عماد حياة المسلم..واكسيرها الصلاة..
واول شي يتحاسب عليه..لاخير في عمل يلهي عنها..
صلوا صلاتكم...بعدين ديروا اللي وراكم...
وقولوا لاإله إلا الله بقلب سليم طاهر تفلحوا❤
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
ع صوت المؤذن وهو يآذن لصلاة الفجر..
فاق..
شبح ليده لقاها فاضيه..شبح قدامه مالقهاش..
غمض عيونه وتنهد..بعدين فتحهم وناض بشويه قعمز..
قعد يشوف ليده اللي كانت شاده يدها كيف ملفوف عليها الشاش..
اذكر اللي صار امس كله..صدره ضاق...حس روحه مخنوق..
ومشمئز من الحياة...
هدا شعور الأنسان اللي يفيق من النوم ع واقع مر كان هارب منه..
نزل من السرير ومشي للحمام وهو يشوف ليده..
وصل في الحمام..فتح وخش..
🌺فهاللحظه..
هي خشت للشقه جايه من حوش شيابينها دارت طلة ع صغارها وركبت تشوفه هو..
مشت للدار وخشتلها..
لقتها فاضيه..بعدين سمعت صوت مية الشيشمه متاع الحمام عرفاته فيه..
طلعت من الدار ومشت للكوجينه..
خشتلها وخدت شيشة ميه بعدين طلعت من الثلاجه شيشة الزهر..حطت منها ريحه ع الميه..وبدت تقرا عليها..
هو طلع من الحمام وخش للدار بش بيبدا ويمشي يصلي..
وهي بعد ماقرت ع الميه..
طلعت من الكوجينه ومشت للصاله وبدت تصلي..
لحظات..
وطلع هو..وهو متوجه للباب شافها تصلي في الصاله..
ابتسم ابتسامه من وسط ملامحه التعيسه..
بعدين مشي طلع من الشقه...
🍁نزل لوطا..
وطلع من الحوش ع رجليه..
هالمرة اختار يمشي مشي للجامع بش يتنفس هواء الفجر النقي..وينشرح صدره شويه..
خطرت عليه نصيحة لينا عن الإستغفار..
لقي روحه يردد فيه...لعند ماوصل للجامع..
وغادي تلقوه جماعه من المصلين يعرفوا والده وقعدوا يسألوا عن صحته...وهو فوق اللي هو فيه مجبر يجاوب ويساير الناس..
🍁وفي المستشفى..
الحاج الشريف مازال في العنايه..
وحداه مروان اللي مافارقاش دقيقه..
بعد صلى الفجر...قعمز وقعد يتلى في القرآن بش بوه يسمع..
الحاج الشريف راجل متعلق بالقرآن برغم انه مش حافظه..
بس لازم يقراه يوميا وفي مكان عمله يفضي في نفسه بش يقراه..
وهو توا غايب عن الوعي..لكن قلبه حاضر بكل وعيه مع القرآن اللي مستوطن فيه مساحه كبيره...
والقلب بكلام ربه وذكره يطمئن..ويتادوا..ويشفى..
فتح عيونه بالشويه وهو يسمع في صوت ولده..
قعد يشبح للسقف..الصورة قدامه ماكانتش واضحه هلبه..
لكن سمعه كان افضل شي فيه..يسمع في كلام مولاه..
ويحس بشعور كله راحه...
ومروان يتلى..
...وبشر الصابرين الذين إذا اصابتهم مصيبة قالوا إنا لله وإنا إليه راجعون اولئك عليهم صلوات من ربهم ورحمه وأولئك هم المهتدون.....
مسح مروان دموعه وشبح لبوه بدون ماينتبه وجاي بيولي يشوف للمصحف بعدين عقله نبهه للي شافه..
رجع شاف لبوه لقاه فاتح عيونه..ابتسم بفرح من بين دموعه..
وقال..بوي..
سكر المصحف وجي وقف عند راسه وقال...بوي..
يدوب الشريف حرك عيونه ناحيته وين راه ابتسم ابتسامه متعبه...
ومروان طول طبس ع جبهته بوه وكب عليها وقال:الحمد لله حمدا كثيرا طيبا مباركا فيه ع سلامتك..
غمض الشريف عيونه وفتحهم تجاوبا مع ولده..
وولده ابتسم تاني ودموعه ينزلوا بعدين ضحك وقعد يمسح فيهم...
🍁🍁🍁🍁
ولى سفيان ع رجليه من الجامع...
وين قرب يوصل طلع تليفونه من جيبه بيغير الوضع متاعه لقي مكالمات فائته من خوه..
قلبه دق بقوة من الخوف...
قال:خير يارب خير..
واتصل بيه....طول فتح مروان الخط..
سفيان:هاه مروان..
"بوي فاق وحاله باهي ياسفيان"
غمض عيونه وتنفس براحه وقال في نفسه..
"الحمد لله"..
"الو..سفيان"
سفيان فتح عيونه وقال:الحمد لله رب العالمين خل نخش نبشر امي ...سلام توا..
"سلام"..
سكر سفيان..وكمل لباب الحوش..فتحه وخش..
••••••••
"الحمد لله رب العالمين الحمد لله"..
سفيان:الحمد لله...توا نبيكم تقولوا لحناي الناس سمعت وتوا ساعه تانيه وتبدا العيله تتوافد ع الحوش.
نوريه؛باهي كيف في حكاية رنده..كلهم عارفينها بتسافر..
سفيان:مافيش غير انها تقعد في دار رتيل ماتطلعش منها بكل..وكويس اللي ماجبتوش صغاركم معاكم بش مايشهدوا ع شي..
نوريه؛باهي لو بات حد هني كيف يصير..
سكت سفيان شويه بعدين قال:تركب تقعد في شقتي..وكل مرة تركبلها تتبادلوا عليها بش ماحد يحس...
وجيهه:باهي شن الغرض اللي تبي نوصله؟
سفيان؛في وقته تعرفوه ان شاء الله..ماشي توا بنركب نبدل ونمشي للمستشفى...
وجيهه:بنمشي معاك..
هز راسه بإيجاب بعدين مشي طلع من الحوش...
وجيهه مشت خشت بسرعه بش توتي روحها..ونوريه اللي حست بالصقع..لفت روحها بالشال وسكرت الباب...
🌺في الشقه..
خش وتوجه طول لداره...
وهي كانت في الكوجينه تجهز في الفطور شافاته كيف خاش مستعجل..بعدين سمعاته سكر الباب..
تنهدت وكملت تجهيز فطور بعدين قعمزت تستنى فيه..
شويه وطلع من الدار وهو ماشي شافها..
سفيان؛نحسابك نزلتي..
لينا حركت راسها بالنفي..
قدملها وقال:الحمد لله فاق بكري .
لينا؛الحمد لله رب العالمين..
سفيان؛الحمد لله..ماشيله توا..
لينا نزلت من ع الكرسي وقالت:افطر قبل..
سفيان بعدم رغبه؛لالا ماعنديش نيه توا..
لينا:لا مش بالنيه هي..من امس ماكليت شي وامس بعد نزفت يدك ضغطك هبط وواضح عندك فقر دم سفيان من اهمالك..
ابتسم بعتاب وهو يشوفلها..
هي ارتبكت وبعدين تجاهلت ابتسامته وقالت:افطر قبل بعدين عدي..لازم ترد بالك ع صحتك وتقيم روحك..توا الكل معتمد عليك بعد ربي...
قعد يفكر في كلامها شويه بعدين قال:وينه فطورك باهي.
لينا:اهو خش..
خش داخل وهي وراه..
لقاته خدي كسرة خبره وكلي بيها شويه دحي..وعليهم شريحة طماطم وجاي بيطلع..
لينا بشي من الإنفعال:سفيان ماتحرقلي اعصابي ع الصبح الواحد مش ناقص رعاش وغشايش قعمز افطر كيف العالم والناس..
هو وقف مضغ وقعد يشبحلها برفعة حواجب..
لينا هدت روحها وقالت:آسفه..بس انا خايفه تصيرلك حاجه بالله قعمز افطر كويس بعدين عدي...ارجوك..
غمض عيونه بإستسلام وهز راسه بالموافقه..بعدين فتحهم ورجع قعمز..
وهي قعمزت حداه صبتله عصير عنب..
وقربتله الحاجات المهمه قدامه وكل مرة تقوله ياكل حاجه وهو ياكل لين حاساته فطر كويس..عطاته نص تفاحه محوله منها قلوبها وقالت ..كول..
سفيان تنهد وقال:والله فوق من نيتي كليت بهلبه..
لينا؛ماديرلك شي هدي بالله عليك كول..
قال:امري لله..وقعد ياكل فيها بعدين قال..امم..رنده بتجي تقعد هني..
استغربت.
سفيان:الكل سمعوا باللي صار لبوي وشويه تانيه تلقي الحوش تعبا....نبي الكل ماشي عليه ان رنده سافرت وبعد فتره لاباس عليها حنقولوا انها روحت مطلقه وراجلها خدي منها بنتها وسفرها...
لينا؛تمام..لكن انا نبي نعرف عمي سمع بحاجه.
سفيان مط شواربه للأسفل بعدم معرفه وهو مضايق..
لينا تنهدت وقالت:ان شاء الله خير...
سفيان؛والله ماني عارف الخير وين في اللي صاير..
لينا؛سيورك تعرفه..وبعدين مش ضروري تعرفه..يكفي تعلم ان ربك مايجي منه كان الخير..وأسألني انا اكثر وحده تعرف معنى هالكلام..
هو ابتسم بعدين هز راسه بإيجاب وناض كلي من التفاحه وخلاها...وخدي كلينكس مسح بيه ايديه ومشي..
وهي مشت معاه..
لين وصل في الباب قالت:عينك من روحك..
لبس في رجليه بعدين شبحلها شويه وقال:لينا..
هي قعدت تشبحله تراجيه يكمل..
سفيان؛مسامحتيني ولا؟
غيرت عيونها عنه وشبحت للباب بعدين ابتسمت بجديه وقالت:خلينا في اللي حني فيه توا..هي عدي بالسلامه..
هو بانت ع وجهه ملامح الضيق..
مشي فتح الباب وطلع بدون مايرد عليها وسكر وراه الباب..
وهي تنهدت بعدين مشت خشت بتلم الكوجينه..
🍁🍁🍁🍁🍁
وفعلا زي ماقال سفيان..
بعد مرور ساعتين كانت العيله في حوش الشريف..
خواته ونساوين خوته وبنات العيله..
اما الرجاله خوته ونساباته وولادهم مشوا يزوروا فيه في المستشفى
هو طلع من العنايه المركزة..لكن مازالت الزيارة ممنوعه عليه..
لهدا ماقدر حد يخشله حتى سفيان ووجيهه
شافوه بس من مرش الحجرة اللي قاعد فيها
وبعدين كلهم روحوا مع سفيان للحوش
وشويه بدوا الاصدقاء والمعارف يجوا للحوش..
والنساوين حصلوا في فطور وضيافه وبعدها خشوا ع الغدي..
وهدا كله ورنده في حوش سفيان..
طول الوقت راقده في دار خوها وكان ناضت تقعد تبكي شويه بعدين تولي ترقد...
وخواتها يتناوبوا عليه..كانوا يوكلوا فيها بالسيف...
ولما تسألهم ع بنتها مايعرفوش شن يردوا وهي تكملها بكي لين ادوخ وترقد..
وهدا كله ومافي حد حس بحاجه...
لين ليل الليل...
وروح مروان للحوش بش يرتاح..
خش للحوش بش يشوف امه وحناه..
زبيده بحسرة:الحمد لله ع كل حال..
مروان:ماتخافيش حناي بوي ان شاء الله حاله يولي باهي بالكثير اسبوع ويروحك..
زبيده: وكان روح وعرف بمصيبة اختك شن يصير فيه..
مروان عقد حواجبه بخوف واستغراب:مصيبة شني!؟..
شبح لأمه بعدين...واختي مني!؟
وجيهه:كيف انت ماتعرفش!؟
مروان:شن في ياهو تكلموا!...
🍁فوق..
في دار سفيان..
سفيان:الباين موجعه الراجل هلبه يارنده.
رنده ببكي:تبي تحط الحق عليا.!
سفيان:لاابدا...بس نبي نقول اللي ليك واللي عليك..برغم اني لو نشوفه قدامي توا نقتله..
رنده قعدت تبكي بصمت..
سفيان:مش حيفلت باللي داره صدقيني واني تو نعرف كيف نتصرف معاه..
رنده ببكي:اني خايفه..لو الناس سمعوا نضيع ياسفيان...
هو غمض عيونه محاولة منه لتمالك اعصابه بعدين فتحهم وقال:مافي حد حيعرف غير اللي حني نبوهم يعرفوه..
رنده بألم:وبنتي.!؟
تنهد بألم وقعد ساكت..
ورنده حطت ايديها ع وجهها وقعدت تبكي..
وهو قرب كرسيه للسرير..وحط يده ع شعرها وقعد يمسح عليه وهو يشوفله بنظرات الم ممزوجه بالغضب الشديد..
🍁الغضب اللي طلع مروان لوطا..
وهو يقول بغضب:خلت كلب مسخ مايسواش قرش يضحك عليها وعلينا..وخدي تحفه محطوطه ع الطاوله حدفها ع طول يده وانكسرت.
عيطوا امه وخواته..
ومنى في الكوجينه حاطه ايديها ع وذانها بخوف..
ولينا حداها حاطه ايديها في نصها وهي تمشي يمين ويسار ومتوترة ع الآخر..
وجيهه وهي ترعش:ولدي بالله هدي روحك مش ناقصه والله ماناقصه..
مروان :وينها الحيوانه وينها..
نوريه؛شن تبي فيها..
مروان بصوت عالي:وينها...؟!
وجيهه:لاانتم بتقتلوني تبو تقتلوني..
عفاف بخوف:سلم وخيي ياسر الدنيا ليل وصوتك مسموع فكنا من العار..
مروان من غضبه وقهرته خبط الطاوله برجله طاحت ولانها مرش انكسرت..
ومشي طلع من الحوش...
وجيهه:اني كان ربي يرفعني ويفكني بس..ومشت خشت للدار وبناتها وراها..
شويه طلعت لينا من الكوجينه بش تشوف الصغار في دار رتيل..
ومنى في الكوجينه مقعمز وحاطه راسها بين ايديها وهي ترعش..اول مرة تشوف مروان فهالحاله..
🍁ومروان ركب فوق..
جي لشقة خوه وقعد يدق ع الباب بقوة..
شويه وفتح سفيان وهو عاقد حواجبه بقلق:خيرك!
مروان خش وسكر الباب وهو يقول؛علاش ماخبرتنيش باللي صار مع رنده!؟
سفيان تنفس بقوة وقعد ساكت..
مروان؛نكلم فيك..علاش خليتني اخر من يعلم..
سفيان؛بسبب ظرف بوي..ولاني عارف شن حدير لو عرفت.
مروان؛توا نبيك تحكيلي اللي صار بالتفصيل..
سفيان:ماعندي شي نحكيه اكثر من اللي تعرفه واللي صار صار توا..
شبحله شويه بعدين هز راسه وفتح الباب وطلع..
سكر سفيان الباب وغمض عيونه وخدي نفس.
بعدين فتحهم ومشي خش لرنده لقاها حاطه ايديها ع راسها وتومي وهي تبكي..
سفيان:خلاص رنده اهدي..
رنده ببكي:مروان كان يعرف يذبحني ياسفيان..
سفيان؛وعلاش يذبحك انتي شن دايره من غلط.! مايقدرش يقربك واني موجود..
جاها ورقدها وهو يقول:حاولي ترقدي توا..
وغطاها كويس..وهي تبكي وترشف..
بعدين خدي المصحف وقعمز وقعد يقرا في القرآن..
ورنده تسمع فيه...
شويه شويه وقفت بكي..بعدين بدي النوم ياخد فيها ورقدت..
وهو يقرا لين كمل الورد متاعه..سكر المصحف وشبحلها لقاها راقده..
ناض..حط المصحف في مكانه..
ومشي طلع من الدار للكوجينه بش ياخد حبة بنادول..
فتح الثلاجه وخداه بعدين سكرها ومشي بياخد شيشة ميه..
شاف وحده ع الطاوله...كان حاس ان لينا قاريه عليها الرقيه..خدي حبه من شريط الدواء..وخدي شيشة الميه وشرب منها وراه..
بعد حطها الطاوله اذكر الحديث اللي صار اليوم الصبح بينه وبين لينا..
《سفيان؛مسامحتيني ولا؟
لينا:خلينا في اللي حني فيه توا..هي عدي بالسلامه..》
شد ع الشيشه بقوة بعدين طلقها..
ومشي طلع من الشقه..
نزل لوطا بش يتمشي ويتنفس هواء نظيف...
قعد يتمشى وهو يفكر في اللي صاير كله..
لفت انتباهه شي وهو تعاطيه مع المشكله اللي صارت..
اسلوب اختلف هلبه..ع شخصيته القاسيه بعض الشي وعقليته الصعبه كان مفروض تعامله مع اخته مختلف عن هكي..
بعيد عن التفهم والاحتواء كان موقفه حيكون اسوء من موقف مروان.
بس هو توا حاس ان اكثر هدوء وحكمه اسلوبه في التعامل مع المشكله فاجئه بجد...
وخلاها يتسائل عن السبب..وفيسع وصلاته الإجابه..
هي غيرت فيه حاجات ماكانش متوقع يوم يجي حد يغيرهم..
قدرت تأثر فيه بقوة...واطلع فيه حاجات حلوة كانت مدرقه..
وتخلصه من عيوبه وحده ورا التانيه.
وفعلا المراة القويه الصالحه تقدر تغير الراجل للأفضل طبعا مش اي الراجل..الراجل اللي عنده جانب كبير من الصلاح طالع نصه والنص التاني يراجي يجيه من يطلعه..
وهدا اللي صارله مع لينا..
بس...
لينا اللي امس عايشاته في حالة من السكينه والطمأنينه بإحتوائها ليه..بحنانها ولطفها معاه....
ناويه تخلي اللي عاشه معاها مؤقت...يعني بعدين حترجع لحالة الجفاء والقسوة والبعد..
وهو مش حيقدر يتحمل اكثر من هكي..
يبي يرتاح...ساده ماشاف وقاعد يشوف...
"شن مطلعك في الصقع"..
وقف والتفتلها شبحلها شويه بعدين قال؛وشن علاقتك..
لينا استغربت في رده..
سفيان:ايه شن علاقتك..انتي مني بش تسأليني طالع في الصقع ولالا..ولاتجبريني ناكل..ولا تهتمي بيا..مني قولي..!؟
قعدت تشبحله وهي عاقده حواجبها بصدمه...
رفع حاجبه وقال:صعبه اجابة السؤال لهالدرجه!؟
تبدلت ملامح وجهها للامتعاض..
سفيان ابتسم بتهكم وقال:تمام مادام مش لاقيه اجابه معناها بري خشي وخليني في حالي..
لينا:الحق مش عليك والله..الحق عليا انا اللي عضيت ع جرحي وصبيت معاك في هالمحنه..ديما تحب تثبتلي انك ماتستاهل مني شي كويس..
ابتسم بأسف والدموع عبوا عيونه وقال:صحيتي..بارك الله فيك..وشكر الله سعيك وياريت مرة تانيه لو شفتيني نموت قدامك بري عني وخليني مانبي منك شي..
ولف ومشي وخلاها...
وهي قعدت تشبحله وهو ماشي...
ارتسمت ع وجهها ملامح البكاء وفمها تقوس وهو يرعش..
ودموعها ينزلوا وحده ورا تانيه.
مشت طول وخشت داخل وسكرت الكوجينه..
وقعمزت تبكي بصمت وقلبها موجوع لأبعد حد..
اما هو بعد كمل طريقه كان مضايق هلبه من نفسه...بس مضايق منها هي اكثر....
ماطولش هلبه وهو يتمشى ركب للشقه طول..
دار طلة ع رنده...
لقي عندها عفاف راقده حداها..
خلاهم ومشي بيدور وين يرقد..
قعد يشبح لدار لينا...بعدين فتحها وخش..
شم ريحتها مخلطه بريحة الصغار..
تنهد وقال:آاه ياربي آااه..
ومشي للسرير..
تمدد عليه ورقد...غمض عيونه والريحه الحلوة مازال في انفه..
وماهي الا لحظات ورقد...
اما هي هديكا الليله ماقدرتش ترقد..
قعدت تتقلب وكأنها تتقلب ع جمر..وقلبها موجوع ع الآخر..
تذكر في كلامه ودموعها مابطلتش نزول...
🍁🍁🍁🍁
وعدت هالليله الصعبه..
ومع صبح اليوم التاني..
مشوا سفيان مروان لبوهم في المستشفى..
كان حاله افضل من قبل..
ياخد ويعطي معاهم...
وسألهم عن...
الشريف:شن حال رنده كلمتكم..
الزوز غيروا عيونهم عنه ومعاش عرفوا ش يردوا..
الشريف بألم:معناها هداكا الكلب دار فيها حاجه..
شبحوله الزوز بإستغراب..
الشريف:احكولي شن صار معاها..
سفيان؛بوي انت شن تعرف؟
الشريف:اني قلت احكولي..
مروان:بوي انت توا مش باهيه ليك الانفاعلات..حتى الاخبار الحلوة مش باهيه ليك مش باهي ليك اي انفعال من اي نوع..
راجي لين تشد حيلك وتطلع..
سفيان؛كل اللي نقدر نقوله توا انت رنده تحت جناح خوتها ماتخافش عليها....
الشريف قعد ساكت وهو يشبحلهم ويفكر بعدين قال:واحد فيكم يقرا حداي قرآن..
سفيان:حاضر..
ناض مروان وقال:عندي حالات نمشي نشوفها وبعدين نولي..
شبح لسفيان..وسفيان شبحله وغمض عيونه وفتحهم بمعنى اطمن..
مشي مروان طلع..
وسفيان فتح ع تطبيق القرآن وبدي يقرا...
☘☘☘☘☘
وعدت الأيام..
وكل يوم الناس كانت تمشي وتجب ع حوش الشريف..
ورنده مازالت في حوش خوها سفيان..
ع حالها ونفسيتها كل مالها في النازل...وع قد مادارو معاها ماقدروش يبردوا ولو شويه من نارها على فراق بنتها..
واللي دار فيها هكي..
اهله كانوا عايشين في حالة من التوتر وهما مش عارفين عنه شي..
لين في يوم جي لخوه اتصال منه...
:وينك ياراجل وينك معقوله من لما تسافر اسبوع مانعرفوا عنك شي..
"المهم توا كملت الموضوع اللي وصيتك عليه"
:بوك قال مادير شي..
"علاش"
وبدي خوه يحكيله اللي سمعوه من سفيان....
"عليك عيلة معفنه طحت فيها..انت كان تعرف اللي صار معاي قبل نسافر..."
وبدي يحكي لخوه في القصه اللي كتب هو السيناريو متاعها..
وخوه كان مصدوم في اللي يسمع فيه ومش مصدق..
:معقوله.
"والله لتوا متفركس ونفسيتي مستغرب فروحي كيف ماقتلتهاش بنت الكلب الفاسده هادي"
:لاإله إلا الله...! والله حتى اني مستغرب لو كنت مكانك ذبحتها ذبح..
"والله ماتستاهل نكمل عمري ع خاطرها في الحبس المهم عندي بنتي والله معاد تحلم تشوفها"
:وليك كامل الحق..حتى القانون في صفك..
"المهم توا كمل موضوع الطلاق وسخه زي هادي مانبيهاش تقعد ع ذمتي اكثر ماقعدت..."
:اليوم بإذن الله نتملك الموضوع ومؤخرها والله ماهي رايه من قرش اصلا وحده زيها مالهاش حق شرعا وقانونا..
"اكيد..المهم الموضوع عندك وبوك وامك احكيلهم اللي صار بش يعرفوا كل شي ويكونوا ع بينه"
:ايه من غير ماتقول..
"هي مالا نخليك توا مشغول هلبه"
:تمام..تو نكلمك لما نتملك الموضوع..
"تمام..السلام عليكم"
:وعليكم السلام..
وسكر خوه وتحرك طول بالسيارة....
🍁🍁🍁🍁🍁
"الحمد لله ع سلامتك وبي"
الشريف وهو مقعمز في الصاله وحداه امه؛الله يسلمكم ..رنده بنتي وين..
وجيهه؛في شقة خوها سفيان..
الشريف؛خلوها تنزل نبي نشوفها..
وجيهه:رتيل اركبي نادي اختك..
رتيل ودموعها في عيونها؛حاضر..
ومشت طلعت من حداهم..
زبيده:خلاص ولدي اللي صار صار توا الله غالب..
تنهد وقعد ساكت..
سفيان وهو واقف في المرر اللي قدام الصاله:بوي ارجوك لو حاس روحك تاعب خش ارقد ولاحقين ع كل شي بعدين..
الشريف؛مافيا شي ولدي..
نوريه؛وبيي مش باهيه ليك الانفعلات قال مروان..
الشريف:انتم اللي بتخلوني ننفعل..
عفاف:خلاص خلوه ع راحته..
ووجيهه جنبه تشوفله بقلق..
الشريف:التوامه وين..
سفيان شبح للينا..
لينا:لحظه..
ومشت للدار..
هو غير عيونه وشبح لبوه..
شويه وجيت بيهم لينا..
وحطتهم قدامه..
الزوز كانوا مستاحشين جدهم..
طاحوا عليه اول ماشافوه وهو قعد يضم فيهم ويبوس..
ودموعه في عيونه...
وجيهه وهي تشوفلهم حطت يدها ع فمها وقعدت تبكي..
زي اليوم....
توفى بوهم....
كلهم كانوا مذكرين هاليوم كويس..بس دارو روحهم متناسينه ع خاطر الشريف..بس هو كان اول من ذكرهم بيه..
نوريه وعفاف ناضوا من حدا بوهم ومشوا للدار بش يبكوا براحتهم...
وسفيان جي لأمه قعمز حداها ضمها وهو يمسح ع ظهرها ودموعه في عيونه..
ولينا تشبحله ودموعها ينزلوا...
ايه هي اذكرت هاليوم الصعب واللي صار فيه..وذكرى عدنان مازال توجع فيها...
بس مش عارفه علاش وقتها كانت تفكر في شعور سفيان...
وتفكر في اللي صار فهداكا اليوم تحديدا..
وفكرت في كل شي صار من وقتها لليوم...
قداش في حاجات في داخلها تغيرت....
قداش في حاجات تبدلت...
حست انها مش هي نفسها من هداكا الوقت لهالوقت...
قعدوا عيونها ع سفيان كيف يمسح في دموع امه ويقوللها في كلام حلو يهدي فيها..وكيف قعد يبوس في خدودها وع راسها وهي معاه تقول بنته مش امه...
حست روحها غايصه في عالمه هلبه بدت تركز في تفاصيله وتحفظ فيها..
خشت رنده وجت لبوها وهي تقول ببكي..
"بابا"..
هو فتح حضنه..
وهي جاته تجري وخشت فيه..وقعدت تبكي..
وهو قعد يمسح ع شعرها ويقول:ماتبكيش بنتي ماتبكيش بوك مازال حي..
وهي شدت فيه بقوة وتبكي وخلاص..
والشريف يهدي فيها وهو يقول:خلاص بنتي خلاص..
رنده؛بنتي...
الشريف زاد ضمها وقال:يردها ربي ليك زي مارد يوسف ليعقوب ان شاء الله..
رنده ببكي:يارب...يارب..
ولينا وسفيان ووجيه وزبيده يشبحولهم بألم...
بعدين سفيان قال:هي خلاص بوي نوض ارتاح..
الشريف؛خليني شويه..
سفيان؛بوي شن اتفقنا حني.؟!
بعدت عنه رنده وقالت؛خلاص بابا نوض ارتاح حبيبي..
زبيده:هيا سلم ولدي اسمع الكلام..نوضي ياوجيهه خودي راجلك وارفعيه لداره...
ناضت وجيه وجاته وهي تقول:هي نوض ياشريف..
تنهد وناض معاها..
وقعد يمشي معاها بالشويه لين طلعوا من الصاله..
سفيان جي للصغار باسهم ع روسهم بعدين ناض وقال بصيغة الأمر؛لبسوا الصغار كويس صقع...
ومشي طلع من الصاله وهي معاه بعيونها مصدومه في اسلوبه معاها..
زبيده:ايه بنيتي لبسهم خفيف شويه..
هي شبحت لصغارها شويه.
بعدين مشت خدتهم وعقلها مش معاها....
🍁🍁🍁🍁
ولان الشريف طلع من المستشفى..
بعد العصر الحوش تعبا بالعيله والأصحاب..
والمربوعه تعبت ع اخرها..
والشريف كان موجود بيناتهم يستقبل في الناس اللي جايه تتحمدله بالسلامه...
وماطولوش عليه هلبه..مش اكثر من ساعه بعدين خش لداره..
وفي الاخير قعدوا بس نساوين العيله المقربين...
ربيعه؛وين رتيل مختفيه اللطف..
نوريه:عندها قراية ياعمتي ثانوي هدا مش لعب..
ربيعه؛امم باهي ربي ينجحها..
اخت وجيهه:تكلم فيكم رنده..
عفاف؛ليها بالك يومين ماحصلنهاش..
اساور؛سعدودها من زيها اللي سيبت هالبلاد الفقريه...
نوريه"مافيكم كان الحسد"..
وجيهه:هي نوضوا وتوا العشي الرجاله ع جية..
نوريه ناضت وهي تقول:هي لينا ومنى..
ناضوا الزوز ومشوا معاها....
ربيعه؛نوضوا عاونوا يابنات..
ناضت اساور ومعاها وحده من بنات خوات وجيهه..
وخشوا للكوجينه...
وبدوا يوتوا...
نوريه:بالله اساور بري للكوجينه الخارجيه جيبي منها زوز قعاد..
اساور:باهي..
ومشت طلعت للجنان وهي يدوب حاطه وشاحها ع راسها وعيون لينا معاها..
مشت وقفت في الروشن وهي تشوف..
لمحتها فاتت بعدين لهت تحط في الموالح في الصواني..
•••برا..
اساور وطالعه من الكوجينه شافت سفيان يمشي ويجي وهو يتكلم بالتليفون..
لما شافها وقف واشر عليها بيده توقف..
هي ابتسمت بفرح..وورتله الصواني يعني بدخلهم وتجي.
هو هز راسه بإيجاب..
وهي خشت فرحانه...
حطت القعاد ع الطاوله وقالت:اهما..وقعدت تساوي في وشاحها وهي تقول:شويه وجايه..
نوريه؛وين ماشيه.
اساور:سفيان يبيني..
ولفت ومشت طلعت...
كلهم انظارهم توجهت للينا..
ولينا دايرة روحها تحط في الصواني في السفر ومش مهتمه..
ويعلم الله باللي صاير فيها من داخل..
🏵برا..
جي سفيان لأساور وقاللها :بري قعمزي..
مشت اساور قعمزت..
وهو قعد واقف مقابلها ومربع ايديه قال:مذكرة لما جيتي كلمتيني ع راجل رنده وقلتي انك سمعتيه ماسمعتيه..احكيلي شن عرفتي وشن سمعتي بالزبط..
اساور؛علاش؟
سفيان؛اني نبي جواب..ماترديش ع سؤالي بسؤال..
ساوت وشاحها وقالت:باهي..
ولينا واقفه في الروشن تشبحلهم وقلبها والعه فيه النار...
منى:هيا لينا تعالي تعشي..
التفتت وقالت؛نعم!؟
منى:قتلك تعالي تعشي..
لينا؛شويه وجايه..
منى تنهدت وقالت:باهي..ومشت طلعت.
ورجعت لينا تشوفلهم..
🏵برا...
سفيان؛ماسمعتي شي تاني..
اساور:لا...علاش تسأل انت توا صايرة حاجه؟
سفيان ابتسم وقال؛لا...مجرد فضول..
اساور:الفضول ضربك توا..ولا دور في حاجه بش تهدزر عليا..
ضحك..
وهي ضحكت وقالت:نبصر عليك..
سفيان هز راسه وقال؛عارف..هي نوضي خشي صقع..وحجابك مرة تانيه البسيه كويس..
اساور بإبتسامه:حاضر..
هو لف ومشي..
وهي وقفت وقعدت معاه بعيونها لين ادرق من قدامهم..
بعدين مشت خشت داخل..
وصلت في الصاله وهي مبتسمه..
ربيعه؛وين كنتي؟!
:خاشه توزع في الابتسامات.
اساور:ريحي جمالك انتي..
وقعمزت ع وحده من السفر ..
ولينا من علي سفرة تانيه كانت تشبحلها وهي بتموت من الغيره..
ومنى مركزة معاها...
🍁وقعدت لينا طول الوقت ساكته الا من كلمات بسيطه..
وفشت غلها في الماعين...وبعد كملتهم..
خشت تغير لصغارها في الدار وهي تغلي غلي من داخل...
شويه وروحوا الكل...
حتى من نوريه وعفاف خلاص قعدوا اسبوع ساد وراهم حياش وصغار يقروا..
وقعدت منى لوطا بولدها بتبات لأن راجلها عنده مناوبه..
اتكت شويه تعبت اليوم من العواله والجري..
اما سلفتها فكانت تقيس في الضغط لعزوزتها اللي حست روحها تعبانه..
وفي عز الانشغال..
الصغار كانوا يلعبوا مع بعض..
وكان الشريف يفك من صغار عمه في العابهم برغم انه عنده العابه..
بحر تنرفز منه...جاه وخبشه ع وجهه..
الشريف خدي لعبه وحدفها بيه جت وجهه وكانت اللعبه ثقيله شويه..خلت انف بحر ينزف..
ناضت منى شهقت وهي تقول:هييي..
والولد عيط ومعاش طلع صوت..
امه قريب ماتت..
وحناته من الحرارة نست اللي فيها وخدت الولد وطلعت بيه برا وهي تنفخ في فمه.
ووراها لينا وهي ترعش..
لين طلع صوت بحر وقعدت يبكي.
ع خشة عمه اللي شاف الموقف قال:خيره!؟
وجيهه:بري جيبيله حاجه امسحي خشمه..
لينا فاقت ع روحها ومشت تجري بش تجيب شنطة الاسعافات..
وسفيان خدي الولد من امه وقال:كيف صار فيه هكي!؟
وجيهه:هالفرخ الاحرف اللي ينقاله الشريف اشبح بشن ضربه..
ومنى تسمع وهي مضايقه ع الآخر..
ع طلعة لينا بالشنطه..
سفيان:وانتي وينك عنه وين كنتي..
قعدت تشبحله وخلاص..
وجيهه:لهت معاي يا......
قاطعها وقال بإنفعال:لهت عنه صار...بإهمالها هدا الصغار حيكملوا عمرهم في المستشفيات..
هي شبحتله بحده..وجاته جبدت ولدها منه وقالت:مابتحسهم اكثر مني هادم صغاري مش صغارك..
ومشت للدار..
وخلاته واقف مصدوم من اللي سمعه كلامها نزل عليه زي السيف...
امه قعدت تشبحله وهي مصدومه..
وهو رمش عيونه من قوة الالم اللي حسه ولف ومشي طلع من الحوش..
ووجيهه وجعها خاطرها ع ولدها هلبه ...
مشت خشت للينا وهي معصبه..
ولينا كانت اداوي في ولدها وهي شاده دموعها بقوة..
وجيهه؛انتي كيف تقولي لسفيان كلمه زي هادي كيف..
منى لاحظت لينا كانت ترعش ..
مشت خدت منها الولد وهي تقول:كله من فرخي اني هالمصيبه هدا..وقعدت اداوي في ولد لينا..
وجيهه؛قسما بالله كلمتك خشت في قلبي زي الموس يابال هو..
لينا معاش قدرت تتحمل انهارت بالبكي وعطت عيونها بإيديها..
ومنى تشوفلها بحزن وهي تحاول تسكت بحر..
وياسمين تشوف لأمها كيف تبكي قعدت تبكي معاها....
وزبيده تشبحلهم وهي تقول:لاحول ولاقوة الابالله..
وجيهه تأففت وقالت:استغفر الله ياربي..
ومشت طلعت من حداهم لدارها هي وراجلها..
🍁ليلتها لينا هدت بكي بالسيف..
وبعد رقدوا الكل حتى صغارها قعدت سهرانه وبين عيونها ملامح وجهه سفيان كيف كانت بعد ماقالت كلمتها اللي كانت ع سفيان اقسى من كل اللي صار معاه لتوا...
ولاقدر يرقد غمضه كان موجوع بقوة بقوة...
وكلتها مازال ترن وذانه..
صغاري مش صغارك..لاوقالتها بلكنته بش تخليه يحسها اكثر.
قال في نفسه..
مستحيل بعد كله مازال يفكر انها ممكن تحمله في قلبها مشاعر..
لو كانت تعزه مش تحبه...ماتجرحاش بهالشكل..
فهم انه عمرها ولافي يوم حباته او حتحبه..
وانها الفترة اللي فاتت كلها كانت تساير فيه والللي صار بيناتهم في اخر مشكله ممكن يكون قبل اي شعور منها اتجاهه..غير الشفقه في الآونه الأخيره..
وبهكي يكون سفيان فقد منها الأمل بالمرة...
🍁🍁🍁🍁
تاني يوم..
"خلاص انت بتمشي معاه"
سفيان:ايه..
مروان؛مش عارف علاش حاسك بتمشي ومش حتولي..
سفيان:نمشي ونخليكم وانتم في هالحاله وبوي هكي صاير فيه مستحيل....بس تقدر تقول ان حنمشي بشكل ونرجع بشكل تاني..
مروان:في بالك شي لموضوع اختك؟
سفيان هز راسه بإيجاب وقال؛غير نروح اني وبوي ع خير.....
🍁🍁🍁🍁🍁
وبدي يجهز سفيان في نفسه هو وبوه للسفر لألمانيا بش يطمن ع صحته اكثر..وبالمرة يعيد حساباته ويرتب اوراقه ويعرف اللي ليه واللي عليه وشن لازم يدير بعد مايروح...
🌺وهي من لما سمعت انه بيسافر ونفسيتها تاعبه...
كانت خايفاته معاش يولي بكل...
المانيا بالنسبه للينا عشيقة لسفيان من زمان متمني يكمل عمره فيها وهو بروحه قاللها هالشي وبعد اللي صار بيناتهم..
حست انه خلاص فقد الأمل منها وخدي قراره الهجرة الهجران...
🍁🍁🍁🍁
في اليوم اللي يسبق يوم السفر..
الساعه 6:00مساءا..
في الكوجينه الخارجيه ترد في مجموعه ماعين استعملوهم الفترة اللي فاتت وهي في قمة الكآبه..
"ماتبيش تسلمي عليا"
قلبها من قوة الدق قريب طلع من مكانه..
بس قعدت ع حالتها...ومش عارفه كيف هي لعند توا قاعده بهالبرود الظاهري..
سفيان؛مش مشكله..ماطمعتش في سلامك اصلا..
بس نبي نطلب منك طلب..يقولوا المشية مشية ربي..وماحد يعرف شن يصير في السفر...نبيك تسامحيني بس ع كل مرة وجعتك فيها وجرحتك...واني مانبيش نقولك مسامحك ع كل شي لاني ماعرفتش نحمل في قلبي عليك بكل.
قعدت شاده الصواني بقوة وهي عاطياته بالجنب..
سفيان؛يعلم الله اني حاولت معاك وياما تاملت وكله كان ع الفاضي..حسيت روحي هنت نفسي وذليتها هلبه واني اللي عمري ماانذليت لحد غير ربي..بس لعند هني وخلاص....حتقعدي عايشه هني معززة مكرمه بصغارك كملي حياتك معاهم كيف ماتحبي..واني لما نروح حنشوف حياتي حتى اني...وليك مني وعد مش حيتغير عليك شي..وصغارك هما صغاري لأني عمهم يعني بوهم..وعمري ماحنكون ليهم غير هكي لو جبت غيرهم عشرة صغار...
سكت شويه وهو يشوفلها بعدين قال:عارفك مش حتقولي شي ولايطلع منك شي يريحني..مش مشكله...تنهد وقال...نشوفك ع خير...
ومشي طلع من حداها...
وهي قعدت ترتب في الصواني وتحط فيهم فمكانهم..
وكانت تحاول تثبت وتتماسك وتشد روحها.
بعد كملت وقفت مررت نظرها ع الكوجينه..
بعدين حكت مقدمة انفها..ومسحت ع حاجبها..
انتبهت للحركات اللي دارتهم كانوا حركاته..
بدت ترتسم ع وجهها ملامح البكاء..
ودموعها طاحوا...
مشت سكرت باب الكوجبنه..وشداته بإيديها..ونزلت عيونها وغمضتهم بقوة وقعدت تبكي بصوت مكتوم...
وقلبها يبكي معاها....وروحها تتألم بقوة...
🍁🍁🍁🍁
وجي اليوم اللي بعده وسافر سفيان هو وبوه...
وهي بعد ماسافروا...
ركبت للشقة بعد مانزلت منها رنده..
خشت لدارها...ووقفت..
شمت ريحته فيها....قعدت تمرر في نظرها عليها بعدين شبحت للسرير...قدمتله بخطوات بطيئة بعض الشي..
وقعمزت عليه...بعدين رقدت ع جنبها الأيمن...
شمت نفس الريحه ع المخده..
انهارت بالبكي...قعدت تبكي بقوة للحظات..
بعدين فتحت درج الكامدينو...وطلعت كن المفرش اللي حطاته تحت الحاجات صورة...
قعدت تشبحلها وهي تبكي بعدين قالت..
"سامحني..مش بيدي والله مابيدي...انا اسفه اسفه واجد"..
ومشت بالصورة..
ولدولاب صغارها وحطتها في وسط البوم داراته لصغارها..ودست الألبوم في وسط بوكس متوسط الحجم ووحطاته في الدولاب من فوق وسكراته..
خدت نفس..
بعدين مشت ولت للسرير...رقدت عليه...
وطلعت تليفونها وخشت ع الصور...
وحطت ع صورة لسفيان خدتها من حسابه ع الفيس..
قعدت تتأمل فيها هلبه وهي تذكر في اخر كلام قالهولها.
بعدين قالت بصوت كله حزن ويدوب طالع....
"نحبك"
#استغفروا
....يتبع......
