رواية مهلكتي

الجزء_التانى (الحلقه التاسعه ) ( إسكارف موف ) ❤ ❤

#رواية_مهلكتى_الجزء_التانى
(الحلقه التاسعه ) ( إسكارف موف ) ❤ ❤
................
ف الحلقه السابقه :_
( بعد ساعه ف المستشفى )
لمياء : لو سمحتى فين اوضة الاستاذ احمد اللى جه من ساعة كده
الممرضه : اه اللى وقع عليه حديد
لمياء : اه هو
الممرضه : اوضة 105 اتفضلى هو لوحده
............... ( التاسعه ) ❤
لمياء : صباح الخييييييييير
احمد : صباح النور
لمياء : الف الف سلامه عليك انا اتخضيت عليك جدا والله
احمد : الله يسلمك ... ربنا ما يكتبلك تتخضى على غالى يارب .. مين حضرتك بقي
لمياء : ازاى مش فاكرنى وانت مهزأنى وشاتمنى
احمد : هههههههههههه بجد مين ؟
لمياء : هههههههههههه والله بتكلم بجد .. مش فاكر اول يوم ف الدراسه خالص لما كنت هخبط صاحبك بعربيه وانت الحمد لله زقيته وشديته
احمد : اهاااااااااااا هو انتى ؟
لمياء : اه شوفت بقي هههههههه
احمد : احححم طيب معلش على طولة لسانى ساعتها بس كنت متنرفز ساعتها ولو كنت طولتك كنت خلصت عليك ههههههههههه
لمياء : هههههههه ولا يهمك انا مقدره والله وحقك
احمد : متشكر جدا . بس انتى ايه اللى عرًفك انى هنا ووصلتيلى ازاى
لمياء : لا ده حوار طويل هبقى احكيهولك اكيد .. ولا مش عاوز نبقى اصحاب
احمد : يا خبر ابيض .. هو احنا نطول يا باشا
لمياء : طيب ع العموم انا اسمى لمياء بنت دكتور سعد عميد صيدله .. ف سنه أولى طب لسا
احمد : اهلا بيك .. عرفتى اسمى طيب ولا محتاجه اقوله ؟ ههههههههههههه
لمياء : اسمك احمد وف تجاره ههههههههههههه عرفت بالصدفه ها
احمد : هههههههههههههه طيب . انا مش عارف اقولك ايه ع الزياره الجميله دى والله
لمياء : طب طمنى عنك ؟ حصل ايه وايه الاخبار
احمد : الحمد لله هو دراعى بس .. وقع عليا شوية حديد . بس تقدرى تقولى كده اتكتبلى عمر جديد
لمياء : الف سلامه عليك يارب ... طب واصحابك فين . الشله بتاعتك ... ده اللى بلغنى الخبر قالى ان الشله بتاعتك كلها جريوا عليك لما عرفوا
احمد : كانو هنا ولسا ماشيين .. جايين تانى شويه كده ... ( بيفتكر ان سلمى جايه ) احييييييه
لمياء : سورى ؟
احمد : لا لا مافيش حاجه ...
لمياء : طب ممكن رقم تليفونك بقي . عشان فيه واحده صاحبتك عملت فيا فصل مش جنتل على فكره واديتلى رقم غير رقمك وكانت زعلانه كده
احمد : عينيها مخضره كده ؟
لمياء : تقريبا
احمد : وبيضا ماشاء الله ومزه وطويله شويه
لمياء : بالظبط
احمد : وعندها غمازتين صح ؟
لمياء : ايووووه هى دى
احمد : الهى ربنا يكرمك دنيا واخره قولى أمين
لمياء : امين يارب ....هات رقمك بقي
احمد : مش حافظ الرقم للاسف . التليفون فين التليفون فين صحيح شكل العيال خدته بالغلط وهما خارجين
لمياء : مش هو ده ؟ ع الترابيزه اللى جنبك اهو ( بتاخد التليفون وبترن على نفسها )
تمام يا ابو حميد انا سيفت الرقم عندى
اتمنى انى ماكونش مضايقاك ولا حاجه ؟
احمد : لا ابدا بالعكس ماتقوليش كده احنا زمايل جامعه واحده
( الباب بيخبط )
احمد : لله الامر من قبل ومن بعد
مصطفى : اهلا وسهلا ... صباح الخير
لمياء : اهلاا مش انت بردو اللى كنت واقف مع الشله الصبح ؟
مصطفى : اه مش انتى اللى كنتى هتخبطى مالك ؟
لمياء : اه ههههههههههههه بقيت مشهوره خلاص ؟
احمد : ايه يا مصطفى كنت فين ؟
مصطفى : مافيش . كنت مع العيال تحت بنشيش قولت اطلع اشوفك لو عاوز حاجه ؟
احمد : ماتحرمش يا غالي .. دى لمياء بنت دكتور سعد عميد كليه صيدله
مصطفى : اه ماحنا اتعرفنا الصبح . ماشاء الله يا لمياء زى القمر
لمياء : متشكره جدا . انتو اللى شله زى العسل . انا كنت جايه اعمل الوااجب لانى اتخضيت والله لما عرفت
احمد : ( بيغمز لمصطفى عشان يقرب منه )
مصطفى : ( بيلمح احمد وبيهز راسه معناها انه فاهم انه مش عاوز سلمى تيجى )
احمد : ربنا يسلمك يا لمياء يارب . انتى اللى زى السكر
مصطفى : طيب يا جماعه انا هستأذنكوا شويه بس بره هخلص حاجه كده
احمد : تسلملى يا غالي
..........
( ع القهوه قصاد المستشفى ف شارع جانبى )
مصطفى : همووووووووووووووووووووووووووووووووت والله العظيم همووووووووووووووووووووت
مالك : ايه مالك ياض
مصطفى : عارفين مين اللى فوق مع الواد احمد
على : مين ؟
مصطفى : البت اللى كانت هتخبطك يا مالك وكلمناها الصبح وسلمى كان عينيها بتطلع شرار بسببها واديتلها رقم غلط
مالك : احييه بتهزر البت المزه دى ؟
مصطفى : والله بجد هههههههههههههه واحمد يا عينى شكله مزنوق زنقة القطط وعاوز يوزعها قبل ما سلمى تيجى والبت لازقه مش عاوزه تتحرك
على : ههههههههههه بقولك ! رن على سلمى شوفها فين
مصطفى : على رأيك اهو نتطمن
على : تتطمن مين يابغل هههههههههههههههه انا عاوزها تيجى
مصطفى : ههههههههههههههههههههه يا قلبك يا أخى
مالك : ههههههههههههههههههههه على بيتكلم صح . رن عليها قولها احمد تعب تعالى بسرعه ههههههههههههههههههههههه بطنااااااااااااااااااااااااى داحنا ف الشر مابنتوصاش
حسن : ههههههههههههههههههه دانتو عيال رمم صحيح ... واد يا مصطفى
مصطفى : ههههههههههههههههههههه ايوه ياعم
حسن : رن على سلمى خليها تيجى ههههههههههههههههههه عاوزين نضحك شويه
مصطفى : ههههههههههههههههههه طب استنوا
الو !
سلمى : الو ايوه يا مصطفى
مصطفى : سلمى تعالى احمد فقد الوعى تانى . شكل كده الالم بيرد عليه وعاوزك جنبه
سلمى : انت بتقول ايه يا مصطفى ... طب اقفل اقفل انا جايه خلاص داخله عليكو
..
مصطفى : هههههههههههههههههههههه جايه ف السكه
مالك : ههههههههههههههه احيييييه ع الضحك
على : داحنا هنضحك من هنا لبكره
....
احمد : وانتى بقي اخبار كلية الطب معاكى ايه
لمياء : اهو ماشيه .. كنت شاطره انا طول عمرى الحمد لله
احمد : ماشاء الله . ناويه تتخصصي ف حاجه معينه ف دماغك ولا لسا مش دلوقتى وقت التفكير ف كده
لمياء : لا انا حاطه قدامى هدف انى هتخصص ف الجراحه
احمد : ان شاء الله .... ناولينى التليفون ده ثوانى لو سمحتى يا لمياء
لمياء : حاضر . اتفضل
احمد : الو !
مصطفى : الو ! ايه يا فنان
احمد : ايه الدنيا تمام عندكو ؟
مصطفى : عيييييييييييييييييب كله تمام قاعدين حراسه اهو
( مالك وعلى وحسن ومجدى بيضحكوا وكاتمين الضحك عشان احمد مايحسش )
احمد : مين اللى بيضحك عندك دول
مصطفى : لا مافيش داحنا ع القهوه اهو
احمد : اااااااه .. ماشى يا ريس خلى بالك بقي
...........
لمياء : بتبصيلى كده ليه ؟
احمد : ولا حاجه ! هطلب منك طلب ممكن ؟
.....................
( قدام المستشفى )
مصطفى : سلللللللللللمى سلللللللللللللللللمى استنى
سلمى : ايه يا مصطفى اللى مقعدكوا هنا مش بتقولوا تعب
مصطفى : لا الحمد لله رجع لطبيعته كانت الحقنه اللى اخدها بس مهبطًاه شويه ف نام وصحى
سلمى : طيب انا طالعاله . انتو جايين ولا ايه
مالك : اه طبعا وده مشهد يتفًوت ده ..
سلمى : مشهد ايه ؟
مالك : ولا حاجه . اتفضلى يلا احنا وراك
..............
( أوضة أحمد )
سلمى : حمووووو ! انت كويس يا بابا ؟
احمد : اه يا سوسو الحمد لله . جيتى بدرى يعنى ؟
سلمى : مصطفى خضنى قالى انك تعبت فجأه
احمد : يا حبيبى يا مصطفى
مصطفى : ( بيكتم الضحكه )
مالك : ( بيدور ف الاوضه هنا وهنا وهنا وحسن ومجدى كذلك )
احمد : ايه يا حبايبى بتدوروا على ايه يا روح قلبى انت وهو
حسن : لا ولا حاجه يا فنان .. هههههههههههههههههههههههههههه عليا النعمه فنان ابن فنان وقولتلهم مش هنقدر عليك
سلمى : انا مش فاهمه حاجه
احمد : لا ماتركزيش انتى .. دا حساب هيتصفى بينى وبين اصحابي حبايبى لما اخرج من هنا
مالك : طب عن اذنكو انا بقي يا شباب هروح اصلى الضهر ههههههههههههههههههههههه
احمد : روح صلى الضهر والعصر وادعى ربنا ينجدك من ايدى لما اقوملك ... وانت يا مصطفى ادعى انتى كمان ..
سلمى : يا جماعه ماتفهمونى انا مش فاهمه حاجه
احمد : سيبك منهم دول عيال رمم
سلمى : هههههههههههههه طيب قوم اتعدل يلا جايبه وجبتينى كنتاكى مشطشطين عارفاك بتموت ف الشطه
مالك : احححم طيب يا حبايبنا احنا تحت بقي هنقضى مشوار كده وراجعينلكو عشان نروحك البيت ياعم
احمد : ليه مانت قاعد تطفح
مالك : هههههههههه حبيبى يا كبير قلبك ابيض بقي
حسن : ههههههههههههه ساعه وهنيجى نروحك .. ماشى . الدكتور واحنا طالعين قال خلاص لو عاوزينه يخرج دلوقتى يخرج
احمد : ماشى ياعم حسن
سلمى : يلا انت وهو من غير مطرود عاوزه أكل الواد
احمد : عاوزه ايه يامه ! هو انا اتشليت منا هاكل
سلمى : ههههههههههههههه ابقى ورينى هتطلع الاكل ازاى وتفصص وتاكل .. محدش مأكلك غيرى والله اتطمن
.............
سلمى : قوم بقي اتعدل بلاش دلع العيال خرجت
احمد : ماهو ماينفعش بردو تأكلينى انتى
سلمى : ليه ان شاء الله
احمد : طيب ماجيبتيش سندويتشات ليه يابت انتى
سلمى : ههههههههههههههههههه والله كان قدامى السندويتشات بس مارضيتيش عاوزنى اضيع الفرصه دى من ايدى . انا بتلكك اصلا عشان أكلك
احمد : اساسا ماكانش له لازمه الاكل . انا شويه وهروح وهبقى اكل هناك .. وبعدين بكام الاكل ده ؟
سلمى : ( بتسيب الاكل وبتقوم من جنبه وبتاخد شنطتها عشان تمشى )
احمد : سلمى ! سلمى بطلى لعب عيال وتعالى رايحه فين
سلمى : ايه انت بتعمل كده ليه ؟ ايه اللى بكام ده ؟ هتحاسبنى يعنى ؟ خلاص لو كده حاسبنى على خضتى عليك وتعب اعصابي وانا جايه ف السكه .. انا كنت بموت يا احمد وانا جايه ف السكه من قلقى عليك . وبعد كل ده جاى تقولى بكام ؟
احمد : طب تعالى اقعدى
سلمى : قعدنا
احمد : بحب الوراك على فكره مش الصدور
سلمى : ههههههههههههههههه ماكان من الاول . لازم اتعصب عليك يعنى
احمد : تتعصبي على مين يا وليه ماتلمى لسانك بقي يابت
سلمى : هههههههههههههههه يا جزمه . افتح بؤك يلا
احمد : والنبى تأكلينى من غير كلام العيال ده افتح بؤك واقفل بؤك . ناقص تقوليلى هًم يا جمل كمان
سلمى : ههههههههههههههههههه يا احمد انت ابنى
والله العظيم ابنى وكل حاجه عندى ف الدنيا دى
بص !
عشان نبقى على نور من دلوقتى وماترجعش تعيط وتقول انى محذرتكش
عينك هتزوغ هنا ولا هنا هفقعهالك
اى واحده هتقرب من الدايره اللى انا هحددها هتبقى عدوتى
هزارك من اصحابك واصحابنا البنات يبقى من غير لمس
مافيش واحده فيهم سواء قريبه ولا غريبه تلمسك بايديها
ممنوع اللمس . كفايه اوى انى ساكته وحاطه جزمه ف بؤي وسايباهم يهزروا معاك
اعيد كلامى تانى ؟ ممنوع اللمس . فاهم يا بابا ولا لا
احمد : وانا مالى انا ! هو انا اللى هلمس ولا هما
سلمى : ماليش فيه
اه حاجه اخيره نسيتها معلش
انا ف الغيره مابعرفش امى
وعمرى ف حياتى حياتى كلها دى ما غيرت على حد ولا على حاجه غيرك
وممكن اعمل اى حاجه ف سبيل غيرتى حتى لو وصلت انى اسافر بلاد وبلاد
ولو ف يوم حسيت او شكيت للحظه ان فيه واحده بتقرب منك من بعيد يا سواد ليلتها وليلتك انت كمان
احمد : دى مصيبة ايه دى . سديتى نفسي الهى يسد نفسك . مش عاوز اكل
سلمى : كل يا بابا كل ( بتديله ورك ف بؤه )
احمد : مش طافح انا
سلمى : هههههههههههههههههه والله الاكل ده كله هيخلص . يلا ياعم
احمد : يا مصبر مين على مش عارف مين يارب
سلمى : هههههههههههههه قول المثل وماتخافش من حد
احمد : لا اخاف ... انتى مش شايفه منظرك وانتى بتتكلمى . دانا خوفت
سلمى : لا ماتخافش طول مانت ماشى مستقيييييييم محدش هيقدر يقربلك
احمد : احنا ف السليم يا ستنا .. ف السليم اوى والحمد لله
رايتنا بيضا وناصعة البياض
ومش احنا يا ماما اللى عينينا تزوغ بره بره
عيب
عيب يا ست سلمى عيب تقولى الكلمتين البايخين دول مش انا يا ماما .
فاهمانى
مش انااااااا .. م ش ا ن ا
سلمى : استنى كده .. هى ايه دى ؟
احمد : عاوزه ايه
سلمى : الإسكارف الموف ده بتاع ايه ولا بتاع مين ؟
.......................
الي اللقاء في الحلقه القادمه

كاتب الروايه هو احمد سعد و تم نشر الروايه مسبقا علي بيدج هو و هي و بيدج stories and novels

لينك الكاتب
https://www.facebook.com/profile.php?id=100010381862587

لينك بيدج/ هو و هي
https://www.facebook.com/howa.weheyaa/

لينك بيدج/ stories and novels
https://www.facebook.com/StoriesAndNovels2020