ليالي ... الوجه الآخر للعاشق

٢٩

نهضت ليالي مصدومة وهي تنظر للأوراق ولم تستطع اكمال قرائتها حيث أخذتها يد أخرى بغضب .....
أخذ هشام هذه الأوراق ونظر لريهام بحدة مما جعلها تستعل غيظا أكثر وقالت :-
_ لازم تستقيل يا هشام وإلا هقول كل حاجة بخصوصك أنت وليالي وأظن أنت فهمني

هتفت ليالي بغضب ودافعت عن نفسها لأمر هي تجهله إلى الآن :-
_ انتي بتتكلمي كدا على مين !! ، وايه اللي بخصوصي انا واستاذ هشام !! انا مش فاهمة حاجة !

التفت هشام لليالي وقال بهدوء :-
_ مافيش حاجة هي بس ريهام متعصبة شوية ، سبينا لوحدنا شوية بعد أذنك يا ليالي
اعترضت ليالي وصرخت ريهام به مجددًا :-
_ مش هتطلع غير لما تمضي على الاستقالة ،وغير كدا مش هسكت يا هشام مهما قولتلي
ضيق هشام عينيه بعصبية ثم قال محذرا :-
_ انا ما بحبش التهديد يا ريهام وانتي عارفاني ، نتكلم بالعقل ولا اتصرف انا بمزاجي ؟

زفرت ريهام بغضب ونظرت بعيدا عنهم حتى التفت هشام إلى ليالي مرة أخرى وقال :-
_ اطلعي انتي دلوقتي ياليالي ،وانا هشوف الموضوع ده وهقولك ما تقلقيش

نظرت ليالي لريهام بكره ثم خرجت من غرفة الكافيتريا وانتظرت بالخارج تفكر في اشياء كثيرة ونالت منها الحيرة بقسوة حتى ظنت أن تهديد ريهام خلفه المشهد الذي حضرته ريهام لأول لقاء بها مع هشام وتهددها بسبب الصفعة .....
غضبت أكثر لأن هذا ليس سبب لتهديد الصريح هذا ثم قالت بغضب :-
_ انا ما عملتش حاجة غلط عشان اخاف منها ،وهشام بنفسه أعترف انه هو اللي غلطان ، لو بتهددني عشان ماتقولش لعمر على القلم تقوله ، واللي يحصل يحصل انا ما اجرمتش يعني !!

**************************

وضع هشام الورقة على الطاولة الخشبية وأغلق الباب ثم عاد لها من جديد ..وبدت نبرة صوته لا تستعدي أي مراوغة منها
_ هو ايه بقى اللي بخصوصي أنا وليالي عايز افهم ، لو قصدك على القلم تبقي عبيطة يا ريهام لأن مش سبب يخلي عمر يطرد ليالي خصوصا إنه عارف اني ساعات ببقى متهور

التفتت له ريهام بحدة وقالت بأنفعال :-
_ انا مش عبيطة يا هشام ،ومش بتكلم على الموقف ده ، انا عارفة كل حاجة بينك وبينها وعارفة انها حامل منك

ضيق عينيه بصدمة وحاول أن يستوعب ما قالته ريهام للتو ثم قال :-
_ حامل مني !!! ، مين اللي قالك كدا ؟!

أجابت ريهام بغضب :-
_ اليوم اللي مات فيه عم جمال ، انا سمعت كلامكوا كله وعرفت إن بنته حامل منك وهو عرف وكان هيعملك مشكلة ،ولولا إني شوفت إنه وقع السلم بالصدفة كنت قولت لعمر فورا لكن ما حبيتش اسبب مشكلة وقولت يمكن تحل الموضوع معاها من غير فضايح لكن إنها تبعد عمر عني عشان توقعه يبقى مش هسكتلها وهفضحها

مرر هشام يده على ذقنه بمكر ثم نظر لها بابتسامة خبيثة وقال :-
_يرضيكي تفضحي خطيبتي يا ريهام ؟