ليالي ... الوجه الآخر للعاشق

٣٤

اتسعت عين فريدة بذعر وهتفت وهي تشير بيدها بشكل معترض :-
_ لأ ،مستحيل تبعد عن أخوك يا عمر ،ده انا اللي مطمني إنك جانبه ومعاه وهتحميه من تهوره وطيشه ، آخر كلام البنت دي مستحيل تبقى لحد في ولادي ،منها لله زي ما فرقتكوا كدا

نظر لوالدته بنظرة معذبة وقال  بألم :-
_ هشام عارف إني بحبها ومع ذلك ما فرقش معاه ، في حاجات كتير لازم توضح بس اللي موقفني إن حالته ما تسمحش للجدال والنقاش دلوقتي ، انا مستني لما يخرج ولازم نتكلم

تمعنت فريده به بشك وتساءلت :-
_ هي ليها دخل في اللي حصل لهشام ..صح ؟ انا ما دخلش عليا كلامه وانه وقع !!
تنفس عمر بصعوبة وقال موضحاً :-
_ صدقيني يا أمي انا مابقتش عارف من الكداب ومين الصادق بس زي  ما قولتلك ،اللي موقفني اني اتكلم معاه هي حالته ، لكن أول ما يجي هنا لازم أعرف منه اللي حصل بالضبط

********************************

زادت حدة الصداع برأس ليالي حتى أنها كانت تتململ أثناء نومها بشكل مضطرب ، لم يتيح لها هذا الألم فرصة الغفوة ،أعتدلت في فراشها بعيون ذابلة من التعب ثم نهضت لتبحث عن الدواء وتأخذ جرعة زائدة علها تجعل هذا الألم يقل .....
وجدته بعد دقائق من البحث بحقيبتها وتناولته مع رشفة بسيطة من كوب الماء على الكمود بجانب الفراش ....
دلفت أمل فجأة بوجه قلق وقد ظهر بروز بطنها بشكل يجعل من يراها يشك بالآمر ..قالت :-
_ ليالي ، انا حاسة إني تعبانة أوووي وكأني هولد

شعرت ليالي بغصة مريرة من هذه الجملة وقالت بتساءل :-
_ لأ ، انتي قولتيلي إنك داخلة على السادس بعد كام يوم ، الحمد لله إن محدش شافك الفترة اللي فاتت عشان ما يشكوش فينا

جلست أمل بتعب شديد وجهها شاحب كالاموات ..قالت :-
_ كنت بدارى ومش بفتح لحد الباب ، وعم محمد ومراته مشغولين في فرح بنتهم ،يمكن ده من حسن حظي عشان ما يكتشفوش حاجة

جلست بجانبها ليالي وربتت على كتفها بحنان وقالت :-
_ كل شيء هيبقى كويس بأذن الله ،ما تقلقيش ، انا مش هلومك تاني يا أمل عشان حسيت إنك ندمانه بجد والاحساس ده كفاية عليكي

أخذت أمل تنهيدة طويلة وتلعثمت وهي تتحدث ببكاء :-
_ لو بس الوقت يرجع بيا كام شهر ،عمري ما كنت هعمل كدا لو هموت ،  نفسي ربنا يسامحني على اللي عملته .....يارب
وتهدج صوتها من البكاء وضمتها ليالي بقوة وقالت :-
_ طالما ندمانة هيسامحك ، وانا بدعيلك ليل نهار عشان يسامحك

وطرق الصداع رأس ليالي بقوة حتى وضعت يدها على رأسها وقطبت حاجبيها بألم ، لاحظت أمل ذلك وسألتها بخوف :-
_ الصداع بردو ؟  لازم تروحي للدكتور تاني

اجابت ليالي بضيق :-
_ روحتله من كام يوم لقيته مسافر مؤتمر وهيجي لسه بكرا
قالت أمل بقوة :-
_ يبقى روحيله بكرا وشوفي موضوع العملية يمكن يقول قريب
نظرت ليالي لوجه أمل القلق وقالت تطمئنها :-
_ ما تقلقيش ، اللي ربنا عايزه هيكون