တခေတ်မင်းသည် မိခင်ဖြစ်သူအား ရေချိုးဦးမည်ဟုပြောခဲ့ပြီးအပေါ်ထပ်သို့ရောက်သောအခါ lagged ကိုပစ်ချလိုက်ပြီး ကုတင်ခြေရင်း၌ ထိုင်ချလိုက်လေသည်။
“ ဟူး....”
သူ ဒီရက်ပိုင်းအတွင်းသက်ပြင်းတွေချနေရတာများနေပြီ။ဒီကောင်လေး မိုးနှောင်းယာ သည်ဘယ်လိုလူမျိုး ၊ဘယ်လိုပုံစံလေး ဆိုတာခုထိ မခန့်မှန်းနိုင်ပေ။
တစ်ခါတစ်လေ ကလေးဆန်သွားပြန်သည်။တစ်ခါတစ်လေ ကျတော့ သူ့ထက်ပင်ရင့်ကျက်နေသေးသည်။
*ဒါနဲ့ နေပါဦး။ သူကရော ဘာလို့ မိုးနှောင်းယာအကြောင်းကိုစဉ်းစားပြီး စိတ်ရှုပ်ခံနေရတာလဲ။မိုးနှောင်းယာ က သူ့အတွက် လူနာ၊ ဒီ့ထက်ပိုရင်းနှီးရလျှင် ညီငယ်လေးတစ်ယောက်။ ဒါကို သူက ဘာတွေ ထပ်ပြီး မျှော်လင့်နေမိပါလိမ့်။*
တခေတ်မင်းသည် ခေါင်းခါလိုက်ကာ ကုတင်ခြေရင်းမှ ထလိုက်ပြီး ရေချိုးခန်းတွင်းသို့ဝင်ခဲ့လေသည်။ရေချိုးခန်းထဲမှ ရေပန်းအောက်ရောက်သောအခါတွင် ရှုပ်နေသော စိတ်နှင့် ကိုက်ခဲနေသော ခေါင်းက ရေနဲ့ထိလိုက်ရသောကြောင့် လန်းဆန်းလာရသည်။
ရေချိုးပြီး အိမ်နေရင်း ရှပ်အင်္ကျီ လေးနှင့်ပုဆိုးလေးဝတ်ကာ အောက်ထပ်သို့ဆင်းလာခဲ့သည်။
“ ဟော, သားခေတ် ၊ ရေချိုးပြီးပြီပေါ့ ၊ ဒီမှာ မေမေက မင်း တူတော်မောင်လိုဘာချက်ကျွေးမှန်းမသိပေမဲ့ ၊သား ငယ်ငယ်က ကြိုက်တဲ့ ငါးရံ့အူဟင်း လေး ချက်ထားပေးတယ် မဆလာ နိုင်နိုင်လေးနဲ့ ”
ဟုတ်ပါသည်။ မေမေ့လက်ရာ ငါးရံ့အူဟင်းသည် ဒီလောကတွင်တော့ အကောင်းဆုံးဖြစ်သည်။သူ မေမေ့လက်ရာကို အရမ်းကြိုက်သည်။အထူးသဖြင့်ငါးရံ့အူဟင်းပင်။
တခေတ်မင်းသည် ဒီနေ့တော့ခေါင်းမဖော်နိုင်အောင်စားလိုက်တော့သည်။
ထမင်းစားလို့ပြီးသောအခါ မေမေက သူ့ရှေ့သို့ သစ်သီးပန်းကန်လေး လာချပေးသည်။ဒါသည် သူကျောင်းသား ဘဝထဲက မေမေလုပ်ပေးနေကျအရာပင်။ ပန်းသီးလေးတွေ စိတ်ပြီး ပန်းကန်မှာ ပုံဖော်ထားသည်ကို တခေတ်မင်း အရမ်းသဘောကျသည်။
“ သားခေတ် ၊ သားအသက် ဒီနှစ်ဆို (၂၅) နှစ်ထဲရောက်ပြီနော် ”
ရုတ်တရက် မေမေက အသက်ကိုပြော၍ စကားစလာသောကြောင့် သစ်သီးစားနေရာမှ တခေတ်မင်း ခေါင်းမော့လာရသည်။ ပြီးနောက် မေမေ့ထံမှ ဆက်ပြောလာမည့်စကားကို နားစွင့်နေလိုက်သည်။
YOU ARE READING
မိုးနှောင်းတစ်ရာ (Ongoing)
Romanceမိုးနှောင်းတစ်ရာ စံအိမ်ကြီးမှ ကြိုဆိုပါတယ်... သင့်ဘဝရဲ့ ပျော်ရွှင်ခြင်း၊ ဝမ်းနည်းခြင်း၊ပူဆွေးခြင်း ၊ချစ်ခြင်း၊မုန်းခြင်း တွေ နဲ့ ဒီစံအိမ်ကြီးထဲက တစ်စုံတစ်ခုအတွက် လဲလှယ်နိုင်မလား ... စံအိမ်ကြီးထဲက တစ်စုံတစ်ခုကို သိချင်ရင်တော့ ကိုယ်တိုင် ဝင်လာခဲ့ပါ...
