Secrets of the Malavegas (Book 7)

44: Plans

Dismayadong-dismayado si Armida sa panganay dahil sa ginawa nito. Nakatulog na gawa ng pagod at pag-iyak si Arjo. Nasa sala si Max, kausap ang mama niya. Alas-kuwatro na, hindi pa nila nakakausap si Josef para sa opinyon nito.

"Ano'ng nangyari, bakit nasugatan ang kapatid mo?" pag-iimbestiga ni Armida habang naka-dekuwatro ang mga binti at nakakrus ang mga braso. Nakatitig sa anak niyang nakasalikop lang ang magkabilang kamay habang bahagyang nakayukod sa inuupuan.

"I confronted Marlon Levarez," pag-amin ni Max. "Pinipilit niyang sabihin ko kay Arjo ang totoo. And he even said we need to go somewhere safe. Umawat si Arjo. I didn't mean to push her, but I did."

Napahugot ng hininga si Armida at napatango. Parang naiintindihan na agad nito ang lahat kahit iyon lang ang binanggit ni Max sa kanya. "Si Cassandra, tinawagan ka na?"

Biglang kunot ng noo ni Max. Bakit naman ako tatawagan ni Lola?"

Napatingin sa center table si Armida. Mukhang hindi pa nga sila tinatawagan ni Cas. Ilang araw na lang at magsisimula na ang initial screening para sa paparating na Annual Elimination. Pero hindi lang iyon, tatlong araw na lang ang natitira para sa isang mahalagang okasyon.

"Ma?" pagtawag ni Max na nagsisimula na namang maghinala.

"Nothing," kaswal na sagot ni Armida. "Just thinking about your birthday three days from now, Soldier."

"You sure?" tanong pa ni Max dahil talagang nakapagdududa ang mama niya.

"Max, 21st birthday mo na sa Thursday. Magiging legal ka na-"

"Ah," putol agad ni Max sa ina. "I get it, Ma. 21 na 'ko sa Thursday. Valid na to accept the throne legally. Si Cas ang magde-declare ng position ko sa Citadel once I agreed. And after that, isasalang kayo ni Papa sa castigation for punishment sa pagtatago sa mga project ng Citadel a.k.a. mga kapatid ko."

Napasimangot agad si Armida dahil maliban sa pinutol na siya ng anak sa pagsasalita, mabilis din nitong nakuha ang napakalabong bagay na gusto niyang puntuhin. Naiinis na rin siya kapag kinakausap ito nang masinsinan, kaya palagi niyang nababato. Gusto palagi nitong pinatatahimik ang kausap. Ang pinakaayaw pa naman niya sa lahat ay yung inuunahan siya sa isang bagay na gusto pa lang niyang ipaliwanag.

"Max, trust me, before you, ang dami nang nagtangkang sirain ang sistema ng Citadel," paliwanag agad niya. "Even me, even your father. Or even your father's father."

"Papa ni Papa? Why? Blinded by idolatry ba ang iyo, Ma?"

"Max, this is not our choice," pagpilit ni Armida.

"Yes, not your choice. Not even Papa. That hell is controlling us, Ma, and you know that better! Even my own name, hindi mo nga rin desisyon, di ba? What more pati desisyon sa buhay ko?"

"Maximilian, understand the whole situation!" mariin nang utos ni Armida at nagtaas na ng boses. "Hindi lang 'to tungkol sa 'yo. Tungkol 'to sa buong pamilya natin."

"Yes, Ma! Yung pamilya natin ang tungkol dito dahil buong pamilya natin ang kinokontrol nila!" galit na katwiran ni Max. "They even called Arjo and Zone, projects! Bakit kayo parurusahan? Dahil tinuring n'yong tao yung patapong bagay lang para sa kanila? That's utter nonsense!"

"Enough!" sigaw rin ni Armida.

Kinuyom nang mahigpit ni Max ang mga kamay habang pinipigil ang sariling huwag nang makipagsigawan sa ina. Sinasabi nitong unawain niya ang sitwasyon, pero paano niya iyon gagawin kung hindi niya alam kung anong sitwasyon na ba ang nangyayari sa kanila.

May nangyayari kay Arjo at sa katawan nito. At wala siyang ibang paliwanag doon maliban sa eksperimento ito ng Citadel. Ganoon din si Zone. Pero paano niya ipaliliwanag na ganoon din ang mama niya? Napapatanong siya kung isa rin bang project gaya ng sinasabi nila ang sariling ina gaya ng mga kapatid dahil sa nangyayari dito.