شكولينا

تكملة الجزء التاسع..

جزء قصيرون....
اللي فايتاته صلاة او خش عليه وقت صلاة يصلي الأول بعدين يقرا...اول ماتتحاسب عليه الصلاة يوم غدوة...💕
《تنويه...في كلام حيكون مؤذي وغير مقبول نعتذر عنه مسبقا بس هو ع لسان الشخصيات اللي في منهم هلبه في مجتمعنا ومايعبرش ابدا عن وجهة نظري...نتمنى انكم تحاولوا تتقبلوا لان كل شي حنكتبه حيخدم قصة الروايه والرساله متاعها》
🍫🍫🍫🍫🍫🍫🍫🍫🍫🍫🍫🍫🍫🍫🍫🍫
بعد ليلة العاصفة الهوجاء اللي هبت في حوش الشريف..
طلع نهار يوم جديد..
جي اتصال لعدنان من القائد يطلب منه فيه الحضوري الفوري بسبب عمليه مستعجله في احدى مناطق الجنوب..
اتصل بعدها عدنان برتيل وطلب منه تجيبله ساكو حوايجه..
رتيل؛هاك..
خدي منها الساكو ومشي وباين ع ملامح وجهه العصبيه..
وهي خشت داخل مضايقه..
مشت تشوف في امها..لقتها مازال قاعده راقده ومتغطيه.
مشت وهي حزينه لدارها وقررت انها ماتمشيش للمدرسه فهاليوم..
🏵🏵🏵🏵
واقف فم الباب وبوه معاه...
عدنان:خليت الموضوع عندك بوي ارجوك مانبيش نطلع من مش راجل قدام البنت..
ابتسم الشريف وقال:راجل راجل وسيد التريس مادام موضوعك عند بوك اطمن...
عدنان:ربي يحفظك ويطول في عمرك..باس ع راسه..
بعدين فتح الباب وطلع..
وبوه قعد واقف يشبحله وهو ماشي..
الشريف؛استودعك الله...
ورجع خش داخل وسكر الباب..
شاف سفيان نزل من شقته ومشي خش طول للحوش..
تنهد ومشي بيخش حتى هو...
🏵🏵🏵🏵
"صبح يافتاح شن تقولي رتيل!"
رتيل بحزن؛والله زي مانحكيلك يارنده نسمع في امي تقول تاخد عبده ماعبده..
"حي غبارة سودا..والله قالتها نوريه واني هزيت ع كلامها"
رتيل:كان تقدري تجي رنوده تعالي بالله عليك خايفه على ماما
"ساعتين تانيات وجايه"
رتيل:تمام..
"سلام توا رتيل"
رتيل؛سلام...سكرت رتيل وناضت مشت طلعت من الدار بتمشي لأمها..
لقت سفيان مقعمز عند راسها ومطبس عليها..
سفيان وهو يمسح ع شعر امه:تطلعي تفطري ياحلوة نبي نتصبح في وجه يفتح النفس..
وجيهه بتعب:والله راسي يوجع فيا.
سفيان ؛تطلعي معاي وعد مني نطيره وجع راسك..
تنهدت وجيهه..
هو طبس باسها ع خدها بعدين قال:هيا نوضي والله كان مانضتي طلعتي معاي ماني فاطرها ونمشي للخدمه من غير فطور..
هزت راسها وقالت:باهي ولدي  باهي..
ابتسم وشد ايديها وهو ينوض فيها:هيا نوض نوض نوض..ياحلو..اوبا..
قعمزت وجيهه وهي تضحك بتعب..
سفيان باس خدها وقال:محلاك يام عسل..واني نقول لمن طالع مدوخ في جرتي حراير البلاد..
ضرباته امه ع كتفه وهي تضحك..
سفيان:وحق ربي مافي مراة تستاهل نحبها غيرك..وقام يدها وباسها..
وجيهه وهي تشوفله بحب:ربي يرضى ويعطيك لين يرضيك ياربي..
سفيان؛ويخليك ليا..
ناض وقف وهو يقول:ماشي نوتي روحي نوضي عمري صلي والبسي هي..
مسحت وجهها بإيديها وقالت:باهي هاني نايضه..
التفت سفيان بيمشي شاف رتيل واقفه:ساعدي امك تحركي..
رتيل بإبتسامه:حاضر..
طلع من حداهم سفيان..
وهو ماشي بطريقه للباب جت منى خاشه..
نزل عيونها ووخرلها..
منى:صباح الخير..
سفيان:صباح الخير..
مشت منى وهو طلع...
••وصلت منى للكوجينه وخشت لزهور وهي تقول:صباح الخير شن الجو..
زهور :صباح النور..ع حطة يدك..
منى؛عدنان طلع الصبح بكري قال اتصلوا بيه من غادي قالوله تعالى في عمليه..
"امتى طلع؟!"
شبحوا الزوز لعزوزتهم اللي باين ع وجهها ملامح القلق...
منى:توا مالاش نص الساعه..
تنهدت وجيهه بخوف ومشت طلعت من  حداهم..
هما الزوز شبحوا لبعض بعدين منى قالت:فطرتي..
زهور:لا مازال...
🏵🏵🏵🏵
"شافها في المستشفى لما انصاب وعجباته"
سفيان وهو رافع حاجبه؛ليها علاقه بالشكلاطه اللي يجيب فيها؟
مروان:ايه قال فاتحه مشروع ادير في الشكلاطه وتبيع..
سفيان بتهكم:ياسلام..اختيار ممتاز...من جميع النواحي..
مروان؛البنت عاجباته ياسفيان وحقه يتزوج البنت اللي يبيها..
سفيان؛وحق العيله فإنه يختار صح..اللي بياخدها حتكون كنه للعيله ام صغارنا مش مرته بروحه لازم يختار صح اختيار مايندمش عليه بعدين..
مروان ابتسم ع جنب وقعد ساكت..
عقد سفيان حواجبه وقال؛شن قصدك بيها الضحكه هادي..
مروان رفع حواجبه وقال:ماقصدي شي..هي نستأذن نيوتن وراي مرضى يراجو فيا..
ولف ومشي...
سفيان رفع حاجبه ولف ومشي ركب لشقته...
🏵🏵🏵🏵🏵
الساعه 11:25صباحا
في حوش هنيه اخت الحاج الشريف.
كان الشريف غادي بش بيروح بأمه وصدفه لقي ربيعه موجوده غادي..
فحب يستغل الفرصه ويفتح معاهم الموضوع..
زبيده:ياحليلي معناها اللي يفكروا فيه البنات طلع صح..
هنيه:لا والله عندها حق وجيهه تقلبها لو كنت مكانها درت زيها واحرف..
الشريف:شن تقولي انتي! اللي يسمع يقول مدايرة كبيرة من الكبائر..
ربيعه:هازي ياشريف! راهو الحاجه هادي عندنا مش مقبوله بكل..
الشريف:والله اني راجل نعرف ربي ونعرف ان مافيش فرق بين الناس الا بالتقوى وغيره كلام فاضي..اني عطيت كلمة لولدي ونهار الخميس هدا وتوا ارواحكم بتمشوا لسبها بش تخطبوهاله..
هنيه وربيعه شبحوا لبعض..
زبيده:وكان نشدوا وين امه!!؟ راهو عيب في حقهم وحقنا..
الشريف:سكرت راسها يام قتلك..واني عطيت ولدي كلمه مش مولي فيها خلاص..بتمشوا؟!
ولأن خواته يعزوه مستحيل يردو لو جاهم قاصدهم في خدمه...
هنيه:ايه وخيي اني نمشي..
الشريف:وانتي ياربيعه..
ربيعه شبحتله شويه بعدين قالت؛روح بيا معاكم للحوش نبي نهدرز مع وجيهه..
الشريف:مش وقت مشاكل ياربيعه مش ناقصة الحكايه.
ربيعه؛مشاكل شني ربي يهديك نبي نهدرز معاها شويه..
تنهد الشريف وقال:باهي..هي نوضي وتي روحك..
ربيعه ناضت وهي تقول:دقايق بس...
ومشت من حداهم..
الحاجه زبيده:الله يسامحك ياولدي ياعدنان الله يسامحك..
الشريف بإنزعاج:اياااه علينا يما عاد..
🏵🏵🏵🏵🏵
"نبي شن صار بالزبط"
هادي رنده في الكوجينه تسأل في الكناين ع المشكله اللي صارت في الليله اللي فاتت..
تبرعت زهور تحكي:اللي فهمته ان عدنان يبي يخطب وحده من الجنوب واللاي ماتبيش وصار بيناتهم نقاش وعركه..بعدين عمي ادخل ونهاها..
رنده:شن قال بوي..
زهور:قال للاي كان ماتبيش تمشي تخطبيها عنده خمسة عمات..
رنده بتهكم:ايوه..
زهور:هدا اللي صار..
رنده مررت نظرها عليهم وقالت:طبعا تعرفوا ان البيوت اسرار  مش تمشوا طول شرنن  شرنن ايوه امي اسمعي شن صار في حوش عيالي..شرنن شرنن اسمعي اختي شن صار بين اللاي وولدها...هدا كان مش درتوها اصلا..
منى:لا وربي شاهد عليا مادرتها.
زهور:ولا اني اصلا الليله اللي فاتت بت حدا اللاي..
منى"ريت الخبيثه ماقالتش"
رنده؛ايوه خليكم هكي دسوا اسرار حوش عيالكم بنات الناس والأصل هكي يديروا..وعكسهم اللي دير عكس هكي..تمام؟
زهور هزت راسها بإيجاب..ومنى قالت..تمام..
وخرت شعرها بيدها للخلف ومشت طلعت..
منى بصوت منخفض:ماحاسبه في روحها..
زهور:ياقداش تكسرلي في كرايمي لما ادير الحركات هادي..
سمعوا صوت دوشة صغار..
منى:صوت مفرخ عفاف..
زهور:اااه ياربي شورنا مانستريحوش بكل..الله يسامحك ياعدنان ع هالموال اللي درتهولنا..
🍀🍀🍀🍀🍀
وهدا كله ولينا ماتندري ع شي من الاصداء اللي دارها الموال اللي غناه عدنان..
بس كانت متوقعه اسوء توقعات..
في باحة المركز كانت واقفه مع بريكه ومريم وواقف علي بريكه واحد..
بريكه؛بالله ولدي نبيهم 3طبق باسطي..
الشاب:حاضر..ولف ومشي طول..
مريم؛ربي يجعله من حملة كتاب الله..
لينا؛يتربي في عز الله وينبته نبات حسن ان شاء الله..
بريكه؛ان شاء الله ونشوفهم عندكم..
مريم ولينا؛ان شاء الله...
ع جية امل تجري من فم بوابه المركز..
مريم؛خيرها هدي!؟
بريكه:ان شاء الله خير!
وصلت فيهم  وقالت:الشكولينا جا جا جا..اول مرة نشوفه لابس مدني..
حطت لينا يدها ع قلبها وقالت:قلبي بيوقف يابنات..
مريم شدت يدها وقالت:ان شاء الله..
ع خشة عدنان للمركز..
لما شافاته لينا ابتسمت من قلبها تلقائيا..
وهو لما شافها ابتسم ومشي لجهه فيها ظل وحول نظاراته وقعد يشوفلها..
وهي مغيره عيونها عنه استحياءا..
مريم:لاقوة الا بالله الله يبارك عليه..
امل:خالتي بريكه يأشرلك..
بريكه مشتله طول..
لينا:بنموت من خوفي..
امل؛ان شاء الله ماهناك كان كل خير..
لينا تنهدت وقالت:يارب..
••وصلت بريكه في عدنان وقالت:السلام عليكم..
عدنان:وعليكم السلام..شن حالكم..
بريكه بإبتسامه:الحمد لله..
عدنان:دوم ان شاء الله..احمم..وصلي للينا اني قاعد عند كلمتي امس فتحت مع اهلي الموضوع وقريبا حيجوا هني ويطلبوها رسمي..اني وليت بسبب عمليه بعد ساعه حتبدا..والله لولاها ماجيت قبل اهلي..
بريكه؛ربي يحميكم وينصركم..
عدنان:آمين..المهم..قولي للينا تستنى عدنان عند وعده..وقولي للينا عدنان يبي دعائك يرافقه وين مايمشس..
بريكه بإبتسامه:ان شاء الله...
لبس عدنان نظاراته وقال:سامحيني تعبتك معاي..
بريكه؛والله يهمك ولدي..
عدنان بإبتسامه:السلام عليكم..
ولف بيمشي شبح للينا لقاها غيرت عيونها عنه ابتسم وكمل طريقه للبوابه..
هي وصاحباتها قعدوا معاه بعيونهم لين طلع..
بعدين مشت لينا تجري لبريكه..
لينا بلهفه:شن قالك..
بريكه بإبتسامه:قال فتح مع هله الموضوع وقريب حيجوا يطلبوك...
ابتسمت لينا بفرح وصاحباتها كذلك..
بريكه؛وقال كنت ناوي نجي نا وياهم غير طلبوني لعمليه ماعمليه..
اختفت ابتسامة لينا وحلت محلها ملامح الخوف:ياربي لطفك..
مريم؛ربي يتقي عنهم ان شاء الله..
امل:استودعيه الله..
بريكه:قال نبيها تدعيلي ديما..
تنهدت لينا ورفعت عيونها فوق وغمضتهم وهي تقول:استودعك عدنان يامن لاتضيع ودائعه...
🍀🍀🍀🍀🍀🍀
"خليه يضربه الحيط ويولي"
وجيهه تنهدت بحزن وقعدت ساكته..
سفيان؛هو عنايدي اني اللي نعرفه لما انتي رفضتي هو سكر راسه مش حبا في البنت اللي يبي يخطبها..
وجيهه:باهي علاش يدير في روحه وفينا هكي..
سفيان:قتلك خليه تو بعد تلسعه النار يعرف انها نار ومعاش يقرب منها..خليه يغلط وتو يتعلم من غلطه..
وجيهه بضيق:اني هادي كيف بنديرها كنتي ونرفعها للمناسبات والناس تشوفها..كيف بندخلها حوشي ونأمن عليها واني مش عارفه هي وين كانت عايشه وفي شني وشن وضعها...غمضت عيونها بقرف وقالت..مستحيل مستحيل نخليها تمد يدها ع شي في حوشي تشد شقتها وبس
سفيان؛والله حتى برا الحوش وتخافي منها..وحده قلبت راس ولدك اللي كان مسكر راسه ع الزواج في اسبوعين توقعي منها كل شي..
حطت وجيهه يدها ع جبهتها وقالت:ااخ ياربي راسي بيتفجر مش قادره نصدق اللي داره ولدي فينا..
سفيان:خلاص يام معاش تفكري في الموضوع هدا هلبه..
شبحتله وجيهه شويه بعدين نزلت يدها وقالت؛سفيان..انت متريح مع مرتك ولدي؟
هو شبحلها وقال في نفسه"ااه يام ااه ياريت نقدر نحكي"..
وقعد محتفظ بصمته ظاهريا..
وجيهه؛عارفاتك مش متريح وباين في وجهك..اني غلطت مني تبعت نوريه ومشيت خطبتها وخليت بنت عيلة بن حامد..هديكا تعليمها عالي وعندها لغات..ونوريه تقولي يام ماعندك ماديري بيها هديكا اللي نعرفها خير منها..
قنينه وربة بيت وهاديه ومطيعه..غرتني..
سفيان"اخترتي كنه لروحك يام مااخترتيش زوجه لولدك الله يسامحك وخلاص"؛خلاص يام توا الكلام هدا مافيش منه فايده..
وجيهه:سامحني ولدي..
سفيان بضحكه؛شن تقولي يام انتي..من اني بش نسامحك يام...
وجيهه بإبتسامه؛ربي يفرحني بصغويرتك..
سفيان اكتفي بإيتسامة مجامله رسمها ع وجهه..
🏵🏵🏵
وشويه وروح بأمه للحوش وهو توكل للجامعه..
وجيهه لما خشت للحوش تفاجئت وين شافت ربيعه موجوده واضايقت هلبه..عارفتها حتكون اول الشامتين فيها..
وجيهه:حالك باهي اللاي..
زبيده؛انتي اللي شنوحالك بنتي..
وجيهه هزت راسها باسف وقالت:الحمد لله ع كل حال..
ربيعه ناضت وهي تقول؛ترا تعالي وجيهه نبيك في كلمتين..
وجيهه ناضت ومشت معاها وبناتها يتبعوا فيها بعيونهم وهما خايفين على امهم..
زبيده؛سمعت نوريه؟
رنده؛لالا ياحنينه قلنا خل تكمل مناسبتها ع خير..
زبيده :احسن مادرتو...
.................
في وحده من الدار..
ربيعه:ديما هكي انتي متسرعه وماتحكميش في عقلك قلبتيها عياطات ودوشه ودرتي ماينفر ولدك منك..
وجيهه بحزن:لوكنتي مكاني شن ديري ياربيعه..
ربيعه:ايه بنضايق ونتعفلق ومانقبلش هالشي بكل لكن مع هكي حنحكم عقلي...لو كنت وجاني ولد من ولادي وقالي يما نبي وحده زي اللي يبيها ولدك وبعد ناقشه نلقاه مصر عليها.
نقوله باهي تونخطبهالك..ونمشي نخطبها ونديرله عرس مطنطن وندربك ونغني ونرقص ونزغرط مش حنغيب جهدي..
وبعد ياحنه ماتوصل..نعرف شغلي معاها...
وجهه ضيقت عيونها وهي تفكر في كلام ربيعه..
ربيعه؛مانديراش جو المهبله اللي درتيه ونخلي ولدي ينفر مني ويطلع من تحت جناحي يش  يخش تحت جناحها هي..بالعكس نخلي وليدي تحت جناحي ونجيبها حتى معاه ونطبق عليها لين نخنقها ونفتك منها ويقعدلي وليدي..
توسعوا عيون وجيهه وهي تشوف لربيعه بآندهاش..
ربيعه:امشي معانا واخطبيهاله وديريله مايبي بعدين انتي ديري ماتبي..
ضيقت وجيهه عيونها  وهي تفكر في كلام حماتها بعدين هزت راسها بإيجاب..
...........
"كيف صار!! شن درتيلها انتي بخيتي عليها"
ربيعه بضحكه:عقلتها بس..هي سلم وخيي مستعجله مسعود يراجي فيا..
الشريف بضحكه؛اركبي اركبي..
ركبت ربيعه السيارة وهو ركب بعدها وتحرك طول...
🏵🏵🏵🏵
"منك جد يام بتمشي تخطبيها"
وجيهه؛اني بنمشي مافيش قدام حل غير هالحل المهم مانخسرش ولدي..
عفاف:حي ع العار حي ع الشماته ووك عليا..تخيلوا بالله عليكم تخيلوا وحده زي هادي تولي كنتنا والله لما يميعدوا بينا في كل تركينه ويضحكوا علينا..
وجيهه:الله غالب امر الله..
رنده:مش مصدقه لتوا عدنان وخيي اللي ينضرب المثل بزينه اللي يشوفه مايصدقش انه ليبي ياخد عبده حي ياخسارتك ياوخيي..
عفاف:حظنا حني زفت في الكناين زفت مزفت..
وجيهه:تندري نوريه..
رنده:لالا كان تعرف تنجلط..
غمضت وجيهه عيونها بحسرة وقالت:الله يسامحك ياولدي..
🏵🏵🏵🏵
الشريف كان مفرحه قبول مرته للأمر الواقع وكان يبي يوصل هالخبر لولده يفرحه بس هاتف عدنان كان مقفل..
وهالشي شغله قلبه ع ولده..
زي قلب امه اللي كانت والعه فيه النار من خوفها عليه..
وصلت بيها تقول لنفسها.
"والله سلامته عندي بالدنيا ومافيها غير يسلم بس واني ندريله اللي يبيه"
🍀🍀🍀🍀🍀
ولينا اللي كانت فهاليوم مشغوله تبعت في الطلبيات مع خدمة التوصيل اللي يكون راجل اختها امال..
عقله وقلبه مشغولين ع عدنان ومش عارف كيف حيوصلها عنه خبر يطمن قلبها..
"شن هني هدى البلي الاحرف خلونا"
لينا؛خيرك يما.
الحازة تجاهلتها..
لينا بضيق:خلاص يما الله يربحك راني والله ماني ناقصه..
الحازة:شن تبي..
لينا:نبي ترضي عني يما..
الحازة:تعرفي كيف تكسبيه رضاي..
تنهدت لينا بضيق..
ع جية عبدالله خش عليهم وهو يقول:الخميس عندكم حاجه؟
لينا؛لا..
الحازة:ليش..
عبدالله؛تذكروا فيه الشاب اللي مرة عزمته ع الغدا نهار جمعه..
لينا بدي قلبها يدق بقوة..
الحازة؛خيره؟
عبدالله:كلمني توا وقالي بيجوه هله هنى وبيجيبهم يهدرزوا وبتعرفوا..
لينا اللي بدت ترجف بكل مافيها حاولت تتمالك نفسها قدام خوها...
الحازة:باهي مرحبتين بيهم..
عبدالله:خلاص الخميس العشيه...
ومشي من حداهم..
التفت لينا لأمها وقالت بضحكه:تبي ترضي عليا يما لما تعرفي ليش جايين..
الحازة بإستغراب: كيف!!!
لينا جتها وهي تضحك بفرح وخدت من يدها وهي تقول:تعالي نحكيلك..

#سبحوا_بحمد_الله

....يتبع.....