Secrets of the Malavegas (Book 7)

48: The Beginning of the End

Madaliin na natin yung ending. Alam n'yo naman na kung ano ang mangyayari e hahahaha

----- 

Kilala ni Josef ang asawa, sapat na para sabihing alam niyang may mga hindi ito sinasabi sa kanya. Simula pa naman noon, may kanya-kanya na silang sikreto, at hindi niya kukuwestiyunin iyon dahil baka magkasubukan sila at mapasubo siya. Iyon nga lang, sa pagkakataong ito, mukhang kailangan na niya itong kausapin tungkol sa ilang sikretong tinatago nito, lalo pa't ang sikreto nito ay karugtong ng sikreto niya.

Pansamantala muna niyang tinawag ito sa kuwarto nila para masinsinan silang mag-usap. Kung tutuusin, napakarami nilang kailangang pag-usapan, napipigilan lang ng lokasyon nila at mga anak.

"Is it about Laby?" tanong agad ni Armida pagpasok na pagpasok sa kuwarto nila.

"Alam mong buhay ang mga alter mo, di ba?" diretsong tanong ni Josef.

"Napag-usapan na natin 'to, di ba?" mataray na balik ni Armida. "Ano na naman bang issue mo sa mga alter ko?"

"Nakakausap mo sila sa Terminal."

Bahagyang napaurong paatras si Armida at puno ng pagtataka ang mukha kung ano ang pinagsasasabi ng asawa niya. "Saan mo naman nakuha 'yang Terminal na 'yan?"

"Armida, I want to know the truth."

Nagpamaywang agad si Armida at halatang nabuburyong na sa asawa. "Anong truth?"

"Alam mong buhay ang mga alter mo. Alam mong totoong tao sila, may sariling katawan, may sariling isip, nasa kung saan at nabubuhay ring gaya mo. They are not just your mentally made-up illusions. They are real."

Nagbuntonghininga si Armida at nagkrus naman ng mga braso habang sinusukat ng tingin ang asawa. "Ano'ng meron, bakit bigla mong bini-bring up itong topic, hmm?"

"Ano'ng kasalanan mo kay Jocas?"

Lalong nagtaka si Armida sa tanong na iyon. "Kasalanan ko? Kay Jocas?"

"Armida, quit playing with this topic! May ginawa ka kay Jocas kaya siya nagagalit sa 'yo!" galit nang sigaw ni Josef.

"Ano nga ang ginawa ko?!" Kahit si Armida, napapasigaw na rin. "Bakit naman magagalit sa 'kin si Jocas, ha?"

"Ugh! God!" Napahilamos si Josef ng mukha dahil sa inis at napatalikod saglit habang pinakakalma ang sarili. Matapos ay binalikan na naman ang asawa nang mas mahinahon na. "Fine. Si Erah. Bakit galit si Erah sa 'yo."

Ang rahas ng buga ng hininga ni Armida at naningkit bigla ang mata niya sa asawa. "What happened? Malamang na may nangyari kaya ganyan 'yang mga tinatanong mo."

"Alam kong alam mo na buhay ang mga alter mo dahil nakakausap mo sila sa—doon sa kung saan man 'yon sa loob ng utak mo!" Inulit na naman ni Josef ang tanong. "Bakit galit si Erah sa 'yo? Bakit gusto niyang saktan ka! Saktan kami!"

"Because she's a psychopath!"

"Then what did you to do Jocas' parents after our first wedding!"

Doon na hindi nakasagot si Armida. Napapikit-pikit na lang siya at napalunok.

Nakaramdam ng malaking pagkadismaya si Josef dahil mukhang alam na niya ang dahilan ng malaking galit ni Erah sa kanila—o si Jocas sa ibang katawan.

"You killed her parents. Pinatay mo sila pagkatapos ng kasal namin ni Jocas, tama? Because after our wedding, ni minsan, hindi na ako nakarinig ng balita sa kanila."

"Nag-usap kami ni Jocas doon," mahinahong paliwanag ni Armida.

"Si Jocas na alter mo?" naiinis na tanong ni Josef. "O yung totoong Jocas na may ibang katawan?"