شكولينا

المقدمه🍫

🍫....
طرابلس...
الساعه 6:30فجرا...
في احد الاحياء السكنيه الراقيه....
في احدى منازل هذا الحي...اللي يتكون من الطابقين...
ينسمع صوت المقرئ الليبي الشهير"الدوكالي العالم"....
وتنشم ريحة القهوة المخلطه بريحة الوشق...
اللي تشم فيهم الحاجه "زبيده" وهي مقعمزة في وسط الحوش ع صلايتها وفي ايديها السبحه وتسبح....
ع جية كنتها "وجيهة"..
وقفت فم الصاله وقالت:كملتي اللاي..
الحاجه زبيده وهي تسبح هزت راسها بإيجاب..
وجيهه لفت ومشت طول للكوجينه تلاقت هي وراجلها "الشريف"
الشريف:كملت؟
هزت وجيهة راسها وهي تقول:نديرلك معاها فنجان..
الشريف وهو ماشي:ايه..
وخش للصاله وهو يقول:صباح الخير يام....
🏵🏵🏵🏵
في الكوجينه..
ووجيهة توتي في القهوة خشت عليها بنت الصغيرة"رتيل"
 بنت 14 سنه تقرا تاني اعدادي..
رتيل:صباح الخير ماميتي..
وجيهه:صباح الخير قعمزي افطري..
رتيل:قولي لبوي..
وجيهه:خودي من عدنان كان هدا وفكيني من النشافات اول امس عاطيك فلوس عاد..
وخدت الصفرة ومشت طلعت..
تأففت رتيل ومشت قعمزت ع الكرسي وهي تهز في رجلها بعصبيه...
"صباح العسل"..
شبحت لباب الكوجينه وقالت:صباح الخير..
خش عليها وهو يضحك قال:خيرك قارنيتهم ع الصبح..
رتيل:نبي فلوس..
عقد حواجبه وقال:علاش؟
رتيل؛نبي نعزم البنات اليوم ع الفطور ديما هما يعزموا فيا..
:وين بتعزميهم ان شاء الله!
رتيل بإمتعاض:في القهوة اللي في راس الشارع...في المدرسه ياعدنان في المدرسه..
ريشها من قصتها وقال:بلا طول لسان..قداش تبي..
رتيل ابتسمت ابتسامه عريضه وقالت؛اللي يطلع من خاطرك انت كريم واني نستاهل..
ضحك وحط يده في جيبه طلع تزدانه وعطاها وهو يقول؛غير تحشمي على وجهك شويه وعاوني نساوين خوتك وامك في قضية الحوش مش صغيرة راك..
خدت الفلوس وناضت وهي تقول؛اني وراي قرايه وبعدين علاش امي دارت الكناين مش بش يخدموها..
ومشت طلعت من الكوجينه..
وهو معاها بعيونه المفتوحات ع وسعهم من الدهشه...
ع خشة امه:عدنان صباح الخيرات..
عدنان :صباح الورد..بوي ناض..
وجيهه:ايه هوينا في الصاله حدا حناك..
عدنان؛كويس خل نمشي نسلم عليهم قبل لنتوكل..
وجيهه وهي مضايقه مشت لبكرج القهوة وهي تقول:تو نلحقك بالقهوة...
ماسمعتش رده..بس حست بقبله انطبعت ع كتفها..
ابتسمت...
هو بعد ما رسم ع وجهها الابتسامه مشي طلع من حداها..
ع رنة هاتفها..
مشت للدولاب فتحاته وطلعاته منه وشافت المتصل ردت طول..
وجيهه بإبتسامه:صباح الخير نوريه..
"صباح الخيرات يام شن حالكم"
وجيهه؛الحمد لله بنتي شن حالك انتي وراجلك والصغار..
"الحمد لله يام..يام مع 11ان شاء الله بنجيكم"
وجيهه:مرحبتين مرحبتين...
🏵🏵🏵🏵
في الصاله...
شاد يدها وهي تشبحله وتكلم فيه:وكان ربي يهديك وتقعد هني وليدي..
عدنان بضحكه:شوركم ماتملوش ياحناي لاانتي ولاامي..
الشريف:عندهم حق والله حتى اني مش مرتاح لتنطيرتك في الجنوب هادي..
عدنان؛هدا العسكري بوي وين مايناودني لازم نكون موجود..حتى للحرب..
زبيده؛يبعد الله علينا الحروب والنكد ماصدقنا افتكينا منها..
عدنان بضحكه:اللهم آمين...
الشريف:المهم توا رد بالك ع روحك سلم ولدي...
عدنان:الحافظ ربي بوي الحافظ ربي...
زبيده:ربي ديما حافظك وين ماتمشي وليدي..
الشريف وعدنان مع بعض قالوا:اللهم آمين...
◇◇◇◇◇
فتحت باب شقتها وطلعت..
انفتح باب الشقه اللي قدامها وطلعت منها سلفتها..
:منى صباح الخير..
منى:صباح الخير زهور..
زهور:سقدي مروان؟
منى:ايه من الفجر..
زهور:سفيان بايت في المستشفى يبيله ساعه باش يروح..
نزلوا الزوز من الدروج وهما يهدرزوا..
منى:امس كلمتني نوريه..
زهور:صبحنا ربحنا..شن تبي..
منى؛قالت بتجي اليوم وبتبات راجلها ماشي للشرق..
زهور بصوت هامس:وووك وووك وووك ووووووك..
منى:والله الليل كله واني نتقلب..
زهور:وتو بيجو الشيطانات التانيات عفاف ورنده..
منى:يارب تصيرلي حاجه اليوم..يارب نجيب..
زهور بضحكه:بتجيبي في السادس ياختشه..
منى: اي المهم نفتك من خلايقهم...
وصلوا لوطا تلاقوا هما وعدنان طالع..
عدنان لما شافهم نزل عيونه طول  وبعد عن الباب....
الزوز هربوا بعيونهم عنه وقالوا:صباح الخير..
عدنان:صباح النور..
خشوا للحوش...
قابلتهم عزوتهم...
الزوز مع بعض:صباح الخير اللاي..
وجيهه وهي مستعجله:صباح النور وطلعت...
شافت عدنان بيطلع ناداته:عدنان..
التفت لأمه...
جاته وقفت قدامه وقالت:راجي ولدي..خود..
ابتسم لما شاف المصحف خداه وقال:نحبك..وقرب باس راسها..
وجيهه:ربي يحفظك ولدي ويحميك ويردك سالم..
عدنان:ولايحرمني منك...قام شنطته وقال...هي يام السلام عليكم...
وجيهه مشت فتحتله الباب وهي تقول:وعليكم السلام في امان الله...
عدنان طلع..وامه قعدت واقفه في الباب وهي تشوفله كيف يمشي لين ادرق من قدام عيونها...تنهدت بحزن وقالت...ربي يارب احفظه واحميه ياربي...وخشت وسكرت الباب...
**************
ومن فجر عرب الغرب.....
لصباح عرب الجنوب....
ارض الناس الأصيله....ارض الكنوز المدفونه...اللؤلؤة السمراء المنسيه...
في قلب هالقطعه الغاليه....مدينه سبها...
في حي القرضه...
حوش كبير على دورين ....
في الدور التاني منه....
كان يوتي في روحه بش يمشي لعمله...ويسمع في ولده الصغير يقوله...
"نبي ننزل لعمتي لينا"...
تنهد بوه والتفت شاف للسرير..
يشوف لمرته اللي غارقه في النوم للساعه عشرة...
مازال بكري ع موعد فيقتها...ماهي تنوض الساعه واحد الظهر هي هدا وين يبدا صبحها..
شبح لولده وقال:هي تعال ...
مشاله خداه من يده...وتوجهوا لباب الشقه...طلعوا منها قاصدين الدور الأول..
~~~~
"مازلتي يابنت"
غلفت لينا البنت الصغرى لعيلة الحاج عبدالودود اخر قطعة "شوكولا" من اللي تعودت تصنعها بروحها وتبيعها وتساعد بحقها في مصرف الحوش...سمعت سؤال امها وردت تقول..
لينا بصوت عالي:معاش مازال يمي..
فجأة..
سمعت صوت ولد خوها ينادي..
"عمتي لينا"..
لينا:تعال سلومه اني هنى في الدار...
شويه وخش عليها يجري وهو يقول:عمتي صباح الخير..
لينا:صباح العسل ياسمح..
قاللها وهو يشوف للشوكولا:عطيني كعبه..
لينا خدت طرف مداته هو كيف جي بياخدها هي وخرت يدها بسرعه وقالت وعيونها ضيقات:فطرت سالم؟
هو حرك راسه يمين ويسار بالنفي..
تنهدت..بعدين ردت طرف الشوكولا لمكانه...وناضت..
خداته من يده وقالت:افطر قبل بعدين نعطيك شوكولاطه..
ومشت بيه طلعت من الدار وتوجهت للكوجينه..
لقت خوها واقف ع امه...
لينا:صباح الخير عبدالله..
عبدالله؛صباح النور..
لينا:عافيه خوي..
عبدالله:الحمدلله...
الحازة "امهم":رافعتيه تفطريه؟
لينا:اممم...ومشت خشت بولد خوها للكوجينه..
الحازة شبحت لولدها بنظرة جانبيه..
هو حاول يخفي ارتباكه لما قال:ماتبي شي يمي..
الحازة تنهدت وقالت وهي رافعه حاجبها:سلامتك ياباتي..
عبدالله:هي السلام عليكم..
ومشي بسرعه طلع..
اما الحازة خشت للكوجينه وهي تقول:تخمر للآذان الظهر وتنزل تاكل وتولي ترقى بيش تخمرللمغرب..
لينا فنصت في امها وهي تقول:يما وين الجبنه..واشرت بعيونها ع سالم..
امها عكرشت وجهها وحركت يدها من الخلف للامام بمعنى"فكيني ترا"...
لينا شبحت لولد خوها وقالت؛هي حبيبي افطر بيش نسمع عليك السورة اللي خديتها في الجامع..
سالم؛وتعطيني من الشوكلاطه..
لينا بضحكه:حاضر..
الحازة؛امتى عندك مستشفى اليوم؟
لينا:بعد الظهر يمي...
الحازة هزت راسها وقالت:يجي باتك يقلك..
لينا:باهي...هي تعال سلومه...وخدت السفرة  ومشت طلعت هي وياه..
امها لحقتها بعيونها وهي تقول:ربي يجيب نصيبك قريب يابنتي وتعدي كيف خواتك ولاتقعدي خدامه لهالعافنات....

◇◇◇◇◇◇◇◇◇◇◇◇◇◇◇◇◇◇◇
عائلة الحاج الشريف...
الشريف...وزوجته وجيهه...
وولاده التلاته..
●مروان استاذ جامعي.....
●سفيان طبيب جراحه عامه...
الزوز تزوجوا مع بعض من سبعه شهور....
سفيان زوجته زهور مازال ماسخرلهاش ربي بالحمل..
مروان زوجته منى حامل في الشهر السادس....
●عدنان اصغرهم ضابط في الجيش وللآن اعزب ومايفكرش في الزواج بسبب طبيعه خدمته....
■التلاته اولاد هادم في غيرهم اربعه بنات..
نوريه..عفاف...رنده...هادم متزوجات...
ورتيل اصغرهم....
ومع العيله ساكنه الحاجه زبيده ام الحاج الشريف عندها غيره 3اولاد بس هي فضلت تقعد عنده لان هو اكبرهم وعلاقتها بمرته زي علاقة الام ببنتها...ووتحظى بالآحترام والتقدير من الكل...
🏵🏵🏵🏵🏵
عائله الحاج عبدالودود..
عبدالودود...وزوجته الحازة...
عندهم زوز ولاد..
عبد الله..ومرته ورده..وولدهم سالم..
عبد السلام ومرته نجمه...وعندها زوز بنات..اسيل..ونهال...
ومعاهم تلاته بنات...
امال وهناء...واصغرهم لينا....
لينا القلب طيب...النيه الصافيه...الروح الحلوة....اللذيذه في كلامها واسلوبها زي الشوكولا اللي تعشقها واحترفت في صناعتها...
هادي مقدمه "شكولينا"..