Unicode
အခန်း ၄
သစ္စာရှင်
ခရမ်းရောင်မိန်းမပျိုလေးနှင့် ဝတ်စုံနက်လူတို့နှစ်ဦးသည်ကား မဆိုင်းမတွတိုက်ခိုက်ကြလေတော့သည်။ ဘေးမှပွဲကြည့်နေသူဖြစ်သည့် ကျိုးကျစ်ရှူးကမူ သူတို့နှစ်ဦးကိုရှင်းရှင်းလင်းလင်းမြင်နေရသည်။ နှစ်ယောက်သား၏တိုက်ခိုက်ပုံတိုက်ခိုက်နည်းများမှာ မတူညီကြသော်လည်း အညှာအတာကင်းမဲ့ကာ ရက်စက်ကြမ်းတမ်းကြပုံခြင်းကတော့ အတူတူပင်ဖြစ်သည်။ ကြည့်ရသည်မှာ နာမည်ဂုဏ်သိက္ခာကြီးမားသောသူတော်ကောင်းဂိုဏ်းအဖွဲ့အစည်းများမှ ထွက်လာကြသူများတော့ဖြစ်ဟန်မတူပါချေ။
တိုက်ကွက် ဆယ့်လေးငါးကွက်ခန့်အတွင်းမှာပင် ဝတ်စုံနက်မှာ မိန်းမပျိုလေး၏လက်ဝါးရိုက်ချက်တစ်ချက်ကို နောက်ဆုတ်ရှောင်တိမ်းလိုက်ပြီး တစ်ဆက်တည်းမှာပင် မိန်းမပျိုလေး၏ရင်ညွန့်နေရာသို့ကန်ထည့်လိုက်သည်။ မိန်းမပျိုလေးမှာ ကိုယ်ကိုဘေးတစ်ဖက်သို့လှည့်၍ရှောင်တိမ်းလိုက်ပြီး ခပ်တိုးတိုးအော်ဟစ်လိုက်ကာ လက်ချောင်းများကိုလက်ဖဝါးသဏ္ဌာန်စုစည်းလိုက်၏။ သေချာပေါက်ကို ရန်သူ၏ဂုံညင်းရိုး (ဒူးခေါင်းရိုး) ကိုခုတ်ပိုင်းရိုက်ချိုးပစ်မည့် သိုင်းကွက်တစ်ကွက်ဖြစ်သည်။ သို့သော် မမျှော်လင့်ထားသည်ကား ဝတ်စုံနက်၏ဘောင်းဘီပေါ်ရှိပစ္စည်းတစ်ခုထံမှ ရုတ်တရက်အသံတစ်သံထွက်ပေါ်လာကာ ခြေသလုံးပေါ်မှသတ္တုစပရိန်တစ်ခုကန်ထွက်လာပြီးသော် မြားကျိုးတစ်ချောင်းလှစ်ခနဲထွက်လာကာ မိန်းမပျိုလေး၏မေးစေ့တည့်တည့်သို့ ဦးတည်လာနေ၏။
မိန်းမပျိုလေး၏သိုင်းပညာမှာ မညံ့ဖျင်းလှပါချေ။ ထိုဝတ်စုံနက်ထက်ပင် တစ်ဆင့်ပိုမြင့်ပုံရသည်။ သို့ပေသိ ဤကဲ့သို့ ညစ်တီးညစ်ပတ်တိုက်ခိုက်မှုမျိုးကိုတော့ မျှော်လင့်ထားဟန်မတူသည့်အလား ရုတ်တရက်ထိတ်လန့်သွားပြီး ရှောင်တိမ်းရန်ကြိုးစားလိုက်သော်ငြားအချိန်မမီတော့ပါချေ။ ကျိုးကျစ်ရှူးက သူ့လက်ထဲတွင်အုပ်ကိုင်ထားသော ကျောက်ခဲလေးကို နောက်ဆုံး၌ပစ်လွှတ်လိုက်လေသည်။ ကျောက်တုံးမှာ မြားဦးတည့်တည့်သို့ထိမှန်သွားပြီး မြားသည် မိန်းမပျိုလေး၏ နားထင်နားမှ အန္တရာယ်ကြီးစွာဖြင့်ပွတ်ကာသီကာဖြတ်သန်းသွားလေသည်။
