راشيت

الفصل الأول: الاختبار

الجزء 40

طه: حمدي الله نتي بنت كوراه مرمدتك فالأرض هنا نيت

كوثر ضرها فيديها محملاتش راسها

كوثر بالغوات: حيد يديك عليا الحيوان

طه زاد صدماتو ملي عيراتو دفعها جات مزدوحة على الأرض كلشي بدا تيضحك.. كوثر ناضت و تتشوف كلشي هكاك تيشيرو ليها بصباعهم و تيضحكو.. هاد الأجواء فكروها فاش رجعات لدار والديها باش تجمع حوايجها كلشي كان تينعت فيها ب"منحوسة" حسات بواحد الاحساس فشكل ماشي تعصبات لا هاد الاحساس فات الاعصاب.. ولا تيبان ليها غير طه بوحدو لي كاين مكاين تاشي حد آخر و الا بقات جامدة غتفرگع تنفس ديالها بدا تينقص و عقلها تتحس بيه تيزدح شوية و يحرج من بلاصتو.. من بعد مبقات تتحس بوالو فقدات الشعور سدات عينيها مزيرة عليهم..

غير حلات عينيهم كان كلشي تيجري قدامها مفهمات والو طه كان منشور فالأرض على كرشو فاقد الوعي حدا رجليها فوق ظهرو كرسي مهرس واحد البنت تتنخض فيها.. و كلشي مخلوع.. جات رحمة لعندهم

رحمة: شنو واقع هنايا؟؟
دري 1: غير طه بغا يدير لينا واحد اللقطة من المسلسل ساعة معرفتش شنو وقع ليه

كلشي سكت واحد لبنت ضغية بعدات الكرسي لي مهرس من فوق ظهرو و غطاو على شنو وقع.. كوثر باقي مصدومة معارفاش حتى شنو وقع.. تواحد مبغا يقول شي حاجة خايفين يتعاقبو هاد المرة.. رحمة قربات و هو يبان ليها طايح وحداه واحد الكرسي تخلعات حولات تفيقو لكن كان فاقد الشعور..

رحمة: شنو دار فراسو يكما حاول ينتاحر مسكين؟؟
دري 2: لا ماشي هكاك غير واحد اللقطة و هو كان جالس فالكرسي بغا يورينا كيفاش يفك راسو الا كان مكتف و خاطفينو زعما هاديك اللقطة.. ولكن كيفما تتشوفي هرس الكرسي
رحمة تيقاتهم: و أش شداكم لشي مسلسلات گاع.. ولدي واش تتسمعني؟ جاوب لله يرضي عليك متخلعنيش.. جيبو ليها كاس ديال لما

مشاو جابوه دوراتو على ظهرو تتحاول تفيقو.. خدات لما خواتو على وجهو والو مفاقش.. جات عندهم الممرضة حيت ملي وقع مشاو عيطو عليها

رحمة: شوفي أ بنتي مالو لله يرضي عليك
الممرضة: جيبو شي خشبة باش تهزوه

جابوها حطوها فالأرض

الممرضة: حسبو حتال تلات و هزوه دقة وحدة صافي

حركو راسهم بآه مقالوش ليها بلي أصلا رحمة دوراتو لعندها.. دارو داكشي لي قالت ليهم و داوه المستوصف ديال الميتم باش يعالجوه..
أما كوثر فبقات فبلاصتها مصدومة معارفاش شنو وقع تتشوف كلشي تيدوز قدام عينيها و هي رافضة تيق شنو وقع.. شوية بشوية تيطيحو تصاور بين عينيها على شنو وقع زعما شنو دارت