شكولينا

الجزء السادس

اللي فايتاته صلاة او خش عليه وقت صلاة يصلي الأول بعدين يقرا...اول ماتتحاسب عليه الصلاة يوم غدوة...💕
《تنويه...في كلام حيكون مؤذي وغير مقبول نعتذر عنه مسبقا بس هو ع لسان الشخصيات اللي في منهم هلبه في مجتمعنا ومايعبرش ابدا عن وجهة نظري...نتمنى انكم تحاولوا تتقبلوا لان كل شي حنكتبه حيخدم قصة الروايه والرساله متاعها》
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
"طالعه تهبلي زهور مشيتي لمزين"
زهور بإبتسامه:ايه وحده حدانا..
؛عندها مزين ولاتخدم في الحوش..
بلعت ريقها قبل ماتصف كذبة تانيه جنب اللي قبلها وقالت:مزينه اسمها الورد الجوري..
:الورد الجوري..
"زهور"
ناضت بسرعه من حدا المراة بعد نادتها وحده من خواتها ومشتلها طول...
زهور؛نعم مفيده..
مفيده؛خشي طلعي الشكلاطه مع ايناس وندى اللي بيطلعوا العصير..
زهور:باهي..ومشت للكوجينه..
خشت لقت خواتها شادات صفر العصير..
قامت مترد الشكلاطه وقالت:هيا يابنات قدامي..
ايناس:نعرفوا من غير ماتقولي..
ومشت طلعت بالصفره ..
زهور بإستغراب:خيرها هادي!
ندى "اختها":فوتيها وهيا..ومشت طلعت وراها..
وزهور وهي مضايقه طلعت وراهم..
🏵🏵🏵🏵🏵
مقعمزين ع كراسي طاولة المطبخ في الكوجينه...
عدنان:العمليه الاخيره اللي درناها خلت نشاطهم ينعدم اسبوع هدا...
سفيان:مافيش موتى ولا؟
عدنان:لا الحمد لله..فيه جرحى لكن جروحهم مش خطيره قعدوا اسبوع في المركز الطبي واليوم الصبح طلعوا..
سفيان:شن جوه الطب غادي..قصدي الامكانيات..
عدنان:متحسنه هلبه عن قبل ع حسب كلامهم واني لاحظت ان حتى الكوادر عندهم كويسه.
عدنان:باهي كان هكي..
ابتسم عدنان وقال:ناسها ماشاء الله عليهم..
سفيان؛وين ماشاء الله عليهم! عرفت منهم نماذج تكرهك في الجنوب كله..
عدنان:اللي اني عرفتهم عكسك تماما حببوني فيه..اهل كرم وواجب واسخياء في كل شي..
سفيان مط شورابه للأسفل ورفع حواجبه وهو مستغرب..
بعدين جت عيونه ع علبة الشكولاته..
قربها منه وفتحها وقال:انت جايبها هادي!
عدنان بإبتسامه وهو يتأمل في الباكو:ايه..صناعه سبهاويه..
خدي سفيان طرف وحطه في فمه بعدين قال:عجبتني..
وخدي الباكو وهو يقول...بناخدها..
عدنان بضحكه:عارفك ماعندكش الروح معاها..ابتسم وقال.
هي ليك..
ابتسم سفيان ووقف وهو يقول:بنركب ندوش ونخدم شي بعدين ننزل..
عدنان غمض عيونه وفتحهم وهو مبتسم..
وسفيان مشي بيطلع وهو يقول؛مروان ديوتي الليله..
عدنان:ايه كلمته بكري وقالي..
سفيان وهو طالع جو قدامه امه وخواته..
نوريه كملت طريقها..ورتيل وراها..
لكن امه وقفت وهي تقول:صار اللا مرتك ماشيه للمة اختها..
عقد حواجبه وقال وهو ياكل:كيف..ماتعرفيش!؟
عدنان سمع سؤال سفيان وناض بيطلعلهم..
وجيهه:لا ياسيدي مانعرفش مابتش تقول خايفتني نمشي معاها..
عدنان:وعلاش ضروري تقول؟وعلاش بتمشي معاها !
وجيهه:عدنان سلم ولدي اني نكلم في خوك..
سفيان بغصب:والله مانعرف انك ماتعرفيش قسما بالله كانهدا خليت رجلك ع رجلها..
عدنان:شن تقول انت ياراجل كل كنه بتمشي مشوار يخصها ضروري ترفع عزوزتها معاها!؟
جاهم صوت نوريه وهي تقول..
"هادي الاصول وهدا الواجب ياعدنان مفروض عزمتني حتى اني كان نعرف القدو"
عدنان التفت وقال بصوت عالي:هي المناسبه ليها ولا لأختها بش تعزمك..
سفيان:كان مش عيب بس والله توا روحت بيها..
عدنان شبحله وقال وهو مندهش:منك جد انت!؟
نوريه جتهم وهي تقول؛حي علينا ياعدنان هدا مازال مادرتش مراة بعتنا..
عدنان بإنزعاج:بعتكم!! شن الكلام الكبير اللي تقولي فيه.
ع اساس انتي وين ماتمشي معلقه في شنطتك مالي راجلك.!؟
نوريه تشبحله وهي مصدومه..
وهو شبح لخوه وقاله:صل ع النبي وبرا اركب لشقتك..
وجيهه:هدا غير نبي نخطبلك لالاا خليك هكي خير..
عدنان ضحك وهو قال:لما ننوى نتزوج..جاها وشد راسها بإيديه وباسه بعدين قال..حتمشي تخطبيلي وانتي تغني هالنهار عليه ندور..
ضحك سفيان ولف ومشي..
وجيهه:ايه وتتزوج وتنسى امك ولا..
عدنان:لا بنجيبها تسكن هني فوقك..لكن حد..باسه من خدها اليمين بعدين قال..بقدره..وباسها من خدها اليسار وقال..بإحترامه..
جاه صوت سفيان وهو يقول..
"اييه تو نشوفوك"
عدنان ضحك ...
نوريه هزت راسها وهي تشوف لعدنان بعدين لفت ومشت خشت للدار وهي تقول:المشيه هادي قلباته..
زبيده:انتم كلام منى لعب بروسكم..
نوريه قعمزت وهي تقول:لا والله ماهكي ياحناي فيه حاجه متغيره..
رتيل:كيف نوريه قصدك عدنان في وحده لفت عليه من غادي..
نوريه:مش عارفه والله ماعارفه..
ع خشة وجيهة وهي تقول:والله ماهي مفوتاته زهور هادي باهي اني وياها..
وقعمزت حدا عزوزتها وهي معصبه قالت؛ولاهداكا التاني! اشبح شن في وراه..
نوريه؛مش قتلكم..
زبيده قعدت تشبحلهم وهي مضايقه وحتى هي زيهم خايفه لتكون توقعاتهم صح...
زبيده برغم انها طيبة قلب وحنونه بس عقليتها وتفكيرها قدم..عقليه صعب جدة تتقبل شي زي هدا...
🍁وهي العنصريه مش محدوده بجيل معين...ولابفئة معينه..ولابمجتمع محدد..هي الشعوب المتحضرة زي مايقولوا عنهم فيهم هلبه لهاللحظه قمة في العنصريه ومتطرفين فيها...🍁
🍀🍀🍀🍀🍀🍀
"هاك ياسمح القهوة"
خدت هناء الفنجان وقعدت تشبح للينا كيف قعمزت وشدت تليفونها تشوف في صفحتها ع الفيس..
لينا بضحكه؛وصلن رسايل واجده يشكروا في الشكولاته اسمعي هدي شن قالت..كليت جميع انواع الشكولاته بس هادي اول مرة نذوق زيها..
هناء بضحكه:غرباويه شكلها..
سرحت لينا بتفكيرها لما سمعت شن قالت اختها..
جي بين عيونها عدنان لما جي بش ياخد من الشكولاته متاعها..
ارتسمت ع وجهها ابتسامه...شافتها هناء..
هناء؛هاه قولي شن جاك تاني...
ولينا مش معاها في عالم عدنان...
هناء بصوت عالي:لينا..
استاقظت وانخلعت شبحت لهناء وقالت:هاه..
هناء:وين كنتي هايمه ياحنه..
لينا وهي تحاول تخفي ارتباكها:نقرا في الرسايل..
هناء ابتسمت وقالت:ان شاء الله ديما مفتوحه قدامك وربي يعطيك لين يرضيك..تنهدت وقالت..ويعطينا..
لينا شبحتلها شويه بعدين حطت التليفون ع تركينه وقالت:تعرفي هنيوه...ربك فاتحها عليا هكي لأني شادة الاستغفار في كل وقت نستغفر..من بعد ماشديته وهي مفتوحه قدامي والله في دعوات واجده دعيتهن ربي استجابهن وفي اللي نراجي ونا متأكده انه حيستجيب بس لما يجي الوقت المناسب..وراهو الاستغفار يعطي بيه ربي الصغار..
هناء تنهدت بحزن وهي تسمع فيها..
لينا وخرت خصلة شعرها المجعده ورا وذنها وقالت:اسمعي..حني بشر وديما نرتكبوا في الذنوب وهالذنوب  وين يتراكمن فوق بعضهن يكونن سبب في حرمانا من الرزق بجميع انواعه..الواحد لما يشد الاستغفار يخفف منهن ويمسحن ويبدا مافي شي يمنع الرزق...
"استغفروا ربكم انه كان غفارا يرسل السماء عليكم مدرارا ويمددكم بأموال وبنين ويجعل لكم جنات ويجعل لكم انهار"
والرسول قال..
من لزم الاستغفار جعل الله من كل هم فرجا ومن كل ضيق مخرجا ورزقه من حيث لايحتسب..
اني عشت الحاجات هدين كلهن ياهنيوه..والله حتى نفسيتي ديما مرتاحه وجوي رايق حتى لو في مشكله صايرة..
هناء:والله كلامك سمح..لكن...مش عارفه..
لينا:ربك كريم فوق ماتصوري ياهنيوه انتي غير شدي الاستغفار والدعاء وراجي وراك تستعجلي الاستجابه..
هناء ابتسمت وقالت:ان شاء الله لنو..
ابتسمت لينا وقالت:ربي يفرحك ويفرحنا عن قريب ياربي..
هناء:آمين...ونفرحوا بيك ياشكولاطه انتي..
ضحكت لينا بخجل...
🍀🍀🍀🍀🍀🍀
"سحارة"
مفيده:مش سحارة ياهمي..مراة عندها كرامات يابنتي تشوف اللي حني مانشوفوش فيه وعندها دواء لحالتك..
زهور:دجل وسحر يامفيده افهمي..
مفيده:تي كله بالقرآن يابنت..
زهور:ماهو كان ماتعرفيش حتى القرآن ولوا يسحروا بيه..
مفيده:وااك عليك عناد فيك..
زهور:بالله وخيتي معاد تشغلي بالك بحالي تو ندبر حل لروحي..مازال ماسكرت عام..مرات قبل نسكره نحمل..
مفيده:يارب يارب في هالليله المباركه ارزقها ووفرحها يارب..
زهور شدت يد اختها وقالت بإبتسامه وعيونها مليانات دموع:ويعطيك ع قيس نيتك وخيتي..
🏵🏵🏵🏵🏵
وفي حوش الحاج الشريف..
سلفة زهور بعد مادارت العشي..وغسلت اماعينه...
قعمزت لنوريه بش تحنيها...تعبت علي مالصقتها اللصقه كيف ماتبي..
وبعد لصقتها بدت تحني في الرجلين..
نوريه وهي تتكلم بالتليفون؛ايه عرس بنت ولد عم حسين...
"صار خلاص ثبتوا ع الموعد نقسه"
نوريه:ايه...كلمتني اليوم عزوزتي وقالتلي حني..وقالت حتى نور حنوها..
"من يحني فيكم"
نوريه:منى..
"وهديكا وين افلح من منى في الحنه"
نوريه وهي تعجب بصوتها تقليدا لصوت زهور:في لمة اختها 
"اها..امي معاها"
نوريه تنهدت وقالت؛امي تحني في حناي يارنو..
"غريبه...امي غالي عليها المناسبات "
نوريه؛ماهو اللا ماقالتش عندها اللمه عرفنا من راجلها ياحنه..
"شن هيا!!!؟"
نوريه؛زي ماسمعتي..
"الحيوانه! تو ماتعرفش من قبل ان امي وين مايمشوا لمناسبه لازم تمشي معاهم!"
نوريه؛دارت مافي راسها..
رنده قعدت ساكته..
نوريه:رنو...الو...
"تي قسما بربي غدوة جايه وراسها هدا تو نكسره"
نوريه؛كلمي حتى عفاف..عدنان روح..
"حمد لله ع سلامته وخيي.."
نوريه؛تعالوا من الصبح في موضوع نبيكم فيه..
منى وهي تحني"حي عليك يازهور حي غدوة"..
نوريه؛منى ركزي الجهة هديكا فاضيه..
منى شبحت وين مااشرتلها بعدين قالت:ايه ريتها..وخدت من الحنه وقعدت تحني وهي تسمع في نوريه تكلم في رنده..
بعدها سكرت منها واتصلت بيها عفاف وهدرزوا ع عملة زهور وعفاف حتى هي تتحلف..
ومنى برغم انها برا الموضوع لكن بطنها وجعتها من الخوف..
تتخيل فيهم شن بيديروا فيها وشن بيدير فيها حتى راجلها..
🏵🏵🏵🏵
اللي مشي مع الساعه عشره بش يروح بيها..
طلعت وهي حامله ومحمله ركبت السيارة وتحرك بيها..وهو ساكت ولاكلمه..
وهي كذلك بس في نفسها كانت تقول..
"ماشافنيش واني لابسه وبالمكياج مش مغيرة طول"
وقعدت مرة مرة تشبحله وهو ساكت وملامح وجهها كالعاده ملامح عصبيه وتكبر..
وصلوا للحوش...
نزلت هي من السيارة وقالت؛هادي حصة ماليك بعتتها معاي اختي..
سفيان:نزليها معاك واركبي بيها لشقتك مش مشتاقين للماكله هما..
ونزل من السيارة..
زهور انصدمت في رده...وبدون ماتناقشه بكلمه..
خدت الشكاير ومشت بيهم للدروج و وهو مشي وراها...
.........
وامه وهي تحني في عزوزتها سمعت صوت سيارة سفيان..
وجيهه؛روحت الهانم..
زبيده؛على كيفها يابنتي لاتحرقي دمك ولا تعاركيها..
وجيهة تنهدت وهزت راسها بعدين قالت..ترا ميلي رجلك عمتي...
..........
خشت دار النوم وحولت خمارها..
خدت نفس عميق..وعيونها جو ع طاولة المكتب لقت فوقها علبة الشوكلاته..
قدمت وفتحتها...
هو خدي منها الغطا وغطى بيه الشكولاته وبعد العلبه ووقف قدام زهور وقال:-علاش ماقلتيش لأمي ع لمة اختك؟
زهور بلعت ريقها وقالت؛ علاش هي حرجت؟
سفيان وهو عاقد حاجبه قال:شن رايك انتي؟!
زهور دموعها عبوا عيونها وهي تقول؛اللمه ع الضيق ياسفيان حني ومالي راجلها بس مانقدرش نرفع معاي اللاي ..
سفيان؛وامي في شن بضيق عليكم؟
زهور:قتلك ع الضيق خواته وخواته وامه وبس ياسفيان شن منظري واني جايبتلهم عزوزتي..
سفيان ؛شن منظرك!!! قصدك امي بتحشمك!
زهور:مش هدا قصدي ياسفيان..
قاطعها وهو يقول بعصبيه:من غير كترت دوة في الجديد من غير امي مش حتمشي لمناسبه..انتي من البدايه تعرفي نظامنا مافي شي مدرق عليك واني قتلك امي وخواتي فوق كل شي..تبي تخسريني اخسريهم..
نزلوا دموعها وقالت:حاضر..واني اسفه..
شبحلها من فوق لتحت بعدين مشي طلع من الدار..
وشويه وسمعت باب الشقه تسكر..
حولت خمارها وعبايتها وبدت تبكي وهي تقول:عليك حظ حظي..عليك بخت بختي..عليك عيشة عيشتي...
ولوحتهم لوطا ومشت قعمزت ع السرير ودرقت وجهها بإيديها وانهارت بالبكي...
 ••اما هو نزل من الشقه..
ومشي قعمز في الجنان...خدي نفس عميق بعدين اتكى بظهره ع الكرسي وغمض عيونه ومازال معصب ومضايق مش بش من زهور...حتى من نفسه...
🏵🏵🏵🏵
لفتلها يدها بسلفر النايلو وكانت اخر شي حناته زهور لنوريه..
نوريه:هيا توا ابدي لنور..
منى؛خل بنوض نشرب ميه ونخش الحمام بعدين نجيها..
نوريه:باهي بسرعه البنت بترقد..
هزت منى راسها وناضت بصعوبه وهي تحس بوجع في ظهرها واسفل بطنها..
مشت للكوجينه...
خشتلها ومشت للدولاب طلعت تليفونها وشافت كان مروان اتصل بيها..
لقاته متصل سته مرات...
منى تنهدت وقالت؛مانقدرش نعاودله ونعطل على هديكا..
ردت التليفون لمكانه..
وشربت الميه...وبعدها طلعت من الكوجينه توجهت للحمام وبعد بضع دقائق طلعت ومشت للدار..
لقت نوريه مغمضه عيونها..
منى؛تعالي نور نمشوا للكوجينه..
نوريه وهي مغمضة عيونها:ايه احسن..سكري الضي في طريقك..
منى وهي طالعه مع نور سكرت الضي...
وكان الحوش هكي شبه مظلم..
خشت بنور للكوجينه وقعمزوا ع بساطها..وحطت حاجات الحنه وبدت تلصق في اللصقه..
منى كانت عندها مشكله ضعف نظر بس ماكانتش تحب تبينها برغم ان حمواتها اللي مايفوتهم شي كشفوها لانها كانت لما تبي تشوف حاجه مش واضحه ضيق في عيونها ومن هكي عرفوا..وياما تسهوكوا عليها بيها حتى قدام راجلها مرات ينادوها"منى العميا"..
تحسست منها مرة وقعدت تبكي..ولعوا فيها كلهم وراجلها معاهم..
ع قولة "حني عيلة نحبوا البصارة والضحك امشي مع جونا بش تكسبينا..جو الحرج والبكي مايمشيش معانا"
وهو يقوللها
"اعتبريهم خواتك وبصروا عليك..كان خواتك بصروا عليك هالبصارة تفويتلهم"
 لهذا اضطرت تمشي وتفوت وتتجاهل بعدها ظاهريا بس ومن داخلها ربي بس العالم قداش تنقهر وتتوجع..
وتوا..
وهي تلصق لنور في اللصقه كانت تبي ديرلها شكل ورده...
دارت اليد الاولى هكي بس التانيه ولأنها النوم كان غالبها والنظر زاد تعب ووجع ظهرها زاد..نست ادير شكل الوردة ودارت الحوته اللي كانت اسهل واسرع ويدها واخده عليها..
ونور بدي ياخد فيها النوم ماركزتش ع منى شن دارت..
ومنى قعدت تعاني فيها وهي تحني..
••فهالوقت..
طلع عدنان من داره ماشي يشرب ميه..
وين وصل في الكوجينه وحي بيخش..
شاف وضع منى ونور...
طول ولى ومشي لداره وهو يحرك في راسه يمين ويسار وخش وهو يقول؛لاحول ولاقوة الا بالله..
بعد كملت منى اليد الاولى ..جت بتحني التانيه انتهت للغلطه اللي دارتها..
تأففت بعدين قالت..والله ماني مغيرتها..وبدت تحني فيها حتى هي...
وبعد كملتها...بعد جهد جهيد بش نوضتها ورفعتها للدار اللي فيها نوريه..رقدتها حدا امها..
وهي من تعبها رقدت معاهم في نفس الدار...
🏵🏵🏵🏵
وتعدي الساعات..
ويطلع صبح اليوم التالي...الجمعه..
ناضت منى زي المخلوعه ومشت بسرعه بتطلع من الحوش بش تركب لشقتها..
لاقتها وجيهه وهي تقول:سقدي راجلك في الطريق..
منى وهي تمشي:صباح الخير اللاي..كلمك؟
وجيهة:ايه..خفي روحك...
طلعت منى من الحوش وركبت لشقتها..
اول ماخشتلها توجهت طول لدار النوم..
طلعت حوايج لمروان..
بعدين طلعت اللبسه العربيه..
وبدت تحدد فيها...وحددت معاها الحوايج التانيات وعطرتهم.
وبعد كملت مشت تجري للكوجينه بش تويتله فطوره..
ع خشته هو للشقه..
قعد يدور عليها لين لقاها في الكوجينه..
مروان بحده؛تليفونك لوحيه في الكناسه علاش دايرتيه.!
منى التفتت وهي تقول:صباح الورد..اقسم بالله امس مافضيت نحك شعري والله العظيم
مروان:للصبح.!
منى:كنت راقده وهو مش حداي حطيته في دولاب الكوجينه قاطعها وهو يقول وسبابته مرفوعه في وجهها:ديري حل مع الاهمال متاعك هدا راهو صبري بدي ينفد..
ومشي للدار...
هي غمضت عيونها بشده وقالت بصوت منخفض:عطيك ماينزعك يانوريه..
••ونوريه لوطا ترد عليك يامنى..
نوريه:عطيك دي يامنى ياعميه شن بتقول عمتي كان شافت هالعار..
وجيهه:تو نقول لراجلها يديرلها نظارات لازم ديرهم..توا جتنا في هكي وين نندري بعدين في شن تجينا..
ونور تبكي زعلانه..
نوريه:خلاص ماما خلاص ياامي..عطيك عمي فوق عماك يامنى الزفت..
🏵🏵🏵🏵
مقعمز يشرب في القهوه وهو يدير في مساج باأصابعه لراسه من جهة الصدغ.. وعيونه مغمضهم..
زهور؛نديرلك اني مساج..
سفيان؛تس...
زهور:باهي تبي نديرلك حاجه تريحك..
سفيان:امم..انزلي لوطا ..
زهور تنهدت وقالت:حاضر..
سفيان؛شن ماتسمعي اسكتي ولاكلمه..فتح عيونه وشبحلها بتهديد وهو يقول:ورب العزة نعرف انك رديتي ع امي ولاخواتي بحرف لحوش بوك طول..
زهور بلعت ريقها وهي تشد في دموعها قالت؛مانعرفش نرد ولانعلي صوتي..
شبحلها شويه بعدين رجع غمض عيونه وهو يمسج في صدغ راسه..
اما هي مشت للدار ودموعها ينزلوا..
••بعد ساعه..
كانت واصله عفاف بصغارها...حطها راجلها ومشي ناوي يولي ع الغدي..
وتلحقها رنده وراجلها دار زي مادار راجل اختها..
🏵في الصاله...
الحاج الشريف:ريتي يام الدنيا صغيره..
زبيده بإبتسامه؛ايه سبحان الله..
ع خشة وجيهه حطت سفرة العصيده وهي تقول :درتها بزيت الزيتون ع خاطرك اللاي..واهو الرب من فوق ليك انت ياشريف..
الشريف؛ربي يعطيك الصحه..
زبيده؛سلم بنيتي سلم بنيتي اللي لاقيتها خير من بنياتي..
وجيهة ابتسمت بحب وهي تقول؛والله حتى انتي زي امي ياعمتي ربي يطول في عمرك..
الشريف؛ع سيرة بنياتك..اليوم ربيعه جايه..
وجيهه:وهدا وين تقول..
زبيده:هاك سمعتي..اكيد بتجي مع ولادها وبناتها..
الشريف:لاقالت بروحها والعشيه بتتغدى في حوش بنتها بعدين تجي هني..
زبيده:مني من بناتها..
الشريف:ليلى..
وجيهه:معناها نعبى بعشاها.
زبيده:من غير سؤال هادي..
وجيهة هزت راسها وقعدت ساكته..
••في دار التقعميز..
"العميه الحوله"
نوريه؛ريتي العمله ريتي والله حناها لما تاكلني..
عفاف:ياريتني جيت امس راني حنيتها اني بنيتي..
رنده؛خلاص نونو قلبي تو نديرولها حل..
ونور مازال زعلانه وبنات خالتها عفاف يشبحوا ليدها..
••في الجنان..
"رنوشه انتي حلوة"
ردت عليها رنا البنت اللي تبلغ من العمر 11شهر:ايه..
عدنان قعد يضحك وبعدين قعد يبوس فيها..
"قلبي..عيوني...روحي"
ضحك عدنان وهو يشوف لرنا كيف تفرفش لما سمعت صوت خالها سفيان..
سفيان وهو يضحك جاها وخداها من عدنان ورفعها فوق..
عدنان؛البنت هادي عندها سفيان واقطع الخبر..
سفيان؛حبي وقلبي هادي..
عدنان ابتسم وقال:ماشاء الله عليها تكبر بسرعه..
سفيان:الله يبارك..بوي وين..
وقف عدنان ع حيله وقال:مع حناي داخل..قال عمتك العشيه جايه..
سفيان:من فيهم ..
عدنان:بحبوحه..
سفيان ضحك وهو يقول؛خزي..
عدنان بضحكه:استغفر الله المحبه من ربي وعمتي هادي بالذات مش طايقها..
سفيان؛ولاهي طايقتنا لأنها مش طايقه امنا..
عدنان:غير كان نعرف حني شن دخلنا في امي..مرت خوها مش لازم تحبها ولاتتفق معاها لكن حني صغار خوها لحمها ودمها علاش تكرهنا هكي..
سفيان:لاالسؤال مهم ولااجابته مهمه ولاهي مهمه من اصله..
"افندي'
التفت سفيان..وعدنان قال:اووو دكتور..
وجو لبعضهم يسلموا...
وسفيان قعد يلاعب في رنا...
••داخل...
زهور ومنى خشوا للكوجينه طول..
زهور بصوت منخفض:تسمعي..
منى بنفس نبرة الصوت؛عارفتها جمعه سودا من امس كلمتهم قدامي..
زهور:حاشى هاليوم المبارك..منى شن قالوا عليا امس..
تنهدت منى وقالت؛يحبكوا عليك هلبه لكن تعرفي عدنان وقفلهم وقعد يعارك فيهم وقال كلام يمسح الكبد يابخت اللي بتاخده..
زهور:والله ماتندري بعدين لما يتزوج يقلبوه يقلبوه..
منى:ياودي ماظني عدنان بروحه مش زيهم..
ع خشة وحده من بناويت عفاف..
شبحتلهم لاسلام ولاكلام.... بعدين قالت لمنى:حقه انتي عميا..
تفاجئت زهور ومنى انصدمت..
البنت كملت نقول:درتي لنور يد فيها ورده ويد فيها حوته ع خاطر عميا..
ومنى بلعت ريقها ودموعها عبوا عيونها..
ع جية رنده ومعاها رتيل..
رنده:اهلا ياخوانم...
زهور:كيف حالك رنده..
رنده تجاهلت زهور وقالت لمنى:شن العمله اللي درتيها لبنت نوريه من الصبح البنت مانشفتلها دمعه..
رتيل:قالتك امي قولي لراجلك يديرلك نظارات الحكايه مطورة معاك..
منى وهي تشد في روحها عن البكي بالسيف:امي كنت تعبانه والنوم غلبني..
رنده؛النوم غلبك ولاالعيون ولوا بالهون..
ع خشة عفاف؛كناينا العاهات..صباح الخيرات..
رنده بضحكه:ضحكتيني ياكلبه والله حق عاهات كل وحده بعاهتها..
رتيل:حي بيبكوا...بصارة واضحه من غير جو..
زهور ابتسمت ع جنب وقالت:عارفينها بصارة وخدينا عليها..
شبحولها التلاته بحده..
زهور بلعت ريقها بخوف..
رنده؛انتي بالذات يستحسن تسكتي وتوفري كلامك لبعدين تمام.. هيا سقدوا بالفطور..
ومشت طلعت..
عفاف:هيا ماما اطلعوا...
طلعت هي وبناتها..
اما رتيل قعدت في الكوجينه بش دير "الهوت شوكلت" المتعوده تشربه في كل وقت.
وهما الزوز حداها يعولوا ع الفطور.
وكل وحده كامده في قلبها مواجعها وساكته...
تعودوا...مش اول مرة يتعرضوا للأذى من هالناس...
🍀🍀🍀🍀🍀🍀
مدت سندويتش الشاميه لأختها.
خداته وهي تقول:خسارة اموله اول جمعه نجي من غيرها..
عبدالودود؛خيرها ماجت هي؟
الحازة:عربها بيجوا يتغدوا في حوشها اليوم..
عبدالودود هز راسه وهو يغمس في الخبزة بزيت الزيتون..
لينا:باتي..شن رايك اطلعنا اليوم للسوق..
عبدالودود قعد ساكت شويه وهو يفكر بعدين قال:باهي.
ابتسمت لينا..
الحازة:اسمعي ماتصرفي فلوسك ع حاجات زايده ايوه كان بتشري حاجه للحوش باهي..لكن حاجات لضنى خوتك لا..
لينا بضحكه:يمي رمضان مازال عليه شهر نبوا من توا نبدوا نوتوله..
هناء:ايه والله حق ذكرتيني بيه..
عبدالودود:ماشاء الله لينا ماتفوتها حاجه لكل شي مدايرة نظام..
لينا:تعلمناه كله من الحازة..
عبدالودود:مال شنو اللي كيفك وكيف امك هن اللي يهنن ع عيله..
هناء:وخيرنا نحنا ياباتي!
عبدالودود:ماخيركن شي..لكن مش كيف لينا..
لينا ضحكت..
هناء بإمتعاض:غير راهو فمك ينشرط..
لينا زادت ضحكت بش تغيظها..
وبوها وامها يضحكوا عليهم..
🍀🍀🍀🍀🍀
"حي ع عمك حي"
عدنان:علاش!
مروان؛مالقيتش وين تحط عينك..تي تعرف لو توقف ع رموش عيونك امك ماهي خاطبتهالك..
عدنان عقد حواجبه وقال:علاش!
مروان؛تي شن  علاش..مش ليك ياراجل مش لينا بكل..
عدنان؛ع خطر سمر قصدك!خسارة مايقولوا عليك دكتور..
مروان؛مادخلش الامور في بعضها..مشروعك فاشل ومش حيصيرلك منه..
عدنان :اني اللي نقرر لو يصير منه ولا لا..
مروان وهي متفاجئ:شن جاك ياراجل كنت ماتحبش تتكلم في الزواج مشيت اسبوع لسبها اتقلبت هالقلبه!سحروك ولاشني..
ابتسم عدنان وقال؛الباين هكي..
مروان بضحكه:تقول فيها وانت فرحان..
عدنان:مفروض انت اكثر واحد تفهم عليا..ورب الكون ماقادر نطلعها من راسي ولانبطل تفكيرفيها لحظه..اقسم بالله نراجي امتى نولي بالساعه والدقيقه..
مروان:لاانت خلاص حالتك ميؤوس منها..
ضحك عدنان..
ومن بعيد شويه في الجنان سفيان مقعمز مع بوه ومرة مرة يشبحلهم..بعدين بصوت عالي نادى:عدنان مروان..
شبحوله الزوز بعدين مروان قال لعدنان:حكيتله..
عدنان:لا ومش حنحكيله عارف عقليته وتفكيره اني ممكن يعفسلي فيها من قبل مانتكلم..
مروان:مزبوط سفيان دماغه مسكر وعقليته صعبه وعنصري شويه..
عدنان؛قول هلبه..مش بس من ناحية اللون..حتى الاصول والعرق..يكره البدو ويشوفلهم بفوقيه...
مروان؛ومايحبش يتعامل مع حد جاي من الدواخل ..
عدنان:امي امي لامشي ولاجي..
"عنونه"
التفت عدنان وهو يضحك:هاه ياشفشه..
رنده من فم باب الكوجينه:تعال ارفع الفطور..
عدنان لف ومشالها وهو يقول:حاضر..
اما مروان مشي وين مامقعمزين بوه وخوه الكبير..
🏵🏵🏵
وطبعا كلهم يفطروا..
ماعدا زهور ومنى اللي تنكدوا ع صبح ربي ونيتهم تسكرت ع الماكله وعن اي شي..اللي هادي قعدت اضم في حاجه في الكوجينه وخلاص..
ومرة مرة يسمعوا في ضحك حمواتهم ودوشة صغارهم..
"اه"
زهور بقلق:خيرك منى؟
منى:بطني من تحت مش عارفه خيرها وظهري..
زهور:خلاص قعمزي اني تو نكمل..
منى:لالا مازال نقدر نقاوم..
زهور:ماتسكريش راسك يامنى تو لاقدر الله تصيرلك حاجه..
منى وهي تمسح في الدواليب:لالامايصير شي..
تنهدت زهور وقالت:براحتك...
••وشويه..
وجو سفر الفطور وحصلوا زهور ومنى..
وبعد كملوا الماعين..
طلعوا للحوش بش يضموه زهور ومنى..
كنس...تنظيف...تلميع..حتى من الحمامات هما كدوهم...
والحموات مقعمزات يدقوا في الحنك ويضحكوا..
••••
اخر مكان ضماته زهور كانت الدار اللي تكنس فيها بالمكنسه الكهربائية..
فجأة انطفت..هي تحساب الضي هرب..
وين التفتت شافت عزوزتها وحمواتها الزوز رنده وعفاف خاشات الدار..
سكرت عفاف الباب..
ووجيهه بعد شافتها كيف سكراته ربعت ايديها وشبحت لزهور بحده..
••••
في الكوجينه..
نوريه:العمله اللي درتيها ترقعيها..
منى:باهي كيف شن تبيني ندير؟
نوريه؛حنيها ايديها حنه عاديه العرايسيه.
.وحني رجليها ودريلها الورده اللي تبيها..
منى:توا!؟
نوريه:تتسوهكي! اكيد مش توا في الليل وحي عليك تعاودي صنعتك..
منى وهي تحاول تتماسك بلعت ريقها وهزت راسها بإيجاب..
نوريه لفت ومشت وهي تقول..مازال التانيه..
منى بحقد قالت في نفسها"جعنكم تلقوه"
••••
زهور ودموعها ينزلوا:اقسم بالله يااللاي انحرجت ماقدرتش هدا علاش ماقلتش..
رنده:لامفروض قلتي وشرحتيلها السبب امي مش قاتله روحها بش تمشي معاك لكن الاصول اصول..
فتحت نوريه الباب وخشت بعدين سكراته وراه وهي تشبح لزهور بحده..
وجيهة:اني لتوا ناخد في اذن عزوزتي ونبلغ فيها لتوا نرفع فيها معاي..من باب الاحترام والتقدير..
نوريه اشرت ع بيد المحنيه ع زهور وقالت:اسمعي اني اللي جبتك لخوي ولعيلتنا بعد سمعتهم يمدحوا فيك وفي تربيتك وفي عيلتك..طقينا بابك ع اساس بنات ناس ومتربيه وتعرف الاصول..ماتخلنيش نندم ونقول شن درت في خوي وفي ماليا..
رنده:حركه زي هادي مانعدوهاش بكل لأن فيها قلة احترام لأمي وامي خط احمر..
نوريه:امي خط ناري مش احمر ناري..ورب العزه اللي ديرلها موقف تجرحها بيه نسقدوها مع الباب وماتقعدش ع ذمة راجلها دقيقه زياده...ردي بالك هالمرة بنفوتوها تتكرر معناها انتي اللي جنيتي ع روحك تمشي انتي يجوا في مكانك ميه ومافي حد خاسر غيرك انتي..
وجيهة:خلاص يابنات سادها ماسمعت واكيد استوعبت ومعاش تعاود صنعتها مرة تانيه..هيا اطلعوا..
التلاته شبحولها بنظرات تقطر سم..
بعدين مشوا طلعوا..
وامهم علقت خيط المكنسه في الضي وطلعت...
ولعت المكنسه..وزهور شدت وقعدت تكنس بيها ودموعها يصبوا..
وحاسه جوفها وكأنه ثاير فيه بركان..نار تحرق في جوفها حرق..
بعد كملت كنس ردت المكنسه في مكانها ومشت خشت للحمام وسكراته عليها وقعدت تبكي وهي حاطه يدها ع فمها وشاده عبراتها بقوة..
🏵🏵🏵🏵🏵
بعد  الغدي..
وهما يغسلوا في ماعين الغدي برا..
زهور؛بديت نتعود خلاص..
منى؛حتى اني..
زهور: تعرفي يامنى..همنا مش فيهم هما همنا في رجالاتنا كان عندنا رجاله دايرلنا قدر راهو مش هدا حالنا.
منى:صدقتي..
زهور:ويقعد حالك خير من حالي ع الاقل انتي راجلك يحبك..
منى:حبه برص..
ضحكت زهور..
منى:طياح سعدي وخلاص...خايف منهم اكثر مني مايكونش باهي الا لما نقعدوا برواحنا..
زهور:اني مش باهي معاي في كل الحالات يامنى..مش عارفه كيف نكسبه مش لاقيتله مفتاح الراجل هدا مش عارفه كيف نرضيه..وزياده ع مصايبي...هالبنوت اللي يجروا في جرته قريب متت يومها لما شفت رساله من بنت تحت طاولة مكتبه واضح طايحه منه وماراهاش كان هدا مايخليهاش هكي..
منى بضحكه:خطرت عليا الهديه اللي جابوها جماعة الوفاق للحوش يوم عيد الحب هو يحسابها جايه لرتيل خزرطها يومها قريب ماتت..وفالأخيرطلعت ليه هو..
زهور:اضحكي اضحكي عندك تضحكي اللي يده في الميه مش زي اللي يده في النار..
منى :لكن جديات راجلك رغم انه مش احلى واحد في خوته لكن عنده كاريزما وجذاب هلبه..
زهور رفعت حواجبها وقالت:ايه وشن تاني..
منى قعدت تضحك..
وزهور قعدت تشبحلها ع جنب وهي تمصمص في الطنجره.
منى هدت ضحك وقالت:مش مهم المهم في النهايه راجلك انتي مادوري شي..
زهور تنهدت وقالت:لما نكسبه يولي راجلي حق يامنى..
منى:تو انتي تحبيه ولالا؟
زهور:اني هادي نص مصيبتي يامنى..
منى:مادام تحبيه حتخليه يحبك صدقيني.
زهور مااقتنعتش بكلام زهور ومع هدا هزت راسها تساير فيها وقعدت ساكته..
🏵🏵🏵
واللي يحكوا عليه مقعمز ورا اللاب توب يقرا في شي عن تخصصه..
شويه جاته رساله ع الهاتف ..
خداه وشافها لقاها عن رمز التأكيد لحسابه ع الفيسبوك..
سفيان:قريب نسكره مرة وحده اني..
تنفس بعصبيه بعدين شبح لباكو الشكولاته..
حط التليفون وقربه...فتحه وخدي منه طرف حطه في فمه بعدين غطاها وقعد يشبح للأسم...
لحظات وقام تليفونه...وجه الكاميرا  عليه..خداله صورة ودارلها تعديلات ونزلها ع حسابه ع الانستقرام وقال..شن نكتب..شن تكتب..شن تكتب...
ابتسم وبدي يكتب...
"Choco lena..made in  Libya"
ونزلها....
بعدين حط التليفون ع تركينه وقال:واهو درنالهم دعايه بالبلاش لوجه الله..
رن تليفونه...فتح الخط ورد..
سفيان:هاه مروان..
"عمتك جت قالك بوك انزل"
تأفف بملل وقعد يمسح في عيونه وهو يقول:ok
 وسكر..
بعدين ناض وهو يقول..يارب
ومشي طلع ....

....يتبع......