لاخير في عمل يلهي عن الصلاة..
الصلاة اولا ❤
قولوا لاإله إلا الله تفلحوا❤
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
في دار التقعميز..
منى:اللاي..
وجيهه وهي شاده ياسمين تلاعب فيها:نعم..
منى:ماليا بيمشوا للبحر اخر الاسبوع هدا ويبوني نمشي معاهم..
لينا مركزة مع وجيهه..
وجيهه:وقداش بيقعدوا؟
منى:الخميس والجمعه والسبت الاحد ان شاء الله مروحين..
وجيهه:وراجلك من بيه؟
منى:ماهو اللاي ماليا عازمين حتى مروان..
وجيهه:باهي انتي كلمتيه هو؟
منى:ايه وقالي شوفي امي
ابتسمت وجيهه وقالت:سلم وليدي..تعرفي علاش قالك هكي..للأن طلعة زي هادي مايقدرش يطلعها من غير امه..
لينا ابتسمت ابتسامه خفيفه متهكمه..
منى قعدت ساكته وهي مضايقه..
وجيهه:راجي لين تكمل رتيل امتحاناتها ونمشوا كلنا لغنيمه..
زبيده:من راسك الكلام هدا؟
وجيهه:لا يااللاي حكيت فيه اني والشريف وقال باهي..باهي يامنى؟
منى شن بتقول يعني غير باهي بإستسلام قالت:باهي ياللاي..
وجيهه وهي تلعب في ياسمين:ياسلم هالبنيات السمحات ياربي..
ولينا تشبح لمنى اللي كان باين ع وجهها الضيق وهي تمسح ع شعر ولدها اللي راقد ع رجليها...
••في الجنان...
مكالمه هاتفيه..
سفيان:نبي نعرف لمن الرقم هدا بسرعه بالله..........تمام...
وسكر...تأفف..بعدين دار اتصال تاني...
وقعد يراجي اللي اتصل بيه يرد..
ورد..
"هلا سفيان"
سفيان:اسمعي قولي لأساور جو التافه اللي دير فيه كله عند خوتها الليله..
"علاش خيرها شن دارت"
سفيان:رغم اني شاك انك ماتعرفيش..التافهه تبعت في رسائل مسخه زي وجهها واكثر من مرة حذرتها ان اللي دير فيه بيوصل لخوتها لو مابطلتاش لكن هي ماتبيش تفهم..
"غير راجي ياسفيان شويه هي اصلا قالتلي خلاص معاش بنزعجه بكل ولاندير شي يضايقه حتى برا انشد مرتك تعرف"
هو رفع حواجبه وقال:شن تعرف!؟
"تعرف ان اساور تبيك وقالتلها كان تبي يصير بينك وبينه نصيب معاش طيحي روحك ليه وارزني "
هو قعد يسمع ومصدوم....
يعرف انها قالت لاساور ان ماعندهاش مشكله يتزوج غيرها لكن مش لدرجة تعطيها نصايح بش تقرب بينها وبينه..!
معقوله لهالدرجه زاهده فيه!؟
"المهم اني تو نزيد نكلم اساوى ونتأكد منها بعدين نرد عليك"
سفيان بصوت هادي:تمام...وسكر عليها...وهو يفكر في اللي سمعه...
مابعد قلبه اللي عاش عمر مرتاح...تقول هالعذاب كانله مدسوس ويوم عن يوم وين مامدسوس يكبر بش وين يجي وقته يعيشه كله في مرة اضعاف مضاعفه...
وفي عز سرحانه استاقظ ع صوت آذان المغرب..
غمض عيونه وخدي نفس..بعدين فتحهم ومشي للشقه بش يغير ويمشي للجامع..
🏵🏵🏵🏵🏵
"والله ماني مخلياته يتهنى ع اللي داره فيا الله"
ايناس؛باهي خلاص اهدي زهور ماتخلنيش نندم اللي قتلك..
زهور قعد توخر في شعرها للخلف بغل وهي تتنفس بسرعه بعصبيه..
ايناس بقلق:زهور..
زهور بنرفزة:خلاص اسكتي..واطلعي من حداي وخليني بروحي..
ايناس شبحتلها شويه بعدين مشت طلعت وخلتها..
وهي قعدت تشوف لتليفونها وللرساله اللي بعتتها قبل شويه ودموعها نزلوا بعدين قالت:تو تشوف ياسفيان..
🏵🏵🏵🏵
"لالا والله لا بكل قداش ليا معاش جيت جنبه لاباتصال ولامسجات ولاشي والله يارنده"
رنده:خلاص خلاص معاش تحلفي مصدقاتك...
"باهي من يعني كان مش اني!؟"
رنده:الله اعلم مرات تكون وحده من طالباته ولازميله معاه مش عارفه..ع العموم خلاص بنسكر توا نهدرزوا مرة تانيه..
"تمام المهم قوليله اساور مالهاش علاقه بالله عليك لو جي وقال لخوتي حاجه يقددوني"
رنده؛ياودي بنسكر منك ونكلمه توا..
"تمام...كلميه طول يللا باي".
رنده:سلام...وسكرت منها واتصلت بيه طول...
نادى لين فصل وماردش...فقررت تكتبله رساله..
وكتبتها وبعتتها بعدين اتصلت بنوريه...
•••••
نوريه في هالوقت كانت حدا عزوزتها في الجنان يشربوا في القهوة ..
نوريه:نفكر ياعمتي نفتحوا الصاله ع المربوعه ونديروها صاله استقبال كبيره مادام درنا مربوعه خارجيه..
عزوزتها:هكي قولك..
نوريه:اممم..وسلفي توا بيعرس وبيطلع من داره نفتحوا داره داره المعيشه ونوسعوها اكثر...
عزوزتها:والله كلام يخش العقل..بعدين هدرزي مع راجلك فيه مادابيا الحوش يزيد يتوسع..وانتي تجي تسكني عندي..
ابتسمت نوريه وقالت؛بعد عرس سلفي ان شاء الله ربي يهنيه نجيك نقعد عندك..
عزوزتها:هالنهار اللي ندور فيه ونراجي امتى يجي..
ضحكت نوريه وقالت:ربي يحفظك..
عزوزتها:ويحفظك بنيتي ويعطيك الذريه الصالحه...خلاص نواره كبرت توا..
نوريه تعكرت ابتسامتها وهي تشوف لنور كيف تلعب..
عزوزتها:لازم تكون لوليدي عزوه زي خوته يانوريه..
نوريه:ان شاء الله ياعمتي..
شويه سمعت تليفونها رن..
عزوزتها:صوت هاتفك هدا..
نوريه:ايه نستأذن عمتي تخش نشوفه..
عزوزتها:اذنك معاك بنتي..
ناضت نوريه ومشت خشت داخل وهي مضايقه..
خدت تليفونها وين ماكان وزادت خشت داخل بش ترد براحتها...
نوريه:هلا رنوده..
"شن جو نويرة"
نوريه:تمام الحمد لله شن جوك انتي..
"تمام...اسمعي اخر الأخبار"
نوريه بفضول:قولي...
🏵وحكت رنده لنوريه اللي صار بالتفصيل..
نوريه:متأكده انها مش المدقوقه اساور..
"لامش هي متأكده..المهم لما قلت لسفيان عن الكلام اللي قالاته العبده هديكا حسيته انطفي"
نوريه:ياكبدي غير شن شايفين فيها هالسودا...ماسد عبده وشلافطيه ولسانها اطول منها..الله يرحمك ياعدنان وخلاص..
"الله يرحمه..اني توا نفكر كيف نخلوه يحط فكرة الزواج في راسه.."
نوريه:انتي تبيه يديرها نكايه فيها ولا عارفتيه مش حيفكر يتزوج سوا كان يبيها ولالا..
"ايه...المهم يكسر شوكتها "
نوريه:لكن الحكايه هادي مش ساهله تبي هلبه..
"عارفه...واول شي علاقتنا بيه لازم تتحسن"
نوريه سكتت وهي تفكر بعدين قالت؛شن رايك غدوة تجيني نهدرزوا ونكلم حتى فوفا تجي..
"ياريت"
نوريه:خلاص تعالي غدوة العشيه..
"ان شاء الله...هي مانعطلش عليك نويره:
نوريه:شن مايصير جديد كلميني طول..
"من غير ماتوصي ياألبي بوسات..سلام"..
نوريه:بوسات...بالسلامه..وسكرت..
بعدين تنهدت ومشت طلعت لعزوزتها...
🌺🌺🌺🌺
بعد المغرب..
في الكوجينه..
لينا وهي ادير في عشي زبيده كانت تهدرز مع منى اللي لاهيه بعشي العيله..
لينا:وهي خيرها ترد..
منى:اختي هادي تتشرط هلبه وخوفي من كثر ماتتشرط تقعد..
لينا:شن شروطها هي؟
منى:هي فنية مختبرات وتبي دكتور راسها مسكر ع الدكتور قالت نبي حد يكون خير مني في المستوى العلمي وحد يفهم عليا ونفهم عليه ويقدر مهنتي.
لينا:مش شرط يكون دكتور بش تلقى فيه الحاجات هدين..
منى:هاتي من يفهمها..
لينا مطت شواربها للاسفل بعدين قالت:ربي يعطيها اللي تتمناه..
منى؛ان شاء الله..
غطت الطنجرة بعدين جت حدا لينا وهي تقرض في عجينه الرشده"المقروضه"..وقالت..
منى:ايه شن جوك انتي وسفيان..
لينا شبحتلها..
منى:حاستكم باديين تتعودوا ع بعض..
نزلت لينا عيونها للرشده وهي تقول:قاعده نساير في ظروفي بش نكمل هالحياة بإستقرار..
منى:مافهمتش؟!
لينا تنهدت وشبحتلها وقالت:انا نعتبر فيك كيف اختي وبنصارحك انا لعند توا مش متقبله ونحس في روحي حتى القدام مش حنتقبل..صعب واجد..
منى:قاعده مش قادرة تتقبليه..
لينا رفعت حواجبها وقالت:بالمرة..شخصيه غريبه وماينعاش معاها..مش عارفه كيف زهور صبرت عليه عام كامل ومستغربه كيف حبت واحد كيفه..ثقيل ع القلب ومش مهضوم بكل..وماعنده ولاطبع حلو يخليه ينحب ولو شويه..قاعده نتحمل فيه ع خاطر عويلتي وبس..
منى:لكن حنين في الصغار ويحبهم تقول بوهم..
لينا:وهدى الشي اللي مخليني نتحمل فيه..
منى قعدت ساكته وهي تفكر في كلام لينا..
لينا:هو اصلا نفس الشي..لولا باته ماكان حط روحه فهالوضع حياته كلها وقفت وخطط واجد ليه تعرقلت..اليوم وقبله شفت بالصدفه رسايل يوصلنه فيهن كلام حب..
منى بصدمه:كيف!؟
لينا شبحتلها وقالت:ردي بالك الكلام هدى يطلع حتى لمروان..
منى بصدمه:ايه ايه اكيد..لكن كيف رسايل حب؟
لينا:كلام حب يعني استاحشتك وحبيبي ومن هالكلام واضح ان في وحده في حياته وانا وعويلتي وقفنا في طريقه معاها..
منى قعدت ساكته وهي تفكر ..
لينا:قبل انا كنت نحسابه يبي اساور ع ايام زهور بس الباين في غيرها في حياته..
منى:ايه ومرات كان كاره زهور ع خاطرها..
لينا؛اها ومرات طلق زهور بيش ياخدها..يعني قبل وفاة عدنان الله يرحمه منين روح مرات يكون مروح بيش يفتح موضوعها..تنهدت وقالن..لكن صار اللي صار...انا حنحكي معاه فهالموضوع ونخليه يعرف ان ماعندي مشكله بكل ...
منى:بكل بكل!؟
لينا :وليش بيكون عندي مشكله اصلا..!؟
منى:في النهايه راجلك صعب ع المراة ترضى بحاجه زي هادي حتى لو كان مافيش بينها وبين زوجها مشاعر..
لينا حركت راسها بالنفي بعدين قالت:انا يامنى الحياة هدي معاد نبي منها شي كان نربي عويلتي ونكبرهم ونشوفهم عايشين مرتاحين ومش محرومين من شي..بآختصار انا توا عايشه لهم هما ومايهمني حد في الدنيا غيرهم..وفي نفس الوقت سفيان من حقه يعيش الحياة اللي يبيها ويكون عنده عويله...حرام يضحي بس ومايعيش كيف مايبي..
منى تنهدت وقالت:مانقول غير ربي يجيب مافيه الخير للجميع وخلاص..
لينا بإبتسامه:آمين...
وخدت الرشده المقرضه وحطتها في اللبن...
ومنى مشت طلعت من الكوجينه...
🌺🌺🌺🌺🌺
بعد صلاة العشاء..
خش للحوش وهو يتكلم بالتليفون...
سفيان:عبدالوارث السنوسي!؟.............تمام بارك الله فيك...
وسكر..ومشي بإتجاه الكوجينه وهو يقول...من عبدالوارث السنوسي هدا!؟مار عليا الاسم..
وكمل طريقه للكوجينه وهو يفكر..
وصل فيها ونادى...لينا..
"هي شويه بس"...
فهم ان منى معاها في الكوجينه..بعد ومشي بإتجاه المظله وقعمز تحتها...وحط رجل ع رجل...
ع جيتها هي...
شبحلها وهي جايه لين وصلت فيه..
لينا؛شويه ونحطلك العشا..
سفيان:قعمزي شويه نبيك..
لينا هزت راسها ومشت قعمزت مقابلاته..
سفيان مسح حاجبه وقال:نبي نوضحلك حاجه..بخصوص الرساله اللي شفتيها جتني ع الهاتف..
قاطعاته وقالت؛مش لازم..
عقد حواجبه وهو يشوفلها..
لينا:مش ملزم تبرر..هدى شي شخصي يخصك انت مايعنيني في شي..
رفع حواجبه بتعجب..
لينا:ونبي نقولك...انا ماعندي ولا مشكله لو تبي تزوج وتشوف حياتك..ماتوقف اي شي كنت مخططله ع خاطرنا...
من حقك تعيش حياتك كيف ماتبي وتزوج من تبي وادير عيله ع روحك..مافي حد يقدر ياخد منك هالحق...ولو على عمي انا مستعده نكلمه ونقنعه وماظني هو يوقف في وجهك من الأساس...
قعد يشبحلها بإمتعاض..وعيونه فيهم لمعة دموع..
وهي تشوفله وتراجي يتكلم..
هو تكلم وقال:تمام..تقدري تخشي..
لينا ناضت وقالت؛شويه ونجيبلك العشا..
سفيان بحده:مانبي شي..
لينا شبحتله بإستغراب..
ناض ومشي وهو يقول؛كان في حد سأل عليا اني فوق..
هي قعدت تشبحله لين معاش بان عليها بعدين حركت راسها يمين ويسار ومشت خشت للكوجينه..
🌺🌺🌺🌺🌺
وإنك لو أبصرت مابين اضلعي
لأبصرت قلبي في لظى يتقلب..
بيت الرافعي هدا كان الرد اللي قعد مكتوم في قلبه ع كلامها..
كلامها اللي كان بقسوة السوط ينزل ع قلبه ويجلده..
مصعبها...لما تقعد عمر عاصم نفسك عن الحب مع ناس تمنت منك نظرة رضا... ويوم اطيح فيه...يكون مع حد مش بس مايندريش عليك...لا..زاهد فيك....!
من بعد ماركب وهو يحاول يلهي روحه بخدمته عن التفكير فيها وفي كلامها...يحاول يخلي تركيزه كله في الفيزياء..وقوانينها..ومسائلها...ومعضلاتها..
الفيزياء اللي كان يعشقها...زهد فيها بعد ماالقلب تعبا بغيرها..
يقلب في وراق الكتب..وفي الصفحات ع اللاب توب..
ويحاول يغرق روحه في عالم عاش سنين طويله غارق فيه..
بس توا...غارق في غيره خلاص..
سكر اللاب توب بقوة وحول نظاراته وحط ايديه عيونه بعد ماسكرهم وقعد يقول..
"اطلعي من راسي...اطلعي...اطلعي من راسي"..
حك عيونه بقوة...بعدين حول ايديه وحطهم مكان الصدغين وقعد يدلك فيهم وعيونه مغمضات بقوة.
《مش ملزم تبرر..هدى شي شخصي يخصك انت مايعنيني في شي..》
فتح عيونه...ونزلت من وحده منهم دمعه...حاول جاهد مايخليهاش تنزل بس ماقدرش...يبي يخفف شويه من الألم اللي يحس بيه ولو شويه..
فجأة سمع باب الشقه انفتح..
ناض من مكانه ومشي سكر الباب...
هي كانت حاطه صغارها الزوز في حضنها بالحملات الخاصه بيهم..متوجهه للدار...سمعت باب داره تسكر ماأهتمتش..
وصلت في دارها خشتلها وسكرتها بالمفتاح...
🌺رقدت صغارها في سريرهم..
ومشت وتت اللي بتلبسه للخدمه...وبعدها غيرت حوايجها..ومشت خشت سريرها وفتحت تطبيق المصحف في هاتفها وبدت تقرا منه لين غلبها النوم ورقدت...
💎اما هو فكان مقعمز في بلاكونه داره في يده كتاب حاول يقراه ماعرفش يركز فيه....سكره...وقعد سرحان بفكره فيها..
وهو عقله عاد يقدر يفكر في غيرها!؟...
🌺🌺🌺🌺
وجي اليوم اللي بعده..
بعد روح من صلاة الفجر خش طول لداره...
وفيها قعد يسمع في صوتها وهي تهدرز ع صغارها وتلاعب فيهم..وكان يسمع في صوت حركه في الكوجينه..
لبس حوايجه وجهز نفسه...وطلع من الدار..
🌺في الكوجينه..
لينا:ياكلوا في البشكوط قلباتي هما....ايه ياعمري ايه نجي هالضحكه ياماما..
هو جي وقعد يشبحلها كيف تكلم فيهم وتضحك معاهم ..
ويله ويل من ضحكتها..
هي شبحاته وبرغم استغرابها في لبسه للنظارات الشمسيه هو في الحوش لكن قالت:اهو جي عمو...تعال ياعمو افطر معانا..
ابتسم ومشي خش للكوجينه وجاهم وهو يقول:صباح العسل..
الزوز ضحكوا بفرحه لما شافوه..
وهي ابتسمت ومشت وهي تقول:الفطور ع الطاوله..وبعد تكمل نزلهم لوطا..
هو قعد يشبحلها لين ادرقت من قدام عيونه...بعدين تنهد وشبحلهم لقاهم يشبحوله...ابتسم وقال:اني بنفطر عليكم انتم يابريوش بالشوكلاطه...وحول شطنته وحطها وجاهم وهو يقول..جيتكم..بناكلكم..وقعد يلعب فيهم وكأنه ياكل فيهم حقه وهما يضحكوا..
وهي طالعه من الدار للحمام كانت تسمع فيهم وهي مبتسمه..
وهو لعب معاهم لين تغير جوه تماما..
بعدين قعمز وحاول ياكل..يدوب كلي وشرب العصير بعدين خداهم ومشي نزل بيهم لحوش اهله..
وهي كملت تجهيز نفسها وقعدت تراجي فيه..
ع جيته بش ياخد شنطته..
سفيان:هي بري انزل..
لينا:باهي..ومشت فاتت من حداه...هو طول وقف وشدها من يدها وقفها..
هي انصدمت وشبحتله..
سفيان وهو عاقد حواجبه قال بحده:علاش حاطه عطر..
لينا:مش حاطه...وحاولت تجبد يدها..وهوشدها بقوة وقال...اللي حاطيته بري ديرله حل بعدين انزلي..
طلق يدها ومشي خدي شنطته وتوجه لباب الشقه طلع وسكر الباب..
وهي قعدت مع الباب بعيونها تشوفله بنظرات غيظ..
🌺🌺🌺🌺
في الطريق..
شاده شنطتها وع وجهها باديه ملامح التجهم..
وهو يسوق وع وجهه باديه ملامح الغضب..
والصمت ماانفكش عنهم..
وصلها للمستشفى...نزلت وفشت غلها في الباب..
هو شبحلها وعيونه يفنصوا فيها...
وهي ماشيه بعصبيه لين خشت للمستشفى..
رخي عيونه بعدين غمضهم وابتسم وقال:آااه وخلاص..
فتحهم وتحرك بسيارته للجامعه...
🏵🏵🏵🏵🏵
"امس عمتي كلمتني فيه ياحسين"
حسين:قوليلها حسين مايبيش عزوة حامد ربي ع اللي عنده وساده غير يتصبح ويتمسى في وجه نويرته..
ضحكت وقالت:لكن عندها حق حسين..حتى اني مستغربه كيف لتوا ماصارش حمل ونور ليا 6سنين جايبتها..
حسين:انتي تبي يانور عيوني..
نوريه هزت راسها بإيجاب..
حسين:تمام باهي شن نقدر نديرلك قولي..
نوريه:شن رايك نمشوا لمصر هلبه شكرولي فيهم وفي دكاترتهم..
حسين:تمام نشوف شن عندي الفترة الجايه وحاضر نمشوا وين ماتبي..
ابتسمت وقالت:ربي مايحرمني منك حسونه..
حسين؛ولامنك نويرتي..
🌺🌺🌺🌺🌺
ماشيه في الممر ادور ع حد لين لقاته..
لينا:دكتور مروان..
مروان:اه لينا تعالي..
وقفت عليه وقالت:تفضل...
هو بدون مايشبحلها:هدا الدوا لحناي تبيه اليوم غير اني مانقدرش نروح اليوم وصليه انتي..
مدت لينا يدها وهو حط الدوا فيها...
لينا خداته وقالت:تمام.
مروان هز راسه ومشي شويه لعند ما سمع واحد وقفها وهو يقول:لوسمحتي..
وقف مروان والتفت...
لينا:تفضل..
:معليشي بنسألك انتي مخطوبه ولامتزوجه..
لينا سحبت نفسها ومشت وهو لحقها..
ومروان لحقهم..
الشاب:والله قصدي شريف بالله غير انتي قوليلي مرتبطه..
مروان حط يده ع ظهر الشاب وقاله:متزوجه...
لينا لما سمعت صوت مروان سرعت في مشيتها وخافت هلبه...اكيد اللي صار حيوصل لسفيان وسفيان حيبطلها طول..
الشاب:اسف سامحني لوكنت نعرف ماجيتش جنبها..
مروان:خلاص هاك عرفت..هي توكل..
الشاب وهو محرج مشي..
ومروان تأفف بضيق ومشي..
🏵🏵🏵🏵
في المكتب...
الزوز.مع بعض يخدم..
بس واحد.فيه كان يراقب في تصرفات التاني وحسه مش ع بعضه..
ابوبكر؛سفيان..
سفيان وهو يقلب يرتب في الوراق:اممم..
ابوبكر:جوك اليوم مكهرب..
سفيان؛ماعنديش نتكلم في شي ابو بكر ارجوك..
ابوبكر هز راسه وقال:تمام ع راحتك..
طق باب المكتب وانفتح..
خشت استاذه وهي تقول:تفضل استاذ سفيان اهو البنادول.
شبحله ابوبكر بإستغراب..
وهو شبح للأستاذة بنفس النظرة..
هي قالت:سمعت بكري في مكتب رئيس القسم تسأل عنه وقلت راسك مصدع..
هو تنهد وهز راسه وقال:حطيه هني..
هي مشت حطاته ع المكتب وقالت:لاباس..
سفيان هو لاهي بالوراق..شكرا...
هي ابتسمت ولفت ومشت طلعت من المكتب..
ابوبكر؛مسكينه البنت هادي..
وسفيان ماباش يعلق بكلمه..
وابوبكر شبه عارف خيره من غير مايحكي..
🏵🏵🏵🏵🏵
الساعه 12:00قبل الظهر
"وكيف تبي تمشي لأختك والعيله ملتمه اليوم"
رنده؛نتغدا معاهم والعشيه ارفعني..
محمد؛باهي لكن تنزلي تعولي معاهم مش تاكلي بس..هي تحركي..
تأففت وقالت:باهي خل نجيب وشاحي..
🏵نزلت هي وياه لوطا...
هو سلم ع خواته وحط بنته عند امه ومشي طلع..
وهي حمواتها استلموها..
:اليوم نبوا الغدي رشيده كسكاس من ايدين الطرابلسيه..
رنده:من عيوني نديرهالكم ع اصولها من غير بطاطا وقرعه زي ماانتم ديروا فيها..
:باهي نوضي ورينا يااصولها انتي..
ناضت وقالت؛والله ندوقك رشده طمعتها تقعد في لسانك لين تموتي بعد عمر طويل..
ومشت للكوجينه..
:ااه كان تخلوني عليها نمرجها مرجه باهيه..
:خليها خليها تاخد راحتها تو تشوف رفعة خشمها هادي وين توصلها..
امهم؛المهم ماتخلوش بوكم يحس بشي راهو ديما في صفها ..
:ماتخافيش اميمتي هي بروحها مش حتحس..
🏵🏵🏵🏵
"وزي ماشفتوا قدامكم بالامتحان حيكون ضمن المحاضرات هادم ركزوا كويس ومافي شي تقولوا عنه مش خاش في الامتحان"
سكت فجأه...وشده راسه بيده..
نزلت بنت وفي يدها شيشة ميه حطته ع طاولته وقالت:تفضل استاذ..
هو قعد يشبح للشيشه وقال؛باهي بري ارجعي مكانك..
المكان مشت ولت مكانها...
فتح عيونه كويس وشبحلهم وقال:اي حد عنده شي مش فاهمه يقول توا..
حس النظر ضبب شويه..ضيق عيونه بعدين نزلهم وشد الطاوله..
البنات:لاباس استاذ..خيرك استاد..
وواحد من الشباب جاه وهو يقول؛لاباس استاد..
هو قعمز وقالت:خلاص اطلعوا..
وحده من الطالبات:نادولك استاذ ابوبكر ياأستاذ..
سفيان:ماتنادوا حد...غيراطلعوا بس..
واحد من الطلبه:هي خلاص قال اطلعوا معناها اطلعوا..
ولمو حاجاتهم وطلعوا وخلوه في القاعه بروحه..
هو بعد ماطلعوا...قام تليفونه...وحط ع رقمها قعد يشبحله وعيونه تعبوا دموع..
ع خشة ابوبكر وهو يقول بقلق:لاباس سفيان خيرك!..
سكر شاشة هاتفه وقال:مش باش يفهموا اني قلت ماتنادوا حد..
ابوبكر:تي نوض معاي ياراجل نوض من لما ريتك الصبح وانت مش عاجبني..
سفيان بإنزعاج:مافيا شي ياودي..
ابوبكر:والله لما تنوض هي باهي..
تنهد سفيان بملل وناض وابوبكر خدي شنطته وطلع هو وياه..
................
في الطريق..
سفيان:ايوه مروان....اسمع قوللهم صاير معاي ظرف ماتقدرش نجي نروح بيهم خل يكلموا المراة اللي تجيهم قبل............تمام.....
وابوبكر يسمع فيه وزاد تأكد من اللي فباله خصوصا ان سفيان حط خوه مرسال بش يوصللها انه مش جاي ماكلمهاش مباشرة..
🌺🌺
وهالشي مافرقش مع لينا لما خبرها مروان بس كان في شي تاني اهم عندها..
مروان؛اكيد مش حنقول لاني نعرف خوي كويس..لكن انتي لازم ع قد ماتقدري تتجنبي هالمواقف..
لينا هزت راسها وقالت:ان شاء الله..مشكور واجد..
مروان:العفو..
لفت لينا ومشت وهو كذلك مشي يشوف شغله...
💎💎💎💎
"ارهاق كالعاده ياسفيان تخدم وتنسى روحك وتهمل صحتك"
سفيان:شن طلع عندك..
الدكتور:فقر دم..دمك ناقص هلبه..
سفيان عقد حواجبه بضيق..
الدكتور؛وشكلك هكي بتمرض..
ابوبكر: واضح من وجهه الأصفر..
سفيان:باهي شن ندير مش وقت مرض بكل صيف وامتحانات وجو استغفر الله..
الدكتور:خفف شغل وحاول تريح نفسك وتهتم بماكلتك..
سفيان:ان شاء الله..
الدكتور:تمشي فيا عارفك..
سفيان:علاش جايبني عنده..
ابوبكر:عارفه بو زنان مش حيحل عنك لين يخليك ادير يقولك عليه..
الدكتور"صديقهم" قال بضحكه:ايوااه..ولانقول للحكومه عندي تكلم. الحكومه عندك ترد بالها..
سفيان"كان تحس بيا ولامهم عندها راهو مش هدا حالي"..
ناض وقال:تمام..هيا نوض..
ناض الدكتور وقال؛انتم اللي هيا معاي في مطعم صحي نعرفه خل نتغدوا غادي..
ابوبكر؛غير حلفت بس..
الدكتور قعد يضحك..
سفيان:عطيه بطنه بس هدا..
ابوبكر بضحكه:مالا شنو والله ما نافعني غيرها...
الدكتور:في هادي صدق ..
سفيان؛هيا ياتاعب انت وياه هيا..
💎وطلعوا مع بعض ومشوا للمطعم اللي قاللهم عنه صاحبه..
كانوا صحابه الزوز طول القعده وهما يهدرزوا وينكتوا ويضحكوا...وهو يحاول يكون.معاهم بس مش قادر..
حتى لو ضحك مجامله..ومرة يسرح..وماينتبهش الا ع اخر الكلام..ويساير فيهم مسايرة..
حتى الماكله كلي بالسيف ومش هديكا الماكله..
🌺🌺🌺🌺🌺
بعد العصر..
في الجنان..
زبيده؛مقنينته الجو اليوم بروده..
لينا:لكن يبي جيلاطي..
منى:من لما روحتي وانتي تتكلمي عليه..
لينا؛الجو جو جيلاطي من لما جي الصيف وماخديناه..
وجيهه؛وقولي لراجلك ياحنه يجيبه..
لينا:نخاف يهزبني..
زبيده:؛وليش يهزبك العفو!
لينا؛ماتعرفيله كيف ياجداي صعب واجد تتوقعي ردة فعله..
وجيهه؛تو نقوله اني..وقامت تليفونها واتصلت بيه..
ولينا تشبحلها..
وجيهه؛هاه سويفه يما مروح...........توا درست قدام الحوش..
لينا بصوت منخفض:خلاص اللاي..
وجيهه:لالاخلاص قبل بنقولك ع حاجه بس دام وصلت مش لازم...............ياودي مرتك تبي جيلاطي قريب تموت عليه من بكري وهي تحكي عنه وقالت نخاف نقوله جيب معاك.يهزبني...
لينا عضت ع شاربها بصدمه..
ومنى وزبيده يضحكوا..
وجيهه:باهي..سكرت وقالت...اهو ياحنه بيولي ع خاطرك.يجيبه وهو اللي عمره مادارها..
منى شبحت للينا..
ولينا قالت؛تحشم منك يااللاي.
وجيهه؛باهي نوضي جيبي ولدك شوفي وين ماشي بالجراي..
لينا:سلامته لما يدير رجلين يطير طياره..
وجيهه؛قولي الله يبارك اللطف..
لينا بضحكه؛الله يبارك ع وليدي..
ومشتله تجري..
لحقت عليه وهو ماشي للجنان من القدام..
شدت الجراي وطلعاته منه وقالت؛وين ماشي وين..وقعدت تبوس فيه..
ع خشة عمه بالسيارة..
قعدوا الزوز يشبحوله..
سفيان درس ونزل..وفيد شكاره فيها زوز احواض كبار جيلاطي لما شافته.لينا عيونها لمعوا بشغف..
جاته وخدتها منه وقال:دخل معاك الجراي..
ومشت بولدها اللي كان يشبح لعمه ..
وهو مع امه بعيونه لين ادرقوا عنهم...
تنهد...ومشي بيركب لشقته.
🌺🌺🌺
واستمر الحال على ماهو عليه يومين تانيات..
كانت فيهم لينا مشغوله بعالمها اللي فيها صغارها وخدمتها ومشروعها الجديد..
عالم هو مش موجود فيه حتى ع الهامش..
واللامبالاة متاعها كان يقابل فيها هو بإهتمام هي مش فارق معاها نهائي..
وهالحاله تزيد.اتعب فيه اكثر واكثر.
لعند مامرض فعلا...
في ليلة الجمعه..
هي في دارها...كانت متمدده ع سريرها وتررد في ورد"الصلاة على النبي" اللي مخليها في حالة هدوء وسكينه لين رقدت..
اما هو في داره...ع سريره..
كان مغمض عيونه بتعب بسبب درجة حرارته المرتفعه مش قادر يفتحهم...
وجهه كان احمر وكان يأن...ويهتري ومافيش من حاس بيه ولاعارف اللي صايرله..
لعند ماجت الساعه اللي تسبق اذان الفجر..
هي طلعت من دارها ومشت للحمام بش تتوضا..
سمعت صوت آنين..
استغربت قدمت بخطوات متردده للدار وخشت.
لقاته في عز الصيف متغطي بالورغان وسنونه يصطكوا في بعض..
هي جاته وقالت؛سفيان...سفيان..
هو :امشي.. اطلعي..
لينا زادت قدمت ولاحظت لون وجهه قالت؛محموم انت..
سفيان؛مادخلكش...واطلعي..
لينا تنهدت بضيق ومشت طلعت من حداه.
هو زاد غم روحه بالورغان وقال:ماصدقت قلت اطلعي..
شويه وخشت عليه بصونيه فيها مية مصقعه فيها خل وفوطه مطبقه..
سفيان؛قتلك اطلعي مانبي منك شي..
لينا:مش وقت عقدك النفسيه توا..
سفيان؛اطلعي امشي..اطلعي..
لينا ماعدلتش عليه..بلت الكماده وحطتها ع جبهته..
وهو طول الوقت مغمض عيونه؛قتلك اطلعي اني..دايره روحك عندك قلب...وواجعك..اطلعي اطلعي وخليني في همي..
لينا؛الحرارة مأثرة عليك وانت بروحك مش ناقص..
سفيان؛لسانك الحار معاش نبيه نسمع منه كلمه اطلعي باش تفهمي..اطلعي..
لينا عصبت وهي تقول؛اللي يدير فيك خير يندم..
ومشت طلعت من حداه وهي معصبه..
خشت للحمام وتوضت..بعدين مشت للدار وسكرتها عليها..
وهو قعد يعاني في روحه بروحه برغم انه كان يرجف بكل شي فيه..
بعد مادار كمادات...استجمع ماقاعد عنده من قوة وناض...مشي طلع من الدار ومنها من الحوش كله..
وهي كانت تقرا في القرآن سمعت باب الشقه لما انفتح وتسكر بلامبالاة..
💎اماهو..
وصل لوطا وجي بيطلع من الحوش ماقدرش..
قعمزت حدا الطاوله اللي برا..وحطه راسه عليها وغمض عيونه بتعب..
آذن الفجر..
وبوه بيطلع لصلاة الفجر..
شافه في هديكا الحاله رعش عليه وقلبه قريب وقف..
جاه طول وقعد ينوض فيه؛سفيان..
سفيان ولدي..
سفيان بتعب:اممم..
الشريف حط يده ع جبهته لقاها زي النار..
مشي بسرعه خش للحوش يكلم امه...
🍁كانت حالته صعب خصوصا بعد مافقد الوعي وين جو بيدخلوه للحوش..
كلموا مروان اللي كان قاعد في المستشفى يجي يرفعه..
وجي مروان...ورفعه غادي...
وطول داروله تغذيه...وداروله تحاليل لقوا دمه ناقص..
صح سفيان رجل ظاهره قاسي وجلف...لكن من داخل كان عكس هكي تماما..
تحمل هلبه ضغوطات نفسيع مرة بيها..
بس لما وصل الشي لقلبه ماقدرش يتحمله..
الحب...ياما يدير في الرجال بالذات اصحاب الطبع القاسي هاوا كان حبوا يحبوا بكل جوارحهم والصدود يعذبهم بقوة.
🌺واخر من يعلم بحاله المراة اللي يحبها.
نزلت زي كل صبح نهار جمعه عادي..
وخشت للحوش استغربت الهدوء اللي فيه..
لين وصلت لدار التقعميز لقت منى وزبيده ورتيل فيها..
لينا؛صباح الخير خيره البيت هادي هكي.
رتيل بتهكم؛بالله عليك! قصدك ماتعرفيش!..
استغربت لينا في اسلوب رتيل.
زبيده بلوم؛وين يابنتي عن راجلك معقوله الراجل يلقوه ملوح في الجنان مولي زي النار من الحرارة ويرفعوه المستشفى وانتي اخر من يعلم!؟
لينا بدهشه:في المستشفى؟!
منى:توا قالي مروان طلع عنده فقر دم وجايته حمى.
لينا ضميرها وجعها هلبه ماكانش مفروض تخليه لو لزها..
رتيل ودموعها ينزلوا:ياناري وخيي كان مش بابا طلع شافه راهو الله اعلم شن صار فيه..
زبيده ؛لاحول ولاقوة الا بالله ..
ولينا مضايقه من نفسها لأبعد حد.
🍁🍁🍁
روح الشريف الساعه عشرة..
وهي تلاقاته من الباب استسمحت منه واعتذرت وحكتله اللي صار بالزبط..وطلبت منه يرفعها وهو وافق...
🌺🌺🌺🌺
"كمل فطورك ولدي تربح"
سفيان بتعب؛خلاص يام..
مروان:خلاص يام خليه اللي كلاه باهي توا..
انفتح باب الحجرة..
خش الشريف وخشت معاه لينا اللي اول ماشافتها وجيهه ولعت فيها..
وجيهه:باهي ياحنه اللي رينا وجهك..ماتقولليش وين كنتي عن راجلك اللي صار فيه هدا كله..
سفيان؛قتلك يام هي جتني واني لزيتها.
لينا قعدت تشبحله..
وجيهه؛وكان تلزها تعدل عليك وانت في هالحاله..!؟معقوله تخليك لين يصير فيك هكي!؟تي هي مش مهتمه بيك ولا مدوراتك بكل..لاتاكل لاتشرب لاتتعب لاتمرض لاتجي لاتمشي ولا كانك راجلها بكل..
لينا نزلت عيونها وهي مضايقه ومحرجه..
والشريف ماباش يدافع عنها لأنه مقنتع بكلام مرته..
ومروان كذلك اللي كان يشبح لسفيان كيف يشبحلها حسه مش هاينه عليه بكل وتأكد بعد الكلام اللي قاله لامه.
سفيان:بيني وبينها يام مانبي حد يدخل تهتم بيا تفوتني تعانيني مادورنيش شي يخصني اني وياها بس..
وجيهه هزت راسها وقالت:مادام انت هكي اني مش قاعده وخلي ست الحسن تقعد معاك..
تنهد بضيق..
وامه مشت طلعت وولدها مروان.لحقها..
الشريف؛تقعدي معاه لين يطلع بنتي العشيه..
لينا هزت راسها وهي ساكته..
والشريف طلع وسكر الباب.
لينا رفعت عيونها فيه وقالت؛هاه شوف جبتلي الهزايب والعرايك..
سفيان؛هدا اللي هامك انتي بس!
لينا ابتسمت وقالت:نضحك معاك..اسفه..بس انت بدري نرفزتني واجد حتى وانت من مريض طبعك لئيم..
ابتسم بتعب وهو يشوفلها.
لينا؛اسفه مرة تانيه..
سفيان؛ولايهمك..
لينا؛شن تحس توا..
سفيان"ياريت نقدر نقول شن نحس توا":الحمد لله خير من بكري..
لينا؛كويس..ومشت قعمزت ع الكرسي وهي تمرر في نظرها ع الغرفه..
هو عارف انها جت رفع عتب وقعدت بش ادير واجبها وتكف اللوم عنها..
عرف لان ماشافش الخوف عليه فعيونها ولا حس بيه في تصرفاتها...
بس هو توا وصل للمرحله اللي يقول فيها شطر هالبيت من الشعر المنقول بتصرف...
"أقصى مراد القلب أن ابقى معك"
#الباقيات_الصالحات
.....يتبع.....
