كل شي حيخليك بعد موتك الا اعمالك الصالحه حتلحقك..
واولها الصلاه..ماتبدي عليها شي في الدنيا مهما كان مهم كله زائل وهي بس اللي حتقعد...الصلاة اولا🌸
قولوا لاإله إلا الله تفلحوا باللسان بالقلب وبصوابعكم اللي تكتب🌷
وصلوا ع الحبيب اسعدكم الله بجواره في جنات النعيم💖
🍫🍫🍫🍫🍫🍫🍫🍫🍫🍫🍫🍫🍫🍫🍫
درس السيارة قدام المدرسه وقال..
رياض:هي هادي مدرستها شويه ويبدوا يطلعوا...
ميسم قعدت تشبح لباب المدرسه..
رياض:زي مافهمتك وردي بالك تخليها تعرف اني صاحب خو صاحبتها..مانبيش مبشر يعرف ..
شبحتله وقالت:علاش..
رياض:مانبيش واحد يعرف من هي البنت اللي نبيها حتى لو كان صاحبي....وهو داير معاي نفس الشي واني محترم تصرفه هدا..
ابتسمت ميسم..
رياض:هيا هيا اللي لابشه شال وردي..
التفتت ميسم وشبحتها وفتحت باب السيارة ونزلت..سكراته وشافت للطريق بعدين مشت تجري..
ورياض يشوفلها بلهفه وترقب..
🌸وقفت ميسم ع رتيل وقالت..
ميسم:سلام صبايا..
وقفوا الزوز وهما يشبحولها وردوا السلام..
ميسم وهي تشبح لرتيل؛اني بنت اخت الشاب هدا اللي راكب سيارة ******..
شبحوا الهام ورتيل للسيارة..
وعيون رتيل جو في عيون رياض..طول غيرتهم وشبحت لميسم وقالت:ايه!
ميسم بإبتسامه:لما توصلي قدام حوشكم راجيني ماتخشيش..بليز حبيبتي مافي شي تخافي منه..
ولفت ومشت تجري للسيارة..
رتيل:هادي خيرها!؟
الهام:كان تشوفيه كيف يشبحلك بيهبل عليك..
رتيل ببرود:اهو جي الباص..
وجبدت صاحبتها ومشوا ركبوا..
وهو طول لحقها..
ميسم:عندك حق صراحه البنيه حلوة بالمرة..
ابتسم رياض وقال:مش حلوة بس..بنت ناس ومتربيه صح..
ابتسمت ميسم..
وقعدوا ورا الباص لين درس برتيل قدام للحوش..
نزلت ميسم تجري ومشتلها..
ورياض يشوف فيهم بتوتر..
وصلت ميسم في رتيل وهي داهشه:شكلك خفتي مني..
رتيل:شن تبي مني!؟
ميسم بضحكه:قتلك اللي راكب السيارة خالو..
وكان مش مصدقه اها..وطلعت تليفونها وقعدت ادور ع صورة..بعدين ورتهالها كانت عائليه فيها هي وامها وخالاتها وخوالها من بينهم رياض..كانوا واخدينها في الطبيعه..
ميسم :هدا خالو رياض..
رتيل شبحتلها وقالت:باهي تفضلي خشي..
ضحكت ميسم وقالت؛باهي اللي اقتنعتي..
فتحت رتيل الباب وهي خاطرها"شكلهم عيلة مهبوله"..
خشت وقالت:تفضلي..
خشت البنت ورتيل سكرت الباب..
لقوا سفيان واقف قدام باب المربوعه..لما شافهم خش طول..
رتيل بشي من الخوف:خوي الكبير..
ميسم هزت راسها وقالت:ممكن تقعميزيني هني شويه نقول الكلمتين اللي عندي ونمشي..
ع طلعة لينا..
مشتلهم وهي تقول:رتيل..شبحت لميسم ابتسمت وقالت؛اهلا..
ابتسمت ميسم بإعجاب عجبها سمار لينا مع جمالها..
رتيل:مرت خوي الكبير..
ضحكت ميسم وقالت:فرصه سعيده..
لينا بإبتسامه:انا اسعد..تفضلي..
ميسم:لا والله مستعجله خالي يراجي فيا عندي كلمتين مع رتيل بنقولهم ع السريع ونمشي..
لينا:تمام قوليهن داخل عيب تقعدي برا..
ميسم:ارجوك اعفيني والله مستعجله..
لينا هزت راسها وقالت:باهي....خودو راحتكم ولفت ومشت خشت داخل..
رتيل:تفضلي..
ميسم مشت قعمزت ورتيل قعمزت قدامها..
ضمت ميسم كفوفها لبعض وقالت؛ياستي..خالي رياض سنه اولى هندسه..معجب بيك هلبه هلبه..لا هو مش معجب..يحبك ويبيك بجديات..وحاليا مايبي منك شي لاعلاقه لامكالمات لاشي..يبيك بس تعرفي مشاعره وان هو مستنيك لين تتخرجي من الثانويه بش يجي يخطبك..
رتيل:مافهمتش يعني شن المطلوب؟
ميسم:يبيك تراجيه زي ماهو يراجي فيك ..
رفعت رتيل حاجبها بتعجب..
ميسم ابتسمت وقالت:مش لأنه خالي نشكرلك فيه بس والله هو راجل وقدع "جذع" وخلوق ويخاف ربي..ويبيك بالحلال هدا علاش لايبي يكلمك ولايتواصل معاك قبل ليصير اي شي رسمي..
رتيل قعدت تشبحلها وهي ساكته..
ميسم:طبعا خودي وقتك وفكري وحنجي يوم ثاني وناخد منك الرد..
ع جية لينا في يدها سفره فيها زوز طواسي "هوت شوكلت"
لينا:تفضلي..
ميسم ناضت :حي والله مافيها كيف بنطلع..
لينا:خوديه معاك..
رتيل:ايه تفضلي..
ابتسمت ميسم وقالت:شكرا..وخدت الطاسه اللي كان تيك وي كبيره مغطيه وقالت..صحيتي..فكري رتوله ومش حتندمي صدقيني..سلام...وشكرا مرة تانيه..
لينا بإبتسامه:العفو..
مشت ميسم طلعت ورتيل سقدتها..وسكرت وراها الباب...
وهي مشت بسرعه لسيارة خالها فتحتها وركبت..
رياض بضحكه؛ماشاء الله حتى ضيفوك..!
ميسم بضحكه:عمري ماحننساه هاليوم عليك مغامرة مجنونه..
ضحك بعدين قال:والنتيجه..
ميسم:مش عارفه..البنت حتى ابتسامه مابتش تبتسم وحسيتها مش متقبله.
تنهد وهز راسه وهو مبتسم قال:متوقع..وشغل السيارة وتحرك..
ميسم بعد شربت من "الهوت شوكلت":امم يجنن..
ضحك رياض..
🌸🌺في نفس الوقت في حوش الحاج الشريف..
لينا:صاحبتك؟
رتيل:تس تس..تعالي نقولك
ومشت قعمزت ولينا قعمزت مقابلتها..
قربتلها رتيل الكرسي وقالت؛هدا من اول ماخشيت المدرسه وفي واحد شبه يوميا يجي للمدرسه في المرواح يدرس السيارة ويقعد يشبحلي لين نروح ويلحق فيا للحوش..
لينا بإنتباه:ايه!
رتيل:ايه..واليوم بعتلي بنت اخته تكلمني قالت مايبيش منك شي غير انك تراجيه لين تتخرجي من الثانويه ويجي يخطبك..
لينا وهي عاقده حواجبها بريبه:الموضوع مريب شويه..السمعات اللي نسمعوا بيهن هالوقت يخلينك تتوقعي كل شي ردي بالك رتيل..
رتيل:ولاحنعبره ولاهامني اصلا بارد ومدرهلي كبدي..
لينا:حتى لو عاجبك كيف ماقتلك خلي عقلك في قرايتك بس يارتيل..
رتيل:اكيد..بس بنقولك..مبشر اليوم بعتلي رساله..
لينا؛وخديتيها؟
هزت راسها وهي تضحك..
لينا:باهي كويس خل اطيح في يد سفيان.
رتيل:درتيلي بيه الرعب يالينا اصلا نعرف وين ندسها المهم بنقرهالك بعدين..
لينا؛باهي هكي انتي مادامك خديتي رسالته معناها خلاص يارتيل..
رتيل؛لالا والله لا قلت لاخته تقوله اللي في باله مش حيصير منه بكل..اصلا اني خلاص اقتنعت قناعه تامه اني الحب بعد الزواج احلا بهلبه..بالذات لو خداني وهرب بيا في ليله ممطره مرعده..وقعدت ترقص في حواجبها..
لينا بضحكه وحواجبها معقودات:تحشمي يابنت!..
"داخل"..
شبحوله الزوز وهما مخلوعات..
لقوه يشوفلهم وهو عاقد حواجبه ومضيق عيونه..واشرلهم بيده يخشوا..
هزت لينا راسها وجبدت رتيل ومشوا بسرعه من جيهة الكوجينه..
وهو معاهم بعيونه لين ادرقوا...شويه وجت رتيل تجري..خدت سفرة الهوت شوكلت ومشت بيها بسرعه..
هو حرك راسه يمين ويسار بعدين خش لصاحبه في المربوعه..
🍁🍁🍁🍁
"خدتها"
الهام:ايه..
مبشر ابتسم وهو يقول في نفسه"ابن اللذين ءامنوا يارياض"
الهام:لكن بنقولك راهو اليوم هداكا جي ومعاه وحده معاه قالت بنت اخته تبي تكلمها عليه وقاللتها قدام الحوش استنيني ماتخشيش لين نكلمك..
عقد حواجبه وقال بغضب:الكلب هدا..اتصلي بيها توا شوفي شن صار معاها..
الهام:بعدين تو نكلمها..
مبشر بعصبيه مكتومه؛اني قلت توا يعني توا..
تأففت الهام ومشت بتاخد تليفونها بش تكلم رتيل..
🌸🌸🌸🌸
فهالوقت في دار رتيل..
كانت لينا مقعمزة تقرا في الرساله..
ارتسمت ع وجهها ابتسامه خفيفه وهي تقرا فيها..
رتيل:شفتي كيف تأثرتي لما قريتيها..
لينا:يقعد كلام يارتوله...ماتخليشي ياخد عقلك..
رتيل؛ياودي ماتخافيش والله الغلط مانديره..
لينا؛وانا مصدقاتك بش نبي نزيد نحرص عليك..
رتيل خدت منها الرساله وهي مبتسمه..
ولينا ناضت وهي تقول:ردي بالك رتوله اها..
رتيل بضحكه:واااي..
ابتسمت لينا ومشت طلعت وسكرت الباب..
فجاة رن تليفون رتيل..
مشت خداته من ع الزيانه شافت المتصل ضحكت وقالت:قصقاصه..وردت عليها...
🌺🌺🌺🌺
ولينا خشت للكوجينه..
لقت رنده تسقي فب الغدي..
لينا:باهي خليني نغسل الماعين...
رنده:ماتمسي شي اني نبي ندير كل شي لبابا وخوي وكل من يعز عليهم..
ابتسمت لينا وهي تشوفلها..
ع خشة امها:هاه خلاص..
رنده:ايه..رني الجرس يام...
رنت وجيهه ع جرس المربوعه...
شويه وجي مروان..
وطلعت معاه امه السفره..
خداها ومشي للمربوعه..
رنده:اطلعي من حداي بري قعمزي حدا امي لين نجيب الغدي..
لينا بإبتسامه:حاضر..
ومشت لينا طلعت..
ورنده كملت حوستها...
🍁🍁🍁🍁
وتغدا ابوبكر وشرب الشاهي بعدين توكل...
وقعد سفيان مع بوه وخوه يحكيلهم اللي صار مع المحامي..
مروان:اني ضده الموضوع هدا وحنقعد ضده وان شاء الله نندم اني جت ضده ومايصيرش معاكم العكس..
الشريف:حنندم لو سكتت عن حق بنتي وخليك واحد واطي يدير فيها اللي داره ومايتحاسبش..
سفيان:خلاص مروان الموضوع منتهي وبإذن الله خيرتها في اللي بيصير..
سكت مروان وهو مضايق ومش راضي..
الشريف:زيد قعمز مع اختك ياسفيان وفهمها كل شي خليها تزيد تفكر اني خايف عليها هي ماتتحملش..
سفيان هز راسه وقال:إن شاء الله..
🍁🍁🍁🍁
وصلى سفيان العصر مع بوه وخوه في الجامع..
بعدين مروان توجه للمستشفى..
وسفيان بوه للمحلات اللي اصر الشريف يدير عليهم دورة..
🍁في نفس الوقت..
كانت وجيهه تستقبل في الاتصالات من نساوين العيله..
حموات سلفات..قريبات راجلها..
ولكل وحده كانت تشرح في نفس السبب اللي كلهم اتفقوا عليه..
ورنده تسمع وتشوف لوجه امها كيف منسود عرفتها قاعده من داخل تسحن في روحها ..عارفه ان اغلب اللي كلموها سمعت في كلامهم نبرة شماته...
وهالشي كان مضايق رنده هلبه لدرجة البكاء لأنها هي سبب اللي تعرضوله وقاعدين يتعرضوله اهلها...
🍁🍁🍁🍁🍁
الساعه 10:45ليلا..
في الصاله...
سفيان:خلاص...هدا اخر كلام..
رنده:ايه اخر كلام..حقي وحقكم منه ناخده وبنتي حترجعلي بإذن الله..
سفيان هز راسه وقال:خلاص..معناها وتي روحك بعدين يومين بإذن الله حتشوفي المحامي وتحكيله كل شي..
رنده؛ضروري؟!
سفيان؛ايه ع حسب كلامه لازم يسمع منك..
رنده تنهدت بضيق وهزت راسها بالموافقه...
🍁🍁🍁🍁🍁
واقف ع طاولة مكتبه يشوف في ملف لقضيه قدامه...
ويشرب في القهوة..
فجأة رن تليفونه...شاف الشاشه..
تنهد بملل وخلاه يرن ورجع يشوف للملف..
فصل الاتصال...ورجع عاود مرة تانيه...
تأفف فصل ع الاتصال ودار هاتفه ع الصامت..
شويه ورن تليفونه التاني..
تأفف وخداه وفتح الخط ورد..
انس:شن تبي متصله في وقت زي هدا وعارفه ان الصغار راقدين!
"قلت بالك سهروك نكلمهم بش يرقدوا"
انس سكت شويه وكيف جي بيتكلم قالت..
"تصدق استاحشت صوتك هلبه"
سكر في وجهها وحط رقمها في الحظر ولوح التليفون ع الطاوله..
رشف من القهوة..وخدي نفس بعدين سكر الملف..
ومشي لسريره..
خشه...ورقد ع ظهره..وقعد يشبح للسقف..
وحط ايديه ع صدره وشبك في بعض وقعد يفكر في وضعه..
كيف بيدير مع زوز صغار يبوا رعاية وعنايه تامه واهتمام...
امه مراة كبيرة ومريضه ماتقدرهمش بروحها..
فكر يجيب خدامه..او مربيه..بس تراجع عن الفكره مش حيخلي صغاره للخدم..
باهي شن الحل...
زواج مرة تانيه مستحيل يتزوج بعد اللي راه مع مرته الاولى وفي نفس الوقت مستحيل يجيب لصغاره مرت أب...
تنهد وقال بدعاء المحتار:ربي آتني من لدنك رحمة وهييء لي من امري رشدا...
🍁🍁🍁🍁🍁
خشت عليه الدار وقعمزت ورا كرسي الزيانه تدهن في ايديها بكريمة الفازلين..
لينا؛وشنن ايديا من الصقع..
سفيان شبحلها وقال:ماديري شي بالميه المصقعه..
لينا:لالا هدى من الصقع..
سفيان قعد يشبح لإيديها وهي تدهن فيهم قال:يبوا معاينه؟!
لينا بضحكه:لالا مش مستاهلات بالكريمه هدي يمشي حالهن..
سفيان هز راسه ورجع شاف للاب توب..
لينا اتكت بمرفقها ع الزيانه وحطت يدها تحت خدها وقالت:رجعت لنيوتن الليبي..
سفيان ساوا نظاراته وابتسم وقال:مانقدرش نتخلا ع حبي الأول..
لينا:والله!؟
ضحك وقال:ارضي بيها هي ضرة ع الاقل..
لينا بغيره:ولانرضى بأي حاجه تشاركني فيك..
سفيان شبحلها وهو مبتسم..
وهي انتبهت لنفسها كيف تكلمت غير عيونها عنه وهي مرتبكه ومتحشمه..
ضحك بعدين قال:هي نوضي معاي الصاله بندير فيديو جديد بنزله توا..
لينا ابتسمت بحماس وقالت؛هيا..وناضت..
وهو ضحك وناضت..
خدي تليفونه ومشي طلع هو وياها من الدار للصاله..
هو قعد يجهز في السبورة والتليفون اللي حطه ع وضعيه مناسبه للتصوير..
لينا:تمام هكي..
سفيان:ايه تمام..
سيبت لينا السبورة وجاته..
سفيان حول نظاراته ومدهولها وهو يقول:يوم الخميس عندنا مشية لحوش ابوبكر.
لينا وهي تمسح في مرايات نظاراته:يوم الخميس العيله بيجوا..
سفيان:عارف ماتخافيش مش حيروحوا قبل يشوفوا رنده..
مدله النظارات وقالت:رنده بتمشي معانا..
خداهم ولبسهم ومشي بإتجاه السبورة وهو يقول:ايه المحامي اللي بيمسك قضيتها قريب زوجة ابوبكر..
وقف حدا السبورة وقال..طلب يشوفها بش يسمع منها..
لينا وهي واقفه حدا التليفون هزت راسها وقالت:ان شاء الله خير..نشغل..
هز سفيان راسه بإيجاب..
وهي شغلت تصوير الفيديو...ومشت قعمزت..
وهو بدي يشرح ومش باين منه شي الا ايديه..
كانت منسجمه معاه ومرة مرة تضحك ع تعليقاته..
واعجابه بيه يزيد وهي تشوف كيف متميز في تخصصه وعبقري في توصيل المعلومه..
بعد كمل ناضت وقفت الفيديو وقالت:الف لايك مني...
سفيان :اني نبي نسمعها بالعربي..
لينا:الف قلب مني..
سفيان:شكولينا لئيمه..
ولينا تضحك..
خدي التليفون..وخدي يدها ومشي بيها وقعمزوا ع الكنبه..
سفيان وهو شاد تليفونه:ماهو لو تعرفي اللي حسيت بيه لما قلتيها راك ماكلمتنيش الا بيها..
ابتسمت وقالت:شن حسيت..
سفيان:باللي حس بيه كافكا لما صرحتله حبيبته ميلينا بحبها...قال...قالت لي احبك..فخرجت الي الشارع لان سماء الغرفه لم تكن كافيه لتحليقي..
لينا بضحكه:انت ماطلعتش الشارع..
سفيان؛اني قلت احساسي زي احساسه ما قلتش درت زيه..
لينا بضحكه:تقعد ليبي الجو هدى مش متاعنا..
حط التليفون جنبه وقال بتحدي:قوليها انتي توا ترا قوليها وشوفي الليبي شن يطلع منه..
لينا قعدت تضحك :باهي خلاص نبصر عليك اهدي..
سفيان؛والله لما تقوليها توا الله..
لينا قعدت تضحك..
سفيان؛حلفت اني.
لينا هدت ضحك بعدين ابتسمت وقالت..امم..نحبك..
هو تنهد بعمق وقلبه قعد يرفرف بين ضلوعه...بعدين ناض..
ومشي للدار ولينا معاه بعيونها وهي تضحك بإستغراب.
شافاته بعدها طالع ولابس كبوط اسود ع التوته ومشي طلع من الشقه.
هي بصدمه:حي عليا الراجل هبل!
ناضت تجري لدار النوم لبست ملايتها ومشت طلعت من البلاكونه..
لقاته طالع ع رجليه من الحوش..
لينا:حي عليا الجو صقع سم..ليش استفزيتيه يالينا غابيه في طبعه انتي!
وقعدت لينا واقفه في البالكونه وهي في قمة القلق..
لين خش للحوش وفي يده شكارة..
هي شافه لين جي للدروج بعدين ادرق عنها..
خشت داخل وسكرت البالكونه كويس..
بعدين مشت طلعت من الدار بمجرد ماوصلت للصاله هو فتح باب الشقه وخش..
جاته وهي تقول:غير ليش معدل عليا بس والله كنت نضحك معاك..
سفيان قرص انفها وقال:اسكتي وتعالي..
وخدي يدها ومشي قعمز معاها ع الكنبه وطلع من الشكارة شكولاته البانيو..
لينا ضحكت بدهشه لما شافتها وقالت؛سافيوش وين لقيتها هدي؟!
سفيان بإبتسامه:مازالوا ييبعوا فيها في محل قريب علينا يومها شفتها عندهم..
قعدت تضحك لينا..
بعدين شبحتله وقالت..خل نوض ندفيلك بابونج طالع في هالجميدي ياهمي..وناضت بتمشي..
رفع حاجبه وقال:ياهمي!!؟ الناس تقول حبيبي وعمري وروحي وانتي تقولي همي..ليبيه شن بيطلع منك يعني..
ولينا خشت للكوجينخ وهي تضحك عليه..
☘☘☘☘
ومروا يومين...
والحال كما هو عليه ماتغير شي..
ورنده عايشه حالة من التوتر مخليتها مش قادرة ترقد الليل..
برغم محاولة اللي حواليها تشجيعها والتخفيف عنها...
وقعدت هكي لين جي يوم الخميس..
وبعد العصر..
مشت هي وخوها ومرته لحوش ابوبكر...
كانت طول الطريق تردد بهمس..
"لاإله إلا انت سبحانك اني كنت من الظالمين"
وخوها يشوفلها من المرايه وقلبه عندها...
🍁وصلوا لحوش ابوبكر..
ووين خشوا..
لقوا عند سهيله مرت خالها وزوز صغار صغيرين مقعمزين جنبها عاقلين..
ابتسمت رنده وعيونها تعبوا دموع لما شافت البنيه اللي كانت تشبحلها..
وام انس تشوفلها برغم ملامح الهم اللي باديات ع وجه رنده الا انهم ماقدروش يدرقوا زينها...
••سهيله:هادي مرت خالي الله يرحمه...ابله فاطمه..ابله فاطمه هادي مرت سفيان صاحب ابوبكر..وهادي اخته..
فاطمه قعدت تشبح للينا وهي مبتسمه قالت:الله يبارك..
لينا ابتسمت بخجل وقالت؛تسلمي..
وسهيله تمرر في نظرها عليهم بإبتسامه بعدين قالت:هادم الحلوين..فواز...وفاطمه الصغيره..
رنده بإبتسامه؛ربي يحفظهم..
ام انس بإبتسامه:تسلمي بنتي...
••••••••
"لازم بروحي اني وياها"..
سفيان:مش خاشلي راس كلامك..
تنهد انس وقال:في تفاصيل ممكن اختك تستحي تحكيها قدامك..
سفيان:بتحكيها قدامك انت!
انس:ايه لاني مش اكثر من محامي بالنسبه ليها..ليا معاها شغل نتمه ونمشي ع حالي لكن انت خوها فاهم عليا..
ابوبكر:سفيان اني نعرف انس كويس ياسفيان يعرف شغله وعارف شن يدير..
انس:وبش يطمن حضرته حنقعمز اني وياها برا تحت المظله اللي قدام الحوش..
وانتم تقعمزوا ع الطاوله اللي مقابلتنا..
سفيان شبح لأبوبكر.
ابوبكر غمض غيونه وفتحهم..
تنهد سفيان وقال ع مضض:تمام...
ابتسم انس بجديه وهز راسه بإيجاب...
🍁🍁🍁🍁
"تعالي حبيبتي"..
ومشت رنده وهي متوتره مع سهيله..
لين وصلوا لفم الحوش..
سهيله:ابوبكر..
"تفضلي اختي"..
طلعت رنده...كانت لابسه قونه سودا فضفاضه..
تحت بالطو طويل مصكر ببطم وحزام في النص واصل للركبه كاروهات ابيض واسود..
ع شاربه لونها ابيض في الاسود محشيه في البالطو..
وفي رجليها كندره سودا حاطيه..
وهي ماشيه كان ابوبكر مقعمز وعاطيها بالظهر وخوها مقابلها..
شبحتله..اشرلها بإتجاه المظله..
شبحتلها..شافت واحد مقعمز وحاط رجل ع رجل لابس سروال جينز اسود وفوق تيشرت شتوي لونه عنابي وفوقه بالطو اسود..موجه نظره القدام ...
بتوتر مشت ناحيته وقعمزت مقاديتها مش قدامه..
رنده:السلام عليكم..
انس بدون مايشوفلها :وعليكم السلام..كيف حالك اختي رنده..
رنده:الحمد لله على كل حال..
انس هز راسه وقال:الحمد لله ع كل حال..اختي رنده اني عندي خلفيه عن مشكلتك لذلك عندي كم سؤال مهم جدا تجاوبيني عليهم..
رنده:تفضل..
انس:علاش قعدتي ساكته عن طليقك لما كان يمارس عليك في العنف الجسدي؟!
رنده:ماكنتش نبي المشاكل..
انس:ماكنتيش تبي تطلقي..
رنده:احمم...ايه..
انس:تمام..في شي عندك يثبت اعتدائه عليك بالضرب؟
رنده:ايه تقرير في وحده من العيادات داراته دكتورة..
انس:اعتدائه عليك كان محصور بالضرب بس؟
غمضت عيونها بشده ونزلت منها دمعه..
هو فهم عليها وقال:باهي...لما كان يكلم فيك فترة كنتي في حوش اهلك..شكيتي فيه ولالا..حسيتي بشي مريب..
رنده:لا..
انس؛كلمك قبل لتطلعي من الحوش كم مرة..
رنده:مرتين..
انس:من رقمه ولارقم تاني..
رنده:لامن رقمه..
انس هز راسه وقال:الحاجات اللي عندك تثبت خيانته راحو مع الهاتف اللي راح؟
رنده:لا..اني غيرت تليفوني في اليوم نفسه اللي طلعن فيه من حوش اهلي...قعدت نستعمل في تليفون اختي اللي نقلت عليه كل شي لان تليفوني صارتله مشكله بسيطه في الصوت..
انس؛يعني توا انتي االتليفون اللي عندك تليفون اختك فيه كل شي.
هزت راسها وقالت:ايه..
انس:علاش درتي هكي..كنت شاكه فيه!؟
رنده؛لا بس من باب الاحتياط..والله ماكنت متوقعه ولو واحد في المية انه ممكن يدير فيا اللي داره..
هز راسه وقال:الى الان مش خاشلي راسي كيف سكتي عنه وهو يعنف فيك..وعلاش كان يدير هكي اكيد في سبب..
رنده:كانت تصير بيناتنا هلبه خلافات واني ماكنتش من النوع اللي يسمع ويسكت..وهو مايتحملش طول يتعامل معاي بالضرب لين معاش نقدر نتحرك بعدين ياخد مني هاتفي ويطلع ويسكر عليا الشقه نقعد محبوسه باليومين بالتلاته..وبعدين يرجع يعتذر بالكلام والهدايا..وانا كنت نسكت ونمشي..وكل خوفي فعلا كان من الطلاق وكلام الناس وشماتتهم..
انس:وهاك دفعتي الثمن وجاك كلام الناس جاك..
نزلوا دموعها من جديد وهي تمسح فيهم وقالت:هادي غلطتي اللي مش حنغفرها لنفسي لين ناخد حقي منه وناخد بنتي..ونرد اعتباري..
انس؛تمام..لكن نقولك من توا قضيه زي هادي مشوارها طويل حتتعرضي لهلبه مواقف صعبه صعبه هلبه..ماتجيش في نص الطريق وتقولي بننسحب اني مانعرفش ناخد قضيه لين نكملها للأخر....قداللي بتخشي عليه توا ولا لا!؟
رنده بتحدي:قده بإذن الله...حتى لو انعرفت قصتي مرات تشجع هلبه نساوين غيري صار فيهم زي ماصارلي ياخدوا حقهم حتى هما ومايسلموش فيه..
هز انس راسه وقال؛تمام...توا نبيك تحكيلي بالتفصيل اللي صار يوم طلعتي معاه من حوش اهلك..
وقعدت رنده تحكيله ع اللي صار وهو يقاطع فيها بأسئله توتر فيها كله بش يعرف مدى صدقها..وكانت فعلا صادقه وهدا للشي اللي تأكد منه..
انس:اها لما خش للفندق كان لابس نظارات شمسيه وطاقيه..
رنده:ايه..
انس:من بعدها معاش طلعتوا..
رنده:ابدا..حتى الغدي والعشي دخلوهم الروم سيرفس بدون مايطلعلهم..يدخلوا ويطلعوا..
انس قعد يفكر وهو ساكت..
هي قامت عيونها شافتله..
جذبتها نظره عيونه للفراغ كيف كانت حاده...
استاقظت لروحها ونزلت عيونها لوطا..
انس؛امم..تمام تمام..خلاص اختي رنده تقدري تتفضلي..
رنده هزت راسها وناضت...وهو قعد يشوف لتليفونه..
رنده لما ناضت بدون سبب..
انفكت حديده من يدها وطاحت..
هو شبح للحديدة وقال:معليشي..
هي كانت بتمشي وقفت والتفتت شبحتله..
جو عيونها في عيونه..
كانوا كبار...زرق..جميلات...وكانه يشوف لمراية البحر...
ارتبك..وطبس جاب الحديده وحطها ع الطاوله وهو عاقد حواجبه هي خدتها وقالت:شكرا ..ومشت..
طول بدون ماتشوف لحد خشت داخل..
وهو ناض وقف بلع ريقه وشبح لسفيان ابتسمله..
ومشاله...
انس:الموضوع ولا واضح توا...بإذن الله القضيه رابحه استاذ سفيان..بس تبي نفس طويل..
سفيان:عارف هالشي من البدايه..
انس؛خلوها حتى هي تعرف هالشي كويس..وتستعدله..
سفيان:اكيد..
انس:خير ان شاء الله..
سفيان وابوبكر:ان شاء الله...
ابتسم انس وهز راسه بإيجاب...
وسفيان قعد مركز عليه واستغرب فيه كيف كانت ملامح جامده من اول ماعرفه لقبل مايقعمز مع رنده وبعدها قعد يوزع في ابتسامات...
انس:بالله خش قول لامي هيا..
ابوبكر:وين ياراجل اقعدوا تعشوا..
انس:مرة تانيه ان شاء الله...والله مشغول هلبه..
ابوبكر :باهي خليهم ولما تكمل شغلك وليلهم.
انس:المكتب بعيد وبيديرلي طريقين في الليل..ان شاء الله مرة تانيه نجو في وقت نكون فيه فاضي...
ابوبكر:براحتك استاذنا..استناني لحظه بس..
ولف ابوبكر ومشي...
وقعدوا سفيان وانس مع بعض ساكتين..
بعدين قال انس:حضرتك استاذ في قسم الفيزياء زي ابوبكر؟
سفيان هز راسه وقال:كنت..وتوا تحولت للتجارة بش نساعد الوالد وضعه الصحي معاش يسمح..
انس:ربي يشفيه ويعافيه.
سفيان:آمين..
ع طلعة ابوبكر:اهم طالعين..
انس:تمام..مديده وصافح ابوبكر؛نشوفك ع خير..
ابوبكر:ان شاء الله..
طلق ابوبكر وصافح سفيان:بعون الله حيكون كل شي لصالح الأخت رنده..
سفيان:ان شاء الله..موكلين الامر الله..ثم اعتمادنا عليك انت..
انس هز راسه وقال:ان شاء الله نكون عند حسن الظن..
طلق يد سفيان وقال:السلام عليكم..
ردوا عليه:وعليكم السلام..
ومشي طلع..
ابوبكر:قتلك راجل كويس وراجل عارف شغله..
هز راسه وقال:دخلني داخل دخل يبسنا..
ضحك ابوبكر وقال:تفضل نيوتن..
مشي سفيان وابوبكر مشي معاه...
شويه وطلعت فاطمه ومعاها الصغار وسهيله تسقد فيهم..
ركبت سيارة ولدها مع الصغار وهو تحرك طول...
فاطمه:الفجي فيها المراة مسكينه..زي الغزاله حرام تتبهدل هالبهدله..وجعتني كيف قعدت تشبح لفطومه دمعتها في عيونها..دير اللي تقدر عليه بش تجيبلها بنيتها..
ابتسم ع جنب وقال:بإذن الله...
....يتبع....
