كل شي حيخليك بعد موتك الا اعمالك الصالحه حتلحقك..
واولها الصلاه..ماتبدي عليها شي في الدنيا مهما كان مهم كله زائل وهي بس اللي حتقعد...الصلاة اولا🌸
قولوا لاإله إلا الله تفلحوا باللسان بالقلب وبصوابعكم اللي تكتب🌷
وصلوا ع الحبيب اسعدكم الله بجواره في جنات النعيم💖
🍫🍫🍫🍫🍫🍫🍫🍫🍫🍫🍫🍫🍫🍫🍫
"استاذة اسماء"
اسماء ابتسمت بجديه وهزت راسها بعدين شبحت لرنده:اهم شي يارنده عندنا هني الجديه في الخدمه بالذات عند الأستاذ زايد..
رنده تسمعلها بإنتباه ومازال متوتره..وهو عيونه تحركوا اتجاهها..وقعد يشبحلها....
ملامحها جميله جدا...وحاده فيها مسحة قسوة وغرور...
هي كانت تتصنع الثقه بالنفس..بس من داخل كانت تشوف في روحها صغيره ع انها تتوظف في مؤسسة حكوميه..
اسماء:وطبعا الخدمه مش حتكون يوميه..
رنده:بنسأل ع حاجه..
هو ضيق عيونه ..
رنده مررت نظرها عليه وعليها وقالت؛في خدمة في الليل؟
زايد؛علاش انتي عندك مشكله مع الخدمه في الليل؟
رنده وهي تشبحله:ايه..
زايد بإبتسامه جديه؛خلاص مافيش مشكله نحط واحد في الليل ..وانتي في النهار..
ضيقت عيونها بإستغراب وشبحت لأسماء بعدين ابتسمت مستغربه؛مافهمتش...علاش زوز؟ علاش اللي يخدم في الليل مايخدمش في النهار...!؟
اسماء:وين المشكله .
هي شبحت لأسماء بتجاوبها وهو مركز معاها..
رنده:لافي مشكله اني الحاجه هادي ماخشتش راسي معليشي..اني شايفه ان مافيش داعي ليا لو في حد يقدر يخدم في اي وقت..وبصراحه ماسمعتش قبل بمسؤول عنده اكثر من مترجم هو واحد بس ولو صار ظرف او مشكله يبدله..
اسماء:انتي شن اللي ضايقك بالزبط..
رنده:بصراحه..وشبحتله وقالت.. ماارتحتش وماأقتنعتش..
زايد؛انتي هني بتخدمي..تخدمي خدمتك وتاخدي عليها مقابل وتمت..
اسماء:الفرصه اللي جاتك الالاف يتمنوها..
رنده بدون ماتشبحله؛اخر همي المقابل اللي حكيت عنه ياأستاذ اني يانخدم خدمه واضحه مافيها شي غامض ياإما..ماتواخدونيش مش حنقبلها..
هو ابتسم وقال:معليش ذكريني بإسمك..
شبحتله رنده بنظرة ثقه فيها شي من العصبيه وقالت:رنده..
زايد بإبتسامه:تمام آنسه رنده...حتكوني انتي المترجم الوحيد اللي عندي هني ووقت خدمتك حيكون في النهار بس مافيش في الليل لان اني نفسي في الليل مانحبش نخدم وممكن ننتقلوا بالخدمه في السفارات وطبعا مش حتركبي معاي حتوصلك سيارة المؤسسه يعني بش تطمني اكثر..
هي فهمت انه كان يختبر فيها بس ماعرفتش السبب..وحست بشي من الإحراج وقالت:عندي سيارة..
زايد هز راسه وقال: باهي...تمام هكي؟
رنده شبحت لأسماء وقالت؛بس قعد عندي سؤال واحد..
اسماء:رنده تسألي هلبه يارنده..
زايد :معليشي خليها تسأل..
هي شبحتله وقالت؛في مترجمين اصحاب خبره تقدر تجيبهم من اي مكان علاش اخترت طالبة دارسات عليا..
حط سبابته ع صدغه وابهامه تحت خده وهو متكي بمرفقه ع المكتب قال:قولي نبي ندعم الجيل الجديد في البلاد..
رنده شبحت لأسماء.
وهو ابتسم..
اسماء:حسيت انك انتي مدايرتلنا مقابله عمل مش العكس!..
هو ضحك نص ضحكه..
رنده:اسفه..هادي اول مرة نخدم وفي مكان زي هدا لازم نعرف كل شي عن خدمتي قبل مانبدا فيها..
زايد؛يعني خلاص اتفقنا..
رنده هزت راسها بإيجاب..
زايد شبح لاسماء وقال:بالله اطلعي قوليلهم يديروا العاب ناريه...
ضحكت اسماء..
ورنده نزلت راسها وشدت ضحكتها..
زايد:بجديات اقناعك انجاز..لاوع قولتك خلتنا نتعاملوا معاها وكأن حني اللي جايين بنخدموا عندها..
رنده شبحتله بإبتسامه وقالت؛ماتواخدونيش..
هو بإبتسامه قال؛مش مشكله..اطلعي توا مع اسماء حتزيد تهدرز عليك اكثر وتفهمك بعض الأمور..
اسماء ناضت وقالت:هي تفضلي معاي..
ناضت رنده وعيونه معاها...
اسماء:نستأذن استاذ..
هز راسه وهو ساكت..
رنده شبحتله وهزت راسها بإبتسامه جديه خفيفه جديده.
وهو ردها بإبتسامه حلوة..
رنده يدوب شافتها لأنها غيرت عيونها عنه..
ومشت طلعت مع اسماء..
بعد ماسكروا الباب...
هو شبح لمكانها وضحك..بعدين حرك راسه يمين ويسار ..
🍁🍁🍁🍁🍁
وروحت يومها رنده للحوش وقعدت تحكيلهم ع مكان الخدمه وشروطها وخوتها وبوها مااعترضوا ع شي ووافقوا ع خدمتها موافقه تامه..
••رنده؛زعميتني عاديه وكأني متعوده نقابل مسؤولين ماعنديش مشكله واني من داخل مرعوبه..
رتيل بضحكه:باهي شن شكله زي رياض؟
رنده:لالا بعيد عنه رياض اشقر وهدا لا...
رتيل:امتى تبدي تخدمي..
رنده؛يوم الاربعاء اول يوم... هواني ماعنديش ايام خدمه معينه لما يكون في وفد اجنبي جاي او لقاء في سفارة ينادوني..
رنده بضحكه؛ايوه حني ياواصل انت ياواصل..
رنده وهي تشوف لرتيل كانت حتضحك بس فجأة تبدلت ملامح وجهها للبكاء..
رتيل تعكرت ضحكتها وقالت؛خيرك!؟
رنده ودموعها ينزلوا:توا وانتي تتكلمي مش عارفه كيف جيتيني زي نوريه..
غرقوا عيون رتيل بالدموع..
رنده:تعودت اي شي يصير معاي حلو اول من يسمع بيه هي..خنقتها العبره..وبدت تبكي..
ورتيل قعدت تبكي حتى هي..
خشت رنده تحت الغطا وتغطت وعطت اختها بالظهر وهي تبكي بقوة..
ورتيل تبكي معاها...
🌺🌺🌺🌺
■كنت نسمع في بكاهن يقطعن القلب وكنت نخاف عويلتها يسمعوا ولاعمتي...
الحق موت نوريه ماقدرناش نتجاوزوه لعند لهالحظه كانت مخليه مكانها في كل شي..لأن كان ليها مكان في كل شي..بغض النظر عن وعارتها وعلاقتي بيها اللي ماكانتش حلوة واجد بس كانت مسيبه فيا اثر..
نذكر ليلتها رنده نزلت منشور عبرت فيه عن شعورها..
كلامها كان واعر..واعر واجد..
كانت مشاركه فيديو عن الأخت..قديش بكيت ليلتها بكيت واجد...
"اااه ياوخيتي ااه..لعند توا مش مصدقه انك خلتينا مرة وحده...ااه يانوريه لو تعرفي كيف نكذب ع نفسي ونوهم فيها بخشتك علينا في اي وقت..خاطري نحكيلك هلبه كلام خاطري نشكيلك ياوخيتي..فراقك مر ياوخيتي مر....قداش تمينت نهدرز معاك اليوم بالذات..قداش استاحشت تعليقاتك وبصارتك وهزايبك..اااه يارب الصبر ياااارب الصبر ياارب الصبر ياااارب الصبر..ورحمة والمغفره لوخيتي يارب"
🍁منشور رنده هدا بكى عفاف لين تعبها...بكى صاحبتها فدوى..بكى بنات العيله اللي كانوا يتابعوا فيها ع الفيس..
وقطع قلب قاعد يتمناها ويبيها برغم ان صاحبها خشت ذمته غيرها..قاعد يراقب فيها ويتبع في اخبارها..
مش بيده ع قد ماحاول ينساها ويطلعها من قلبه من قدرش في البعد حبها زاد قلبه اكثر من قبل..
بس الحب شي...والنصيب شي تاني...
••مقعمز في صالون حوشه الكبير بروحه..
حاط رجل ع رجل ومربع ايديه..وعقله عندها يتفكر في اللي صار في المقابله..ويحلل في شخصيتها...
هي حاده بعض الشي..صعبه...ومحترمه جدا..لأن نظراتها ليه كانت محدوده ماملتش عيونها منه...
ضحك لما اسلوبها في الكلام..كان واضح انها تتصنع في القوة عيونها بينوا خوفها وتوترها اللي حاولت تخفيهم...
قطع عليه تفكير بيها خوها الصغير اللي كان نازل بيسهر لوطا ع القرايه..
ولما شافه كيف مقعمز سرحان...مشاله..
قعمز جنبه وقال؛نقعمز عادي؟!
شبحله ع جنب..
ضحك رياض وقال؛خيرك مقعمز هني بروحك مش عوايدك..
تنهد بعدين قال:توا انت قداش ليك تبيها البنيه هديكا؟
رياض بإبتسامه؛فوق العام..
زايد؛مامليتش ..
رياض؛هدا حب مش لعب..
زايد ابتسم وقعد ساكت..
رياض:من الاخير قول شن عندك احكيلي ينحكالي السر اني مش كان اصغركم معناها بنشهدر بيك..
ضحك زايد بعدين قال:هو مش سر..بس..انت تعرف اختها البنت اللي تبيها..
رياض:ايه وعارفك طحت فيها..
زايد؛مش لهالدرجه يعني تقدر تقول اعجاب..
رياض؛تمام اعجاب..يعني اللي مخليك مقعمز بروحك هني وفي عز الليل اعجاب!
زايد؛شوف رياض حبيبي..انت في سنك هدا عند شي ينقاله عنفوان الشباب كل شي تاخد فيه بإنفعال مبالغ فيه هكي مافيش كنترول ع المشاعر كل شي عندكم يطور بسرعه..عكس اللي زي اني اللي في عمري الحكمه غالبه عليهم في كل شي..يعني المراة عاجبتني تمام بس هذا مايعنيش اني كبدت وانطبست لا طبعا..
رياض؛باهي يعني انت شن تبي منها اساسا..
زايد:نبي نعرفها اكثر..نعرف شخصيتها..اخلاقها عقليتها...
رياض:وكيف بتعرفه هدا كله.؟
حكي زايد لرياض عن اللي داره....
رياض:مش مطوله ع ماتعرف المقلب اللي درته فيها..
زايد؛ماتقولش مقلب..اساسا مانبيش الموضوع يطول نبي نعرفها عن قرب وبعدين نبعت خواتك طول..
رياض:لحظه..لانها عجباتك بس تتزوجها؟
زايد:ماهو ياروميو الحب حق يجي بعد الزواج..
رياض:كان حق هكي راك حبيت نجوى الله يرحمها..
زايد:الله يرحمها وضعي اني وياها مختلف...
رياض:باهي تمام دير اللي يريحك لكن ارجوك يازايد ماتخربش عليا..
زايد حط يده ع شعر خوه وشده وهو يقول؛امتى خربت عليك اني يامعفن!؟
رياض بضحكه؛خلاص خلاص خرب كان تبي تخرب دير اللي يعجبك..
طلقه وقال؛جحش..
ورياض يساوي في شعره وهو يضحك..
🍁🍁🍁🍁
يوم الإربعاء...
الساعه 9:40صباحا..
"شن رايك #شكولينا"
مررت نظرها عليها..كانت لابسه بالطو لعند الركبه لونه اسود فيه بطم ذهبيه وتحته قونه سودا...وشاربه سودا في الذهبي غير لماع..وشنطه سودا صغيره وسيرها ع هيئة سلسال لونه ذهبي..
لينا:رسميه..
رنده؛بالقصد..
لينا بإبتسامه؛عارفه سمحه واجد..
رنده:انتي السمحه ياشكولينا..بس تعرفي متوتره وخايفه..نتخيل في روحي نلخبط ونحط نفسي في موقف محرج...
لينا:كثري من الحوقله كثري منها واجد بيش ربي يهون عليك الموقف..
رنده:ان شاء الله..بالله لينا ردوا بالكم من شيرو باهي كان عيط عطيه حليب فراوله..
لينا بضحكه؛ياودي نعرف غير عدي وماتفكري في شي وديري اللي قتلك عليه..
رنده بضحكه؛تمام..سلام توا...ومشت رنده ركبت سيارتها...
ولينا خشت داخل..
شويه جاها بحر يقول:ثوكتر..."سوكتر"
لينا؛لالا لا سكوتر لاعينك تعالي معاي العب بطيارتك وهنيني..
وخداته من يده وهو زعلان مشي معاها...
فاتت من قدام عزوزتها اللي كانت مقعمزة تخيط في الكرشة للعصبان قالت؛طلعت رنده..
لينا:ايه يااللاي..
وخشت حطت ولدها حد الصغار وعطاته يلعب..
ومشت طلعت وهي تقول؛عمتي ها ع شن استقريتي..
وجيهه؛خلاص فتاتكم والعصبان وراك تنسي 11راجل..
لينا؛ايه في بالي..
ومشت خشت للكوجينه..
زبيده:ماشاء الله عليها ولت تخش ع العزايم بقلب قوي..
وجيهه وهي تخيط؛ولت هي ايديا ورجليا
توا..
زبيده؛بنت اصل المراة هادي..
ابتسمت وجيهه وقالت؛ايه والله..وتفكرت اول مره جاها عدنان فيها وكلمها عليها ش دارت ضحكت روحها وعيونها معبيات دموع...
🍁🍁🍁🍁
"هما صغارك مفروض تتفاهم انت وياهم طول منك ليهم"
حسين:باهي لكن مانبي حد يكون حاضر معانا اني وياهم بس..
سفيان؛بنتغاظى عن تلميحاتك ياحسين نخليك بروحك تعرف انك غالط وتفكيرك مش مزبوط..
حسين تجاهل كلام سفيان وقال:يوم الجمعه العشيه ان شاء الله بنجي..
سفيان هز راسه وقال:تمام..
حسين؛هي السلام عليكم..ومشي..
وسفيان وهو يتبع فيه بعيونه قال..وعليكم السلام..
🍁🍁🍁🍁
واقفه قريبه من باب غرفة الاجتماعات وهي تردد..
"لاحول ولاقوة الابالله"...
لين شافاته جاي من بعيد ومعاه واحد واسماء ..
لما شافها دار روحه عادي بس قلبه قعد يدق بقوة عجبه شكلها وهيئتها هلبه..
وصل فيها وقال:السلام عليكم.
رنده:وعليكم السلام..
وخشوا كلهم داخل..
وكان الوفد الاجنبي المؤلف من ثلاته اشخاص بالأنتظار..
رنده من اول مابدي يتكلم هو وهي باديه ترجم للطرفين..
قعمزت حداه وهي تخدم في خدمتها...
استغربت في روحها كيف كانت ترجم بدون ماتلخبط في كلمه وبسلاسه..
وهو مرة مرة يشوفلها..
زاد عجباته في اصرارها ع انها تنجح في اول يوم ليها...
وكانت مرة مرة وهي ترجم تبتسم ابتسامه خفيفه..
وركز ع افراد الوفد كيف يشبحولها..
حس بالضيق وتمنى لو يقدر ينهي اجتماعه بيهم بسرعه..
وبعد ساعه بالزبط انتهى الاجتماع واعضاء الوفد طلعوا ومعاهم اسماء..
وقعد هو ورنده والموظف التاني..
زايد؛نبي التقرير يكون كامل واعطيه بعدين لرنده ترجمه..
؛تمام..
ع خشة اسماء؛بيوصلهم علاء للفندق..
هو هز راسه وقال؛اني توا نبي قهوة..
اسماء قعمزت وقالت؛عارفه طلبتلك..
:كان حسبتيني حتى اني..
اسماء:طلبتلكم كلكم..
رنده وقفت وقالت؛لا اني نستأذن عندي محاضرة..
زايد؛مازال خدمتك ماتمتش..
رنده؛بعدين نولي ان شاء الله وناخد التقرير المحاضرة ضروري نحضرها استاذ..
زايد بإبتسامه:ماتخافيش تو ينجحوك ..
ضحكوا اسماء وزميلها..
رنده اضايقت وقالت؛اكيد اني الاولى ع دفعتي من العام اللي فات..
اسماء وزميلها شبحوا لبعض..
زايد شبحلها شويه بإبتسامه بعدين قال:تفضلي..
رنده؛السلام عليكم..
ولفت ومشت طلعت وهو معاها بعيونه..
اسماء؛انفعاليه شويه..
زايد شبحلها وقال؛قهوتي في مكتبي..
اسماء؛حاضر..
ناض ومشي طلع...
:شن القصه..
اسماء:مانعرفش علمي علمك..
وناضت مشت طلعت وراه..وهو ناض طلع بعدها...
🍁🍁🍁🍁
تبخر في الحوش الوشق وادور وعزوزتها تشبحلها ومستغربه في حالها قبل ماتتحركش الا بالنخص والعراك واليوم من الفجر نايضه ضم وتكنش وتنظف وحتى غداها ع النار..
قالت في نفسها بالك هداها ربي!..
اكرام؛شن خاطرك نديرلك ياعمتي..
رمضانه؛شي..ديري للبنات كان بديري..
اكرام:لا من بكري درت كذا نوع حلو..ونوع موالح قلت نحطوه مع الغدي..
هزت راسها وقالت؛باهي باهي..
ابتسمت ومشت وهي تقول:خل نمشي نشوف نوفي كان ناضت..
رمضانه تنهدت بملل وقعدت تتفرج ع التلفزيون..
🍁🍁🍁🍁
الساعه 1:30بعد الظهر..
في الطريق..
رنده وهي تسوق:مش عارفه هكي ماارتحتش..لما تخدمي مع ناس زي هادي تقعدي خايفه منهم..
فدوى؛بالك غير اول يوم بعدين تتعودي ويبدا الموضوع عادي..
رنده:ان شاء الله نقدر نتعود ونشد لساني..اني كان حمقت مانعرفش نسكت خايفه يوم من الايام يستفزني نقوله كلمه تتسبلي في مشكله..
فدوى:تعلمي تشديه لسانك في حاجات لازم تتجاهليها وتفويتها مش كل شي توقفي عنده..
رنده:ايه بس هو مستفز يقولي تو ينجحوك ع خاطر نخدم عنده يعني..
فدوى؛مشي مشي وخلاص وكان لقيتي روحك ماتتحمليش سيبي..
رنده هزت راسها وقالت:هو هدا...
وقفوا في طريق كانت كلها زحمه..
فدوى:شن بيفضها توا..
رنده تأفف واستغفرت...بعدين قعدت تمرر في نظرها حواليها..
كانت مدرسه حدا صفة محلات للاكسسورات والفضه..
قعدت تتفرج عليهم ..
رنده؛ننزلوا نشوفوا شن عندهم لين تفض الزحمه..
فدوى شبحت وين ماتشبح وقالت؛ايه خير مانقعدوا نستنوا هني..
قعدت رنده تشوف من وين تطلع..
ولقت كيف وطلعت من الزحمه ودرست ع حافة الرصيف..
ونزلت هي وصاحبتها وسكرت سيارتها زين ومشوا للمحل وخشولها...
اول ماخشوا طلقوا السلام...
وبدوا يتفرجوا..
كان في زباين غيرهم ..بس هما ماركزوش في الناس..
لين وقفوا ع الكاصه...
"شوفي هدا قنين يمشي مع الفيلو"
رنده الجمله لما سمعتها خلت عندها فضول تشوف لمصدرها..
شبحت جنبها..
وانصدمت...
لما شافت فاطمه ام انس ومعاها مراة تانيه من عمرها وشابه صغيره...
فاطمه ماركزتش ع رنده...
وكانت تقول؛بنتي ماتتحشميش خودي انس قال تاخد اللي يعجبها وماتفكرش في الفلوس..
حست رنده وكأن في حد خدي قلبها وقعد يعصر فيه..
والدموع عبوا عيونها غصب عنها..قعدت مركز ع البنت تبان اصغر منها..وقنينه..بعدين شبحت للطقم اللي بتاخده وقعدت تتخيل فيها لابسه فستان الزفاف وعليه الطقم ومتعنقه بيدها ذراع انس وهو يزف فيها..
غيرت عيونها وشبحت لقدام ودموعها طاحوا..
فدوى؛شن رايك في هدا...
ركزت عليها لقت دموعها ينزلوا..
فدوى:رنده خيرك...
رنده مشت طول طلعت...
وفدوى خلت الخاتم ولحقتها وهي تنادي رنده..
فاطمه سمعت الاسم شبحت للباب وهي مصدومه وقالت:شويه بس..
ومشت للباب..وام العروسه والعروسه يشبحولهم بإستغراب..
••برا...
رنده لما ركبت السيارة انهارت بالبكي..كانت تبكي بحرقه وقلبها موجوع هلبه..
وفدوى ركبت معاها وهي مخلوعه وقالت:رنده خيرك شن جاك...
رنده ببكي:شفتها يافدوى البنت اللي بياخدها انس..داخل مع امه يافدوى...وقعدت تبكي بقوة لين شدتها الكحه..
خدت فدوى شيشة ميه فتحتها وعطتهالها وهي تقول بقلق:اشربي ..
خدت رنده الشيشة وشربت منها شويه شويه بعدين قالت ببكي:حاسه بنار والعه في صدري يافدوى..بنموت..معقوله بسرعه هكي لقي وحده تانيه وبيتزوجها..!! وين نذكر كلامه وتصرفاته يافدوى مانصدقش كان يكذب عليا معقوله حتى هو زيه زي هداكا الحقير....معقوله كلمة نحبك ساهل تنقال وفيسع تنتسى...!!
فدوى بحزن؛خلاص هدي حبيبتي هدي...افتكيتي منه كان هو هكي يارنده..
رنده هزت راسها ورجعت شربت الميه بعدين عطتها الشيشة وقعدت تمسح في دموعها..
خدت نفس عميق وشغلت سيارتها وتحركت وفضت الزحمه وكملت طريقها بصاحبتها لحوشها...
وفي محل الفضه..
كانت فاطمه مع الناس ومش معاهم تشبح في البنت اللي مقريه فاتحتهم هي ولدها كيف شاده كيس علبة المجوهرات وهي فرحانه..
قالت في نفسها"والله حتى هي بنيه طيبه ربي يهني وليدي معاها وتخليه ينسى رنده"..
🍁بس في من مايبيش انس يتهنى ولايرتاح...
في واحد من المقاهي المختلطه في العاصمه..
رولا:عرفتيلي في اما مزين حاجزة؟.
:ايه جبتلك التفاصيل..في مركز ***** يوم 24\4 ويوم 25\4..
رولا:يعني يوم 25\4 الدخول..تمام.....مازال شهر بحاله..بعد رمضان نتلاقوا ونتفاهموا..واهوقدامك حق تعبك وحنبحبحهالك لما يجي وقت الخدمه اللي نبيها منك..
:ان شاء الله..خدت ظرف الفلوس حطاته في الشنطه وقالت..ماتبي شي..
رولا:شكرا..
ومشت البنت طلعت..
ورولا تشرب في فنجان النسكافيه وهي تفكر...
🍁🍁🍁🍁
مقعمزة ع سريرها تفضفض لمرت خوها اللي مقعمزة ع كرسي مقابلتها وتسمعلها..
رنده وعيونها حمر منفوخات من البكي تتكلم هالمرة بدون ماتبكي بس بنبرة الم:صدقته وحبيته مش صدقته بس..حتى لو ماكانش نصيبي كنت حنفرح لما نذكر ان كان في حياتي راجل حقاني حبني بصدق بس النصيب فرق بينا..
لينا؛باهي يارنده هو طبيعي بيعدي يشوف نصيبه ماتنسيش عنده عويله وامه مريضه..
هزت راسها وقالت؛عارفه لكن توقعت بعد سنه سنتين باهي مانبيش نبالغ سته شهور..فترة تقنعني انه قدر ينساني ويشوف لغيري فيها...مش بعد شهرين يالينا يقرا فاتحه مرة وحده..! اني لتوا ندير في روحي ناسيه وين يخطر عليا ربي بس العالم باللي يصير فيا...اني يالينا ماحبيتش في حياتي قبله بكل..ماحبيتش غيره...شفته غير ع الكل قلت ياريت ياربي جمعتني بيه من زمان وكنت عرفته قبل هداكا الحقير اللي دمر فيا كل شي حلو..لكن للأسف توا توضحلي ان كلهم زي بعضهم بس بدرجات..او مرات ربي مقدرلي مانطيحش كان في الكذاب وخوه...الأول قتل فيا ثقتي في نفسي والتاني قتل فيا الثقه بالناس..قصدي..اني لهالدرجه مكروهه عند ربي بش دار فيا هدا كله!؟
لينا تأثرت هلبه بكلامها والسؤال خلا دموعها ينزلوا مسحتهم وقالت:وكان يكرهك يارنده يقربك ليه!؟ انتي مانكش ملاحظه قديش تغيرتي حتى بعد روحتي للحج بان فيك التغيير واضح..تعرفي شن معناه هدى معناه منين مشيتله وصلتيله..وراهو مش كل حد يعدي لبيت الله لصاحبه يارنده...اها انتي توا تتوجعي واجد..لكن معليش ع قد الوجع يارنده حيجيك العوض صدقيني...وقولي ديما ع اللي يصير معاك لعله خير..
رنده؛باهي ليش بالألم وبالدموع..
لينا؛ماهو يارنده هدي دنيا وحتقعد لقيام الساعه دنيا لازم نبكوا فيها ونتوجعوا ونتألموا بش مانتعلقوش بيها...حنيعشوا فيها يوم هكي ويوم هكي..واللي قلبه معلق بربه حيعيش مرتاح حتى لو كانت المصايب تصب عليه كيف المطر...لأنه عارف ان ربي معاه ومش حيخليه والدنيا اخرتها لزوال مافي شي يستاهل ينزعل عليه فيها...
تنهدت رنده وغمضت عيونها بشده بعدين فتحتهم وقالت:يارب..
لينا:اقري قرآن اقري..والله مافي نصيحه كيف هدي تنفعك توا يارنده..
رنده ابتسمت وقالت:برغم اني وياك نداد لكن عقلك كبير هلبه بجديات انتي شخص مثالي بمعنى الكلمه.
لينا:لا والله لامثاليه ولاحاجه..انا لوقت قريب ماكنتش نحبك نهائي ويخي كنت نكرهك قبل واجد..لو كان عقلي كبير او مثاليه ماكنتش كرهتك بكل...
رنده:اني لو كنت مكانك كرهتني..
ضحكت لينا..
ورنده حتى هي ضحكت بعدين خبطت بيدها ع جبهتها وقال؛يييي..نسيت التقرير بكل...
لينا؛تقرير شني!؟
رنده:في خدمتي الجديده..مفروض اليوم ناخد تقرير عن الاجتماع ونترجمه يبيه استاذ زايد ع مكتبه.غدوة..اللي صار ذهبلي شيرتي بكل..
لينا؛خلاص بكرا ان شاء الله عدي بكري كان فيها كيف ترجميه وسلميه..
رنده؛هو هدا مش حنمشي للكليه..وخدت تليفونها من الكامدينو بتشوفه لقاته مقفول:وووك..استغفر الله واتوب اليه...بالله لينا الشحن..
لينا التفتت وخدت الشحن من ع المكتب ومداته..
خداته رنده..ولينا ناضت وهي تقول؛بنعدي نشوف سيف..
رنده هزت راسها وهي تفتح في التليفون..
طلعت لينا..
ورنده اتصلت بأسماء لما شافت منها مكالمات واعتذرت وشرحت ظرفها واتفقت معاها تجي غدوة بكري بش ترجمه...
🍁🍁🍁🍁
"هدا بوك ياشريف باب من ابواب الجنه مازال مفتوح"
الشريف بضيق؛عارف..لكن اني ياخالي نذكر فيه كيف خلى امس تبكي هلبه..انت ماشفتهاش اني بس كنت نشوف فيها..
سفيان وهو يحاول يخفي ألمه؛هدا شي بينه وبينها رحمة الله عليها..انت مالكش علاقه باللي صار بيناتهم..انت لو تبي رضا ربي حق ماتقطعش بوك لأي سبب حرام هدا ياشريف..
شريف قعد ساكت وهو مضايق..
سفيان؛اني ملاحظ ان خوتك يقلدوا فيك ومتأثرين بيك هلبه اللي ديرها انت هما يديروها رد بالك ماتخليش روحك قدوة في الغلط..
الشريف:باهي ياخالي شن ندير اني توا؟
سفيان؛بوك يوم الجمعه.العشيه بإذن الله جاي يهدرز عليكم عامله بإحترام وتصرف معاه كويس واسمعه منه وقوله مافي خاطرك..اللي تقولي فيه توا بش يعرف انت شن تحس لكن بآحترام..اتفقنا؟
الشريف هز راسه بالموافقه وهو ساكت..
سفيان؛اتفقنا!؟
الشريف ع مضض؛اتفقنا ياخالي اتفقنا...
هز سفيان راسه..ومسح ع شعر ولد اخته وهو يشوفله بإبتسامة الم..
🍁🍁🍁🍁🍁
الساعه 12:00ليلا..
فرشت البطانيه وقالت؛شن كانت تقولك اختك بكري..
هو خش السرير بيرقد وقال:تشكر فيك..
اكرام؛وشن قالت..
تغطا وهو يقول؛قايمه امي والحوش متغيره عن قبل..
اكرام؛غير قبل الحمل تعبني وبعده الجياب وتوا حاسه روحي احسن...
سكت معاش تكلم..
اكرام؛حسونه غدوة نبي نمشي لأمي..
حسين:باهي طفي الضي وخليني نرقد تاعب..
تنهدت وقالت:حاضر..
ومشت طفت الضي...
🍁🍁🍁🍁
تاني يوم...
من الصبح رنده كانت في مكان عملها..استلمت التقرير وقعمزت ترجم فيه...
لين كملاته..
وبعدين مشت بش تسلمه...
وصلت في مكتب سيف...
خدت نفس وقالت بهمس"لاحول ولاقوة الا بالله"..
ودقت الباب..
"تفضل"
بعد سمعت الإذن بالدخول فتحت الباب وخشت وهي تقول:السلام عليكم..
هو كان لاهي بوراق قدامه رد :وعليكم السلام..
واقف قدام المكتب وقالت؛التقرير أستاذ..
قام عيونه وشاف لعيونها...اثر البكي كان واضح فيهم..
خصوصا انها ماكانتش تحط في زينه ع وجهها يعني مافيش شن يدرق....
رجع شاف للتقرير وقال؛حطيه وقعمزي..
هي توترت..حطت التقرير وقعمزت..
زايد خداه وحطه ع تركينه وقعد يشوف للوراق اللي قدامه شويه بعدين سكر عليهم الملف وشبحلها وقال:اسف لو امش ضايقتك بكلامي مش قاصد اللي انتي فهمتيه..بصارة يعني..
رنده عقدت حواجبها وهزت راسها وهي ساكته..
تنهد وربع ايديه واتكى بيهم ع الطاوله وقال:اني مش جديات ديما في الخدمه نضحك مرة مرة بش نخلق جو حلو للموظفين اللي يخدموا معاي..يهمني مانكونش مكروه والناس تدعي عليا..
هي يدوب ابتسمت...
هو ابتسم بعدين قال؛رنده..
شبحتله..
زايد حك حاجبه وقال؛كانت عندك قضيه حضانه ضد طليقك وربحتيها لكن ماباش يسلمك البنت وهرب بيها..مزبوط.؟
رنده ضاق صدرها هلبه وين ذكرها بهديكا الايام وقالت؛ارجوك استاذ الموضوع هدا خصوصيات مانحبش نحكي فيها لحد..
زايد؛فاهم عليك..لكن اني نبي نساعدك..
رنده ضيقت عيونها وقالت؛علاش!؟ وبعدين انت جايبني هني وخدمتني عندك ع خاطر الموضوع هدا!؟
زايد؛طبعا لا..اني واخد عنك معلومات زيك زي اغلب الموظفين اللي في الدائرة المقربه مني لازم نعرف عنهم كل شي..لما عرفت اللي صاير معاك من باب الآنسانيه قلت نساعدك بس..
رنده؛واني مانبيش الموضوع هدا اني سكرته خلاص ومعاش نبي نفتحه نهائي..
زايد؛لكن اني..
قاطعاته وقالت ودموعها ينزلوا؛ارجوك استاذ لوسمحت الموضوع هدا سكره بالله عليك..
وجعاته لما شاف دموعها...قربلها الكلينكس وقال:اسف جدا خلاص سكرنا عليه..
هي خدت من الكلينكس وقعدت تمسح في دموعها وانفها..
زايد؛هو اني ديما بنجي نكحلها نعميها..نذكر زمان واحد من ولاد عمي جايه خوه يجري بالبرويطه مايشبحش فيه اني زعميتني جيت بننقده دفيته من قدامه حي طايح من الدروج..
رنده ضحكت في عز بكاها...
هو ابتسم وقال:اهو طلعتي تعرفي تضحكي زينا..
هي ابتسمت وقالت:نستأذن توا..
هو هز راسه وقال:تفضلي..
ناضت رنده ومشت طلعت وهي تقول السلام عليكم..
وهو رد عليها وع وجهه ابتسامه حلوة وتبعها بعيونه لين طلعت...
🍁وهي لما طلعت اذكرت كلامه المضحك..شدت ضحكتها..
وشكلها هدا شافاته موظفه كانت عند السكرتيره..
وبدوا الزوز يحللوا في اللي شافوه ع حسب ماتقوللهم عقولهم...المريضه....
🍁🍁🍁🍁
الساعه 2:30بعد الظهر....
فتحت كيسة سودا وقالت:اهوا..
هي بدنها كشش وقالت؛ووك عليا..
:هاكي شد من غير دلع فرخات..
خداته اكرام وقالت؛باهي اشرحيلي تاني كيف ندير؟..
امها؛خلي نمشي نشوف الغدي وتو نجي...
اكرام ؛باهي..
مشت امها..واكرام مشت قعمزت حدا بنتها وولدها حداهم يتفرج ع التلفزيون..
شبحت للكيس بإشمئزاز..ولفاته وحطاته في الشنطه وسكرت عليه...
ع جية امها قعمزت حداها وقالت؛افتحي وذانك
واسمعيني كويس وركزي معاي...
🍁🍁🍁🍁
وسمعت اكرام لأمها بكل انتباه..وكان عندها الى جانب فكرة امها تخطيط تاني قاعده تنفد فيه..
يومها طلبت من حسين يخليها تبات وهو مارفضش وخلاها تبات...
واليوم اللي بعده اللي هو الجمعه وحده من خواتها لمتهم كلهم في حوازتها..خوتها وخواتها ورجالتهم...
واكرام شدت في حسين بش يمشي..
"نقولك اليوم العشيه بنمشي نشوف صغاري"
اكرام؛صغارك تقدر تشوفهم.حتى يوم تاني ياحسين بالله عليك تعالى ماتحرجنيش قدامهم..
"وين المشكله كان مشيتي بروحك"
اكرام؛وشن منظري ورجالة خواتي كلهم جايين الا راجلي..من غير شي يدووا عليا ويقولوا راجلها مش طايقها هكي انت بتاكد كلامهم وتحطني في موقف يقهر..وبدت تتبكاله..
"لاحول ولاقوة الابالله!"
اكرام؛بالله عليك ياحسين هاليوم بس هاليوم ارجوك..
تنهد بعدين قال..
"باهي"..
ومشي معاها لحوازة عديله وهو حاط في باله يتغدا ويمشي يشوف صغاره..
بس مع الاسف غادي شدوه وحلفوله..وهو من طبعه يتحشم وبعد حلفوا ماقدرش يردهم واضطر يقعد معاهم..
••"هوينا خليت راجل اختك يحلفله يقعد"
اكرام؛سلمك يام والله من غيرك مانسوى حاجه..
وحده من خواتها قالت؛تعلمي تتصرفي بروحك واعرفي كيف تخليه يسكنك في حوشه..
اكرام؛تي غير نرجع نكسبه زي قبل وبعدين نشوفها حكاية الحوش هدا..ليه توا اربعه شهور مسكره وماخلا حد يخشله حتى ماليها ماخلاهمش ياخدوا دبشها..
امها؛ينساها وراسك ينساها غير انتي ديري اللي قتلك عليه..
"لايجوز الحلف بغير الله بس هدا شي واقعي وموجود ويكون ليه علاقه بثقافة بعض الشخصيات"..
اكرام؛هاني تو نديره ونشوف شن يصير..اصلا اني توا نبي نحط حمواتي في الجيب بش يقنعوه في حكاية الحوش..
:ايوه صحه ليك...
🍁🍁🍁🍁🍁
في محل #شكولينا...
في الغرفه الداخليه..
سفيان بعصبيه؛قعدوا الصغار يراجو ساعتين ونتصلوا بيه مايردش وفي الاخير يتصل ويقول سامحوني غير صارلي ظرف منعني..شن هو ظرف ياحسين قعد يلف ويدور وبعدين قال نسيبي عازمني..ياريتك شفتي شكل الصغار لما قلتلهم منظر وجوههم قهرني والله تمنيت نمشيله وين ماهو نعطيه طريحه تخليه راجل عنده كلمه..
لينا بضيق؛خلاص صل ع النبي..
سفيان:عليه الصلاة والسلام...
لينا؛انت درت اللي عليك وريحت ضميرك خلاص وهو من اليوم يتحمل نتيجه افعاله معاش يوجعك خاطرك عليه..
تنهد ومسح ع وجهه بعدين حط يده ع الطاوله وقعد يضرب بصوابعه عليها..
كانت معصب ع الآخر ولينا مابتش تزيد تكلمه لين يروق..
شويه دق الباب..
لينا؛تفضلي..
خشت رحمه وقالت؛في زبونه تبي تشوفك..
لينا ناضت وقالت؛هي شويه بس..
ومشت طلعت هيا وياها..
وسفيان شبح للشنطه اللي فيها ولده ناض ومشي يشوفه لقاها راقد..ابتسم وطبس عليه باسه..
ع خشة لينا شافاته ابتسمت..
بعدين مشت للرفوف وخدت منهم عينه ومشت طلعت..
هو بعد طلعت مشي يدور ع الرفوف ويتفرج ومرة مرة يحط في فمه طرف..
شويه خشت عليه وشافاته شن يدير جاته ضربت يده وقالت:حيه عليك وحيه شن دير..
سفيان وهو ياكل؛نذوق..
لينا:اربعه طروف واذوق!؟
سفيان بلع وقال؛من كل نوع طرف..
لينا:ياربي هدينا عينات ليش هكي بس!؟
سفيان بضحكه:صحتين ع قلبي..ولامش صحتين.
لينا بضحكه؛صحتين ع قلبك..
سفيان ابتسم بعدين عقد حواجبه بتساؤل وقال:لكن حسيت انهم يختلفوا عن بعض..
لينا؛اها..كل وحده ونوعها في اللي موادها غاليات هدي ندير فيها للناس اللس تقدر تشريها..
وفي اللي عاديات وهدي للناس اللي مايقدروش ع الغالي مانبي حد يقول محل #شكولينا ماياخد منه كان اللي عنده...
سفيان:تصدقي ونصارحك يعني توقعت بعد يكبر اسمك تخدمي بس لعلية القوم زي مايقولوا..بش يزيد يكبر اسمك وتكون ليه ميزة..
لينا:انا من كان ياخد مني كان الناس البسيطه اللي قعدوا يمدحوا فيها ويحكوا عنها وخلوها معروفه امتى عرفوني جماعة الفلوس كان بعدين..
ابتسم سفيان وقال؛ماهو هدا علاش اني نحبك..
وجاها وشد انفها بقوة وقال بالتشديد ع الحروف..نحبك..
لينا قعدت تخبط ع يده وتقول؛اطلق ياهمي تو يخشوا علينا..اي خشمي..
هو طلق انفها وقعد يضحك وقال؛هيا المغرب اذن..
لينا؛هيا..
سفيان؛ناخدوا عشي في طريقنا..
لينا؛اها وحاجات حلوة للعويله بش نجبروا خاطرهم..
سفيان رفع حواجبه وقال؛شن رايك نطلعوا كلنا ل*****؟
لينا بإبتسامه؛والله فكره!
سفيان؛خلاص كلميهم يوتوا ارواحهم..
لينا؛باهي..خود شنطة سيف..
سفيان:حاضر...خدي الشنطه ومشي طلع بيها من الباب البراني..
وهي قعدت تلم في حاجاتها..
🍁في نفس الوقت..
"عصام كأن باب الحوش يدق"
:سمعته سمعته..
ومشي بإتجاه الباب لين وصل فيه وفتحه...
تفاجئ باللي شافه قدامه وقال:عمي الشريف..اهلا اهلا تفضل..
الشريف بإبتسامه:يزيد فضلك ياولدي..
خش الشريف وهو يقول:كيف الحال..
:الحمد لله في خير ونعمه...كيف حالك انت والعيله..
الشريف هز راسه وهو يقول:الحمد لله...
🍁ومها في دار النوم كانت تغير لعدنان..
لحظات وخش عليها راجلها يقول..
:ترا لفيه بالبطانيه وجيبيه..
مها بإستغراب؛علاش!؟
:جده جي يبي يشوفه..
مها بخوف؛من جده؟
:جده الشريف يامها يعني من جده..
مها وعيونها تعبوا دموع:ماتقولش يبي ياخده!
:تي لاشن ياخده يبي يشوفه..ماتنسيش الولد سكر اربعه ماشافوه..
مها:باهي بالله عليك ماتخليشي ياخده بالله عليك..
؛مش واخده قتلك مش واخده..هيا لفيه بالبطانيه..
ومها ودموعها ينزلوا لفت عدنان ببطانيه..وباساته من خده بلطف ومداته لعمه..
خداها وهويقول:معاش تبكي والله ماهو واخده..
ومشي طلع وهو يقول:ديري قهوة...
مها رشفت وقالت:حاضر...
🍁وطلع عدنان لجده اللي كان اول مرة يشوفه...
ضمه وشم عليه ريحة بنته...ولما سمع اسمه قلبه ذاب فيه..
الشريف:الله يبارك عليه واضح صحته كويسه..
:ايه الحمد لله...
الشريف:اهتمامكم بيه واضح..
:كيف عاد مش ولد خوي ياعمي شريف!
الشريف:وحني جدوده ياولدي نبوه يمشي علينا ويجي..
:اني والله خاطر في بالي هالشي لكن وين نذكر لزة امي من حوشكم ياحاج نوخر..
الشريف:هدا شي وهداكا شي..وامك مافي حد لزها ياولدي..
سكت خو حسين وهو مضايق..
الشريف؛باهي خلاص تو نجوا حني ونشوفوه وانت لما يطيب خاطرك تفضل في اي وقت..
هز راسه وقال:إن شاء الله ياحاج إن شاء الله...
☘☘☘☘☘
وعدت الايام...
ورمضان خلاص قرب والناس بدت تويلته...
بس حسين كان مش عارف كيف بيفوت عليه رمضان من غيرها..نفسيته زادت تعبت ومعاش روح لحوشه بكل..
ومن جهة تانيه كانت اكرام تطبخ في طبختها ع نار هاديه..
حسنت علاقتها برمضانه وحمواتها..وفي نفس الوقت كانت توتي في حاجه...كل يوم تركب ع خاطرها فوق السطح وتشوفها...
وبعد كم يوم هالحاجه جهزت وجي.وقت التنفيذ...
🍁اما رنده...
فالمرات اللي مشت فيهم الخدمه مرة عن مرة تلاشوا عنها الخوف والتوتر عنها...
وتعودت ع زياد اللي كان ضروري يضحكها كل مايشوفها..
••زايد؛اليوم الاجتماع طويل وريق رنده نشف..
ابتسمت بإحراج..
اسماء:مش جعانين..
زايد؛هلبه..نطلعوا للمطعم اللي هني شن رايكم..
:يااه يااستاذ قداش ليك مادرتها..
زايد بآبتسامه؛قلت خل رنده تجرب اول مرة..
رنده؛لا اني اسفه مانقدرش..
اسماء:علاش..
رنده؛ممنوع عليا اني جايه هني نخدم ونروح وطلعة المطعم هادي مالهاش علاقه بالخدمه..
زايد قعد يشبحلها بإبتسامه..
:اعتبريه غداء عمل زي مايقولوا..
رنده؛لا معليش اعذروني..شبحت لزايد وقالت..اعذرني يااستاذ..
زايد بإبتسامه:اسماء جيبي المطعم هني..
رنده تفاجئت..
زايد؛تتغدي في مكان عملك مالكش عذر لو قلتي لا..
اسماء:خلاص يارنده خلينا نتغدوا بالله عليك..
رنده بإبتسامة احراج:تمام..
وقامت اسماء تليفونها بش تطلب من المطعم وزايد يقوللها شن تطلب..
والموجودين عيونهم تشبح لرنده والعقول تفسر في ألف تفسير وتفسير...
🍁🍁🍁🍁🍁
"هاه شنو ياعمتي حسين قريب يوصل"
رمضانه؛ايه..سقي غداك..
ولفت بتمشي وقفتها لما قالت..
رمضانه بإشمئزاز:شن هالريحه العفو..
اكرام؛مش عارفه..شكلهم والعين برا نار...تو نسكر الرواشن ونولع وشق..
ونمشت بسرعه للكوجينه...
لحظات وخش حسين..
حسين؛السلام عليكم..
رمضانه:وعليكم السلام..
حسين؛شن حالك يام..
رمضانه:الحمد لله..هي اغسل ايديك وقعمز بش تتغدا..
حسين؛لالا مانبيش توا..يام بنخش نرقد في دارك ع العصر نوضيني..
رمضانه؛باهي ع كيفك..
ومشي خش لدار امه..
وطول انطرح ع سريرها..شم ريحه غريبه بعدين قال:وقته...
وغمض عيونه بش يرقد وهو معصب..
حتى ع باله حريق كناسه..
••اكرام طلعت من الكوجينه..
حطت غدي عزوزتها قدامها وقالت:كأني سمعت حس حسين..
رمضانه؛ايه جي وخش رقد في داري خليله ع تركينه..
اكرام؛حاضر..
ومشت طول للكوجينه وهي مبتسمه بنصر.....
وعدا الوقت لين آذن العصر...
وبعتت رمضانه اكرام لراجلها بش تنوضه وخشت عليه ع اساس بتنوضه..لكن خلاته راقد وطلعت..
والحاجه رمضانه بعد صلت العصر اتكت ونساته..
مع المغرب ناض حسين من النوم..
وهو حاس بجسمه متكسر..
ومشي طلع من دار امه وقال.؛خيركم يام مانوضوتيش.
رمضانه؛كيف!! اني نحسابك طالع!؟.اكرام يااكرام..
جت اكرام بسرعه من الكوجينه:نعم عمتي..
حسين قعد يشبحلها شن لابسه وكيف دايره شعرها والزينه اللي حاطتها..
رمضانه؛مش قتلك نوضيه بكري..
اكرام؛ايه خشيت بنوضه لكن لما شفته كيف راقد وهو تاعب وجعني خليته يكمل نومه..
رمضانه؛تو شن بنقول عليك اني..
هو قعد يمسح في عيونه ويقول:مش مشكله..بري طلعيلي دبش بندوش..
اكرام شبحتله بإبتسامه وقالت؛حاضر..ومشت..
وهو قعد يتبع فيها بعيونه وابتسامه جانبيه ارتسمت ع وجهه..
وامه قعدت تشبحله...
🍁🍁🍁🍁
وجي رمضان...
كان اول رمضان من غير نوريه...اول يوم كان صعب هلبه..
بالذات ع الصغار اللي كانوا فاقدين امهم هلبه..
بكوا لين تعبوا من البكي.....يوم صعب هلبه وكل من فقد غالي اكيد جربه..
ويوم عن يوم يمروا..
والحزن خفت وهجه..وطغي عليه جو رمضان بجماله..
والبعض كان يبي ينسي البعض الاخر هالوجع ويملا الفراغ.
وهدا اللي داروه خوال وخالات صغار نوريه....
وفي مكان تاني ..
صارت حاجه لعيله عكرت عليهم جو رمضان...
الفاسي؛كيف شن صارله كيف انحبس!؟
عصام"اخ محمد":والله ماني عارف يابوي..المهم بنته بتقعد هني لين نشوفوا شن يصير فيه..
الفاسي؛بتسافرله انت!؟
؛اني وولد عمي حمد وصاحبي مصباح يابوي هدا محبوس برا موضوعه كبير..
الفاسي:هدا اللي داره في بنت بن عامر..
:والله ماوقته يابوي بالله..
🍁والبنت داخل تبكي عند حناها وعماتها اللي يبكوا معاها وهي تردد وتقول...
"بابا بابا"....
☘☘☘☘
وعدا رمضان....وجي العيد...
وحسين ماجاش شاف صغاره كان يوم العيد ومعاه خوه جايب معاه عدنان اللي قريب هبلوا عليه خالاته وحناه..
بس خوته تعاملوا مع بوهم بجفاف وهو هالمرة ماكانش مهتم هلبه لنفورهم منه...
رفعهم عيدوا ع حناهم وقعدوا معاها مش اكثر من نص ساعه بعدين ردهم لحوش جدهم...
••سفيان:لو بيدي اني يابوي والله مانخليهم يشوفوه بكل..
الشريف:مانقول غير باهي اللي وصت عليهم يقعدوا معانا رحمة الله عليها..
مروان؛ايه...الله يرحمها عارفه اللي فيها..
شد سفيان دموعه بالسيف وقعد يمسح ع لحيته بعصبيه...
☘☘☘☘☘
بعد أيام...
كانت رنده واصله لمكتب اسماء بتخشله لقت عندها زوز موظفات وهي مش موجوده..
رنده؛السلام عليكم..
الزوز وهما يشبحولها بنظرات مريبه:وعليكم السلام..
رنده:اسماء وين..
:طلعت شويه وجايه..
رنده هزت راسها وقعدت تراجي..
قعدوا الزوز يشبحولها ووحده منهم قالت..
:معليشي نسألك سؤال؟
رنده؛تفضلي..
:تعرفي استاذ زايد من زمان يعني من قبل ماتخدمي هني..
رنده ضيقت عيونها وقالت:لا..علاش!؟
شبحوا هما الزوز لبعض وقعدوا ساكتين..
رنده ماعجبهاش سؤالهم ولانظراتهم ..عقدت حواجبها وقالت:معليشي شن في!؟
وحده منهم قالت؛مافي شي..
رنده برفعة حاجب:لافي مانحبش من يتعامل معاي بالأسلوب هدا عندك حاجه تبي تقوليها قوليها..
:معليشي حبيبتي ماتعيطيش وتعلي صوتك مش غير حني بس اللي ندووا المكان كله يدوي عليك..مترجمة شني هادي اللي يجيبها استاذ زايد اللي عنده الفرنسيه والروسيه والصينيه والألمانيه وبالانجليزي يدوي خير من العربي!..
رنده انصدمت بقوة..
التانيه قالت:استاذ زايد اساسا عايش في بريطانيا..
:حني هني كلنا سكتنا وماقدرناش نتكلموا...حسينا في ان...
رنده كانت مصدومه بقوة..وموجوعه هلبه..
خطر عليها محمد وكلام محمد عنها اللي حكاه يوم الجلسه السريه...
طعن تاني في شرفها كلام تاني عن عرضها..
وهي مطلقه.....يعني الكلام اللي طلع توا اسوأ من اللي انقال عنها قبل..
هني هي فهمت نية زايد كيف بينلها الموقف اللي صار والكلام اللي سمعاته..
هي فهديكا مخها وقف عن.التفكير..الغضب هو اللي كان مسيطر عليها سيطره تامه..
مشت بتطلع تلاقت هي واسماء دفت بكتفها ومشت طلعت..
اسماء؛خيرها هادي!..
ومشت لحقتها..
:ياحليلي ياريتني ماتكلمت غبارتي السودا..
:ان شاء الله مانمشيش معاك في القص..
•• وصلت رنده لمكتب السكرتيره وقالت بغضب:استاذ زايد داخل..
السكرتيره هزت راسها بإيجاب..
مشت بسرعه رنده لمكتبه..
والسكرتيره لحقتها وهي تقول:وين ماشيه..
اسماء:رنده..
رنده فتحت الباب وخشت..
لقت عنده واحد من الموظفين..
هما الزوز شبحولها بإستغراب..
رنده وهي تحاول تتحكم في اعصابها وقالت والعبره خانفتها:ممكن لو سمحت شويه..
زايد شبحلها وقال؛برا اطلع توا بعدين نكملوا..
الموظف ناض ومشي طلع من حداهم...وسكر الباب..
وهو طالع قال:شن في خيرها هادي!؟
اسماء؛مش عارفه..
••داخل..
رنده؛انت كيف دير فيا هكي؟!
هو ناض وجي وقف قدامها وهو يقول:اليوم كنت بنتكلم معاك في الموضوع..
رنده:تتكلم معاي في شني !!؟ شن تشبح فيا انت!؟.
زايد وقف قدامها وقال:اني اسف فعلا بس ماقدرش نسكت ع حق حد نشوفه ضايع قدامي..اني عارف ان ماكانش عندك علم بوجود بنتك في حوش جدودها من بوها وخل نقولوا هما مابوش يسلموهالك..لكن الشرطه حتاخد البنت غصب عنهم يبوا ولامايبوش بس قبل هكي لازم يكون عندك علم.
رنده بصدمه؛شن تقول انت شن تقول!!؟شن درت انت!؟.
زايد:اللي لازم يندار من زمان هو خدي اللي يستحقه وبنتك ولتلك..
رنده بإنفعال؛وانت من قالك مازال نبي بنتي توليلي من قالك..بنتي توا خدت ع بوها وع حياتها معاه معاش نبيها مانبيش نفسدلها حياتها ونخربها مانبيهاش تنحرم مره تانيه..اني رضيت بنصيبي وقسمي من هالدنيا همي توا بنتي تعيش مرتاحه حتى لو ماكانتش معاي..علاش درت فيها هكي علاش....! انت اساسا شن تبي مني قول جايبتي تخدمني هني مترجمه وانتي مافيش لغة ماتعرفهاش لا وعايش في بريطانيا فوق هكي..جايبني هني بش تضحك عليا وتخليني سيرة ع لسان اللي يسوى واللي مايسواش!؟ بالك تحساب باللي درته بتوصل لحاجه اهو ربي فضحك والله لو من ماكنت تكون ماك طايل ظفر من ظفاري..
زايد هو عاقد حواجبه؛اني نبي نتزوجك رنده..
شبحت بنظرة صدمة ممزوجه بالإستغراب الشديد..
زايد؛هدا اللي نبيه منك بس..واللسان اللي جاب سيرتك بالغلط نقلعه من جذوره ..
رنده بلعت ريقها ومررت نظرها حواليها وقالت؛استغفر الله العظيم..استغفر الله...شبحتله وقالت:مانبي منك شي غير انك ترد البنت لبوها وبس..شي تاني حنعتبر روحي ماسمعتاش..
وحولت من رقبتها التعريف متاعها ولوحاته ولفت ومشت طلعت..
وسكرت وراها الباب بقوة..
هو غمض عيونه وشد ع قبضة يده بقوة من الغضب..
🍁اما هي كانت ماشيه هاربه باللي قعدلها من نفسها..
حست روحها تحطمت تماما ....
الضربات اللي كلتهم من هالحياة دمروها..
وين ماترجع توقف ع رجليها وتكمل حياتها تجيها ريح تعصف بيها ترفع فوق بعدين اطيحها..
تتسأل وتقول..
كنت سيئة لهالدرجه باش ربي انتقم مني هكي!؟
وين ترجع تذكر كلام لينا...
تستغفر في نفسها وتقول...
يارب معاش قادرة نتحمل تعبت...
ربي لطفك..ربي رحمتك..ربي عافيتك...
تعبت...
🍁🍁🍁🍁
واقفه فم الباب تتفرج عليه وهو يحط في شناطي دبشها في السيارة...
بعدين ركب وشغل السيارة وتحرك..
رمضانه ودموعها ينزلوا:اييه اللي مات مات ع عمره...الله يرحمك يانوريه يابنتي ويسامحك...
ولفت وجت بتخش جو عيونها ع حوش ولدها..شبحتلها بحسرة بعدين مشت خشت داخل...
🍁في الحوش..
كانت واقفه ع الزيانه تتكلم بتليفونها وهي تشبح لعقد اللولو اللي لبساته في رقبتها..
اكرام:ايه اليوم بيجيب عمال يركبوا دار نومي هني..وبعدين بالشويه بالشويه نبدا نركب الأثاث...
"عتبة خير حبيبتي"
اكرام؛آمين...تسلمي ياقلبي...
🍁🍁🍁🍁🍁
الشريف وهو شاد دموعه:جيتك قبل بش ناخدهم انت قلت مايطلعوش من الحوش والحوش بتسكره وبتخليه ع حطة يدها..
حسين تنهد وقال:مافي حد يموت ع حد ياعمي..حتى ولدك سفيان خدي مرت خوه وجاب منها صغار..
الشريف عقد حواجبه وقال:شن دخل هدا في هدا!؟
حسين:دخله ياعمي نبي نوصلك ان الحي ابقى من الميت زي مايقولوا هي الله يرحمها ويسامحها كانت ونعم المراة لكن توا خلاص هي عند ربي وحني مازلنا هني والحي يبي والميت يبي ياعمي...
الشريف:الصغار ماتفكرش تاخدهم..
حسين؛لا الصغار اني مأمن عليهم عندكم حيعيشوا احسن عيشه...وتوا نستأذن..نشوفك ع خير...السلام عليكم..
ولف ومشي طلع من الحوش...
الشريف مشي وراه وسكر الباب...
والتفت وشبح للشناطي..
ع طلعة وجيهه شافت الشناطي وقالت؛شني هادم؟
الشريف بحزن:حوايج نوريه..
وجيهه قعدت تشبح للشناطي ودموعها ينزلوا..
والشريف مشي قعمز ع واحد من الكراسي وهو يشوف للشناطي والدموع غلبوه..
وجيهه مشت قعمزت حتى هي..اتكت بمرفقها ع الطاوله..
وحاجه راسها ع يدها وبدت تبكي بصمت..
انفتح باب الحوش...وخشت سيارة رنده..
يلي كانت تبكي حتى هي شافت بوها وامها كيف مقعمزين..
درست ونزلت..
شافت للشناطي وقالت؛شن هادم..
وجيهه ببكي:حوايج نوريه...
رنده مجرد ماسمعت امها شن قالت انهارت بالبكي..
وامها بدت تبكي بالصوت...
والشريف حتى هو قعد يبكي ماتحملش...
لينا كانت داخل مقعمزة مع الصغار وزبيده...
ناضت بولدها في غمرها ومشت طلعت لما سمعت صوت البكي..
وصغارها الزوز مع الشريف مروان لحقوها..
زبيده؛خيرهم هادم ياربي امتى ترفع غضبك بس؟!..
وصلت لينا برا..
لقتهم يبكوا..عيونها دمعوا..
شافت للشناطي قعدت تشبحلهم هلبه بعدين قدمت وقال:شناطي من؟!
ماحد جاوبها...هي ماخدتش وقت زياده في التفكير بش عرفت لمن الشناطي..
وبدوا عيونها يذرفوا في الدموع...
#سبحوا_الله
يتبع....
