ليالي ... الوجه الآخر للعاشق

٩

احست ليالي بالقلق واضافت :-
_ يا ساتر يارب  هو مؤذي أووي كدا !! ،وبعدين ما تقلقيش انا اصلا مابحبش الاختلاط مانتي عارفة

تحدثت هبة وهي تنظر حولها والقت نظرة على العاملين حتى اشارت لليالي على أحد الاركان التي يتوسطها طاولة خشبية كبيرة ويلتف عليها عدد من الفتايات التي يستعدون لبدء العمل وقالت :-
_ماتخافيش من حاجة ..بصي المكان اللي هناك ده هو اللي هتشتغلي فيه وانا وصيت البنات عليكي بس حذري منهم دول شياطين ....

بلعت ليالي ريقها بقلق ثم أخذتها هبة للمكان عندما لاحظت توترها وقالت للفتايات:-
_ صباح الخير يا بنات ..دي ليالي اللي قولتلكم عليها ..خلي بالكوا منها وعلموها براحة دي أول مرة تشتغل

القوا الفتايات عليها تحية الصباح ثم ضحكت فتاة من بينهم تدعى سمر وقالت
_ تعالي يا ليالي انا اللي هفهمك الشغل
ابتسمت هبة لليالي ثم تركتها وذهبت إلى عملها على أحدى ماكينات الخياطة في مكان بعيد عن مكان ليالي

بدأت سمر الحديث وقالت :-
_ انتي هتشطبي وهقولك تعملي إيه بالضبط

************************

في مقر الشركة .....
عدى على وصوله حوالي نصف ساعة ولكن لم يجمع تركيزه بعد
،،لهفته لرؤيتها الآن تحيره وتفتت تركيزه .....
دخل تامر وبيده بعض الاوراق وقال:-
_ دي أوراق محتاجة توقيعك يا عمر

وضعها أمامه على المكتب وأخذ عمر قلم ووقع عليها سريعاً ،تردد تامر في السؤال ولكن تحدث بمكر
_ هي البنت بتاعت امبارح كانت عايزة إيه يا عمر ؟؟

رمقه عمر بحدة وقال:-
_ ليه ؟؟
توتر تامر وقال بمراوغة :-
_ لا بسأل بس ،،افتكرت يعني إن مش عاجبها المكافأة ولا حاجة عشان كدا جت تاني يوم !!

تنهد عمر وقال بضيق وحيرة :-
_ هي فعلا مش عاجبها المكافأة
نظر تامر بدهشة وقال:-
_ دي طماعة أوووي ،هي كانت عايزة أكتر من كدا !!!

حدق به عمر بغضب وقال محذرا:-
_ لأخر مرة يا تامر بحذر تجيب سيرتها بالطريقة دي ،وانت عارف إني مابديش إلا فرصة واحدة

حرك تامر رأسه بموافقة ولكن نظرته حاقدة وأخذ الاوراق الموقعة ثم خرج من المكتب .......

رمى عمر القلم من يده بعصبية وزفر بحدة من احساسه بنفورها من جهته ووخزه هذا الاحساس بشيء خانق جعل تقطيبة تظهر على وجهه....التقط هاتفه حتى يتصل بهاتفهم الارضي ولكن وضع الهاتف وقال بضيق :-
_  لأ مش هتصل ،ادام هي عايزة كدا !!

************************

اتصل تامر على هاتف هشام كي يخبره آخر الأخبار
اجابه هشام بعد أن ايقظه اهتزاز الهاتف
_ ايوة يا تامر ... ها في جديد
ردّ تامر وهو يراقب باب مكتبه :-
_ اه في ، البنت جت عشان تطلب فلوس اكتر من اللي اديهالهم عمر ..المكافأة مش عجباها يا سيدي 😏