة الأطفال قبلى وخنقة
لو نمت فيها هصحى نص سوا
مالك :وانا السرير قصير عليا
اعمل ايه
سهر :لا ما انت متصعبهاش عليا لو عليا اروح بيت اهلى
انما انت اللى اتفقت معايا ان اهلنا ميدخلوش بنا
ولو هنتخانق يبقى بنا وبين بعض ولو انا عايزة اغضب اغضب فى اوضتنا وانت هتنام فى اوضة الأطفال
مالك :الكلام ده كان قبل ما اعرف ان سريرها قصير عليا
انا هنام هنا
ومش هتحسى بيا ولا كأنى نايم ولا ايدى هتيجى عليكى ولا هحضنك حتى
سهر :انت اساسا كده كده مبتحضنيش وانت نايم
مالك وهو بينام جنبها :طيب ما الموضوع بسيط اهوه وانا سايبلك مساحتك ومش خانقك...رايحة فين مش قولتى اوضة الأطفال حر
سهر :هروح انام على الركنة
مالك :براحتك بس ضهرك هيوجعك الركنة ناشفة
سهر :هو ده اللى ربنا قدرك عليه
لا شكرا لاهتمامك
تانى يوم
مالك :ايه ده انتى مش هتاكلى معايا
سهر :لا انا سبقتك
تانى يوم بالليل
مالك :قومى نامى على السرير
سهر :هتنام انت على الركنة
مالك :لا
انا وانتى هنام على السرير
مش علشان متخانقين يبقى كل واحد فينا ينام فى مكان
ولا تاكلى لوحدك وانا اكل لوحدى
سهر :اومال هنام جنب بعض وناكل سوا
مش عايزنى اقولك نكت بالمرة علشان اسليك واحنا متخانقين
مالك :وهو يعنى المتخانقين مينفعش ينامو جنب بعض وياكلو سوا
مينفعش واحد فيهم يقول للتانى نكتة يضحك عليها والدنيا بينهم تروق
سهر :وخلاص كده تخلص الخناقة بنكتة
ويرجعو تانى يتخانقو نفس الخناقة تانى وتالت وعاشر
ما هو اصل الخناقات مبتتحلش بالنكت يا مالك
مالك :انا قولت الدنيا بينهم تروق بس ده مش معناه انهم ميتكلموش فى الخناقة اللى بينهم ويعرفو سببها ويوضحو سوء الفهم لو فى
او لو حد غلطان يعتذر
ولو الاتنين غلطانين يراضو بعض
سهر :بالبساطة دى
هو ده الحل السحرى من وجهة نظرك
مالك :اه
تخيلى اه هو ده الحل السحرى
الكلام علشان يتفاهمو
يتكلمو علشان يراضو بعض
علشان هما الاتنين عايزين الدنيا بينهم تروق
مش واحد فيهم عايز يطلع التانى غلطان وخلاص
لغة الحوار هى الحل يا سهر
انما الانفصال النفسى ده اكيد مش هو الحل للمشكلة بالعكس ده هيزودها
سهر :انفصال نفسى
ده يعنى ايه ده
انت هتطلقنى ولا ايه
مالك :الانفصال النفسى هو اللى احنا فيه ده
عايشين فى نفس البيت وكل واحد فينا عايش مع نفسه بياكل ويشرب وينام لوحده
كأنه عايش لوحده
سهر :انا لما بضايق من حد فى اصحابى ببعد عنه لحد ما اهدا وانسى
مالك :طيب واهلك لما بتضايقى منهم
سهر :بعمل كده برضه معاهم
وبعد كام يوم بهدى وبرجع اتعامل عادى
مالك :لا انا ميمشيش معايا الكلام ده
التجاهل مش حل بالنسبالى
واحنا لسه متجوزين من كام شهر بدرى اوى على الخرص الزوجى ده
سهر :خرص زوجى
انت ليه كلامك كبير كده محسسنى ان فى مصيبة
مالك :علشان فى مصيبة
انا مش عيل صغير هتعاقبيه بأنك متاكليش معاه وتسيبيه ينام لوحده
ومتتكلميش معاه الا لو هو كلمك
وتردى على قد كلامه
سهر :انا مضايقة منك اعمل ايه يعنى
مالك :اتكلمى معايا فى اللى مضايقك منى
وضيقك منى ملوش علاقة بأنك تنامى جنبى واننا ناكل سوا
انا مكنتش باكل لوحدى وانا مسافر
فمش معقول اكل لوحدى وانا متجوز وانتى عايشة معايا
غير اننا متجوزين وبنشارك بعض الحياة بتفاصيلها دايما
مش واحنا متصالحين تمام
ولو اتخانقنا خلاص بح مفيش مشاركة
سهر :كل ده علشان منمتش جنبك يومين ومكلتش معاك
خلاص هنام جنبك ولا تزعل نفسك
مالك :ده اللى فهمتيه من كلامى
سهر :مش ده اللى انت عايزه
مالك :اه وعايزك تتكلمى فى اللى مضايقك
سهر :قولتلك انى مبعرفش يا مالك
باخد جنب كام يوم كده اهدى وانسى وخلاص
مالك :تتعلمى يا سهر
تتعلمى تتكلمى فى اللى مضايقك
سهر :ان شاء الله
تعالى طيب ننام الوقت اتأخر
بعد يومين
سهر :ايه ده
مالك :ورد
سهر :ليه
مالك :ليه ايه
سهر :ليه جيبتلى ورد
انا مقولتلكش انى عايزة ورد يا ابراهيم قصدى يا مالك
مالك وهو بيضحك :مش لازم تقولى يا يسرية قصدى يا سهر
سهر :ايوه ايه مناسبته
مالك :انتى مخضوضة ليه كده انا جايبلك ورد مش قنبلة
سهر :كنت قريت بوست على الفيس واحدة فيه كانت بتقول ان جوزها كل ما بيخونها علشان متشكش فيه وعلشان يسكت احساسه بالذنب
بيهتم بيها وبيقولها كلام حلو وبيجبلها ورد من غير مناسبة
مالك وهو بيضحك :فانتى خايفة اكون بخونك
ودى معقول اخونك واحنا متجوزين مبقلناش ست شهور
طيب يعدى علينا سنة حتى
سهر :يعنى ايه انت هتخونى بعد ما نكمل سنة جواز
مالك وهو بيضحك :والله انتى وشطارتك
حطى طيب الورد فى فازة ولا حاجة
بعد شهر
مالك :مال وشك عامل كده ليه
سهر :مفيش زهقانة من رواية بقراها بس
مالك :مزهقك ايه فيها
سهر :البطل من اول الرواية بيكره البطلة وفاكر ان ابوها اللى قتل ابوه
واتجوزها علشان ينتقم ومن اول الرواية ممرمطها وماسح بكرامتها بلاط القصر بتاعه
ومبيقولهاش غير يا بنت القاتل يا بنت المجرم
وبعدين كالعادة طلعت بنت حلال مصفى وحبها وعرف الحقيقة وانه ظالم ابوها
وهى سامحته بسرعة وكأنه مكنش عامل كرامتها سجادة رايح جاى يخطيها برجله
تقريبا كاسبة كرامتها فى كيس شيبسى
مالك :وانتى ايه اللى مزهقك مكنتيش عايزاها تسامحه
سهر :لا مش الفكرة
انا بس زهقت لأنى قريت الفكرة دى كتير
مالك :وبتقريها ليه لما هى مزهقاكى
سهر :علشان عارفة ان نهايتها هتكون حلوة وساذجة وسعيدة
وانا مش هقرء حاجة تضايقنى
مالك :زى اللى بيتفرج على فيلم شافه قبل كده بدل ما يشوف فيلم جديد ميعجبوش
بيتفرج على القديم اللى ضامن انه يعجبه
سهر :مش بالظبط
هى اه فكرة الروايات اللى بقراها واحدة
بس فى شوية تفاصيل بتختلف جوا الرواية
مالك :بس التفاصيل اللى بتختلف دى مش كفاية
بدليل انك زهقتى اهو
سهر وهى بتضحك :بس حتى لو زهقت مش هبطل اقراها
مالك وهو بيضحك :ده انتى غاوية تعذبى نفسك بقى
سهر :لا وانت الصادق غاوية قصص حب
بحب اقرء قصص الحب اوى
يعنى هيبقى لا واقع ولا خيال كمان
مالك :ايه
سهر :ايه
انت جعان صح انا هقوم احضر العشا
مالك وهو بيدخل وراها المطبخ :لا استنى انتى قولتى...
سهر قاطعته بحماس :ايه ده انت جيبت شيكولاتة مع طلبات البيت
مالك :اه قولت انك ممكن تكونى بتحبيها
سهر بسعادة :بحبها بس ده انا بموت فيها
تسلملى يا مالك
هو انت جايبها ليا لوحدى ولا هتاكل معايا
مالك وهو بيضحك :ايه السؤال ده لا بجد ايه السؤال ده
سهر :قصدى يعنى اعمل حسابى انك ليك فيها نصيب
ولا اكلها كلها لوحدى
مالك وهو بيضحك اكتر :لا كليها لوحدك
ايه الفرحة دى كلها انتى مفرحتيش ربع الفرحة دى ببوكيه الورد اللى كان اغلى بكتير اوى من الشيكولاتة اللى جيبتها دى
سهر وهى بتفتح واحدة تاكلها :اعترفلك بسر خطير
مالك :اعترفيلى بسر خطير
سهر :انا مبحبش الورد
مالك :خالص
سهر بسعادة :خالص...بس بحب الشيكولاتة اوى
مالك :شكلك حلو وانتى فرحانة وبتاكلى وملحوسة بؤك بالشيكولاتة كده
سهر وهى بتمسح بؤها :اهو اللحوسة دى عيب الشيكولاتة الوحيد بالنسبالى
مالك :طيب ايه هتحضرى العشا ولا هتعشينا شيكولاتة
سهر :الله انت مش قولتلى اكلها لوحدى
مالك :ما انا برضه قولتلك ان الجواز مشاركة
سهر :فى كل حاجة الا الشيكولاتة
مالك وهو بيضحك :خلاص متخافيش انا اساسا مبحبش الشيكولاتة
سهر بابتسامة :ده من حسن حظى
احضرلنا العشا بقى
بعد اسبوع
مالك :عارفة بحب اتفرج عليكى اوى وانتى بتعملى شغل البيت وانتى بتغنى وترقصى كده
سهر :متعودة على كده من وانا فى بيت اهلى
مالك :بس مكنتيش بتعملى كده فى اول جوازنا
سهر :علشان بس مكنتش خدت عليك قصدى على البيت هنا
مالك بابتسامة :مبسوط انك بقيتى بتتصرفى قدامى بطبيعتك وبحريتك وخدتى عليا قصدى على البيت هنا
سهر :عارف بعمل كده علشان مزهقش من شغل البيت
مالك :دى طريقة ناجحة
لما بشوفك كده مبحسش انك مضايقة وانتى بتعمليه بالعكس
بس انتى بتسمعى اغانى قديمة كتير
سهر :مليش فى الجديد
مالك :بس لدرجة تسمعى اغانى ساعة وساعتين كمان
واقصر اغنية بتسمعيها بتاع عشر دقايق
سهر :اه عادى وهو انا يعنى هستعجل ليه
وبعدين كده احسن اسمع الأغنية بمزاج
مش تبقى تلت اربع دقايق واقلب
انا بحتاج وقت علشان اندمج السربعة دى مبتاكلش معايا
علشان كده بحب الأغانى الطويلة والروايات الطويلة وحتى المسلسلات الطويلة
الوقت بالنسبالى عامل مهم
مالك :اه خدت بالى
بعد اسبوعين
مالك :البيت عندنا مقلوب بسبب حوار عمر ده
سهر :انتم ليه رافضين اوى كده
مالك :علشان هو لسه متخرجش يا سهر ولسه عنده جيش وبعدها يبقى يشتغل ويخطب
سهر :وهو قال انه بقاله سنتين بيشتغل وهو بيدرس علشان يعرف يجيب شبكة
وعايز يخطب دلوقتى علشان يحجزها علشان خايف اهلها يجوزوها
هو كلها كام شهر ويتخرج
وفترة الجيش تبقى خطوبة
وكده كده اهلك هيساعدوه فى الجواز
مالك :وهو الجواز شبكة وشقة بس
الجواز مسئولية وهو لسه صغير
سهر :وهو عايز يشيل المسئولية دى
لو رفضتو مش هتكسبو حاجة غير انه هيشوفكم كسرتم قلبه وانه خسر البنت اللى بيحبها بسببكم
انا رأيى انه الأفضل تحتووه
يعنى اخطبوهاله سنتين ولا سنتين ونص
اهو يكون اتخرج وخلص جيش واشتغل وهى تكون اتخرجت
مش هيبقى صغير اوى وقتها
فى ناس كتير اتجوزت وهى قده واصغر كمان
طيب عارف انا كان معايا فى الجامعة اتنين متجوزين واحنا لسه فى سنة تالتة
كانو روميو وجوليت الجامعة
مالك :الجواز مش اساسه الحب بس
زى ما قولتلك الجواز مسئولية
سهر :وانا مقولتش ان كلامك غلط بالعكس كلامك صح
الجواز مسئولية وعمر حابب يتحمل المسئولية دى
واهو بدء لما بقى بيشتغل وهو بيدرس بدل ما يقضى وقته فسح وخروجات مع اصحابه
هو حاططها هدف قدامه عايز يوصله
لو حرمتوه من الهدف اللى بقاله كتير بيتعب علشان يوصله
هيضايق منكم جامد ويمكن يهمل فى دراسته وفى حياته كلها بعد كده
ويمكن يرفض حتى يتجوز بعد كده كمان
مالك :مش للدرجة دى لا
سهر :لا للدرجة دى
انت مش شايف هو مصر عليها ازاى
وبيحاول علشانها بقاله سنتين وبيشتغل
انا شايفة ان حبه ليها خلاه بقى راجل ومسئول
بدل ما يبقى شاب مستهتر وكل يومين مع واحدة
قصة حبه حلوة وساعدته يتغير للأحسن ويبقى مسئول
ساعدوه يكملها
مالك :بتتكلمى بشغف وبتدافعى عنه جامد
سهر :قولتلك بقى بحب قصص الحب اوى
بحب فكرة ان حد اختار يكمل حياته كلها مع حد دى
ومش فاهمة ليه حد ممكن يحرم نفسه من الحق ده ويخلى حد يختارله
مالك :انتى بتتكلمى عن مين
سهر :انا بتكلم عموما مبتكلمش عن حد معين
مالك :طيب هو عموما لما واحد يخلى اهله يشوفوله عروسة
فده مش معناه انه سابهم يختاروله
هو ممكن يكون مبيتعاملش مع بنات
او البنات اللى بيتعامل معاهم فى عيلته وجيرانه وشغله مش مناسبين
ممكن حاجات كتير يعنى تخليه يطلب من اهله يشوفوله عروسة
وقتها هو بيشوفها ويا يحصل قبول فالموضوع يكمل
يا ميحصلش قبول والموضوع ميكملش
هو ليه حرية الاختيار
زى ما البنت ليها حرية الاختيار انها توافق او ترفض
محدش فيهم خسر حق الاختيار
سهر :يمكن
مالك :لا مش ممكن ده اكيد
هو ايه الفرق بين واحد قال لواحدة عايز اتعرف عليكى وارتبطو
وواحد اتقدملها وخطبها علشان يعرفها
فى الحالتين هما بيتعرفو
وبالعكس فى الحالة التانية هى كرامتها محفوظة لأنه كده اكيد مش بيلعب ولا بيتسلى ولا هى بتعمل حاجة من ورا اهلها
سهر :خلاص انت كبرت الموضوع ليه كده
مالك :علشان هو مش صغير بالنسبالك يا سهر
سهر :قصدك ايه
مالك :مش مهم
على العموم انا اقتنعت بكلامك
صراحة كنت متردد فى موضوع عمر ده
بس كلامك خلانى اقرر انى هاخد صفه وهقنع بابا وماما
سهر بسعادة :هيوافقو مادام انت وافقت
هما بيفرقلهم كلامك
كده الحمد لله عمر هيخطب اللى بيحبها
بعد شهر
مالك :مبروك لمروة
سهر :الله يبارك فيك
مالك :قصة حب جديدة اهيه من اللى بتحبيهم
عماد فضل ورا اهله لحد ما وافقو على جوازه من مروة
سهر :هو بالنسبالهم يستاهل واحدة تانية غير مروة
تكون اصغر منها
مع ان عماد اكبر منها بتلت سنين
بس هما عاوزينله برضه واحدة اصغر منه بتمن ولا عشر سنين
غير ان مروة مطلقة
وهو مسبقلوش الجواز
مالك :هو كبر ولو خد واحد هو اكبر منها بعشر سنين
مش هيرتاح معاها التفاهم هيكون صعب
وايه يعنى مروة مطلقة مادام هو عايزها ومقتنع بيها خلاص
هو عمل الصح لما اتمسك بيها وخلا اهله فى الاخر يرضو باللى هو عايزه
سهر :يعنى انت ممكن تعمل زيه
مالك :اعمل زيه دى يعنى اعمل ايه
سهر :تختار واحدة و...
مالك قاطعها بانفعال :اختار واحدة واحبها صح
او اختارها اصلا
انا اللى اختارها وانقيها واقول انا عايز دى
سهر :اهدى انا كنت هقول وحتى لو مطلقة تتمسك بيها
انا مكنتش هقول اللى انت قولته ده
مالك :مكنتيش هتقوليهولى بلسانك
بس هو ده اللى جواكى يا سهر
بس انتى مبتتكلميش عنه زى ما مبتتكلميش عن حاجات كتير جواكى
وسيبانى اتعب علشان اعرفك اعرف ايه اللى بيفرحك وايه اللى بتحبيه
بجرب حاجات كتير لحد ما الاقى الحاجة اللى بتحبيها
بقول حاجات كتير لحد ما اعرف ايه الحاجة اللى بتأثر فيكى
بعمل حاجات كتير لحد ما اكتشف ايه الحاجة اللى ممكن تقربنى منك
وانتى ولا شايفة كل ده
كل اللى شايفاه انى واحد خلا اهله يختاروله واحدة يتجوزها
افهمى بطلى غباء وافهمى انا اختارتك
اختارت اخطبك اختارت اتجوزك
اختارت احاول اسعدك واقرب منك
وانتى عامية مش شايفة غير حاجة واحدة
حاجة بتعاقبينى عليها مع انك وافقتى
لما انتى رافضة الفكرة اوى كده وافقتى ليه عليا
سهر :اهدى بس انا...
مالك قاطعها بغضب :ردى وافقتى ليه
سهر :علشان انت متترفضش يا مالك
مميزاتك كتير
لا عرفت ارفضك لما اتقدمت
ولا انت عملت حاجة افسخ بسببها الخطوبة
وافقت علشان انت متترفضش يا مالك
مالك وهو بيضحك بسخرية :مترفضش بس متحبش صح
مترفضش بس عمرك ما هتحسسينى انك مبسوطة معايا
يا ريتك رفضتينى يا شيخة
سهر :انت رايح فين
مالك :رايح فى ستين داهية
تانى يوم
سهر :من امبارح مبيردش عليا وفى الاخر قفل موبايله خالص
انا قلقانة عليه يا سمر
قلقانة وخايفة
سمر :الله يخربيت ده طبع زبالة فيكى
كان هيجرا ايه لو اتكلمتى عن فكرة انك مش حاسة ان هو اللى اختارك دى
سهر :اتكلم اقوله ايه
اذا كنت متكلمتش بصراحة وهو فهم لوحده ولما فهم طفش وسابلى البيت
اومال لو كنت اتكلمت معاه بقى
سمر :مكنش لازم تتكلمى معاه
كنتى اتكلمتى معايا
جوزك فهم من غير ما تتكلمى بصراحة
لأنه ذكى وعلى قد ذكائه على قد غبائك
انتى مش بس مبتتكلميش عن اللى جواكى
لا انتى كمان بتقفلى على افكارك وبترفضى تتقبلى اى حاجة غيرها
يعنى بالنسبالك الحب واحد بيختار واحدة ويتجوزها
انما واحد بيتجوز واحدة ويعمل اللالى علشان تحبه بعد الجواز
لا ده مش حب
يا يحصل اللى فى دماغك يا خلاص بقى
جوزك بيحبك وقصة الحب الخرافية اللى كنتى عايزاها
كان ممكن تعيشيها معاه بعد الجواز
مش لازم قبله يا سهر
سهر :انا كنت عايزة واحد يختارنى ويحبنى ويتجوزنى
علشان يتحمل عيوبى
سمر :ومالك عمل ايه غير كده
ما هو اتحمل عيوبك وحاول يقرب منك ويقربك منه
انتى اللى مش عايزة تشوفى كل ده
انتى اللى راسمة سيناريو واحد للحب
ولو السيناريو ده محصلش بالنسبالك خلاص ده مش حب
وبعدين مين قالك ان الحب اهم حاجة فى الجواز او حتى ضمان سعادة
طيب ما انا اتجوزت سعد وانا وهو بنحب بعض
بس بعد الجواز الدنيا بتختلف
مشاكل وخناقات وتفاصيل الحياة المملة بتأثر فينا
وبتبعدنا عن بعض شوية بشوية
وسعد بيستسهل وانا كمان بصراحة
عارفة لو واحد فينا زى مالك جوزك حياتنا كانت هتبقى احلى
مالك بيتعب علشانك
وفاهم الجواز صح
انتى اللى فهماه غلط
ومروة مش جوازتها الأولى كانت عن حب وكان اختيارها
سهر :اهى مروة دى اللى لغبطتنى اكتر ما انا متلغبطة
خوفت ارفض مالك اندم
زى ما هى ندمت لما اختارت جوزها الاولانى
مع اننا قولنالها بلاش
وفى الاخر اهيه جالها واحد بيحبها وشاريها
سمر :وهى كان المفروض تعيش بقية عمرها تعيسة ووحيدة
علشان انتى تحسى انك عملتى الصح لما وافقتى على مالك
مروة مش عدى عليها اوقات صعبة اتمنت فيها الموت بسبب جوزها الاولانى ولا انتى ناسية
سهر :لا مش ناسية
وفرحانة علشان ربنا عوضها
هى تستاهل
سمر :هى غلطت ودفعت تمن غلطها يا سهر
وانتى اختارتى متغلطيش
سهر وهى بتعيط :انا خوفت اختار يا سمر
وافقت على مالك علشان اهلى وافقو عليه
لأنه ميترفضش
ملقتش حاجة ارفضه بسببها
حاسة انى كنت جبانة علشان وافقت
وانه اجبن منى علشان ساب اهله يختاروله
سمر :لا مش ممكن على غبائك ده
هشتمك وانتى بتعيطى لأنك معصبانى وتستاهلى الشتيمة
اهله مين اللى اختاروله
هو اهله جوزوكم ولفوكى لفة هدايا وقالوله اتفضل
هو مش نزل وشافك فى فرح اخوكى على اخته
وبعدها جالكم البيت وبعدها اتخطبتم وبعدها اتجوزتم
ومن بعد جوازكم طالع عينه مع شخصيتك الكتومة المعقدة دى
هو لازم يطلع عينه قبل ما يتجوزك علشان تحسى انه اختارك
على فكرة ياما ناس طلع عينها قبل الجواز وبعد الجواز بطلو يتعبو علشان بعض وعلشان كده جوازهم فشل
مالك بيعمل الأصعب وانتى ولا مقدرة
واحد غيره ولا كان هيتحمل قرفك ده
بس هو اختارك واختار يتحمل قرفك ويتعب معاكى ويتعب علشانك
ولو انتى هتفضلى لا شايفة ولا مقدرة كل ده
يبقى انتى متستاهليهوش
ويبقى هو اختار يتعب علشان الشخص الغلط
سهر بخضة :يا نهار ابيض تفتكرى تعب منى وهيطلقنى
انا طول الليل بفكر فى كل حاجة عملها علشانى لقيته عمل كتير
وزى ما هو قال انا اللى كنت عامية
بس والله خلاص هفتح عينى وهشوف وهقدر كل اللى بيعمله علشانى
بس يدينى فرصة تانية
سمر :هو انتى اه خلتيها خل وعكيتى الدنيا
بس معتقدش انه ناوى يسيبك لا
سهر وهى بتعيط اكتر :انا كنت خايفة اختار واحد ويطلع اختيارى غلط وافشل وجوازى ميكملش
وفى الاخر اطلع انا الاختيار الغلط لمالك وافشل وجوازى ميكملش بسببى انا
لا يا رب لا
انا اسفة والله علشان مشوفتش نعمة ربنا لما جاتلى ومقدرتش اختيار ربنا ليا
بس والله ما هعمل كده تانى بس ميسبنيش
سمر :اهدى يا حبيبتى
هو بس تلاقيه مضايق منك بس اكيد مش لدرجة يسيبك
انتى لما يرجع حاولى تصالحيه
سهر :حاضر والله حاضر بس هو يرجع بس
بعد خمس ساعات
سهر وهى بتجرى على الباب :مالك اخيرا جيت انت كنت فين انا بكلمك من امبارح مرديتش ليه قلقتنى عليك
انت مبتردش عليا ليه
مالك :مش عايز اتكلم معاكى تعرفى تسكتى
سهر :انا اسفة والله انا...
مالك قاطعها :سهر قولت اسكتى
سهر باستسلام :حاضر هسكت بس متزعلش منى
بعد ساعة
مالك :انتى بتعملى ايه
سهر وهى بتنام جنبه على الركنة :بنام
انت مش قولتلى ان المتجوزين مينفعش ينامو غير جنب بعض
وادينى اتعودت على كده
من امبارح وانا مش عارفة انام من غيرك
مالك :لا والله
سهر :اه والله
انت عندك حق المشاركة هى اساس الجواز
والانفصال النفسى ده اسوء من الانفصال الحقيقى
انت عارف انا دخلت قرءت عن الانفصال النفسى وعن الخرس الزوجى كمان
انت بتقرء حاجات مهمة وفيها ثقافة كده
مالك :على فكرة لو مسكتيش هقومك من هنا
سهر :لا بالله عليك انا بجد عايزة انام
مالك :خلاص اسكتى ونامى
بعد خمس دقايق
سهر :حلوة فكرة انك حاضنى واحنا نايمين دى انت ليه مكنتش بتحضنى واحنا نايمين قبل كده
مالك :انا مش حاضنك الركنة ضيقة وانا مش عارف احط ايدى فين علشان كده حاططها عليكى
والزنقة دى انتى السبب فيها
انا سايبلك اوضتنا بحالها انتى اللى جاية...
سهر قاطعته :جاية اتمحك فيك
اعمل ايه جوزى ومقدرش على بعده
مالك انا اسفة
مالك :مش انا قولتلك اسكتى
سهر :مش هقدر اسكت
انا فى العادى بسكت ومبعبرش عن اللى جوايا
بس ده غلط وخلانى ازعلك منى
وعلشان كده انا مش هسكت
انا اسفة يا مالك
انت عندك حق انا اللى كنت عامية وغبية ورافضة اشوف غير اللى فى دماغى بس
مع انه غلط
انت اختارتنى وتعبت علشانى اكتر ما اى حد انا اعرفه تعب علشان البنت اللى بيحبها
عارف انت اختيار ربنا ليا
انت احلى حاجة حصلتلى فى حياتى
ادينى فرصة تانية انا خلاص مبقتش عامية
ادينى فرصة اوريك فيها انى شايفة كل حاجة حلوة عملتها علشانى ومقدراها
انا كنت خايفة نفشل علشان انت مبتحبنيش و...
مالك قاطعها :مين قال انى مبحبكيش
وانا لو مبحبكيش هستحمل كل ده منك ليه
انا اختارتك يا سهر واتحملت نتيجة اختيارى وحبيت اختيارى
ومش فاهم انتى ليه مش شايفة ده
سهر :علشان كنت عامية وغبية
بس خلاص والله
انا بقيت شايفة صح
وبعد كده هسمع كلامك وهتعلم ازاى اتكلم واعبر عن اللى جوايا
هعمل اى حاجة انت عايزها بس متسبنيش يا مالك
مالك :انتى فكرتينى هسيبك ده انا مقدرتش ابعد عنك اكتر من يوم
مفكرة انى هقدر اسيبك يا سهر
يا ريت كان ينفع يا ريت كنت اقدر
سهر وهى بتبوس ايده :الحمد لله انك متقدرش
انا كمان مقدرش والله
انا بحب حياتى معاك يا مالك
انا كنت غبية وشايفة حاجة واحدة وبفكر فى حاجة واحدة
لما فتحت عينيا وشوفت كل حاجة حواليا وفكرت فى كل حاجة
لقيت انى مبسوطة بحياتى معاك وانى مكنتش هكون مبسوطة فى حياتى مع حد غيرك
انا بحب حياتى معاك والله وبحب وجودك فى حياتى
وبجد مقدرش اعيش من غيرك
مالك :فى حاجة مقولتلكيش عليها من يوم فرح منة وهشام
كنت خايف متفرقلكيش لو عرفتيها ودى كانت حاجة هتضايقنى منك
بس دلوقتى بعد كلامك ده قررت اقولهالك
انا يومها طبعا ماما كانت كلمتنى عليكى وقالتلى هتشاورلى عليكى فى الفرح
انا يومها قبل ما هى تشاورلى
فضلت ابص على البنات اللى لابسين سوارية قولت اكيد واحدة فيهم هتبقى اخت هشام
لحد ما شوفتك وفضلت مركز معاكى وقولت يا رب تبقى هى
لحد ما ماما جات وشاورت عليكى وطلعتى هى
بس والله لو حتى مكنتيش هى كنت هتقدملك
عارفة انا قولت ساعتها يا ريتنى كنت نزلت حضرت خطوبتهم اكيد وقتها كنت هشوفك وهتقدملك
مش ده بالنسبالك يعتبر انى اختارتك حتى ولو جزئيا
سهر :بده او من غيره انت اختارتنى يا مالك
ومن هنا ورايح انا وانت مكملين مع بعض علشان انت اختارتنى وانا اختارتك
الروايات والأفلام والاغانى وحكايات الكابلز فى السوشيال ميديا وحتى قصص الناس اللى حوالينا
ساعات كتير بتدينا مفهوم واحد للحب وللأسف بتدينا مفهوم واحد للاختيار
مع ان الحب ليه مفاهيم كتير وأشكال كتير
والاختيار ليه مفاهيم اكتر وأشكال اكتر
الاختيار مش واحد بيختارك فى بداية القصة
الاختيار اللى بجد واحد بيختارك فى الاول
وبيرجع يختارك فى كل موقف صعب يقابلكم
ويفضل يختارك يختارك يختارك لحد ما القصة تخلص
وعلشان يفضل يختارك لازم انت كمان تفضل تختاره
متعملش زيى متبقاش غبى واعمى
افتح عينك وافتح قلبك وشغل عقلك
واوعى تحط شكل واحد للحب او مفهوم واحد للاختيار💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الأعلى بدون حساب ولا سابقة عذاب هو وموتى المسلمين جميعا خصوصا من زال اثره فلم يذره زائر ولم يذكره ذاكر