شكولينا

الجزء الثاني والثلاثين"رحلة غنيمه"

لاخير في عمل يلهي عن الصلاة..
الصلاة اولا ❤
قولوا لاإله إلا الله تفلحوا❤
في منكم هلبه قالوا ان اهل عفاف وقفوا من غير مايعرفوا السبب..
لا هما عارفين وهي حكتلهم...في المشهد اللي جبت فيه منى ولينا يهدرزوا..هي كانت لوطا تحكي لاهلها..بس اني جبت ردة فعل سفيان طول بدون مانعيد نتكلم في المشكله..
راجل عفاف انسان لئيم ومايستحيش..برغم ان عفاف قايماته وقايمه اهله..وهو اغتني من ورا مساعده بوها ليه لكن معاملته ليها كانت اسوأ من معامله سفيان لزهور..
اقل شي سفيان ماكانش يهزا ع اهلها ويتسهوك عليهم ..
وهو فوق الباهي اللي دايرينه معاه ماليها كان وقح ولئيم لأبعد حد..وهما ملاحظين هالشي هدا علاش مايحبوشي..
وكانوا ساكتينله ع خاطر بوهم كان مقدره وهو من النوعيه اللي لما حد يديرلهم قدر يصدقوا ارواحهم ويتعاملوا مع الشخص اللي يقدر فيهم كأنه يدير معاهم في واجبه...
لهدا هما تعاملوا معاه هالمرة بشده بش يتربى..
بغض النظر عن كون عفاف تستاهل ولالا...
🍫🍫🍫🍫🍫🍫🍫🍫🍫🍫🍫🍫🍫🍫🍫🍫
" :باهي...حبيت من قبل...؟!"
فاجئه السؤال بقوة..قعد قلبه وسط ضلوعه يرجف..
الرجفه هني تعني يدق بقوة رهيبه...وكأنه بيطلع منه..
ماقدرش يجاوب طول قعد ساكت..وع وجهه مرسومه ابتسامه خفيفه..
لينا:اسفه كان اطفلت ع خصوصياتك..
هو شد مقدمه الطاقيه اللي لابسها بعدين ساوا نظاراته وقال:علاش سألتيه السؤال هدا؟
لينا:حب فضول خاطري نعرف..
شبحلها..لقاها تشبح القدام وهي مضيقه عيونها ..
رجع شاف القدام وقال بإبتسامه؛ولا مرة..
عقدت حواجبها وقالت:معقوله ولامرة ولامرة حتى اعجاب لا؟
سفيان؛اعجاب ممكن بس يعني اعجاب عادي يعني زي ان يعجبني مستوى ذكاء او مستوى ثقافه او مستوى علمي او شخصيه ناجحه...يعني  شعور اعجاب ممكن نحس حتى اتجاه ابناء جنسي..
لينا؛امم..يعني ولامرة حبيت قبل..
سفيان:ولامرة.
لينا:هو انا مفروض مانستغرب اجابتك..
شبحلها وشبح للطريق وقال:علاش..
لينا:لانك شخصيه متعاليه ومتكبره وغالبا المتكبر يشوف للغير بنظرة دونيه ويحس ان في حد يستاهل منه حتى الاهتمام..
تنهد وقعد ساكت...كلامها واعر بس حقيقه هو كان هكي فعلا..
لينا:زعلك كلامي..
سفيان:تس..خديت عليه..
لينا ابتسمت وقالت:معناها زعلت..تعلم ماتزعل من الحق..بش تحول هالصفه منك الكبر يخليك بروحك..
سفيان:تمام يالينا الحكيمه..
لينا:تهزا براحتك..
سفيان:لا نهائيا مش هازي ع كلامك..كلامك انتي بالذات مستحيل نهزا عليه..
هي حست بشي غريب..نبرة صوت وهو يقول في كلامه الاخير وترتها..طول تجاهلت شن قال وسألاته سؤال طلع معاه بروحه..وممكن عقلها الباطن اللي استغل الحاله اللي هي فيها خلاها يطلع من المكان المحبوس فيه..
لينا:عمرك ماحسيت اتجاه زهور بأي شعور؟
سفيان تبدلت ملامح الابتسامه ع وجهه للضيق وقعد ساكت.
لينا حست روحها لبزت وقالت:نسحب سؤالي..
سفيان:ماقدرتش ع قد ماحاولت..
شبحتله..
سفيان:مانبيش نتكلم عليها بسوء...بالعكس هي كانت قايمتني فعلا  وعمري ماريت منها تقصير..بس الله غالب ماقدرتش ...
لينا:وهي حباتك واجد...وياريتك انت كنت معاها كويس..
سفيان اضايق وقال:باهي خلاص غيري الموضوع...
لينا هزت راسها وقالت:باهي...اسفه..
هو ماباش يرد عليها..
شبحتله ولاحظت من ملامح وجهه انه اضايق هلبه فسرت هالشي ع انه حاس بتأنيب الضمير اتجاه زهور..
اما هو فكان مضايق هلبه منها هي كلامها يدل ع انها مازالت مش حاسباته شي في حياتها...
لو كان يعنيها ع الأقل انه زوجها ماكانتش فتحت معاها موضوع زي هدا وتكلمت عنه عادي وفوقها تلوم فيه ع عدم حبه لزوجته الأولى..
في مراة يهمها زوجها تقوله كلام زي هدا عن مرته الأولى!؟
من كثر مااضايق منها قعد ساكت طول الطريق..
وهي هالصمت خلا النوم يغلبها ورقدت..
شبح جيهتها لقاها راقده..
شبح للطريق وتنهد بإبتسامه بعدين قعد يقول في ابيات شعر تعبر عن حالته...
يافاتنتا بالحب قلبي قد ملك
هل انت من حوا وآدم أم ملك.
عيني اذا نظرت لحسنك سبحت
سبحان من خلق الجمال وجملك
في الحسن بدر انت والأفلاك هم..
هل يستوي في الحسن بدر والفلك؟
شبحلها وقال :وربي احلا حتى من البدر...
ضحك بعدين شبح للمرايه شاف الصغار لقاهم مازال راقدين..ابتسم وشبح للطريق ...
🌺🌺🌺🌺
وبعد طول مسافه..
وصلوا لمنتجع غنيمه السياحي..
سفيان:لينا..لينا...
فتحت عيونها وشبحتله...
سفيان بإبتسامه:نوضي وصلنا..
غيرت عيونها عنه وشبحت القدام ...فجائها المنظر..
ساوت تقعميزتها ومررت نظرها على المكان وقالت بدهشه:ليبيا فيها هك؟!
سفيان:واحلى من هكي..
استاقظت لروحها كيف بانت منبهره هلبه..شبحتله بعدين قالت..سامعه عنها بس ولا مرة شفتها ع الطبيعه..
سفيان؛وهاك شفتيها وحتشوفي الأحلى منها بإذن الله..
هي ابتسمت..بعدين التفتت.لصغارها..ضحكت وقالت..ناضوا..
سفيان وهو يشوفلهم من المرايه:قبلك..
ضحكت وقالت:توحشتكم واجد ياماما..
سفيان:قداش تحبوا الدراما انتم النساوين..
لينا ضحكت وشبحت القدام..
🏵🏵🏵
كانوا كلهم واصلين للاستراحات اللي حجزوها في المنتجع..
خدوا  جنب بعض للرجاله بروحهم والنساوين بروحهم..
مشت الكم ساعه الأولى في ترتيب حاجاتهم اللي جابوهم معاهم...
وبعدين طلبوا الغدي يجيهم وين ماهما...
حور:الخدمات هني حلوة وفي تطور صيفنا العام اللي فات هني..
لينا:حاجه كويسه تشجع ع السياحة الداخليه..
رنده"تي غير شن تعرفي فيها السياحه انتي"
حور ابتسمت مجامله وقالت:امم..
وحده من بنات عمهم:حتى في الشرق في منتجعات حلوة قداش خاطري نمشي غادي..
لينا:ايه صح راس الهلال حاجه خيال
:مشتيلها قبل..
لينا:اها..مرات خويا شرقاويه في اول سنين زواجها عزمونا هلها وعدينا انا وباتي وامي الله يرحمهم..
كلهم باصوات متقطعه؛الله يرحمهم..
ربيعه؛تغدوا وسادكم هدرزة..
سكتوا شويه وهما ياكلوا بعدين اساور قالت..
اساور:زعما يخلونا بعدين نمشوا للشط؟
وجيهه:يخلوكم امال شني علاش جايين حني..
ربيعه؛شدي في ولدك ياوجيهه البنيات خايفات منه..
لينا شدت ضحكتها..ورنده ركزت عليها..
وجيهه بضحكه:لالا مايدير شي المكان هادي محترم هلبه..
عفاف؛نبوا حتى ندهوروا يام معاش نقعدوا محبوسين هني..
عيشه:ان شاء الله نديروه كله غير تغدوا توا..
🏵اما الرجاله فكانوا يتغدوا في مطعم المنتجع وسط جو بحري بإمتياز صوت وصورة وريحه حلوة...
🌺🌺🌺
بعد العصر...
طلعوا النساوين وقعدوا يدهوروا في المنتجع في طريقهم للشط..
لينا كانت تجر في كروسه صغارها وهي تتفرج ع المكان وتشم في ريحة البحر اللي عدلت نفسيتها ومزاجها...
وفي عيون تلاحق فيها بغيره..
هي هالمرة مالبستش عبايه..لبست فستان لونه بنفسجي غامق وعليه شاربه لونها ابيض كريمي...لبسة مستورة وغير ملفته للإنتباه..بس هي اللي كانت ملفته هلبه للإنتباه بجمال ملامح وجهها...ملامج وجهها تختلف هلبه عن ملامح اصحاب البشرة السمراء المعروفه..
ملامح ناعمه وجميله...
ملامح لفتت انتباه واحد من زوار المنتجع شافها وهي ماشيه بالصغار...وجت قدامه لقطه فيها عفاف خدت الكروسه من لينا ومشت بيها ولينا قعدت تمشي وهي شاده القفطان لأنه من طوله يمسح في الوطا..
والشاب مركز معاها ع الآخر..
وصلوا للشط وقعمزوا تحت المظلات اللي مقابلاته....
وقعدوا يتفرجوا ع شباب العيله وهما خاشين يعوموا..
ربيعه:ياحليلي خوتك مايعرفوا يعوموا كان في الغريق..
اساور :لازم كل مشية بحر تقعدي تنقرزي ماما مايصيرلهم شي..
وجيهه:يحفظهم ربي ياربيعه...
ربيعه:آمين..
سلفة وجيهه:مخليه مكانها نوريه..
وجيهه:ايه والله عرس سلفها بدي وزي ماتعرفي عابيين عليها في كل شي..
عيشه:ربي يعاونها ويتمم مناسبتهم ع خير..
هما بأصوات متقطعه:آمين..
بعدين وجيهه التفتت شافت لينا تصور هي وصغارها في السيلفي...
وجيهه:تعالي هني يالينا يشوفك راجلك يديرلك مشكله..
لينا:حاضر....وخدت الكروسه وولت بيهم للطاوله وحطتهم بينها وبين عفاف وقعمزت..
عفاف:نجيني ياربي نجيني..وخدت ياسمين وحطتها في حجرها..
حور:شوفوا سفيان شن يدير في ولد مروان وبنت عفاف.
كلهم شبحوا وين ماتشبح..
اساور بضحكه:تقول شاد فطيمات..
رنده بضحكه:يخوف فيهم..
حور:قاعد مايحبش يعوم قدام الناس..
وجيهه:ايه ياحنه وماتشبحيش فيه كيف قاعد ع الشط مع الصغار..
اساور قعدت تتأمل فيه وهي مبتسمه..
ولينا كانت مركزة عليه وكل مالها يزيد عندها فضول اتجاهه رغبتها في انها تعرفه اكثر باديه تكبر في داخلها..
منى بضحكه:حي مروان تعالق هو وخوك يااساور..
ربيعه؛هادم الزوز في اللعب الصامت مايغلبهم حد عارفتهم بيديرولنا خارقه يخلونا نتعايطوا...
عيشه بضحكه:استهدي بالله وصل ع النبي ياربيعه..
ربيعه:عليه الصلاة والسلام..نخاف منه البحر ياوخيتي نحبه من بعيد لبعيد..
ضحكوا...
عند الرجاله...
عطي سفيان الشريف لبوه ومشي برنا لأمها...
وهو ماشي ليها كانوا عيونه ع لينا كيف تهدرز مع منى ورتيل..
لما قرب منهم نادى...
سفيان؛عفاف..
عفاف التفتت بعدين ناضت ومشتله..
سفيان:شديها وخلي عيونك عليها..
عفاف:حتى انتم ردوا بالكم من البنات..
سفيان:ماتخافيش عليهم..جيبيلي الصغار..
عفاف:هي شويه بس...ومشت ببنتها وجت للكروسه وقالت للينا:سفيان يبيهم..
لينا شبحتلها وقالت؛قوليله يرد بالك..
وجيهه:شن بيصيرلهم مع عمهم..
لينا شبحتلها وقالت:من باب الحرص يااللاي بس..
وجيهه:عمهم حريص عليهم زي عيونه ارفعيهم بنتي ارفعي..
عفاف خدت الكروسه ومشت بيها لخوها..
ولينا تشبح لسفيان وهي مضايقه..
هو حول نظاراته وقال لاخته:خيرها لينا؟!
عفاف:خايفه ع الصغار..
هو شبحلها واشرلها بعيونه غمضهم وفتحهم بمعنى ماتخافيش..
هي ابتسمت..وهي ردلها الإبتسامه ورنده تشوفلهم..
شويه شدت يد حور وقالت:تعالي حويرة شويه.
ناضت هي وياها..
عيشه:وين ماشيات..
رنده:نبوا نتمشوا..
ومشوا وقفوا ع سفيان..
حور تحشمت ورنده قالت:سفيان.
سفيان عقد حواجبه ولبس نظاراته وقال:خير؟!
حور:شن حالك سفيان..
سفيان:الحمد لله..
حور:نحس فيك ماعرفتنيش.
سفيان:لاعرفتك بنت الحاج الشارف..
ابتسمت وقالت:ماشاء الله مازال تزبطني .
رنده:من فيهم ترا..
سفيان:تقريبا حور..
حور بضحكه:مذكرني كويس..
سفيان؛باهي شن تبي رنده؟
رنده:خلينا نوققوا ع الشط شويه بالله عليك..
سفيان؛هوينا عندك راجل بري قوليله هو..
رنده:محمد ماعنداش مانع..
سفيان:خلاص بري..بس خليكم حدانا..
حور:اكيد..
مشي سفيان بالصغار وهما مشوا معاها..
زبيده:كان نلقى حتى اني نطلق رجيلاتي ع الشط..
اساور:نرفعك اني حنينه..
ناضت ومشت لحناها..
ربيعه:خلوكم قباله وردي بالك ع حناك..
اساور:حاضر..
ونوضت حناها ومشوا مع بعض...
والباقي قعدوا يهدرزوا عادي...
بس منى اللي كانت مركزة ع التصرفات الغرببه اللي قاعده تصير ومستغربه برود لينا..
لينا وهي شاده تليفون رتيل؛هدي احلا..
رتيل:خلاص مالا بناخد الشوز هدا مع القفطان..
لينا؛حلو..نتخيل فيك كيف تطلعي فيهن عسل..
ابتسمت رتيل..
لينا:طلة حلوة مناسبه لعمرك بعيد عن لبس بنات هالوقت اللي يكبرن في رواحهن ولبسهن مايستر شي..
رتيل:باهي توا بيقعد شعري كيف نديره..
منى:دير بحث ع التسريحات المناسبه لعمرك..
رتيل:اممم..
لينا غيرت عيونها وشبحت للشط..
شافت سفيان واقف بالصغار وحداه حور ويبان يهدرز هو وياها..
شويه وشافتهم يضحكوا..
حست بشعور غريب..شعور مزعج يطبق الصدر ويوجع البطن..
حولت عيونها عنهم وشافت لأساور كيف تمشي مع حناها وعيونها ع حور وسفيان..
رجعت تشوف لرتيل...بلعت ريقها وصنعت ابتسامه بعد قالت؛ها شن لقيتي..
🏵ع الشط..
عفاف ورنده..
رنده:لاحظتي كيف انسجم معاها طول..
عفاف:تحسيه يجامل فيها..
رنده؛يجامل عينك..
عفاف؛باهي لشن تبي توصلي..
رنده شبحتلها وقالت:اتفقنا اني ونوريه نقربوا مابيناتهم ونخلوا سفيان ياخدها..
عفاف:ولينا..
رنده؛من هي لينا؟
عفاف:شن من هي!؟ مرته...
رنده:مرته اللي حاولت تقرب بينه وبين عمته وقالتلها خوديه مانبيشي!؟
عفاف:ايه هداكا قبل بس توا حاسه علاقتهم ببعض تغيرت معاش زي قبل..
رنده؛شن اللي تغير فيها يعني!؟كل شي واضح حبيبتي..
عفاف سكتت وهي تشبح لخوها وحور..
رنده:نبيك تفتحي معاي الموضوع معاها..
عفاف:مع مني؟!
رنده:هادي لينا..نبيها هي تقنعه ياخد عليها..
ضحكت عفاف..
رنده:نحكي جد لما هي تفتح معاه الموضوع حيوافق طول..
عفاف:رنده انتي معقوله مش ملاحظه سفيان قداش متغير واضح راهو بادي يحبها..
رنده:وهي ماتحباش ياعفاف يعني لعند امتى بيقعد هكي معاش صغير راهو..
تنهدت عفاف وقعدت ساكته..
رنده:هاه شن قلتي؟!
عفاف وهي تشبح للينا هزت راسها بإيجاب..
ع جية اساور:في شن تحكوا..
رنده بإبتسامه مجامله: نهدرزوا عادي..
اساور؛اممم شن الحكايه..واشرت بعيونها ع حور وسفيان..
رنده؛لاحكايه ولاروايه عادي يعني..
اساور هزت راسها وهي رافعه حاجبها..وعفاف تشبحلها بطرف عينها..
••سفيان؛لا مش زي قبل..
حور:امم شكله في هلبه حاجات تغيرت..
سفيان:اكيد حتى قريب15سنه..
حور بآبتسامه:صح..
سفيان تنهد والتفت...شاف لينا طالعه من تحت المظله وهي تتكلم بالتليفون..
عقد حواجبه وقعد يشبحلها..وحور مركزة معاه..
🌺لينا بضحكه:اها والله جو سمح والمكان يهبل..
"يابختك.."
ضحكت لينا..
"لينا يابنت رانا توحشناك واجد تعالي"
تلاشت ضحكتها وهي تقول: مش متحمله نخش البلاد بعدهم...
"الله يرحمهم ويغفرلهم..بس انتي لازم تجي لينا وتاخدي حصتك من الورث "
لينا دموعها طاحوا وهي تقول:انباع خلاص؟
"ايه انباع انباع ياوخيتي..وخوك عبدالله خدا حصته وهله وعدا لطرابلس"
لينا؛بالله!
"والله...قال بيقعد غادي خلاص"
لينا؛وواك...خي ع الدنيا خي..لاقال نتصل بيها ونخبرها لاقال نخطم عليها نشوفها ونشوف عويلتها...خزي عليهم من خوت خزي..
"ايه والله خزي وتفي كل تبع مراته وولوا هله وناسه..حتى هداك بيعدي للشرق مش قاعد هنى.."
لينا مسحت دموعها وقالت:يعدوا...كيف قعدوا كيف عدوا..
"باهي لينو تعالي والله توحشناك اقعدي في بيوتنا يومين تلاته كان تبي مرحب بيك انتي وراجلك "
لينا؛تو تشوف الوضع ونرد عليك..
"باهي..هي مالا مانعطل عليك نخليك تستمتعي بالاجواء السمحه والبحر"
لينا ابتسمت وقالت:بوسيلي البنات وهنو كان جاتك ولاعديتلها..
"يوصل ياحنه يوصل وحتى انتي سلمي ع اللي عنك هي بالسلامه"
لينا: يوصل في امان الله بالسلامه...بالسلامه...وسكرت..
شبحت قدامها..
لقت واحد من بعيد واقف يشبحلها..
طول لفت ومشت وهي منزعجه..لين وصلت في كرسيها وقعمزت..
وجيهه؛من كلمك؟
لينا:اختي امال تسلم عليكم...
💎ومن بعيد سفيان قال لعفاف تمشي ترد الصغار..
وعفاف مشت بالصغار هي والبنات...
والرجاله طلعوا من الميه ومشوا  لإستراحتهم بش يبدلوا..
🌺🌺🌺
وقعدوا ع الشط للعشي جابولهم الخدمات العشي لعندهم...
وتعشوا وسط جو عائلي لطيف نوعا ما...
وبعد العشي ولوا لأستراحتهم بش يرقدوا الصغار..
منى:لعب لين داخ..
لينا:نجيه ياربي..
منى:حتى بوه يكلم فيا وهو مدروخ ..
لينا:عاموا واجد هما..
منى:خسارة قبل خاطري نعوم في الليل..
لينا ابتسمت وهي اطبطب ع بحر بش يرقد..
سكتوا شويه وهما يسمعوا في اصوات ضحك وهدرزة البنات..
منى شبحت للينا وقالت:ملاحظه حور كيف تتلصق..
لينا شبحتلها وقالت:تتلصق!؟
منى:ايه ع اللاي و ع البنات...
لينا؛اقارب يعني علاقتهم ببعض طبيعيه.
منى:انتي هكي شايفه..
لينا شبحت لولدها وهزت راسها بإيجاب..
منى:تمام..خلاص رقد شيرو خلي حتى اني نرقد مادام الحكايه كساد..
تممدت منى جنب ولدها..
ولينا حطت بحر حدا اخته...وكيف جت بترقد بحداهم..
جتها رساله ع التليفون.
قاماته وفتحتها..
(فايقه)
ابتسمت وبدت تكتب بعدين بعتت..
(ايه)
شويه وجاها الرد..
(اطلعي)
هي قعدت تشبح للرساله شويه..بعدين ناضت..
مشت طلعت عبايه ووشاح ولبستهم..
منى:وين يامهون..
لينا وهي تحاول تخفي توترها:سفيان انظر شن يبي.
منى ابتسمت وغمضت عيونها..
ولينا مسحت ع خدها من التوتر بعدين مشت..
طلعت برا..
لقاته واقف من بعيد وهو لابس شورب تلاته ارباع جينز لونه رمادي..وتيشرت ابيض في الرمادي وطاقيه رصاصيه..وفي رجليه سبيدرو ابيض في الرمادي..كان يشبح لتليفونه وكأنه يراجي في الرد...
ابتسمت ومشتله وقفت وراه وقالت:Good evening ..
هو التفت وقال بضحكه:خيرك ماردتيش يا #شكولينا..
لينا؛قلت خل نخلعك ياسافيوش..
ضيق عيونه وقال:مني!؟
لينا:انت تقولي شكولينا انا بنقولك سافيوش..
سفيان:مالقتيش غيره!؟
لينا بضحكه:مافيش غيره وياسرك اعتراضات.
ابتسم وقال:باهي تعالي.
مشي وهي مشت معاه..
سفيان:هاه شن الجو..
لينا:سمح ومريح والنفسيه حلوة.
سفيان:حلو..
قعدوا يمشوا الزوز مع بعض وهما ساكتين لين وصلوا للشط..
سفيان:قعمزي..
لينا ابتسمت وقعمزت ع الرمله..
وهو قعمز جنبها...
سفيان؛شن عجبك المكان..
لينا؛حلو واجد..نفرح وين نشوف مكانات كيف هدين في البلاد..يشجعوا ع السياحه ..
سفيان:ايه..بس يبوا تطوير واهتمام اكثر.
لينا:امم..بالشوي بالشوي وتو يصير منا..بلادنا لو يهتموا بقطاع السياحه فيها تغنينا عن النفط..
سفيان بإبتسامه؛مزبوط...قوليلي انتم في الجنوب شن يميزكم..
لينا:ايييه عد واغلط حاجات واجد..صح طبيعنا جافه وصحروايه بس فيها معالم ومدن عريقه..كيف غدامس متلا..
ونحنا عندنا في سبها معلم تاريخي مشهور يميزنا..
قامت تليفونها وهي تشوف فيه وادور في الصور و تقول..القاهره...قلعه سبها..
ووجهتله الشاشه..
سفيان قعد يشوفلها وقال:ايه شايفها قبل...
لينا:امم حطوا صورتها ع عشرة الجنيه..
سفيان بضحكه:ايه صح..
لينا رجعت التليفون وقالت:هدي كانت وياما شهدت ع حروب ايام الاتراك...وايام طليان وحتى ايام الفرنسيس..وع قد ماصار فيها من حروب ماانهد فيها شي..المهم هي مسجله في اليونسكو...وتابعه لجهاز ادارة المدن التاريخيه.
سفيان:حلو..
لينا؛وحتى عندنا حاجات تانيه تميزنا واهم تنوع ..الجنوب تحسه بلاد بحالها فيها عرب وتبو وطورارق وفيها حتى ناس مجنسه..هدى ليش تلقى عندنا ثقافات واجده...يعني تصور حتى في الاعراس نختلفوا  في العادات والتقاليد...كل قبيله وعرق ليهم عاداتهم..
سفيان وهو منسجم معاها وهي تتكلم بحماس:حلو..
لينا ابتسمت وقالت:تفكرت مهرجان الزي اللي داروه قبل..اهو عنده صوره حتى هما..
وخشت ع الصور وهو يتأمل فيها بإبتسامه..
لينا:شوف..ووجهتله التليفون...هدي بنت اختي خدوجه...لابسه الفجره وعرب الشرق يقولولها العبروق..
سفيان بإبتسامه:الله يبارك..
ابتسمت لينا وغيرت لصورة تانيه؛وهدي بنت خويا اسيل لابسه البدله الصغيره فيها شويه اختلاف عن اللي عندكم..
سفيان؛ربي يحفظها..امها مش سمرا؟
لينا هزت راسها بإيجاب.
سفيان:امم..
وبعدين رجعت التليفون وقالت...وللطوارق زيهم والتبو زيهم
ونحنا عندنا العرب...التريس يلبسوا في الزماله كيف عرب سرت وبني وليد..
سفيان؛اها نعرفها شايفها ع ناس نعرفهم...تجار يجوا لبوي ويتعاملوا معاه..
لينا شبحت للبحر وقالت؛يييه قديش توحشت ايام زمان..واجد..
سفيان؛تبكي نلوحك في البحر..
لينا قعدت تضحك ودموعها في عيونها..
سفيان هو عاقد حواجبه بإبتسامه؛ايوه فكينا من النكد عقاب الليل..
لينا مسحت دموعها وقالت:ايه حقه انت ماتحبش تعوم قدام الناس..
سفيان:من قالك..
لينا؛كلهم قالوها..
سفيان:ايه مزبوط..نشوف فيها مش لايقه...
لينا:باهي وفي الليل والمكان شبه فاضي.
سفيان؛تس في الليل مانعومش مانحبش نعوم في الظلام..
لينا:تخاف..
سفيان؛ومش متحشم نقولها عادي..ايه..
لينا:شكلك تخاف من البحر..
سفيان؛لا ابدا وعادي جدا نعوم ونوصل في العمق..لكن عندي طقوس معينه تقدري تقولي..
لينا سكتت وهي تشوف للبحر..
وهو شبحلها شويه بعدين؛تحبي تقري..
لينا؛لا مانقولك نحب بس عادي يعني كان عجبتني حاجه نقراها..بس مش حاجات.معقده..
سفيان؛امم ذكريني  لما نروحوا عندي روايه حلوة تمشي معاك تو نعطيهالك تقريها..
لينا بإبتسامه:تمام..
سكتوا الزوز وهما يشوفوا للبحر ومش مسموع صوت غير صوت امواجه..
ومن بعيد شويه كانت اساور تشبحلهم وهي مضايقه..
بعدين لفت ومشت وهي تقول:هدا غير ماتبيشي...مال كان تبيه كيف..
ومشت لفت ع الاستراحه ماتبيش تخش وهي مضايقه ومعصبه...
وهي ماشيه سمعت صوت واحد يقول..
"والله.حبي تحشمت من بوها راجل كبير وعزمني ماقدرتش نرده"
هدت مشي...وقعدت تبع في مصدر الصوت لين وصلت فيه وانصدمت وين لقاته محمد راجل رنده.
ولت فيسع قبل يحس بيها وهي مازال تسمع فيه يقول
"غير انتي اصبري عليا شويه تو نلقى طريقه نصرفها بيها انتي بس اصبري"
اساور بصوت منخفض: واطي..
🌺🌺🌺
لينا:امتى يبدا دوامك في الفصل الصيفي.
سفيان؛الاسبوع الجاي..
لينا:باهي بنقولك حاجه..
سفيان شبحلها وقال:قولي..
لينا شبحتله وقالت؛اختي الكبيره عزمتنا انا وياك لبيتها..
سفيان:امم..بس يعني مفروض راجلها هو اللي يكلمني ويعزم.
لينا شبحت للبحر وقالت؛عندك حق تو نقوللها.
سفيان؛استاحشتيهم.
لينا:اكيد..دنيا..
ابتسم وقال: خلاص ع خاطرك نمشوا من غير عزومه...
ضحكت وشبحتله وقالت؛قداش انت عجيب...المتناقضات كلها فيك..نحس في منك زوز مرات..سفيان وسافيوش..
ضحك وقال:اممم...مع الناس كلها سفيان..ومعاك.انتي بس سافيوش..
هي قعدت تشبح لعيونه وحست بيهم وكأنهم يتكلموا من بنظراتهم..
حست بالتوتر وشبحت القدام وضحكت وهي تقول:ايه واضح.
سفيان:شن هو اللي واضح..
لينا شبحتله وقالت؛واضح انك تولي مختلف لما نكونوا مع بعضنا..
سفيان رفع حاجبه وقال:في نظرك شن السبب..
شبحتله وقالت..لأننا اصحاب والاصحاب ديما مع الناس شكل ومع بعضهم شكل..
هو تعكرت ابتسامته ورجع شاف للبحر..
اما هي ناضت وهي تقول:خلاص لازم نولي تو مخليه العويله بروحهم وانا نعسني النوم..
هو تنهد وناض معاها..
وقعدوا يمشوا وهما ساكتين..بس في داخله حديث كله انفعال قاعد ينقال...
"معقوله لهالدرجه مش قادرة ولاماتبيش نفهم...يعني مش واضح عليا هي مش حاسه مني بشي !!؟ ااخ وخلاص..ماليش غير الصبر..".
وصلوا في الإستراحه..
لينا:هي تصبح ع خير..
سفيان:نقصوا المكيف..وماترقدوش من غير غطا.
لينا بإبتسامه؛وحتى انت...
سفيان ابتسم وقال؛تصبحي ع خير...
لينا؛وانت من اهله..ولفت ومشت وهو قعد معاها بعيونه لين خشت ومشي ولى للآستراحه..
🌺بعد وصلت غادي...حولت العبايه والوشاح وقدت حدا صغارها بعدين حطت ع برنامج تطبيق القرآن وقعدت نقرا..
فجأة جتها رساله ع الماسنجر...
كملت وردها في القراءة بعدين فتحت الرساله..
لقت رساله فيها ملصق شكلاطه..
شافت الاسم لقاته مكتوب باللغه الانجليزيه..
سفيان بن عامر..
ضافوا بعض ع الفيس..بس هادي كانت المرة الاولى اللي يتكلموا فيها ماسنجر..
ردت عليه بملصق سمايل راقد...
هو بعتلها..
(تبعتيلي من الحلم)
شدت ضحكتها..وبعتت..
(بنرقد والله)
شويه جتها رساله..
(ارقدي ارقدي دامك مرتاحه ومافي شي شاغلك.ارقدي وخلي السهر للمشغول بالهم)
لينا بدت تحس بشي غريب في تعامله وكلامه وتصرفاته بس كانت تتعمد تتجاهل هالإحساس..
بعتتله..
(تصبح ع خير)
وسكرت النت وحطت التليفون تحت المخده..وغمضت عيونها وبدت تقرا في الأذكار...
🌺🌺🌺🌺🌺
في صباح اليوم التالي..
كانوا كلهم موجودين في مطعم المنتجع رجاله ونساوين..
فهالوقت..
كانوا رنده وعفاف واخدين لينا ع تركينه وفاتحين معاها موضوع حلو بش تستفتح بيه..
لينا؛ان شاء الله..
رنده؛خير خير...حني نبوا نخطبوا لسفيان..
لينا رجعت حست بهداكا الشعور المزعج بس بينت العكس.
لينا ببرود مصطنع؛وانا شن المطلوب مني عدي نخطبله؟!
عفاف؛انتي متقبله شي زي هدا عادي..
لينا؛اساسا انا قتله نهار تبي تزوج عدي تزوج وماتترددش..
رنده؛كويس بكل...اللي نبوه منك انك تجي معانا لما تفتحوا معاه الموضوع..
لينا:شبه فتحته معاه موضوع اساور قبل..
رنده؛حني مانبولاش اساور حني نبوله حور بنت عمتي عيشة.
التفتت لينا وشبحت لحور اللي كانت تاخد في صور سلفي هي والبنات..
بعدين شافتلهم وقالت؛تمام...
رنده؛حلو يعجبوني الناس العاقله اللي زيك..
لينا:وغيره؟!
رنده:بعد المغرب بنمشوا نفتحوا معاه الموضوع وتي روحك..
لينا هزت راسها بإيجاب..بعدين مشت ولت للطاوله..
رنده؛خل نمشي نبشر حور..
ومشتلها وعفاف لحقتها بش تولي تقعمز..
لما وصلوا للطاوله جوهم نساوين يبانوا خمسينيات...
وحده منهم قالت:السلام عليكم..
ردوا السلام وهما مستغربين..
المراة:نقدروا نقعمزوا شويه..
زبيده:تفضلوا تفضلوا..
الزوز قعمزوا وهما يقولوا :يزيد فضلك..
وحده منهم قالت:سامحونا ازعجناكم ع الصبح بس عندكم بنيه هبلت ولدي من امس لليوم يدوي عليها وقالي:اخطبهالي..
كلهم تفاجئوا..ولينا ابتسمت وهي للصبايا العازبات كيف علت ع وجوههم حمرة الخجل.
ربيعه بضحكه؛مني فيهم.؟
المراة مررت نظرها عليه لين ثبتوا ع وحده وقالت؛اهيا..
كلهم انصدموا..
المراة؛هي سميرة مش ليكم قريبتكم ولاصاحبتكم..
كلهم قعدوا يشبحوا للينا اللي كانت مصدومه..
بالذات رنده اللي كانت بطق من غيرتها خصوصا ان نساوين من ذوي البشرة البيضا..
وجيهه بضحكة تعجب:والله شن بنقولك ياوخيتي..انتم جايين تخطبوا في  كنتي..
النساوين انصدموا...وانحرجوا..
وحده منهم:بالله عليك سامحينا..صح مفروض فكرنا فيها..سامحونا..وناضوا الزوز..
زبيده:صار خير يابنياتي خليكم افطروا معانا..
:لاصحتين ع قلوبكم بالله ماتواخدوناش..
وجيهه؛صار خير..
:عن اذنكم...
ومشوا الزوز وهما منحرجات ع الآخر ولينا اكثر منهم..
وجيهه:وين راك ولدهم؟
ربيعه؛وين بيشبحها يعني ع الشط..شن ماهناك كان حني امس!؟
زبيده:عليك اسئله ياوجيهه..
وجيهه؛ماقاصده شي غلط..لكن فكرت لو راجلها يسمع شن يدير..
ع جية راجلها ببحر وهو ينادي فيها تجيه..
ربيعه؛غير تعالى اسمع يامقنزع..
زبيده؛ربيعه!!
ولينا خايفه هلبه وهي ماشيه لسفيان..
سفيان؛خير ان شاء الله!..ومد للينا بحر وهي شداته وقلبها يدق بقوة من الخوف..
ربيعه:تعال اسمع شن صار..
وجيهه؛ربي يهديك ياربيعه..
عيشه:ربيعه بلاهبال..
قربلهم سفيان وهو يقول؛نعم..
ربيعه بضحكه:توا كانوا في هني زوز نساوين بيخطبوا.
سفيان:واني شن علاقتي..
وجيهه:ربيعه..
ربيعه بضحكه:انت الوحيد اللي ليك علاقه قالت ولدها بعتها تخطبله مرتك.
سفيان:كيف!!؟
لينا حست روحها بدوخ من الخوف...مدت بحر لمنى ومنى خداته وهي تشبحلها..
سفيان؛تتسهوكي عمتي!؟
ربيعه؛لاوالله مانتسهوك انشد امك..
وجيهه؛دوة فاضيه ولدي..
هو شبح للينا وقال:تعالي..
ومشي..
لينا:الله يسامحك ياعمتي.
ومشت لحقاته..
زبيده؛تريحتي توا..
ربيعه بضحكه:الله غالب نحبه ونحب نحرقله دمه..
وجيهه  شبحت لسلفتها بضيق..
وبناتها يشبحولها..
اما حور واساور كانوا يلحقوا في لينا وسفيان بعيونهم لين ادرقوا..
••سفيان وهو محتقن من الغضب:وين شافك الزفت هدا..
لينا:وانا نعلم عنه نحنا امس كنا كلنا ع الشط وفي ناس غيرنا..
سفيان؛لبسك امس واليوم مش عاجبني وموضوع الخمار بنبدا نفكر فيه.
لينا؛مش حنلبسه الا بقناعه..
سفيان؛شرع ربي مافيشي قناعه..
لينا؛مش فرض هو..
سفيان؛لافرض..
لينا:مسأله خلافيه.
سفيان :معاش تجادليني..
لينا:لا بنجادلك..شي انا ماليش ذنب فيه ماليكش حق تحاسبني عليه..
سفيان بإنفعال:تسكري فمك وتوا تولي تلبس عبايه وحاجه ع راسك مش ملفت  لونها ..تحركي.
لينا قعدت تشبحله بحده..
سفيان:اني قلت تحركي قدامي هيا..
هي مشت وهي معصبه وهو معاها...
كان النار تصهد في صدره قريب ينجن...
شبح ليدها ..بعدين شدها منها...هي جت بتجبدها هو شد عليها بالقوة..
حبست دموعها في عيونها ماتبيهمش ينزلوا باش ماتبينش حالة من حالات ضعغها في موقف زي هدا...
وصلوا للاستراحه..سحبت يدها منه بقوة وخشت داخل..
وهو لف وشبح جهه البحر...خدي نفس وزفر..بعدين مسح ع وجهه بيده..
شويه وطلعت وقالت بحده:هيا..
سفيان:تكلمي كويس ماطلعيش جنوني..
سكتت وهي تقاوم بقوة بش ماينزلوش دموعها..
لين وصلها وين ماهما مقعمزين ومشي..
مشت قعمزت وخدت ولدها من منى وهما يشبحلوها..
شويه وجي الفطور وبدي يفطروا لكن هي ماهناك ماكلت..
🌺🌺🌺
ومرت الساعات..
وكلهم استمتعوا بالأجواء الحلوة الا هي...
قعدت متنكده النهار كله...والنهار كله معاش شافاته من بعدها..
لعند ماجي وقت المغرب..
كانت مقعمزة ادير لصغارها في شيش حليبهم بش بيمشوا كلهم لصالة المناسبات متاع المنتجع بعد ماطلب منهم مروان يمشوا غادي..
ع خشة رنده..
رنده:زي ماتفاهمنا..
لينا وهي تخض في شيشة الحليب:ماتخافيش متفكره مش ناسيه وحنحاول جهدي بش نقنعه..
رنده:حلو...هي نوضي يراجو فيك.
ناضت لينا وشيش الحليب في يدها وطلعت..
ورنده طلعت وراها...
جوهم سيارات تابعه للمنتجع رفعتهم لمكان الصاله لين وصلولها..
نزلوا ...ومشولها...
لاحظوا ان قدام الصاله في الهواء الطلق كان المنسق بطريقه حلوة وكأنه في حفله..
عفاف بضحكه:شكله مروان بياخد التانيه ودايرها لمنى مفاجأه..
كلهم قعدوا يضحكوا ماعدا منى ولينا اللي كانت مش طايقه روحها..
وجيهه:باهي شن في هني!!؟
شويه وجو زوز عاملات وهما جايبين طاوله متحركه عليها عليها تورته كبيرة...ومكتوب فوقها باللغه الانجليزيه #شكولينا  وجنبها رقم 25...
كلهم شبحوا للينا..
وهي قعدت تشبح للتورته وهي مش مصدقه اللي تشوف فيه عيونها..
انتفضت من الفجعه لما سمعت اصوات الألعاب الناريه..
توجهت انظارهم للألعاب الناريه..
رتيل:عيدك ميلادك لينا..
وحده من بنات عمهم؛وين كانت مدرقه هالرومانسيه ياسفيان..
ربيعه:ريتوا مايطلع منه هالمقنزع..
وجيهه شبحت للينا حستها مصدومه هلبه ومش قادرة تصدق..
حور جت لرنده وقالت:قلتيلي مايحبهاش!؟
رنده قعدت تشبح للينا بحقد وغيظ قريب تموت..
واساور كذلك كانت بطق من الغيره..
منى؛يابختك يالينا..
:هي تعالي خل نغنولك...
"سنه حلوة يالينا.."
وبدوا يغنوا معاها حتى حور..ماعدا رنده واساور..
"سنه حلوة يالينا"
ولينا تسمع واللي تشوف فيه شي تاني.
اذكرت مفاجأة عدنان..وكيف كانت وقتها فرحانه من قلبها.
بس توا حاسه روحها مخنوقه ومصدومه...
اللي يدير فيه سفيان هدا مالاش الامعنى واحد بس..!؟
لالا...مستحيل...الشي هدا مرفوض عندي ومش حنقبله..
مانقدرش نقبله....
مانقدرش..مازال قلبي مسكون..ومايقدرش يحب تاني ..
مستحيل...
هي توا خلاص انحطت تحت خيار انها تسلم بالحقيقه اللي عرفتها..
بس لازم ترفضها...تتجاهلها...تغمض عيونها عنها...
•••••••••
ماشيه بخطوات مترددة بإتجاهه لين وصلت فيه..
سفيان وهو ياكل في طرف شكولاته؛راك تقوليلي قاعده زعلانه..
لينا تصنعت ضحكه وقالت:لالا بكل...شكرا ..
سفيان شبحلها شويه وقال:تفاجئتي ولا..وسألتي نفسك معقوله هدا كله يطلع من نامق الجمري؟!
هي ضحكت ودموعها في محجز عيونها قالت:اها تفاجئت بس مش واجد..طبيعي الاصحاب يديروا لبعضهم مفاجآت كيف هدي..ساوت وشاحها بتوتر وقالت..ذكرتني بأيام المدرسه صحباتي دارولي مفاجأة تشبه هدي ووقتها كنت مضايقه من شي وتغير جوي في اللحظه...ضحكت بعدين قالت..ذكرني بيوم ميلادك ترا..
هو يسمع في كلامها..
حس وكأنه في حد صب عليه ميه مثلجه..
قعد يمضع في الشكولاته ببطء وشاح بالنظر عنها وشبح للبحر وهو يمرر في نظره عليه..
وهي تشبحله بضيق...
بلع اللي ياكل فيه وقال:14\4..
لينا بضحكه؛ايوه صح..خلاص ارجى مني مفاجأة لهداكا الوقت بإذن الله..وهي توا نخليك خليهم حايسين في بحر وياسمينه...شكرا مرة تانيه..
ولفت ومشت وهي مضايفه ع الآخر وحست بقلبها مغموم..
اماهو..
مسح عينه اليسار بسرعه قبل ماتخونه دمعتها..
بعدين غمض عيونه وخدي نفس عميق..وزفر...
بعدين فتحهم ومشي...
وقلبه مكسور لأجزاء مجزئة....
..متى يتشفى منك الفؤاد المعذب
  وسهم المنايا من وصالك اقرب
فبعد ووجد واشتياق ورجفة
فلاانت تدنيني...ولاانا اقرب...

...يتبع....

#صلوا_على_النبي