كل شي حيخليك بعد موتك الا اعمالك الصالحه حتلحقك..
واولها الصلاه..ماتبدي عليها شي في الدنيا مهما كان مهم كله زائل وهي بس اللي حتقعد...الصلاة اولا🌸
قولوا لاإله إلا الله تفلحوا باللسان بالقلب وبصوابعكم اللي تكتب🌷
وصلوا ع الحبيب اسعدكم الله بجواره في جنات النعيم💖
☄الموضوع هدا دويت فيه هلبه زمان وحنعاود نتكلم فيه
للقراء الجدد لانهم مش عارفينه..
اني مانمشيش بإملاءات القراء وبرغباتهم في الكتابه..
ماتجيش تقوليلي نبوا مشاهد طويله لفلان وفلانه وماطوليش مشاهد علان وعلانه هدا شي مايعنيكش انتي كقارئه..انتم عليكم تقروا بس وتناقشوا الاحداث والقضايا المطروحه في الروايه ولو في حد مش عاجبه شي فيها معاش يقراها...
اما كبر وطول المساحه لقصص وشخصيات معينه هدا شغلي اني واني الادرى بالقصه كلها ومجريات الأحداث واللي صار فيها ..وكل شخصيه ليها مساحتها وقصتها ولازم تاخد حقها كامل بش يوصل الهدف منها..
تمام...نتمنى ان الرساله تكون وصلت..
في الجديد بنلقى تعليقات زي هادي بنحضر..بتقولوا خيرها شادتها تهديد بالحظر..لا والله مش تهديد بس معاش عندي شده للنقاشات وحرق دم والحظر انسب حل...
🍫🍫🍫🍫🍫🍫🍫🍫🍫🍫🍫🍫🍫🍫🍫
"ماشاء الله أسو طالعه عسل"
اساور بإبتسامه:عيونك الحلوة رنودي..
حور؛مبارك اساور ربي يتمم ع خير..
اساور:الله يبارك فيك والفال ليك....
حور بضحكه:عن قريب إن شاء الله..
اساور رفعت حواجبها وقالت:شكله في موضوع..
حور:هو في..ونقول ان شاء الله خير..
اساور:ان شاء الله ان شاء الله...هارنودي شن الامور شن المعنويات..
رنده:الحمد لله خير من قبل بالذات بعد مابديت قرايه..
اساور:خالو قال الجلسه يوم 15 واحد وقال هداكا روح..
شبحت حور لرنده..
رنده تنهدت وقالت؛ايه روح الحقير..وحتى جاني للكليه..
الزوز شهقوا بصدمه..
رنده:مش تطلع منكم..
حور بقلق:اكيد لا..لكن شن دارلك لما جي؟
رنده:هربت منه..
اساور:كم مرة جاك..
رنده:مرة وحده..
اساور:ردي بالك يارنده ردي بالك هدا توا حيدير هلبه حاجات ع خاطر القضيه بش مايخليكش تاخدي حضانه البنت ممكن يرميك بمصيبه ويفتري عليك..
عيون رنده غرقوا بالدموع..
اساور:نعرف وحده رفعت ع راجلها قضيه طلاق وتبي حقوقها وهو بش مايعطيها شي دارلها قضيه شرف..
رنده وعيونها معبيات دموع:ربي ينتقم منه..
اساور؛ردي بالك حتى ع رقم تليفونك وحساباتك مرات يخترقهم ويديرلك خارقه..
بلعت حور ريقها وقالت:ايه صح عندها الحق احدفي حسابك ولاأمنيه..
رنده:حسابي بالذات مش حيلقاه مغيره كل معلوماتي فيه مافي شي يدل ع انه متاعي ..
حور:ماتندريش مرات يلقاه يارنده نصيحه مني احدفيه افضل..
رنده تنهدت وهزت راسها بالموافقه وباديه ع وجهها ملامح القلق..
وحور تشبحلها..
اساور بإبتسامه غيظ:لينا طالعه مش عاديه واخده مني الجو عطيها نقطه في جاذبيتها وجمالها..
شبحوا للينا..لقوها واقفه ع وحده من المعازيم تهدرز معاها..
رنده ابتسمت وقالت:فعلا حلوة هلبه من برا ومن داخل..
حور شبحت لرنده وهي متفاجئة..
شويه جت ربيعه وقالت:جو جو..وصلوا..
اساور بتوتر:حي عليا..
ضحكوا رنده وحور بعدين نزلوا من حداها وخلوها بروحها..
وشويه وخشوا اهل خطيبها...
🍁🍁🍁🍁🍁
"لا الحمد دكتور امورك كلها تمام"
ابتسم مروان وقال:الحمدلله..ضيق عيونه وقال..لكن دكتور اشرف نبي منك خدمه..
:تفضل..
بعد ربع ساعه..
طلع مروان من المستشفى ويده اليمين مربوطه في رقبته وراسه ملفوف بالشاش..
خدي نفس..وقام تليفونه واتصل لخوه..
🌺في شقة سفيان
كان مقعمزة وفي حجره ياسمين راقده..وجنبه ولاد اخته يتفرجوا ع التلفزيون..
وبحر قدامهم واحد وراقي وقلم ويخربش..
وعمه عين فيه وعين فالتلفزيون..
بعدين شبح لياسمين..وجرب ينوض بيها للدار قعدت تبكي..
ضحك..ورجع لمكانه وقعد يطبطب عليها...رقدت مرة تانيه..
تنهد بعدين شبح لولاد اخته شويه..
رفع حاجبه بعدين قال:قولوا مؤيد وشريف..
شبحوله الزوز..
سفيان:شن جوكم في الحوش..بابا وماما جوهم تمام..
شبح مؤيد للشريف..
والشريف قال لخاله: جوهم تمام...علاش تسأل خالي؟
سفيان شبح للتلفزيون وقال:هكي وخلاص سؤال عادي..
الشريف شبح لمؤيد وفنص فيه..
مؤيد شبح للتلفزيون وقعد محتفظ بصمته..بعدين شريف تفرج معاه...
شويه رن تليفون سفيان..
سفيان:ترا جيبه مؤيد..
ناض مؤيد ومشي للطاوله وخدي الهاتف ومده لخاله..
خداه سفيان وشاف المتصل استغرب..ورد طول..
سفيان؛هاه مروان..
"سفيان شن جو"
سفيان؛تمام..خيره صوتك؟
"والله شن بنقولك درت حادث"
سفيان بفجعه؛كيف!؟
الولاد شبحوله..
"ماتخافش اني ماضررتش هلبه لكن سيارتك من القدام انضرت شويه"
سفيان:سيارة شني ياراجل فداكم..شريف ماصارله شي؟
"لالا حطيت شريف في حوش خواله قبل الحادث"
سفيان :باهي وينك انت توا؟
مروان:اني توا طالع في المستشفى بناخد تاكسي ومروح..
سفيان:حالك باهي متأكد؟
مروان:ايه صورولي ومالقوش مشاكل الامور كلها تمام..
سفيان هز راسه وقال:الحمد لله..
"جاي في الطريق"
سفيان: نراجي فيك..
سكر سفيان..
والشريف قال:خيره خالي؟
سفيان؛دار حادث لكن حاله باهي..وشبح لبحر لقاه ماشي للحيط بيخربش..
سفيان:لحق عليه ياشريف لحق خود منه القلم..
وانطلق الشريف يجري لين وصل فيه وخدي القلم..
بحر شبحله بعدين شبح لسفيان وجاه يجري وضم رجله وقال بزعل:ريف..
الشريف بضحكه؛عارف اسمي..
قعدوا يضحكوا..
سفيان بضحكه:شن تحاسبه صغير توا بيبدا يتعلم يقول هلبه حاجات مش غير الاسامي..
مؤيد:قول مؤيد..
بحر بزعل وبلغه طفوليه:لا...
قعدوا يضحكوا...
🏵🏵🏵🏵
وطلعت اساور بفستان اهل خطيبها..وكانت فيه متألقه وجميله..
بعد وصلت في الكوشه..جتها ام خطيبها لبست الدبله وطقم ذهب..بعدين قصت هي وياها التورته...والكاميرا تصور في هاللحظات الحلوة..
اللي عاشوها بنات وجيهه قبل وكانوا فيها اسعد الناس وقتها...
نوريه"اول مانروح صور البيان والعرس بنتش فيهم النار"
عفاف"اضحكي توا ياأساور اضحكي بعدين تقعدي تشتاقي ضحكه زي هادي"
رنده"قداش كنت فرحانه يومها واني في مكانها..قداش كنت عبيطه"
ومش غير بنات وجيهه...
منى"قداش ذكرى حلوة خليتها سودا يامروان"
................
ربيعه:إن شاء الله ربي يهنيها ويتمملها ع خير..
زبيده:ان شاء الله ان شاء الله..
ربيعه؛ويكفيها شر الحاسدين يارب العالمين..
وجيهه شبحتلها..
زبيده:آمين.
ربيعه:واجعل بختها احسن بخت ياسيدي ومولاي..
زبيده؛آمين آمين..بري قعمزي مع حمواتك شن جايه هني ومخليتهم!
ربيعه ناضت وهي تقول:حاضر يما..
ومشت لطاولة حمواتها ووجيهه تشوفلها وهي تحرك في راسها يمين ويسار..
🏵🏵🏵🏵
وخديت العروس صور تذكاريه مع اهل خطيبها وعيلتها...
وبعد ماروحوا اهل العريس..
بدوا المعازيم يروحوا...
ومنهم وجيهه وبناتها وكناينها اللي استغربوا في جية سفيان بدال مروان بالذات منى ولينا..
••خبطت عفاف بيدها ع خدها وقالت:وخيي!!
سفيان:مافيه شي ياودي اموره تمام حاجات بسيطه صارتله كدمه في راسه وخلع في كتفه..
............
منى ووجيهه بفجعه؛حي عليا!...ولدي!
الشريف:مافيه شي ياودي...كتفه اضرر شويه وكدمه في راسه..
وجيهه:ياكبدي اني ياكبدي..وليدي ياناري..
نوريه بقلق:مافي شي يام خيرك كان فيه حاجه تشبحي في بوي هكي..
وجيهه:خف روحك ياشريف نبي نشوف ولدي..غمضت عيونها بشده وقالت..ووك ياكبدي..
الشريف:اذكري الله يامراة خيرك..!
ومنى من الخلف دموعها ينزلوا...اذكرت الكلام اللي قاله قبل ليطلعوا وكيف هي تجاهلته...حست ان هي السبب..
قالت في بالها..اكيد وهو يسوق كان يفكر في اللي صاير بيناتهم وماردش باله ودار الحادث.
تخيلت لو صار فيه ولا مات حست قلبها زاد انغم..
وفجأة النفس هرب عليها..وداخت...
وحصلوا فيها وتفركسوا وصارت فيهم حاله..
ولما وصلوا.للحوش..
ركبوا لشقة سفيان وين كان قاعد وقتها...
ولينا قعدت لوطا بروحها ومنتابها شعور بالقلق من اللي صار..
شويه نزلها سفيان..
"لينا"
في الكوجينه...
لينا:هنى هنى..
مشي للكوجينه وخشلها لقاها مقعمزة تشرب في ميه..
سفيان بقلق؛رعشتي!؟
لينا:لالا مافيا شي..بس خفت شويه..
حط يده ع راسها وقال:الامور تمام حبيبي مافي شي يخوف..
لينا حطت يدها ع قلبها وقالت:معاد نتحمل الحاجات هدي وين نسمع بحد دار حادث ولاصارتله حاجه قلبي ينغم..
طبس باس ع راسها وقال:هي تعالي معاي نركبوا فوق طلعوا لشقة مروان..
لينا هزت راسها وناضت..
وهو قعد شادها ويمشي معاها..
لينا بضحكه:نقدر نمشي بروحي عادي..
سفيان:امشي وانتي ساكته..
قعدت تضحك..
طلعوا من الحوش..ركبها للشقه دخلها بعدين طلع لشقة خوه...
خشلها ولقاهم كلهم ملتمين حواليه في الصاله ومرته واقفه بعيده عليه وتبكي..
وجيهه:متأكد وليدي مافيك شي...فحصوك زين في المستشفى..
مروان بإبتسامه؛والله مافيا حاجة يام غير اللي تشوفي فيه...
نوريه:خلاص يام سادك بكي اهو قدامك مافيه شي..
الشريف:هي خلاص ياوجيهه انزلوا وخلوه يرتاح..
وجيهه:ابدا ماني نازله بنبات حداه الليله..
هو فنص وقال؛والله يام حالي باهي والله..ماتعبيش روحك انزلي باتي لوطا..
وجيهه:لالا مايهنينيش خاطري..
الشريف:وجيهه..
وجيهه:سامحني ياشريف قلبي مش حيهنيني خلوني حدا ولدي الليله...
نوريه تنهدت وقالت:خلاص بوي خلوها ع راحتها..هي خل ننزلوا حني..
تنهد الشريف وقال:باهي تصبحوا ع خير..
والبنات قالوا باصوات متقطعه:تصبحوا على خير..
ووجيهه وومنى يردوا عليهم ومشت سقدتهم..
ومروان معاها بعيونه وهو مضايق...
شويه ومشت للدار بش تبدل...
وجيهه:شن وليدي توا ماتحس في شي..
مروان:نحس يام..نحس في قلبي..
وجيهه بخوف:خيره!
شبحلها وقال:تشبحي في حالي يام مامدرق عليك شي..
تنهدت وقعدت ساكته..
مروان؛ماتقولش راجلها داير حادث..
وجيهه:شن تبيها ادير قدامنا تضبطك وبوك واقف!؟
وجهه ولى احمر وتحشم..
وجيهه:ياسر اللي صار فيها مسكينه في السيارة لين داخت..
رفع حواجبه وقال:حق يام!
رفعت حاجبها وقالت بتهكم؛حق ياسيدي حق..
ع طلعة منى جتهم وقالت:تعشيت..
مروان:لا..
منى هزت راسها ومشت للكوجينه..
وجيهه شبحت لولدها لقاته يتبع فيها بعيونه تنهدت وقالت؛خل ننزل نغير حوايجي...
وناضت ومشت طلعت من الشقه..
وهو بعد ماطلعت ناض ومشي للكوجينه..
خش عليها لقاها تويتله في العشي..
مروان:ماسمعتش منك حتى الحمد لله ع السلامه..
منى وهي مشغوله:حمد لله ع السلامه..
مروان:معقوله لهالدرجه البرود!
منى قعدت ساكته وهي دير في العشي...
خدت صونيه من الشباك هو جاها وخداها منها ولوحها لوطا..
انسكرت..
هي انخلعت..
وهو بعصبيه قال:خلاص عاد زودتيها..فهمنا اني غلطت ونستاهل شن ماديري فيا لكن مش لهالدرجه..غلطي وعرفته من قبل ماتعرفيه وصلحته..ويشهد عليا الله من بعدها مافكرت نغلط فيك حتى بنظرة...قصدي اني بنادم بنادم نضعف ونغلط عادي زيي زي غيري وع فكرة انت كنتي اكبر سبب ..هملتيني..حطتيني ع ركن..كل شي كان قبلي واني اخر شي..
منى ودموعها ينزلوا قالت:مصح وجهك..حق صحيح وجه..اي اهتمام تراجي فيه مني اني كنت مش ملحقة نهتم بنفسي..
عايشه حياة من حياتي نخدم ليل مع نهار لين ينهد حيلي..نفرح وين نحصل فرصه للنوم..وياريت فيه من يقدر ياريت في من يشوف..اني كنت نبي منك التقدير ..منك مش من غيرك..نبيك تشوفني وتشوف اللي اني فيه وتحس بيا..
لكن انت شن درت قولي...قول شن درت...
قعد ساكت وهو يشوفلها بنظرات اسف وندم وعيونه معبيات دموع..
مسحت دموعها وقالت:انت صدمتني..صدمة عمري كانت فيك انت..عمرك ماحتفهم شعور مراة مصدومه في راجل كانت تحسابه بيكون ليها سند عمرها كله وفي الاخير الكسرة ماجتها كان منه هو...مش حتفهم ولاحتفهم يامروان...
غير عيونه عنها وهو مضايق ع الآخر وكاره روحه...
وهي تشبحله وتمسح في دموعها وهما يرجعوا ينزلوا..
شبحلها وقال:تحبيني؟
منى ابتسمت بتهكم..ومشت طلعت من حداه ..
وهو غمض عيونه بأسف وفتحهم...بعدين قعمز ع الكرسي..وخبط بيده ع الطاوله...
🍁🍁🍁🍁
"سكروا وراي الباب كويس"
رتيل:حاضر ماما
طلعت وجيهه..ورتيل سكرت وراها الباب بالمفتاح..
بعدين ولت لدارها..خشت وسكرتها عليها..
شافت رنده لقتها مقعمزة ع سريرها تقرا في القرآن..
تنهدت بعدين قعمزت ع سريرها فتحت لاب توبها ولهت بيه..
🏵وفي دار التقعميز..
خواتها فرشوا لبناتهم ورقدوهم..
وهما راقدات حداهم يهدرزوا..
عفاف:انتي مااتصلتيش بيه بكل..
نوريه؛ولا يحلم بيها بعد اللي شفته منه..
عفاف:انتي هكي سلمتيه لهديكا المزيته ع طبق من ذهب..
نوريه:لا الله صونية ليموني..واحد زيه مايستاهل نحرق روحي بش نحافظ عليه مادام هو ماحافظش عليا..
عفاف :تس..لكن يانوريه هكي غلط راك تنسي ان عندك صغار تخافي بوهم بعدين يفضل عليهم صغار التانيه.
نوريه:لا مايديرهاش..علاقته بيا شكل وعلاقته بصغاره شكل...
عفاف؛المهم انتي ردي بالك القرده هديكا مادام وصلت بيها تبعتلك صور معناها ناويه ع اكبر من هكي..
نوريه وهي تفكر ؛تو نشوفوا شن يطلع معاها..
تنهدت عفاف وقعدت ساكته..بعدين قامت تليفونها وقعدت تشبحله وقالت؛قداش خاطري تجيني منه مكالمه ولارساله وين نقعد بعيده عليه..اليوم انقهرت واني نشوف في بنت هنيه جليله وهي تكلم في راجلها ع غزل وحب وصفتله حتى لبستها ومكياجها وصورتله بناته وبعتتله الصور..شوفي قداش ليها متزوجه ممكن قبلي..
نوريه قعدت ساكته...وهي تتفكر ايام كانت وين تجي لحوش اماليها وتبات عندهم كيف كان حسين يتصل بيها ويبعت في الرسايل....
ابتسمت وبتهكم وقالت:لاتنقهري ولاتتحسري..كله زي بعضه..هي ارقدي ارقدي سلم وخيتي والله ماتنفعك كان صحتك..وعطتها بالظهر..
وعفاف تشوفلها بضيق واجعها حال اختها....
🍁🍁🍁🍁
وفي شقة مروان..
بعد ماتعشت وجيهه هي وولدها العشي اللي دارته...
هدرزت عليه شويه ومشت خشت بترقد في دار الشريف..
وهو مشي لدار النوم..
وقف قدامها..خدي نفس..
بعدين فتح الباب وخش..
لقاها راقده وعاطيه بالظهر..
مشي قعمز حداها...
مروان:منى...
لارد..
تنهد وقال؛منى نوضي..عارفك مارقدتيش...
لارد..
مرر نظره ع الدار بعدين شبحلها وقال:عندك حق...كل كلمة قلتيها عندك فيها حق..واني الغالط والغلط راكبني من ساسي لراسي..كنت معاك اناني هلبه...ماقدرتش وضعك ولاحسيت بيك..فكرت في نفسي بس..ممكن لاني هكي تعودت..تعودت ع الاهتمام تعودت نكون مهم كيف ماكانوا يحسسوا فينا امي وخواتي..كنت نقول المراة تتحمل عادي اصلا هدا واجبها هي هكي..هدا اللي شفته وعشته مع امي وبوي...
منى:بوك يقدر في امك وحاطها تاج ع راسه ومحترمها وانت ياريتك جيت في ربع بوك..
مروان هز راسه وقال:تمام اني ماننفعش وفيا عيوب الدنيا كلها..لكن والله يامنى نحبك اقسم بالله نحبك وهلبه مش شويه وربي يشهد عليا..
منى:معاش ولت تأثر فيا الكلمه هادي زي زمان يامروان..معاش بديت نصدق فيها..
حط يده ع عيونه بعدين مسحهم ..ومرر نظره ع المكان وقال:تبي تطلقي منى..
فتحت عيونها ع وسعهم..
مروان؛مدام اني وياك وصلنا لهني الطلاق احسن حل ليا وليك وعيل واحد خير من تنين وتلاته..
ناضت قعمزت وقعدت تشبحله وهي مصدومه..
مروان:صدقيني هكي احسن ليا وليك..
نزلوا دموعها وقالت؛حتى اني قتلك هكي من الاول..
مروان؛باهي علاش تبكي!؟
منى مسحت دموعها وقالت؛مانبكيش..
مروان:لاتبكي..علاش تبكي مش خلاص..مش انتي هكي تبي
منى وهي تشوفله بتحدي وتمسح في عيونها اللي ينزلوا غصب عنها:ايه هكي نبي..
مروان:وعلاش تبكي الدموع هادم علاش ينزلوا!؟
قعدت تشبحله بنفس النظره وحاولت تجاوبه بس ماقدرتش تتكلم..حطت ايديها ع وجهها وانهارت بالبكي..
مروان بضحكه:تحبيني وتموتي فيا عارفك...
نزلت ايديها وقالت؛لا نكرهك..كرهتك..
مروان بضحكه:حتى اني..
هي من غيظها خدت المخدة وضرباته بيها جت ع وجهه..
جي دايخ وطاح راسه ع المخده.
منى خبطت بيدها ع وجهها وقالت:حيي عليا..مروان..مروان..
قعدت تخبط فيه خبطات خفيفه ع وجهه وهي تقول..مروان..حي عليا ياربي.. مروان اني اسفه..خلاص نوض بالله عليك ياهمي..كيف نسيت الحادث كيف..حبيبي نوض بالله عليك..
فتح عين وحده وقال:اني شني!؟.
ضرباته ع كتفه وقالت بغيظ:بارد...بارد..بارد..
مروان:ااه كتفي ااه..
منى:ايه حقه.نسيت..اني اسفه..
ومروان يضحك عليها..
وهي تشبحله بإمتعاض...
هدى ضحك بعدين قال بإبتسامه حب:نحبك..
وهي ردت عليه بإبتسامه سخريه واسعه..وهو يضحك عليها..
🌷يامن اهيم به والشوق يقتلني..
هلا رحمت فؤادا شاخ من صبري
هلا نظرت إلى شمسي ومطلعها..
انت الشروق وانت النور في عمري...🌷
🏵🏵🏵🏵🏵🏵
الساعه 10:00صباحا..
"هدا وين طالع هو وياها من صباحات ربي!!؟"
رنده:مني؟
وجيهه:خوك مروان هو ومرته..
رنده:بالسيارة!؟
وجيهه:ايه ياحنه بالسيارة نسيتي اللا تعرف تسوق"
رنده:ايه صح..
ع خشة نوريه:نسمع في الباب البراني متاع الحوش ..
وجيهه:مروان ومرته طالعين..
نوريه:شكلهم ماشيين يجيبوا الشريف قاعد عند خواله..
وجيهه:ايه حقه..نسيته بكل..
"نوريه"
نوريه بإستغراب:هدا سفيان!..
ومشت طلعتله...
لقاته في بداية الممر..
نوريه:صباح الخير..
سفيان وهو عاقد حواجبه:صباح النور..توا اتصل بيا حسين وقالي مروح امس من السفر وتاعب ومش عارف شني يبيني اني نروح بيكم..
انتابها شعور بالغضب..وبالخيبه..وبالألم...وحست بدمها يغلي غلي وسط عروقها..وهالمشاعر هادي كتمتها بقوة واظاهرت انها عاديه قدام خوها وقالت:باهي نفطر الصغار ونوتي روحي..
ولفت ومشت خشت..
وهو مازال قاعد واقف يشبحلها وهي ماشيه والشك كبر هلبه في نفسه..وقعدله بس يقطعه باليقين..
لف ومشي طلع..
اما هي بدت تلم في حوايجها وحوايج صغارها..
عفاف:بيجيك..
نوريه:مش هو سفيان بيروح بيا..قال مروح امس تعبان..
عفاف:تعبان صار!!؟
نوريه "كان ماخليتاش يتعب تعب ماتعباش في حياته كلها مانبداش نوريه":بالله عفاف جيبيلي الحوايج المنشورات.
عفاف:حاضر..ومشت طلعت..
ع خشة امها قالت؛مروحه توا..
نوريه:ايه يام..
وجيهه:بيروح بيك سفيان..
نوريه:ايه..
قعدت تشبحلها وهي تجري وتلم بعدين قالت..
"خدي عليك ولا"
الجمله كيف قالتها امها وكيف سمعتها...حستها وكأنها موس وخش لقلبها..
خدي عليك....!
التفت لأمها وحطت ايديها في نصها وقالت:ايه..
وجيهه هزت راسها وقالت:حسيت من اول يوم جيتي فيه..
نوريه مطت شواربها لداخل وقعدت تحك فيهم بسنونها بعدين ولت اللي دير فيه..
وامها مشت قعمزت وقعدت تشبحلها وهي ساكته..
ونوريه تجري ع حاجاتها..
ع خشة عفاف بالدبش:اها نوريه..
جتها خدتهم منها وبدت اطبق..
وعفاف تلم معاها وتعاون...
ووجيهه تبع فيها بعيونها...
🌺🌺🌺🌺
"اول مرة يديرها "
لينا تلبس فيه فبالطوه وتسمع وهي ساكته..
سفيان ساوا بالطوه وقال بعصبيه:كان في شي يقولوا علاش يدرقوا ويستغفلوا فينا !؟
لينا؛باهي انت صل ع النبي وهدي اعصابك...كان في شي تو يبان..
سفيان هز راسه وقال؛تو يبان..
ومشي فتح الباب وطلع..
هي قعدت واقفه تشوفله لين نزل..بعدين سكرت الباب وقالت:سترك يارب..
ومشت خشت داخل..
🍁🍁🍁🍁
وجهزت نوريه روحها وصغارها.. وبعد الفطور وبعد السلام..
طلعت هي وصغارها لسيارة بوها اللي خداها سفيان لأن سيارته في الورشه كما هو معروف..
بعد ماطلعت السيارة من الحوش..
وجيهه قعدت تبكي..
رنده:صلي ع النبي يام..
عفاف:الله غالب هدا نصيبها يما..
وجيهه ببكي:مش عارفه ليش هكي حظكم مش عارفه...
عفاف ورنده قلبت عليهم المواجع بكلامها وقعدوا يبكوا..
وبنات عفاف يشبحولهم بحزن..
🍁🍁🍁🍁
طول الطريق كانوا ساكتين..
لين وصل بيهم للحوش..
لقوا البوابه الخارجيه مفتوحه شويه..
نزل الشريف للباب وفتحه كله..
وخش سفيان بالسيارة..
لقي قدامه خو حسين..
درس...
ونزل نوريه..ونزلوا باقي الصغار..
وسفيان نزل وجاه خو حسين طول..
:صباح الخير سفيان شن الامور..
سفيان؛صباح الخير..امتى روح حسين امس
:مع المغرب..
هز سفيان راسه ومشي للكوفني فتحه بش ينزل الشناطي..
وخو حسين يشوفله...
بعد مانزل الشناطي مشي بيركب وهو يقول:سلملي ع حسين..
:غير اقعد افطر..
رفع سفيان يده وهو يحي فيه...سكر الباب وشغل السيارة ووخر بيها لين طلع من الباب..
وخو حسين مشي للباب سكره بعدين قال:عليك موقف حطيتني فيه ياحسين..
ومشي توجه لحوشه...
🍁🍁🍁🍁
داخل...
مقعمزات في الصاله يهدرزوا...
نوريه؛امتى روحوا؟
مها:ع المغرب..
نوريه:جو هني؟
مها:لا ع خاطر عمتي مهناش..
نوريه:والصبح مابانش؟
مها هزت راسها بإيجاب..
نوريه هزت راسها بعدين ناضت وهي تقول:خل نمشي نبدل حوايجي..
مها ناضت وقالت:واني ماشيه نوتي روحي بنمشي لحوش اماليا..
نوريه ابتسمت وقالت:بالسلامه..
مها:بالسلامه..
خشت نوريه داخل..
ومها وهي مضايقه ع نوريه مشت طلعت من الحوش..
🍁ومشت مها مع راجلها لحوش اماليها..
ونوريه دارت دوره ع الحوش..
بعدين خشت للكوجينه بش ادير الغدي دابها هي وصغارها بس...
ومرت عليها الساعات مع صغارها وماكانتش تراجي في خشته ابدا لانها عارفاته مش حيخش..
••نوريه:هي بروا لحقوا عليه..
الشريف ومؤيد مشوا طلعوا وهما لابسين عربي بش بيمشوا مع بوهم لصلاة الجمعه..
وصلوا في الحوش وطقوا الباب..
شويه انفتح الباب وطلع حسين وهو يقول بضحكه:اووو شباب..
طبس سلم عليهم وهما حاسين اتجاهه بالنفور..
حسين:شنو مااستاحشتوش بوكم؟
"حسونه"..
ابتسم بإرتباك ووقف ع حيله بعدين قال؛نعم..
"راك تنسى تخطم ع حوش ماليا تجيب الغدي"
حسين:مش ناسي..وطلع سكر الباب وقال لولاده..هيا بابا..
مشوا هما الزوز قدامه وهو وراهم..
حسين:ماما شن جوها؟!
الشريف:مليح هلبه..الجو مليح في حوش جدي...
مؤيد:امي كانت كل يوم تضحك..
الشريف:امس مشت لحفله وطلعت طرف مش عاديه ..
مؤيد:امي ديما طرف اطلع طول..
حسين قعديضحك وحواحبه مرفوعات..
بعدين شبح لحوش امه...ابتسم وشبح القدام..
ومشي ركب للسيارة مع ولاده وطلعوا من الحوش...
🍁🍁🍁🍁
"طيب فيه"
منى بضحكه وهي رافعه حاجبها:اللي مبرد ع قلبي اني طيرتله عقله من راسه وخليته يدير حادث بالكذب.
لينا بضحكه؛والله جو...تقعدوا تذكروا فيها وتضحكوا بعدين..
منى ضحكت بعدين قالت:تو بيقعد اسبوع وهو قايم يده بالكذب..
لينا؛عليك عمله دارها فروحه..
منى بضحكه؛وجعتني سيارة راجلك..
لينا بضحكه:ايه راحت ضحيه مجنون منى..
ومنى تضحك...
بعدين سكتوا وهما يوتوا في الغدي..
شوية وقالت لينا...
لينا؛بكري خشيت عليهم لقيتهم يبكوا ومعاهم اللاي بعد روحت نوريه..
منى بضيق:شكلها عرفت..
لينا هزت راسها بإيجاب..
منى:وين يخطر عليا الموضوع هدا نخاف..
لينا تنهدت وقعدت ساكته..
ع خشة وجيهه:واتي غداكم..
لينا:ايه خلاص اللاي..
وجيهه خشت رفعت السفره وقالت:الحقيني بالصونيه..
منى :خليها عليك اللاي..وجتها خدتها منها وطلعت..
وجيهه وراها..
لينا تنهدت بضيق بعدين خدت المفرش وطلعت بيه لدار التقعميز...
🍁🍁🍁🍁
الساعه 5:00عصرا..
نوريه كانت تفتح في الرواشن بش تهوي الحوش مرة تانيه..
وقفت لما شافتهم طالعين مع بعض وايديهم في بعض..
وابتسامه راجلها ع وجهه ومرته التانيه تهدرز وتضحك..
قعدت معاهم بعيونها لين ركبوا السيارة بعدين طلعوا..
غمضت عيونها وقعدت تردد"مايستاهلش مايستاهلش مايستاهلش مايستاهلش"..
بعدين فتحتهم وخدت نفس ومشت ادور ع باقي الحوش..
لحظات وجت حماتها مروحه بامها اللي قعدت عندها نهارين..
خشت رمضانه وبنتها معاها..
ونوريه استقبلتهم بضحكه حلوة:عمتي..
رمضانه وين شافتها فرحت هلبه:نوريه بنيتي..
جتها وسلموا ع بعض بحرارة وبنتها تشبحلهم بإيتسامه..
نوريه:كيف حال صحيحتك عمتي.
رمضانه؛الحمد لله بنتي في خيار الخير..شن حالك انتي وشن حال اماليك.
نوريه:الحمد لله يسلموا عليك..
بعدين سلمت ع حماتها..
:الله يبارك عليك يانوريه مزيانه..
نوريه بإبتسامه:تسلمي...
وخشوا داخل للحوش..
ونوريه حولت وشاحها وقعدت تحوس من غيره...
وتت الضيافه وجت بيها لحماتها..
لقت الصغار حداها..
نوريه حطت السفره وقالت؛وينها عمتي..
رمضانه وهي جايه:هاني جيت..
نور:حنينه..وناضت هي وخوتها يسلموا عليها..
رمضانه؛سلمهم ياربي استاحشتكم هلبه ياجريوات..
نور:حتى حني حنينه..
وقعمزت رمضانه مع الصغار..
:تهبل قصة شعرك والصبغه عجبوني هلبه ربي يبارك..وين دريتهم؟
نوريه:حلومه الزناتيه..
:الله!؟لاا بنمشيلها رسمي حلومه هادي..
نوريه:كان تبي نخليها تجي هني..
:ياريت..
نوريه:خلاص شوفي يوم يناسبك نرتبلك معاها موعد..
:تمام..
نوريه:لاعمتي هادي ليك بالشوفان طعمتها تجنن..
خدتها رمضانه وقالت:خل نذوقوا..
وبدت تاكل...
؛امتى درتيه؟
نوريه؛بكري شويه..
رمضانه؛قنين قنين..مال حسين طالع..
حماة نوريه قعدت تشبحلها..
نوريه بلامبالاة مصطنعه؛طلعوا قبل لتجوا بشويه..
هزت رمضانه راسها وهي تاكل..
🍁هدرزوا شويه..
بعدين روحت حماتها...
وبعد المغرب..
روحوا اكرام وحسين وطول لحوشهم...
ونوريه ادير في عشاها هي وعزوزتها وصغارها..
خشت عليها رمضانه وقالت؛احسبي حسين واكرام تو كلمني وقال يبي عشي..
نوريه:حاضر عمتي..
عمتي؛يحضرلك وجه محمد بنيتي..
ومشت طلعت من حداها..
وكملت نوريه العشي وجهزاته..
وحطت ليها ولبنتها وعزوزتها مع بعض..
والولاد بروحهم في دارهم..
••رمضانه:والله يابنتي بنة تطيبك ماذقتها عند حد مااستطعمت الماكله كان توا..
نوريه بضحكه:صحتين عمتي..
رمضانه؛سلمك..ايه احكيلي من وين اللي خدوها بنت ربيعه..
نوريه:تراهنه ياعمتي******
رمضانه؛كويسين ال******
نوريه:ايه..الحق ماشاء الله عليهم حتى اللي جابوه كله قنين وعليه القيمه..
رمضانه:ماشاء الله..وامتى عرسها..
نوريه:مش معروف لتوا...
ع خشة اكرام وهي مبتسمه ابتسامه نفاق عريضه...
اكرام؛عمتي..
رمضانه؛اهلا..
مشتلها بتسلم عليها وهي تسرق في النظر لنوريه.
لاحظت التغيير..وكيف ضعفت بشكل حلو...ولعت فيها النار..
ونوريه وقتها تاكل ومش مهتمه..
ونور تاكل وتشبح لاكرام بحقد..
وقفت ع حيلها وقالت؛وين عشانا اني وحسين.
قامت نوريه راسها وقالت:فوق الطاوله مغطي..بس رد بالك تحطي لحسين خبزة عاديه ياكل في طعام هو..
اكرام بإبتسامه:نعرف حبيبتي..
رمضانه:ماتعرفيش انه ياكل في الخبزة اللي طيب فيها نوريه..
ابتسم نوريه ع جنب وهي تاكل..
اكرام:اها..مادامه يحب خبزة الحوش تو نتعلمها..ومشت خشت داخل وهي منغاضه.
رمضانه:ايه كملي شن دارت عمتك في البيان.
نوريه:قولي شن مادارت تقول حفلة دخول..مش عارفه شن بدير بعدين..
رمضانه؛ مادام عندها خل ادير القلب اللي يقلب...
نوريه سمعت الجمله الاخيره وقعدت تضحك..
ورمضانه تشبحلها بإبتسامه استغراب..
ونور تشوفلها بإبتسامه حب..
ع خشة حسين..
جو عيونه عليها..و ع ضحكته..
وبدي قلبه يدق بقوة..وهو يشوف في التغيير اللي بادي عليها..
والأهم منهم ضحكتها..واذكر كلام ولاده..
تنحنح وقال:السلام عليكم..
هي شبحتله..
لما شبحتله تنهد تلقائيا..
رمضانه؛تعال سلم..
هو استاقظ وشبح لأمه وضحك بإرتباك ومشالها..طبس يسلم ع امه وهو يسرقلها في النظر..
وهي متجاهله تماما...
بعدين جاها ومد يده..
رمضانه:نوريه..
شبحتلها بعدين شبحت ليده..
حسين بإبتسامه:اني اللي مروح من سفر واني اللي نبدا السلام..
هي مدت يدها وصافحته وقالت:حمد.لله ع السلامه..
هو نهضها وهي انخلعت..
وسلم عليها كويس وهو يقول بإبتسامه جانبيه:الله يسلمك..
وهي مازال مخلوعه ومتحشمه من عزوزتها..
ع جية اكرام بالسفرة لما شافتهم زادت انحرقت..
اكرام:العشي حسونه.
هو شبحلها ومازال يده في يد نوريه..
نوريه جبدت يدها وولت قعمزت..
هو شبح ليده بعدين شبحلها وهو عاقد حواجبه ..
نزل يده..
اكرام؛هي تعالى حسونه .
حسين ؛حطيه غادي..
اكرام قريب انفجرت ومع هدا سمعت كلامه ومشت حطت العشي وين ماقاللها..
وقعمزت..وهو قعمز مقابل نوريه..
ورمضانه تراقب بصمت..
اكرام؛كول هادي من يدي حسونه..
هو شبح لنوريه لقاها مش مدورة..
كلي من اكرام وقال:يسلموا..
ضحكت اكرام..
رمضانه:ايه وشن حال الحاجه زبيده..
نوريه بضحكه؛هيجت حتى هي رقصوها..
رمضانه بضحكة تعجب؛اياااه..
وقعدت نوريه تهدرز هي وعزوزتها ومش مهتمه لوجود.حد حداهم..
وهو طول الوقت عيونه عليها..
حاولت اكرام تصرف انتباهه عنها لكن ماقدرتش..وهالشي زاد نارها نار...
🍁🍁🍁
في الكوجينه..
نوريه تغسل في الماعين..
خشت عليها اكرام حطت السفرة وهي تشوفلها من فوق لتحت بعدين قالت..
اكرام؛خشيتي في حالة كآبة بكري بكري..
شبحتلها نوريه وهي رافعه حاجبها..
اكرام؛الصبغه..والقصه والرجيم..وجو التصابي..اعراض اكتئاب المراة لما تجي عليها ضرة..بالذات لو كانت اصغر منها بوين..بس نبي نقول حتى الراجل يزبط انها اعراض اكتئاب تخليه يدعيلها في سره ربي يشفيها فقط لاغير..
ضحكت نوريه بعدين قالت:تعرفي احسن حاجه فيك انك ع المكشوف ومش من تحت لتحت..بس نبي نقولك حاجه..هدي حبيبتي خودي شهيق وزفير واسترخيي..مافيش داعي للتشنج..كانك ع حسين ربي يهنيك بيه..اني خديت غايتي معاه..14سنه..علاقه..خطوبه زواج...والصغار وجبت منه وعشت معاه بمافيه الكفايه وخلاص اكتفيت..بنخليهولك كملي معاه عقاب عمره...وبالرفاه والبنين..
غمضت اكرام عيونها وهي تحاول تتمالك نفسها بعدين فتحتهم وشبحت لنوريه من فوق لتحت ومشت طلعت..
ونوريه ابتسمت بمكابرة وهي شاده دموعها بعدين قالت:مايستاهلش...
ورجعت تكمل في باقي الحوسه....
🍁🍁🍁🍁
الساعه 11:30ليلا..
اكرام؛تصدق حسونه..
حسين:شني!؟
اكرام؛ربي يحبني هلبه وديما ميسرلي اموري حتى وين بعتلي نصيب تاني جاني في راجل زيك انت الله يبارك عليك..والحق خفت من وضعك ومرتك..لكن ربك يسرها وجتني ضرة زايد ناقص عندها راجلها ياخد عليها ولاماياخدش..تصدق طمنتني وقالت ماتخافيش مني واعتبري حسين مش متزوج..ماعندي ماندير بيه..
حسين بصدمه:هي هكي قالت..
اكرام بضحكه:الحق مش هكي بس اني جبتهالك بطريقه حلوة..المهم انها مسلمه فيك ع الاخر..صدمتني الصراحه والله لو كنت مكانها وعندي راجل زيك نحبسه حبس حداي ومانخلي مراة تشبحله حتى الشبح..
حسين كان يسمع في كلامها وهو يشبح في الفراغ ..
وحاس بقلبه موجوع من اللي يسمع فيه...
🍁استنى اكرام لين ترقد..
بعدين مشي لحوش امه...
وتوجه لدار النوم..
فتحها وخش...لقاها مظلمه ونوريه راقده..
خشلها ومش يشوفها عن قرب..
لقاها راقده بالنوم..
قلبه انحرق حرق...قعد يشبحلها شويه..
بعدين مشي طلع من الدار متوجه برا الحوش وهو منقهر ع الآخر..
وقف في الجنان وهو يحاول ياخد النفس.
بعدين مشي لواحد من الكراسي وقعمز عليه..واتكى عليه....وسرح في ماضي بعيد... في احلا ايام عمره....
#حوقلوا
....يتبع
