ليالي ... الوجه الآخر للعاشق

٤٣

أخذت ليالي تنهيدة طويلة ثم بدأت تروي كامل قصتها منذ البداية حتى الآن وأخذها موجة بكاء وهي تتحدث
كانت جميلة تحملق في وجهها بذهول حتى هتفت بأعتراض:-
-وليه هربتي ! , ماكنش لازم تهربي بالعكس ,كنتي توقفي قصاده لحد ما تبان الحقيقة ,انتي كده خليتيه يتأكد أنك غلطانة ومتهمة
-نظرت ليالي لها بقوة وقالت بعصبية :-
-لو انا لوحدي كنت عملت كدا ,لكن آدم خلاني مرعوبة , لو عرف عمر أن آدم مش ابني هياخده مني ومش هشوفه تاني ,انا ما اقدرش أعيش من غيره 
نهضت جميلة وقالت بحدة:-
-ده كلام اللي اسمه تامر مش كلامك , لأ اللي عملتيه غلط ,واقدر اشك في تامر ده دلوقتي ,لو كان فعلًا همه يساعدك كان حاول يظهر الحقيقة ويقف معاكي مش يقولك اهربي ! , هو تامر عارف أن عمر بيحبك؟
أجابت ليالي بتفكير :-
-من طريقة كلامه حسيت أنه عارف , بس اللي حصل معاه زمان شبه اللي حصل معايا شوية فممكن عشان كدا حب يحذرني ,انا مش بدافع عنه بس مش شايفة سبب تاني يخليه يأذيني !
تحركت جميلة في الغرفة ذهابًا وايابًا وهي تفكر بعمق ثم قالت بشك :-
-طب ما يمكن مش عايز يأذيكي أنتي !, مش عارفة بس اللي انا شيفاه انه لو فعلًا عايز يساعدك ماكنش خلاكي تهربي ,اما خالي محمد فانا أقدر افهم ضعف موقفه ,ده راجل غلبان بيجري على اكل عيشه , المهم دلوقتي لازم نشوف موضوع العملية ده أهم من أي شيء ,وماتقلقيش انا مش هسيبك والحمد لله انك في مرحلة لحد دلوقتي ماتعتبرش خطيرة
نظرت ليالي للباب بخوف وقالت :- انا مش عايزة أواجه عمر غير بعد ما أعمل عملية , عايزة أحس اني قوية وانا واقفة قدامه ,مش عايزة استخدم مرضي عشان اصعب عليه,اللي شوفته ده اكيد من طرفه لأني شوفته مع هشام قبل كدا
اجابت جميلة سريعا :-
-طب بصي انتي ما تطلعيش خالص من البيت وانا هروح لدكتور كمال في المستوصف وهحاول اتواصل مع الدكتور اللي بيتابع حالتك وهنوصل لحل أن شاء الله
*********************************************
"في دوار الحج محمود"
رفعت نعمة سماعة الهاتف الأرضي واتصلت على رقم أخاها الأكبر الذي يتولى عمودية البلد بعد وفاة والده وكان هذا الشقيق يهابه الجميع لكثرة شره واستبداده ,اجابها بعد دقيقة :-
-ايوة يا نعمة ,عاملة ايه ؟
تظاهرة بالحزن والدوع الكاذبة وقالت :-
-الحقيني ياخويا ,حسين جوزي بيفكر يتجوز عليا من بت جاية بقالها اكتر من شهرين ونص على البلد
أجاب صابر بنرفزة وبصوت خشن :-
-أنتي مش هتعقلي بقى يا نعمة ,كل شوية تطلعيلك بموال كدا !
بكت نعمة أكثر وقالت :-
-يعني ده جزاتي أني بستنجد بيك ياخوي ,كتر خيرك يا كبير البلد ,بس هتبقى وحشة في حقك أن أخت العمدة يبقى جوزها متجوزة عليا ومذلولة كدا و...
قاطعها بغضب وقال :-
-طب هي مين وقاعدة فين ؟
ابتسمت نعمة وأخبرته بالتفاصيل
***********************************************
بعد ذلك بايام كثيرة قد راقب فيها صابر دخول وخروج ليالي مع جميلة أثناء الليل للبيات في منزل الحاج محمود
أتصل على شقيقته وقال:-
-بقولك ايه يا نعمة تعرفي تقولي لحماكي أني جاي اقعد معاه شوية
تعجبت نعمة من الآمر وقال بتساؤل :-
-ليه يا صابر ؟
أجاب صابر بضحكة ساخرة :-
-أخوكي نوى يتجوز يا نعمة ,وعشان ما تحتاريش هتجوز المصراوية اللي عندكوا ,بصراحة الصبية تستاهل
تفاجئت نعمة من الخبر ولم تشعر بفرحة أو بضيق....قالت :-
-طب والواد اللي معاها ؟ انا كل اللي عرفته أن ابو الواد مات , وابويا الحج محمود ما اظنش انه هيوافق ده انت وهو زي الاعداء
رد صابر بدون جدال :- مالكيش دعوة انا هخليه يوافق غصب عنه وانتي كمان ترتاحي منها
*********************************************
هدر صوته بشكل شرس في أرجاء القصر وتوجس الرجل الذي يقف أمامه ..قال غمر بعنف :-
-اربع شهور وانتوا بدورو عليها ومش عارفين تلاقوها ,طقم الحرس كله يتغير وفي خلال اسبوعين بالكتير لازم تكون عندي هنا
أجاب رئيس الحرس بريبة وقال :-
-اوامرك يا عمر بيه
كان تنفسه يعلوا ويهبط عندما وضعت يد على كتفه فجاة ,أستدار عمر ليتفاجئ بصديقه القديم "باسم"
ضمه باسم بقوة وقال بحزن :-
-البقاء لله يا عمر ,والله ما عرفت غير من شوية لما روحت الشركة عشان أشوفك واقعد معاك
تقبل عمر العزاء منه ولاحظ باسم تغيره بشكل ملحوظ ..قال :-
-انا شايفك واحد تاني , يبقى اللي قالتهولي آنسة ريهام صح
ضيق عمر عينيه وقال بغضب :- هنتقم منها ياباسم ومش هسيبها تهرب مني أكتر من كدا
رد باسم بقوة وقال :-
-اللي عرفته أه هشام مات بجرعة مخدرات زايدة يا عمر ,هي ذنبها ايه ؟! أنا لو مكانك هسمعها الآول وهدور على الحقيقة وبعدين اقرر انتقم ولا لأ, بس أنت الغضب عاميك ,وممكن تندم بعد كدا
صاح عمر بالم :-
-حقيقة ! ,الحقيقة اني كنت مغفل لوقت كبير أوووي ,كان قدامي حاجات كتير تخليني اشك فيها ومع ذلك فضلت اثق ,الحقيقة أنها كانت تعرف أخويا ومتجوزاه عرفي وحامل منه كمان من قبل حتى ما تعرفني
وتابع بحزن عميق :-    
-انت ما شوفتك لما كانت بتتعب واجيب سيرة دكتور كانت تبقى عاملة ازاي ,عشان الحقيقة اللي بتتكلم عنها دي ما تتكشفش, ما شوفتش لما شافت هشام اول مرة في الشركة كانت عاملة ازاي , الحقيقة انها كانت بتلعب عليا انا واخويا , لو هي بريئة ماكنتش هربت
أخرج عمر أوراق من جيبه واشار بهم لباسم :-
-الحقيقة انها ولدت قبل موت هشام بأيام وهشام هو اللي دفع تكاليف المستشفى وادي الورق لو مش مصدقني
فحص باسم الاوراق ليشعر بالحيرة بعد ذلك ولم يعرف بماذا يجيبه