عماد حياة المسلم..واكسيرها الصلاة..
واول شي يتحاسب عليه..لاخير في عمل يلهي عنها..
صلوا صلاتكم...بعدين ديروا اللي وراكم...
وقولوا لاإله إلا الله بقلب سليم طاهر تفلحوا❤
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
"وين ياصباح شن صار فيها المراة هديكا قداش بنقعد نستنى؟!"
:كان صبرتي راك حجيتي..حصلتلك معاها موعد بعد غدوة العشيه..
زهور:لو كان طالبه موعد من رئيس دوله راني قداش ليا محصلاته..
:تي هادي اهم من رئيس الدوله شن تحسابي انتي..ضحكت بعدين قالت...المهم راك تنسي لازم تجي في موعدك جيتي متأخره مش حتحصليها..
هزت زهور راسها وقالت:باهي..هي طلعي الصفرة هديكا..
:هيا هي...
ومشت قامت صفرة موالح وطلعت بيها وزهور طلعت وراها..
🏵🏵🏵🏵🏵
"بإذن الله ع مرواحة نوريه آخر الأسبوع هدا بنديروها"
رتيل بفرحه:جديات ماما؟
وجيهه بإبتسامه؛ايه بوك قال لازم نديرولها مادرنا لخوتها..
رنده:سامحيني ريتا كله مني..
رتيل:ولا يهمك رنودي المهم انتي تكوني كويسه ياألبي.
ابتسمت رنده..
شويه رن تليفونها قاماته وشافت المتصل..ناضت طول من حداهم..
وامها واختها معاها بعيونهم..
••خشت لدار اختها رتيل وسكرت الباب وردت..
رنده:شني ماتملش انت..
رد عليها بنبرة بكاء وتوسل..
"بنموت من غيرك يارنده والله بنموت"
رنده:وخيرك مافكرت قبل لدير عملتك..
"حمار حمار اني حمار...سامحيني رنودتي وولي لحوشك ورب العزة نحطك في عيوني ونقصها يدي كان انمدت عليك"
رنده:واهلك!؟
"والله من غدوة...شن من غدوة من توا..مستعد نمشي ندور ع شقه اجار نقعدوافيها لين يكمل حوشنا المهم توليلي ياعمري"
رنده قعدت ساكته..
"حبيبتي مش قادر نتنفس من غيرك..والله كان ماوليتي يارنده نشنق روحي والله"
رفعت حاجبها وهي مبتسمه بغرور وقالت:باهي انت ابعت ماليك العشيه نبي امك وخواتك يجوا ونشوفوا شن يصير..
رد عليها بلهفه وهو يقول..
"حاضر ياعمري حاضر بعد العصر يكونوا عندكم"
رنده سكرت عليه وقالت؛والله نوريك انت وياهم كان مافطستش خشومكم كلكم مانبداش اني رنده بن عامر..
ومشت فتحت الباب وطلعت من الدار..
🌺🌺🌺🌺
الساعه2:00بعد الظهر..
كان واقف بالسيارة قدام المستشفى يراجي فيها..
وعيونه ع باب المستشفى..
شاف ياسين طالع وهو يتكلم بالتليفون..
تلقائيا ارتسمت ع وجهه ملامح الامتعاض..
شويه وطلعت هي شبحلها وابتسم..
وهي وين شافت ابتسامته ابتسمت.
وصلت في السيارة فتحت الباب وركبت..
لينا:السلام عليكم..
سفيان:وعليكم السلام..نحس في جوك مليح..
لينا بضحكه:في حالة ليها وقت تتعالج عند الدكتورة من ايام المجمع طلعت حامل اليون.
شغل السيارة وتحرك وهو مبتسم..
لينا:من فرحتها قالت لراجلها يجيب بكلاوة جابت مايسد المستشفى والله وفرقت هي وراجلها..وحسبتك معايا في وحده..
سفيان عقد حواجبه وقال:اني اعفيني..حاجه مانعرفش من وين جايه ماناكلهاش..
هي ماعلقتس اكتفت بإبتسامه مجامله...وطلعت طرف البكلاوة متاعها وقعدت تاكل فيه..
وسكتت بالمرة..وهو يشوفلها بطرف عينه مرة مرة..
بعدين قال:الله غالب اني هكي الشي هدا فيا مانقدرش نسيبه..
لينا:امم..مش مشكله عادي..
سفيان:متأكده عادي...مازعلتيش..
لينا حركت راسها بالنفي وهي تاكل قالت..ههمم...
هو تنهد كذلك وقعد ساكت...
كملوا الطريق وهما ساكتين..
لين وصلوا للحوش..
اول ماخشوا..طلعت نور بنت نوريه تجري...
نزلت لينا ومشتلها...
ضمتها نور بعدين قالت؛ درت حوش بحر وياسمين طيحوه..
لينا بضحكه؛هالمشاغبين هادم..
وخدت نور من يدها وخشت هي وياها داخل وهو بعيونه معاها..
مضايق من معاملتها ليه...تكلم فيه عادي بس مش زي قبل..
معاش تبصر معاه بصارتها المستفزة..
ولاتهدرز عليه بحماس زي قبل..
وكل ماله يزيد يحقد ع رنده لأن حاسها هي السبب..
•••داخل..
في الصاله..
لينا وهي واقفه في الممر:خلاص بإذن الله نبدا فيها من بكرا عطلتي..
وجيهه:ديري 40 طرف بنديروها للعيله وخلاص..
لينا؛ان شاء الله..ترا رتوله جيبي ياسمينه..
ناضت رتيل بياسمين ومشت طلعت مع لينا اللي كانت شاده بحر..
ومشوا طلعوا الزوز..
وسفيان خش جاب الحباس بش يركبه فوق...
🌺في الشقه..
في الصاله..
حطوا الصغار وقعدوا يهدرزوا..
رتيل:اليوم كلمتني الهام وقالت بتجي وبتجيب معاها هديه من مبشر.
لينا:وانتي شن قتيلها..
رتيل:قلت لا لكن هي سكرت راسها..
لينا؛يادي السي مبشر هدى اللي مش حيرتاح لين يديرلك خارقه مع سفيان..
"سمعت اسمي"
انتفضوا الزوز من الخلعه..
سفيان وهو خاش بالحباس:شن تقولوا عليا..
رتيل وهي تألف في كذبه وتقول فيها وقتي:حفلة نجاحي بعد غدوة وقلتلها تقولك عليك انت طورطه..
سفيان خش للدار..
ولينا ورتيل يشبحوا لبعض بخوف.
ع طلعته وهو يقول:وشن شكلها متاع النجاح..
رتيل:تشبه اللي درتوها لرنده في حفلة تخرجها..
حك حاجبه وقال:تمام..
رتيل بضحكه:ياوخيتي سلمه خوي..والله انتي يالينا محصله دعوة في يوم عرفه..
لينا ضحكت..
سفيان:ع كلامك هدا..فوق اللي تبيه مني هديه ماصارتش..
رتيل بضحكه :ياربي تحمسست..!
سفيان:باهي بري عيشي حماسك لوطا..
رتيل ابتسمت وقالت:حاضر..
ومشت بسرعه طلعت من الشقه وسكرت الباب..
ولينا مشت للدار..
وهو تنهد من قلبه..بعدين مشي لداره..
🏵🏵🏵🏵🏵
الساعه 5:30عصرا..
نزلت لينا بالصغار بعد صلاة العصر..
برغم المشكله اللي صارت بينها وبين رنده ماقطعتش الحوش
وكله ع خاطر سفيان برغم انه ماطلبش منها شي..
مشت خشت من جهة الكوجينه لما شافت كندرة مروان قدام الباب الرئيسي..
وهي ماشيه شبحت للشجر لاحظت ان وراقها بدت تصفر واطيح..خلاص فصل الخريف خش..
وصلت في الكوجينه وخشت وهي تقول..
لينا؛السلام عليكم...
منى التفتتلها وهي واقفه ع الحوض:وعليكم السلام..
لينا:خشيت من هنى لإني شفت كندرة مروان فم الباب.
منى:ايه توا كيف قمت من قدامه سفرة الغدي..
لينا:طلع..
منى:ايه طلع..
لينا:باهي خل نعدي نحطهم ونجيك..
منى هزت راسها بإيجاب..
ولينا مشت طلعت من حداها..
لحظات وولت لينا خشت وهي تقول:في حد جاي توا؟
منى:مانعرفش...علاش!؟
لينا:نسمع في الباب الخارجي يدق..
منى بإستغراب:ماقالوش في حد بيجي اليوم..
"منى"..
منى مسحت ايديها في المريول ومشت طلعت بسرعه لراجلها..
ولينا واقفه تراجي فيها..
شويه شافت منى ماشيه لدار التقعميز..
لحظات..وجت جايه ومعاها وجيهه..
وجيهه كملت لبرا..ومنى خشت للكوجينه..
منى:عيت راجل رنده جو...
لينا:اها..
منى:مايملوش..
لينا:ع خاطر هالبنيه المسكينه..
منى:ع اللي داره مستحيل توليله لو شن يدير..
لينا تنهدت وقالت:ربي يصلح الحال..
منى كانت تبي لينا تسألها ع السبب بش تحكيلها لأنها تبي تحكي لحد بطق..مش قادره تتحمل ادس اكثر من هكي..
لكن لينا ضيعت عليها الفرصه..
لينا:ايه حقه عندي معاك موضوع..
منى:موضوع شنو غير المحل؟
لينا بضحكه:موضوع خير حتى هو..
قعمزي نحكيلك..
ع خشة وجيهه:ديروا قهوة..
منى:حاضر اللاي..
مشت وجيهه..
ولينا قالت :قعمزي اني تو نديرها ونحكيلك..
منى؛باهي هيا احكي فضولي بيقتلني..
لينا ضحكت ومشت بدير القهوة..
••في الصاله..
كانوا اهل محمد مقعمزين..
امه وتلاته من خواته ووحده من نساوين خوته..
ومعاهم الحاجه زبيده ووجيهه..
شويه وطلعت رنده وهي بكامل اناقتها..
قالت:السلام عليكم...ومشت قعمزت حدا امها..
ام محمد:كيف حالك بنتي..
رنده:في خيار خيري والحمد لله..
وحده من حمواتها:وين ميرال بوها مستاحش يشوفها تبي ناخدلها صورة.
رنده:وانتي جايه بش تاخدي صور لميرال..
شبحوا لبعض..
ووجيهه قالت:ياريت تخشوا في الموضوع..
اخته بلعتها ومن داخل تسحن ع رنده..
ام محمد:خشينا فيه من اول خشينا لحوشكم ياوجيهه وقلنا ربي يلم الشمل..ويابنتي راهو محمد نادم وصايره فيه حاله يبكي بكي ع خاطرك..ومستاحش بنته ع الآخر الله كل يوم يقول نحلم بيهم يام كل ليله..
وجيهه:ماهو فكر قبل ليدير عملته..
:بني آدم خطاء ولكل راجل في نزوة يتوب عليها ويندم بعدين وهو بيقطعه الندم..
رنده؛وانتي..
شبحولها..
:اني شني؟!
رنده برفعة حاجبها وقالت:مش نادمه ع انك دخلتي بنت خالك بيني وبين خوك..
امها شبحتلها..
هي بتنصع الصدمه:اني؟!
رنده:ايه انتي ومافيش غيرك كله تخطيطك انتي..وع فكرة صور بنت خالك قاعدات وكان ماجيتش بنت ناس ونخاف راهو فضحت بيها في كل تركينه..
ام محمد بخوف:لا بنيتي يستر الله عليك استري عليها..
رنده:قلت...جيت بنت ناس ونخاف ربي..
وجيهه:مش عارفه شن هالوقت اللي ولينا فيه وحده تخلي خوها بخش الحرام عادي المهم تخرب ع مرت خوها..
وام محمد تشبح لبنتها اللي كان لونها مخطوف..
السلفه قالت:توا خلاص اللي صار صاى فكري في بنتك يارنده..
رنده:معليشي لوسمحتي ماتدخليش الموضوع بيني وبينهم..
شبحت السلفه لعزوزتها...
ام محمد:معليشي..شبحت لرنده وقالت...كان عندك شروط قوليهم اللي تبيه نديروه..
رنده:نبيه نسكن بعيد عليكم ومعاش نبي شي يربطني بيكم ونبي تخلونا في حالنا وبس..لأن محمد ماتغيرش معاي الا بعد جينا سكننا فوقكم..
ام محمد؛حاضر اللي تبيه حني فيه.
رنده:وفوق هكي راهو كلامي هدا مش الأخير...مازال قاعده نفكر..
هما قعدوا يشبحوا لأمهم..
وام محمد قالت:ان شاء الله خير..وزيدي فكري فهالبنيه ماتحرميهاش من وبيها..
رنده؛تو نشوف..
وناضت ومشت طلعت من حداهم وهي تمشي بكبر..
ع جية منى بصفرة القهوة..
جت بتمدلهم...
هما ناضوا..
وجيهه وهي رافعه حاجبها:قعمزوا اشربواقهوتكم..
ام محمد؛اعتبرينا شربناها..
ناضت وجيهه وقالت:ع راحتكم..
هما مشوا طلعوا...وهي تسقد فيهم..
ومنى ولت للكوجينه..
اما زبيده اللي كانت متفرجه صامته طول القعده..
بأسف قالت..لاحول ولاقوة الا بالله..
••في الكوجينه..
منى:حتى القهوة مابوش يشربوها..
لينا:معناها جية ع الفاضي كيف اللي قبلها..
"رنده"
منى:مروان..
"رنده تعالي"
لينا:سفيان...
شويه شافوا رنده فايته من قدام الكوجينه..
وصلت فيهم وقالت :نعم..
سفيان وهو عاقد حواجبه؛رسينا ع بر...تبي تطلقي ولا لا؟!
هي بلعت ريقها وقعدت ساكته..
مروان بنرفزة:تكلمي..
رنده؛لا..
سفيان:شن اللي خلاك وليتي في كلامك..
رنده:تبوا الناس يدووا علينا ويقولوا ياناري ولتلهم بنتهم مطلقه!
سفيان:شن التفكير الاعوج هدا..مالك بأمهم الناس انتي!؟
مروان:حتى كان انتي تبي مافي حد هني يرضالك توليله..
رنده:اني صاحبة الشان واللي بس اللي يحقلي نحكم في مصيري..نبي بنتي تعيش معاي ومع بوها ومانكونش ناقصه عن صغاركم..
مروان:وترجعي تعيشي مع واحد مسخ زي هدا!؟
سفيان:هدي يامروان..
مروان بإنفعال:نهدي شني ياراجل قولي تي اني لليوم بس لقيتلك محاميه ممتازة اطلقك منه وتجيبلك حقك من عيونه الوسخ هدا..
رنده بضيق:خلاص مروان الموضوع منتهي..
ولفت ومشت ..
مروان وهو يشوفلها برفعة حواجب قال بصوت عالي:انتي هكي!؟ مالا والله يارنده لو شن يصير فيك يارنده معاد نعرفك..
ومشي طلع وهو معصب..
وسفيان اللي كان متحكم في اعصابه بقوة شاف انه من الأفضل عدم فرض رأيه ع رنده..وقال في عقله ان هي ام وتفكر في مصلحة بنتها..ولو مش حاسه ان راجلها ممكن يتعدل معاها ماكانتش رضت ترجعله حتى لو ع خاطر البنت..
التفت بيمشي شاف امه واقفه..
وجيهه؛شن رايك انت؟!
سفيان تنهد وقال:بيناتهم بنت يام..ع خاطرها هي بس.
وجيهه :هي شرطت تسكن بعيد عليهم قالت هو ماتغيرش عليها الا بعد ماسكنوا معاهم..هدا علاش هي كانت تبي تقعد في الشقة اللي في ******
اضايق سفيان لما اذكر ان هو اللي عارض هالشي..وحس ان هو السبب في اللي وصلتله اكثر..
سفيان زفر بضيق بعدين قال:استغفر الله واتوب اليه...ان شاء الله خير يام..ان شاء الله..
وجيهه:ان شاء الله..
هو مشي طلع...
وهي بعد تبعاته بعيونها لين طلع...مشت خشت داخل...
🌺🌺🌺🌺
الساعه 10:15ليلا..
لينا:نبي الرد بسرعه لان ليه فترة يرجى هو وهله هكي قالتلي الدكتورة اماني..
منى:ان شاء الله يجيك الرد خلال هاليومين...
لينا:تمام..تصبحي ع خير..
منى:قدامك كل خير
وكل وحده فيهم فتحت باب شقتها وخشت..
🌺لينا مشت طول لدارها بتشوف الصغار كان رقدوا لأن سفيان ركبهم قبل ماهي تركب..
وين خشت..مقعمز حداهم حاط رجل ع رجل وشاد كتاب ويقرا..
لينا:السلام عليكم..
تنهد ونزل الكتاب وقال:وعليكم السلام..
لينا مشت قعمزت ع السرير وقالت:ان شاء الله غير ماتعبوك..
عقد حواجبه وقال:لينا خيرك موليه هكي معاي..
لينا قلبها بدي يدق بسرعه بس بينت انها عاديه وهي تقول:خيرني كيف موليه معاك..عادي كيف قبل..
سفيان:لا مش زي قبل..شفتي مني شي ضايقك..جرحتك بتصرف ولاكلمة بدون مانقصد!؟ كانك ع التصرف اللي بدر مني اليوم في السيارة نعتذرلك عنه بدل المرة الف مرة...لكن انتي ليك مده متغيره معاي من يوم عركتك مع رنده..شن قالتلك هي!؟
لينا تنهدت بضيق وقالت:نسألك سؤال..
سفيان:اسألي..
لينا:تو انت بعد اللي صار هدى كله..لو رجع بيك الوقت للورا..
كنت رضيت نكون زوجتك؟!
ابتسم بحب وقال:واني فرحان وممنون..
لينا بضيق وخوف:يعني..لو مش حيجي يوم تنقلب فيه عليا وتكرهني وتقول شن درت في عمري..!؟
سفيان؛لينا اللي قدامك قريب يخش الاربعين..يعني سن الرشد وهدا عرف الحب وعاشه بحذافيره..سؤال زي هادي غلط ينطرح عليه
ارتسمت ع وجه ملامح ابتسامه خجوله مع ملامح الضيق اللي كانت عليه..
سفيان تنهد وقال؛معاش تسمعي لحد يالينا..وخلي عندك فيا ثقه ارجوك..ظني بيا خير وحتلقيتي عند حسن الظن..
لينا بإبتسامه:ان شاء الله..
سفيان:ااخ منك وخلاص..خشيتي حياتي قلبتيها فوقي لوطي ع قولت مني...لاعاد ليلي ليل ولانهاري نهار وعقلي كان سهي عن التفكير شويه..نحسة ولى مش طبيعي..
ابتسمت بخجل وهي منزله عيونها لوطا..
سفيان:ايه هدا اللي عندك انتي..توا بس تولي بكوشه..
ضحكت وشبحتله بعدين قالت؛تشرب قهوة؟
سفيان:توا!؟
لينا:اها توا..بكرا ماعندي شي..عطلة..وكان انت ماتبي تسهر نشربها بروحي وخلاص..
سفيان تنهد وقال:ع اساس اني ولى يعرفني نوم بكري في جرايرك ياقهوة انتي..
ضحكت لينا وقالت:باهي عدي اطلع توا شويه ونطلع نديرها..
سفيان شبحلها بطرف عينه من ورا النظارات الطبيه وقال:طالع من غير لز..
وناض مشي طلع من الدار..وهي تضحك مشت سكرت الباب..
بس بدون ماتلف المفتاح..
وهو قعد واقف يشبح للباب هلبه ويراجي امتى تلف المفتاح..
بس مالفتاش..
ارتسمت ع وجهه ابتسامة فرح...بعدين خدي نفس..
ومسح ع شعره للخلف...ومشي قعمز في الصاله..
🌺اما هي..
لبست بيجامه كم صيفيه..
ولمت شعرها كعكه فوق..ونزلت منه خصلات مموجه مبعثرة حوالين وجهها..
بعدين مشت طلعت من الدار بطريقها للكوجينه..
وهو يتبع فيها بعيونه لين خشت الكوجينه..
ناض وحط الكتاب ع الطاوله..
ومشي بإتجاه رخامه البار..
قعمز وراها ع الكرسي..وقعد يتفرج عليها..
وهي دور في الكوجينه وتوتي في القهوة لين حطتها ع النار..
هي ماكانتش حاسه انه موجود...
كانت وهي واقفه ع القهوة تذكر في كلامه ليها..
وغلبتها ابتسامه حلوة وهي تذكر فيه..
وهدا كله وهو يتفرج عليها وابتسامته ع وجهه وكأنه عارف هي في شن تفكر..
هي تنهدت بعدين شبحت ايسارها شافته ضحكت وقالت:قداش حركتك خفيفه ماتخلي حد يحس بيك..
سفيان؛خفيف الحركه وقوي الحضور..
لينا؛ياحبك لروحك..
سفيان؛حبيت غيرها اكثر منها..
غيرت عيونها عنه وهي تضحك بخجل...
وهو يشوفلها بنفس الابتسامه..
هي ركزت ع القهوة طابت..طفت عليها..بعدين مشت صبتها في الفناجين..
وخدتهم الزوز ومشتله بيهم..
حطت متاعه قدامه..
وهي حطت متاعها قدامها..وقعمزت ع الكرسي مقابلاته..
خدي الفنجان وشرب منه وهو يشوفلها وهي رشفت من فنجانها..
هو تنهد بعد شرب وقال؛عليا تأثيرك زي تأثير القهوة ع الناس..
في بس اللي مجرد يشم ريحتها راسه يتكيف ونفسيته ترتاح..وهادي انتي..
لينا حطت خصله شعرها ورا وذنها وهي تقول بخجل:خلاص عاد..
سفيان:خلاص في عينك..حتى تعبير عن مشاعري ماتبنيش نعبر..هلبه عليا ياسمحه راهو!
وهي تضحك ومن الخجل قريب تتبخر...
سفيان:شني هدا...وخدي فنجان القهوة وقعد يشرب منه..
وهي هدت ضحك بعدين رشفت من فنجانه وشبحتله وقالت:استغربت فيك بكري كيف تعاملت بهدوء مع رنده عكس خوك..
سفيان:امم..هو اني صح مش متقبل قرارها..لكن قعد تفكيري كله في بنتها...واكيد مروان فكر في بنت اخته لكن بطريقه تانيه..مايبيهاش تعيش في جو كله مشاكل..شد ذقنه بيده بعدين قال..شوفي لينا اني نأملك ع اي سر بدون مانفكر انه ممكن يطلع منك..نبي نقولك ع اللي صار بالزبط وانتي احكمي..
قعد يحكي سفيان للينا ع اسباب الخلاف بين رنده وراجلها
ولينا تسمع وتفكر ...
سفيان؛يعني مروان عنده حق في موقفه من رنده بعد ماتراجعت عن الطلاق..
لينا؛لاماعنده اي حق كان هكي..
هو استغرب..
لينا؛بصراحه استفزني واجد موقفه..مايرضاش لأخته اللي يرضاه لمرته..!
سفيان عقد حواجبه وقال:شن قصدك تكلمي بوضوح..
لينا غمضت عيونها وخدت نفس بعدين فتحتهم وقالت:مش عارفه كيف بنقولك..بس والله لولا انه موقفه استفزني ماطلعت مني حاجه لحد..
سفيان بنفاد صبر:تي باهي تكلمي..
لينا:ايام كنت نخدم في المجمع مروان كان يخون في مرته..
سفيان انصدم..
لينا؛وعرفني عرفت وحاول يبررلي خوف منه نعاود لمرته..وانا والله مافكرت حتى مجرد تفكير ان نقوللها شي..ولانقدر نقوللها اصلا..
بس خفت لو مروان.يتمادى ويجي يوم يشوفه غيري ومش حيسكت كيف ماانا سكتت حاولت نحط روحي مكان مروان ونشوف هي في شن مقصرة من باب الأنصاف...وحاولت نساعدها والحمد لله..رجع كل شي كيف قبل واحسن..
سفيان كان يسمع ويذكر في اليوم اللي تكلم فيه مروان عن خدمة لينا وكيف خلاه يخطط لتركها للخدمه وفعلا خلوها تسيب..ااضايق هلبه من نفسه ومن خوه مروان..
لينا؛الشاهد...انكم لو سمعتوا من الطرفين متأكده انكم حتغيروا حكمكم علي الموضوع كله..يعني وبدون ماتزعل مني..اختك معروفه متكبرة واجد ومنعجبه بنفسها ولسانها كيف الموس..مرات تكون مستفزاته بالكلام محسساته بالنقص بسبب تغير الوضع المادي بحكم انه قاعد يبني..يعني الراجل مضغوط وهي تزيد وفهالحاله متوقع منه كل شي..انا راهو هنى مانبررله..اللي داره مايتبرر بس نحاول نكون منصفه...
سفيان:يعني الغلط اساسا من رنده هكي تبي تقولي..
لينا:لا والله ماتفهم كلامي هكي ع اني متحامله عليها...اني قاعده نشوف في الصورة كامله بس..كيف مادرت مع مروان..
وقتلك انا لانبرر الضرب ولاالخيانه..الراجل حق مايخونش مرته حتى لو كان مايحبها..ولو ع الضرب فانت مرة جيت بتضربني لولا وجود باتك وامك لو كنت ناسي..والسبب انا.
انا ع عصبيتك استفزيتك..
تنهد وشبح لفنجان القهوة وهو يهز في راسه موافقا ليها ع كلامها..
لينا:توا مانقولوا كان ربي يهدي النفوس ويجيب مافيه الخير..
سفيان:آمين..
بعدين شبحلها وابتسم بحب وقال:كل مالك تزيدي تاخديني مني اكثر واكثر...ع صغر سنك..تفكيرك عميق...عقلك كبير..
واعيه وناضجه...انضج من مراة في عمر الاربعين...
لينا نزلت عيونها لفنجان القهوة وهي مبتسمه بخجل..
وقلبها يرفرف في وسط ضلوعها..
هو حب يقدم خطوه تانيه اتجاهها..
حط يده ع يدها وشدها...
هي شبحت ليدها بعدين شبحت لعيونه اللي كانوا يشبحولها من ورا النظارات الطبيه..
كانت نظراتهم كلها حب...شافت اعمق من النظره..شافت روحها فيهم.....
وهو فعلا ولى مايشوف في شي غيرها هي من عشقه ليها..
وصل لأقصى مراحل الحب..
كان يقوللها من نظراته انه يبي يكون زوجها..وشريك حياتها ورفيق دربها..مايبيش يكون نصها التاني ولاجزء منها يبي يكون كلها...زي ماهي ولت كله...
اللي كان يحس بيه اترجم ع لسانه في بيت شعر يقول...
قل لي ياكل كلي....
من لي؟...إن لم تكن نوري وظلي...
عيونها تعبوا دموع من قوة الشعور اللي كانت تحس بيه...
عمرها ماحست بهالمشاعر القويه الا معاه هو...عمرها ماحست ان قلبها رجف لحد زي ماقاعد يرجف توا..
وآاه من رجفة القلب...هي اكبر دليل ع الحب..
ع تأثير المحبوب القوي ع قلب محبه...
بس مع هذا كله كانوا الخوف و التوتر مسيطرين عليها..
لهدا وين سمعت صوت ولدها يبكي سحبت يدها وناضت بسرعه مشت للدار..
هو شد ع قبضة يده...وغمض عيونه وابتسم بأسف..
بعدين تنهد..
🌺اما هي..
خشت للدار ويدها ع قلبها..
جت لولدها حطتله الرضاعه في فمه شدها وغمض عيونه وقعد يرضع..
وهي مازال تحت تأثير الموقف..
هالشي خلاها تمشي لباب الدار تسكره...وتلف المفتاح..
هو لما سمع لفة المفتاح..
حط يده ع جبهته وقعد يفرك فيها وهو مضايق ع الآخر..
بعدين شبح الفناجين..نزل يده..
وناض خداهم الزوز...وخش داخل...غسلهم بعدين طلع من الكوجينه متوجهه لداره..
☘☘☘☘☘
بعد يوم...
الساعه 3:30الظهر..
خشت للدار وسكرتها عليها...
ومشت للدولاب فتحاته وخدت الصرة متاعها من فوق..
نزلتها وفتحتها وبدت ادور ع الطاقيه...انصدمت لما مالقتهاش حاولت ادور من جديد..مالقتش أي اثر..
وقفت بحث..وهي تفكر ومصدومه..
《 اليوم بنضم الدواليت ونطلع الدبش الزايد..
زهور بإستعجال؛ديري اللي يعجبك..》
غمضت عيونها بشده..وشدت بإيديها ع الدبش بغضب شديد...
ومن شدة الغيظ والغضب عيطت عيطه مكتوبه وخبطت بإيديها بقوة ع الحوايج...
قعدت تتنفس بسرعه من الغضب بعدين فتحت عيونها وقالت:اكيد في الف طريقه غير هالطريقه..
طلعت تليفونها من جيب التوته وجت بتتصل بصباح...اتصلت بيها صباح..
فتحت الخط وردت؛ايوه صباح.
"هاه زهور..ووك عليا ياوخيتي ربي سترنا"
زهور:خيرك!؟
"اليوم طبوا هديكا المراة ومعاها زباين كانوا عندها افتحي الفيس وشوفي الخبر".
زهور بغضب:الله يلعن هالحظ المسخ..
وسكرت عليها وفتحت الفيس..
ولقت الخبر قدامها منتشر في الصفحات والقروبات.
حطت سبابتها في فمها وعضت عليه بغيظ...
🍁فسيكفيكهم الله🍁
🌺🌺🌺🌺🌺🌺
مع الساعه تمانيه ونص مساءا..
كان حوش عيلة الشريف معبي بالاقارب..
وكلهم جايين يحضروا حفلة نجاح رتيل..
وهداكا اليوم كانت نوريه معاهم...
هيجوا في الحفله وكانها حفله بيان او عرس..
مظاهر البهجه كلها فيها...والكل مشارك..
بالذات نوريه اللي ماعندهاش روح مع هالأجواء..
لينا وهي واقفه تصفق وتتفرج عليهم وتضحك..جتها رفيده وقالت...
رفيده:خالو سفيان قالك تعالي..
لينا:شنو...وطبست راسها لرفيده..
رفيده:خالو قالك تعالي..
شبحتلها لينا وقالت:وينه..
رفيده؛في الجنان..
لينا:باهي..
ومشت خدت وشاح وحطاته ع راسها..
كانت لابسه جامبسوت مستور لونه كركمي...
مشت طلعتله لقاته واقف حدا الكوجينه..
لينا:سافيوش..
التفت وجاها:تو نبي هي حفله نجاح مشغلين فيها حتى راجلي علاش!؟
لينا قعدت تضحك بعدين قال:نجاح ع جميع الاصعده ماهو..
ضحك وقال:باهي خودي هادي عطيها لرتيل وقوليلها قدام الكل من سفيان..
لينا ابتسمت وقالت:حلوة حركه..تمام..
"لينا"
لينا دفاته وقالت:برا برا..
وخشت وسكرت الباب..
اساور:وين كنتي؟!
لينا:راجلي ناداني طلعتله..
اساور ابتسمت بتهكم وقالت:اياااه تطورات..
لينا؛شن قصدك!
اساور:شي سلامتك..بش قبل بنسألك كان فضل من الشكلاطه..
لينا:لا ع العدد حبيبتي مافضل شي..
اساور:خسارة..تنهدت بعدين قالت..باهي هي تعالي..
لينا:عدي انتي اني تو نجي.
اساور بتهكم:اممباه..ومشت طلعت ..
لينا بهمس:مثقل دمك..
فجاة سمعت الباب طق..
التفتت فتحاته لقاته واقف قدامه وهو يضحك..
لينا:شن يضحك فيك!؟
سفيان شد ضحكت وحركت راسه بالنفي وهو يرفع في حواجبه وينزل...بمعنى شي..
لينا وهي تحاول تخفي ارتباكها قالت:تبي حاجه تانيه..
سفيان؛قبل بنطلب شكلاطه لكن خسارة قلتي تمت..
لينا ضحكت وقالت:لا ماتمت مازال فيه..وطلعت لسانها وغمزت وهي تضحك..بعدين خشت داخل..
شويه وولتله بعلبه وقالت:كول لين تطلع من عيونك..
خداها وقال بضحكه:اما انتي يا #شكولينا..
فجأة سمعوهم يغنوا مع بعض..
"حتى راجلي يدلل فيا...حتى راجلي يخاف عليا"
سفيان :بري غني معاهم حتى انتي..حتى راجلي..عند وذن اساور بالذات..
لينا بضحكه:بلاش صماته وعدي..
ضحك وجي بيمشي التفتلها وغنى..
حتى راجلي..
ضحكت وقالت:صامت..وسكرت الباب...
وهو قعد يضحك بعدين مشي كمل طريقه...
🏵🏵🏵🏵🏵
الساعه 1:30ليلا..
ملتمان في دار التقعميز بعد مافرشوا ليهم ولصغارهم بش يرقدوا..
رنده؛انتي ريتيهم اليوم كيف يقصقصوا مادا بيهم يتشمتوا بالذات بنات نفيسه وبنات هنيه..
نوريه؛حسيتهم سامعين شي واصلهم شي..
عفاف:هو مش حيدرق مادام واحد من عمامك حضر جية بوه لبوي..
رنده تنهدت بغضب..
نوريه؛وانتي شن قررتي؟
رنده؛مازال بنشحطه اسبوع تاني لما نشعفه..
نوريه:بالذات ع مدان اليد يارنده
رنده:كان مدللني احلا لما كنا بروحنا من لما خلطنا ع ماليه الغبر وهو متغير..
عفاف؛قد مايجي يجي من مالي الراجل عطيهم محماط كان نندري هكي راني خديت واحد مقطوع من شجره..
رنده:صدقتي..
نوريه:هادي والله الا العين وجت فيكم..حني ماناش هكي بش طيحوا في الشكالات المقلبه..
رنده:حظوظ يانوريه..وان شاء الله ديما حظك خير من حظنا...
عفاف:ايه حقه شن صار معاك غادي..
نوريه:طلع كله من تحت حبوب منع الحمل اللي خديتهم بعد جبت نور..
رنده؛قعدتي سنتين تاخدي فيهم..
نوريه:ايه ..المهم عطوني دوا نمشي عليه شهر بعدين نولي مراجعه..
عفاف:يجعل فيه الشقي ان شاء الله ويرزقك نويره..
نوريه ورنده قالوا:آمين..
🍁🍁🍁
في نفس الحوش...في دار تانيه..
الشريف:اني هالمرة مش واقف في وجهها حتى بعد اللي عرفته بنتك مش هوينه ياوجيهه..
وجيهه:جاك هو ولا؟
الشريف:ايه جاني وتعتذر وقريب قتل روحه ع مارضيت نسمعه والحق الراجل في حاجات فيها انظلم من بنتك..واني نعرف رنده واسلوبها وطول لسانها وجيهه:باهي كان لاقدر عاود صنعته وضربها ولا دارلها حاجه.
الشريف:مايقدرش..قدمت فيه بلاغ ووقعته ع تعهد..
انصدمت وجيهه..
الشريف:بش يفكر مرة تانيه مليون مرة قبل يمد يده عليها..
وجيهه:حسك مسحت ع كبدي..
ضحك الشريف...
🏵🏵🏵🏵🏵
وفي الدور الثاني..
في شقة مروان..
منى:ايه اسمه ياسين مكلم الدكتور اللي تخدم معاها لينا وقاللها تفتح معانا الموضوع حني ماليا وهند ويشوف كان يرضوا يعطوا بنتهم لأسمر..
مروان:ايه عرفته الدكتور ياسين الحق ياربي في هالكم شهر اللي خدم فيهم معانا ماريتش منه العيب راجل محترم وطبيب مجتهد...
منى:باهي زيد اسأل عنه مروان..
مروان:شن راي هند؟
منى:حسيتها متقبله الموضوع وحتى ماليا ماعندهمش مشكله..
مروان:تمام تو نزيد نسأل عنه ونردلك خبر...
🌺🌺🌺🌺🌺
وفي الشقه اللي مقابلتهم...
كان حد فيهم في داره..
هي تقرا في وردها...وهو يقرا في ورده..
لعند ما كملوا..وبعتوا لبعض رسايل..
(تميت الحزب 36) (كملت الحزب 36)
هي ابتسمت وكتبت رساله وبعتتله..
(تصبح ع خير)
شويه وجاها الرد..
(أعيذ عينك ان تغفى على وجع
او ان تظل وقد نام الورى آرقه..
اعيد روحك من هم ومن حزن..
او تكون مثار العطف والشفقه)
ابتسمت وحطت التليفون ع الكامدينو وغمضت عيونها وهي مبتسمه وتقرا في الأذكار...
☘☘☘☘☘
يوم السبت في الليل..
مقعمزات حدا بعض لاهيات في تليفوناتهم..
شويه وحده منهم قالت..
ايناس:معاكم دكتور اسمه ياسين سبهاوي.
اميره:ايه خيره..
ع خشة زهور للدار بدون ماينتبهولها.
ايناس:هند اخت منى اللي كانت سلفة زهور..خطبها.
اميرة:توقعت في بيناتهم استلطاف.
ايناس؛قالت لينا خشت واسطه في الموضوع كان يخدم معاها في سبها..
اميرة شبحت لإيناس شويه وقالت:مش هكي بس..زمان كان يبيها..
ايناس بدهشه:الله!
اميرة:سمعتها منه من فمه لودني..
"قصدك كانوا علاقه مع بعض!؟"
اميرة انخلعت وين شافت زهور وقالت:لا والله لا هو قال هي رفضاته..
زهور وهي مبتسمه بمفاجأة:باهي خيره وجهك ولى اصفر هكي!؟
اميرة:بالله يازهور فكينا من المشاكل مادخلك بحد..
زهور بضحكه؛وفي شن يعنوني يعني لا هو ولاهي اني توا مخطوبه وبنتزوج وكل حد راح ع حاله..
اميره:ايوه هو هدا الصح زوزو..
زهور ضحكت بعدين قالت:هي نوضوا تعشوا..
ناضوا الزوز ومشوا طلعوا من الدار مع بعض...
🌺🌺🌺🌺
تاني يوم...
في الطريق..
سفيان:مادام هي قالت بنجي لازم تستقبليها..
لينا:اكيد في النهايه هدى بيت خوها .
سفيان:مافيش حاجه اسمها حوش خوها..قولي حوشنا.
لينا ابتسمت وقالت:لا مش حوشنا..بيييتنا..
ضحك..ودرس قدام المستشفى وقال:عينك من روحك يا #شكولينتي
هي هربت بعيونها الخجوله عنه..ونزلت من السيارة طول وهي مبتسمت بخجل...
وهو قعد معاها بعيونه لين خشت..
شويه شاف ياسين خاش وراها..
تعكرت ابتسامته بعدين شغل السيارة وتحرك للجامعه..
☘وعدت الساعات..
لعند ماجت الساعه 11ونص..
هو كان.طالع من مكتبه..
جاته رساله ع تليفونه..ابتسم ع باله من لينا..
قام تليفونها وفتحها..
(يامقرن ياللي راقد ع ودانك وماتندريش ع اللي دير فيه مرتك مع حبها القديم في المستشفى دكتور السبهاوي واسمه ياسين)
هو حس بالدم جمد في عروقه..
معاش قدر يدير اي ردة فعل..
شويه وهو يرعش اتصل بالرقم اللي بعد الرساله عطاه مقفل..
قعد يشبح في الفراغ وهو يذكر في الموقف اللي جمعهم في المستشفى..
كيف هو يمدح فيها..وكيف هي ارتبكت وتوترت.
وبدت تتوالي بين عيونه المشاهد والحوارات..
بالذات وين يكلم فيها ع خدمة المحل وهي تماطل فيه..
كيف لما يحاول يقرب منها تصده وتبعده..
وع قد مادار معاها وقاللها من كلام حلو حتى بكلمه حب عاديه مابادلتاش..
وبدي الشيطان يلعب في لعبته وخلا عقل سفيان يغرق في وحل الافكار الشيطانيه...
معاش قدر يتحمل..
طول مشي بيطلع من الجامعه وهو كتله من الغضب المشتعله...
🌺🌺🌺🌺🌺
في المستشفى..
لينا وهي تتمشى مع الدكتورة اماني.
اماني:لا والله الحمد لله حاليا مستقرة وحياتي حلوة ومتفاهمين اني وياه..الحق غالبا السكنه فوق حوش اهل الراجل ماتجيش الا بالمشاكل وتوصل للفراق..
لينا: غالبا مش ديما...ع العموم ربي يهدي سر الجميع ان شاء الله...
اماني:ان شاء الله..
ع جية ياسين..
وقفهم وقال:السلام عليكم..
الزوز ردوا عليه السلام...
💎فهاللحظه..
درس سفيان قدام المستشفى ونزل..
ومشي خش ..
..........
ياسين:والله جيت ناخد الرد النهائي عييت وانا نرجى..
اماني بضحكه:عندك حق..
لينا بإبتسامه جديه:اسفه والله الظروف..
قطع عليها صوت رنين هاتف الدكتورة اماني...
شافت المتصل وقالت:عن اذنكم...ولفت ومشت بعدت عليهم..
ياسين:اذنك معاك...ايه كملي..
لينا:ايه..الظروف اخرت الرد ...اسفه..
ياسين:مش مشكله..المهم الرد اليوم لازم ناخده..
لينا بإبتسامه جديه:البنت وعيلتها ماعندهمش مانع....
ياسين ابتسم براحه وقال:الحمد لله..
•••فهاللحظه...
وصل سفيان..
وشافهم...من صدمته قلب قريب وقف..
قعد يشبحلهم بعيونه اللي غارقات بالدموع وهو متمني لو ربي ياخد روحه حالا...
......
لينا:ع بركة الله..
ياسين :ان شاء الله بارك الله فيك اختي لينا..
لينا:فيك بارك الله..وغيرت عيونها عنه..
وجو على من خلا ابتسامتها تختفي وين وشافاته كيف واقف ويشبحلهم..
ع طول مشتله..
وياسين التفت وشبحلهم..
هي وصلت فيهم وقالت بشي من الخوف:خير سفيان علاش جيت توا ان شاء الله خير!
هو غير عيونه عنها وقال بصوت هدوئه كان مخيف:اني برا سيبي اللي عندك والحقيني.
ومشي من حداها وخلاها في حالة من الخوف والتوتر الشديد..
مشت تجري للحجره....
خشت حولت بالطوها وخدت شنتطها ومشت طلعت تجري..
وياسين معاها بعيون وكان قلق جدا من اللي صار قدامه.
ع جية الدكتورة اماني:وينها لينا!؟
ياسين بقلق:جاها راجلها..
•••••••
وصلت للسيارة وركبت..
شبحتله كيف يبانوا ملامحه غريبه وتخوف.
لينا بلعت ريقها وقالت:سفيان.
رفع يده وقال:مانبيش نسمع منك حرف طول مااني نسوق..
بلعت ريقها تاني من الخوف وشبخت للطريق وكل مافيها يرتعد من الخوف..
الصمت القاتل..لازمهم لين وصلوا للحوش..
خش بالسيارة داخل وقال..
سفيان:اركبي للشقه طول..
نزلت بالسيف..
وهو نزل بعدها...
شبح سيارة خوه مروان لقاها قاعده..
بعدين شبحلها هي لقاها وصلت في الدروج..
مشي وراها..
وصلت قبله فتحت الباب وخشت..
وهو خش بعدها وسكر الباب بقوة..
مشت كم خطوه لين وصلت للصاله وهي تستجمع في قوتها.
سفيان:اوقفي ..
وقفت وشبحتله..
سفيان:بعد ماتحكي كل شي تخشي للدار تاخد شلاتيتك وتو نحجزلك ونسفرك من وين ماجبتك وهادي رجوليه مني..
والصغار تنسيهم شرعا وقانونا معاش تحلمي بيهم..
لينا وهي تسمع فيه شن يقول نزل عليها برود عجيب من الصدمه...
قعدت ساكته ماقدرتش ترد...
سفيان:وتوا نبيك تحكي كل شي بالتفصيل من البدايه كيف خلتيني مضحكه وقعدتي تسايري فيا بش ديري مافي راسك..
لينا وهي حابسه دموعها بقوة...مطت شفايفها لداخل بعدين قالت:تمام...اسمع..هدى كان متدرب يخدم في المركز اللي كنت نخدم فيه ماكانش في بيني وبينه حتى السلام..
لعند مافي يوم بعتلي وقال يبي يخطب وانا رفضته...ورجع هو بروحه كلمني..وعدنان الله يرحمه حضر الموقف..
رفضته مرة تانيه..وفي نفس اليوم عدنان عرف بالموضوع وبعتلي من يفتح معاي موضوع الخطبه وانا وافقت..وبعد ماخداني...عمره..ماشك فيا لحظه اني كان في بيني وبينه شي ولاسألني حتى من باب الفضول لان كان عارف من المراة اللي خداها كويس..المراة اللي تربت ع الدين والاخلاق اللي عمرها ماصبت عليه مرة وتكلمت معاه...
اما ع اللي صاير تو...عدي اسأل مروان منى وهما يقولولك...وبعد ماتسألهم ويجاوبوك ياسفيان...نبيك تعرف انك بالنسبه ليا انتهيت قبل ماتبدا وماعاد تعنيلي شي ولا أي شي ووالله لو الظروف والوقت والله ماقعدتلك فيه دقيقة وحده...خسارة ماظنيت فيك ظن خير...وان بعض الظن...اثم.
ومشت وخلاته وخشت للدار وسكرت الباب بقوة ولفت المفتاح لاخر لفه فيه بعصبيه..
بعدين حطت يدها ع فمها وكتمت عبارات بكاها..
وحست قلبها وكأنه انطعن بسكين مزقه تمزيق..
🍁اما هو.
كان حاس روحه واصله لحنجرته...
كان يرجف بكل مافيه غضبا وخوفا...
حط يده ع رقبته وقعد يمسح عليها..
نزلت منه عينه اليسار دمعه سخونه...مسحها ومشي طول من الشقه ونزل لوطا....
خش للمربوعه لقي مروان متكي فيها.
سفيان:مروان نادي مرتك..
قعمز مروان وهو مفزوع قال:كيف!؟
سفيان بنفاد صبر:قتلك نادي مرتك توا..
ناض وقف مروان وهو مفجوع مشي طلع من المربوعه..
وهو واقف يراجي ع نار ويفرك في يده اليمين بأصابعها من التوتر...
ع خشة مروان ومعاه منى..
مروان:تي شن في ياراجل!
سفيان عطي مرت خوه بالجنب وقال:شن الموضوع اللي يربط بيكم وبين لينا..
منى ومروان شبحوا لبعض..
بعدين منى قالت:قصدك موضوع الدكتور ياسين..
سفيان جسمه صقع مع بعضه وهو يقول:ايه..
مروان:اها...هدا يبي يخطب اخت منى وع حسب مانعرف عن طريق الدكتورة اماني..
سفيان:وعلاش ماكلمكش انت طول..
منى:كان يبي يتأكد لو حني واختي نرضوا ناسبوا اصحاب البشرة السمراء..
مروان:الحق الموضوع حساس وبايخ كان ردوه لهالسبب بتقعد بيني ويبنه لقطه اخيي وعنده الحق..
منى:اني اليوم الصبح كلمتها وقتلها حني موافقين وهي بتوصله الرد...علاش شن صار سمعت عنه حاجه غلط؟!
سفيان ودموعه في عيونه..حرك راسه بالنفي ومشي طلع من حداهم..
منى:شن في مروان!؟
مروان:نبي نقول ان شاء الله خير لكن مش هكي الباين..
🍁🍁🍁
هو ركب السيارة..شغلها وطلع...
وطول الطريق كان جزء من كلامها يتردد في وذانه...
《 وبعد ماتسألهم ويجاوبوك ياسفيان...نبيك تعرف انك بالنسبه ليا انتهيت قبل ماتبدا وماعاد تعنيلي شي ولا أي شي ووالله لو الظروف والوقت والله ماقعدتلك فيه دقيقة وحده...خسارة ماظنيت فيك ظن خير...وان بعض الظن...اثم》
بعد ماقطع مسافه بدون وجهه محدده..
وقف بالسيارة ع تركينه...
شد الدومان بإيديه الزوز وهو يشوف للفراغ ودموعه ينزلوا..
بعدين بانفعال قعد يخبط في راسه ع يد الدومان بقوة..
بعدين اتكى عليه وانهار بالبكي....
#صلوا_على_محمد
...يتبع.....
