شكولينا

الجزء ماقبل الأخير"القسم الأخير"

🍁انتم مع الأجزاء الأخيره من رواية #شكولينا🍁
كل شي حيخليك بعد موتك الا اعمالك الصالحه حتلحقك..
واولها الصلاه..ماتبدي عليها شي في الدنيا مهما كان مهم كله زائل وهي بس اللي حتقعد...الصلاة اولا🌸
قولوا لاإله إلا الله تفلحوا باللسان بالقلب وبصوابعكم اللي تكتب🌷
وصلوا ع الحبيب اسعدكم الله بجواره في جنات النعيم💖
🍫🍫🍫🍫🍫🍫🍫🍫🍫🍫🍫🍫🍫🍫🍫
•••••في وقت سابق•••••
في احدي العيادات بالعاصمه طرابلس...
شاده في يده بالقوة..وجهها شاحب والتعب بادي عليها....
كانت توصي..واضح توصي..
وهو مع شكل ووجهها وحالتها والكلام اللي يسمع فيه منها ماقدرش يشد دموعه..
وقلبه مقبوض..مقبوض هلبه...
نوريه بتعب:حسين كان ماطلعتش من هني....
حسين بدموع:نوريه اسكتي.
نوريه غمضت عيونها وقالت:بالله عليك خليني نقول اللي عندي...فتحت عيونها وقالت..كان ماطلعتش من هني...صغاري..بلعت ريقها وكملت تقول...صغاري نبيهم يقعدوا مع ماليا...مع خوي سفيان..عارفه ان ربي حينجيه ويرده..حالمه بيه اني حالمه..صغاري نبيهم يقعدوا معاه ماتربيهمش مرت البو ياحسين...
وحسين دموعه سيل يسمع فيها ويشد ع يدها ومايبيش يقاطعها...
نوريه:وولدي هدا...لو ربي نجاه...نبيك تعطيه لمها وعصام..
حسين بألم:خلاص اسكتي بالله عليك اسكتي وارحميني يانوريه..
هي قعدت تشبحله بحزن ودموعها ينزلوا..
مسح دموعه وقال:تو تطلعي من هني انتي وولدك مافيكم شي..وكلامك هدا يانوريه بنقعد شاده عليك ونقولك فيه واني نضحك عليك ياهبله..وانتي تقولي..قلد صوتها وهو يقول..حسين يابارد بطل براده...
في عز تعبها والمها وخوفها وحزنها ضحكها ضحكه خفيفه. 
هو طول قربلها وطبع ع جبيها قبله طويله..
وهي غمضت عيونها بشده من الألم..
ع خشة الممرضه تنحنحت وقالت:معليشي ياأستاذ..
تباعد عليها بالسيف..وطلق يدها وهوحاس انه سيب روحه..
مشي بيطلع وهي تشبحله بعدين قالت:زي ماوصيتك..
هو التفت شافلها...هز راسه وهو يساير فيها مسايرة...
بعدين مشي طلع بسرعه...
🍁🍁🍁🍁🍁
"نبي بابا نبي بابا"
منى بغضب:وبا ان شاء الله ليك وليه..
امها:ماتقوليش هكي يامراة خيرك هكي..
منى:شن بنديرله قوليلي يعيط ويقول نبي بابا ع اساس بوه مدوره ولامعبره...
امها خدت الشريف لحضنها وهي تقول؛خلاص ولدي خلاص تو الصبح بابا نكلموا بابا يجي باهي..
والولد يبكي بالعبره في حضن جداه.
منى قعدت تشبحله بغضب ممزوج بالألم بعدين رفعت عيونها  فوق وقالت من وسط قلبها..
"شرد صغارك زي ماشردتي ولدي يانوريه..حسبي الله ونعم الوكيل فيك من ساعة تزرق لين تغيب يانوريه"...
🍁🍁🍁🍁
"قريب توصل انت...........تمام تمام....لالا اللي وصيتك عليه بس......" هز راسه بعدين سكر...
سمع صوت آذان الفجر..غمض عيونه وهو يقول..
"يارب"
فتح عيونه شاف الممرضه اللي خاشه لعملية نوريه تمشي بسرعه ووجهها مايتفسرش..
وقفها وقال:شن صار..
الممرضه وهي ترعش:جابت وليد حاله باهي..
حسين عقد حواجبه وقال بحده:امه امه مرتي شن صار فيها..
الممرضه بإرتباك:تعبانه شويه.
حسين فنص فيها وقال:كيف تعبانه..
ع جية واحد من الدكاترة يجري:تعالي ياسعاد..
ومشي بسرعه والممرضه لحقاته..
حسين بعصبيه:فهموني شن في شن في يابهايم...
وفي بعض من الاشخاص يمشوا ويجوا كانوا يشبحوله...
لحظات..
وطلع الدكتور ومعاه الدكتورة ووجوههم ماتتفسرش..
هو قدملهم طول وقال:شن صار فيها..
الدكتور بأسف:صارتلها مضاعفات اثناء العمليه ضغطها ارتفع هلبه..وللأسف....
"توفت"..
حس وكأن قلبه دق دقة اخيره ووقف بعدها...
توسعوا عيونه ع الآخر...حس بالدم في وسط عروقه يغلي غلي..
بغضب شديد شد الدكتور من بالطوه وهو يقول بعصبيه وصوت عالي:شن تقول انت شن تقول..
الدكتوره خافت وتباعدت..
الدكتور متفهم حالته كلمه بهدوء وقال:وحد الله وقول إنا لله وإنا إليه راجعون..
وماحسش الدكتور الا وقبضة يد جايه ع وجهه..
عيطت الدكتورة...
وفي رجاله موجودين جو لحسين شدوه..
حسين بغضب شديد:حول انت وياه حول...قعد يضرب فيهم ويدف...ويبي يتلاحق الدكتور وهو يقوله..شن تقول ياحمار انت...مرتي وين يامجارم..شن درتوا فيها يابهايم..
وقعد يدف  ويضرب..
الدكتور:مرتك توفت الله يرحمها جاية تعبانه هي اساسا..
حسين بدي يبكي وهو يقول بصوت عالي:اسكت...اسكت..
واحد من الموجودين:ادعيلها بالرحمه ياخوي كلنا ليها الموت راهو ماهارب منها حد..
انهد حسين وهو يمرر في نظره عليهم وهويقول:شن ندير توا..اني شن ندير..
وبصوت عالي هز كل القسم وهو يقول؛شن ندير...!؟
ومشي للحيط وقعد يخبط عليه بإيديه وهو يبكي ويقول:شن بندير اني...شن بيديروا صغارها...كيف ندير ياناس..كيف بندير....
الدكتور ماتحملش حاله هرب بدموعه بعدين عن الموجودين..
والدكتور والممرضات يبكوا...
والرجاله الموجودين تأثروا عليه..
شويه هو سكت ووخر عن الحيط ومشي بسرعه للغرفه اللي هي فيها..
لحقوه الممرضات والدكتوره..
خبط الباب فتح وخش وهو يقول نوريه..
لقي ممرضه تفك في الاجهزة وهي تبكي بصمت متأثرة..
وشاف نويه مغطيه واثر الدم في مكان بطنها واضح
.جاها حول الغطا من وجهها..اللي ابيض هلبه وفمها اللي اختفي لون الحمرة منه...
قعد يخبط ع خدودها خبطات خفيفه وهي يقول:نويره حبيبتي نوريه..نوريه نوضي بالله يانوريه..لمن خلتيني..لمن خليتي صغارك..نوريه..عارفه حياتي من بعد كيف بتولي..مشيتي وخليتها يانوريه..ديما هكي انتي ديما..ديما زاهده فيا يانوريه..ديما.
الممرضات والدكتورة قلوبهم انشقت..
مش متعودين يشوفوا راجل يدير هكي ع فقد مرته..
••برا...
كانت في مراة حامل بتخش غرفه الولاده وراجلها يمشي معاها.
هي كانت تتالم بس لما سمعت الدوشه نست اللي هي فيه..
:شكلها في وحده بتجيب وماتت..
:ماتت ماتت هدا عمرها..كلنا بنموتوا..
:وكان نموت اني..
:هدا عمرك حتى انتي..هيا تحركي خفي روحك الزفت..
هي دموعها نزلوا ومشت وهي شاده بطنها وراجلها يتذمر ويتأفف وهو ماشي وراها..
🍁عندهم الحق الممرضات يتأثروا لحال حسين النادر الحدوث🍁
طلع من الحجرة وهو يبكي بألم وبصوت..
ع جية خوه يجري وفيده اكياس فيهم حاجات وصاه عليهم خوه لمرته..
لما شاف حال خوه انصدم وقال؛حسين شن صار..
حسين ببكي:ماتت ياعصام..ماتت..
انصدم خوه وبقوة وجمد في مكانه وهو يشبحله..
وحسين يمشي بخطوات ثقيله لين وصل في الكراسي وقعمز عليهم وحاط ايديه ع وجهه وهو يبكي..
وخوه جي جنبه حط الحاجات ع الارض وقعمز جنبه وضمه لصدره وهو يقول:الله يرحمها ويغفرلها الله يرحمها....ادعيلها ياحسين...
🍁🍁🍁🍁
حولت اليبرة من يد عزوزتها بعدين قالت:هي ابدي افطري عمتي..
رمضانه:مافيش اخبار عن نوريه لتو؟
مها:عصام قال بنصلي الفجر وبنمشيلهم.
رمضانه حط يده ع صدرها وقعدت تمسح عليه...
مها:خيرك عمتي!؟
رمضانه:حاسه قلبي مغموم ومش قادرة ناخد نفس افتحي الروشن افتحي..
بخوف مشت تجري مها للروشن وفتحاته ع وسعه..
مها بقلق:ها شن عمتي!؟
رمضانه حركت راسها يمين ويسار..
جتها مها وهي تقول بخوف:نكلم عصام .
رمضانه:لالا قبل منين كان يصيرلي هكي نوريه كانت تحط في يدها ع صدري وتقرا قرآن..
مها هزت راسها وحطت يدها ع صدر عزوزتها وقعدت تقرا عليها...
لحظات وقال رمضانه:خودي هاتفي وكلمي راجلك انشديه شن صار في سلفتك.
مها:حاضر..وخدت التليفون من حجر رمضانه وقعدت ادور ع رقم راجلها لين لقاته واتصلت...
نادى ..مرة...اتنين...تلاته...بعدين انفتح الخط..
مها:ايوه عصام..
"مها"
مها:ايه..بالله شن صار في نوريه..
تنهد بعمق بعدين قال..
"توفت"
مها من الصدمه جمدت في مكانها..
"مها...الو"
مها بصدمه:شن تقول انت!؟
"الله يرحمها يامها توفت خلاص" وسكر عليها..
رمضانه بقلق شديد:تي تكلمي يامراة شن قالك؟
مها نزلت التليفون وقعدت تشبحله ودموعها ينزلوا قالت:نوريه توفت ياعمتي..
خبطت رمضانه ع صدرها وهي تقول:ووك عليا ووك...وبدت تخبط ع رجليها وهي تقول..حي عليا حي..حي عليا نويرة الباهيه راحت حيي..
ومها انهارت وقعدت تبكي بالعبرة...
ع جية اكرام اللي سمعت البكي والعياط..
اكرام بفجعه:خيركم!؟
رمضانه:ووك عليا نوريه ووك..ماتت نوريه يااكرام ماتت بنيتي اللي ماجبتها ماتت..
اكرام شهقت بصدمه وحطت يدها ع فمها وقعدت تمرر في نظرها عليهم وهي مستوعبه اللي سمعاته...
نوريه..ماتت....
ضرتها..ماتت...
🍁🍁🍁🍁
 القرآن بصوت ماهر المعقيلي..
كانوا يسمعوا فيه من راديو الحاجه زبيده..
هي كانت مقعمزة تسبح...
وكنتها في الكوجينه طيب في القهوة...
وبنات ولدها...وحده في دار التقعميز مقعمزة ع مصليتها وتصلي...
وحداها الصغيره تتفرج ع ولد خوها وهو راقد..
والوسطانيه في الدار تتكلم بالتليفون..
عفاف:باهي غير قولي الحق عبدالصمد في امل..
"وبالله كبير ياعفاف ع حسب مافهمت غيبوبته مش مطوله"
عفاف:ان شاء الله يارب ان شاء الله...اسمع اني بنسكر توا وبنكلم نوريه نشوف شن صار فيها كان صار شي اتصل..
"ان شاء الله نتصل بش نبشر"
عفاف:ان شاء الله..في امان الله..
"سلام"..
سكرت عفاف..واتصلت بنوريه طول...
🍁في العياده..
كان حسين مقعمز ويشبح في الفراغ وهو مصدوم والدموع يطيحوا بروحهم...
وجنبه خوه سرحان..
جت الممرضه بتليفون نوريه وحطاته جنب حسين من غير ماتتكلم..ومشت..
فجأة رن التليفون..
حسين لما سمع نغمته اللي كان حافظها حس بقلبه انتفض..
شبحله..لقي..
اختي عفاف..يتصل بك..
خدي التليفون وفتح الخط وحطه ع وذنه..
"ايوه نوريه صباح الخير"
هو انهار بالبكي..
🍁عفاف انفجعت لما سمعت صوته وصوت بكاه..
وقفت وهي تقول:حسين..خيرك تبكي...
مسح عينه براحة يده وهو يقول ببكي:نوريه توفت...
قعدت ترعش مع بعضها..حست جسمها صقع كله..
عفاف بنبرة صوت مرتعشه:من اللي توفت..
حسين قعد يبكي وخلاص معاش قادر يتكلم...
خوه خدي منه التليفون وسكره...
وخلوا عفاف في حالة عدم استيعاب..
نوريه..ماتت....اختها الكبيره ماتت...!
امها وصاحبتها ماتت...!
صوت حسين وهو يبكي يتردد في وذنها..
بكاء راجل قلب محروق..وهي تعرف قداش حسين يحب نوريه...
لما استوعبت اللي عرفاته رفضت تصدقه..
فتحت الباب وطلعت وهي تعيط وتقول...
هما كلهم من الفجعه جوها يجروا..
رنده :خيرك!!؟
عفاف بعياط:نوريه...نوريه..
رنده حطت يدها ع صدرها وهي تقول:لالالالا..ماتقوليهاش بالله عليك ماتقوليها..
ورتيل حاطه يدها ع رقبتها حست روحها مخنوقه..
وعفاف تعيط:ناري عليك يانوريه...نوريه..
وبدت رنده تعيط...
ورتيل بدت تبكي بالعبرة...
هدا كله ووجيهه تتفرج عليهم وهي مش مستوعبه شي..
وجيهه تحب بنتها نوريه هلبه فوق حب الام لبنتها كانت بنتها واختها ومرات امها...
ان تختفي من حياتها هكي فجأة بدون مقدمات شي من الصعب الصعب جدا تستوعبه...
يعني عدنان كانت متوقعه يصيرله شي يوم الايام مجال عمله خلاها وين تودعه تتوقع انها مش حتلاقيه مرة تانيه..
سفيان ع وضعه الحالي كانت بخوف شديد وقلق اشد متوقعه يصير فيه اي شي....
بس نوريه..لاعلى بال ولاع خاطر!
سمعت صوت ولادها وهما جايين يجروا من المربوعه ويقولوا..
الشريف وهو مفجوع والدموع في عيونه:سمعت اسم امي...
رنده لما شافاته جاته خداته في حضنها وهي تبكي...
وفي هاللحظه خشت لينا للحوش.
وهي حاطه يدها ع الجرح وتقول بفجعه؛شن في مني مني!؟
سمعت عفاف وهي تندب وتعيط وتقول:ناري عليك ياوخيتي ناري عليك يانوريه...ياناري..
فتحت لينا فمها شويه وعيونها ع وسعهم من الصدمه ودموعها بدوا ينزلوا سيل...
الصغار كلهم ناضوا وهما مخلوعين...
بنات عفاف قعدوا يبكوا مع امهم...
ونور بنت نوريه حاضنتها رتيل ويبكوا الزوز...
وصغار لينا وهما مخلوعين يبكوا...
بس ولاد نوريه كانوا مصدومين حاضنتهم رنده وهي تبكي..
وهما مش مصدقين..
زي حناهم...
اللي مشت قعمزت ع درجة الصاله وهي تشبح لعزوزتها كيف حاطه طرف محرمتها ع عيونها وتبكي...
••من برا..
خش الشريف للحوش وهو يسمع في العياط..
ويقول ويردد:إنا لله وانا اليه راجعون..
مش عارف مني..بس كان متوقع..
وهو يصلي في الفجر في الجامع كان يدعي في سجوده يعطيه الصبر ع اي مصاب ينزل بيه ويعطيه قوة يتحمله..
الشريف ماكانش يبي يسيب عيلته حس انهم بحاجه ليه اكثر من اي حد..
صح الموت مش بيد حد غير الله عز وجل..
لكن هو يحاول ياخد بالسبب ومايستلمش ولايضعف..
خش للحوش وهو يسمع في عياطهم..
ولما شافهم حاضنين صغار نوريه فهم بدون مايسأل..
حط يده ع الحيط بش يقعد واقف ومايطيحش..
كان متألم..قلبه يتقطع...
صعب ع الأب والأم يعيشوا بش يدفنوا صغارهم مش العكس...
بالذات لو خلوا وراهم ذريه......
زي عدنان...وتوا نوريه..
يشبح فيهم وهو يبكي بصمت..بس عيونه ركزوا ع مرته المصدومه..
مشالها طول قعمز قدامه وقعد يخبط ع وجهها خبطات خفيفه وهو يقول:وجيهه..وجيهه..
كلهم في هاللحظه استاقظولها..
لينا:عمتي..ابكي ياعمتي..
عفاف بصوت مبحوح؛يام..
خداها راجلها في حضنه وهو يقول:كلنا ليها ياوجيهه كلنا ليها ..
وجيهه:قعدت ندفن في صغاري ياشريف..قعدنا ندفنوا في صغارها...علاش حني شن دايرين بش يدير فينا ربي هكي..
لينا ودموعها ينزلوا:حتى الانبياء دفنوا صغارهم ياعمتي راهو هدى مش نقمه هدى ابتلاء..وبعدين هالدنيا مافي حد حيقعد فيها ياعمتي كلنا بنعدوا ونخلوها...كل من عليها فان ويبقى وجه ربك ذو الجلال والإكرام ياعمتي..مافي قاعد غير ربي..
الشريف:لاإله الا الله..
لينا:لا إله إلا الله...ادعيلها راك امها دعواتك مستجابه ادعيلها ربي يرحمها راهي في حكم الشهيده وان شاء الله من حفرتها لجنتها..ادعي بس راهي ماتبي منكم كان الدعاء محتاجه لو الدعاء واجد..انا متأكده لو نقدروا نسمعوا صوتها توا راهي تقول ادعولي ربي يثبتني عند السؤال ويرحمني ويفتحلي باب الجنه متاعي...ادعولها بس..
كلام لينا كان مؤثر هلبه وهما يسمعوا فيه ويبكوا بصمت..
لينا نفسها ماكانتش عارفه كيف الكلام هدا طلع معاها كانت تسمع فيه من فمها يطلع وكأنه طالع من فم حد تاني..
بس هو الحق والخير الله ينطق بيه لسان من احب من عباده..
🍁وطبعا صوت العياط جاب الجيران اللي قعدوا يخشوا عليهم..
من بينهم حوش الساحلي اللي جوهم جري
والهام اول ماخشت عليهم جت لرتيل وحضنتها وقعدوا الزوز يبكوا بحرقه..
ووجيهه تبكي مع جارتها وهما يحضنوا فيهاوكبدها ذابت من الحزن....
🍁🍁
ووصل الخبر  لمروان في المستشفى سيب كل شي وروح الحوش..
ووللعمات والأعمام والخوال والخالات...
والحوش تعبا ع اخره وصوت البكي ونواح هو بس اللي مسموع...
🍁🍁🍁🍁
مقعمز يفطر في حوش اخته ..
مع اخته وبناتها...وخوه اللي جاهم من الصبح....
زايد:والله اسبوع بس يانوال وبنسافر عندي ماندير..
نوال:وامتى بتولي تاني..
زايد:بعد شهر لاأكثر..
نوال:لا قريبه هلبه قبل كل اربعه شهور ..
زايد قعد ياكل وهو ساكت..
ونوال تشبحله ع جنب هي مبتسمه وميسم ركزت عليها..
شويه رن تليفون رياض.
وحده من بنات نوال:خالو تليفونه..
هز راسه وخداه شاف المتصل استغرب..
فتح الخط ورد وزايد مركز معاه..
رياض:صباح الخير مبشر...............تمام الحمد لله............
ملامح وجهه تغيرت وهو يقول...إنا لله وإنا اليه راجعون..لاحول ولاقوة الا بالله..
نوال؛شكله الراجل مات..
شبحلها زايد وهو عاقد حواجبه..
ميسم:منوماما؟
نوال؛خو رتيل الكبير..
ميسم:حيي خيره!؟
سكر رياض وقال بأسى:لا مش هو اختهم الكبيره ماتت تحت عملية الولادة..
نوال بصدمه:نوريه..!!! ووك ياناري ياناري...ناضت وهي تقول..كان العزي في حوشهم بنمشوا اني وناديه..
رياض:تو نزيد نسأل ..
زايد:على هكي الجنازة الظهر..
رياض:اكيد..
نوال ودموعها في عيونها:ووك قداش وجعتني والله خشت خاطري من اول مرة ريتها فيها..العيله كلها خشت خاطري ياناري عليهم مساكين مامتلقيين..
🍁🍁🍁🍁
وتمر الساعات..
والحزن يكبر مايصغرش..
والألم يزيد ماينقصش..
ونوريه يلفوا عليها الكفن لفه ورا لفه...قبل لتنحط في التابوت ويرفعوها لاخر منازل الدنيا...بش تنتقل لحياة البرزخ...
حسين ماجفوش دموعه عليه...يبكي بصمت وهو يحط فيها في الثابوت متاعها مع خوها مروان اللي نزلوا قطرات من دموعه ع كفنها...
سكروا عليها التابوت وانقام ع الكتاف وانحط في سيارة كبيره بش يرفعوها لحوش اهلها ويلقوا عليها اخر نظره...
🍁وين وصل غادي ودخلوه للدار اللي حدا المربوعه..
جو امها وخواتها بش يشوفوها..
وجيهه ببكي؛ووك عليا ياربي مش مصدقه..مش مصدقه كيف نشوف فيها هكي..ياريتك انتي اللي شفتيني هكي يابنيتي..قطعتي قلبي سحنتي كبدي...حرقتيني يابنتي حرقتيني..الله يرحمك ياماما..الله يرحمك يابنيتي الكبيرة..ياوخيتي..يااميمتي الله يرحمك..صغويرتك في عيوني ماما ماتخافيش عليهم بنيتي صغويرتك في قلبي ياماما اطمني وتريحي ياماما..ارقدي مرتاحه..
وطبست عليها وقعد تبوس في كل جزء من وجهها..
والبنات حداها بيتقطعوا بالبكي..
ومروان مقعمز برا ع رووس صوابعه وهو منهار ويبكي بالعبره...
"نبي نشوف امي ياخالي"
قام راسه وشبح للشريف كانوا دموعه ينزلوا ووجهه يقطر حزن..
مروان وقف ع حيله وقال:خش خالي خش..
مشي الشريف خش لقي خالته رتيل تبوس في امه..
هو قدم وهي شافاته تباعدت..
وعيونها هي وخالاته وحناه عليه..
الشريف ولد العشر سنوات..
واقف يشوف امه وهي ميته ملفوفه بكفنها وسط ثابوتها..
رفع ايديه وقعد يدعي...
"اللهم ثبتها عند السؤال..اللهم ثبتها عند سؤال اللهم ثبتها عند السؤال..
اغفرلها كل ذنوبها..وارحمها وخلي قبرها روضة من رياض الجنه..."
نزل ايديه وجاها..طبس ع راسها وباسه بعدين قال..نتلاقوا في الجنه يما...
رنده ببكي:ماخليتش فيا عرق ياولدي..
وانهاروا بالبكي..ومروان خدي الشريف وضمه وهو يبكي..
والشريف دموعه ينزلوا بصمت..
🍁🍁🍁
وبعد ماودعوها الوداع الأخير..
طلعوا بتابوتها من الحوش لنفس السيارة بطريقهم للجامع بش يصلوا عليها..ومنها للمقبرة...
الجنازة كان فيها اعداد كبيره من الناس وغالبيتهم معارف حسين والحاج الشريف..
والملفت للآنتباه وجود زايد في الجنازة هلبه من الحاضرين كان عندهم فضول يعرفوا علاقتهم بيه...
وهو واقف يتفرج ع حسين من ورا نظاراته ..
كيف طاح ع قبر نوريه بعد مادفنوها وحطوا عليها..
وهو يقول ببكي؛وين نلقى زيك قوليلي وين...وين نلقى زيك مراة وين...مافيش زيك انتي ولاريت..مراة قايمتني صاينتني تخدم ع راحتي وراحة امي..مراة ربتلي صغاري احسن تربيه...مراة صبرت معاي وعاشت معاي ع الحلوة والمرة وهي تضحك وراضيه..وين نلقى زيك وين...مانقول كان الله يرحمك ويرحم من جابك وعقبك ورباك يارفيقة عمري...والله مافي زيك والله زيك ماني لاقي..
وبوها يسمع ويبكي وهو حاط يده ع عيونها..
ومروان مغطي ايديه بوجهه وهو يبكي..
وانس كان متأثر ع الأخر وخو حسين وهلبه من الحاضرين اثر فيهم كلام حسين ع الآخر...ومنهم زايد ورياض...
🍁🍁🍁🍁
بعد الجنازة ولو للحوش..
كانوا ناصبين قدامه الخيمه اللي تبعت بالرجاله..
والجنان منصوبه فيه خيمه كبيرة للنساوين..
وهما بين اللي حاصل في الكوجينه والتطييب..
وبين اللي يبكي وينوح..
••اساور ببكي:ياربي مش مصدقه نحس فيه حلم كذب..
رنده؛ياريت ياأساور ياريت..
مرام ببكي:بين عيوني يوم جتني ومكيجتها للصدرة كنت نقوللها كل ماتكبري تصغري..تقولي اني مانكبرش بكل الحاجه الوحيده اللي تزيد فيا جمالي..
رنده ببكي:راحت في ربيع عمرها وخيتي...
اساور مسحت ع وجهها وهي تقول:اااه..اااه..
ع خشة مها ومعاها رمضانه اللي لما شافتها رنده..
تبدلت نظرات الحزن اللي في عيونها لكره شديد...
وفي وسط زحمة الناس واصوات احاديثهم...
سكت كل شي فجأة ومعاش ولى في صوت مسموع غير صوت رنده اللي بكل غضب ناضت وهي تقول..
ان شاء الله غير تريحتي ياحاجه رمضانه..
كلهم يشبحولها بصدمه.
رنده:سحنتي كبدها سحن ع الصغار خليتها مهمومه متكدره لاتعرف ترقد ولاترتاح خليتها بروحها تقول لراجلها تزوج عليا بش تجيب العزوة اللي تبيها عمتي..خليتها ذوق مرار الضرة وتنقهر في اخر عمرها خلتيها تسيب الدنيا بش تجيب العيل اللي تبيه..تريحتي ياحاجه رمضانه تريحتي..
زبيده:رنده اسكتي.
رنده:مايسكتني حد..نوريه مامتش اليوم نوريه ماتت في اليوم اللي شافت فيه راجلها يزف في مراة تانيه..ماتت وين جت عليها الضرة وهي المراة المقومه الكامله المكمله والكمال اللي عمرها ماقصرت لافي حق عويلتها ولاحقك انتي ياحاجه وحق بناتك..
رمضانه كانت تسمع وهي منزله عيونها ودموعها ينزلوا..
ووجيهه تشبحلها بحده وهي راضيه بكلام بنتها رنده قالت اللي في خاطرها..
ولينا تشبح لرمضانه بنظرات عدم تقبل بسبب عقليتها وتفكيرها اللي هز استقرار اسرة...
وعفاف ورتيل ماكانوش غير عن اختهم..
صوت رنده كانت مسموع لبرا وكلامها واضح حتى الرجاله سمعوه..
بما فيهم عصام خو حسين اللي كان مضايق هلبه..
وانس اللي كان يسمع وهو خايف ع رنده..
وزايد اللي مش قادر يمنع شعور الأعجاب بيها في نفسه قاعد يكبر ويزيد...
🍁رنده مررت نظرها ع الموجودين ودموعها ينزلوا :بتقولوا قليلة ادب قولوا اللي تبوا تقولوه عليا قولوه..بس نبي نذكركم اللي ماتت هادي ماكانتش اختي هادي كانت امي اللي ربتني واني اللي ادرى باللي راته وعاشانه...ومايحس بالنار كان اللي عافس فيها...
ولفت مشت بتخش..بس ماإن مشت خطوتين الا وجت طايحه فاقده الوعي..
عيطوا وهما يقولوا:رنده..
واصواتهم وصلت برا..
مروان ناض وخشلها..وانس ناض وراه ولحقه..
وزايد معاهم بعيونه اللي كانت نظراتهم كلها قلق:قريبهم هدا!؟
رد جارهم خليفه اللي كان مقعمز جنبه وقال؛هدا كان المحامي متاعها وتوا خاطبها..
شبح لخليفه بشي من الصدمه..
ورياض كان يشبح لردة فعله...
خليفه:جيران الحيط في الحيط ونعرفوا ع بعض كل شي..
غير زايد عيونه عنه بعدين شبح لخوه وقال:هيا..
وناض ورياض ناض معاه..
ومشوا سلموا ع الشريف وخوته وطلعوا من الخيمه...
ركبوا السيارة..
رياض:خيرك حسيت جوك تكهرب..
حرك راسه بالنفي وقال:ابدا جوي عادي بس يعني كنا في عزي..!
هز رياض راسه مسايره وقعد ساكت..
وتحركت السيارة ووراها سيارات المرافقه...
🍁🍁🍁🍁
بعد اللي صار روح سلف نوريه بأمه ومرته وقالوا لحماواتها مايمشوش غادي وبيديروا عزاهم برواحهم..
لكن حسين اللي قعد في المقبرة للمغرب...يدعي لرفيقته مايبيش يخليها في اول ليها القبر بروحها...
بعد روح مشي لحوش نساباته بش يكمل العزي غادي...
سمع باللي صار لأمه لكن مااهتمش هو توا مش قادر يفكر في شي من حزنه الشديد..
☘☘☘☘☘☘☘☘☘☘☘☘☘☘☘☘
ومن الحزن والألم..
للفرح وبهجة الفرح....
عند عيله رياض اللي دار اول عرس لحفيد ليهم..
كانت اجواء الافراح هي نفسها المعروفه في كل عائله ليبيه..
في اول الايام ماحضرش والد العريس بسبب انشغالاته كان يروح من الليل لليل..
بس يوم الفاتحه كان الحضور اجباري...
كلهم لبسوا عربي ماعدا هو افرنجي لانه كان جاي من اجتماع في سفارة اجنبيه طول للجامع..
حط يده في يد نسيبه وبدي الشيخ بمراسم عقد القران..
ومراد كان متحمس وقلبه طاير من السعاده..
وعمه الصغير يشبحله ومتمني لو كان في مكانه...
وبعد مانقرت الفاتحه..
قعدوا يهنوا في مراد اللي كانت ابتسامه الفرح مش مفارقه وجهه..
بعد السلام والتهاني..
جي لبوه..
زايد فتح ايديه ع اساس بيحضنه...
ولما وصل مراد في بوه قعد يرقص زايد بإيديه وهو يقول:وبيس وبيس وولدي ولا عريس..
كلهم قعدوا يضحكوا ومراد يضحك  بإحراج لأنه دارله لقطه محرجه..."عوجه"كيف مانقولوا..
زايد بضحكه فتح ايديه وقال:هي تعالى هي تعالى .
فتح مراد ايديه بيحضن بوه.
فاته زايد وحضن رياض وهو يقول:هي تعالى هي تعالى يامداير في عقلي حاله.
وكلهم يضحكوا..
خو زايد قال:حمضتها راك..
مراد:خلاها خل..
التفت عليه وجبده وضربه كف خفيف وقال:تحشم ع وجهك سفتول..بعدين ضمه..
ومراد ضم بوه وهو يضحك..
زايد:مبارك ياقنين مبارك بالرفاه والبنين لكن هاه رد بالك تخلي البنين يقولولي جدو ..
نسيبه:مالا شن تبيهم ينادولك يابرو..
زايد:لاياخفيف ساد يقولوا بابا زي بوهم..
مراد باس راسه وقال:حاضر..
شبح زايد لولده وابتسم بعدين باسه من خده...
🌸وبدت النوبه تخبط في حوش زايد..
وجمهور كبير كان حاضر..
وهو كان واقف يتفرج ع ولده وهو يرقص مع صحابه وعمامه...ويضحك..
بعدين تحمس وخش فيهم وبدي يرقص مع ولده..
والجماعه زادو شاشو..
رياض بضحكه:هدا غير نسيت النوبه!
سمعه وجبده من يده ودخله معاهم وقعدوا يرقصوا مع بعض والدنيا شايشه زي مانقولوا..
والاجواء كلها فرح في فرح...
🍁🍁🍁🍁
طالعه للجنان بش تلوح القمامه..
طلعت لوحتها في مكانها بعدين مشت بتخش وهي تسمع في وحده من عمات راجلها..
"خشي قعمزي يالينا مش باهي ليك الحركه هلبه"
لينا:هاني خاشه..
خشت وجت بتسكر الباب شافت جهة المظله..
لقت الشريف ولد نوريه مقعمزة تحتها..
طلعت تاني وردت الباب بعدين مشتله..
وصلت فيه وهي تقول:الشريف خش داخل صقع..
الشريف:مانبيش..
لينا شبحتله شويه بعدين قعمزت مقابلاته وقالت:غلط قعدتك هنى تو تمرض..
شبحلها وقال:تصدقيني لو قتلك مش حاس بالصقع..
لينا عيونها تعبوا دموع وهي تشوفله...الولد فايت سنه وكلامه وتعبيره اكبر من عمره..
الشريف:اني لما نجي هني نجي مع امي..وكان قعدنا بروحنا هني ايام عارفها بتولي...لكن توا اني قاعد هني مع حناي وخالاتي وامي مش معانا ومانقدرش نستناها ماهو معاش بتولي..
نزلوا دموع لينا طول مسحتهم ورشفت..
الشريف:تعرفي..نفكر في امي توا ليها خمسه ايام في القبر بروحها..تعرفي نبي نقعد نايض اليوم كله بش ندعيلها ماهو سمعت شيخ يقول اللي يموت معاش يقدر يدير اعمال صالحه لكن دعاء صغاره يساعده ويونسه في القبر..خايف ننسى ندعي امي تقعد بروحها..
لينا قعدت تشد في روحها بقوة بش ماتنهارش قدامه كلامه مؤلم هلبه..
الشريف:تعرفي اني فرحان لأمي ارتاحت..ماهو هي كل يوم كانت تبكي كنت نشوف فيها وهي ماتندريش عليا..اصلا من لما بوي تزوج وامي ولت حزينه وديما تبكي معاش ولت زي زمان .
لينا حطت يدها ع فمها بش تكتم بكاها..
الشريف:اني معاش نبي نقعد مع بوي نبي نقعد هني خلاص..
لينا حولت يدها ومسحت دموعها وقالت:اللي تبيه حبيبي يصير المهم توا خش داخل بش ماتمرضش.
ناض الشريف وهي ناضت ومشوا مع بعض..
الشريف:ندعي حتى لخالي سفيان..
لينا شبحتله وابتسمت بألم ومسحت ع راسه وقالت:ربي يحفظك ويحميك...
وخشت هي وياه داخل وسكرت الباب...
🍁🍁🍁🍁
وجي اليوم اللي بعده..
وكان يوم دخول ولد زايد...
لما شاف ولده بالبدله وهيئته هيئة عريس دمعوا عيونه..
شد وجهه بإيديه وقال:كبرت يامدعبل..
وباس جبينه بعدين قال..وكبرتني معاك..
مراد بإبتسامه:لا الله يبارك عليك يابوس شباب من يوم عرفتك..
ضحك وخبط خده خبطه خفيفه بعدين حط ايديه ع ذراعاته وقال:اسمع..توا انت بتخش ع حياة جديده مانبيش نخوفك منها مادام انت خديت اللي يبيها قلبك نص مشاكلك محلوله..لازم تفهم ان الزواج مش طلوع وادهوير وكلام حلو وحبني ونحبك..الزواج راهو مسؤوليه كبيرة هلبه..انت بتولي مسؤول ع مراة وبعدين ان شاء الله صغار خليك راجل زي ماربيتك..وراهو المراة كائن منكدي بطبعه تحملها وخلاص.
فنص مراد بضحكه..
زايد بضحكه:نبصر عليك..المراة حساسه لازم تعاملها ديما زي بنتك قبل لتكون مرتك وحبيبتك..ساير ع قد ماتقدر كن لها عبد تكونلك جاريه..تعطيك اضعاف ماتعطيها..
رد بالك تكسرها...كان كسرتها ربي مش حيخليك وحيسلط عليك من يكسرك اضعاف كسرها...خاف ربي فيها...
مراد؛والله انت كانت تتزوج تخليها برينسس..
زايد ابتسم ابتسامه مراد يعرفها ابتسامه ضيق..وزايد فيسع مادارك الموقف وقال:هي اطلع لجماعتك..
باس مراد راس بوه ومشي طلع وبوه تنهد بإبتسامه وطلع وراه..
وكانت ليله م ليالي الف ليله وليله...
اجواء فرح خالصه...
وفي اخر هالليله العريس روح بعروسته لوحده من الفنادق..
والعيله اللي هدا روح ع حاله..
هديكا الليله زايد بات في حوش اخته نوال..
بش اليوم اللي بعده يسافر...
والصبح بكري ...
ناض دار الروتين اليومي متاعه..بعدين جهز وقبل ليطلع..
قعمز مع نوال يشرب في القهوة...
نوال:حاساتك زي اللي بتسافر وبتخلي حاجه ليك هني..
شبحلها وقعد ساكت..
نوال:برغم ان مراد هو وميسم بيسافروا اليوم حتى هما..
زايد غمزلها وقال:شن تبي تقولي؟
نوال بضحكه:الفتره الاخيره ملاحظاتك متغير مش زايد زمان...فيك حاجه هكي مخلياتك مهبي شويه..
زايد شبح لفنجانه وقال:والله ماني عارف شن بنقول..بعد هالعمر..
نوال؛اللي يسمعك يقول عمره 70عام كلهم 45 عام..
زايد شبحلها وتنهد بعدين قال:هي هكي جتني زي الكف ع غفله...
نوال بضحكه؛البنيه جميله..
زايد:وجذابه تشدك مش عارف كيف...لما شفتها مش عارف كيف بنوصفلك..المهم فركستني وخلاص...تصدقي تمنيت لو اصغر بعشرة سنين..
نوال؛والله عمرك هدا هو العمر اللي تحبه المراة قالوا المراة سن الرشد متاعها 27 والراجل 40..
زايد؛مخطوبه..
نوال اتفاجئت:جديات..
زايد:للأسف..
نوال:والله ماكنت نعرف..
تنهد وقال:هو اني بالعموم راجل محظوظ بس المرة هادي مش عارف كيف جتني معاكسه..يللا فيها خيره..
نوال هزت راسها بأسف..
ناض وقال:هي خلاص وقت عليا..
ناضت وسلمت عليه بالخد وهي تقول:توصل بالسلامه..
زايد:ان شاء الله..هي استودعانكم سلمي ع راجلك..
نوال:يوصل..ومشت تسقد فيه...
🍁🍁🍁🍁🍁
بعد 5ايام..
الساعه 11:00صباحا..
في مربوعة حوش الشريف..
عبدالله:ماتبي شي ماناقصك شي..
لينا؛سلامتكم بس..
عبدالسلام؛كان احتجتي لشي اتصلي تبي تجي تقعدي عند واحد فينا لو يروح راجلك سالم تعالي مايشدك كان لسانك يالينا..
لينا:مادام راجلي قاعد يتنفس انا هدى مكاني ربي يطول في عمره ويرده سالم يارب..
عبدالسلام وعبدالله:آمين..
عبدالله:عدي قوليلهن يطلعن..
ناضت لينا وقالت :حاضر..
ومشت طلعت من المربوعه..للصاله كان فيها خواتها ونساوين خوتها...
خواتها جو قعد اسبوع كامل واليوم بيروحوا..
ونساوين خوتها جوهم تلاته مرات..
لينا:قالولكن هيا..
زبيده:كان قعدتوا للغدي..
امال:لاخلاص ياحاجه هداك هو..
وناضوا وبدوا يسلموا ع عفاف وزبيده ووجيهه..
ورده:اخر الاحزان ان شاءالله..
وجيهه هزت راسها وهي ساكته.
وعفاف بصوت مبحوح:قالت ان شاء الله..
وطلعوا وسقدتهم لينا..
امال:ردي بالك ع روحك راك نافس..
هناء:ان شاء الله يردلك سالم ياوخية مافيه سو..
لينا وعيونها مليانات دموع:آمين..
نجمه:لينا تبي اي حاجه رني..
لينا:تسلموا جعني مانفقدكم..
•••وفي دار رتيل..
كانت رنده مقعمزة تقرا تحاول تركز وتنشغل عن الحزن..
وحداها رتيل مقعمزة تقري في مؤيد ونور جنبهم تكتب في الواجب..
فاتوا عشرة ايام ع وفاة امهم..
وخالاتهم فضلوا يردوهم للقرايه بالك يلهوا بيها شويه ..
وفي هز الهدوء اللي هما فيه.
رن تليفون رنده...شافت المتصل لقاته رقم دولي..
رنده بإستغراب:رقم دولي..!؟
رتيل:ردي بالك مروان..
🍁من يومين مروان سافر وبدل هو وعبدالصمد لأن عنده اشغال مستعجله لازم يشرف عليها بنفسه🍁
رنده فتحت الخط وقالت:ايوه..
"عظم الله اجرك ياقلبي"
قلبها قريب وقف من الخلعه..
"سامحيني وصلت متأخره عارف...مش مشكله الله يرحمها اختك اللفعه هديكا ريحت وارتاحت"
رنده بغضب ودموعها ينزلوا:سكر فمك ياخنزير....
ورتيل والصغار يشبحولها بخوف..
"مقبوله منك ياحبي..اها حقه شن صار في خوك قاعد يراجي في دوره"
رنده:ان شاء الله في راسك ياكلب..
"مقبوله منك حتى هادي..باهي وهداكا المحامي اللي سمعت هاه سمعت اشاعات تقول ان في بيناتكم مشروع زواج لاقدر الله"
رنده خافت وقعدت تقول:انت شن تبي مني ياحيوان شن مازال تبي مني..
"نبي نقولك ياحبي لو تبي مشروعك معاه يتم نلحقوه باختك..شوفي خوك عطيتكم فيه احتمالات بين يموت بين لا..لكن هدا ورب الكون...من غير احتمال ماهو واخد..الموت طول"
رنده بدي انفاسها تتسارع..
"اهو اني قاعد نحذر فيك ماتخلنيش مجرم ع الآخر نقتله ورب الكون نقتله ونخليك تقيم عزاه حتى هو..وقد اعذر من انذر"..
وسكر عليها...
رتيل:شن يبي منك الحقير هدا..
حطت رنده تليفونها ع الطاوله وهي ترعش مع بعضها..
بعد حطت ايديها الزوز  ع جبهتها ودموعها تنزل..
وشويه وغطت وجهها وانهارت بالبكي....
صوت بكاها وصل لبرا حاولوا يفهموا منها شن في لكن هي مابتش تقول لحد ورتيل لما شافتها ماقالت شي سكتت.
وصغار اختها ماتكلموش بكل...ماتربوش ع طول اللسان والكلام في امور ماتخصهمش..
ورنده...اليوم بطوله وعقلها مع انس وقلبها بيموت من الخوف عليه..
ومالقتش مفر من انها تاخد قرار حتى لو كان حيعذبها يقعد الأفضل ليه هو...
🍁🍁🍁🍁
"باهي شن بديري"
رولا:والله مانخليهم يتهنوا بالله لو نسحرهم..
صاحبتها؛سحر!؟
رولا:ايه سحر نخش حتى ع السحر المهم مايكونش لغيري حتى لو ماكانش ليا..
:ردي بالك تورطي روحك ع خاطر راجل..
رولا:ماتخافيش مش مورطه روحي..
شويه رن تليفونها وقالت:هدا خوي جي.....
وناضت صاحبتها سقدتها من الحوش....
🍁🍁🍁🍁
"مافيش شماته في الموت لكن اللي دارتهولك ولى عليها اهي ماتت وخلتهم متشردين"
منى:ربي يمهل ولايهمل.
:المهم توا انتي مزال اقل من شهرين وترمي العده وراهو في عندي ليك موضوع بعد ترميها فرصة العمر العوض من ربي..
منى:صعب نتزوج طول بعد نرمي العده..
:لامش صعب هو تو تشوفيه كان ماسمعتيش بيه تزوج قبل لترميها مانبداش اني..
منى:لايديرها هو ماعنداش مانع..
:خلاص حتى انتي عيشي حياتك وعوضي اللي فاتك في زواجه مش محسوبه عليك اصلا بعد عرفت كيف كنتي عايشه تأكدت انك ماكنتيش عايشه..
منى؛عندي ولد ياهنادي مانقدرش نخليه لأمي مراة كبيرة مانبيش نشقيها..
:هونا بوه ياحنه مش ولده خلاص هونا حوش جدوده مش يربوا في صغار بنتهم توا ولد ولدهم اولى..
منى قعدت تشبح للشريف وهو راقد بضيق..
:والله لما تاكليها في عمرك اخرته لما يكبر بيمشي لبوه وانتي تقعدي مبومه بروحك..
منى قعدت ساكته وهي تشبح لولدها وكلام اختها يدور في عقلها...
☘☘☘☘
بعد يومين....
في كلية اللغات..جامعة طرابلس قاطع_ب
كانت واقفه في الساحه تراجي..
وصاحبتها مقعمزة تشبحلها من بعيد...
شويه شافت سيارة تعرفها...جت ودرست...
وصاحبها نزل منها وسكرها..وقدم لصاحبتها..
فدوى بأسف:خسارة والله خسارة..
••وصل فيها وحول نظاراته وقال..
انس بإبتسامه؛السلام عليكم..
رنده:وعليكم السلام..
انس:كيف الحال..
رنده؛الحمد لله ع كل حال .
انس:فكرت نتواصل معاك واللي منعني ان مافيش صفة تربطني بيك لتوا..مع الاسف الظروف عارضتنا لكن معليشي كله خير..
رنده:اكيد كله خير..تنهدت بعدين قالت..انس.
انس:أؤمري..
شدت روحها بقوة وشبحتله بعدين قالت؛مافيش نصيب..
تلاشت ابتسامته وعقد حواجبه بعدم فهم..
رنده؛مش حترتاح معاي صدقني ظروفي ومشاكلي ماتمش وشوف ربي شن دار بش ماصارش من الفضانيه..خيرتك مش فيا ياانس مانصلحش بيك..
انس:وانتي علاش تقرري عني!؟ من قالك اني مانبيش نتحمل معاك ظروفك ونوقف معاك ..تي اني يارنده كان نلقى نتزوجك توا بش نقعد معاك نوقف معاك نسندك ونقويك..مش انتي بس حتى عيلتك..اني راضي بيك وبحياتك بكل شي فيها ومستعد نتحمل معاك كل شي...
صعبها عليها هلبه خلاها مش عارفه شن ترد تلقائيا ردت بحده وقالت:اني مانبيش..مانبيش نتزوج مانبيش..خلاص نبي نقعد مع بوي وامي..نبي نربي صغار اختي مانبيش مسؤوليه تانيه غيرها..راجل وصغاره وامه..عيلتي اولى بيا..
هو انصدم فيها بقوة وقال:اها هي هكي.!؟
رنده بحده؛ايه هكي..
هز راسه وزع نظره ع المكان وقال:تمام..شبحلها وقال..استني شويه..
ومشي لسيارته..
وهي شاده روحها بالسيف في صدرها صوت صرخه مكتوم مش قادره طلعه..
شويه وجاها وقال..هاتي يدك..
هي بتردد مدت يدها.
هو حط فيها مشبك شعرها وقال:يشهد عليا ربي اني تمنيتك من قلبي لكن انتي رافضه تعطيني فرصه وقصتك مع طليقك اثرت عليك هلبه....يللا معرفة خير..وصدقني هادي اخر مرة تشوفيني فيها..
رنده سكرت يدها ع المشبك وقالت:يكون احسن..
ولفت بسرعه ومشت..
وهو قعد واقف يشبحلها كيف عطاته بظهرها ومشت قلبه يبي يلحقها..بس كرامته كانت فوق كل شي..حاول معاها ومانفعش...وهي مابتش تساعده يكمل معاها..
مشي طول ركب سيارتك وشغلها وتحرك وهو يحرق في العجل..
هي لما سمعت صوتها بدت تبكي بصمت..
مشت للكرسي اللي فيه صاحبتها طول انهدت بالبكي وهي تقول:حسبي الله ونعم الوكيل...حسبي الله ونعم الوكيل..
وصاحبتها تمسح ع ظهرها وهي تشوفلها بحزن...
🍁🍁🍁🍁
في مربوعة بوها...
كان حسين مقعمز يكلم في الشريف..
حسين بنبرة حزن:هادي وصيتها قالت صغاري يتربوا عند سفيان..ماتبيش مرت بو تربيهم..اني مستحيل نتخلى عن صغاري ووالله ياعمي لولا انها وصيتها مابعدتهم عني لحظه..
الشريف بألم:وصية بنتي تمشي...وربي يردخالهم سالم ...
حسين هز راسه وقال:آمين..
الشريف:والولد الصغير...
حسين شبح للشريف بألم..
🍁واجابة سؤاله في العياده اللي قعد فيها الولد في الحضانه..
"هي سمي بالله"
مها قعدت تشبحله بألم وحب...خداته وهي تقول بصوت مرتعش:بسم الله..
استقر في حضنها وبين ايديها..
ضماته وهي تشم في ريحته ودموعها ينزلوا...
《مافكرتيش شن بتسميه ابله نوريه؟!
    من اول ماعرفت انه ولد...
وشن بتسميه!؟
     ع خوي الله يرحمه...عدنان》
قعدت مها تبكي وهي ضاماته وتشم في ريحته..
راجلها:خلاص مها..هيا.
وخرت مها عنها...وحطاته في الشنطه متاعه اللي كان شادها عمه..
بعدين مشوا بيه هما الزوز مروحين لحوشهم....
🍁🍁🍁🍁
مقعمزة في دار الكوجينه تقرا في سورة البقرة عن طريق تطبيق الهاتف..
وهي تسمع في صوت زخات المطر..
وصلت في آية..
"وإذا سألك عبادي عني فإني قريب اجيب دعوة الداع إذا دعان فليستجيبوا لي وليؤمنوا بي لعلهم يرشدون"
حطت التليفون ع الطاوله...وناضت وقفت في الروشن وهي تدعي...
"اللهم صل على محمد وعلى آل محمد..كما صليت على ابراهيم وعلى آل ابراهيم انك حميد مجيد..وبارك على محمد وعلى آل محمد كما باركت ع ابراهيم وعلي آل إبراهيم في العالمين..انك حميد مجيد..
الهي...عجل باالبشرى والفرج ياربي بدل الحزن بالفرح ياارحم الراحمين ياحي ياقيوم"
🍁🍁🍁🍁
غرفه في مستشفى..
صوت جهاز القلب..مع صوت مروان وهو يقرا في القرآن..
وابوبكر مقعمز ع الكرسي ويشبح لصاحبه اللي ليه اكثر من 15يوم وهو ع هالحال..
فجأة...تحرك صبعه..
هو قعمز كويس وقعد مركز فيه يحساب روحه يتخايل..
حرك باقي صوابعه..
ابوبكر:والله حق..مروان..
مروان سكر المصحف وقال:شوف صوابعه..
حرك صوابع ايديه الزوز..
مروان ناض وطلع بش ينادي الدكاتره..
وابوبكر يشبح لصاحبه وهو يقول:تي هيا فيق ياراجل تعبتنا معاك..
تحركوا جفونه...
ابوبكر:اهاااه!!
وبدوا عيونه ينفتحوا...
ابوبكر:الله اكبر..
تسكروا تاني بعدين انفتحوا....
ابوبكر:سفيان تسمع فيا...
هو غمض عيونه بعدين فتحهم وقال بصوت يدوب طالع...
"لينا"

#كلمة_التوحيد
....يتبع.....