Polaris (Published under IndiePop)

Kabanata 6: Captain Warrior

Wala pang isang oras akong nagsusulat ay biglang tumawag si Cooper. "Xiang, tignan mo 'yong post ni Liam."

Habang kausap ko siya sa phone ay binuksan ko ang laptop ko at nag log-in ako sa facebook ko. Gamit ko ang dummy account ko dahil naka-block na ako sa account ni Liam.

Liam Anderson:
Hindi ko naman talaga minahal ang ex-girlfriend ko dahil isa lang 'yong pustahan. Natuwa lang ako sa kanya kaya umabot kami ng taon pero never ko siyang minahal. Kay Tyra lang ako nagkaganito.

Kusang tumulo ang mga luha sa mga mata ko. Sabi ko sa sarili ko, naka move-on na ako pero hindi pa rin pala. Sobrang sakit ng mga sinabi niya. Sa loob ng isang taon, minahal ko siya nang sobra at lahat binigay ko sa kanya pero bakit gano'n? Kulang pa rin pala.

Kahit pala mahalin mo silang nang sobra, hindi 'yon magiging assurance na hindi ka na nila sasaktan, na mamahalin ka rin nila.

"Xiang, umiiyak ka ba?" Tanong ni Cooper. Hindi ako nagsasalita dahil mas lalo niyang mahahalata na umiiyak nga ako, "T*ngina talaga ng lalaki na 'yan! Makakatikim siya sa akin! Bubugbugin ko siya hanggang sa mabasag 'yong mukha niya."

"Cooper, h'wag na please lang," pagmamakaawa ko. Ayokong mag-aksaya pa ng oras si Cooper sa walang kwentang tao na 'yon. "Pabayaan na natin, please. Ayoko nang magkaroon pa tayo ng uganyan sa kanya kaya pabayaan mo na."

Napabuntong hininga siya. "Sige, papabayaan ko na pero sa oras na ulitin pa niya 'to, babasagin ko na talaga 'yong mukha niya. Pasensya na kung nasabi ko pa, gusto ko lang maging aware ka sa mga pinagsasabi no'n."

Kinagat ko ang labi ko para kahit papaano tumigil na ako sa pag-iyak, "Wala 'yon. Maganda at nalaman ko 'to. Salamat Cooper."

"Gusto mo bang magkita tayo?"

"Nagsusulat ako ngayon, bukas na lang siguro. Sige na, kailangan ko nang bumalik sa sinusulat ko."

Binaba ko agad ang phone at doon ako umiyak nang sobra.

Parang isa-isang tinutusok ang puso ko. Sobrang sakit. Mas masakit pang malaman na kahit kailan hindi niya ako minahal kaysa malaman na may iba na siyang mahal.

"Gago ka talaga, Liam. Sobrang gago mo pero sobrang tanga ko rin kasi pagkatapos ng lahat, mahal pa rin kita."

Pinatong ko ang ulo ko sa mga tuhod ko at doon ako umiyak hanggang sa maubos ang mga luha ko.

Nawala na ako sa pagsusulat ko. Gusto ko na lang munang makatulog pero sa sakit na nararamdaman ko ngayon, hindi ko magawa.

Nagpasya na lang ako na lumabas ng bahay para bumili ng alak sa tindahan malapit sa amin.

Hindi naman talaga ako umiinom. Isang beses pa lang at kasama ko no'n si Cooper at Fashia. Uminom kami pagkatapos namin maghiwalay ni Liam dahil nahuli ko sila ni Tyra na magkahalikan.

Ang sakit no'n pero mas masakit ngayon.

"Ate, isang bote nga ng matador tapos samahan mo na ng juice."

"Iinom ka Serenity?" Tanong ni aling Nena. "Anong problema mo? Hindi ka naman umiinom ha?"

"Problemang pag-ibig po," sagot ko. "Ngayon lang 'to, aling Nena. Pangpabawas ng sakit."

"Sa t'yan ang ditetso ha, h'wag sa ulo."

Nginitian ko na lang siya at kinuha ang mga pinamili ko. Bahala na si batman kung anong mangyari basta gusto kong magpakalasing para mabawasan 'tong nararamdaman ko. Dati nang malasing ako, medyo nawala ang sakit. Bumalik din siya pagkatapos ng isang araw pero medyo nabawasan na.

Alam ko patay ako nito kay auntie pero bahala na siya. Siya kaya ang ma-broken hearted nang ganito?

Pagdating ko sa bahay, nag-lock ako sa kwarto ko at nagsimulang uminom. Hindi ko na inaya si Cooper dahil may pasok siya bukas.