كل شي حيخليك بعد موتك الا اعمالك الصالحه حتلحقك..
واولها الصلاه..ماتبدي عليها شي في الدنيا مهما كان مهم كله زائل وهي بس اللي حتقعد...الصلاة اولا🌸
قولوا لاإله إلا الله تفلحوا باللسان بالقلب وبصوابعكم اللي تكتب🌷
وصلوا ع الحبيب اسعدكم الله بجواره في جنات النعيم💖
🍫🍫🍫🍫🍫🍫🍫🍫🍫🍫🍫🍫🍫🍫🍫
صالة حوش الشريف معبيه بنساوين العيله..
انفتح الباب وخشوا لينا ورنده..وسمعوا صوت الدوشه والهدرزة..
تأففت رنده وقالت:شن بيخلصني منهم..
لينا قعدت تشبحلها وهي تحول في كندرتها..
رنده خدت نفس وقالت:رب اشرح لي صدري ويسر لي امري واحلل عقده من لساني يفقهوا قولي..
ابتسمت لينا..
ورنده مشت خشت بعد حولت بوتها..ولينا لحقتها..
في الصاله..
رنده:السلام عليكم..
كلهم بأنظارهم معاها وهما يردوا:وعليكم السلام..
نظرات عيونهم كانت بالنسبه ليها زي الأسهم اللي تتصوب ناحيتها..
نظرات متفحصه بفضول..نظرات شماته..نظرات شفقه..
كانت تحاول تتصدالها بإبتسامه مصطنعه مرسومه على وجهها..
وهي تسلم عليهم وحده وحده..
وكلهم يدعولها "ربي يعوضك خير"
ونبرات الصوت اختلفت من شخص لأخر زي مااختلفت نظراتهم..
بعد ماكملت سلام...قعمزت..
وسلمت بعدها مرت خوها..وهما بدوا بأسئلتهم..
ربيعه:كيف صار بنيتي شن درالك الضلايلي هداكا..
رنده تنهدت وبدت تحكيلهم وماطلعتش في كلامها عن السيناريو المتفق عليه..
ع جية خواتها من الكوجينه..
نوريه:رنوده..
ناضت رنده وجتها نوريه وقعدت ضم فيها وتسلم..
والكل يشبحولهم..بعدين سلمت عليها..
وبعدها سلمت عليها عفاف وقعمزوا حدا اختهم..
نفيسه "مرت عمهم":افتكيتي منه واحد زي هدا..
هنيه"عمتها":ايه باهي وبنتك كيف بيصير فيها؟
وجيهه شبحت لرنده..
رنده:بنرفع قضية بش ناخد حضانة بنتي مش حنخليهاله..
عيشه"بنت عم الشريف":والله عوينه يابنتي وماذكرت ربي..كلهم حسدوك في نصيبك يابنتي..
حور:صح...هلبه عيطوا عليكم...
وجيهه:حسبنا الله ونعم الوكيل..
زبيده:خلاص قدر الله وماشاء فعل وربي يعوضها خير منه مليون مرة ويردلها بنيتها..
كلهم بأصوات متقطعه قالوا:آمين..
ربيعه شبحت للينا وتفحصتها لاحظت انها زايده في الزين ووجهها ناير سألتها:شن حالك ياسبهاويه..
شبحوا للينا..
لينا بإبتسامه:الحمد لله..شنو حالك انتي عمتي؟
ربيعه:الحمد لله..شني مافيش حويجه..
لينا والعيون عليها انحرجت وهي تقول:مازال ربي ماسخر..
وجيهه؛عن قريب ان شاء الله..حالمه بيهم حلم وقريب ان شاء الله يتفسر..
ابتسمت لينا بخجل..
ونوريه وهي تسمع فيهم شن يقولوا سرحت بتفكيرها في همها ورجع انتابها القلق من شي دارته بدون رد شيرة وخايفه من عواقبه..
🍁🍁🍁🍁🍁
في دار المعيشه..
مقعمز حسين هو وامه يشربوا في الشاهي..
رمضانه؛حسين..
حسين:نعم يام..
رمضانه:ولدي الباين مرتك في الصغار معاش في منها الرجي..
حسين بضيق؛يام امتى تسكريه الموضوع هدا؟
رمضانه؛مش مسكراته لين ادير مايصلحلك حقك الشرعي اللي عطهولك ربي..
حسين بحزم:يام حاجه توجع نوريه مش حنديرها ماتحاوليش ارجوك..
رمضانه:باهي شن رايك كان قتلك نوريه هي اللي جت فتحتلي الموضوع وقالت اني بنخطبله غير انتي اقنعيه..
حسين بعدم تصديق:شن تقولي يام!
رمضانه؛ورب البيت هي اللي جتني وقالتلي ياعمتي اني معاش نقدر ندير صغار ونبي حسين ياخد حقه من غيري وكان فتحتله اني الموضوع بيسكره..انتي مش يردكش اقنعيه واني نخطبله..
حسين قعد يشبح لأمه وهو مصدوم مش مصدق..
كيف نوريه تسلم فيه هكي بالساهل..وهي اللي تقول بتخطبله..!
ناض من حدا امه وطلع وهو معصب ...
وامه معاه بعيونها وهي تقول:ربي يهديك وتسمع الكلام..بعدين رفعت حاجبها وقالت..ماعنده مايدير غير انه يسمعه وينفده...
🍁🍁🍁🍁🍁
الساعه 8:30ليلا..
في الكوجينه....
وهما يوتوا في العشي...
لينا وعفاف واساور وحور ومرام..
كانت لينا تتحرك..وعيون حور معاها..
ومرام كذلك واكثر تركيزها كان ع عقد زهرة الياسمين المزينه رقبتها..
مرام:حلو سلسالك لينا..
لينا ابتسمت وقالت:عيونك الحلوة..
اساور بضحكه:شكله هديه من سفيان..
عفاف شبحت للعقد ابتسمت..
لينا بضحكه:ايه..
مرام بإبتسامه:ربي يعقد عسلكم..
لينا بإبتسامه:آمين..تسلمي مرومه..
وحور غيرت عيونها عن لينا ولهت باللي دير فيه..
اساور:ايه حقه صبايا...في موضوع يلوح في الأفق..
كلهم شبحولها بمفاجأة..
مرام:واخيرا..
اساور بضحكه:ايه...واحد من زباين محلنا شافني كذا مرة وعجبته وفتح معاي الموضوع ويراجي في الرد..
لينا:اهم شي يكون عاجبك..
اساور بإبتسامه:هو ايه..بس نبي نشحطه شويه..وغمزت للينا..
ولينا ضحكت..
عفاف:ايه شحطيه ويبسيله ريقه قبل توافقي مايبوا الا هكي هالرجاله..
ضحكوا..
حور بضحكه:حولي خل نسقي اني مش تقدري تسقيه بيده وحده..
عفاف وخرت وهي تقول:مش قادرة نصبر كان نلقى نحوله بروحي..
لينا:مفروض ماتحركيها بكل لين تنجبر ياعفاف..
عفاف بضحكه:الحق والله ماندير في حاجه في حوشي عبدالصمد هو اللي يتحرك..يضم في الحوش يوتي في البنات للمدرسه ويقري فيهم...والماكله شبه يوميا يدير في جاهز ممكن مرة ولامرتين دارلنا مبكبكه...
اساور:ياوخيتي محلاه..
لينا:الراجل الحنين يبان في المواقف هدين يبان حتى حبه لمرته..في من تريس والله مايدوروا تلقيه ياكل ويشرب عند هله ومخليها هي ادبر راسها..
اساور:صح..
ابتسمت عفاف وهي تسقي وتفكر في راجلها...
وكملوا تجهيز العشي..
وطلعوا للرجاله والنساوين تعشوا...
ورنده فهالوقت كان تحاول تبين انها متعايشه مع ألمها وجوها عادي..وربي بس العالم باللي تحس بيه..
خفت الزحمه..بعدين فضت..
وحتى البنات روحوا...
ولينا ركبت لشقتها مع راجلها..
ووجيهه خشت باتت في دارها حدا راجلها..
ورتيل راقده بالنوم...تعودت ترقد بكري حتى في ليلة الجمعه..
ورنده قعدت سهرانه..
مقعمزة ع سريرها وسرحانه بخيالها في ايام حلوة..
مش عارفه علاش خطرت عليها توا...ممكن لانهم اليوم ذكروها بيها..ذكروها بأول مرة شافت فيها محمد
••••••
في كلية اللغات..
ماشيه بتطلع لسيارة خوها سفيان بش بتروح..
وهي ماشيه يعترض طريقها واحد..
تحسابه جي قدامها بالغلط غيرت طريقها..اعترضه مرة تانيه..
وقفت وشبحتله..
حول نظاراته وقال؛مش عارف قداش مرة قتلوني عيونك..
عقدت حواجبها من فوق لتحت..
ابتسم ع جنب وقال:محمد الفاسي خريج ادارة وحاليا ملتحق بمعهد الهندسه النفطيه..مأسس نفسي ولد عيله وناس ونبي نخش حوشكم من بابه..
شبحتله بغرور وفاتت من حداه وخلاته..
•••••••
وتوالت محاولات محمد لين تخرجت رنده من الكليه..
وبعت اهله يخطبوها...وردتهم...
بعد كم شهر بعت ناس يخشوا واسطه بش توافق..ورداته..
بعدين مشي كلم خوها سفيان...
وسفيان روحلها ودارلها تحقيق مطول...بعدين حاول يقنعها بيه وهي عطاته فرصه..
ورجع بعت اهله...ووصلوا لمرحلة المقابله الشرعيه
في المقابله...
محمد:صدقيني يارنده حتعيشي معاي ايام حلوة من حلاوتها حتحسي روحك عايشه في حلم..والله ماهو كلام يارنده..انتي غير بس ارضي عليها وتو تشوفي بعيونك..
رنده بإبتسامه مغرورة:واثق من روحك هلبه..
محمد بإبتسامة حب:لأني نحبك هلبه..
ابتسمت بغرور وغيرت عيونها عنه..وهو يتأمل فيها..
•••••••
وفي ليله عرسهم...
"الله محمد شن هدا؟!"
محمد وهو واقف قدام برواز صورة طويله لرنده واخدتها في البيان قال؛هادي انتي في قلبي وحياتي ياعمري..ياريت نقدر نوريك اللي في قلبي ليك يارنده ياريت تقدري تشوفيه..
ابتسمت رنده بإعجاب وعيونها مليانات دموع...
•••••••
"لا محمد هلبه هكي "
محمد؛مافي شي هلبه عليك ياعمري وبعدين هادي يقولولها هدية شهر العسل يعني مادرت شي جديد..
رنده بإبتسامه:نحبك هلبه حمودي..
محمد بضحكه:ياروح حمودك..
ضحكت رنده..
••••••
"وين تحسي بيه الوجع"
رنده وهي تبكي:رجلي اليسار..
قعد محمد يدلك فيها وهي تشوفلها ودموعها في عيونها..
محمد:هي شويه ياقلبي وتولي احسن..
رنده مسحت دموعها وهي تشوفله كيف يدلك في قدمها..
محمد؛ها شن حبيبي كويسه توا؟
رنده هزت راسها وقالت:ايه ولت احسن..
محمد بضحكه؛سلملي المدلع ياربي.
ضحكت رنده من بين دموعها...
🍁🍁
وقعد الذكريات الحلوة تزور فيها وحده ورا تانيه..
وكانت كل ماتذكر شي ماتصدقش ان هدا هو نفسه الشيطان اللي خانها و لعب بشرفها وسمعتها ويبي يدمرها..
معقوله في حد يحب حد يدير فيه هكي!؟
وتزيد تتأكد وقتها ان محمد عمره ماحبها..
وتزيد تعرف ان الحب الحقيقي..مش كلمه حلوة وهديه...وحنية مزيفه..الحب الحقيقي اعمق من هكي بهلبه..
ان اللي يحب التاني يخاف عليه حتى من نفسه..
مهما يصير بيناتهم من الزعل يقعد حبل الود موصول بقوة ومتين عمره ماينقطع..
يحنوا ع بعض حتى وقت الزعل..ولاواحد منهم يهون عالتاني..
الحب الحقيقي مهما وصفنا فيه مش حنوفوه حقه..
ويقعد اجمل ما ينقال عن الحب انه رزق..
والرسول في يوم قال عن خديجه رض الله عنها..
"إني رزقت حبها"
🍁🍁🍁🍁
غطاته وهو راقد ..بعدين طبعت قبله ع راسه ومسحت ع شعره وهي مبتسمه..
بعدين مشت لدار صغارها وقعمزت فيها..
وخدت الروايه وبدت تقرا فيها..
كانت البدايه متاعها عاديه تعرف بالشخصيات والبيئة اللي عايشين فيها وطبيعة حياتهم..
وشويه شويه بدت القصه..والأحداث..
ولينا بدت تنسجم معاها...لعند ماوصلت في صفحه لقت سفيان كاتب ع هامشها...
إني مرضت بحب من منها الدوا..
إني عشقت كي اصير عليلا...
بعدين شافت اسمها مكتوب بخط حلو هلبه..
ابتسمت بحب ودموعها في عيونها وقلبها يدق يقوة...
سكرت الروايه ومشت حطتها في مكانها..
وناضت مشتله الدار..
لقاته مازال راقد ع جنبه الأيمن ومربع ايديه
تنهدت بإبتسامه وقالت بهمس..نحبك..نحبك دنياااا..
بعدين ضحكت...شويه سمعت صوت ياسمين تبكي..
مشت...طلعتلها...
🍁🍁🍁🍁
"ماشيه من وراي تفتحي في موضوع زي هدا مع امي وتحطي فيا تحت الامر الواقع"
نوريه بهدوء:مافي شي من وراك ياحسين كله انت عارفه وعارف انه حيصير غصب عن اللي يبي واللي مايبي..
حسين بصدمه:كيف يعني انت ماعندكش مشكله تمشي تخطبي لراجلك مرة تانيه..
نوريه:لان همي الاول والاخير مصلحتك..
حسين:ومصلحتك انتي..
نوريه:من مصلحتك..
حسين بضحكه استغراب؛وتتكلمي عادي عادي
جدا ولاكأنه راجلك اللي بياخد عليك..
نوريه:ياحسين علاش تعارك توا وحارق دمك الهليلوله اللي دايرها هادي كلها مالهاش داعي..انت تعرف واني نعرف ان اللي تبيه عمتي حيصير رضينا ولامارضينا..
حسين:هداكا الوقت حنقولوا حاولنا لكن ماقدرناش..لكن انتي حتى المحاوله قطعتي رقبتها ..انت اللي فتحتي الموضوع وانتي اللي بدوريلي فوقها..
لو كان في قلبك ليا شويه حب راني شفت دموعك وانتي تتكلمي توا..لكن انتي تتكلمي ببرود وكأني مانعنينلك شي..
ولاكأني عشت معاك حب عمره 14سنه يانوريه..
قعدت ساكته وهي تشوفله ببرود
وبرودها هدا استفزه هلبه وخلاه يقول:تمام يانوريه تمام..ماعنديش مانع..لكن مش انتي اللي حتختاريها..خواتي وبالمواصفات اللي اني نبيها..وحناخدها اصغر منك بعشرة سنين..
نوريه:اللي يريحك ديره وربي يهنيك ويعطيك الذريه الصالحه..
قعد يشبحله بنظرات كلها غضب كان يبي يضربها لكن ماقدرش..
حده مشي وخدي مخده وبطانيه ومشي طلع من الدار..
هي بعد ماطلع..
مشت خشت سريرها وتغطت..وغمضت عيونها..ودموعها نزلوا منهم...
🍁🍁🍁🍁
تاني يوم الصبح..
كعادتها ناضت مع الفجر نوضت عزوزتها وصلوا...
بعدين عطتها يبرة السكر وعطتها فطورها..
ع خشة سلفتها..
سلمت عليهم..ولاحظت عليها نوريه وكأنها باكيه خدتها ع تركينه وسألتها...
مها بدموع:مشيت عاينت وطلع عندي مشكله في الرحم ونبي سنتين بش نقدر نحمل ونجيب الصغار مع الادويه..
نوريه:راجلك شني؟
مها:يقولي عادي مافيش مشكله نراجو عامين بس اني خايفه من عمتي خايفه تخليه يطلقني ولاياخد غيري..
نوريه:مازال صغيره يامها اطمني عمتي مش حتخلي راجلك لايطلقك ولاياخد عليك مازال عندك فرص..
مسحت مها دموعها وقالت:شن قصدك؟!
نوريه بإبتسامه اسف:حسين بياخد..
مها قعدت تشبحلها بصدمه ممزوجه بالألم..
نوريه:هيا هيا تعالي خل نديروا الفطور قريب ينوضوا القوم..
شدت مها يد نوريه وهي تشوفلها..
نوريه بنبرة باكيه:قتلك هيا..
مها:ابله نوريه..
نوريه حطت يدها ع عيونها وبدت تبكي..
ومها ضمتها ودموعها نزلوا..
ونوريه تبكي بألم...وسرعان ماهدت بكي وبعدت عن مها وهي تمسح في دموعها وقالت:هيا بسرعه سقدي بش ينوضوا يلقوا كل شي واتي..ومشت للكوجينه..
ومها مسحت دموعها ولحقتها...
🍁🍁🍁🍁🍁
الساعه 5:00عصرا..
في الطريق..
مروان مع منى في السيارة ومش مسموع صوت غير صوت ولدهم الشريف..
حاول مروان يكلمها بس كانت رافضه ترد عليه..
وهو خلاها ع راحتها..
لين وصلوا للحوش وخشوا..
منى خدت ولدها وطول مشت ركبت لشقتها..
وهو معاها بعيونه..بعدين تنهد ومشي طلع شنطتها ولحقها بيها...
••داخل..
في دار التقعميز..
وجيهه:اللا جت وركبت لشقتها طول..
رتيل:كيف شن قصدها بحركتها هادي؟
وجيهه:شكلهم مقريينها كويس في حوش اماليها امها وحده مش هوينه..
رنده تنهدت وهي تسمع فيهم وقعدت ساكته.
ولينا كذلك دايره روحها لاهيه مع الصغار.
رتيل؛بيني وبينك يام منى قلت خلطتها خير ماتعرفش تحفظ سر راهو اللي هناك في وذان امها وخواتها..
لينا شبحت لرتيل..
وجيهه:من قالك؟
رتيل:مرة سمعتها تتكلم بالتليفون مع وحده من خواتها وتحكي في اللي صار مع عفاف..
وجيهه؛حتى اني عارفتها..
لينا:اللاي شن رايك نديروا سفنز..
وجيهه:ماعندي ليه خلوق..
لينا:سفيان خاطره فيه اللاي يبي متاعك انتي بالذات..
تنهدت وجيهه بعدين ناضت وقالت:كان هو طلبه خلاص..ومشت للكوجينه..
لينا ناضت وهي تقول:بالله ردن بالكن..
ومشت لحقت عزوزتها..
•••في الكوجينه..
لينا:قتلك اللاي.
وجيهه:نعم؟
لينا:ينعم عليك..معليشي اللاي ماتاخدي ع خاطرك من منى..خليها تاخد وقتها بعدين تولي كيف ماكانت..
وجيهه؛في حد حطك محامي دفاع عنها؟!
لينا بضحكه:انا نحاول نهدي النفوس ياللاي.. ابتسمت وقاالت..الوضع مش متحمل مشاكل تانيه..
وجيهه:باهي تحركي اعجني العجبنه ومعاش تكتري دوة...
ابتسمت لينا وقالت؛حاضر..
ووجيهه قعدت تشبحلها وهي بتبدا تعجن وتفكر في كلامها..
بعدين مشت طلعت من حداها..
ولينا تشوفلها بإبتسامه...
••طلعت وجيهه للصاله..
خدت تليفونها واتصلت بمنى..
🌼ومنى في هالوقت تبدا اضم شقتها..
سمعت تليفونها رن..
مشت خداته شافت المتصل..
مطت شواربها بملل وفتحت الخط وردت..
منى:السلام عليكم اللاي..
"وعليكم السلام كيف حالك منى"
منى:الحمد لله..كيف حالك انتي..
"الحمد لله..روحتي"
منى:ايه في شقتي توا بنبدا نضمها..
"باهي تكملي انزلي خلينا نشوفوك ونشوفوا شروفه استاحشناكم"
ابتسمت منى بإستغراب وقالت:باهي كان حصلت فضوة..
"باهي ع راحتك..المهم ابعتي الشريف حتى مع بوه."
منى:حاضر..
"بالسلامه توا"..
منى:بالسلامه..تنهدت وحطت تليفونها في مكانه ومشت وهي تنادي...شريف...
🍁وقعدت منى يومين في شقتها مانزلتش بكل..
والشريف ينزل مع بوه ويركب بيه لما يجي طالع...
وهالشي كان مضايق وجيهه بس سكتت ع خاطر مروان خافت يزيد يتحسس وهالشي يدير مشاكل بينه وبين خوه...
وكله عادي عند وجيهه ولايصير بين ولادها مشاكل..
••خش للمستشفى وهو حاس بشي من الوجع في مكان ما من جسمه..
توجه لحجرة خوه دق الباب وفتحه..
مروان من ورا المكتب:ياهلا بنيوتن..
ابتسم سفيان وقال:فاضي..
مروان بإبتسامة قلق:ان شاء الله خير وجهك مش عاجبني..
سفيان:حاس بألم هني من امس..وحط يده ع مكان الألم..
مروان عقد حواجبه وقال:ع الأغلب زايده...
فنص سفيان وقال:قصدك عمليه!؟
مروان بضحكه:اكيد مادام بدت تسببله في الم لازم تحولها..
سفيان عقد حواجبه بصدمه وقعد يتخيل فيهم فاتحين شي من جسمه ويدخلوا فيه ويطلعوا..وختم تخيله بمشرط ينساه واحد من الدكاترة في بطنه..
سفيان:مافيش غير هالحل!؟
مروان بضحكه رفع حواجبه وقال:تس...
سفيان بلع ريقه بقلق وقعد ساكت..
ومروان يشوفله وهو شاد ضحكته....
🍁ودارو لسفيان الفحوصات اللازمه..
وطلعت فعلا مشكلة زايده..وقرروا يديروله عمليه بعد ساعه..
في الحجرة..
كان مقعمز وهو في حالة من القلق وفي نفس الوقت يتوجع...
فجأة..انفتح باب الحجرة وهي خشت..
سفيان:شن جابك ؟!
لينا بقلق:شني شن جابني ماتبيني نكون معاك وانت فهالحاله..
سفيان؛علاش حالتي خطيره!؟
لينا:لا خطيرة شنو..مش زايده هي؟
سفيان:ايه قالوا هكي..
لينا ع الكرسي حداه وقالت:من امس حسيتك مش طبيعي تتوجع وداس عليا..
سفيان؛ماكانش قوي زي اليوم...حسبته الم عارض ويمشي حاله..
لينا تنهدت وقالت: مش مشكله بعد اقل من ساعه ترتاح منها..
قعد ساكت شويه بعدين قال: :مش متريح...كان درتها برا خير.
هي بضحكه:عملية زايد راه...
سفيان:وشن عمليه الزايده شويه...كلمة عمليه بحد ذاتها مش ساهله..يشقولك جسمك بمشرط ويمزرطولك احشائك وعاد كان جي حظي زي مانعرفه في دكتور حمار ينوشلي حاجه تانيه ولاينسى كركوبه فاشه في بطني..
هي ضحكت بعدين قال...الموضوع ابسط من هكي العمليه ساهله جدا والدكاترة كويسين..
سفيان:لالا ماتقوليش الكلام العبيط هدا وزعمتيك بتشجعيني لالا..
هي سكتت وعيونها عليه وشاده ضحكتها..
هو شبحلها بعدين قال:خيرك سكتي تكلمي..لكن نبي كلام واقعي مش عبيط..
هي فنصت عيونها بتخويف وقالت:عمليه....مشرط...شق...طلع...
هو فنص..
هي كملت تقول...مرات المشرط يخرط الكبد...ومرات يفلق المرارة..ومرات يقطع المصارين..
هو مازال يفنص فيها..
وهي شاده ضحكتها وعيونها مازال يفنضوا بتخويف: عمليه.
هو بلع ريقه وعقد حواجبه وقال:خلاص بطلي..
هي ضحكت وقالت:خلاص بنسكت..
قعدوا ساكتين وهو يفكر وهي تشوفله بإبتسامه بعدين قالت..هات يدك..
شبحلها..ومد يده..
خدتها وقعدت أشر بسبابتها ع اماكن معينه في اصابعه وقالت..
استغفر بيهن من قلبك...كيف توا..وقعدت اطبق ع يدها وهو يشوف وقالت..قالوا الاماكن عدي في الاصابع توصل لاهم اعضاء الجسم..تعطيك طاقه ايجابيه وتريحك..وغير هكي اك البنادم يرتاح لما يخفن عنه ذنوبه..والاهم انهم يشهدن عليك يوم القيامه...هي ابدا...وانا معاك..
هي بدت وهو يشوفلها بإبتسامه وبدي يستغفر بهمس ومن قلبه زيها...
هي قعدت تشبحله بإبتسامه...وهو شبحلها ابتسم بعدين قال:تحبيني؟
ضحكت..
سفيان وهو رافع حاجبه اليسار قال بضحكه؛قوليها توا ماتندريش شن يصيرلي داخل..
لينا بضحكه:غير شن بيصيرلك بس..راهي عملية زايده بإذن الله ماصاير كان الخير..
سفيان؛ان شاء الله...لكن قوليها..
ضحكت وكيف جت بتقولها خش دكتور..
سفيان شبحلها بحده يبيها تطلع..
هي فهمت عليه وناضت ومشت طلعت..
الدكتور:مستعد استاذ سفيان...
سفيان هز راسه بإيجاب..
🌺🌺🌺🌺
ودخلوه لغرفة العمليات..
ولينا مشت لحجرة الدكتورة اماني تستنى يجيها خبر غادي..
اماني:لينا خيرك خايفه عمليه بسيطه هادي..
لينا بقلق:مش عارفه دكتورة..مش متحمله الحق..
اماني بضحكه:مش متحمله فيه شي قصدك..
ابتسمت لينا بخجل ممزوج بالقلق..
بعدين جت بتنوض وهي تقول:خل نعدي نشوف بروحي..
ولما ناضت ولت قعمزت حست بدوخه..
اماني بقلق:خيرك لينا؟!
لينا:مش عارفه..شورني وقفت فيسع ضغطي هبط..
اماني خدت جهاز القياس وقالت:هدا من التوتر..
مشتلها بيه وقالت:هي قيمي كمك..
رفعت لينا كمها...واماني لبست الجهاز وبدت تقيس بعدين قالت:ضغطك هابط...نوضي معاي ديري تحاليل بش نطمنوا.
لينا:دوخه عاديه راهي..
اماني:اي دوخه تحسي بيها لازم اديري بعدها تحليل دم يالينا مافيش دوخه تجي من فراغ..هيا نوضي..
لينا:وسفيان!
اماني؛تو يجينا الخبر بالهاتف ماتخافيش حتى خوه معاه..
تنهدت لينا بقلق بعدين ناضت وطلعت مع الدكتورة...
🌺وطلع سفيان من غرفة العمليات بعد استئصال الزايده وكان وضعه الصحي ممتاز..
اما لينا..بعد مادارت التحليل وطلعت النتيجه...
اماني بإبتسامه؛ترا تعالي معاي لينا..
لينا مشت معاها وهي مستغربه..
وصلوا للحجرة وخشولها...
اماني:بري تمددي غادي لينا..
لينا بدهشه:دكتورة!
اماني بضحكه:غير بري يللا..
مشت لينا وهي ترجف مع بعضها..
تمددت ع السرير..
جتها الدكتورة وجهزتها ودارتلها فحص الايكو..
اماني بضحكه؛مصغيرته..
لينا ودموعها في عيونها:شن هو؟!
الدكتورة بضحكه؛وليدكم ولابنيتكم...انتي حامل يالينا...في بداية الحمل....
فجأة لينا ولت تضحك ودموعها ينزلوا...
مش اول مرة تحمل وهادي مش اول فرحة حمل تعيشها..بس بالنسبه لسفيان هي الأولى...بعد طول انتظار.....
#صلوا_على_محمد
....يتبع......
